1 Xcʼulmataj cʼut chi ri in, Nefi, xintzelej cho ri u panibal ri in tat cʼäte xintzijon rucʼ ri Ajawaxel.

2 Xcʼulmatajic chi areʼ xtzijon wucʼ, xubij chwe: Xinwachicʼaj chi ri Kajawal xinutako chi ri at cucʼ ri awätz quixtzelej na pa Jerusalén.

3 Chawilampeʼ, cʼo pa u kʼab ri Labán ri tzʼibatal che jujun junab chrij ri aj Judeyib, y xukujeʼ ri tzʼibatal chque ri qui biʼ ri awijaʼlil. Waʼ jastak e cʼo cho ri u xak tak chʼichʼ.

4 Rumal waʼ, ri Kajawal xtakan chi ri at cucʼ awachalal quixbec na cho ri rachoch ri Labán rech quitaʼ ri tak tzʼibatal riʼ, y rech quicʼam ulok waral pa ri ulew cätzʼinowic.

5 Areʼ cʼu ri awätz quewixwitic, y tajin cäquibij chi ri in quintaʼ chque jun cʼäxalaj jasäch, xane man in taj ri cutaʼ waʼ, kas are ri u takanic ri Dios.

6 Rumal riʼ, jat nu cʼojol, y ri Kajawal catutoʼ na rumal at man xatwixwit taj.

7 Cʼäte cʼu riʼ, ri in, Nefi, xinbij che ri in tat: Quinbe na, quinban na jas ri xutako ri Kajawal, rumal in wetaʼm chi man cuyaʼ tä areʼ u takbal chque ri calcʼual ri achijab we tä ma tä u sucʼumam nabe jun beyal rech cäbantajic ri jasäch ri xtakic ulok chque.

8 Xcʼulmatajic chi sibalaj xkaj chuwäch in tat ri xinbij che, rumal areʼ xretamaj chi ri Kajawal in u tewichim.

9 Cʼäte cʼu riʼ, ri in, Nefi, cucʼ ri wätz, xkacʼam ri ka panibal y xkachap ka binem pa ri ulew cätzʼinowic, xujbec cho ri ulew re Jerusalén.

10 Xcʼulmatajic chi are xujopanic pa Jerusalén, ri in, cucʼ ri wätz xkachʼabej kachbil kib.

11 Y xkachaʼ chkaxol jachin ri cäbec cho ri rachoch ri Labán. Ri Lamán xchaʼic, y xbec cho ri rachoch ri Labán. Y ri Lamán xtzijon rucʼ areʼ tʼuyulic chupam rachoch.

12 Ri Lamán xutaʼ che ri Labán ri tak tzʼibatal ri e tzʼibam pa ri u xak tak chʼichʼ bronce ri cʼo ri qui biʼ ri rijaʼlil ri in tat chquiwäch.

13 Xpe royowal ri Labán, y xresaj bic ri Lamán chuwäch. Man xraj taj cuyaʼ ri tak tzʼibatal che. Rumal riʼ, xubij che: Ri at, at jun elakʼom, y kas catincämisaj.

14 Xane ri Lamán xanimaj chuwäch ri Labán, xubij chke jas u banom ri Labán. Rumal riʼ, sibalaj xujbisonic, y ri wätz xcaj xebec pa ri ulew cätzʼinowic.

15 Xane in xinbij chque: Cʼas ri Dios je jas ri uj cʼaslic y man cujtzelej tä na rucʼ ri ka tat we majaʼ ka banom jas ri xujutak ri Kajawal.

16 Rumal waʼ, chkanimaj ri u takbal ri Kajawal. Joʼ ja cʼo wi ri rechbal ri ka tat. Chilaʼ xuyaʼ can u kʼän puak, ri u sak puak, y ri u kʼinomal. Y jeriʼ u banom areʼ rech cunimaj ri u takbal ri Kajawal.

