1 Ma o lenei sa oo ina ua uma ona faaiu e a’u, o Nifae, le tautala atu i o’u uso, faauta sa latou fai mai ia te a’u: Ua e ta’u mai ia te i matou ni mea faigata, ua sili atu nai lo mea e mafai ona matou gafatia.

2 Ma sa oo ina ou fai atu ia te i latou, ua ou iloa ua ou tautala atu i mea faigata e faasaga i e amioleaga, e tusa ma le upumoni; ma ua ou taumamāina e amiotonu, ma molimau atu o le a sii a’e i latou i luga i le aso gataaga; o le mea lea, e manatu tagata ua sala o le upumoni o se mea faigata, ona e tuia ai i latou i le totonugalemu lava.

3 Ma o lenei o’u uso e, a na fai ua outou amiotonu ma fia faalogo i le upumoni, ma ua’i atu i ai, ina ia mafai ona outou savavali tonu i luma o le Atua, po ua outou lē muimui ona o le upumoni, ma fai mai: Ua e tautala mai mea faigata e faasaga ia te i matou.

4 Ma sa oo ina apoapoai atu a’u, o Nifae, i o’u uso, ma le filiga atoa, ia tausi i poloaiga a le Alii.

5 Ma sa oo ina latou faamaualalaloina i latou lava i luma o le Alii; ua fai ma mea ua ou maua ai le olioli ma faamoemoega tetele mo i latou, o le a latou savavali i ala o le amiotonu.

6 O lenei, o nei mea uma sa tautalagia ma faia a’o nofo lo’u tamā i se faleie i le vanu na ia faaigoaina o Lemuelu.

7 Ma sa oo ina ave e a’u, o Nifae, se tasi o afafine o Isamaeli e fai ma a’u ava; o lenei foi, sa ave e o’u uso ni isi o afafine o Isamaeli e fai ma a latou ava; ma sa ave foi e Sorama le afafine ulumatua o Isamaeli e fai ma ana ava.

8 Ma sa faapea ona faataunuuina e lo’u tamā poloaiga uma a le Alii sa tuu mai ia te ia. Ma o a’u foi, o Nifae, sa faamanuiaina tele lava e le Alii.

9 Ma sa oo ina fetalai mai le siufofoga o le Alii i lo’u tamā i le po, ma poloaiina o ia e tatau ia te ia ona alu lana malaga i le vao i le aso na sosoo ai.

10 Ma sa oo ina ua tulai lo’u tamā i le taeao, ma alu atu i le faitotoa o le faleie, sa vaaia e ia i luga o le eleele, ma lona ofo tele, se polo lapotopoto sa uiga ese lava lona gaosiga; ma sa gaosia lea polo i le apamemea sili ona lelei. Ma i totonu o le polo sa i ai ni nila faasino se lua; ma o le tasi sa faasino mai ai le ala e tatau ona matou o ai i le vao.

11 Ma sa oo ina matou faaputuputu faatasi soo se mea sa tatau ona matou ave i le vao, ma le vaega uma na totoe o a matou meatotino na foai mai e le Alii ia te i matou; ma sa matou ave fatulaau o ituaiga eseese uma ina ia mafai ona matou avea i le vao.

12 Ma sa oo ina matou ave o matou faleie ma malaga atu i le vao, e sopo atu i le vaitafe o Lamana.

13 Ma sa oo ina matou malaga mo le va o aso e fa, toeitiiti ane lava agai atu i le itu i saute-saute i sasa’e, ma sa matou toe faatutu o matou faleie; ma sa matou ta’ua le igoa o le nofoaga o Sasera.

14 Ma sa oo ina matou ave a matou aufana ma a matou ufanafana, ma o atu i le vao e fasi mai ni mea e ’ai mo o matou aiga; ma ina ua uma ona matou fasi o mea e ai mo o matou aiga sa matou toe foi mai i o matou aiga i le vao, i le nofoaga o Sasera. Ma sa matou toe o atu i le vao, e mulimuli agai i le itu lava e tasi, ma tausisi i vaega aupito sili ona lafulemu o le vao, sa i tuaoi lata ane i le Sami Ulaula.

