Pene 47: « Auê te taata »; Te faaite papû nei te mau peropheta no te mau mahana hopea nei i te peropheta Iosepha Semita

Pene 47

« Auê te taata »; Te faaite papû nei te mau peropheta no te mau mahana hopea nei i te peropheta Iosepha Semita

« Ua piihia te peropheta Iosepha Semita… e te Atua, na te reo o te Atua iho, no te iriti i te tau tuuraa o te Evanelia i te ao nei no te taime hopea » (Joseph F. Smith)

No roto mai i te oraraa o Iosepha Semita

I muri a‘e i te poheraa o te peropheta Iosepha Semita e to’na taea‘e Hyrum, ua hoi oi‘oi atu te mau melo no te Pŭpŭ no te Tino Ahuru ma Piti Aposetolo o tei tere na i te mau tere pororaa evanelia i te fenua Marite i Nauvoo. Ua pii te mau melo no te Tino Ahuru ma Piti Aposetolo i te feia mo‘a no te hoê rururaa i te 8 no Atete 1844, i reira o Brigham Young, te peresideni no te Tino Ahuru ma Piti Aposetolo i paraparau ai. E a na reira ai oia, ua tupu te tahi ohipa faahiahia tei ite-mata-hia e rave rahi feia mo‘a. Mai te hoê temeio, ua ti‘a mai e ua paraparau mai te peresideni Young mai ia Iosepha Semita ra te huru. Ua haamana‘o o George Q. Cannon e « mai te mea ra ua ti‘afaahou mai o Iosepha mai te pohe mai e ua paraparau faahou mai oia ia ratou, eita ïa te reira i te mea maere na te rahiraa taata i taua rururaa ra. O te reo o Iosepha iho; e ere ana‘e te reo o Iosepha tei faaroohia; e au ra i te mata o te nunaa e o Iosepha iho tei ti‘a mai i mua ia ratou. Ua tupu mai te hoê temeio maere i taua mahana ra i mua i te amuiraa tei ore roa i faaroohia e matou. Ua horo‘a te Fatu i To’na ra nunaa te hoê iteraa o tei ore i vaiho mai te feaaraa e o vai te taata Ta’na i ma‘iti no te arata‘i ia ratou ».¹

I te hopearaa o teie rururaa, ua ma‘iti te feia mo‘a e ia peresideni te Tino Ahuru ma Piti Aposetolo ia ratou. Hau i te toru matahiti i muri iho, i te ava‘e titema 1847, ua faanahonahofaahou-hia te Peresideniraa Matamua e ua paturuhia o Brigham Young ei peresideni no te Ekalesia.

Mai te tau o Brigham Young, ua faaite papû te mau peropheta ato‘a tei faatere na i te Ekalesia i te misioni faahiahia a te peropheta Iosepha Semita. Ua maitihia o Iosepha Semita i roto i te apooraa i te ra‘i ia riro ei peropheta e ei hi‘o faahiahia no te mau mahana hopea nei. No te faufaa rahi o ta’na misioni i faaite-ateahia’i te reira e te mau peropheta tahito, mai te peropheta Iosepha no te Faufaa Tahito, tei hoohia i Aiphiti. Ua riro o Iosepha iho no Aiphiti ei hi‘o, e ua tohu rahi oia no ni‘a ia Iosepha Semita:

« E faatupu te Fatu, to‘u Atua, i te hoê hi‘o, e e riro oia ei hi‘o maitai no te huaai o to‘u ra tauupu … E ma‘irihia oia i to‘u nei i‘oa, e i te i‘oa ato‘a hoi o to’na ra metua. E riro oia mai ia‘u nei te huru, no te mea te mau mea ta te Fatu e faatupu na roto ia’na ra, na roto i te mana o te Fatu, e arata‘i ïa i to‘u ra mau taata i te ora ».² (2 Nephi 2:6, 15; a hi‘o ato‘a 2 Nephi 3:6–22)

I te ava‘e titema 1834, ua horo‘a o Iosepha Semita metua i te peropheta Iosepha te hoê haamaitairaa, o te haapapû e e oia te hi‘o ta Iosepha i tohu i mutaa ihora: « Te haamaitai nei au ia oe i te mau haamaitairaa o to oe mau metua o Aberahama, Isaaka e Iakobo, e tae noa’tu i te mau haamaitairaa no to oe metua tane o Iosepha, te tamaiti a Iakobo. Inaha, ua haapa‘o oia i to’na ra huaai i te mau mahana hopea nei …; ua imi itoito oia ia ite e no hea mai te tamaiti o te haere mai no te afa‘i mai i te parau a te Fatu, e nehenehe ai ratou ia haamaramaramahia e ia faahoihia i roto i te nănă mau, e ua ite to’na na mata ia oe, e ta‘u tamaiti; ua oaoa to’na aau e ua mauruuru to’na varua, e ua parau oia … ‘No roto mai i to‘u huaai, tei haapurarahia e te mau Edene, e ti‘a mai ïa te hoê hi‘o maitai …, e e feruri hohonu to’na aau i te paari rahi, e e puohu e e ite to’na maramarama i te mau mea hohonu a te Atua, e e parau to’na ra vaha i te ture a te feia parau-tia … E mau oe i te mau taviri no teie ohipa, e tae noa’tu i te peresideniraa no teie Ekalesia, i te tau nei e a muri noa’tu ».³

