1 Na afei, emi Nephi, mahyɛ ase rekyerɛw ^amprɛtse yinom no do ndzɛmba a osii wɔ m’ahendzi na me ɔsomdwuma; dɛm ntsi ansaana mebɛkyerɛw me nsɛm no, ɔsɛ dɛ mekã biribi a ɔfa m’egya na mo nuanom so ho.

2 Na hwɛ ɔbaa dɛ aber a m’egya wiee ne kasaa a ɔfa ^an’adaaso ho, na afotu pa a ɔdze maa hɔn no, ɔkãa Jewfo hɔn ho nsɛm kyerɛɛ hɔn.

3 Dɛ sɛ wɔsɛɛ hɔn nye ^aJerusalem kuropɔn no wie a ^bwɔbɔsoa hɔn mu dodowara akɔ ndɔmmum mu wɔ ^cBabylon; dɛ mbrɛ Ewuradze noara ne mber a ɔahyɛ no tse no, ^dwɔbɛsan aba bio, nyew, wobeyi hɔn efi ndɔmmum mu aba; na sɛ wonya dze hɔn fi ndɔmmum mu ba a hɔn nsa bɛkã hɔn egyapadze asaase no bio.

4 Nyew, ofitsi ^amfe ahaesia ekyir a m’egya fii Jerusalem no mpo; Ewuradze Nyankopɔn beyi ^bnkɔnhyɛnyi efi Jewfo mu—^cMessiah mpo a, anaa dɛ, wiadze Agyenkwa.

5 Na ɔkasaa so faa nkɔnhyɛfo no ho, mbrɛ hɔn mu dodowara ^aagye dase wɔ ndzɛmba a ɔfa dɛm Messiah yi ho, ɔno a ɔakã no ho nsɛm, anaadɛ dɛm wiadze Pomfo yi.

6 Dɛm ntsi adasamba nyinara ayew na ^awɔahwehwe ase, na sɛ wobenya nkwagye a ɔno ɔsɛ dɛ wɔtwer dɛm Ɔpomfo yi.

7 Na ɔkasaa so faa ^ankɔnhyɛnyi bi a obedzi Messiah no enyim ebesiesie Ewuradze n’akwan mu.

8 Nyew, koraa mpo dɛ ɔbɔkɔ sar no do akɛtseatsea mu dɛ: Hom ^ansiesie Ewuradze n’akwan, na wɔmma n’atsempɔn ntsentsen osiandɛ obi gyina hom finimfin ha a hom nnyim no; na ɔwɔ tum sen me, na no nsokota ho ahoma mennsɛ dɛ mesan mpo. Na pii na m’egya kãe a ɔfa iyinom ho.

9 Na m’egya see dɛ wobonuma wɔ ^aBethabara, wɔ Jordan egya, na ɔkãa bio dɛ wɔdze nsu ^bbonuma no; na koraa mpo dɛ wɔdze nsu bonuma Messiah no.

10 Na wɔdze nsu enuma Messiah no ekyir no, obohu na ɔagye dase dɛ woeenuma Nyame ^aEguambaa no; nyia obeyi wiadze bɔn akɔ no.

11 Na ɔbaa dɛ m’egya kãa dɛm nsɛm yi wiei no, ɔkasaa kyerɛɛ mo nuanom no wɔ dza ɔfa Asɛmpa no a wɔbɔkɔ akɛkã akyerɛ Jewfo no, na afei so dza ɔfa no Jewfo no wodow a ^awɔbɔwodow wɔ hɔn ^bgyedzi mu. Na ekyir ^cwoeku Messiah no a ɔbɛba no na no wu ekyir no ^dɔbɔsoɛr efi ewufo mu, na ɔnam ^eSunsum Krɔnkrɔn no do bɛda noho edzi akyerɛ Amanamamfo.