15 Ma sa oo ina matou malaga mo le va o aso e tele, ma fasi mea e ai i le ala, ia matou aufana ma a matou ufanafana ma a matou maa ma a matou maatā.

16 Ma sa matou mulimuli i faasinoga a le polo, ia sa taitaia ai i matou i vaega aupito sili ona lafulemu o le vao.

17 Ma ina ua mavae ona matou malaga mo le va o aso e tele, sa matou faatutu o matou faleie mo se vaitaimi, ina ia mafai ona matou toe malolo ma maua mai ni meaai mo o matou aiga.

18 Ma sa oo a’o alu atu a’u, o Nifae, e fasi ni mea e ai, faauta, sa gau la’u aufana, lea sa gaosia i le sila e sili ona lelei; ma ina ua mavae ona gau o la’u aufana, faauta, sa feita o’u uso ia te a’u ona ua lē aoga la’u aufana, ona sa matou lē maua se meaai.

19 Ma sa oo ina matou foi mai i o matou aiga e aunoa ma ni meaai, ma ona sa vaivai tele, ona o la latou malaga, sa mafatia tele i latou i le fia aai.

20 Ma sa oo ina amata ona muimui tele Lamana ma Lemuelu ma atalii o Isamaeli, ona o o latou mafatiaga ma puapuaga i le vao; ma sa amata foi ona muimui lo’u tamā e faasaga i le Alii lona Atua; ioe, ma sa faanoanoa tele i latou uma, sa oo lava ina latou muimui e faasaga i le Alii.

21 O lenei sa oo ina puapuagatia a’u, o Nifae, faatasi ma o’u uso ona ua gau la’u aufana, ma sa vaivai foi a latou aufana, sa amata ona matua faigata tele, ioe, ua fai ma mea ua lē mafai ai ona matou maua o se meaai.

22 Ma sa oo ina, sa tele ona tautala atu a’u o Nifae, i o’u uso, ona ua latou toe faamaaa o latou loto, na oo lava ina faasea faasaga i le Alii lo latou Atua.

23 Ma sa oo ina faia e a’u, o Nifae, mai se laau se aufana, ma mai i se laau sa’o, se ufanafana; o le mea lea, sa ou faaauupegaina ai a’u lava i se aufana ma se ufanafana, faatasi ma se maata ma ni maa. Ma sa ou fai atu i lo’u tamā: O fea ou te alu i ai e maua mai ai ni meaai?

24 Ma sa oo ina ole atu o ia i le Alii, ona ua latou faamaualalaloina i latou lava ona o a’u upu; ona e tele mea sa ou fai atu ai ia te i latou i le malosi o lo’u agaga.

25 Ma sa oo ina tulei mai le siufofoga o le Alii i lo’u tamā; ma sa matua aoaiina lava o ia ona o lona muimui e faasaga i le Alii, ua fai ma mea ua tuuina ifo ai o ia i le loloto o le faanoanoa.

26 Ma sa oo ina fetalai mai le siufofoga o le Alii ia te ia: Inā vaai ia i le polo, ma vaai i mea ua tusia ai.

27 Ma sa oo ina ua vaai atu lo’u tamā i mea na tusia i le polo, sa fefe o ia ma gatete tele lava, ma sa faapea foi o’u uso ma atalii o Isamaeli ma a matou avā.

28 Ma sa oo ina vaai atu a’u, o Nifae, i pine faasino sa i totonu o le polo, ua ola ia e tusa ma le faatuatua ma le filiga ma le gaua’i sa matou tuu atu i ai.