Na roto ia Iosepha Semita, te hi‘o maitihia no te mau mahana hopea nei, ua heheuhia mai te mau haapiiraa e te mau oro‘a faaora no te evanelia, e ua faahoi-faahou-hia mai te Ekalesia mau a Iesu Mesia i ni‘a i te fenua nei. Te amui nei te mau iteraa o te mau peropheta tahito e te mau peropheta o teie tau no te parau e ua riro o Iosepha Semita ei mauihaa na roto ia’na i faahoi mai ai te Atua i te îraa o te evanelia no te haamaitai « i te taato‘araa o te utuafare taata, mai te tau e a muri e a muri noa’tu ».⁴

Te mau iteraa papû o te mau peropheta no te mau mahana hopea nei

Ua faatoro‘a-atea-hia o Iosepha Semita no to’na piiraa peropheta

Te peresideni Brigham Young: « Ua faauehia i roto i te mau apooraa o te tau mure ore, hou te faatumuraa i te fenua nei, o oia, o Iosepha ïa te taata, i roto i te tau tuuraa evanelia hopea o te ao nei, o te faatupu i te parau a te Atua i to’na ra mau taata, e o te farii i te îraa o te mau taviri e te mana o te autahu‘araa a te Tamaiti a te Atua. Ua hi‘o atea te Fatu ia’na, e i to’na metua tane, e i te metua tane o to’na metua tane, e i to’na hui tupuna e tae roa a‘era ia Aberahama, e mai Aberahama e tae roa a‘era i te diluvi, e mai te diluvi e tae roa a‘era ia Enoha, e mai ia Enoha e tae roa a‘era ia Adamu. Ua hi‘o noa oia i taua utuafare ra e taua toto ra mai to’na pû e tae roa maira i te fanauraa o taua taata ra. Ua faatoro‘a-atea-hia o [Iosepha Semita] i roto i te tau mure ore ia faatere i teie tau tuuraa evanelia hopea ».⁵

Te peresideni Joseph Fielding Smith: « Ua maitihia o Iosepha Semita no te ti‘a i te upoo o te ohipa a te Fatu i te mau mahana hopea nei, e ua faataahia ta’na ohipa na roto i te ite atea o to tatou Metua Mure Ore i roto i te mau tau mure ore hou a fanauhia’i oia. Ua haere mai oia na roto i te varua o Elia no te faaineine i te e‘a no te taeraa mai o to tatou Fatu. Aore roa e peropheta mai te tau mai â o Adamu, maori râ o to tatou iho Faaora, o tei horo‘ahia ia’na te hoê misioni rahi roa‘e ».⁶

Te peresideni Ezra Taft Benson: « No te noaaraa i te hoê iteraa o te aano o te misioni a te peropheta i te fenua nei, e ti‘a ia tatou ia hi‘o i te reira na roto i te iteraa mure ore. Tei rotopu na oia i ‘tei hau i te maitai e tei maramarama’ ta Aberahama i faaite mai teie te huru:

« Inaha, ua faaite mai te Fatu ia‘u, o Aberahama, te mau ite tei faanahonahohia hou te ao i hamanihia’i; e i rotopu ia ratou ato‘a ra, e rave rahi to reira tei hau i te maitai e tei maramarama. E ua ite atura te Atua i taua mau varua, e e mea maitai ratou, e tia ihora oia i rotopu ia ratou, na ô atura: O teie ïa ta‘u e faariro ei mau taata faatere na‘u; te ti‘a ra hoi oia i rotopu i te mau varua, e ua ite oia e, e mea maitai ratou; e ua parau maira oia ia‘u: E Aberahama, o oe te hoê o ratou; ua maitihia oe hou oe i fanauhia ai.’ (Aberahama 3:22–23).

« Oia ato‘a o Iosepha Semita. I reira ato‘a oia. Ua parahi ato‘a oia i roto i te apooraa e o ratou o tei hau i te maitai e te maramarama. Ua farii i te hoê parahiraa hanahana e te faufaa rahi ua tauturu papû oia i te opuaraa e te faaohiparaa i te ohipa rahi a te Fatu ia ‘faatupu i te tahuti ore e te ora mure ore o te taata nei’, te faaoraraa i te taato‘araa o te mau tamarii a to tatou Metua [Mose 1:39]. Ua riro na e e riro â ta’na misioni ei mana i ni‘a i te mau taata ato‘a o tei haere mai i te fenua nei, i te feia ato‘a o te ora nei i ni‘a i te fenua e te mau milioni ato‘a aita â i fanauhia mai…

« E ere noa te peropheta Iosepha Semita i te ‘hoê o tei hau i te maitai e tei maramarama,’ ua haapa‘o râ oia e te tamau noa ra oia i te haapa‘o i te mau ohipa faufaa rahi i ŏ nei i ni‘a i te fenua nei e tae noa mai teie mahana mai ni‘a mai i te ra‘i mai. No te mea i te mata o te Fatu … o te hoê o te faanahoraa rahi mure ore e te tuhaa faufaa rahi ta te peropheta Iosepha e rave ra—na roto i te autahu‘araa mure ore e te mana o te Atua ».⁷

Ua riro te orama matamua a Iosepha Semita ei tuhaa faufaa rahi no to tatou mau iteraa papû tata‘itahi

Te peresideni Joseph F. Smith: « Te oro‘a rahi roa‘e tei tupu i te ao nei mai te ti‘a-faahou-raa o te Tamaiti a te Atua mai te menema mai, e to’na maueraa i ni‘a, o te haereraa mai ïa o te Metua e o te Tamaiti i taua tamaiti ra o Iosepha Semita, no te faaineine i te e‘a no te haamauraa i te niu o te basileia o te [Atua]—e ere te basileia o te taata—o te ore roa e mou aore râ e faatahurihia.

