1 Oi talofa ia te i latou o e e faia tulafono lē amiotonu, ma e e tusia tulafono e oo mai ai faigata;

2 O le tetee ese o e matitiva mai le faamasinosa’o, ma le aveese o le aiā tatau mai i e matitiva o lo’u nuu, ina ia avea fafine ua oti a latou tane ma a latou vete, ma ina ia mafai ona latou faoa e ua oti o latou tamā!

3 Ma o le a se mea tou te fai i le aso e asiasi mai ai, ma le faafanoga o le a oo mai mai le mea mamao? o ai o le a outou sulu i ai mo se fesoasoani? ma o fea o le a outou tuu ai lo outou mamalu?

4 A aunoa ma a’u o le a latou ifo i lalo o ni pagota, ma o le a latou pa’u’ū i lalo o e ua fasia. E ui i ia mea uma e lē liliu ese ai lava lona toasa, ae ua faaloaloa atu pea lona aao.

5 E, Asuria e, le sasa o lo’u ita, ma o le tootoo i o latou lima o lo latou ita tele lea.

6 O le a Ou auina atu o ia e faasaga i se atunuu pepelo, ma o le a Ou tuu atu ia te ia se poloaiga e faasaga i le nuu o lo’u ita, ia ave e ia le vete, ma ave mea e faoa mai, ma soli i latou i lalo e pei o palapala o ala.

7 E ui i lea ua lē faapea lona manatu, pe ua faapea foi le manatu o lona loto; ae o lona loto ia faaumatia ma vavae ese malo e lē toaitiiti.

8 Aua ua fetalai mai o ia: Ua lē o ni tupu ea o’u aloalii uma?

9 Ua lē pei ea Kaleno o Karekimisa? Ua lē pei ea Amato o Arepa? Ua lē pei ea Samaria o Tamaseko?

10 E pei ona faatūina e lo’u lima malo o tupua, ma o ona tupua ta sa sili atu ia i latou o Ierusalema ma Samaria;

11 Pe Ou te lē faia ea, ia Ierusalema ma ona tupua, e pei ona Ou faia ia Samaria ma ona tupua?

12 O le mea lea o le a oo mai foi ina ua faia e le Alii lana galuega atoa i luga o le Mauga o Siona ma luga o Ierusalema, o le a Ou faasalaina le fua o le loto malosi o le tupu o Asuria, ma le faasausili o ona mata faamaualuluga.

13 Ona ua fai mai o ia: O le malosi o lo’u lima ma lo’u poto na ou faia ai nei mea; ona ua ou poto; ma ua ou aveesea tuaoi o le nuu, ma gaoi o latou oloa, ma ua ou faatoilaloina e o nonofo ai e pei o se tagata toa;

14 Ma ua maua e lo’u lima oloa o le nuu e pei o se ofaga; ma e pei ona faaputuina e se tasi fua o manu o totoe, ua faapea ona ou faapotopoto le lalolagi uma; ma sa leai se tasi na sii lona apaau, pe faamaga lona gutu, pe ’i’i.

15 Pe faalialia ea le matau ia te ia lava e faasaga i lē na te ta a’i? Pe faamaualuga ’ea le ’ili ia te ia lava e faasaga i lē na te ’ili a’i? E peiseai e mafai e le sasa ona lūlū atu o ia lava e faasaga ia i latou o e e si’ia i luga, pe e peiseai e mafai e le tootoo ona sii o ia lava i luga e peisea’i e lē o se laau!

16 O lea o le a auina mai ai e le Alii, le Alii o ’Au, i totonu o ona tagata puputa, le pa’e’e; ma o le a faamumūina e ia se mu e pei o le mumū o se afi i lalo o lona mamalu.

17 Ma o le a avea le malamalama o Isaraelu o se afi, ma lona Paia e Toatasi o se apeafi, ma o le a mumū ma o le a susunu ai ona laau talatala ma ona laau tuitui i le aso e tasi;

18 Ma o le a mu ai le matagofie o lona vaomatua, ma lona fanua uluola, o le agaga atoa ma le tino; ma o le a faapei i latou o se tagata ave-tagavai ua matapogia.

19 Ma o laau e totoe i lona vaomatua o le a itiiti, e mafai e se tamaitiiti ona tusi i latou.

20 Ma o le a oo mai i lena aso, o le vaega o totoe o Isaraelu, ma i latou e pei o e ua sao o le aiga o Iakopo, o le a lē toe faalagolago i lē na taiaina i latou, ae o le a faalagolago i le Alii, le Paia e Toatasi o Isaraelu, i le faamaoni.

21 O le a toe foi mai le vaega o totoe, ioe, le vaega lava lea o totoe o Iakopo, i le Atua malosi aoao.

22 Ona e ui ina pei lou nuu o Isaraelu o le oneone o le sami, ae o se vaega o totoe o i latou o le a foi mai; o le faatafunaga ua faatonuina o le a faatumulia i le amiotonu.

23 Ona o le a faia e le Alii le Atua o Au se faatafunaga tele, ua fuafua e oo atu i le laueleele uma.

24 O lea, ua faapea ona fetalai mai o le Alii le Atua o Au: E, lo’u nuu e o e ua nonofo i Siona, aua e te fefe i le Asuria; o le a taia e ia oe i le sasa, ma o le a si’i i luga lona tootoo ia te oe, e pei ona faia e Aikupito.

25 Ona ua toe itiiti lava, ona i’u lea o le toasa, ma lo’u ita i lo latou faafanoga.

26 Ma o le a faaoso a’e e le Alii o ’Au se sasa mo ia e tusa ma le faasauaga o Mitiana i le papa o Oreva; ma e pei ona sa i ai lona tootoo i luga o le sami o le a faapea foi ona sii i luga e ia e pei o le ala na faia ia Aikupito.

27 Ma o le a oo mai foi i lena aso o le a aveese ai lana avega mai lou tauau, ma lana amo mai lou ūa, ma o le a lepetia le amo ona o le faauuga.

28 Ua sau o ia i Aiata, ua sopo atu o ia i Mekerona; ua tuu e ia ana kariota i Mekemase.

29 Ua latou sopo atu i luga o le ala sopo; ua latou api i Kapa; ua fefe Ramata; ua sola Kipea o la Saulo.

30 Ia sii a’e le leo, E, le afafine e o Kali; ia faia ia lagona i Laisa, E, Anatota e.

31 Ua aveese Matemena; o e o nonofo i Kipima ua latou faapotopoto faatasi i latou lava e sosola.

32 Ae o le a nofo pea o ia i Nove i lena aso; o le a lūlū atu lona lima e faasaga i le mauga o le afafine o Siona, le maupu’epu’e o Ierusalema.

33 Faauta, o le Alii, o le Alii o ’Au, o le a ia faagataina le lala ma le mata’utia tele; ma o e e tulaga maualuluga o le a tatuu i lalo; ma o le a faalotomaualaloina e ua faasausili.

34 Ma o le a ta i lalo e ia laau filifili o le vaomatua i le u’amea, ma o le a faapa’ūina Lepanona e se tasi malosi aoao.