1 Wachanim cʼut ri in, Nefi, quintzijon chrij ri lokʼalaj tzij ri u kʼalajisam in tat chrij ri José, ri xcʼam bic pa Egipto.

2 Kas wi, ri José xukʼalajisaj che ri cäpe na chrij conojel ri rijaʼl. Man cʼo tä nicʼaj chic kʼalajisabal che ri cäpe na nim qui bantajic chuwäch ri xutzʼibaj areʼ. Ri areʼ xukʼalajisaj che ri cäpe na chkij ri uj, y ri kijaʼl ri quepe na. Are waʼ tzʼibam chuwäch ri tak u xak re bronce.

3 Aretak ri in tat xuqʼuis u bixic chrij ri xukʼalajisaj ri José che ri cäpe na, xebuchʼabej ri u cʼojol y ri u mial ri Lamán, y xubij chque: Chitampeʼ, nu cʼojol y nu mial, ri ix kastzij ri u cʼojol y u mial ri nabial nu cʼojol. Quinwaj chi quitatabej ri nu tzij.

4 Kastzij ri Kajawal Dios u bim canok: We tä quinimaj ri nu takbal, quixnimar na che utz cho ri ulew. We tä man quinimaj taj ri nu takbal kastzij quixtastaj chrij.

5 Chitampeʼ, nu cʼojol nu mial. Man quincuin taj quinkajic pa ri mukbal are majaʼ xinyaʼ chic jun tewichibal piwiʼ. Kastzij wetaʼm chi we utz quixtijox pa ri utzalaj be, kas jeriʼ man quijack tä na iwib pa ri be.

6 We tä quixetzelatajic, quinyaʼ can we nu tewichibal riʼ piwiʼ ri ix, chi quesax bic ri itzel cʼokonic pa i jolom, y cäyaʼic paquiwiʼ ri i nan i tat.

7 Je cʼu riʼ, rumal ri nu tewichibal, ri Dios man cuyaʼ taj chi quixsachic. Areʼ cutokʼobisaj i wäch ri ix y xukujeʼ qui wäch ri iwijaʼl che junalic.

8 Xcʼulmataj wi chi cʼäte ri in tat xuqʼuis u bixic chque ri u cʼojol y ri u mial ri Lamán, xtakanic chi xepetic chuwäch ri u cʼojol y ri u mial ri Lemuel.

9 Y xtzijon cucʼ, xubij: Chitampeʼ, nu cʼojol y nu mial, ri ix, kastzij, ri u cʼojol y ri u mial ri ucab nu cʼojol. Kastzij wi, quinyaʼ junam ri tewichibal piwiʼ ri ix je jas xinyaʼ paquiwiʼ ri u cʼojol y ri u mial ri Lamán. Je cʼu riʼ man iwonojel taj quixsachic, xane quetewichix na ri iwijaʼl pa ri qʼuisbal kʼij.

10 Xcʼulmatajic chi aretak ri in tat xuqʼuis u bixic chque ri e areʼ, cʼäte cʼu riʼ, xtzijon chque ri u cʼojol ri Ismael, cʼä chque conojel aj ri rachoch ri e areʼ.

11 Y aretak xuqʼuis u bixic chque ri e areʼ, xtzijon rucʼ ri Sam, xubij: Ri at cattewichixic na, y xukujeʼ ri awijaʼl, jeʼ, cawechbej na ri ulew je jas ri a chakʼ Nefi. Cʼu ri awijaʼl quecʼojiʼ na cucʼ ri rijaʼl ri areʼ. Cʼu ri at catux na je jas ri awachalal, y xukujeʼ ri awijaʼl quebux na je jas ri rijaʼlil areʼ. Ri at, at tewichim rech ronojel ri a cʼaslemal.

