1 Na afei ɔbaa dɛ emi, Nephi, mekasaa kyerɛɛ mo nuanom no wiei no, hwɛ, wɔsee me dɛ: ndzɛmba a ɔyɛ dzen na ada no edzi akyerɛ hɛn yi, ɔyɛ dzen kɛse ma hɛn dɛ yebotum asoa.

2 Na ɔbaa dɛ mesee hɔn dɛ minyim dɛ makã nsɛm a ɔyɛ dzen etsia emumuyɛfo, dɛ mbrɛ nokwar no tse, na atseneneefo no so mebu hɔn bem, na magye dase dɛ wɔbɛmaa hɔn do wɔ da a odzi ewiei no mu. Dɛm ntsi ^aafɔdzifo no fa ^bnokwar no dɛ ɔyɛ dzen, osiandɛ ^cotwa hɔn dze kɔ hɔn mu.

3 Na afei mo nuanom, sɛ nkyɛ hom yɛ atseneneefo na hom nya pɛ dɛ hom betsie nokwar no na hom dwen ho yie, dɛ hom ^abɛnantsew tsenenee mu wɔ Nyankopɔn enyim a, nkyɛ osian nokwar no ntsi hom runnhwinhwin, na hom akã dɛ: Akã nsɛm a ɔyɛ dzen etsia hɛn.

4 Na ɔbaa dɛ emi, Nephi, mutuu mo nuanom no fo enyiberdo dɛ wondzi Ewuradze ne mbrasɛm do.

5 Na ɔbaa dɛ ^awɔbrɛɛ hɔnho adze wɔ Ewuradze enyim; araa ma dɛm ntsi minyaa enyigye na enyidado kɛse wɔ hɔn mu dɛ wɔbɛnantsew tsenenee akwan no mu.

6 Afei, dɛm ndzɛmba yi nyinara sii wɔ ber a m’egya tse ntamadan mu wɔ bɔnsa no a wɔfrɛ no Lemuel no mu.

7 Na ɔbaa dɛ emi, Nephi, mefaa Ishmael ne ^ambabaa no mu kor ^bwaar no; na mo nuanom no so faa Ishmael ne mbabaa no warwaar hɔn; na ^cZoram so faa Ishmael ne babaa panyin no waar no.

8 Na m’egya dzii Ewuradze ne mbrasɛm a ɔdze maa no nyinara do. Na emi, Nephi, so Ewuradze hyiraa me mbordo.

9 Na ɔbaa dɛ Ewuradze ne ndze kasaa kyerɛɛ m’egya anafua, na ɔhyɛɛ no dɛ sɛ adze kye a ɔntoa n’akwantu no do nkɔ sar no do.

10 Na ɔbaa dɛ aber a m’egya soɛɛr anapa no na okegyinaa ntamadan n’abow no ano no, ohun adze bi da famu hɔ a ɔmaa ɔbɔɔ hu. Adze ^akorkorba bi a mbrɛ woesi edzi no edwin no yɛ hu na wɔdze ayewa fɛɛfɛw ayɛ. Na ndua ntseatseaba ebien bi hyɛ adze korkorba no mu; na no mu kor kyerɛɛ kwan a yɛmfa do nkɔ sar no do.

11 Na ɔbaa dɛ yɛboaboaa ndzɛmba a ɔsɛ dɛ yɛdze kɔ sar no do na edziban a Ewuradze dze ama hɛn nyinara ano; na yɛfaa eduaba ahorow nyinara a ɔsɛ dɛ yɛdze kɔ sar no do.

12 Na ɔbaa dɛ yɛfaa hɛn ntamadan, yetwaa esutsen Laman na yesii mu kɔr sar no do.

13 Na ɔbaa dɛ yetuu kwan bɛyɛ nda anan wɔ mpoano-boka afamu no, yesii hɛn ntamadan bio; na yɛfrɛɛ bea no ne dzin Shazer.

14 Na ɔbaa dɛ yɛfaa hɛn egyen na hɛn egyen menaba, na yɛkɔr sar no do dɛ yɛrokɔhwehwɛ edziban abrɛ hɛn ebusuafo, na aber a yenyaa edziban no, yɛsaan hɛn ekyir bio kɔr hɛn ebusuafo nkyɛn wɔ sar no do, dɛ yɛrokɔ Shazer. Na yetuu hɛn kwan no bio wɔ sar no do, yɛfaa kwan kor no ara do kɔr sar no do bea a asaase no yɛ asaaseber na ɔbɛn ^aPo Memen no egya.

