1 Y xcʼulmatajic chi xkachap chic jumul ri ka be chupam ri ulew cätzʼinowic. Cʼäte riʼ, tza xuje cho relbal kʼij. Y xujbinic, y xkakʼiʼ ri jekʼbal tak cʼäx pa ri ulew cätzʼinowic, y ri kixokilal xcalcʼualaj ri cal chilaʼ.

2 Xujutewichij ri Ajawaxel rucʼ nimak tak tewichibal. Pune tä baʼ xak räx tiʼj xkatijo pa ri ulew cätzʼinowic, ri kixokilal xpe sibalaj u pam ri qui tuʼ chque ri cal, y xecowiric, je jas ri achijab. Y xquichaplej xquikʼiʼo ri be, y man xewixwit taj.

3 Y jeriʼ coc pa ka jolom chi ri u takbal ri Dios quenimax na. Y we ri calcʼual ri achijab queniman che ri u takbal ri Dios, areʼ quebutzuku, y cuyaʼ ri u chukʼab chque rech cäquinimaj ri u takbal ri u takom ulok chque. Y are je xuban waʼ kucʼ, ri Ajawaxel xuyaʼo jas ri rajwaxic chke aretak xujcʼojiʼ pa ri ulew cätzʼinowic.

4 Y xujcʼojiʼ chilaʼ qʼui junab, kastzij, wajxakib junab pa ri ulew cätzʼinowic.

5 Y xujopan chupam ri jun cʼolbal ri xkayaʼ u biʼ wächinel ulew che umal rech ri sibalaj tak uwo cheʼ, y ri qui cäb wonon. Y ri Ajawaxel xuban can waʼ ronojel rech man cujcäm taj. Y xkil ri nimalaj jaʼ ri xkayaʼo ri u biʼ Irreántum che, cubij sibalaj jaʼ.

6 Y xcʼulmatajic chi xkacoj tak ri ka panibal chuchiʼ ri nimalaj jaʼ. Pune tä baʼ ka chʼijom y ka jikʼam ri sibalaj tak cʼäx. Jeʼ, sibalaj e qʼui ri man cujcuin tä che u tzʼibaxic, sibalaj xcuʼbiʼ ka cʼux, y xujquicotic aretak xujopan chuchiʼ ri nimalaj jaʼ. Yxkacoj u biʼ wächinel ulew che ri cʼolbal, rumal ri sibalaj u wäch ri cheʼ.

7 Y xcʼulmatajic chi cäte ri in, Nefi, cʼolinak chic qʼui kʼij pa ri jun cʼolbal u biʼ wächinel ulew, xpe baʼ puch ri u chʼabal ri Ajawaxel chwe, y xubij: Chatwalajok pakal cʼä puwiʼ ri juyub. Y xcʼulmatajic chi xinwalaj bic, y xinpakiʼ puwiʼ ri juyub, y xinban ri chʼawem rucʼ ri Ajawaxel.

8 Y xcʼulmatajic chi ri Ajawaxel xinuchʼabej, y xubij chwe: Caban na jun nim jucub je u sucʼ jas ri quincʼut chawäch, rech chi ri in quebincʼam bic ri a winak puwiʼ we jaʼ riʼ.

9 Y xinbij che: Ajawaxel, ¿ja quinbe wi che u rikic ri chʼichʼ ri rajwaxic quintzaco chque tak ri nu chacubal che u banic ri nim jucub je jas ri u sucʼ ri cʼutum la chnuwäch?

10 Y xcʼulmatajic chi ri Ajawaxel xubij chwe jawiʼ quinbe wi che u rikic ri chʼichʼ che u banic ri nu chacubal.

11 Cʼäte riʼ, xbantajic chi ri in, Nefi, xinban nicʼaj xutʼibal kʼakʼ rucʼ qui tzʼumal awaj che u xutʼuxic ri kʼakʼ. Y cʼäte xbantaj wumal ri xutʼibal kʼakʼ, xben pa kʼij quieb abäj, ri jun cho ri jun chic, che resaxic kʼakʼ.

