Pene 5
Haere i roto i te Maramarama o te Iteraa Papu
Nahea te maramarama o to tatou iteraa papu ia tupu ia riro ei hoê “iteraa hohonu mau”?
Omuaraa
Ua hau i te 32 matahiti to Harold B. Lee riroraa ei ite taaʻe no te Faaora, o Iesu Mesia. Ua faaite papu oia e, “Ma te hanahana rahi, e ma to’u varua atoa, te faaite atu nei au ia outou i to’u iteraa papu e, ua ite au e, te ora nei o Iesu, o oia te Faaora o to te ao nei.”1
No te farii i te hoê iteraa papu, te parau ra oia e:
“I te hoê taime ua farii au i te hoê pope Katorika apî tei apeehia mai e te hoê misionare tĭtĭ no Colorado. Ua ani atu vau ia’na i te tumu i haere mai ai oia, pahono maira oia e, ‘te haere mai nei au e hiʻo ia oe.’
“Ua ani atu vau e, ‘No te aha?’
“Na ô maira oia e, ‘Te imi nei au i te tahi mau aratairaa o te ore e itehia ra iaʻu. Tera râ, te feruri nei au e, te itehia ra iaʻu te reira i roto i te mau Momoni i teie nei.’
“Paraparau atura maua hoê afa hora te maoro. Na ô atura vau ia’na e, ‘E te Metua, ia haamata to oe aau i te parau ia oe i te mau mea aore to oe feruriraa i ite, te farii ra ïa oe i te Varua o te Fatu i reira.’
“Ua ata aʻe ra oia e na ô maira, ‘te manaʻo nei au e, te tupu nei te reira i niʻa iaʻu.’
“Na ô atura vau ia’na e, ‘Eiaha ïa e haamaoro faahou.’
“Tau hepetoma i muri mai, niuniu maira oia iaʻu. Na ô maira, ‘I teie Mahana Maa i muri nei e bapetizohia vau ei melo no te Ekalesia, no te mea, ua parau mai to’u aau i te mau mea aore to’u feruriraa i ite.’
“Ua faafariuhia mai oia. Ua ite oia i te mea te tiʻa ia’na ia ite. Ua faaroo oia i te mea te tiʻa ia’na ia faaroo. Ua maramarama oia i te mea te tiʻa ia’na ia maramarama, e ua rave oia i te mea te tiʻa ia rave. Ua roaa to’na iteraa papu.”2
Te mau haapiiraa a Harold B. Lee
Eaha te hoê iteraa papu?
E tiʻa ia parau e, te iteraa papu, o te hoê ïa heheuraa hanahana no te raʻi mai i te taata faaroo ra. Te faahiti atoa ra te papai Salamo i taua manaʻo ra: “… te faaite a Iehova e mea mau ïa. …” (Salamo 19:7). Ua parau te aposetolo Paulo, “… aore roa e taata e tiʻa ia parau [e aore râ ia ite], o Iesu te Fatu, maori râ, o tei parau i ta te Varua Maitai ra.” (1 Korinetia 12:3). I muri aʻe ra, ua haapii mai te mau peropheta e, “ia ui atu outou ma te aau hinaaro mau, ma te manaʻo papu, e ma te faaroo i te Mesia, na’na ïa e faaite mai i te parau mau ia outou na roto i te mana o te Varua Maitai. E na roto i te mana o te Varua Maitai e ite ai outou i te parau mau i te mau mea atoa ra.” (Moroni 10:4–5). …
Te ora nei te Atua! O Iesu te Faaora o teie nei ao! E parau mau te evanelia a Iesu Mesia tei papaihia i roto i te mau papairaa tahito e to teie nei anotau i roto i to’na ra îraa! Ua ite au i teie mau mea na roto i te faaiteraa a te Varua i to’u nei varua.3