12 Y xcʼulmataj chi ri in tat, Lehi, xuqʼuis u bixic chque conojel ri e aj rachoch. Kastzij wi xtzijon jas u beyal ri u naʼom pa ranimaʼ y ri Ruxlabal ri Ajawaxel ri xcʼojiʼ rucʼ. Cʼu aretak xcʼulmataj waʼ, in tat kas riʼj chic, xcamic. Cʼäte cʼu riʼ, xmukic.

13 Xcʼulmataj chi xak xuwi jujun kʼij ocʼowinak ri u cämical, aretak Laman y Lemuel, y ri u cʼojol ri Ismael, xechʼoʼjin wucʼ rumal ri u pixab ri Kajawal.

14 Rumal cʼut, ri in, Nefi xinpixabax chi rajwaxic xintzijon cucʼ jas u beyal ri u tzij ri Kajawal. Rumal kastzij sibalaj nu bim chque, y xukujeʼ in tat aretak cʼä majaʼ xcämic. Qʼui nu bim chic ri tzʼibatal canok chuwäch ri jun chic nu xax tak u xak chʼichʼ, rumal kastzij tzʼibatal chupam mas ojer tak tzij chuwäch ri jun chic nu xax tak u xak chʼichʼ.

15 Quintzʼibaj chuwäch we jun xax u xak chʼichʼ riʼ ri cunaʼ ri wanimaʼ, y xukujeʼ sibalaj lokʼalaj tak tzij ri e tzʼibatal chuwäch ri xax tak u xak bronce. Kastzij wi, cäquicot ri wanimaʼ rumal ri lokʼalaj tzij, y quinchomaj chrij pa nu cʼux. Quintzʼibaj rech cäquetamaj ri walcʼual y cäquil ri utz ri cʼo chupam.

16 Kastzij ri wanimaʼ cäquicotic pa ri jastak rech ri Kajawal, y amakʼel quinchomaj pa nu cʼux chrij ri jastak ri wilom y nu tom.

17 Man rucʼ tä riʼ, pune rumal ri rutzil ri Ajawaxel, areʼ u cʼutum chnuwäch ri nimalaj y mayilaj u banom. Cubij ri wanimaʼ: ¡Ri in itzel winak rumal ri wetzelal! Jeʼ, cäbison ri wanimaʼ rumal ri nu tiojil. Cʼäx cunaʼ ri wanimaʼ rumal ri itzel nu banom.

18 Ri in sutim rumal ri takchibal che mac, ri macaj ri man cʼäx taj quinsubataj chupam.

19 Cʼu aretak quinrayij quinqucotic, cächʼikow ri wanimaʼ rumal ri nu mac. Pune tä jeriʼ, wetaʼm jachin ri cʼul nu cʼux chrij.

20 Ri nu Dios, areʼ in nu toʼom. Areʼ u cʼamom nu be chquixol ri nu cʼäxcʼolil pa ri ulew cätzʼinowic. Ri areʼ in u chajim pa ri tak jaʼ re ri nimalaj jaʼ.

21 Ri areʼ in u nojisam rucʼ ri lokʼokʼebal u cʼux cʼä pa ri qʼuisbal u wäch ri nu tiojil.

22 Areʼ u sachom qui cʼux ri nu cʼulel, cʼä quebirabatic chnuwäch.

23 Kas wi ri areʼ u tom ri nu chʼawem pa kʼij, y u yaʼom chwe ri wetamabal, xcʼutwächinic chnuwäch pa chäkʼab.

24 Cʼu pa kʼij, nu cowim pa nimalaj chʼawem chuwäch. Jeʼ, kastzij nu pakalisam akʼanok ri nu chʼawem. Cʼu xekaj ulok ri angelib y xquiban utzil panuwiʼ.

25 Y puwiʼ ri u xicʼ ri Ruxlabixel, u cʼamom akʼanok nu tiojil cʼä paquiwiʼ ri tak juyub. Y ri in wilom rucʼ ri nu bokʼwäch nimalaj tak jastak. Jeʼ, we jastak riʼ man yatal tä chque ri achijab rech quequilo. Rumal cʼu riʼ xbix chwe chi man quintzʼibaj taj.

