1 He naʻe hoko ʻo pehē ʻi he hili ʻeku holi ke u ʻilo ki he ngaahi meʻa kuo mamata ki ai ʻa ʻeku tamaí, pea ʻi heʻeku tui ʻoku lava ʻe he ʻEikí ʻo fakahā mai ʻa e ngaahi meʻa ko iá kiate au, naʻe lolotonga ʻeku nofo ʻo fakalaulauloto ʻi hoku lotó naʻe ʻave au ʻe he Laumālie ʻo e ʻEikí, ʻio, ki ha moʻunga māʻolunga ʻaupito, ʻa ia naʻe teʻeki ai te u mamata ai ki muʻa, pea naʻe teʻeki ke tuʻu ai ʻa hoku vaʻé ki muʻa.

2 Pea naʻe folofola mai ʻa e Laumālié kiate au: Vakai, ko e hā ʻokú ke holi ki aí?

3 Pea naʻá ku pehē ange: ʻOku ou fie vakai ki he ngaahi meʻa ʻa ia naʻe mamata ki ai ʻa ʻeku tamaí.

4 Pea folofola mai ʻa e Laumālié kiate au: ʻOkú ke tui naʻe mamata ʻa hoʻo tamaí ki he fuʻu ʻakau, ʻa ia kuó ne lau ki aí?

5 Pea naʻá ku pehē ange: ʻIo, ʻokú ke ʻafioʻi ʻoku ou tui ki he ngaahi lea kotoa pē ʻa ʻeku tamaí.

6 Pea ʻi he ʻosi ʻa ʻeku lea ʻaki ʻa e ngaahi lea ko ʻení, naʻe kaila ʻa e Laumālié ʻaki ʻa e leʻo lahi, ʻo pehē: Hōsana ki he ʻEiki, ko e ʻOtua fungani māʻolunga tahá; he ko e ʻOtua aoniu ia ki he māmaní kotoa, ʻio, ʻo māʻolunga hake ʻi he meʻa kotoa pē. Pea ʻokú ke monūʻia koe, ʻe Nīfai, koeʻuhi ko hoʻo tui ki he ʻAlo ʻo e ʻOtua fungani māʻolunga tahá; ko ia, te ke mamata ki he ngaahi meʻa kuó ke holi ki aí.

7 Pea vakai ko e meʻá ni ʻe tuku kiate koe ko ha fakaʻilonga, ʻo ka ʻosi hoʻo mamata ki he fuʻu ʻakau ʻa ia naʻe tupu ai ʻa e fua naʻe kai ai ʻa hoʻo tamaí, te ke mamata foki ki ha tangata ʻoku hāʻele hifo mei he loto langí, pea te ke mamata kiate ia; pea ʻo ka hili ʻa hoʻo mamata kiate iá, te ke fakamoʻoniʻi ko e ʻAlo ia ʻo e ʻOtuá.

8 Pea naʻe hoko ʻo pehē naʻe folofola mai ʻa e Laumālié kiate au: Vakai! Pea naʻá ku sio ʻo vakai ki ha fuʻu ʻakau; pea naʻe tatau ia mo e fuʻu ʻakau kuo mamata ki ai ʻa ʻeku tamaí; pea ko hono fakaʻofoʻofá naʻe lahi ʻaupito, ʻio, ʻo lahi ange ʻi he fakaʻofoʻofa kotoa pē; pea ko hono hinehiná naʻe laka ia ʻi he hinehina ʻo e sinou ʻoku vilingia.

9 Pea naʻe hoko ʻo pehē ʻi he hili ʻeku mamata ki he fuʻu ʻakaú, naʻá ku pehē ange ki he Laumālié: ʻOku ou ʻilo kuó ke fakahā mai kiate au ʻa e fuʻu ʻakau ʻa ia ʻoku mahuʻinga hake ʻi he meʻa kotoa pē.

10 Pea naʻá ne folofola mai kiate au: Ko e hā ʻokú ke fie maʻú?

11 Pea naʻá ku pehē ange kiate ia: Ke u ʻiloʻi ʻa hono ʻuhingá—he naʻá ku lea kiate ia ʻo hangē ko ha lea ʻa ha tangata; he naʻá ku vakai ʻokú ne ʻi he tatau ʻo ha tangata; ka neongo iá, naʻá ku ʻilo ko e Laumālie ia ʻo e ʻEikí; pea naʻá ne folofola mai kiate au ʻo hangē ʻoku lea ha tangata ʻe taha ki ha tangata ʻe tahá.

12 Pea naʻe hoko ʻo pehē naʻá ne folofola mai kiate au: Vakai! Pea naʻá ku tafoki ʻo hangē haʻaku feinga ke sio kiate iá, pea naʻe ʻikai te u sio kiate ia; he kuó ne ʻalu mei hoku ʻaó.