12 Xane nabe canok, ri Ajawaxel man u yaʼom taj chi cäkaban ri kʼakʼ pa ri ka be chupam ri ulew cätzʼinowic. Areʼ xubij: In quinbano chi ri i wa utz, y qui quinaʼ u tijowic rech man rajwaxic taj quitzaco.

13 Y xukujeʼ in quinux che ri i chäj pa ri ulew cätzʼinowic. Y quinban u banic ri be chiwäch we amakʼel quinimaj ri nu takbal. Are je baʼ puch, we quinimaj ri nu takbal, quixcʼam bic cho ri tasom ulew, y quiwetamaj na chi ri in quixincʼam bic.

14 Je puch, y xubij ri Ajawaxel xukujeʼ: Aretak ix opaninak chic cho ri tasom ulew, quiwetamaj na chi in ri Ajawaxel, in ri Dios. Y chi in, ri Ajawaxel, xixinwesaj pa ri sachbal i wäch. Kastzij chi in xixinwesaj bic pa ri tinimit re Jerusalén.

15 Je puch, in, Nefi, quinsacʼajinic che u nimaxic ri u takbal ri Ajawaxel, y quebinpixabaj ri wachalal rech quesacʼajinic che ri u nimaxic.

16 Y xcʼulmatajic chi xinban ri nu chacubal rucʼ ri chʼichʼ ri xinwesaj che ri abäj, y xintzaco.

17 Y aretak xquil ri wätz chi in quinkaj che u chapic u banic jun nim jucub, xquichap jun jasjatem chwij, xquibij: Ri ka chakʼ moxirinak. Cuchomaj areʼ chi cäcuin che u banic jun nim jucub, jeʼ, xukujeʼ cuchomaj chi rucʼ ri jucub cukʼaxaj ri nimalaj jaʼ.

18 Y jeriʼ xejasjatic ri wätz chwij, y man xcaj taj quechacunic, rumal xquichomaj chi man quincuin tä in che u banic jun jucub. Y man xecojon taj xukujeʼ chi ri Ajawaxel xucʼutu chnuwäch jas ri u sucʼ ri cäban che.

19 Are wacamic, xcʼulmatajic chi ri in, Nefi, xinchap u jikʼaxic umal rech chi xquicowirisaj ri canimaʼ, y xquilo chi xinbixonic. Jerxbecab pa ri canimaʼ cʼä chi xequicot chwij, xquibij: Ketaʼm chi at man catcuin taj che u banic jun jucub, xane ketaʼm chi man cʼo tä a noʼj che u banic jun nimalaj chac.

20 At, je xaʼ junam rucʼ ri ka tat, at cacʼam u be rumal ri moxalaj tak u chomanic ri ranimaʼ. Jeʼ, uj resam bic pa ri tinimit re Jerusalén, y uj wacatinak pa waʼ ulew cätzʼinowic, pa qʼui tak junab riʼ. Y ri kixokilal e chacuninak pune e yawab chic. Y e areʼ e qui yaʼom acʼalab pa ri ulew cätzʼinowic, y qui chʼijom conojel ri cʼäx xak xu cäraj ri cämical. Y cäraj ne are mas utz chque we tä xecäm jelaʼ are majaʼ elinak bic pa Jerusalén, chi cäquikʼiʼ ri waʼ cʼäx.

21 Kas jeriʼ qʼui junab ka kʼiʼom ri cʼäx pa ri ulew cätzʼinowic, y ronojel tak waʼ junab mas utz ka banom rucʼ ri ka jastak y ri ulew ri kechbem canok we tä uj cʼo jelaʼ. Jeʼ cäraj ne xujquicot jelaʼ.

22 Y ketaʼm chi ri tinimit ri cʼo pa ri ulew re Jerusalén e utzalaj tak winak, rumal ri areʼ qui nimam ri u pixab ri Ajawaxel, y ronojel ri u takbal, je ri u takbal ri Moisés. Je puch chi ketaʼm chi e areʼ jun sucʼalaj winak, y ri ka tat Lehi xukʼat tzij paquiwiʼ, y xujresaj bic ri uj umal rech chi xkacoj ri u tzij. Kastzij chi xak junam ri ka chakʼ rucʼ. Y areʼ je tak ri qui tzij ri wätz ri quewixwit chkij.