12 Nyew, m’egya kãa nsɛm pii mpo a ɔfa Amanamamfo ho, na dza ɔfa Israel fifo so ho, dɛ wɔdze hɔn bɔto ^angodua ho, dɛ n’abaw bɛpan na ^bwɔapetse asaase nyinara enyi.

13 Dɛm ntsi, ɔkãa dɛ obehia dɛ yɛyɛ kor na wɔgye hɛn kɔ ^aanohoba asaase no do, ama Ewuradze n’asɛm aahyɛ mã, dɛ yɛbɛpetse asaase nyinara enyi.

14 Na Israel fifo no apetse ekyir no, wɔbɛsan ^aaboaboa hɔn ano bio; anaa no korakora, dɛ ^bAmanamamfo nsa akã Asɛmpa n’amahyɛ ekyir no, ^cngodua n’abaw pa no, anaa dɛ Israel fifo hɔn ahyɛ mu nkaasefo no wɔbɛgye hɔn ahyɛ mu, anaaso wobohu nokwar Messiah, hɔn Ewuradze na hɔn Pomfo no.

15 Na dɛm nsɛm yi na m’egya dze hyɛɛ nkɔm na ɔkasaa kyerɛɛ mo nuanom no, na nsɛm pii so a mannkyerɛw wɔ nwoma yi mu; na makyerɛw no mu dodowara a mohwɛ a oye ma me wɔ mo ^anwoma kor no mu.

16 Na dza makã ho nsɛm yi nyinara, sii ber a m’egya tse ne ntamadan mu wɔ Lemuel bɔnsa no mu no.

17 Na ɔbaa dɛ emi, Nephi, metsee ^ansɛm a m’egya kãe a ɔfa ndzɛmba a ohun wɔ ^benyido-adzehu mu nye nsɛm so a ɔnam Sunsum Krɔnkrɔn no tum do kãe; tum a ɔnam gyedzi a onyae wɔ Nyankopɔn ne Ba no mu—na Nyankopɔn ne Ba no nye ^cMessiah no a ɔbɛba no—Emi, Nephi, so mepɛɛ dɛ mubohu na matse na menam ^dSunsum Krɔnkrɔn no tum do ehu ndzɛmba yi a ɔyɛ Nyame n’akyɛdze dze ma hɔn a wɔhwehwɛ no ^eenyiberdo, wɔ ^ftsetseberdo na mber so a obeyi noho akyerɛ adasamba.

18 Na ɔtse ^adɛm ndeda, ndɛ na afebɔɔ, na woesiesie kwan no ato hɔ ama adasa fitsi wiadze ne fapem, sɛ ɔba no dɛ wonu hɔnho na wɔba ne nkyɛn a.

19 Na hɔn a wɔhwehwɛ enyiberdo no wobohu; na ^aSunsum Krɔnkrɔn no tum no bɛda Nyame ^bn’esumasɛm edzi akyerɛ hɔn wɔ mber yi mu dɛ mbrɛ ɔyɛɛ no tsetseberdo no; na dɛ mbrɛ ɔyɛɛ no tsetseberdo no dɛmara so na ɔbɛyɛ wɔ mber a ɔreba no mu, dɛm ntsi Ewuradze ^cn’akwan yɛ kor na ɔkɔ aprɔw onnyiewiei.

20 Dɛm ntsi kaa, O ɔdasanyi, dɛ wo ndwuma nyina mu no wɔdze wo bɛba ^aebobu wo atsɛn.

21 Dɛm ntsi, sɛ epɛɛ dɛ ebɛyɛ emumuyɛdze wɔ wo ^ansɔhwɛber yi mu a, nna woho ^brenntsew wɔ Nyankopɔn n’atsɛmbu egua no enyim; na adze a no ho nntsew biara runntum nye Nyankopɔn nntsena; dɛm ntsi, otwar dɛ wotwa wo kyen afebɔɔ.

22 Na Sunsum Krɔnkrɔn no ma me tum dɛ menkã dɛm nsɛm yi na mma minnsiw do.