15 Na ɔbaa dɛ yetuu kwan nda pii, yɛnam nyina na yɛdze hɛn egyen na egyen-menaba, abo na hɛn totowabo rukum mbowa.

16 Kwan a adze korkorba no ^akyerɛɛ hɛn no na yɛfaa do, na ɔdze hɛn faa sar no do bea a asaase no yɛ asaaseber.

17 Na yetuu kwan nda pii ekyir no, yesisii hɛn ntamadan na yedzii mber kakra wɔ hɔ gyee hɛn ahom bio na yɛhwehwɛɛ edziban maa hɛn ebusuafo.

18 Na ɔbaa dɛ emi, Nephi, mokɔr dɛ morokokum abowa no, hwɛ, mubuu m’egyen no a wɔdze ^adadze pa yɛe no mu; na mubuu m’egyen mu ekyir no, hwɛ, mo nuanom no hɔn bo fuwii osiandɛ masɛɛ m’egyen, ma yennya edziban biara ntsi.

19 Na ɔbaa dɛ yɛsaan hɛn ekyir baa hɛn ebusuafo nkyɛn a nna yɛnndze edziban biara, osian hɔn akwantu no ntsi nna wɔafonafona, afei so nna ɔkɔm dze hɔn dodow.

20 Na ɔbaa dɛ Laman nye Lemuel na Ishmael ne mbabanyin no hyɛɛ ase hwinhwiin pii osian hɔn haw na amandzehu wɔ sar no do ntsi; na m’egya so hyɛɛ ase dɛ oruhwinhwin Ewuradze, ne Nyankopɔn; nyew, na hɔn nyinara dzii yaw mbordo, na wohwinhwiin Ewuradze.

21 Afei ɔbaa dɛ emi, Nephi, menye mo nuanom no hun amandze osian megyen no a asɛɛ no ntsi, na hɔn so hɔn egyen no mu ahoma agogow ntsi ɔmaa ɔyɛɛ dzen yie, nyew, ɔyɛɛ dzen araa ma nna yennya edziban biara.

22 Na ɔbaa dɛ emi, Nephi, mekasaa pii kyerɛɛ mo nuanom no osiandɛ nna woepirim hɔn akoma bio, ma ^awɔkasaa tsiaa Ewuradze hɔn Nyankopɔn.

23 Na ɔbaa dɛ emi, Nephi, medze dua yɛɛ egyen na medze duaba a ɔtsen yɛɛ egyen-menaba; na moboaa moho na mefaa m’egyen na ne menaba, mo totowabo na abo. Na mesee ^am’egya dɛ: Henfa na monkɔ nkɔhwehwɛ edziban?

24 Na ɔbaa dɛ ^aobisaa fii Ewuradze hɔ, osiandɛ ɔnam me nsɛm ntsi wɔabrɛ hɔnho adze; na menam me kra n’ahoɔdzen do kasaa pii kyerɛɛ hɔn.

25 Na ɔbaa dɛ Ewuradze ne ndze baa m’egya hɔ; na ^aɔtsẽa no ara yie osiandɛ ohwinhwiin Ewuradze, ma dɛm ntsi awerɛhow kɛse baa no do.

26 Na ɔbaa dɛ Ewuradze ne ndze see no dɛ: Hwɛ adze korkorba no, na hwɛ adze a wɔakyerɛw wɔ do no.

27 Na ɔbaa dɛ aber a m’egya hun dza wɔakyerɛw wɔ adze korkorba no do no, osuroi na no ho popoo kɛsenara, na mo nuanom na Ishmael ne mbabanyin na hɛn yernom so dɛmara.

28 Na ɔbaa dɛ emi, Nephi, muhun adze ntseatseaba no a ɔwɔ adze korkorba no a ɔkyerɛ kwan no mu no dɛ wɔnam hɛn ^agyedzi na mbɔdzembɔ na setsie a yɛdze maa hɔn no do yɛɛ edwuma.