E faatia’tu vau ia outou i te hoê iteraa tei roaa iaʻu na roto i te hoê o to matou mau taata faatere ohipa imiraa moni. E melo ta’na vahine e te mau tamarii, area o’na ra, e ere ïa i te melo. … Ua parau mai oia iaʻu e, “Eita vau e tomo i roto i te Ekalesia e tae roa’tu i te taime e roaa ai to’u iteraa papu.” Ua parau atura vau ia’na, “Ia hoi faahou mai oe i Salt Lake City nei, haere mai e farerei iaʻu.” I te tahi tau hepetoma i muri mai, i to maua paraparauraa i muri aʻe i te hoê apooraa no ta matou ohipa imiraa moni, ua parau atura vau ia’na “Aita vau i ite e, te ite ra anei oe e, e iteraa papu anei to oe e aore râ, aita; e aore râ, ua ite anei oe e, eaha te hoê iteraa papu.” E no reira, ua titau aʻe ra oia ia ite e, eaha te hoê iteraa papu. Ua pahono atu vau ia’na ma te parau atu e, “I te taime e parau ai to oe aau ia oe i te mau mea aita to oe feruriraa i ite, na te Varua ïa o te Fatu e faaite ra i te reira ia oe.” E i muri iho, na ô atura vau, “Ia au i to’u ite no niʻa ia oe, te vaira te tahi mau mea o ta oe i ite, e parau mau te reira, i roto i to oe aau. Aita e melahi e haere mai e tupaipai mai i niʻa i to oe paufifi no te parau mai ia oe e, e parau mau teie.” Ua riro te Varua o te Fatu mai ta te Fatu i parau ra: “Te farara nei te mataʻi i ta’na vahi i hinaaro ra, e te ite ra oe i to’na haruru, aita râ oe i ite i te vahi no reira mai oia ra, e te vahi e haerehia’tu e a’na ra; oia hoi, e taata atoa ta te Varua i fanau ra” (Ioane 3:8). No reira, na ô atura vau i to’u hoa, te taata faatere ohipa imiraa moni e: “I teie nei, a haamanaʻo oe e, eita to oe iteraa papu e tupu mai na roto i te hoê ohipa maere, ia tupu mai râ te reira, e rari to oe turuʻa i te pape mata oaoa i te pô. E ite oe, e to’u hoa e, i te taime e tupu mai ai taua iteraa papu ra.”4
Te faaite atu nei au ia outou i to’u iteraa papu e, ua ite au e te ora nei te Faaora, e te faaiteraa puai aʻe te roaa ia outou e te ora nei Oia, o te faaiteraa ïa ta te Varua Maitai e faaite i to outou varua e, te ora mau nei Oia. E mea puai aʻe i ta te mata e ite, e mea puai aʻe i ta te hahaere-tino-raa e te paraparau-tino-raa Ia’na, mai tera ïa te huru o taua faaiteraa a te Varua ra o te riro ei haavâ ia outou mai te mea e, e huna outou Ia’na. Tera râ, e hopoiʻa na outou paatoa e naʻu atoa nei, ia haamau i taua iteraa papu ra. Te tamau noa nei te taata i te ui mai ia matou e, e mea nahea te hoê taata ia farii i te heheuraa? I te feia faatere matamua o te Ekalesia ua parau atu te Fatu ia ratou i roto i te hoê heheuraa i te naôraa e, “E faaite au ia oe i roto i to oe feruriraa e i roto i to oe aau na, na roto i te Varua Maitai. E vai oia i roto ia oe. O te varua teie i na roto hoi i te reira i aratai ai Mose i te mau tamarii o Iseraela i te Miti Uteute ra, e a haere atu ai na roto ra.” [A hiʻo PH&PF 8:2–3]. Ia tae te faaiteraa a taua Varua ra i to tatou nei varua, e heheuraa te reira no ô mai i te Atua Mana Hope ra.5
[I te poheraa o Lazaro, na ô atura te Faaora ia Mareta e,] “Tei iaʻu te tiafaahouraa e te ora: o te faaroo mai iaʻu ra, pohe noa â oia e ora â ïa: E te taata ora atoa nei e faaroo iaʻu ra, e ore roa’tu ïa e pohe.” I reira, hiʻo atura oia i niʻa ia Mareta e na ô atura, “Ua faaroo oe i te reira?” E i roto i te hohonuraa o teie nei vahine haehaa, ua ara te hoê mea, e ua parau maira oia mai ta Petero i parau ra, “E te Fatu, e, ua faaroo vau e o oe te Mesia te Tamaiti a te Atua o te haere mai i te ao nei ra.” [Ioane 11:25–27].
