Scriptures
2 Nefi 29


U tas 29

Nicʼaj chi u kʼalajisanem ri Nefi che ri cäpe na; ri Gentilib y ri Biblia; juleʼ chic u xak chʼichʼ; ri tak u tzij ri Dios cäquimulij na quib.

1 Kastzij wi pa ri kʼij riʼ quinban jun mayilaj chac chquixol ri e areʼ, rech quinnatajisaj ri tzij ri nu yaʼom chque ri calcʼual ri achijab, y rech quinlicʼ nu kʼab chucab mul rech quebintzelej ulok ri nu winak, ri e aj ri rachoch ri Israel.

2 Y xukujeʼ rech quinnatajisaj ri yabal tak tzij ri nu yaʼom chawe ri at, Nefi, y che ri a tat, chi cänataj chwe ri awijaʼl y chi ri qui tzij ri awijaʼl quel na bic pa nu chiʼ chque ri e areʼ ri awijaʼl. Cʼu ri nu tzij cätatabex na pa ronojel u xiquin ri uwachulew je jas jun retal chquiwäch ri nu winak ri e aj ri rachoch ri Israel.

3 Y rumal ri nu tzij cätatabex na, qʼui tak Gentilib cäquibij na: ¡Jun Biblia! ¡Jun Biblia! Cʼo chi kucʼ jun Biblia, y man cʼo tä na jun Biblia chic.

4 Tzare, jeriʼ cubij ri Ajawaxel Dios: E conalaj tak winak. Cäcʼojiʼ na cucʼ jun Biblia, y quel na ulok cucʼ pa qui kʼab ri aj Judeyib, ri winak re ri nu yabal tzij ojer. ¿Jas ri maltioxibal cäquiyaʼo chque ri aj Judeyib rumal ri Biblia ri cäquicʼamo pa qui kʼab? ¿Jas cäquibij ri Gentilib rucʼ waʼ? ¿La cäquinatajisaj ri binem, ri chac, y ri cʼäx que ri aj Judeyib, y ri qui sacʼajil chwe aretak xequitijoj ri Gentilib che ri colotajibal?

5 Ri ix, Gentilib, ¿la i natajisam ri aj Judeyib, ri winak re ri ojer nu yabal tzij? Man je tä riʼ. Xane ri ix iwetzelam qui wäch, y man xiwaj taj xequitzelej ulok. Tzare chiwilampeʼ, quintzelej na ronojel waʼ jastak piwiʼ ri ix rumal cʼut chi ri in, ri Ajawaxel, cänataj chwe ri nu winak.

6 O conalaj tak winak, ri ix ri quibij: Jun Biblia, ri uj cʼo kucʼ jun Biblia, y man rajwaxic tä chke jun Biblia chic! ¿La cacʼojiʼ tä lo ixucʼ jun Biblia we tä ma tä cumal ri aj Judeyib?

7 ¿La ma tä iwetaʼm cʼut chi e cʼo juleʼ tak chi tinimit chuwäch ri jun? ¿La ma tä iwetaʼm chi ri in, ri Ajawaxel i Dios, e nu banom conojel winak, y chi quenataj chwe ri areʼ ri e cʼo cho ri tak ulew pa u nicʼajil ri nimalaj jaʼ? ¿La ma tä iwetaʼm chi ri in quintakan pa ri tak caj akʼanok y xukujeʼ cho ri uwächulew iquim, y chi quinyaʼ nu tzij chque ri cacʼual ri achijab, je cʼut, cʼä chque conojel tinimit ri e cʼo chuwachulew?

8 ¿Jasche cʼut quixwixwitic xak xuwiʼ rumal quicʼam jubikʼ chi na che ri nu tzij? ¿La ma tä iwetaʼm chi ri qui kʼalajisabal quieb tinimit cäquikʼalajisaj chiwäch chi ri in in Dios, y chi cänataj chwe jun tinimit xaʼ junam rucʼ jun chic? Rumal cʼu riʼ, quinchʼaw rucʼ jun tinimit xaʼ junam rucʼ jun chic. Y aretak ri quieb tinimit cäquirik quib, ri qui kʼalajisabal ri quieb tinimit cäquimulij na quib xukujeʼ.

9 Are waʼ quinbano rech quincʼut chquiwäch qʼui winak chi ri in xaʼ junam iwir, camic, y amakʼel, y chi quinbij ri nu tzij je jas u beyal ri nu rayibal. Michomaj chi xak xuwiʼ rumal nu bim jun tzij, man quincuin tä che u bixic jun tzij chic. Cʼä majaʼ qʼuisinak ri nu chac, y man cäqʼuistaj tä cʼä pa ri qʼuisbal que ri achijab, mine pa ri kʼij riʼ, cʼä che junalic.

10 Rumal cʼu riʼ, xaʼ rumal chi cʼo iwucʼ jun Biblia, michomaj chi cʼo chupam conojel ri nu tzij. Michomaj xukujeʼ chi man xinban taj chi quetzʼibax juleʼ chic.

11 Ri in in cʼut quintak chque conojel ri achijab, ri e cʼo pa ri relbal kʼij, cʼu ri e cʼo pa ri kajbal kʼij, ri e cʼo pa ri u wiquiakʼab relbal kʼij, je jas ri e cʼo pa ri u mox ri relbal kʼij, y ri e cʼo cho ri tak ulew pa ri u nicʼajil ri nimalaj jaʼ, rech cäquitzʼibaj ri tak tzij ri quinbij chque. Rumal cʼut chi cucʼ ri wuj ri quetzʼibaxic, quinkʼataj tzij paquiwiʼ conojel ri e aj uwächulew chquijujunal je jas u beyal u banom, je jas u beyal ri tzʼibatalic canok.

12 Rumal kastzij quinchʼaw na cucʼ ri aj Judeyib, y cäquitzʼibaj ri nu tzij. Y quinchʼaw na xukujeʼ cucʼ ri aj Nefitas, y cäquitzʼibaj ri nu tzij. Y quinchʼaw na cucʼ ri nicʼaj kʼataj chic re ri rachoch ri Israel, ri e nu cʼamom bic cʼä naj, y cäquitzʼibaj na ri nu tzij. Kastzij cʼut quinchʼaw cicʼ conojel tak tinimit ri e cʼo chuwächulew, y cäquitzʼibaj na ri nu tzij.

13 Cäcʼulmataj cʼu na chi cäcʼojiʼ cucʼ ri aj Judeyib ri qui tzij ri aj Nefitas, y cäcʼojiʼ na cucʼ ri aj Nefitas ri qui tzij ri aj Judeyib. Cäcʼojiʼ na cucʼ ri aj Nefitas y ri aj Judeyib ri qui tzij ri sachinak tak kʼataj re Israel. Y quecʼojiʼ na cucʼ ri sachinak xak kʼataj re Israel ri qui tzij ri aj Nefitas y ri aj Judeyib.

14 Y cäcʼulmataj na chi ri nu winak, ri e aj ri rachoch ri Israel, quemulix na quib pa ri ulew re ri quechbal, y xukujeʼ ri tak nu tzij quemulix quib xaʼ jun. Y quincʼut na chquiwäch ri e areʼ ri quechʼoʼjin rucʼ ri nu tzij y rucʼ ri nu winak, ri e aj ri rachoch ri Israel, chi in ri Dios, y chi xinyaʼ nu tzij che ri Abraham chi amakʼel cänataj chwe ri rijaʼl.