1 Y wachanim quinchʼaw awucʼ ri at, José, ri nu cʼojol chʼip. Ri at xatalax wi pa ri ulew cätzʼinowic are nu rikom cʼäx. Ri a nan xatralcʼualaj pa ri kʼijal are nu rikom nimalaj nu bisonic.

2 We canimaj ri u takbal ri jun lokʼalaj winak aj Israel, ri areʼ cuchʼajchʼobej we ulew chawe, kas jun ulew jeʼlic u wäch, che ri awechbal y che ri quechbal ri awijaʼl cucʼ ri awätz. Y catcʼojiʼ na cho waʼ ulew pa utzil che junalic.

3 Wacamic José, nu cʼojol chʼip, at nu cʼamom ulok cho ri ulew cätzʼinowic ja ri xinrik wi nu kʼoxom. Catutewichij ri Kajawal amakʼel rech ri awijaʼl man ronojel tä quesachic.

4 Kastzij ri at nu quiqʼuel, y ri in rijaʼl ri José ri xcʼam bic pa qui kʼab ri u cʼulel pa Egipto. Nim ri tzij ri u yaʼom ri Dios che ri José.

5 Ri José kastzij xrilo ri u wäch ka kʼij. Xucʼam jun yabal tzij pa u kʼab ri Kajawal. Xubij chi chquixol ri rijaʼlil ri areʼ, ri Dios cuyac na jun sucʼalaj u kʼab cheʼ che ri rachoch Israel. Man je tä ri Mesías, xane jun chic u kʼab cheʼ ri cätastajic chquiwäch ri nicʼaj chic. Pune tä jeriʼ, cänataj na che ri Kajawal pa ri yabal tzij ri u yaʼom areʼ chi ri Mesías, cucʼut na rib chquiwäch pa ri qʼuisbal tak kʼij rumal ri uxlabal re ri chukʼab chquesaxic pa ri kʼekum cho ri sakil. Kas queresaj ulok chupam ri kʼekum ri man quilitaj taj, y queresaj pa qui kʼab ri u cʼulel jun cʼä pa ri tzokopinic.

6 Kastzij xkʼalajisan ri José, xubij: Ri Kajawal nu Dios cuwalajisaj na jun ilonel. Areʼ coc che jun utzalaj chaʼom ilonel chque ri wijaʼl.

7 Kastzij xubij ri José: Jeriʼ cubij chwe ri Ajawaxel: Quinwalajisaj na jun chaʼom ilonel chquixol ri awijaʼl. Ri areʼ cälokʼokʼex na chquixol ri awijaʼl. Y quinyaʼ na che ri areʼ jun takbal chubanic jun chac rumal quech ri awijaʼl, ri rachalal areʼ. We jun chac cäbanowic nim u patan chque ri awijaʼl. Rumal cʼu riʼ, cäquetamaj ri yabal tak tzij ri nu yaʼom chque ri awatiʼt a mam.

8 Y quinyaʼ na che jun takbal, cächa ri Ajaw, chi man cuban tä mawi jun chac, xak xuwi ri chac ri quintak ri in che. Quinnimarisaj na u kʼij chnuwäch rumal chi cuban na nu chac.

9 Cänimarisax cʼut u kʼij je jas ri Moisés. Ri Moisés riʼ nu bim canok chi quinwalajisaj chixol chquitzokopixic nu winak, ri tinimit aj Israel.

10 Y quinwalajisaj na ri Moisés rech quebucʼam bic, quebutzokopij ri a tinimit pa ri ulew re Egipto.

11 Tzare jun ilonel quinwalajisaj chquixol ri awijaʼl ri at. Y quinyaʼ che ri cuinem chukʼalajisaxic ri nu tzij chque ri awijaʼl. Cʼu man xak tä chukʼalajisaxic nu tzij, cächa ri Ajawaxel, xane rech quecojon che ri nu tzij, ri cäyaʼic chic chque.

12 Rumal cʼu riʼ, ri awijaʼlil quetzʼiban na, y xukujeʼ quetzʼibanic ri rijaʼlil ri Judá. Ri cätzʼibax cumal ri awijaʼlil y xukujeʼ ri cätzʼibax cumal ri rijaʼlil ri Judá queqʼuiyaric xak junam chusachic ri qui noʼj ri man kas taj tijonem y chuqʼuisic ri chʼoʼj. Je cʼu riʼ, cätacʼabax ri utzil chquixol ri awijaʼl. Xukujeʼ pa ri qʼuisbal tak kʼij, cäquetamaj na ri qui banom ri qui tat, qui mam, y cäquetamaj ri yabal tak tzij ri nu yaʼom, cächa ri Ajawaxel.

13 Ri u tukaric cuban na chukʼab che areʼ cäjektajic ri nu chac chquixol conojel nu winak che u tzelejic ri a bantajic ri at, ri rachoch ri Israel, cächa ri Ajawaxel.