Nohea mai te reira i te roaaraa mai ia’na? E ere ïa no roto mai i te taiʻoraa i te mau buka. E ere ïa no roto mai i te mau haapiiraa faaroo e aore râ, te ite ihi e aore râ, te philosophia. Ua roaa râ ia’na te hoê faaiteraa i roto i to’na aau, mai tei roaa atoa ia Petero ra. Ahiri te Fatu i pahono, e mea papu e, teie ta’na e parau atu, “E ao to oe, e Mareta, e ere ta te taata i faaite mai ia oe i te reira, na tau Metua râ i te ao ra.”… Te mea faufaa roa aʻe i te mau mea atoa e roaa ia outou, o te ite ïa i roto i to outou aau e, e parau mau teie mau mea.6
E mea iti te taata tei ite mata roa i te Faaora i te tahuti nei, area râ, o tatou tataitahi tei farii i te horoʻaraa a te Varua Maitai i muri aʻe i te bapetizoraa, e roaa ia tatou te iteraa papu e te vai mau ra Oia mai te huru e, ua ite na tatou Ia’na. Te tiʻaraa mau, mai te mea e faaroo to tatou e te vai mau nei Oia, noa’tu e aita tatou i ite mata, mai ta te Fatu i parau ia Toma, e haamaitairaa rahi to te feia “aore i ite iaʻu a faaroo mai ai” (Ioane 20:29), no te mea “e haerea faaroo hoi to matou, e ere i te haerea ite mata” (2 Korinetia 5:7). Noa’tu e aita te mata i ite, ua faaroo râ, e oaoa tatou i te oaoa eita e tiʻa ia parau, ma te noaa hoi te hopea o to tatou faaroo, oia te ora o to tatou varua (a hiʻo 1 Petero 1:8–9).7
E tiʻa anei ia tatou ia parau poto noa e, te hoê taata tei farii i te hoê iteraa papu mau, ua farii ïa i te hoê heheuraa no ô mai i te Atua ora ra, e ia ore ra, aita ïa to’na e iteraa papu? Te taata e iteraa papu to’na, ua roaa ïa ia’na te horoʻaraa no te tohu, ua roaa ia’na te varua no te heheuraa. Ua roaa ia’na te horoʻaraa na roto hoi i te reira i parau ai te mau peropheta i te mau mea no ta ratou ra mau hopoiʻa. …
E tauturu te Fatu ia tatou paatoa ia faaitoito ia roaa taua iteraa papu ra, te hoê mea faufaa rahi i roto i ta tatou faaineineraa ia roaa te iteraa. E ia roaa hoi taua feruriraa hanahana ra e, e peropheta o Iosepha Semita, e e parau mau te evanelia, te tahi atu mau fifi atoa e vai ra, e hope paatoa ïa i te mou, mai te hiona e tahe hou a hiti mai ai te mahana.8
Nahea tatou ia faaineine ia tatou iho no te farii i te hoê iteraa papu?