« I to‘u fariiraa i teie parau mau, e mea ohie na‘u ia farii i te tahi ê atu mau parau mau ta’na i faahiti e i parau i roto i ta’na misioni … i te ao nei. Aita roa‘e oia i haapii i te hoê haapiiraa e ere i te mea mau. Aita oia i faaohipa i te hoê haapiiraa aita oia i faauehia ia faaohipa. Aita roa‘e oia i pee i te hape. Aita oia i noaa i te haavarehia. Ua ite oia; ua faaroo oia; ua rave oia mai tei faauehia ia rave; e, no reira, o te Atua te tiaau i te ohipa tei ravehia e Iosepha Semita—e ere o Iosepha Semita. E hopoia na te Fatu, e ere na te taata ».⁸

Te peresideni Heber J. Grant: « E piti huru: Ua ite mau o Iosepha Semita i te Atua e ua paraparau roa oia Ia’na, e na te Atua iho i faaite mai ia Iesu Mesia i te tamaiti ra ia Iosepha Semita e ua parau Iesu Mesia ia Iosepha e ua riro oia ei mauihaa i roto i te rima o te Atua no te faati‘a faahou i te Evanelia mau a Iesu Mesia i ni‘a i te fenua nei—aita ana‘e ra, e parauhia te momoni ei parau aamu haavare. E ere te momoni i te parau aamu haavare! O te mana ïa o te Atua no te faaoraraa. O te Ekalesia ïa a Iesu Mesia, tei faati‘ahia i raro a‘e i Ta’na faaueraaa, e eita roa te ti‘aturi ore o to te ao nei e nehenehe e taui i te mau mea tumu i taamuhia i te Ekalesia a Iesu Mesia i te Feia Mo‘a i te mau Mahana Hopea nei ».⁹

Te peresideni Howard W. Hunter: « Ua mauruuru vau i to‘u riroraa ei melo i roto i te Ekalesia; e ua niuhia to‘u iteraa papû no ni‘a i to’na hanahana i ni‘a i te aamu ohie o te tamaiti tei tuturi i raro a‘e i te mau tumu raau e tei farii i te mau ve‘a no te ra‘i mai—e ere hoê Atua, e piti râ na taata taaê, te Metua e te Tamaiti, o tei heheu faahou mai i te fenua nei te mau taata no te Atuaraa. Ua niuhia to‘u faaroo e to‘u iteraa papû i ni‘a i teie aamu ohie, no te mea ahani e ere i te mea mau, e ma‘iri ïa te faaroo Momoni i raro. Mai te mea e mea mau—e te faaite nei au i to‘u iteraa papû e e mea mau te reira—o te hoê te reira o te mau oro‘a rahi roa‘e i roto i te aai o te taata ».¹⁰

Te peresideni David O. Mckay: « Te fâraa mai o te Metua e te Tamaiti ia Iosepha Semita o te niu ïa o teie nei Ekalesia. Tei roto ia’na iho te tumu huna no to’na puai e to’na itoito. E parau mau te reira, e te faaite papû nei oia i te reira. Na te hoê heheuraa i pahono i te mau ma‘imiraa ato‘a no ni‘a i te Atua e To’na huru atua. Aita anei outou i ite eaha te auraa no te reira? Ua pahonohia mai te uiraa e, eaha te huru o te Atua. E mea maramarama maitai to’na auraa e ta’na mau tamarii. Ua itehia to’na anaanatae i te taata na roto i te mana i horo‘ahia i te taata. Ua haapapûhia te ohipa no ananahi. Ua haamaramaramahia mai teie mau parau mau, e te tahi atu mau parau mau hanahana na roto i taua orama hanahana matamua ra ».¹¹

Te peresideni Ezra Taft Benson: « Te orama matamua a te peropheta Iosepha Semita o te hoê ïa haapiiraa tumu no te Ekalesia. Ua ite te enemi i te reira e ua aro oia i te roo maitai o Iosepha Semita mai te mahana a faaite ai oia i te fâraa mai te Metua e te Tamaiti … E ti‘a ia outou ia faaite noa i te iteraa papû no te parau mau o te orama matamua. Ua ite o Iosepha Semita i te Metua e te Tamaiti. Ua aparau raua ia’na mai ta’na i parau e ua na reira raua. O te oro‘a hau roa ia i te hanahana mai te ti‘afaahouraa mai â o to tatou ra Fatu. Te taata faatere o te ore e faaite, ma te tape‘a-ore-hia, i to’na iteraa papû e ua fâ mai te Atua e o Iesu Mesia ia Iosepha Semita, eita roa’tu ïa oia e nehenehe e riro mai ei faatere mau, ei hoê tia‘i mamoe mau. Mai te mea eita tatou e farii i teie parau mau … mai te mea aita tatou i farii i te hoê iteraa no ni‘a i teie heheuraa rahi, eita ïa e nehenehe ia tatou ia faatupu i te faaroo i roto i te feia ta tatou e arata‘i nei ».¹²

