1 Wachanim cʼut, ri in, Nefi, man quincuin taj quintzʼibaj conojel ri xetijox chquixol ri nu winak. Xukujeʼ cʼo na nu chukʼab pa chʼawem chuwäch ri tzʼibanic, rumal aretak jun achi cächʼaw rucʼ ri u cuinem ri Lokʼalaj Uxlabixel, ri u cuinem ri Lokʼalaj Uxlabixel cucʼam bic cʼä pa ri canimaʼ ri calcʼual ri achijab.

2 Tzare, kastzij, e cʼo qʼui winak ri cäquicowirisaj ri canimaʼ chrij ri Lokʼalaj Uxlabixel. Rumal cʼu riʼ, man cʼo tä u cʼo libal chupam ri qui tiojil. Rumal cʼu waʼ, cäquitzak bic sibalaj qʼui ri tzʼibatal canok y cäquilo jacha man cʼo tä qui patan.

3 Tzare ri in, Nefi, nu tzʼibam ri kas je nu tzʼibam, y ri in quinwilo chi nim u patan, y sibalaj nim u patan chque ri nu winak. Rumal cʼut chi ri in quintakej nu chʼawem rucʼ ri Dios cumal e areʼ pa kʼij, y quinchakʼisaj ri nu chʼacat pa chakʼab cumal e areʼ. Y quinchʼaben che ri nu Dios rucʼ cojobal y wetaʼm chi cutatabej na ri nu chʼawem.

4 Y wetaʼm chi ri Dios cuchʼajchʼobej ri nu chʼawem che ri qui chʼecbal ri nu winak. Cʼu ri tzij ri nu tzʼibam ri man cʼo tä nu chukʼab cux na rucʼ sibalaj u chukʼab chque ri nu winak, rumal che we tzij riʼ quequipixabaj rech cäquiban ri utz. Cuban chi cäquetamaj chquij ri qui tat qui mam. Y cätzijon chrij ri Jesús, y quebupixabaj ri winak rech quecojon che ri areʼ, y rech chi cäquikʼiʼo cʼä pa ri qʼuisbal, are ri junalic cʼaslemal.

5 Sibalaj co cätzijon chrij ri mac, je jas ri u kʼalajisabal ri kastzij. Rumal cʼu riʼ, majun winak cäpe royowal rumal ri nu tzij, xak xuwiʼ we tä ri areʼ cʼo ri ruxlabal ri itzel rucʼ.

6 Quinquicotic pa ri kʼalajisanem, quinquicotic pa ri kastzij, y quinquicotic pa nu Jesús rumal ri areʼ resam bic nu cʼux pa ri xibalba.

7 Nu lokʼokʼem ri nu winak, y nim nu cojobal che ri Cristo chi quebinwil na qʼui ri e chʼajchʼoj qui cʼux chuwäch ri u kʼatbal tzij.

8 Nu lokʼokʼem ri aj Judeyib. Quinbij aj Judeyib rumal quintzijon chrij ri e areʼ jawiʼ xinpe wi ri in.

9 Xukujeʼ nu lokʼokʼem ri Gentilib. Tzare kastzij, man cʼo tä majun jachin rucʼ ri cʼo ri cʼulibäl nu cʼux, xak xuwiʼ we quetzelej ulok rucʼ ri Cristo, y queboc pa ri oquibal latzʼ u chiʼ, y quebinic pa ri sucʼum be ri copan pa ri cʼaslemal, y cäquiterenej u binic pa ri be cʼä aretak cäqʼuistaj ri kʼij re ri ka tijowem kʼij.

10 Wachanim cʼut lokʼalaj wachalal, y xukujeʼ ri aj Judeyib, cʼu iwonojel ri aj uwächulew, chitatabej we tzij riʼ y chicojoʼ che ri Cristo. We tä ma tä quixcojon che we tzij riʼ, chixcojonok na che ri Cristo, y we quixcojon che ri Cristo, quixcojon na che waʼ tzij, rumal waʼ tzij are ri u tzij ri Cristo. Ri areʼ e u yaʼom chwe, y quequitijoj conojel winak chi cäquibano ri utz.

11 We man are tä waʼ ri u tzij ri Cristo, chikʼataʼ tzij. Rumal cʼut chi pa ri qʼuisbal kʼij, ri Cristo cucʼut na chiwäch rucʼ cuinem y nimalaj juluwem chi are waʼ kas wi ri u tzij. Cʼu ri ix y ri in cäkatacʼabaʼ kib chuwäch ri u kʼatbal tzij, y quiwetamaj na chi ri areʼ u takom chwe chi quintzʼibaj waʼ jastak, pune tä cʼo nu tukaril.

12 Y quinboʼchiʼj ri Tataxel pa ri u biʼ ri Cristo chi qʼui chkaxol ri uj, we tä ma tä konojel ri uj, cujcolotaj na pa ri rajawibal pa ri nimalaj y qʼuisbal kʼij.

13 Wachanim cʼut lokʼalaj wachalal, iwonojel ri ix aj ri rachoch ri Israel, cʼu iwonojel ri ix aj ronojel ri uwächulew, quinchʼaw chiwe je jas jun ri cächʼaw tzpa ri cʼajcʼaj ulew. Cäkil na kib cʼä are cäpe na ri nimalaj kʼij riʼ.

14 Cʼu ri ix ri man quiwaj taj quicʼam ulok chiwe ri rutzil ri Dios, y man quinimaj taj ri qui tzij ri aj Judeyib, y xukujeʼ ri nu tzij ri in, y xukujeʼ mine ri tzij ri quel bic pa u chiʼ ri Alaj u Chij ri Dios, kastzij wiʼ quinbij chiwe jumul, quinbe na/ Jeriʼ cʼut rumal we tzij riʼ cucʼajisaj na i wäch pa ri qʼuisbal kʼij.

15 Rumal cʼut jas quintʼikij chuwächulew cucʼut na chiwij pa ri kʼatbal tzij. Jeriʼ u takom chwe ri Kajawal, y rajwaxic quinnimaj. Amen.