1 Ma sa oo i aso o Aasa le atalii o Iotama, le atalii o Usia, le tupu o Iuta, na o a’e ai agai i Ierusalema o Resina, le tupu o Suria, ma Peka le atalii o Remalia, le tupu o Isaraelu, e tau ai le taua ma Iuta, ’a ua lē mafai ona manumalo mai ai.

2 Ma sa ta’u atu i le aiga o Tavita, e faapea: Ua ’au faatasi Suria ma Efaraima. Ma sa gatete lona loto, ma loto o lona nuu, e pei ona luluina laau o le vao i le matagi.

3 Ona fetalai mai lea o le Alii ia Isaia: Alu atu nei e faafetaia’i Aasa, o oe ma Sarasopa lou atalii, i le pito alavai o le lepa aupito i luga i le alatele o le fanua o le fai tamea;

4 Ma fai atu ia te ia: Ia e faaeteete, ma filemu; ’aua e te fefe, pe loto-vaivai ona o ia i’u ’aulama asu e lua, ona o le ita tele o Resina ia Suria, ma le atalii o Remalia.

5 ’Auā ua taupulepule leaga Suria, ma Efaraima, ma le atalii o Remalia, e faasaga ia te oe, e faapea:

6 Ia tatou o a’e ia e faasaga ia Iuta ma faatiga i ai, ma tatou faia ai se osofaiga mo i tatou, ma tofia se tupu i lona taulotoaiga, ioe, le atalii o Tapala.

7 Ua faapea ona fetalai mai o le Alii le Atua: O le a lē tu lava, pe faataunuuina foi.

8 Ona o le ao o Suria o Tamaseko, ma o le ao o Tamaseko, o Resina; ma i totonu o le ono sefulu ma le lima o tausaga o le a lepetia ai Efaraima e lē toe avea o se nuu.

9 Ma o le ao o Efaraima o Samaria, ma o le ao o Samaria o le atalii o Remalia. Afai tou te lē talitonu e moni o le a lē faatumauina outou.

10 E lē gata i lea, sa toe fetalai mai le Alii ia Aasa, e faapea:

11 Ia e ole mai i le Alii lou Atua mo se faailoga; ia e ole mai i mea loloto, po o mea maualuluga i lugā.

12 ’A ua fai mai Aasa: ’Ou te lē ole atu, pe ’ou te tofotofoina le Alii.

13 Ma sa fai mai o ia: Ia outou faalogo mai nei, le aiga e o Tavita; o se mea itiiti ea ia te outou le faatigaina o tagata, ae tou te faatigaina ea foi i lo’u Atua?

14 O lea, o le a tuu mai ai e le Alii lava ia se faailoga ia te outou—Faauta, o le a to se taupou, ma fanaua mai se tama tane, ma o le a ta’u lona igoa o Emanuelu.

15 O le pata ma le meli o le a ’ai e ia, ina ia mafai e ia ona iloa tetee le leaga ma filifili le lelei.

16 Ona ae lei iloa e le tama tetee le leaga ma filifili le lelei, o le laueleele ua e inoino i ai o le a tuulafoaia mai ona tupu uma e lua.

17 O le a aumai e le Alii i ou luga, ma luga o lou nuu, ma luga o le aiga o lou tamā, aso sa lei oo mai talu mai le aso na alu ese ai Efaraima mai ia Iuta, le tupu o Asuria.

18 Ma o le a oo mai foi i lena aso o le a faailo atu ai le Alii mo le lago o loo i le itu pito mamao o Aikupito, ma mo le lagomeli o loo i le laueleele o Asuria.

19 Ma o le a latou o mai, ma o le a latou malōlō uma i vanu tuufua, ma i mavaevae o papa, ma i luga o laau tuitui uma, ma luga o vaovao uma.

20 I lea lava aso e tasi o le a faamamā ai e le Alii i se tafi togi tupe, e i latou o i tala atu o le vaitafe, e ala i le tupu o Asuria, le ulu, ma fulufulu o vae; ma o le a faamamāina ai foi le soesā.

21 Ma o le a oo mai i lena aso, o le a fafaga ai e le tagata se povi fafine taanoa e tasi ma ni mamoe se lua.

22 Ma o le a oo mai foi, ona o le tele o le suāsusu latou te tuuina mai o le a ’ai ai o ia i le pata; ona o le pata ma le meli o le a ’aina e tagata uma o totoe i le laueleele.

23 Ma o le a oo mai foi i lena aso, o le a i ai i mea uma, lea sa iai le afe o vine i le afe o siliva, o le a fai ma laau tuitui ma laau talatala.

24 O le a o mai tagata iina ma ufanafana ma aufana, ona o le a avea le laueleele atoa ma laau tuitui ma laau talatala.

25 Ma o maupu’epu’e uma o le a suaina i le faamalu eleele, o le a lē oo atu i ai le popole i laau tuitui ma laau talatala; ae o le a avea ma mea e ave i ai povi, ma solia e lafu mamoe ma oti.