13 Pea naʻe hoko ʻo pehē naʻá ku mamata ʻo vakai ki he fuʻu kolo lahi ko Selusalemá, kae ʻumaʻā mo ha ngaahi kolo kehe foki. Pea naʻá ku vakai ki he kolo ko Nāsaletí; pea ʻi he kolo ko Nāsaletí naʻá ku vakai ki ha tāupoʻou, pea naʻe fuʻu hoihoifua ʻaupito ia mo hinehina.

14 Pea naʻe hoko ʻo pehē naʻá ku mamata ki he ngaahi langí ʻoku matangaki; pea naʻe ʻalu hifo ha ʻāngelo ʻo tuʻu ʻi hoku ʻaó; pea naʻá ne pehē mai kiate au: ʻE Nīfai, ko e hā ʻokú ke vakai ki aí?

15 Pea naʻá ku pehē ange kiate ia: Ko ha tāupoʻou ʻoku fuʻu fakaʻofoʻofa mo hoihoifua lahi hake ʻi he kau tāupoʻou kehe kotoa pē.

16 Pea naʻá ne pehē mai kiate au: ʻOkú ke ʻiloʻi ʻa e āfeitaulalo ʻa e ʻOtuá?

17 Pea naʻá ku pehē ange kiate ia: ʻOku ou ʻilo ʻokú ne ʻofa ki heʻene fānaú; ka neongo iá, ʻoku ʻikai te u ʻiloʻi hono ʻuhinga ʻo e meʻa kotoa pē.

18 Pea naʻá ne pehē mai kiate au: Vakai, ko e tāupoʻou ʻokú ke sio ki aí ko e faʻē ia ʻa e ʻAlo ʻo e ʻOtuá, ʻi he anga ʻo e kakanó.

19 Pea naʻe hoko ʻo pehē naʻá ku vakai naʻe ʻave ia ʻe he Laumālié; pea hili hono ʻave ia ʻe he Laumālié ʻo fuofuoloa siʻi naʻe lea mai ʻa e ʻāngeló kiate au, ʻo pehē: Vakai!

20 Pea naʻá ku mamata ʻo toe vakai ki he tāupoʻoú, ʻokú ne fua ha tamasiʻi ʻi hono nimá.

21 Pea naʻe pehē mai ʻe he ʻāngeló kiate au: Vakai ki he Lami ʻa e ʻOtuá, ʻio, ko e ʻAlo ʻo e Tamai Taʻengatá! ʻOkú ke ʻiloʻi koā ʻa e ʻuhinga ʻo e fuʻu ʻakau naʻe sio ki ai ʻa hoʻo tamaí?

22 Pea naʻá ku tali kiate ia, ʻo pehē ange: ʻIo ko e ʻofa ia ʻa e ʻOtuá, ʻa ia ʻoku aʻu atu ki he loto ʻo e fānau ʻa e tangatá; ko ia, ʻoku lelei taha ia ʻi he ngaahi meʻa kotoa pē.

23 Pea naʻá ne lea mai kiate au, ʻo pehē: ʻIo, pea ʻoku fakafiefia taha ia ki he laumālié.

24 Pea hili ʻene lea ʻaki ʻa e ngaahi lea ní, naʻá ne pehē mai kiate au: Vakai! Pea naʻá ku mamata, ʻo vakai ki he ʻAlo ʻo e ʻOtuá ʻokú ne hāʻele atu ʻi he lotolotonga ʻo e fānau ʻa e tangatá; pea naʻá ku mamata ki he tokolahi ʻoku fakatōmapeʻe hifo ʻi hono lalo vaʻé ʻo hū kiate ia.

25 Pea naʻe hoko ʻo pehē naʻá ku vakai ko e vaʻa ukamea kuo mamata ki ai ʻa ʻeku tamaí, ko e folofola ia ʻa e ʻOtuá, ʻa ia naʻe fakatau ki he matavai ʻo e ngaahi vai moʻuí, pe ki he ʻakau ʻo e moʻuí; ʻa ia ko e ngaahi vaí ko ha fakatātā ia ʻo e ʻofa ʻa e ʻOtuá; pea naʻá ku vakai foki ko e ʻakau ʻo e moʻuí ko ha fakatātā ia ʻo e ʻofa ʻa e ʻOtuá.

26 Pea toe pehē mai ʻe he ʻāngeló kiate au: Mamata ʻo vakai ki he āfeitaulalo ʻa e ʻOtuá!

27 Peá u mamata ʻo vakai ki he Huhuʻi ʻo e māmaní, ʻa ia kuo lea ʻa ʻeku tamaí ʻo kau ki aí; pea naʻá ku vakai foki ki he palōfita ʻa ia te ne teuteu ʻa e hala ki muʻa ʻiate iá. Pea naʻe hāʻele atu ʻa e Lami ʻa e ʻOtuá ʻo papitaiso ʻiate ia; pea hili ʻa hono papitaisó, naʻá ku vakai ki he matangaki ʻa e ngaahi langí; pea hāʻele hifo ʻa e Laumālie Māʻoniʻoní mei he langí ʻo nofoʻia ʻiate ia ʻi he tatau ʻo ha lupe.