23 Cʼäte riʼ, xcʼulmatajic chi in, Nefi, xebinchʼabej y xinbij: ¿La quicoj ix chi ri ka mam katiʼt, ri ralcʼual ri Israel, xebesax bic pa qui kʼab ri aj Egipcios, we man xecojon tä che ri u pixab ri Ajawaxel?

24 ¿La kastzij quichomaj ix chi xecuinic xquesaj quib pa ri cʼäx, we tä ma tä ri Ajawaxel u takom bic ri Moisés chquesaxic chupam?

25 Cʼut, iwetaʼm chi ri ralcʼual ri Israel xecʼojiʼ che jun cʼäxalaj patanijic. Y xyaʼic sibalaj chac chquij rumal. Iwetaʼm chi jeʼlic xquilo chi xebesax chupam ri cʼäx patanijic.

26 Xukujeʼ, iwetaʼm chi xtakan che ri Moisés rumal ri Ajawaxel chi cuban na ri jun nimalaj chac. Y iwetaʼm chi rumal ri u tzij, xujak rib ri quiäk nimalaj jaʼ jeriʼ y jelaʼ, y ri winak xquikʼaxaj chcakän pa ri chakiʼj ulew.

27 Xane iwetaʼm chi ri aj Egipcios, e areʼ ri ajchʼoʼjab rech Faraón, xejikʼ can chupam ri quiäk nimalaj jaʼ.

28 Y xukujeʼ iwetaʼm chi ri ralcʼual Israel xetzuk rucʼ maná pa ri ulew cätzʼinowic.

29 Jeʼ, y ri ix iwetaʼm xukujeʼ chi ri Moisés, rucʼ ri u tzij, je jas ri u cuinem ri Dios ri cʼo rucʼ, xukʼosij ri u wäch ri abäj y xel ulok ri joron rech ri ralcʼual ri Israel cäquiqʼuis ri chakiʼj qui chiʼ.

30 Y pune xcʼam qui be, xnabej ri Ajawaxel ri qui Dios, y qui Colonel chquiwäch, xucʼam qui be pa kʼij, y chakʼab xuyaʼ chque ri qui chäj, y xuban chque ronojel jas ri rajwaxic che ri achi chi cucʼamo, xquicowirisaj ri canimaʼ, xesorinic y xeyokʼowic che ri Moisés y che ri kastzij cʼaslic Dios.

31 Y xcʼulmatajic chi xusach qui wäch je jas ri u tzij. Je jas ri u tzij, xucʼam qui be, y je jas ri u tzij xebutoʼ che ronojel ri jastak. Y man cʼo tä jas ri xbanic ri man rucʼ tä ri u tzij.

32 Y cʼäte riʼ chi xquikʼaxaj ri nimaʼ Jordán, areʼ xuyaʼo chque qui chukʼab che cocotaxic ri winak ri e cʼo pa ri ulew, jeʼ, xequijacho qui wäch cʼä pa ri sachbal qui wäch.

33 Are cʼu ri camic, ¿la quichomaj ix chi ri alcʼualaxel re ri tinimit riʼ ri xecʼojiʼ pa ri tasom ulew, y ri xequiak bic jelaʼ cumal ri ka mam, la quichomaj chi e utz tak achijab? Chiwilampeʼ in quinbij chiwe chi are tä riʼ.

34 ¿La quichomaj chi ri ka mam tza xtokʼobisax mas qui wäch chque ri winak ri e cʼo pa ri tinimit, we tä ri e areʼ mas e sucʼum? In quinbij chiwe chi man are taj.

35 Chilwilampeʼ, ri Ajawaxel quebulokʼokʼej ri ralcʼual xaʼ junam. Y jachin ri sucʼumalaj achi, areʼ cätokʼobisaj u wäch rumal ri Dios. Xane chiwilampeʼ, we tinimit riʼ u xutum ronojel ri u pixab ri Dios, y tza xjekʼic pa ri canimaʼ ri qui mac. Y ronojel ri royowal ri Dios xpe cucʼ. Y ri Ajawaxel xucʼajisaj ri uwächulew chque areʼ, y xebutewichij ri ka mam. Kastzij, xucʼajisaj u wäch ri ulew che retzelaxic, y xebutewichij ri ka mam xquechbej na.

