1 Are je baʼ, in, Nefi, quinyaʼ tä na ja ri cäpe wi ri ijaʼlil que nu mam cho waʼ cʼolbal re ri nu tzʼibatal che jujun junab. Mawi jumul quinyaʼ na waʼ cho we xax u xak tak chʼichʼ ri quintzʼibaj, rumal are cʼo chupam ri tzʼib che jujun junab ri u cʼolom ri in tat. Rumal wa, man quintzʼibaj tä riʼ che we jun chac.

2 Utz cäkaj chnuwäch chi xak quinbij chi ri uj rijaʼlil José.

3 Y man rajwaxic taj chwe chi quintzʼibaj conojel ri jastak re ri in tat, rumal man cuyaʼ cätzʼibaxic cho we xax tak u xak chʼichʼ. Rajwaxic chwe waʼ cʼolbal che u tzʼibaxic ri jastak re ri Dios.

4 Ri quinrayij, are waʼ chi quinyaʼ tzij pa qui jolom ri achijab rech quekeb ri e areʼ cho ri Dios re Abrahán, re Isaac, y re Jacob, rech cäquicol quib.

5 Rumal riʼ, man quintzʼibaj tä na jas cäkaj chquiwäch ri winak rech ri uwächulew, xane ri cäkaj chuwäch ri Dios, y chquiwäch ri winak ri man e rech taj ri uwächulew.

6 Are je waʼ, quintak na chque ri wijaʼlil chi man cäquitzʼibaj tä cho we xax tak u xak chʼichʼ ri man cʼo tä u patan chque ri calcʼual ri achijab.