26 Kastzij, we in wilom sibalaj nimalaj tak jastak pa u petibal chquixol, y we ri Ajawaxel u tokʼobisam qui wäch ri winakil, ¿jasche cʼut cäraj cokʼic ri wanimaʼ, y ri nu cʼux cäcʼojiʼ pa ri cʼolibal re kʼaxomal? ¿Jasche cäsach u wäch nu tiojil, y quintukaric rumal ri nu cʼäxcʼolil?

27 Y ¿jasche quinyaʼ wib che ri macaj rumal nu tiojil? ¿Jasche quinyaʼ wib pa takchibal che mac, rech chi ri itzel cäcʼojiʼ pa wanimaʼ y cäretzelaj ri jamaril, y ri utzil pa wanimaʼ, y cuban cʼäx che ri nu cʼux? ¿Jasche xpe woyowal cumal ri nu cʼulel?

28 ¡Chatcʼastajok wanimaʼ! Matcʼojiʼ chic pa macaj. ¡Chatquicotok wanimaʼ! Mayaʼ chic cʼolibal che ri u cʼulel ri wanimaʼ.

29 Man cäpe tä chic awoyowal cumal ri nu cʼulel. Mawesaj nu chukʼab rumal ri nu cʼäxcʼolil.

30 ¡Chatquicotok O wanimaʼ! Chatchʼaben che ri Ajawaxel, y chabij: O Wajaw, quinnimarisaj ri kʼij la che junalic. Jeʼ, cäquicot ri nu cʼux umal la, lal nu Dios, ri abäj rech ri nu colotajic.

31 O Wajaw, ¿la quesaj la na nu mac pa nu cʼux? ¿La quintzokopij la pa qui kʼab ri nu cʼulel? ¿La cäyaʼ la chi quinbirbatic chuwäch ri mac?

32 ¡Quinwaj chi cätzʼapix amakʼel ri u chiʼ ri xibalba chnuwäch, rumal cʼut chi xpax ri wanimaʼ; y machʼachʼem nu cʼux! Man cätzʼapij tä la chnuwäch ri u chiʼ ri sucʼumalaj be la, rech quincuinic quinbinic pa ri be re ri lianic, y xukujeʼ rech quinbinic xak xuwi pa ri sucʼumalaj be.

33 O Dios, chinpisaʼ la wij rucʼ ri atzʼiak re ri sucʼalic la. O banaʼ la jun nu be rech quinanimajic chquiwäch ri nu cʼulel. Banaʼ la sucʼum che ri nu be jawiʼ quinbe wi. Man cäkʼataj tä la ri nu be. Xane pacaʼ la ri nu be chnuwäch jawiʼ quinbe wi. Man cäkʼatej tä la nu be, xane cäkʼatej la ri qui be ri nu cʼulel.

34 O Wajaw, cʼul nu cʼux che la, cʼul na nu cʼux che la amakʼel. Man cʼul tä nu cʼux chrij ri nu kʼab, ri nu tiojil, rumal wetaʼm chi itzel u wäch ri jachin ri cʼul u cʼux pa ri kʼab re ri tiojilal. Kastzij itzel u wäch jachin cʼul u cʼux che jun achi, o cubij chi ri tiojil are ri tobal re.

35 Kastzij, wetaʼm chi ri Dios cuyaʼ che apachique winak ri cätaʼ wi che. Jeʼ, ri Dios cuyaʼ na chwe, we utz ri quintaʼ che. Rumal cʼu riʼ, quinyac akʼanok nu chʼawem che la. Jeʼ, quinchʼaw na ucʼ la, nu Dios, ri abäj re ri nu sucʼalic. Kastzij nu chʼabal cäkʼanisaj che la amakʼel, ri abäj we, y ri junalic nu Dios. Amen.