1 Are cʼu ri camic, quinwaj chi quiwetamaj chi aretak ri in tat, Lehi, xuqʼuis u kʼalajisaxic ri cäpe na paquiwiʼ ri rijaʼlil, ri Ajawaxel xchʼaw che jumul chic. Xubij che chi man utz taj chi ri areʼ, Lehi, quebucʼam bic ri u familia xak qui tuquiel pa ri ulew cätzʼinowic, xane rajwaxic chque ri u cʼojol chi cäquicʼam bic quixokilal, rech quequiwalajisaj quijaʼlil che ri Ajawaxel pa ri tasom ulew.

2 Y xbantajic chi ri Ajawaxel xtakan che ri in tat chi in, Nefi, rucʼ ri wachalal, cujtzelej chi na pa ri ulew re Jerusalén, rech quekacʼam bic ri tat Ismael y ri u familia pa ri ulew cätzʼinowic.

3 Y xbantajic chi in, Nefi, y ri wachalal xujtzelej chic jumul pa ri ulew cätzʼinowic rech cujbec pa Jerusalén.

4 Y xujopan cho ri rachoch ri tat Ismael, y sibalaj jeʼl xujrilo. Jeʼ puch, tza xujcuinic xkatzijobej che ri u tzij ri Ajawaxel.

5 Are cʼu riʼ, ri Ajawaxel xuchʼuchʼujarisaj ri ranimaʼ ri tat Ismael, y ri e cʼo cho ri rachoch. Rumal waʼ, xcaj quebe kucʼ pa ri ulew cätzʼinowic cʼä pa ri u panibal ri in tat.

6 Are cʼu ri uj benak pa ri ulew cätzʼinowic, kas jeʼri Lamán y Lemuel, y quieb u mial ri Ismael, y quieb u cʼojol ri tat Ismael y ri qui familia, xepe coyowal chke, jeʼ, chwe in, Nefi, y che ri Sam, y che ri qui tat, Ismael, y ri rixokil, y chque ri nicʼaj oxib u mial chic.

7 Xcʼulmaxic chi rumal ri coyowal, xcaj xetzelej bic pa ri tinimit re Jerusalén.

8 Y ri in Nefi, nu jikʼam umal rech ri cowilaj tak canimaʼ, y xebinchʼabej ri Lamán y ri Lemuel, xinbij chque: Chiwilampeʼ, ri ix ri wätz, ¿jasche sibalaj co ri iwanimaʼ, y sibalaj ix moy pa i chʼobobal? ¿Jasche rajwaxic chiwe chi in, ri i chakʼ, quixinchʼabej, jeʼ, y quinban ri cʼutbal chiwe?

9 ¿Jasche man oquinak taj ri u tzij ri Ajawaxel pa i jolom?

10 ¿Jasche sachinak pa i jolom chi xiwil jun ángel rech ri Ajawaxel?

11 Kastzij, y ¿jasche sachinak pa i jolom ri nimak tak tokʼob ri u banom ri Ajawaxel chke? Xujutzokopij pa u kʼab ri Labán, y xraj chi xujcuin che resaxic lok ri xax tak u xak chʼichʼ.

12 Kastzij, ¿jasche cʼu sachinak pa i jolom chi ri Ajawaxel cäcuin che u banic ronojel ri jastak chque ri calcʼual ri achijab je jas ri cäcaj areʼ, we quecojon che. Jeʼ puch, chujniman che.

13 Are we cujniman che, cäkechbej na ri tasom ulew. Y quiwetamaj na pa jun kʼij are cäban na ri u bim ri Ajawaxel chrij ri sachbal u wäch ri tinimit re Jerusalén. Xane ronojel jas ri u bim ri Ajawaxel chrij ri sachbal u wäch ri Jerusalén, cäban na.

14 Kas jeriʼ, ri Uxlabal re ri Ajawaxel cuqʼuis na baʼ cucoj u chukʼab cucʼ. Chilwilampeʼ, xane qui xutum ri kʼalajisanelab che ri cäpe na, y xquiqʼuiak bic ri Jeremías pa cheʼ. Y xcaj cäquicämisaj ri in tat, rumal waʼ xanima bic ri in tat pa ri tinimit.

15 Xane umal rech waʼ, quinbij chiwe chi we quiwaj quixtzelej pa Jerusalén, quixcäm ne cucʼ. Jeʼ puch, we quichaʼo, chixtzelejok jelaʼ, y cänataj ri nu tzij chiwe we quixbec, quixcäm na xukujeʼ, rumal je quinutakchij ri Uxlabal re ri Ajawaxel chi quinbij.

16 Are cʼu xbantajic chi in, Nefi, nu bim waʼ tzij riʼ chque ri wachalal, xpe coyowal. Y xinquichapo, kas jeriʼ sibalaj nim ri coyowal. Y xinquixim rucʼ tak colob rumal xcaj quinquicämisaj rech quinquiyaʼ can pa ri ulew cätzʼinowic rech quintijic cumal itzel tak awaj.

17 Xbantaj cʼu waʼ chi xinchʼabej ri Ajawaxel, xinbij: O ri lal Ajawaxel, je jas ri nu cojobal che la, cinesaj la pa qui kʼab ri wachalal. Kas cäyaʼ la ri nu chukʼab rech quintʼokopij ri colob ri ximtal pa nu kʼab.

18 Aretak nu bim we tzij riʼ, kastzij chi xeturtub ri colob che ri nu kʼab y ri wakän, y xintaqʼuiʼ chquiwäch ri wachalal, xebinchʼabej chic jumul.

19 Xbantajic chi xpe coyowal wucʼ jumul chic, xcaj quinquichapo chic, xane jun chque ri u mial ri tat Ismael, jeʼ, xukujeʼ ri u nan, y jun chque ri u cʼojol ri tat Ismael, xechʼaw panuwiʼ cucʼ ri wachaal. Xquichʼuchʼujarisaj ri canimaʼ, y xquitanabaʼ ri qui chukʼab che nu cämisaxic.

20 Tajin xcʼulmaxic chi xoc bis pa canimaʼ rumal ri qui mac, y xexuquiʼc chnuwäch, y xquitaʼ chwe chi quincuyu jas ri xquiban chwe.

21 Xbantajic chi kas sucʼ xincuyu ronojel jas ri xquiban chwe, y xinbij chque chi cäquitaʼ che ri Ajawaxel qui Dios chi cucuy ri qui mac xukujeʼ. Y xcʼulmatajic chi je xquibano. Y aretak xbantaj ri qui chʼawem rucʼ ri Ajawaxel, xkachaplej chic jumul ri ka be ja ri cʼo wi ri u panibal ri in tat.

22 Y xbantajic chi xujkaj ulok cho ri u panibal ri ka tat. Cʼäte cʼu ri in, y ri wachalal, y ronojel ri u familia ri tat Ismael, xujopan pa ri u panibal ri in tat, ri e areʼ xetioxin che ri Ajawaxel ri qui Dios, y xquichiʼj jun tabal tokʼob che, y xquiporoj tak awaj chuwäch.