17 Ri areʼ retaʼm chic chi ri Jerusalén cäsach na u wäch rumal ri quetzelal ri winak.

18 Are jewaʼ, ri areʼ xquixutuj ri qui tzij ri kʼalajisanelab che ri cäpe na. We tä ri in tat canajinak pa Jerusalén cʼäte u takom ri Kajawal chi quel bic pa ri tinimit, kas areʼ cäcämic xukujeʼ. Rumal riʼ, rajwaxic che chi quel bic pa we ulew riʼ.

19 Chiwilampeʼ cʼut, takal chke cäkarik ri tak tzʼibatal riʼ rech cäkacʼolo ri qui chʼabal ri ka nan ka tat chque ri kalcʼual.

20 Y xukujeʼ rech cäkacʼolo ri qui tzij ri lokʼalaj tak kʼalajisanel che ri cäpe na. We tzij riʼ yaʼom chque rumal ri Uxlabixel y ri u cuinem ri Dios tzpa xchapletaj ri uwächulew, cʼä wacamic.

21 Jeriʼ u cholaj ri nu tzij ri xinyaʼ chque ri wätz rech cäquicoj qui chukʼab chunimaxic ri u takbal ri Dios.

22 Xcʼulmatajic cʼut chi xujbec cho ri ulew re ri kechbal, xkacʼam lok ri ka kʼän puak, ri ka sak puak, y conojel ri jeʼlalaj ka jastak.

23 Cʼäte ka mulim chic we jastak riʼ, xujtzelej bic cho ri rachoch ri Labán.

24 Xujoc bic cʼä ja cʼo wi ri Labán, y xkataʼ che chi cuyaʼ chke ri tzʼibatal che jujun junab ri e tzʼibam cho ri xaxalaj u xak tak chʼichʼ bronce. Xkachiʼj che u tojbal ri ka kʼän puak, y ri ka sak puak, y ri jeʼlalaj tak ka jastak.

25 Xcʼulmataj chi are xril ri Labán chi cʼo qʼui jastak kucʼ, xurayij u wäch ri jastak. Rumal riʼ, xujresaj bic, xtakan chque ri u pataninelab chi cujquicämisaj rech cäresaj ka kʼinomal.

26 Xcʼulmataj cʼut chi ri uj xujanimaj chquiwäch ri u pataninelab, xkayaʼ can ri ka jastak, y xkaj pa u kʼab ri Labán.

27 Xcʼulmataj cʼut chi xujanimaj cho ri ulew cätzʼinowic, y ri u pataninelab ri Labán man xujquirik taj. Xkawaj kib pa ri u jul jun nim abäj.

28 Xcʼulmaxic chi xpe royowal ri Lamán chwe y xukujeʼ che ri in tat, y je xuban ri Lemuel rumal xunimaj areʼ ri u tzij ri Lamán. Je cʼu riʼ, xquibij cowilaj tak tzij chke ri uj, ri qui chakʼ, y xujquichʼayo rucʼ jun cheʼ.

29 Y xcʼulmatajic chi are cätajin cujquichʼay rucʼ ri cheʼ, xpe jun ángel re ri Ajawaxel chquiwäch y xebuchʼabej, xubij: ¿Jasche quichʼay ri i chakʼ rucʼ jun cheʼ? ¿La ma tä iwetaʼm ix chi ri Ajawaxel u tasom ri Nefi rech cux i nimal rumal rech ri i mac? Chiwilampeʼ, chixtzelej cho Jerusalén, y ri Ajawaxel cujach na ri Labán pa i kʼab.

30 Cʼäte tzijoninak chic ri ángel kucʼ, xel bic.

31 Y cʼäte benak chic ri ángel, ri Lamán y ri Lemuel xquichaplej chi jumul qui wixwitem, xquibij: ¿Jas u sucʼ ri Ajawaxel cujach na ri Labán pa ka kʼab? Kas areʼ cʼo nim u chukʼab, cʼä cäcuin cutak paquiwiʼ cincuenta achijab. Kas jeʼ, cäcuin quebucämisaj cincuenta achijab. ¿La ma tä cäcuin tä chubanic junam chke uj?