Te peresideni George Albert Smith: « I te taime a ite ai te tamaiti peropheta, i roto i te uru raau no Palmyra, i te Metua e te Tamaiti, e a ite ai oia e e nau taata mau raua, e e nehenehe ia raua ia faaroo e ia pahona i te mea ta’na i parau, ua haamata ïa te hoê tau apî i roto i teie nei ao, e ua haamauhia te hoê niu no te faaroo o te mau tamarii a te taata nei. E nehenehe ta ratou e pure i teie nei i to tatou Metua i te Ao ra e ia ite e e nehenehe ta’na e faaroo e e pahono i ta ratou ra mau pure, e te vai nei te hoê tu‘atiraa i rotopu i te ra‘i e te fenua nei ».¹³

Ua haapiihia te peropheta Iosepha Semita na te Atua e te mau melahi

Te peresideni John Taylor: « O vai o Iosepha Semita? Te faaite nei te Buka a Moromona ia tatou e e huaai oia no Iosepha tei hoohia i Aiphiti, e no reira ua maitihia oia mai ia Aberahama no te rave faaoti i te hoê ohipa i ni‘a i te fenua nei. Ua ma‘iti te Atua i teie taure‘are‘a tane. Aita oia i haapiihia mai ta to te ao nei i ite, e taata hau roa ra i te ite e te maramarama ta‘u i farerei i roto i to‘u nei oraraa, e ua tere vau e rave rahi hanere tauasini maile i te atea, ua haere au i te mau fenua êĕ, e ua amui atu i roto i te mau faito e faaroo ato‘a hoi o te taata, aita râ vau i ite atu ra i te hoê taata maramarama mai ia’na te huru. E no hea mai to’na maramarama? E ere no roto mai i te mau buka; e ere no roto mai i te feruriraa aore râ te ite aore râ te mana‘o o taua tau ra, ua noaa râ ia’na te reira na roto i te mau heheuraa a te Atua tei faaitehia’tu ia’na na roto i te rave‘a o te evanelia mure ore ».¹⁴

Te peresideni Wilford Woodruff; « Mai te au ta‘u i ite, aita roa vau i tai‘o a‘e nei i roto i te tahi vahi, no ni‘a i te hoê â mana o tei faaitehia mai i te mau tamarii a te taata i roto i te tau tuuraa tata’itahi, o tei faaitehia i te peropheta a te Atua i te faanahonaho-raa-hia teie Ekalesia, i te taime a fâ mai ai te Metua e te Tamaiti i te peropheta Iosepha ei pahonoraa i ta’na pure, e a parau ai te Metua, ‘O Ta‘u Tamaiti Here teie; a hi‘o na Ia’na; a faaroo Ia’na.’ E faaururaa faufaa rahi teie, o tei ore roa â i faaitehia na roto i te tahi atu tau tuuraa o te ao nei, o ta te Atua i horo‘a mai no ni‘a i Ta’na ohipa. No reira, i roto i ta’na faanahonahoraa, ua tauturuhia te peropheta a te Atua na te mau melahi o te ra‘i. O ratou ta’na mau orometua, e te mau mea ato‘a o ta’na i rave, e te mau mea ato‘a o ta’na i rave faaoti, mai te haamataraa mai â, mai taua mahana ra e tae roa mai i te taime o to’na taparahi-raa-hia, e heheuraa ana‘e ïa no ŏ mai ia Iesu Mesia ra ».¹⁵

Te peresideni Lorenzo Snow: « E taata vêvê e te ite ore o Iosepha Semita o ta te Atua i ma‘iti no te haamau i ta’na ohipa, e e ere oia i hoê melo no te hoê pŭpŭ keresetiano tuiroo. E ere oia i hau atu maori râ ei tamaroa noa, te haavare ore e tei î i te parau-ti‘a… Mai ia Mose, ua ite oia i to’na aravihi ore e to’na ineine ore no te ohipa, no te ti‘a’tu ei taata faatitiaifaro i te faaroo, i roto i te hoê ti‘araa e au-ore-hia e te taata, no te aro i te mau mana‘o e te mau ti‘aturiraa i vai na e rave rahi mau tau, tei fariihia e te taata, te haapa‘oraa hohonu i roto i te faaroo, ua pii râ te Atua ia’na no te faaora i te feia vêvê e te feia e imi nei i te parau mau i te mau fenua ato‘a mai to ratou faatîtîraa i te pae varua e te pae tino. E ua fafau te Atua ia’na e te taata ato‘a o te farii e o te haapa‘o i ta’na parau poro‘i, e te taata ato‘a o te farii i te bapetizoraa no te mataraa o te mau hara, ma te mana‘o papû, e farii ïa i te mau faaiteraa no te ra‘i mai, e farii ïa i te Varua Maitai, e farii ïa i te hoê â evanelia e te mau haamaitairaa tei fafauhia e tei fariihia na roto i te evanelia, mai tei porohia e te mau aposetolo i mutaa ihora, e teie parau poro‘i, teie fafauraa, e vai puai mai ïa i te mau vahi ato‘a e i te mau taata ato‘a o te ti‘a i te afa‘ihia’tu e te mau peresibutero, te mau ve‘a haamanahia a te Atua. O ta Iosepha Semita ïa i parau, te hoê tamaiti ite ore, peu ore, parau-tia, ohie e te haavare ore ».¹⁶

