Scriptures
1 Nefi 1


Ri Nabe Wuj Rech Ri Nefi

Ri Rajawinic Y Ri U Chac

Jun tzʼibatal canok chrij ri u bantajic ri Lehi, y ri rixokil, y ri cajib u cʼojol, are ri qui biʼ (cächapletaj rucʼ ri nabial cʼä ri qʼuisbal quech) Lamán, Lemuel, Sam y Nefi; ri Ajawaxel cubij che ri Lehi chi quel bic cho ri ulew re Jerusalén, rumal ri areʼ cukʼalajisaj chque ri winak chrij ri qui mac, y ri winak cäcaj cäquicämisaj; ri areʼ cäbinic oxib kʼij pa ri ulew cätzʼinowic cucʼ ri ralcʼual y ri rixokil; ri Nefi cucʼ ri rätz, questzelejic pa ri ulew re Jerusalén chucʼam bic ri tzʼibatal canok che jujun junab que ri aj Judeyib; ri qui tzijom canok chrij ri qui cʼäxcʼol; ri areʼ quecʼuliʼc cucʼ ri u mial ri Ismael; quebel pa ri ulew cätzʼinowic cucʼ ri quixokilal y ri calcʼual; ri cʼäx y ri kʼoxom ri cäquirik pa ri ulew cätzʼinowic; ja ri quebe wi; quebopan chuchiʼ ri nimalaj jaʼ. Ri rätz ri Nefi quecʼululan che; ri areʼ cusach qui cʼux y cuban jun nim jucub; cäquiyaʼ u biʼ che ri ulew, wachinel ulew cäquikʼaxaj ri nimalaj jaʼ cʼä xebopan pa ri tasom ulew, y cʼo nicʼaj jastak chic xquibano; are waʼ je jas ri u tzʼibam ri Nefi, utz na quinbij chi ri in, Nefi, xintzʼibaj we tzʼibatal canok che jujun junab.

U tas 1

Ri ilonem ri xril ri Lehi chrij jun bolobic kʼakʼ, y ri wuj re ri kʼalajisabal che ri cäban na; cukʼalajisaj can nabe chi cäsach na u wäch ri Jerusalén, y ri u petibal ri Mesías; ri aj Judeyib cäcaj cäquicämisaj areʼ.

1 In, Nefi, xinalaxic cucʼ utzalaj in tat, nu nan. Rumal waʼ, xintijox che ronojel ri retamabal ri in tat. In rikom sibalaj cʼäxcʼolil chupam ri nu cʼaslemal. Pune tä jeriʼ, in sibalaj tokʼobisam nu wäch rumal ri Kajawal ronojel nu kʼij. Kastzij ri Dios u yaʼom chwe nimalaj etamabal y utzil, y xukujeʼ sibalaj jastak re ri Dios ri man e kʼalajisam tä chi sak. Rumal cʼu riʼ, quintzʼibaj jas nu banom pa ri nu cʼaslemal.

2 Jeʼ, kas quintzʼibaj ri bantajinak canok, quintzʼibaj pa ri u chʼabal ri in tat. Chupam riʼ, cʼo wi ri quetamabal ri aj Judeyib, y ri qui tzijobal ri aj Egipcios.

3 In wetaʼm chi kastzij ri quintzʼibaj, y kas quintzʼibaj rucʼ nu kʼab in, y quintzʼibaj je jas ri u cholaj ri wetamabal.

4 Xcʼulmataj cʼut chi are xchaptaj ri nabe junab rech ri rajawinic ri Sedecías, ri ajawinel re Judá (ri in tat Lehi xcʼojiʼc pa Jerusalén ronojel u cʼaslemal), pa ri junab waʼ, xebopan qʼui kʼalajisanelab che ri cäpe na. Xquikʼalajisaj chquiwäch ri winak chi we man cäquiqʼuex taj qui cʼux che ri qui mac, ri nim tinimit re Jerusalén cäsach na u wäch.

5 Cʼäte riʼ, xbantajic chi ri in tat Lehi, are xel bic cho ja, xuban chʼawem rucʼ ri Dios kas rucʼ ronojel ranimaʼ. Xubano rech quetokʼobisax qui wäch ri u winak.

6 Xcʼulmatajic chi are tajin cuban ri u chʼawem rucʼ ri Dios, xkaj ulok chuwäch jun bolobic kʼakʼ ri xtaqʼuiʼc puwiʼ jun abäj, y sibalaj qʼui ri xrilo y ri xuto. Rumal ri jastak ri xrilo y xuto, sibalaj xbirbatic y xuxej rib.

7 Cʼäte xcʼulmataj waʼ, xtzelej cho ri rachoch pa Jerusalén. Xuqʼuiak rib cho u chʼat. Man xuchʼij tä ri u chukʼab ri Uxlabixel y ri jastak ri xrilo.