Te faahitihia ra te parau a [te Faaora] mai teie te huru, “… te basileia o te Atua tei roto ïa ia outou nei.”(Luka 17:21). E mea tano aʻe paha ia tatara i taua parau ra mai teie te huru, “Te basileia o te Atua tei ia outou na ïa e aore râ, tei rotopu ia outou na,” tera râ, ia feruri anaʻe au i te faahitiraa matamua o teie nei parau, oia hoi, “Te basileia o te Atua tei roto ïa ia outou nei,” haamanaʻo atura vau i te hoê ohipa tei tupu i niʻa i te hoê pŭpŭ tamarii haapii no te fare haapiiraa tuatoru no Brigham Young … tei haere mai i ‘Lion House’(e fare teie no Brigham Young, faaohipahia i teie nei ei fare fariiraa, ei fare tamaaraa taaʻe), hoê ahuru e ma ono rahiraa ratou, tei riro ei tiʻa no na fenua taaʻe hoê ahuru ma ono; ua anihia’tu ratou ia tiʻa mai i niʻa e ia faaite mai e mea nahea to ratou iteraa i te evanelia e to ratou fariiraa i te reira, … e ia faaite mai i to ratou iteraa papu. Ua riro mau taua pô ra ei pô haaputapûraa i te aau. Ua faaroo matou i te mau parau no roto mai i te mau taurearea no Mexico, no Raparata, no Beresilia, no te mau fenua Scandinave, no Farani, e no Peretane. Hoê anaʻe â huru parau. I to ratou faatiaraa, e mea nahea ratou i te iteraa i te evanelia, teie ta ratou parau: E hinaaro rahi to ratou ia ite i te parau mau. Te imi ra ratou i te maramarama. Aita râ ratou e mauruuru ra, e i roto i ta ratou mau maimiraa, ua haere mai te hoê taata ia ratou ra ma te afai mai i te mau parau mau o te evanelia. Ua pure ratou no niʻa i te reira e ua imi maite i te Fatu ma te hinaaro mau, e ma to ratou aau atoa, e ua roaa ia ratou te hoê iteraa papu e, o teie te evanelia a Iesu Mesia. … No reira, i roto i te aau o te taata tataitahi, te feia atoa e imi papu i te parau mau, mai te mea e, te vaira te hinaaro i roto ia’na ia roaa te ite, e ia haapii ma te hinaaro mau e ma te faaroo i te Fatu ia Iesu Mesia, e riro e, tei roto te basileia o te Atua ia’na, e aore râ, e parau atoa tatou e, tei ia’na te mana no te farii i te reira.9
Ua riro te oraraa paieti e te poraʻo ore ei niu no te iteraa papu o te taata, ia ore ra, eita ïa te Varua e riro ei faaite no te misioni hanahana a te Fatu e aore râ, no teie ohipa i to tatou nei anotau.10
Te ohipa faufaa matamua … note farii i te iteraa papu o te haapapuraa ïa e, ua nahonaho maitai “te oraraa pae varua” o te hoê taata. E mea tiʻa i to’na manaʻo e to’na tino ia tamâhia ia hinaaro oia e fanaʻo i te horoʻaraa a te Varua Maitai i roto ia’na, na roto hoi i te reira e tiʻa ai ia’na ia ite papu i te mau mea o te varua.11
E ere te faafariuraa i te hoê “tareta parau” faaiteraa e, e melo te hoê no te Ekalesia e e parau aufauraa tuhaa ahuru ta’na, e parau tiʻaraa melo ta’na, e parau faatia ta’na no te hiero, e te vai atu râ. To’na auraa mau, o te haavîraa ïa i te hinaaro faahapahapa e te titau-tamau-raa ia tinai i te mau ino i roto i te aau, eiaha râ i to rapaeʻau noa.12
I teie nei, ia haere anaʻe to tatou mau misionare i rapae, te parau nei tatou i te feia ei reira te mau misionare e haa ai, “Aita matou e ani nei ia outou ia tomo mai i roto i te Ekalesia ia puta noaʻe to outou iʻoa i roto i te mau buka. E ere o te reira ta matou manaʻonaʻoraa. Te haere mai nei râ matou no te pûpû atu ia outou na i te horoʻa rahi aʻe o ta to te ao nei e nehenehe e horoʻa, oia te horoʻaraa o te basileia o te Atua. E roaa te reira ia outou mai te mea e, e farii e e tiaturi outou, tirara’tu ai.” Tera ïa ta matou titauraa i to te ao nei. “E nehenehe ta matou e haapii atu ia outou i te mau parau haapiiraa a te Ekalesia a Iesu Mesia e ia faaite atu i to matou iteraa papu no niʻa i te hanahana o teie ohipa, tera râ, no te faaiteraa e, e parau mau teie mau mea ta matou e haapii atu nei, na outou iho te reira e imi.”