Te peresideni Harold B. Lee: « Iosepha Semita, te taure‘are‘a tei ore i haapiihia i roto i te mau haapiiraa faaroo no te tau, tei ore i haapiihia i roto i te mau fare haapiiraa no te ite no to’na tau… o te hoê ïa taata auraro i te mau haapiiraa e te mau omuhumuhuraa a te Varua. Eita e nehenehe ia Iosepha ia haamau i teie Ekalesia. Eita e nehenehe ia’na ia faatupu i te ohipa a te Fatu, te Buka a Moromona. E faaoo paha ratou i te peropheta Iosepha Semita ei taata. E uiui paha ratou e nahea teie Ekalesia i te haamataraa, te ti‘a mai nei râ teie mea ei pou rahi—te Buka a Moromona iho. Eita e nehenehe ia Iosepha, te taata, ia rave i te reira, ua nehenehe râ ia Iosepha, ma te tura‘ihia e te mana o te Atua Mana Hope ia rave i te taviniraa temeio no te faati‘a mai i te basileia mai roto mai i te pouri na roto i te faahoi-raa-hia mai te evanelia a Iesu Mesia ».¹⁷

Te peresideni David O. McKay: « Te hinaaro nei au e paraparau atu no ni‘a ia Iosepha Semita, eiaha no to’na noa huru taata tuiroo, no ni‘a ato‘a râ i to’na ti‘araa tavini faaûrûhia no te Fatu. Oia mau, te faahiahiaraa o Iosepha Semita e faaururaa ïa no ô mai i te ra‘i…

« ‘No hea ra te ite o teie nei taata, aore hoi oia i haapiihia? na ô a‘era te ati Iuda no to ratou maere i te paari o Iesu [Ioane 7:15]. No reira e nehenehe anei tatou e tapiti i te uiraa no ni‘a ia Iosepha Semita, a hi‘opo‘a ai tatou i ta’na mau ohipa faahiahia i roto i te area taime poto no na matahiti [hoê ahuru ma maha] mai te faanahonahoraa o te Ekalesia e tae atu i to’na taparahi-pohe-raa-hia; a hi‘opo‘a ai tatou i te au-maitai-raa o te evanelia tei faahoihia mai e te evanelia o te ekalesia i mutaa ihora tei haamauhia e Iesu e ta’na mau Aposetolo; a ite ai tatou i to’na ite no te mau ture e te mau oro‘a; e a ite ai tatou i te faanahoraa faito-ore-hia e te manuia o te Ekalesia tei faati‘ahia na roto i te faaûrûraa a te Mesia tei topahia i to’na ra i‘oa. Te pahonoraa i te uiraa, ‘no hea mai te paari o teie nei taata?’, ua horo‘ahia ïa i roto i teie mau reni faateniteni:

« Auê te taata i parau ia Iehova! Parauhia oia ei hi‘o e Iesu Maitihia oia no te ohipa
Faahoi mai i te evanelia;
E faateitei te mau arii ia’na e
E faatura te mau nunaa ia’na ».18

Te peresideni Howard W. Hunter: « Te arue nei tatou ia [Iosepha Semita] no to’na aravihi i te aparau ia Iehova i te tahi ato‘a râ mau ve‘a ê no te ra‘i mai. E rave rahi tei tere mai, tei horo‘a i te mau taviri e tei haapii i taua ‘hi‘o maitai’ tei faati‘ahia mai i te mau mahana hopea nei… Te arue nei matou ia Iosepha Semita, no to’na ato‘a itoito e te aravihi i te iriti e tei farii hanere mau api no te papa‘iraa mo‘a tei heheuhia mai. O oia te rave‘a no te heheuraa. Na roto ia’na, ua numerahia, ua rahi atu te mau api faahiahia mau no te papa‘iraa mo‘a tahito tei fariihia e te tahi ê atu taata i roto i te aai o te ao nei ».¹⁹

Ua piihia te peropheta Iosepha Semita e te Atua no te iriti i te tau tuuraa evanelia hopea e no te faahoi mai i te îraa o te evanelia

Te peresideni Spencer W. Kimball: « Te faaite nei au i to‘u iteraa i to te ao i teie mahana e hau atu i te hoê tenetere e te afa ua marua te ereraa i te heheuraa; ua matara faahou â te mau ra‘i, e mai taua taime ra ua tamau noa te mau heheuraa.

« Ua hiti mai taua mahana apî ra a pure ai te hoê varua ma te hiaa‘i rahi no te arata‘iraa no te ra‘i mai. Ua itehia te hoê vahi mo‘emo‘e, ua tuturi te mau turi ava‘e, e ua haehaa te hoê aau, ua faahitihia te mau ti‘aororaa, e ua turama te hoê maramarama hau atu i te anaana o te mahana i te avatea—eita te paruru e tapiri-faahou-hia.

« Na te hoê taure‘are‘a…, o Iosepha Semita, ma te faaroo faitoore-hia, i ofati i te ‘o‘e no te heheuraa, i vavahi i te ra‘i veo e i haamau faahou i te aparauraa. Ua apa te ra‘i i te fenua, ua ti‘avaru ê atu te maramarama i te pouri, e ua paraparau faahou mai te Atua i te taata nei, ma te heheu faahou mai i ‘ta’na parau i mo‘e i ta’na mau tavini te mau peropheta.’ (Amosa 3:7). Tei te fenua nei te hoê peropheta apî e na roto ia’na ua haamau te Atua i to’na basileia, o te ore roa e haamouhia aore râ e vaihohia i te tahi ê atu nunaa—te hoê basileia o te ti‘a noa e a muri noa’tu.

