Ri Ucab Wuj Re Ri Nefi

1 Xcʼulmataj chi aretak ri in, Nefi, xinqʼuis xebintijoj ri wätz, ri ka tat, Lehi, xubij sibalaj jastak chque xukujeʼ. Xubij chi nim ri rutzil ri Ajawaxel rumal e resam ulok pa ri ulew re Jerusalén.

2 Xtzijon chque chrij ri qui cʼululanic aretak e benak puwiʼ ri nimalaj jaʼ. Xutzijoj ri elbal cʼuxaj re ri Dios are xebucolo, y man xejikʼ taj chupam ri nimalaj jaʼ.

3 Y xukujeʼ xtzijon chque chrij ri tasom ulew ri qui cʼamom chic. Xubij chi ri Ajawaxel sibalaj cʼo relbal cʼuxaj chke rumal xujupixabaj chi cujel bic pa ri ulew re Jerusalén.

4 Kastzij xubij areʼ: In wilom jun ilonem. Rumal cʼu riʼ, wetaʼm chi ri Jerusalén sachinak chic u wäch. We tä xujcʼojiʼ chilaʼ pa Jerusalén ri uj cujcäm xukujeʼ.

5 Xubij: Ka rikom cʼäx, tzare ka chʼecom jun tasom ulew, jun chaʼomalaj ulew chquixol ri nicaj chic. Je cʼu riʼ, ri Kajawal Dios u yaʼom u tzij chwe chi we jun ulew cäquechbej ri wijaʼl ri in. Kastzij wi, ri Kajawal u yaʼom waʼ ulew chwe ri in, y chque ri walcʼual che junalic. Xukujeʼ cäyaʼic chque conojel e areʼ ri quecʼam ulok pa nicʼaj ulew chic rumal ri u kʼab ri Kajawal.

6 Cʼu ri in, Lehi, quinkʼalajisaj chrij ri cäpe na je jas u beyal ri cukʼalajisaj chwe ri Uxlabixel ri cʼo wucʼ. Majun winak cäpe ulok pa waʼ ulew we tä ma tä ri Kajawal u cʼamom u be.

7 Je cʼu riʼ, we jun ulew chʼajchʼojarisam chque ri winak ri quebucʼam ulok waral. We tä cäquipatanij ri areʼ, je jas cubij ri takbal ri u yaʼom, we jun ulew tzokopitalic chque. Mawi jumul quekaj na pa qui kʼab ri qui cʼulel, xak xuwi we tä e itzel. Rumal we e itzel ri winak, cäcʼajisax na we uwächulew riʼ rumal quech. Tzare amakʼel tewichim ri ulew riʼ chque ri sucʼumalaj winak.

8 Je cʼu riʼ, banom jun utzalaj noʼj che we ulew chi man etamatal tä u wäch chque ri nicʼaj tinimit chic. We tä quetaʼm, qʼui tinimit quepetic, y cäquinojisaj waʼ ulew chque ri winak. Cʼu we tä jeriʼ, man cʼo tä cʼolbal che ri kechbal.

9 Je cʼu riʼ, nu cʼamom jun tzij. Cubij chque conojel ri winak ri queresaj ulok ri Dios pa ri ulew ri Jerusalén chi we cäquinimaj ri u takbal ri Dios, cäquinimarisaj na quib che ri utzil chuwäch we ulew riʼ. Quechajix na chquiwäch ri nicʼaj tinimit chic. Jeriʼ quecʼojiʼ pa we ulew xak xuwi ri e areʼ. Y we cäquinimaj ri u takbal ri Dios, quetewichix na cho ronojel u wäch we ulew. Man cʼo tä jun winak quequitzuru, mawi jun ri cämajow ri ulew re ri quechbal, xane amakʼel quecʼojiʼ chi pa utzilal.

