1 Ket napasamak a binilinnak ti Apo, gapuna a nagaramidak kadagiti pinanid a minas a pangikitikitak iti pakasaritaan dagiti tattaok. Ket kadagitoy a ^apinanid nga inaramidko inkitikitko ti kasuratan ti ^bamak, ken kasta met dagiti panagdaliasatmi iti langalang, ken dagiti padto ti amak; ken kasta met nga inkitikitko ti adu a bukodko a padto kadagitoy.

2 Ket saanko nga ammo iti dayta a panawen a panangaramidko kadagitoy a bilinennakto ti Apo a mangaramid ^akadagitoy a pinanid; gapuna, ti salaysay ti amak, ken kapuonan dagiti ammana, ken ti ad-adu a paset dagiti amin a pasamak iti langalang ket naikitikit kadagiti umuna a pinanid a nasaokon; gapuna, dagiti banag a napasamak sakbay nga inaramidko ^bdagitoy a pinanid iti kinapudnona, kangrunaan a nadakamat kadagiti umuna a pinanid.

3 Ket kalpasan a naaramidko dagitoy a pinanid babaen ti bilin, siak, ni Nephi, nakaawat iti bilin a dagiti naespirituan a panagserbi ken dagiti padto, dagiti nalawlawag ken napatpateg a pasetda nasken a maisurat ^akadagitoy a pinanid; ken nasken a mataginayon dagiti banag a naisurat para iti pammilin kadagiti tattaok, nga agtagikuanto iti daga, ken kasta met para iti sabsabali a ^bnainsiriban a panggep, nga ti Apo ti makaammo kadagitoy a panggep.

4 Gapuna, siak, ni Nephi, nagaramid iti kasuratan kadagiti sabali a pinanid, a mangted iti salaysay, wenno mangted iti ad-adu a pakaammuan kadagiti gubat ken panagsusupanget ken dagiti pannakadadael dagiti tattaok. Ket naaramidko daytoy, ket imbilinko kadagiti tattaok no ania ti nasken nga armidenda inton awanakon; ken nasken a maipaima dagitoy a pinanid manipud iti maysa a henerasion iti sumaruno, wenno manipud ti maysa a propeta iti sabali, agingga a manayonan pay dagiti pammilin ti Apo.

5 Ket maitedto ti pakaammuan ti panangaramidko kadagitoy a pinanid kalpasanna ti ^apanangaramidko kadagitoy a pinanid; ket kalpasanna, kitaen, itultuloyko a maibatay iti nasaokon; ket inaramidko daytoy tapno ad-adu ti sagrado a bambanag a ^bmataginayon para iti pannakaammo dagiti tattaok.

6 Nupay kasta, saanko nga isurat iti ania man a banag kadagiti pinanid malaksid iti ibilangko a ^asagrado. Ket ita, no agbiddutak, uray ta nagriro met dagidi nagkauna; saan a gapu ta ikalinteggak ti bagik gapu kadagiti sabali a tattao, ngem gapu iti ^bpagkapsutan nga adda kaniak, a mayannurot iti lasag, ikalinteggak ti bagik.

7 Ta dagiti banag nga ibilang ti sumagmamano a tao a dakkel iti pategna, agpada para iti bagi ken iti kararua, ibilang dagiti dadduma nga ^aawan ti kaes-eskanna ken ilupeklupek dagiti sakada. Wen, ^bilupeklupek dagiti saka ti tattao uray pay ti Dios ti Israel; kunak, ilupeklupek dagiti sakada ngem isaok iti sabali a balikas—ibilangda isuna nga awan ti kaes-eskanna, ket dida dumngeg iti timek kadagiti pammagbagana.

8 Ket kitaen ^aumayto, kas maibatay kadagiti balikas ti anghel, iti ^binnem a gasut a tawen manipud iti panawen nga ipapanaw ti amak iti Jerusalem.

9 Ket gapu iti kinadangkes ti lubong, kedngandanto isuna kas maysa nga awan ti pategna; gapuna saplitanda isuna, ket ituredna daytoy; ken dangranda isuna, ket ituredna daytoy. Wen, ^atupraanda isuna, ket ituredna daytoy, gapu iti naayat a kinamanangngaasina ken ti naunday a panagituredna nga agpaay kadagiti annak ti tattao.

10 Ket ti Dios dagiti ^aammatayo, a ^bnaiturong ti iruruarda iti Egipto, a nawayawayaan iti pannakaadipen, ken kasta met a sinaluadanna ida iti langalang, wen, ti ^cDios ni Abraham, ken ni Isaac, ken ti Dios ni Jacob, ^dinsukona ti bagina, kas maibatay kadagiti balikas ti anghel, a kas tao, kadagiti ima dagiti dakes a tattao, tapno ^emaitag-ay, kas maibatay kadagiti balikas ni ^fZenock, ket ^g, mailansa iti krus, kas maibatay kadagiti balikas ni Neum, ket maitabon iti ^hsepulkro, kas maibatay kadagiti balikas ni ⁱZenos, a sinaona maipanggep kadagiti tallo nga aldaw a ^jkinasipnget, a maitedto a tanda ti ipapatayna kadagiti agtaeng kadagiti isla ti baybay, kangrunaanna a maited kadagiti adda iti ^kbalay ti Israel.