36 Chiwilampeʼ, ri Ajawaxel xuban ri ulew rech cäpokʼic u wäch. Y xebubano rech ri ralcʼual cäquechbej na.

37 Y cuwalajisaj ri utzalaj tinimit, y cusach qui wäch ri itzel tak tinimit.

38 Cucʼam qui be ri colomalaj tak winak cho ri jeʼlicalaj tak ulew, y cusach qui wäch ri itzel tak winak, cäretzalaj ri ulew che areʼ.

39 Cäjawin pa ri chilaʼ chicaj, rumal are u tʼuyulibal, y waʼ ulew, are ri tacʼalibal ri rakan.

40 Y quebulokʼokʼej ri e areʼ ri quecojon che, chi areʼ Dios. Chiwilampeʼ, areʼ culokokʼej ri ka mam, y xuyaʼ u tzij chque, kastzij rucʼ Abrahán, Isaac y Jacob. Y xunataj che ri u tzij ri u yaʼom, y xeresaj bic pa ri ulew re Egipto.

41 Y rucʼ ri u chʼamiʼ xebusucʼumaj jelaʼ pa ri ulew cätzʼinowic, rumal chi xquicowirisaj ri canimaʼ je jas ri xiban ix. Are cʼu riʼ, ri Ajawaxel xebuyaʼ pa ri cʼäx umal rech ri qui mac. Xebutak ulok chquij ri itzelalaj tak cumätz ri querapapic rucʼ kʼakʼ. Y cʼäte xeticʼ cumal, xuyaʼo ri qui cunabal rech quebutziric. Are waʼ ri kas rajwaxic ri cäquibano xaʼ chi quecaʼyic, xane rumal chi are nojim u banic, y man cʼäx taj, sibalaj qʼui xecäm chque.

42 Y cʼo jujun tak mul xquicowirisaj ri canimaʼ, y xquixutuj ri Moisés, y ri Dios xukujeʼ. Je baʼ puch, iwetaʼm chi rucʼ ri u cuinem ri man cʼo tä junamaxic, xecʼam bic cho ri tasom ulew.

43 Are cʼu ri camic, cʼäte riʼ bantajinak chic juntir jastak, xopan ri kʼij are xquetzelaj quib. Kastzij, we ne xchakʼan ri itzel pa canimaʼ puwiʼ ri qui mac, y man wetaʼm taj chi rajne xak jubikʼ cäraj rech cäsach qui wäch pa we kʼij riʼ. Jeʼ, ri in kas wetaʼm chi cäpe na ri kʼij aretak cäsach qui wäch, xak xu jujun quecʼam bic pa ri qui kʼab ri qui cʼulel.

44 Rumal waʼ, ri Ajawaxel xtakan che ri in tat chi quel bic pa ri ulew cätzʼinowic, y ri aj Judeyib xquirayij u cämisaxic. Jeʼ, y ri ix xirayij u cämisaxic xukujeʼ. Jeʼ, rumal waʼ pa ri iwanimaʼ, ix cämisanelab, y ri ix je jas ri e areʼ.

45 Chanim quixpe che u banic ri macaj, y sibalaj nojim cänataj chiwe ri Ajawaxel i Dios. Iwilom jun ángel, xtzijon iwucʼ. Kastzij xita ri u chʼabal chi jujun tak mul. Y areʼ chʼawinak iwucʼ rucʼ jun chʼuchʼujalaj alaj u chʼabal, xane sachinak chic pa i jolom ronojel ri utzalaj chomanic. Rumal waʼ xbantajic chi man xita tä chic ri u tzij, umal rech chi rajwaxic areʼ xuban jun u chʼabal je jas ri cäkuljaʼ ri xcuinic xusalabaj ri ulew, je tä ne xpakʼinic.