10 Tzare chiwilampeʼ, we tä cäpe ri kʼij aretak man cäquinimaj tä chic ri u tzij ri Dios cʼäte qui cʼamom chic ri utzalaj tak tewichibal pa u kʼab ri Kajawal, aretak cʼo chic ri quetamabal che u bantajic ri uwächulew y ri qui bantajic conojel ri winak, y quetaʼm conojel ri nimalaj tak mayibal ri u banom ri Kajawal tzpa ri u bantajic ri uwächulew; aretak qui cʼamom ri cuinem chubanic ronojel rucʼ qui cojobal, y cʼo cucʼ ronojel ri takbal tzpa ri u jekbal ri uwächulew; aretak e u cʼamom ulok rumal ri junalic rutzil pa we jun utzalaj tasom ulew; chiwilampeʼ, in quinbij chi we cäpe ri kʼij riʼ, aretak cäquixutuj u wäch ri Lokʼalaj Winak aj Israel, ri kastzijalaj Mesías, ri Esanel Macaj, y ri qui Dios, kastzij wi, ri areʼ cukʼat na tzij paquiwiʼ.

11 Cʼäte cʼu riʼ, cucʼam ulok na juleʼ chic tinimit, y cuyaʼ chque chukʼabil. Cäresaj bic chquiwäch ri ulew re ri quechbal. Te cʼu riʼ, cuban na chi cäquijach quib y chi quesocotajic.

12 Je cʼu tzpa jun ijaʼlil che jun ijaʼlil chic, cätix na sibalaj quiqʼuel, y sibalaj cʼäx cäquiriko. Rumal cʼu laʼ, nu cʼojol, quinrayij chi cänataj chiwe ri ix chi kas quitatabej nu tzij.

13 ¡Chixcʼastajok! ¡Chixcʼastaj pa ri jun nimalaj waram, ri kas areʼ ri u waramil ri xibalba, y chitotaʼ can ri tikom chʼichʼ ri ix u ximom! Are cʼu waʼ ri tikom chʼichʼ ri quebuximo ri calcʼual ri achijab rech quecʼam bic pa ri cʼolbal rech junalic kʼoxomal y chʼikowem.

14 ¡Chixcʼastajok! Chixwalijok cho ri cʼajcʼaj ulew y chitatabej ri u tzij ri i tat ri cäbirbatic. Chanim quiyaʼ na ri u tiojil pa ri joronalaj matzalic mukbal. Chilaʼ majun ajbinel cätzelej ulok. Xaʼ jun, quieb, oxib kʼij, y quinterenej ri qui be conojel ri aj uwächulew.

15 Tzare, kastzij wi ri Kajawal u colom ri wanimaʼ cho ri xibalba. In wilom ri u kʼij, y amakʼel in u kʼalum rucʼ ri kʼabaj re ri u lokʼokʼem.

16 Cʼu quinrayij chi cänataj chiwe quinimaj ri u pixab y ri u kʼatbal tzij ri Kajawal. Kastzij in qʼuetatijinak pa wanimaʼ tzpa ri nabe kʼij.

17 Sibalaj cʼäx u naʼom ri wanimaʼ pa jujun tak kʼij, y nu xim wib rumal co iwanimaʼ. We ne cäpe ri Kajawal i Dios rucʼ ronojel ri royowal chiwij, y quixtastaj na chrij, y cäsach na i wäch che junalic.

18 O we ne cäkaj jun cʼajisabal wächaj piwiʼ ri ix y paquiwiʼ ri iwijaʼlil ri quepe na, o we ne quixsocotajic rumal ri chʼichʼ, y cäpe ri wijaʼl. We ne ri nicʼaj winak chic ri e itzel cäquil na i wäch, y quixcʼam bic je jas u beyal ri u rayibal y ri u kajbal pa u kʼab ri itzel.

19 O nu cʼojol, quinrayij chi waʼ man cäcʼulmataj tä chiwe. Xane chi quixux jun winakil chaʼom y chi cʼo i tokʼob chuwäch ri Kajawal. Tzare chbantajic ri u rayibal areʼ, rumal sucʼ u cholaj che junalic.

20 Cʼu ri areʼ u bim: We quinimaj ri nu takbal, quixnimarisax na che utz cho ri uwächulew. Xane we man quinimaj taj ri nu takbal, quixtastaj na chwij.

21 Wacamic, rech chi cäquicot ri wanimaʼ rumal iwech aretak quinel bic cho waʼ uwächulew, y rech man quinnaʼ tä cʼäx are quinkaj pa ri mukbal, chixwalajok cho ri cʼajcʼaj ulew, nu cʼojol, chixux achijab, chichomaj pa junam rech chi xaʼ jun i chomabal y xaʼ jun iwanimaʼ. Chijunamaj iwib chi pa ronojel rech man quixtzak taj pa qui kʼab ri i cʼulel.