« E vai a muri-noa’tu to teie basileia e te mau heheuraa ta’na i afa‘i i teie oraraa nei e mau mea mau ïa tei tupu. E ore roa te mahana e tia faahou; eita te mau taata ato‘a e riro faahou ei feia parau-ti‘a ore no te aparau atu i to ratou ra Atua. E ore roa te Atua e huna-faahou-hia’tu i ta’na mau tamarii i ni‘a i te fenua nei. Tei ŏ nei te heheuraa no te faaea roa mai ».²⁰

Te peresideni Gordon B. Hinckley: « Te aamu o te oraraa o Iosepha o te hoê ïa aamu no te temeio. Ua fanauhia oia i roto i te vêvê. Ua paari oia i roto i te ati. Ua ti‘avaruhia oia mai tera vahi i tera vahi, ma te faahapa-hape-hia, e ua tape‘a-hape-hia oia i roto i te fare tape-‘araa. Ua taparahi-pohe-hia oia i te 38raa o to’na ra matahiti. I roto râ i te area poto e 20 matahiti na mua i to’na poheraa, ua rave oia i te ohipa tei ore roa i rave noa‘e-hia e te tahi ê atu taata i roto i te taato‘araa o te roaraa o te hoê oraraa. Ua iriti e ua nene‘i oia i te Buka a Moromona, te hoê buka tei iritihia na roto i te mau reo êê e rave rahi e tei fariihia e te mau milioni taata, i ni‘a i te fenua, ei parau na te atua. Ua riro te mau heheuraa ta’na i farii e te tahi ê atu mau papa‘iraa ta’na i papa‘i mai te mau papa‘iraa mo‘a no te mau milioni taata. Te taato‘araa o te mau api o te buka fatata ïa e piti o te faito o te taato‘araa o te Faufaa Apî o te Bibilia, e ua tae mai te reira na roto noa i te hoê taata i roto i te area tau matahiti noa. I roto i teie ato‘a area taime ua haamau oia i te hoê faanahonahoraa… tei tape‘a i te mau ati e te mau tamataraa ato‘a e tei manuia i teie nei mahana i te faatereraa i te mau melo na te ao ato‘a nei… mai te faatereraa e 300 melo i te matahiti 1830. Te vai nei te feia feââ tei tutava i te tatara i teie faanahonahoraa faahiahia mai te hotu o te mau tau ta’na i ora na. Te parau atu nei au, taua faanahonahoraa, e mea taa ê ïa, o oia ana‘e ra, e e mea faahiahia i taua taime ra mai teie nei mahana. E ere te reira te hotu no te mau tau. Ua tae mai te reira mai te hoê heheuraa no ŏ mai i te Atua ra…

« I roto i te area e 20 matahiti hou to’na poheraa, ua faanaho o Iosepha Semita i te hoê tabula ohipa no te afa‘iraa i te Evanelia i te mau nunaa o te fenua nei. Te maere nei au i to’na măta‘u-oreraa i te faahaere i te ohipa. E tae noa’tu i te mau mahana matamua no te Ekalesia, i te mau taime no te mau ati, ua piihia te mau tane ia faaru‘e i to ratou mau fare e to ratou mau utuafare, no te tere atu na ni‘a i te moana, no te poro i te faahoi-raa-hia mai o te evanelia a Iesu Mesia. Ua itehia te mana‘o o te peropheta e ta’na orama e te taato‘araa o te fenua nei.

« No to tatou mau amuiraa rahi e piti taime i te matahiti, te haaputuputu mai nei te mau melo i te fenua Amerika Apatoerau, Ropu e Apato‘a; i te mau motu no te fenua Peretane e no Afirika; i roto i te mau nunaa no Europa; i te mau motu e te mau fenua no Patifita; e te mau fenua tahito no Asia. Teie te hotu o te orama a Iosepha Semita, te peropheta a te Atua. Ua riro mau oia ei hi‘o puai tei ite i teie mahana e te mau mahana faahiahia’tu â i mua a haere ai te ohipa a te Fatu i mua na te fenua ato‘a ».²¹

Te peresideni Joseph F. Smith: « Noa’tu eaha te tahi atu mau mea ta te peropheta Iosepha Semita i rave aore râ i faatupu, eita e ti‘a ia tatou ia haamo‘e e o oia te taata i roto te mau milioni taata tei ora na i ni‘a i te fenua i taua taime ra—te taata ana‘e, tei piihia e te Atua, na roto i te reo o te Atua iho, no te iriti i te tau tuuraa evanelia i te ao nei no te taime hopea; e teie te mea faufaa rahi ia haamana‘o, e ua piihia oia e te Atua no te faaite te Evanelia i to te ao nei, no te faahoi mai i te autahu‘araa mo‘a i te mau tamarii a te taata, no te faanahonaho i te Ekalesia a Iesu Mesia i te Feia Mo‘a i te mau Mahana Hopea nei i te ao nei, e no te faahoi faahou mai te taato‘araa o te mau oro‘a no te Evanelia, no te faaoraraa eiaha noa no te feia ora, no te feia pohe ato‘a, e ua piihia oia i teie misioni e te Atua iho…

« …I vai na te tahi ê atu mau peropheta, e mau peropheta rahi, tei farii i te mau melahi no te utuutu ia ratou, e te tahi atu tei ite i te manimani rima o te Atua, tei haamaitaihia e te mau heheuraa rahi aore râ e te mau heheuraa iti; i hea râ, e o vai râ te taata o ta te Metua e te Faaora i fâ, e tei faaite atu ia raua ia’na ra? Tei hea taua taata ra? Aita roa e vahi tei papa‘ihia e te aai, maori râ te peropheta Iosepha Semita, e a vai apî noa’i oia. E taure‘are‘a noa â oia, ia faaauhia i te mau mea i tupu, a taparahi-pohe-hia’i oia, e 38 matahiti noa to’na.