Te parau nei matou i te mau taata ta matou e haapii nei e, “I teie nei, na outou e ani i te Fatu. A imi maite, a rohi, e a pure.” Tera ïa te raveraa no te aratai mai i te taata i roto i te Ekalesia, e mai te reira atoa te raveraa i te matamua ra no te aratai mai i roto i te Ekalesia nei i te feia aau parau tiʻa i te mau vahi atoa.13
I to Iesu nanaraa i to’na mata i niʻa i te raʻi i roto i te pure, inaha, “ua tae i te hora,” [a hiʻo Ioane 17:1] ua faahiti aʻe ra oia i te hoê parau mau hohonu roa o ta te varua tataitahi e tiʻa ia taa papu: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3). E auraa hohonu atu â to teie parau i te auraa o taʻu e tuatapapa atu i ô nei, e rave noa mai râ vau i te hoê manaʻo no roto mai i te reira. Nahea e roaa ai ia outou te iteraa i te Metua e te Tamaiti? … E haamata tatou i te farii i taua iteraa ra na roto i te taiʻo-maiteraa i te parau. Ua haapii mai te Faaora ia tatou ia “… imi … i te parau i papaihia ra, no te mea te manaʻo na outou e roaa te ora mure ore i reira: o te faaite ïa iaʻu o taua mau parau ra.” (Ioane 5:39). E itehia i reira te aamu no te mau mea ta te Atua i rave i te taata nei i roto i te tau tuuraa tataitahi, e tae noa’tu i te mau ohipa e te mau parau a te mau peropheta e ta te Faaora iho tei horoʻahia mai i raro aʻe i “te faaururaa a te Atua,” mai ta te Aposetolo Paulo i parau ra. “e mea maitai ei haapiiraa, ei aʻoraa, ei faaiteraa hapa, ei faaite mai i te paarau-tia ra: ia au roa te taata no te Atua i te mau ohipa maitatai atoa ra.”(2 Timoteo 3:16–17). E mea tiʻa i te feia apî ia taiʻo i teie mau buka moʻa ma te tu’ua ore te mahana.
Eita râ e navaʻi i te haapiiraa i te parau no to’na oraraa e ta’na mau ohipa na roto noa i te taiʻo- maite-raa i te parau. Ei pahonoraa i te uiraa e nahea e roaa ai i te hoê taata te iteraa Ia’na e i Ta’na ra parau haapiiraa, teie ta te Fatu i parau atu: “O tei hina-aro maite i te haapaʻo i to’na ra hinaaro, e ite ïa.” (Ioane 7:17). Ia manaʻo outou, e riro anei te hoê taata tei ore â i rave aʻe nei i te mau tamatamataraa i roto i te fare maimiraa [Laboratoire] ei faatere no te ite ihi? E tiaturi anei outou i te mau manaʻo paraparau o te hoê taata o tei ore i ite i te parau no te pehe, e aore râ, e tiaturi anei outou i te manaʻo o te hoê taata tei ore i peni aʻe nei? Oia atoa te taata mai ia outou o te hinaaro e “ite i te Atua” o te taata ïa e haapaʻo i To’na hinaaro e o te haapaʻo i Ta’na mau faaueraa e o te faaohipa i te mau mea i orahia e Iesu.14
Te titauraa i te iteraa na roto i te faaroo e ere ïa i te purumu ohie no te haapiiraa. E titauhia te itoito rahi e te rohi-tamau-raa i roto i te faaroo. …
Ei haapotoraa, e ere te haapiiraa na roto i te faaroo i te ohipa na te taata hupehupe. Te na ô ra te parau a te hoê taata e, e titauhia te puai o te varua taatoa, e te manaʻo hope e ia taamuhia te reira i niʻa i te Atua—e mea tiʻa ia tano maitai te taamuraa. I reira anaʻe e roaa ai “te iteraa na roto i te faaroo.”15
Eaha te tiʻa ia tatou ia rave no te haapuai i to tatou iteraa papu?