22 Chibanaʼ jeriʼ rech man itzel taj cäcʼajisax i wäch. Xukujeʼ rech man quixrikitaj taj chuxeʼ ri tzʼakat royowal ri ka Dios, cʼä cusach cʼu i wäch, kas cäretzelaj ri i cʼux y ri i tiojil che junalic.

23 Chixcʼastajok nu cʼojol. Chicojoʼ ri atzʼiak re ri tzʼakatisibal. Chitotaʼ can ri tikom chʼichʼ ri ix ximowinak, chixel ulok cho ri kʼekum, y chixwalajok pa ri cʼajcʼaj ulew.

24 Mixcʼululanic chic chrij ri i chakʼ. Nim ri juluwem ri rilom areʼ, y u nimam ri takbal tzpa xujel bic pa Jerusalén. Areʼ jun chacunel pa u kʼab ri Dios. Xujucʼam ulok pa we jun tasom ulew. We tä ma tä xaʼ rumal ri areʼ kastzij uj xujcämic pa ri ulew cätzʼinowic rumal ri wijaʼl. Tzare ri ix xiwaj xicämisaj areʼ. Jeʼ, y kas wi ri areʼ u rikom u cʼäxcʼolil iwumal.

25 Sibalaj quinxej wib, y xukujeʼ quinbirbat chi ri areʼ cäcʼäxcʼobic jumul chic iwumal. Rumal kastzij xitzujuj ri areʼ chi xraj xtakan piwiʼ ri ix. Tzare wetaʼm chi ri areʼ man u tzucum taj cuinem o takanic piwiʼ, xane u tzucum ri u kʼij ri Dios y ri junalic utzilal i wäch ri ix.

26 Cʼu ix wixwitinak chrij rumal kʼalaj ri tzij ri u bim chiwe. Quibij chi co chʼawinak chiwe, y chi xchʼoʼjin iwucʼ ri ix. Tzare chiwilampeʼ ri u cowil u tzij areʼ kas wi ri u cowil ri cuinem re ri u tzij ri Dios ri cʼo rucʼ. Ri jasäch ri quibij oyowal che, are ri kastzij je jas u beyal ri cʼo rucʼ Dios, y ri i chakʼ man xcuin taj xukʼatij ri kastzij. Rumal cʼu ri, xukʼalajisaj rucʼ chukʼabil ri iwetzelal ri ix.

27 Rajwaxic cʼo cʼut ri u chukʼab ri Dios rucʼ cʼä che u takanic chiwe chi quinimaj. Tzare kastzij, man areʼ taj, xane ri Ruxlabal ri Ajawaxel ri cʼo rucʼ, areʼ xujak ri u chiʼ che ri u bixic, y man xcuin taj xutzʼapij.

28 Wacamic nu cʼojol, Lamán, y xukujeʼ ri ix, Lemuel y Sam, y xukujeʼ nu cʼojol ri ix ri kas u cʼojol ri Ismael, chitampeʼ na. We quitatabej ri cubij ri Nefi, man quixsach taj i wäch. Je cʼu laʼ, we quitatabej ri u tzij, quinyaʼ can piwiʼ nu tewichibal, kas ri nabe nu tewichibal.

29 Tzare we man quitatabej tä ri u tzij, quinwesaj bic ri nabe nu tewichibal, kas ri nu tewichibal, y cäcʼojiʼ na puwiʼ ri areʼ.

30 Wachanim cʼut, quinchʼaw awucʼ, Zoram: Ri at kastzij jun rachiʼl ri nu cʼojol, Nefi, che junalic.

31 Ri at sucʼ, rumal cʼu riʼ, cätewichix na ri awijaʼl cucʼ ri rijaʼl ri areʼ. Cʼu ri iwijaʼl ri ix quieb quecʼojiʼ na qʼui kʼij, y quenimarisax na che utz chuwäch we ulew. Xak xuwi we quebux itzel quesocotaj, y quebesax bic che ri utzil chuwäch we ulew che junalic.

32 Rumal cʼu riʼ, we canimaj ri u takbal ri Kajawal, ri areʼ chuchʼajchʼobej we ulew che ri qui chajixic ri aawijaʼl rucʼ ri rijaʼl ri nu cʼojol.