46 Y iwetaʼm chi rucʼ ri u chukʼab ri nimalaj u tzij, cäcuinic cusach u wäch ri ulew. Jeʼ, y ri ix iwetaʼm chi rucʼ ri u tzij cäcuinic cuban lianic che ri juyub, y ri juyub che ri lianic. ¿O, jasche, puch, sibalaj i cowirisam ri iwanimaʼ?

47 Kas umal iwech, cärak ri wanimaʼ in che ri bisonem, y ri uwo nu cʼux cäkʼoxowic. Quinxej wib chi amakʼel quixesax bic jelaʼ. Chiwilampeʼ, ri Ruxlabal ri Dios xinunojisaj chi jerxa ri nu tiojil, man cʼo tä chic u chukʼab.

48 Y xcʼulmatajic chi cʼäte ri xinbij waʼ tzij, xpe coyowal chwe, y xcaj xinquiqʼuiak bic cʼä chuxeʼ ri nimalaj jaʼ. Xane aretak xepe chnuchapic xebinchʼabej y xinbij chque: Pa ri u biʼ ri Ronojel Cuinel Dios, quintakan chiwe chi man quinichap taj, xane cʼo ri u cuinem ri Dios wucʼ, cʼä ja ri cäqʼuis wi ri nu tiojil. Jachin ri cucoj u kʼab chwij cächakiʼj na je jas jun chakiʼj patzʼan. Y cäquis na areʼ cho ri u cuinem ri Dios, rumal are ri Dios cäsokow na.

49 Y xcʼulmatajic chi ri in, Nefi, xinbij chque chi man xquewixwit tä chic chrij ri qui tat. Xukujeʼ man cäquijicʼ tä quib che nu toʼic, xane u bim ri Dios chwe chi quinban na jun nim jucub.

50 Y xinbij chque: We ri Dios in u takom che u banic ronojel ri jastak, in quincuinic quinbano. We cubij chwe chi quinbij che we jaʼ riʼ: Chabanaʼ ulew, cuban na ulew. Y we je quinbij, je cʼu riʼ cäban na.

51 Je puch, we ri Ajawaxel cʼo ri nim u cuinem, y u banom sibalaj tak mayibal chquixol ri calcʼual ri achijab, ¿jasche, quichomaj chi man cäcuin tä cucʼutu chnuwäch chi quinban jun jucub?

52 Y xcʼulmatajic chi in, Nefi, xinbij sibalaj jastak chque ri wachalal cʼä chi xsachtaj qui cʼux, y xecuin taj quinquichʼoʼjij. Xquixej quib che u walajisaxic qui kʼab chwij. Man xinquichap rucʼ jun u wiʼ qui kʼab, che qʼui kʼij. Y man xquicʼachʼ tä chic. Xquiban waʼ rumal xquixej quib chi quesach qui wäch chnuwäch in. Y sibalaj cʼo u chukʼab ri Ruxlabal ri Dios. Y jeriʼ xkaj chquiwäch.

53 Y xbantajic chi ri Ajawaxel xubij chwe: Chayukuʼ chic ri a kʼab chquiwäch ri awachalal, y man cäsach tä qui wäch ri qui tiojil chawäch, xane in sibalaj quebinsalabej, xcha ri Ajawaxel, y quinban na waʼ rech cäquetamaj chi in ri Ajawaxel qui Dios.

54 Y xcʼulmatajic chi in xinyuk ri nu kʼab chquiwäch ri wachalal, y man xesach tä qui wäch chnuwäch. Xane are ri Ajawaxel xebusalabej je jas ri u tzij u bim canok.

55 Y ri e areʼ xquibij: Kas xketamaj chi camic cʼo ri Ajawaxel awucʼ, rumal ketaʼm puch chi are u cuinem ri Ajawaxel ri xujusalabej. Y xetzak chwakan che nu kʼijilaxic. Xane ri in man xinwaj taj, y xinbij chque: Ri in iwachalal, kastzij, ri in i chakʼ. Are je puch, chikʼijilaj ri Ajawaxel i Dios y chinimarisaj qui kʼij ri i nan, i tat, rech naj cukʼiʼ ri i cʼaslemal cho ri ulew ri yaʼom chiwe rumal ri ulew ri yaʼom chiwe rumal ri Ajawaxel i Dios.