11 Ta kastoy ti kinuna ti propeta: Awan duadua a ^asarungkaranto ti Apo a Dios ti amin a balay ti Israel iti dayta nga aldaw, iti sumagmamano babaen ti timekna, gapu iti kinalintegda, para iti nalaus a rag-o ken pannakaisalakanda, ken kadagiti dadduma babaen ^bdagiti gurruod ken dagiti kimat ti bilegna, babaen ti bagyo, babaen ti apuy, ken babaen ti asuk, ken alibungubong ti ^csipnget, ken babaen ti panagrengngat ti ^ddaga, ken babaen ti pannakaisang-at ^ekadagiti bantay.

12 Ket awan duadua a mapasamak ^aamin dagitoy a banag, kinuna ti propeta a ni ^bZenos. Ket nasken a maburakburak ^cdagiti batbato; ket gapu iti ung-ungor iti daga, adu kadagiti ari dagiti isla ti baybay ti magutugot babaen ti Espiritu ti Dios, a mangipukkaw: Nagitured ti Dios ti nakaparsuaan.

13 Ket kadakuada nga adda iti Jerusalem, kinuna ti propeta, ^aparigatento ida ti amin a tattao, gapu ta ^binlansada iti krus ti Dios ti Israel, ket insiasida ti pusoda, linaksidda dagiti tanda ken datdatlag, ken ti bileg ken dayag ti Dios ti Israel.

14 Ket gapu ta insiasida ti pusoda, kinuna ti propeta, ken ^ainumsida ti Nasantuan ti Israel, agallaalladanto iti nainlasagan a bagida, ket matayda, ken agbalinda a ^bpagiinnarasaasan ken ^cpagsasaritaan, ket magurguradanto iti amin a pagilian.

15 Nupay kasta, inton dumteng dayta nga aldaw, kinuna ti propeta, ta ^asaandanton nga isiasi ti pusoda a maibusor iti Nasantuan ti Israel, malagipnanto ^bdagiti katulagan nga inaramidna kadagiti ammada.

16 Wen, malagipnanton ^adagiti isla ti baybay; wen, ken amin dagiti tattao nga adda iti balay ti Israel, ^bukkonekto, kinuna ti Apo, kas maibatay kadagiti balikas ti propeta a ni Zenos, manipud kadagiti uppat a suli ti lubong.

17 Wen, ^amakitanto ti sangalubongan ti panangisalakan ti Apo, kinuna ti propeta; maparaburanto ti tunggal pagilian, kakabagian, pagsasao ken tattao.

18 Ket siak, ni Nephi, naisuratko dagitoy a bambanag kadagiti tattaok, ta bareng maallukoyko ida a manglagip iti Apo a Mannubbotda.

19 Gapuna, agsaoak kadagiti amin iti balay ti Israel, no la ket gun-odenda ^adagitoy a bambanag.

20 Ta kitaen, adda dagiti marikriknak iti espiritu, a mangbannog kaniak uray pay a namagkutukot kadagiti susuopko, kadagidiay adda iti Jerusalem; ta no saan a naasi ti Apo, a nangipakita kaniak ti maipanggep kadakuada, uray pay a kas kadagiti nagkauna a propetana, natayak met koma.

21 Ket awan duadua nga impakitana ^akadagiti propeta a nagkauna ti amin a bambanag a ^bmaipanggep kadakuada; ken kasta met nga impakitana iti kaaduan ti maipanggep kadatayo; gapuna, nasken nga ammotayo ti maipanggep kadakuada gapu ta naisuratda kadagiti pinanid a gambang.

22 Ita napasamak a siak, ni Nephi, insurok dagitoy a bambanag kadagiti lallaki a kakabsatko; ken napasamak nga adu a bambanag ti imbasak kadakuada, a naikitikit kadagiti ^apinanid a gambang, tapno maammuanda ti maipanggep kadagiti inar-aramid ti Apo kadagiti sabali a daga, kadagiti nagkauna a tattao.

23 Ket adu a banag ti imbasak kadakuada a naisurat ^akadagiti libro ni Moises; ngem tapno ad-adda a maallukoyko ida a mamati iti Apo a Mannubbotda imbasak kadakuada dagiti insurat ti propeta a ni ^bIsaias; ta ^ciyarigko amin a nasantuan a kasuratan kadakami, tapno agbalinda koma a ^dpakagunggonaan ken pagadalanmi.

24 Gapuna kinasaok ida, a kinunak: Denggenyo dagiti balikas ti propeta, dakayo a natda iti balay ti Israel, ti ^asanga a naisina; denggenyo dagiti balikas ti propeta, nga insurat kadagiti amin a balay ti Israel, ken iyarigyo ida para iti bagbagiyo, tapno maaddaankayo iti namnama ken kasta met dagiti kakabsatyo a nakaisinaanyo; ta kastoy a wagas ti naisurat ti propeta.