14 Y jeriʼ xukʼalajisaj ri José, xubij: Chiwilampeʼ cʼut, kastzij ri Ajawaxel cutewichij na ri jun ilonel riʼ. Y ri e areʼ ri cäcaj na cäquicämisaj, cäsach na qui cʼux. Rumal cätzʼakatisax na ri yabal tzij ri nu cʼamom pa u kʼab ri Kajawal chrij ri wijaʼl. Kastzij, in wetaʼm chi cätzʼakatisax na we jun yabal tzij riʼ.

15 Y ri u biʼ ri ilonel riʼ xaʼ junam rucʼ ri nu biʼ ri in, y xukujeʼ ri u biʼ ri u tat. Ri areʼ cujunamaj na wucʼ in, areʼ ri cuban ri Kajawal rumal ri u kʼab ri ilonel cuyaʼ na ri qui colotajic ri nu winak. Y kas wi cäbantaj rumal ri u cuinem ri Kajawal.

16 Je cʼu riʼ, xukʼalajisaj chrij ri cäpe na ri José: In wetaʼm waʼ xaʼ junam je jas wetaʼm chrij ri yabal tzij rech ri Moisés. Wetaʼm, rumal ri Kajawal u bim canok chwe: Quinchajij ri awijaʼl che junalic.

17 Y u bim ri Ajawaxel: Quinwalajisaj na jun Moisés. Quinyaʼ na ri u cuinem rucʼ jun sucʼum cheʼ. Y quinyaʼ che utzalaj noʼjibal rech cätzʼibanic. Tzare quinkʼatatij na ri rakʼ rech man cächʼaw taj. Man quinyaʼ tä che chi cuban jun nimalaj tzijonel. Xane, quintzʼibaj takbal tak tzij che ri areʼ rucʼ ri kas nu kʼab, y quinsucʼumaj na jun tzijonel chutoʼic.

18 Y xukujeʼ ri Ajawaxel xubij chwe: Quinwalajisaj na jun chquixol ri awijaʼl, y quinsucʼumaj na jun tzijonel, areʼ jun kʼaxal u tzij. Cʼu ri in, chawilampeʼ, ri in quinyaʼ na che chi cutzʼibaj ri qui tzʼibanem ri e aj ri awijaʼlil. Cutzʼibaj waʼ chque ri e aj ri awijaʼlil. Te cʼu riʼ, cukʼalajisaj ri tzijonel chquiwäch ri awijaʼlil.

19 Y ri tak tzij ri cutzʼibaj ri ilonel, are ri tzij ri quinwaj pa ri wetamabal chi quejabux chquxol ri awijaʼl. Y cäbantaj je jas ri awijaʼl e chʼawinak cucʼ pa ri ulew, rumal cʼut ri in wetaʼm ri qui cojobal.

20 Y quechʼaw na pa ri ulew, kas quekʼalajisan na chquiwäch ri cachalal ri qʼuexbal cʼuxaj are ocʼowinak qʼui tak ijaʼlil. Y cäcʼulmataj wi chi ri qui chʼabal cäjabux na je jas u beyal ri kʼalaj qui tzij.

21 Rumal ri qui cojobal, quel na ri qui tzij pa nu chiʼ ri in chque ri cachalal, ri awijaʼl ri at. Y ri qui tzij ri man cʼo taj u chukʼab quinyaʼ na u chukʼabil pa qui cojobal rech cäntaj chque ri yabal tzij ri xinyaʼ chque ri awatiʼt a mam.

22 Kastzij nu cʼojol, José, jeriʼ xukʼalajisaj ri nu tat ojer canok chrij ri cäpe na.

23 Jeriʼ cʼut, rumal we jun yabal tzij, at cattewichixic. Man quesach taj ri awijaʼl, rumal cäquitatabej na ri tzʼibatal can chupam ri wuj.

24 Y cäwalajisaxic na jun nimalaj cuinel chquixol ri e areʼ. Ri areʼ rucʼ ri u tzij y rucʼ ri cubano cuban na ri utzil xukujeʼ. Cux na jun chacunel pa u kʼab ri Dios, y nim ri u cojobal. Rumal cʼu riʼ, cuban na nimak tak mayibal. Utz cäril wi ri Dios che, rumal ri nimalaj utzil cuban na chi cätzelej ulok u banic ri rachoch ri Israel, y chi cätzelej u banic qʼui jastak chque ri quijaʼl ri awätz.

25 Cʼu camic, José, at tewichim. Chawilampeʼ, ri at cʼä acʼal. Rumal cʼu riʼ, chatatabej ri u tzij ri awätz, Nefi, y cäbantaj chawe je jas u beyal ri tzij ri nu bim canok. Chanatajisaj ri u tzij ri a tat ri chanim cäcäm na. Amen.