[Ua parau atu te Fatu ia Petero,] “I ani na Satani ia outou e ueue mai te sitona i ueuehia ra: I pure na râ vau ia oe ia ore ia mure to oe faaroo; e ia faafariuhia mai oe ra, a faaitoito i to mau taeaʻe”(Luka 22:31–32). I teie nei, te hinaaro nei au ia ite mai outou e, te parau nei Oia i te raatira no te Tino Ahuru Ma Piti. Te pure nei au no oe; i teie nei a haere e a faafariu mai, e ia faafariuhia mai oe ra, a faaitoito i to oe taeaʻe. To’na auraa, [e riro ta-tou] i te ore e faafariuhia e aore râ, e nehenehe tatou e faafariuhia. To outou iteraa papu, tei roto ia outou te reira i teie mahana, eita râ te reira e vai tamau noa i roto ia outou.16
E au te iteraa papu mai te hihi o te avaʻe, e ore e tiʻa ia tapeahia; mai te ua’a tiare ra to’na pautuutu ore; e titauhia ia faaoraora ia’na i te mau poʻipoʻi atoa o to outou oraraa. E titauhia ia outou ia tapea noa i te reira na roto i te taiʻo-maite-raa i te parau papai, na roto i te faaroo, e na roto i te pure. Mai te mea e, e riri outou, mai te mea e, e faahoa outou i te mau taata tano ore, e faaroo outou i te mau aamu tano ore, e taiʻo outou i te mau parau tano ore, e rave outou i te mau peu iino, aita ïa e ohipa pohe atu mai te iriti-ê-raa i te Varua o te Atua i rapaeʻau ia outou, mai te huru ra e, ia haere atu outou i rapae i teie fare, na roto atu outou i te hoê piha maramarama i te haere atu i rapae i roto i te pouri.17
Te mea tei roaa ia outou i teie mahana na roto i te iteraa papu, e nehenehe outou e ere i te reira ananahi mai te mea e, aita outou e rave i te hoê mea no te reira. E nehenehe to outou iteraa papu e tupu i te rahi e aore râ, i te iti roa, tei ia outou noa. No reira, e haamanaʻo anei outou i ta outou hopoiʻa i teie nei? Na ô mai ra te Fatu e, “O tei hinaaro maite i te haapaʻo i to’na ra hinaaro, e ite ïa i taʻu e haapii nei e na te Atua, e naʻu iho” (Ioane 7:17).18
Te Feia Moʻa i te Mau Mahana Hopea Nei tei faafariu-mau-hia, e ore ratou e rave i te peu faufau. Te Feia Moʻa i te Mau Mahana Hopea Nei tei faafariu-mau-hia, e ore ratou e rave i te ohipa parau tiʻa ore, e ore ratou e haavare, e ore ratou e eia. To’na auraa ra, oia hoi, i teie mahana te vai ra te iteraa papu o te hoê taata, ia rave râ oia i te mau peu taaʻe atu i te mau ture a te Atua ra, no te mea ïa e, ua moʻe ê to’na iteraa papu, e e titauhia ïa ia’na ia rohi ia roaa faahou mai te reira ia’na. E ere te iteraa papu mai te hoê taoʻa e roaa mai ia outou i teie mahana e o ta outou e tapeʻa tamau noa. E nehenehe te iteraa papu e tupu i te rahi e e riro mai ei iteraa hohonu mau, e aore râ, e tupu oia i te itiraa e morohi roa’tu, tei te huru o te ohipa ta tatou e rave no te reira. Te parau nei au e, ia tamau noa tatou i te faaoraora i te iteraa papu i tera mahana e tera mahana, na te reira e faaora ia tatou i te mau herepata a te enemi ra.19
Nahea te iteraa papu e riro ai ei tutau no te varua?