8 Y aretak kʼiʼtajinak chic rumal ri u chukʼab ri Uxlabixel, xcʼam bic che jun ilonem. Chilaʼ xrilo chi ri caj xujak rib y xuchomaj chi xril ri Tataxel, chi cʼo pa ri u tʼuyulibal sutim rij cumal qʼuialaj angelib ri tajin quebixon che ri Dios y cäquikʼijilaj u wäch.

9 Y xcʼulmataj chi xrilo jun ri xkaj ulok pa ri caj, y ri u juluwem nim na cho ri kʼij pa nicʼaj kʼij.

10 Y xukujeʼ xril chi xterenexic cumal nicʼaj e cablajuj. Y ri qui julquenic nim na cho ri tak chʼimil ri e cʼo cho ri caj.

11 Y xekaj ulok, xebe cho ri uwächulew. Xopan ri nabe, xtaqʼuiʼ chuwäch ri in tat, y xuyaʼ jun wuj pa ri u kʼab. Xutak che u siqʼuixic u wäch.

12 Y xcʼulmataj chi are cätajin cusiqʼuij u wäch ri wuj, ri Uxlabixel sibalaj xoquic pa ri ranimaʼ.

13 Xusiqʼuij u wäch ri wuj, xubij: ¡Ay, ay chawe Jerusalén! In wilom ri nimak tak a mac. Kastzij, ri in tat xusiqʼuij u wäch ri wuj che ri jastak chrij ri Jerusalén, chi ri winak aj Jerusalén cäsach na qui wäch, chi qʼui quecäm na pa u wiʼ chʼichʼ, y chi qʼui quekaj na pa qui kʼab ri qui cʼulel jelaʼ pa jun tinimit, Babilonia u biʼ.

14 Xcʼulmataj cʼut chi are ri in tat u siqʼuim chic u wäch ri wuj, y rilom ri nimak tak mayibal jastak, xurak u chiʼ, xubij qʼuialaj tak tzij che ri Kajaw je waʼ tzij riʼ: ¡Sibalaj nimak y mayibal tak u banic ri chac la, O Kajawal Dios, lal sibalaj Cuinel! Ri nim tʼuyulibal la cäpakiʼ cʼä chicaj. Ri cuinem la, y ri utzil la, y ri esabal cʼux la cäquijach quib paquiwiʼ conojel ri winak cho ri ulew. Rumal rech chi sibalaj quel cʼux la, man cäyaʼ tä la chi cäcäm jun chque ri quepe chwäch la.

15 Are u sucʼ waʼ ri u tzij ri in tat chunimarisaxic u kʼij ri u Dios. Ri ranimaʼ xcʼojiʼc pa quicotemal, y ronojel u cʼux xnojisax rumal quech ri jastak ri xrilo, kas ri cʼutum chuwäch rumal ri Kajaw.

16 Camic ri in, Nefi, man quintzʼibaj tä ronojel ri xutzʼibaj ri in tat, rumal e sibalaj ri jastak ri xutzʼibaj chrij ri xrilo pa tak ri ilonem y ri xrachicʼaj. Xukujeʼ xutzʼibaj qʼui jastak ri xukʼalajisaj chrij ri cäpe na y ri xubij chque ri ralcʼual, tzare man quintzʼibaj tä riʼ conojel.

17 Xak xu quintzʼibaj na ri nu banom in pa ri nu kʼij. Quintzʼibaj na jubikʼ chrij ri tzʼibatal che jujun junab ri xuban ri in tat, y quintzʼibaj na waʼ cho tak jujun u xak chʼichʼ ri xinban rucʼ nu kʼab in. Cʼäte cʼu riʼ, quintzʼibaj na che ri xbantajic pa ri nu cʼaslemal in.

18 Rumal waʼ, quinwaj chi ix quiwetamaj chi cʼäte ri Kajaw u cʼutum chic waʼ nimalaj jastak chuwäch in tat, Lehi, chrij ri sachibal u wäch ri Jerusalén, xel bic chquixol ri winak che u kʼalajisaxic ri cäpe na, y xukujeʼ chrij ri xrilo y xuto.

19 Xcʼulmatajic baʼ chi ri aj Judeyib xquitzeʼj u wäch ri in tat rumal ri jastak ri xukʼalajisaj chquiwäch. Kas xtzijon cucʼ chrij ri quetzelal y ri qui mac. Y xuyaʼ can chque ri u kʼalajisabal che ri xuto y ri xusiqʼuij pa ri wuj ri kas sak cubij chrij ri u petibal ri Mesías, y xukujeʼ ri esabal macaj que conojel ri winak.

20 Aretak ri aj Judeyib xquita waʼ, xpe coyowal rucʼ je xquiban chque ri ojer tak kʼalajisanel che ri cäpe na ri xexutux cumal, y ri xebuk che abäj, y xecämisaxic. Ri e areʼ xukujeʼ xquitzucuj in tat rech cäquicämisaj. Xane cʼut in, Nefi, quincʼut na chiwäch chi ri Dios quel u cʼux chquij conojel ri e u chaʼom rumal ri qui cojobal. Cuyaʼ qui chukʼab rech cäquitzokopij quib.