29 Ma sa tusia foi i o laua luga se tusitusiga fou, lea na manino i le faitau, lea na tuu mai ai ia te i matou le malamalama e uiga i ala o le Alii; ma sa tusia ma suia ia tusitusiga mai lea taimi i lea taimi, e tusa ma le faatuatua ma le filiga sa matou tuu atu i ai. Ma ua faapea ona tatou vaai ai e mafai e le Alii ona faataunuu mea tetele i ala faatauvaa.

30 Ma sa oo ina alu atu a’u, o Nifae, i luga i le tumutumu o le mauga, e tusa ma faatonuga sa tuuina mai i le polo.

31 Ma sa oo ina ou fasi manu ’aivao, ua fai ma mea ua ou maua ai meaai mo o matou aiga.

32 Ma sa oo ina ou foi mai i o matou faleie, ma faafuata mai manu na ou fasia; ma o lenei ina ua latou vaai mai ua ou maua ni meaai, sa latou olioli lava! Ma sa oo ina latou faamaualalalo i latou lava i luma o le Alii, ma avatu le faafetai ia te ia.

33 Ma sa oo ina toe alu la matou malaga, ma agai atu toetoe o le ala e tasi e pei o le amataga; ma ina ua mavae ona matou malaga mo le va o aso e tele sa matou toe faatutu o matou faleie, ina ia mafai ona matou malolo mo se vaitaimi.

34 Ma sa oo ina maliu Isamaeli, ma sa lagomau o ia i le nofoaga sa ta’ua o Naoma.

35 Ma sa oo ina faanoanoa tele lava afafine o Isamaeli, ona o le maliu o lo latou tamā, ma ona o o latou puapuaga i le vao; ma sa latou muimui faasaga i lo’u tamā, ona ua ia aumai i latou mai le laueleele o Ierusalema, fai mai: Ua oti lo matou tamā; ioe, ma ua tele ona matou feoa’i solo i le vao, ma ua matou mafatia i le tele o puapuaga, le fia aai, le fia inu, ma le vaivai; ma a mavae atu nei mafatiaga uma o le a matou fano lava i le vao i le fia aai.

36 Ma sa faapea ona latou muimui faasaga i lo’u tamā, ma faasaga mai foi ia te a’u; ma sa latou mananao e toe foi atu i Ierusalema.

37 Ma sa fai atu Lamana ia Lemuelu ma atalii foi o Isamaeli: Faauta, ia tatou fasioti lo matou tamā, ma lo matou uso foi o Nifae, o lē ua ia ave i ona luga e fai ma o tatou pule ma o tatou aoao, o e o ona uso matutua.

38 O lenei, ua fai mai o ia na fetautalaai o ia ma le Alii, ma na auauna mai foi agelu ia te ia. Ae faauta, ua tatou iloa ua pepelo o ia ia te i tatou; ma ua ia ta’u mai nei mea ia te i tatou, ma ua ia faia le tele o mea i lona poto faitogafiti, ina ia mafai ona ia faasese la tatou vaai, manatu, atonu, ina ia mafai ai ona ia taitai ese atu i tatou i se vao uiga ese; ma a uma ona ia taitai ese atu o i tatou, ua manatu o ia e fai o ia ma tupu ma pule ia i tatou, ina ia mafai ona ia faia ia te i tatou e tusa ma lona loto ma lona manao. Ma sa faapea le ala na faaoso a’e ai e lo’u uso o Lamana o latou loto i le ita.

39 Ma sa oo ina faatasi mai le Alii ia te i matou, ioe, e oo lava i le siufofoga o le Alii ma sa fetalai mai upu e tele ia te i latou, ma sa aoaiina malosi lava i latou; ma ina ua uma ona aoaiina o i latou e le siufofoga o le Alii, sa latou liliu ese lo latou ita, ma salamo ia latou agasala, ma ua fai ma mea ua toe faamanuiaina ai i matou e le Alii i meaai, na matou lē fano ai.