I te anotau o te [Mesia], i te hoê taime ua faaite papu To’na raatira aposetolo, o Petero, i to’na faaroo e to’na iteraa papu no niʻa i te misioni hanahana a te Fatu: “O te Mesia oe, te Tamaiti a te Atua ora ra.” Na ô atura te Fatu i te pahonoraa ia Petero e, “…e ere ta te taata i faaite mai ia oe i te reira, na tau Metua râ i te ao ra.” e ei niʻa iho “i teie nei păpă ”—e a ore râ, e nehenehe atoa ia parau e, te iteraa papu tei heheuhia mai e te Varua Maitai, oia te heheuraa e, o Iesu te Mesia—i patuhia ai Ta’na ra Ekalesia, e “e ore roa ïa e noaa i te uputa o hade.” (Mataio 16:16–18).20
Te fatata mai nei te taime, tei mua roa hoi ia outou na i teie nei… mai te mea e, aita taua iteraa hohonu mau i roto ia outou e, e parau mau teie mau mea [te evanelia, te Ekalesia, e te vai atu râ] eita ïa outou e maahia i roto i te mau ati e farara mai i niʻa iho ia outou ma te tamata i te afaʻi ê atu ia outou i teie mahana i rapae i to outou mau vahi paruruhia. Mai te mea râ e, ua ite outou ma to outou varua atoa e, e parau mau teie mau mea …, e ite ïa outou e, o vai o Iesu to outou Faaora, e o vai o te Atua to outou Metua; e ite ïa outou e, eaha te faaurûraa a te Varua Maitai. Mai te mea e, e ite outou i teie mau mea, e riro ïa outou mai te hoê tutau i roto i te mau vero atoa e uihi mai i niʻa i to outou fare, mai tei faaitehia i roto i te parabole a te Fatu ra. Tei faaroo i Ta’na ra parau e ua haapaʻo i Ta’na mau faaueraa, e au ïa mai te fare tei faatiahia i niʻa i te păpă ra; e mairi ihora te ûa, e tahe ihora te pape pue e te mataʻi hoi i te uihiraa mai i niʻa iho i taua fare ra, e aore roa i parari, no te mea ua patuhia hoi i niʻa i te păpă. “Area tei faaroo noa mai i taʻu nei mau parau, e aore i haapaʻo, e faitohia ïa i te maamaa o tei faatia noa i to’na fare i niʻa i te one; e mairi ihora te ûa, e tahe ihora te pape pue, e te mataʻi hoi i te uihiraa i niʻa iho i taua fare ra, mairi ihora e e parari rahi to taua fare ra” (Mataio 7:26–27).