« …Ua aparau te peropheta Iosepha Semita… i te Metua e te Tamaiti e ua paraparau i te mau melahi, e ua haere mai ratou e farerei ia’na, e ua horo‘atu ia’na te mau haamaitairaa e te mau horo‘araa e te mau taviri no te mana i ni‘a iho ia’na o tei ore roa-’tu i horo‘ahia i ni‘a i te tahi atu taata maori râ te Tamaiti iho a te Atua. Aita e taata ê atu tei ora na i ni‘a i te fenua nei tei mau i te taato‘araa o te mau taviri no te Evanelia e no te mau tau tuuraa tei tuuhia’tu i ni‘a iho ia’na mai tei tuuhia’tu i ni‘a i te peropheta Iosepha Semita i roto i te hiero no Ketelani a fareireihia’i oia i taua vahi ra e te Tamaiti a te Atua, e Mose, e Elia e Eliaha, e a veteahia’i te mau ra‘i ia’na e a farii ai oia i te mau taviri no te mana e te mana faatere e nehenehe ia’na ia haamau i te niu no te ohipa a te Atua, ma te aano e te hohonu, no te tapo‘i i te fenua i te ite o te Atua, e To’na ra mana e hanahana ».²²

E haamaitai te ohipa a Iosepha Semita i te feia ato‘a o tei ora na i te fenua nei, te feia o te ora ra, e te feia e fanauhia mai

Te peresideni Joseph F. Smith: « Aita te ohipa ta Iosepha Semita i rave na i faataa-noa-hia no teie ana‘e oraraa, no te oraraa ato‘a ra i mua e te oraraa i ma‘iri atu. Oia hoi, e tu‘ati te reira i te feia ato‘a tei ora na i ni‘a i te fenua nei, i te feia e ora ra e te feia o te haere i muri mai ia tatou. E ere te tahi mea o te tu‘ati noa i te taata a ora‘i oia i te tino nei, i te taato‘araa râ o te utuafare taata mai te tau mure ore e a muri noa’tu. No reira, mai ta‘u i parau, ua faaturahia o Iosepha Semita, ua faaturahia to’na ra i‘oa; e rave rahi tauasini taata o te haamauruuru nei i te Atua i roto i to ratou aau e i te hohonuraa o to ratou varua no te ite ta te Fatu i faahoi mai i ni‘a i te fenua nei na roto ia’na, e no reira te parau nei ratou i te parau maitai no’na e te faaite nei ratou i to’na faufaa. E aita teie i faataa-noa-hia i te hoê oire iti, aore râ i te hoê Tuhaa Fenua, aore râ i te hoê fenua, e haere râ teie i te mau fenua ato‘a, te mau opu, te mau reo e te mau nunaa ato‘a i reira te Evanelia i porohia’i e tae noa mai i teie nei taime ».²³

Te peresideni Joseph Fielding Smith: « Na roto i te hoê â rave‘a i ite ai au e o Iesu te Mesia—e te reira na roto ïa i te heheuraa a te Varua Mo‘a—ua ite au e e peropheta o Iosepha Semita e e peropheta na oia e e vai noa oia e a muri noa’tu ei hoê peropheta na te Atua.

« Te faatura nei au i to’na i‘oa mo‘a. E to’na taea‘e, to‘u papa ruau, te patereareha Hyrum Smith, ua taati oia i to’na iteraa i to’na toto i roto i te fare tape‘araa no Carthage. E te hinaaro nei au ia riro ei mauihaa i roto i te rima o te Fatu ia ite te mau hopea o te fenua e e noaa faahou te faaoraraa no te mea ua faati‘a mai te Fatu i te hoê hi‘o puai i teie nei mahana no te haamau faahou i to’na ra basileia i ni‘a i te fenua nei.

« Na roto i te varua no te iteraa e te haamauruururaa, te faaoti nei au i teie nei mau parau faaûrûhia mai roto mai i te Parau Haapiira e te mau Parau Fafau: ‘Ua rahi a‘e ta Iosepha Semita, te peropheta e te hi‘o a te Fatu, i rave, maori râ ia Iesu ana‘e, no te faaoraraa i te taata nei i roto i teie nei ao, i tei ravehia e te hoê taata ê atu o tei ora na i ni‘a iho i te reira.’ (PH&PF 135:3) ».²⁴

Te peresideni Gordon B. Hinckley, o tei a‘o i Carthage, Illinois, i te 26 no tiunu 1994, no te faahanahana i te 150raa o te matahiti no te taparahi-pohe-raa-hia te peropheta Iosepha Semita: « Ua tupu te ohipa hanahana tei haamatahia e ana tei taparahi-pohe-hia i Carthage, na roto i te hoê rave‘a maere e te umerehia… Ua haere mai teie ohipa maere, tei haamata na roto i te piiraa peropheta o te tamaiti no Palmyra, ‘mai roto mai i te medebara no te pouri, e te anaana mai mai te ateate o te marama, te teatea o te mahana, e te ri‘ari‘a o te nuu faehau ma to ratou mau reva ra,’ mai ta te peropheta i pure e ia na reira (PH&PF 109:73)…

« Te faaea nei tatou i ŏ nei na roto i te tura i teie nei arui. Te feruri nei tatou i te temeio o te oraraa tei hamata i ni‘a i te mau aivi matie no Vermont e tei hope i ŏ nei i roto i te fare tape‘araa no Carthage. Aita taua oraraa ra i roa. Te mau hotu râ no taua oraraa ra ua riro ïa ei mea e ore roa e taahia.

