1 Xbantajic chi cʼäte bininak chi ulok pa ri ulew cätzʼinowic cʼä ja cʼo wi ri ka tat, kastzij xquicot ri ranimaʼ, y xukujeʼ ri nu nan, Saríah, sibalaj xquicotic rumal kastzij chi u jikʼam rumal kech.

2 Xuchomaj areʼ chi uj cäminak pa ri ulew cätzʼinowic. Xukujeʼ xchʼachʼat chrij ri in tat. Xubij chi areʼ jun ilonel, xubij: Chawilampeʼ at uj awesam ulok che ri ulew re ri kechbal, y ri wal e sachinak chic, y ri uj cujcäm na pa ri ulew cätzʼinowic.

3 Y are je u sucʼ ri u chʼachʼatem ri nu nan ri xubij chrij ri in tat.

4 Xcʼulmax cʼut chi ri in tat xchʼaw rucʼ, xubij: In wetaʼm chi in jun ilonel. We tä ma tä jeriʼ wilom ri jastak rech ri Dios pa jun ilonem, man xinwetamaj tä ri rutzil ri Ajawaxel, xincanaj canok pa ri Jerusalén cucʼ ri wachalal rech quincäm na cucʼ jelaʼ.

5 Xane chawilampeʼ, kas yaʼom chwe jun tasom ulew, y cäquicot ri wanimaʼ rumal riʼ. Kas jeʼ, in wetaʼm chi ri Kajawal quebutzokopij na ri kalcʼual cho ri u kʼab ri labän, y kas quebutzelej na ulok chke pa ri ulew cätzʼinowic.

6 Y rucʼ we tak tzij riʼ, ri in tat, Lehi, xucuʼbisaj u cʼux ri nu nan umal kech aretak uj benak pa ri ulew cätzʼinowic cʼä pa ri tinimit re Jerusalén che u cʼamic ulok ri tzʼibatal che ri qui banom ri Judeyib.

7 Are cʼu xujopan pa ri u panibal ri in tat, sibalaj xequicotic, y xcuʼbisax u cʼux ri nu nan.

8 Y ri areʼ xchʼawic, xubij: Camic in kas wetaʼm chi ri Ajawaxel u takom ri wachajil chi quel bic pa ri ulew cätzʼinowic. Kastzij in wetaʼm chi ri Ajawaxel xebuchajij ri wal. Xebutzokopij cho ri u kʼab ri Labán, y xuyaʼ ri u cuinem chque rech cäquiban je jas ri xtakan chque. Jeriʼ u sucʼ ri u tzij ri nu nan.

9 Xcʼulmaxic chi sibalaj xequicotic y xquichiʼj tabal tokʼob che ri Kajaw, y xquiporoj tak awaj chuwäch. Xquimaltioxij che ri Dios re Israel.

10 Y cʼäte u maltioxim che ri Dios re Israel, ri in tat xuchap ri tzʼibatal che jujun junab ri cʼo retal cho ri xax tak u xak chʼichʼ bronce, y xebunicʼoj cʼä ja cächaptaj wi.

11 Xrilo chi cʼo ri job wuj rech ri Moisés, jawiʼ cubij wi jas ri u sucʼ xbanow ri uwächulew, y xukujeʼ ri u tzijol ri Adán y ri Eva, ri nabe ka nan ka tat.

12 Xukujeʼ cʼo ri qui tzijol ri Judeyib tzpa ri tiquiritajic cʼä pa ri u chaplexic ri rajawibal ri Sedecías, ri rajaw ri Judá.

13 Xukujeʼ ri tak kʼalajisabal che ri cäpe na que ri nabe lokʼalaj tak kʼalajisanelab cʼä pa ri u chaplexic ri rajawibal ri Sedecías. Xukujeʼ cʼo qʼui tak kʼalajisabal che ri cäpe na rech ri Jeremías chupam.

14 Xcʼulmataj cʼut chi ri in tat xukujeʼ xurik cho ri xax tak u xak chʼichʼ bronce ja cäpe wi ri u sucʼ ri rijaʼlil u mam. Rucʼ waʼ, xretamaj chi areʼ rijaʼl ri José. Kas areʼ ri jun José ri xcʼayix can pa Egipto. Areʼ ri u cʼojol ri Jacob ri xcolotajic rumal ri u kʼab ri Ajawaxel rech cucol ri u tat y ri e cʼo cho rachoch che jun nim wijaʼl.

15 Y xukujeʼ xebesax ulok cho qui kʼab ri aj Egipcios rumal ri jun Dios ri xecolow canok.

16 Je cʼu riʼ ri in tat xurik ja xpe wi ri rijaʼlil. Ri Labán xukujeʼ jun rijaʼl ri José. Rumal waʼ ri Labán y ri u mam qui cʼolom ri tzʼibatal che jujun junab.

17 Y are cʼu ri in tat xril conojel we jastak, kas xpe ri Uxlabixel rucʼ che u kʼalajisaxic ri cäpe na chrij conojel ralcʼual.

18 Xubij chi ri xax tak u xak chʼichʼ bronce quebec an pa conojel tak cʼolbal, xinak, chʼabal y tinimit ja quecʼojiʼ na ri rijaʼl.

19 Rumal waʼ, xubij chi ri xax tak u xak chʼichʼ bronce mawi jumul cäsach tä na u wäch. Mawi ri kʼij o ri junab cutzʼiloj na ri u wäch. Y xubij qʼui kʼalajisabal che ri cäpe na chquij ri rijaʼl.

20 Y xcʼulmatajic chi cʼä camic ri in tat y ri in ka nimam ri u takbal ri Ajawaxel ri u yaʼom chke.

21 Y cʼo chic pa ka kʼab ri tzʼibatal che jujun junab ri u takom ulok chke, y xkanicʼoj ronojel u wäch, y xkilo che sibalaj rayibal qui wäch. Kastzij sibalaj lokʼ chkawäch uj rech chi cujcuinic cäkacʼol ri u takbal ri Ajawaxel chque ri kalcʼual.

22 Rumal waʼ, are riʼ je jas u chomabal ri Dios rech cäquicʼam ulok kucʼ pa ri ka binem cho ri ulew tzʼinowinak cʼä pa ri tasom ulew.