29 Na wɔakyerɛw adze fofor so wɔ do, na n’akenkan nnyɛ dzen, ntsi ɔmaa ^ayɛtsee Ewuradze n’akwan ase; na wɔkyerɛw nna wɔsesa no ofi ber to ber dɛ mbrɛ hɛn gyedzi na mbɔdzen a yɛbɔe dze hwɛɛ no yie no tse. Na iyi maa yehun dɛ Ewuradze nam ^bndzɛmba kumaabi do botum ayɛ ndzɛmba akɛse.

30 Na ɔbaa dɛ emi, Nephi, mokɔr koko no n’etsifi dɛ mbrɛ adze korkorba no kyerɛe no.

31 Na ɔbaa dɛ mukum mbowa abɔyafo pii ma dɛm ntsi minyaa edziban maa hɛn ebusuafo.

32 Na ɔbaa dɛ medze mbowa a mukum hɔn no sanee baa hɛn ntamadan no mu; na aber a wohun dɛ medze edziban aba no, hwɛ, enyigye kɛse a wonyae a! Na ɔbaa dɛ wɔbrɛɛ hɔnho adze wɔ Ewuradze enyim, na wɔdze ndaase maa no.

33 Na ɔbaa dɛ yɛsɔɔw hɛn akwantu no do bio, yɛfaa kwan no a ahyɛse no yɛfae no ara do; na yɛnantseew nda pii ekyir no yesisii hɛn ntamadan bio, ama yɛaahom mber kakra.

34 Na ɔbaa dɛ ^aIshmael wui, na wosiee no wɔ bea a wɔfrɛ no Nahom.

35 Na ɔbaa dɛ Ishmael ne mbabaa no sũi ara yie, osian hɔn egya a wɔayew no no ntsi, na osian hɔn ^aamandzehu so wɔ sar no do ntsi; na wohwinhwiin tsiaa m’egya osiandɛ ɔno na ɔdze hɔn efi Jerusalem asaase do aba, na wɔsee dɛ: Hɛn egya ewu; nyew, na yekyinkyin pii wɔ sar yi do, na yehu amandze pii, ɔkɔm na nsukɔm adze hɛn na ɔfona akã hɛn; na amandze a yehunii yi nyinara ekyir no ɔkɔm rebɛma yɛahera wɔ sar yi do.

36 Na dɛm na wohwinhwiin tsiaa m’egya, na emi so; na wɔpɛɛ dɛ wɔbɛsan hɔn ekyir bio akɔ Jerusalem.

37 Na Laman see Lemuel na Ishmael ne mbabanyin no dɛ: Hwɛ, hom mma ^ayenku hɛn egya, na hɛn nua Nephi so, ɔno na ɔafa ato no do dɛ ɔbɛyɛ hɛn a yɛyɛ no nuanom mpanyin yi hɛn ^bhwɛdofo na kyerɛkyerɛnyi.

38 Afei ɔse Ewuradze nye no akasa, na ɔse sor ^aabɔfo so eyi hɔnho akyerɛ no. Mbom hwɛ, yenyim dɛ ator na oridzi kyerɛ hɛn; na ɔkã dɛm nsɛm yi kyerɛ hɛn, na ɔnam noara ne nyansaa do yɛ ndzɛmba pii, ama ɔdze eefura hɛn enyiwa, ɔdwen dɛ gyama obotum dze hɛn akɔ bea fofor bi so do; na sɛ ɔdze hɛn nya du hɔ a ekyir no ɔayɛ n’adwen dɛ obedzi hɛn do hen na ɔahwɛ hɛn do, na dza ɔpɛ biara no ɔdze aayɛ hɛn. Na dɛm kwan yi na mo nua Laman faa do kasaa kyerɛɛ hɔn ma wonyaa ebufuw.

39 Na ɔbaa dɛ Ewuradze kãa hɛnho, nyew, Ewuradze ne ndze baa bɛkasaa pii kyerɛɛ hɔn, na ^aɔtsẽa hɔn enyim ara yie; na Ewuradze ne ndze ɔtsẽa hɔn wiei no, hɔn ebufuw no pae, na wonuu hɔnho fii hɔn bɔn ho ma dɛm ntsi Ewuradze hyiraa hɛn bio ma yenyaa edziban ntsi yɛannhera.