I parau na te Fatu, e te parau atu nei au ia outou i teie mahana e, e mairi mai te ûa o te ati, te ûa o te fifi, te pape pue e te mataʻi o te mau tamataraa paari i niʻa iho i to outou fare. E tupu mai te faahemaraa ia rave i te hara, e roohia outou i te ati, e roohia outou i te mau fifi i roto i to outou oraraa. Te fei o te ore e topa ia tae mai taua mau tamataraa ra, o te feia anaʻe ïa tei faatia i to ratou fare i niʻa i te păpă o te iteraa papu. E ite mau outou, noa’tu eaha te ohipa e tupu mai; eita e tiʻa ia outou ia tiʻa noa i niʻa i te maramarama tipee [oia hoi, ia arai i te mau fifi ma te tiaturi noa i niʻa i te iteraa o vetahi ê]. Ei niʻa anaʻe i te maramarama tei roaa ia outou na roto i te faaiteraa a te Varua outou e tiʻa ai, taua faaiteraa a te Varua ra hoi o te tiʻa ia outou paatoa ia farii.21
Eita e navaʻi no tatou te Feia Moʻa i te Mau Mahana Hopea Nei ia pee noa i to tatou mau tiʻa faatere e ia haapaʻo noa i ta ratou mau aʻoraa, ta tatou râ hopoiʻa rahi roa aʻe, o te titauraa ïa ia roaa to tatou iho iteraa papu aueue ore no niʻa i te piiraa hanahana o teie mau taata, e te faaiteraa e, te mau mea atoa ta ratou i parau mai ia tatou nei, o te hinaaro atoa ïa o to tatou Metua i te Ao ra.22
I teie mahana te haere mai nei au i mua ia outou i roto i to’u tiʻaraa ei ite taaʻe ma te faaueraa ia faaite atu i taua iteraa ra. E rave rahi mau mea tei tupu i niʻa iaʻu e tei haapapu roa i to’u iteraa. I te hoê taime te titau ra vau i te Varua no te horoʻa i te hoê aʻoraa no niʻa i te tumu parau o te Pâta, te tiafaahouraa o te Faaora; no reira, ua haere au, o vau anaʻe, i roto i te hoê piha, e ua taiʻo vau i na evanelia e maha, te parau ihoarâ no te Faatatauroraa, te Tiafaahouraa, e ua tupu te hoê mea i niʻa iaʻu. A taiʻo noa ai au i te mau parau, mai te mea ra e te ite mata ra vau i taua ohipa ra, eiaha râ te aamu anaʻe. E ua horoʻa vau i taʻu parau poroʻi, e ua faaite au i to’u iteraa papu e, i teie nei, mai te hoê taeaʻe iti haihai roa i roto i taʻu mau taeaʻe nei, o vau atoa, ua roaa to’u iho iteraa no niʻa i te poheraa e te tiafaahouraa o to tatou Fatu. No te aha? No te mea ua tupu te ahu i roto i taʻu varua, e ua tiʻa iaʻu ia parau papu ma te feaa ore. Oia atoa outou. E te mea oaoa roa’tu i roto i te ao atoa nei, o te tutau rahi no to outou varua, i roto i te taime ati, i roto i te taime o te faahemaraa, i roto i te mau taime maʻi, i roto i te mau taime papu ore te manaʻo, i roto i te mau taime rohiraa e te ohipa, [maori râ] e ite outou ma te papu e te feaa ore e, te ora nei te Atua.23
Te Mau Manaʻo Tauturu no te Haapiiraa e te Aparauraa
-
No te aha te heheuraa no ô mai i te Varua Moʻa ra i riro ai ei “faaiteraa puai aʻe te roaa ia outou” e, te ora nei te Faaora?
-
Eaha te haapiiraa ta te Peresideni Lee i horoʻa mai no te fariiraa i te iteraa papu no niʻa i te evanelia?
-
Nahea tatou e farii ai i te iteraa no niʻa i te Metua i te Ao ra e ia Iesu Mesia?
-
I to outou manaʻoraa, eaha ta te Peresideni Lee e parau ra a na ô ai oia e, “E au te iteraa papu mai te hihi o te avaʻe, e ore e tiʻa ia tapeahia;… e titauhia ia faaoraora ia’na i te mau poʻipoʻi atoa o to outou oraraa”?
-
Eaha te mea e faaiti e aore râ, e faamorohi roa’tu i to tatou iteraa papu? Eaha te tiʻa ia tatou ia rave ia riro te maramarama o to tatou iteraa papu ei “iteraa hohonu mau”?
-
Ia roaa anaʻe to tatou iteraa papu, nahea tatou i te tauturu ia vetahi ê ia haapuai i to ratou iteraa papu?
-
Nahea te iteraa e te ora nei te Atua i riro ai ei tutau no to tatou varua i roto i te mau taime ati? Eaha te taime i riro ai to outou iteraa papu no niʻa i te Faaora ei tumu no to outou puai?