28 Pea naʻá ku vakai naʻá ne hāʻele atu ʻo ngāue ki he kakaí, ʻi he mālohi mo e nāunau lahi; pea kuo fakataha mai ʻa e ngaahi haʻofanga kakai tokolahi ke fanongo kiate ia; pea naʻá ku vakai naʻa nau kapusi ia mei honau lotolotongá.

29 Pea naʻá ku toe vakai foki ki he toko hongofulu mā ua kehe ʻoku muimui ʻiate ia. Pea naʻe hoko ʻo pehē naʻe ʻave ʻa kinautolu ʻe he Laumālié mei hoku ʻaó, ʻo ʻikai te u sio kiate kinautolu.

30 Pea naʻe hoko ʻo pehē naʻe toe lea mai ʻa e ʻāngeló kiate au, ʻo pehē: Vakai! Peá u mamata, ʻo vakai ki he toe matangaki ʻa e ngaahi langí, pea naʻá ku mamata ki he kau ʻāngelo ʻoku ʻalu hifo ki he fānau ʻa e tangatá; pea naʻa nau tauhi ʻa kinautolu.

31 Pea toe lea ia kiate au, ʻo pehē: Vakai! Pea naʻá ku sio atu ʻo vakai ki he Lami ʻa e ʻOtuá ʻoku hāʻele atu ʻi he lotolotonga ʻo e fānau ʻa e tangatá. Pea naʻá ku vakai ki he ngaahi haʻofanga kakai tokolahi naʻe puke, pea nau moʻua ʻi he ngaahi faʻahinga mahaki kehekehe kotoa pē mo e kau tēvolo pea mo e ngaahi laumālie ʻuli; pea naʻe lea ʻa e ʻāngeló ʻo ne fakahā kiate au ʻa e ngaahi meʻá ni kotoa pē. Pea naʻe fakamoʻui ʻa kinautolu ʻi he mālohi ʻo e Lami ʻa e ʻOtua; pea naʻe kapusi ki tuʻa ʻa e kau tēvoló mo e ngaahi laumālie ʻulí.

32 Pea naʻe hoko ʻo pehē naʻe toe lea mai ʻa e ʻāngelo kiate au, ʻo ne pehē: Vakai! Pea naʻá ku mamata ʻo vakai ki he Lami ʻa e ʻOtuá, kuo puke ia ʻe he kakaí; ʻio, ʻa e ʻAlo ʻo e ʻOtua taʻengatá naʻe fakamāuʻi ʻe he māmaní; pea naʻá ku mamata mo fakamoʻoni ki ai.

33 Pea ko au, Nīfai, naʻá ku mamata ʻoku hiki hake ia ki he kolosí ʻo tāmateʻi koeʻuhi ko e ngaahi angahala ʻa māmaní.

34 Pea hili hono tāmateʻí naʻá ku mamata ki he ngaahi fuʻu kakai tokolahi ʻo e māmaní, kuo nau fakataha kātoa koeʻuhi ke tauʻi ʻa e kau ʻaposetolo ʻa e Lamí; he naʻe ui pehē ʻa e toko hongofulu mā uá ʻe he ʻāngelo ʻa e ʻEikí.

35 Pea kuo fakataha kātoa ʻa e fuʻu kakai tokolahi ʻo e māmani; pea naʻá ku vakai ʻoku nau ʻi he fale lahi mo ʻataʻataá ʻo hangē ko e fale naʻe mamata ki ai ʻa ʻeku tamaí. Pea toe lea mai ʻa e ʻāngelo ʻa e ʻEikí kiate au, ʻo pehē: Vakai ki he māmaní mo hono potó; ʻio, vakai, kuo fakataha kātoa ʻa e fale ʻo ʻIsilelí ke tauʻi ʻa e kau ʻaposetolo ʻe toko hongofulu mā ua ʻa e Lamí.

36 Pea naʻe hoko ʻo pehē naʻá ku mamata mo fakamoʻoni, ko e fuʻu fale lahi mo ʻataʻataá ko e loto-hīkisia ia ʻa e māmaní; pea naʻe tō ia, pea naʻe lahi ʻaupito ʻa ʻene toó. Pea naʻe toe lea mai ʻa e ʻāngelo ʻa e ʻEikí kiate au, ʻo pehē: ʻE pehē pē hano fakaʻauha ʻa e ngaahi puleʻanga, mo e ngaahi faʻahinga, mo e ngaahi lea, mo e kakai fulipē, ʻa ia ʻe tauʻi ʻa e kau ʻaposetolo ʻe toko hongofulu mā ua ʻa e Lamí.