« Ua hau atu teie nei ohipa a te Ekalesia a Iesu Mesia i te feia mo‘a i te mau mahana hopea nei i te faufaa i te ora iho no te mau tauasini e te mau tausini taata tei pohe i roto i te taviniraa i te Ekalesia. E rave rahi mau hanere tauasini ite tei haere atu na te ao nei no te faaite i te piiraa o Iosepha Semita ei hoê peropheta a te Atua. Ua ma‘iri te autahu‘araa mo‘a tei faahoihia mai na roto ia’na i ni‘a i te mau rahiraa tai‘o-ore-hia o te mau taata parau-ti‘a e te paieti tei ahuhia e teie nei mana hanahana. E te tere nei te Buka a Moromona na te fenua nei mai te tahi ê atu ite no te Fatu ra ia Iesu Mesia.

« No te faahitiraa i te hoê parau mau tei parauhia e mea maoro i teie nei e i te tahi atu vahi, « ua riro mai te toto o te feia tei taparahihia ei huero no te Ekalesia. Na te mau iteraa papû tei haamauhia i teie nei mau vahi, i ni‘a i teie fenua o ta tatou e ruru nei i teie arui, taua mahana ve‘ave‘a e te haumi e 150 matahiti i teie nei, e haapaari nei i te faaroo o te mau taata na te ao ato‘a nei ».²⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

A tai‘o i te ohipa tei tupu tei faaitehia i te api 615. A feruri e nahea to te nunaa mana‘oraa ia farii ratou i te iteraa e e na Brigham Young e mono ia Iosepha Semita ei faatere no te Ekalesia. Nahea ta tatou e nehenehe e farii i te hoê iteraa e ua pii te Fatu i te peresideni o te Ekalesia i teie nei mahana?
Ua tohu o Iosepha no Aiphiti e te tahi atu mau peropheta tahito, i te parau no Iosepha Semita e ta’na misioni (api 616.) Mai tei faaitehia i roto i teie nei pene, ua tamau noa te mau peropheta no te mau mahana hopea nei i te haapuai i te faufaa rahi no Iosepha Semita. I to outou feruriraa no te aha o Iosepha Semita i farii ai i teie huru haapa‘oraa, na mua i ta’na taviniraa i ni‘a i te fenua nei e i muri mai?
A tuatapapa i te mau iteraa papû i te mau api 617–18 no ni‘a i te faatoro‘a-atea-raa-hia o Iosepha Semita. Nahea to tatou iteraa no ni‘a i te misioni a Iosepha Semita i ni‘a i te fenua nei e taui ai ia « hi‘o ana‘e tatou i te reira na roto i te hi‘oraa o te tau mure ore »?
A tai‘o i te mau iteraa i te mau api 619–21 no ni‘a i te orama matamua. Eaha te faariro i teie oro‘a « te oro‘a rahi roa‘e tei tupu i te ao nei mai te ti‘a-faahou-raa mai â o te Tamaiti a te Atu »? Nahea te orama matamua i riro ai « ei niu no teie Ekalesia » e « te tumu huna no to’na puai e to’na ora »? Eaha tei tauturu ia outou ia farii i te hoê iteraa no ni‘a i te orama matamua?
Ua parau te peresideni Joseph F. Smith e « e hopoi‘a na te Atua te ohipa tei ravehia e Iosepha Semita—e ere na Iosepha Semita » (api 619). I to outou feruriraa no te aha teie ohipa i riro ai ei tuhaa faufaa rahi no te misioni a Iosepha Semita?
Ua parau te peresideni John Taylor no ni‘a ia Iosepha Semita, « aita roa’tu vau i farerei i te hoê taata maramarama mai ia’na te huru » (api 621). Ua faaite râ te peresideni Taylor e te tahi atu mau peresideni o te Ekalesia e aita i rahi te mau rave‘a ta Iosepha Semita i farii no te haere i te haapiiraa. No te aha i nehenehe ai i te peropheta Iosepha ia faarahi i to’na ite? (No te tahi mau hi‘oraa, a hi‘o i te mau api 621–25). A maimi ai tatou i te ite i te pae varua, nahea ta tatou e nehenehe ai e pee atu i te hi‘oraa o Iosepha Semita?
A tai‘o faahou i te mau api 625–30, ma te hi‘o i te mau parau mau e te mau oro‘a ta te Fatu i faahoi mai na roto ia Iosepha Semita. A feruri e nahea to outou oraraa i huru ê ai mai te mea aita outou i ite i te faahoi-raa-hia mai o te evanelia. No te aha outou i mauruuru ai ia Iosepha Semita e ta’na misioni?

Te mau papa‘iraa mo‘a; 2 Nephi 3:6–19; 27:6–26; 3 Nephi 21:9–11; PH&PF 1;17; 5:9–10; 21:1–6