Pene 20
Te Haapaoraa i te Ture no te Viivii Ore
Eaha te mea o ta tatou e nehenehe ia rave no te paruru i to tatou iho viivii ore e i te viivii ore o to tatou utuafare?
Omuaraa
Mai te mea, te hinaaro nei outou ia vai mai te mau haamaitairaa o te Varua o te Fatu i niʻa ia outou, e mea tiʻa ia outou ia tapeʻa mâ noa e te poraʻo ore i to outou tino, oia te hiero o te Atua,” te na reira ra te Peresideni Harold B. Lee.1
Ua faaohipa oia i te rata peʻapeʻa a te hoê taata o tei haapaʻo ore i te ture no te viivii ore, no te faaiteraa i te faufaa o teie nei aʻo: “I te tau a fanaʻo ai au i te Varua o te Fatu e a haapaʻo ai au i te evanelia, ua matara noa te mau api o te papaʻiraa moʻa i mua iaʻu, e e roaa iaʻu te iteraa apî, e e puta taʻue noa mai i roto i to’u varua te auraa o te mau api o te papaʻiraa moʻa. I teie nei, mai te taime a hurihia ai au i rapae i te Ekalesia, aita vau e taiʻo faahou ma te haroaroa; te taiʻo nei au i te mau api ma te manaʻo tapitapi, inaha, i mua ra, ua feruri au e, ua maramarama maitai au. Na mua aʻe nei, ua fanaʻo vau i te raveraa i te mau oroʻa o te evanelia no taʻu mau tamarii, ia haamaitai i taʻu mau aiu, ia bapetizo ia ratou, ia haamau ia ratou, ia haamaitai ia ratou ia roo- anaʻe-hia ratou i te maʻi. I teie nei, ua titauhia iaʻu ia tiʻa noa i te hiti e ia hiʻo i te tahi atu mau taata ia rave i taua mau oroʻa ra. Ua mataro vau ia haere i te hiero, i teie râ mahana, ua piri ïa te uputa o te hiero i mua iaʻu. Ua mataro vau ia amuamu rii no niʻa i te mau ô o ta te Ekalesia e titau nei, te aufauraa i te tuhaa ahuru, te aufauraa i te ô haapaeraa maa, te aufauraa i teie, e te aufauraa i tera, e i teie nei, i te mea e, ua hurihia vau i rapae i te Ekalesia, aita e fariihia iaʻu ia aufau i te tuhaa ahuru; i teie nei, ua piri te mau uputa o te raʻi i mua iaʻu, i te mea e, aita e tiʻa iaʻu ia aufau i te tuhaa ahuru. I roto i toʻu oraraa taatoa, eiaha roa vau e amuamu i te mau titauraa a te Ekalesia ia pŭpŭ i taʻu mau taoʻa. E mea maitai taʻu mau tamarii i niʻa iaʻu, tera râ, ua ite au e, i roto i te hohonuraa o to ratou varua, te haamâ ra ratou i te metua tane no’na te iʻoa o ta ratou e mau ra.”2
Te parau ra te Peresideni Lee e, “Taua taata ra e aore râ, taua vahine ra o tei hi’o tutonu i to’na mata i niʻa i te opuaraa mure ore o te ora mure ore, e taata taoʻa rahi ïa, i te mea e, ua î to’na varua taatoa i te hoê auahi o te tae mai i niʻa i te taata o tei tapeʻa tiamâ noa i to’na oraraa.”3
Te mau haapiiraa a Harold B. Lee
No te aha e mea faufaa roa ia haapaʻo i te ture no te viivii ore?
Mai te mea e, e tahoêhia taua taata ra e taua vahine ra i roto i teie taatiraa moʻa o te faaipoiporaa, i reira hoi te tino tahuti nei e faaineinehia ai ei sekene no te mau varua e tonohia mai raʻi mai, ua tuu te Fatu i roto i te ouma o te mau tamaroa atoa e o te mau tamahine atoa i te hoê hinaaro no te atiraa te tahi i te tahi. E mau hinaaro moʻa teie, tera râ, e mau hinaaro puai rahi. No te parururaa eiaha ia haafaufaa-ore-hia te ora, e aore râ, eiaha ia faaohipa-tia-ore-hia no te haamauruuru noa i te hiaai o te taata nei, ua tuu te Atua na mua roa, i roto i te anaʻiraa o te mau hara rahi o tei faaarahia mai ia tatou i roto i na Ture Hoê Ahuru, a tahi, te taparahi taata, e te piti ra, te peu faufau. “Eiaha roa oe e taparahi i te taata! Eiaha roa oe e faaturi!” (A hiʻo Exodo 20:13–14). … Te aʻo atu nei te Ekalesia ia haapao i te huru o to outou ahu e ta outou mau peu, e ia patoʻi ê atu i te mau manaʻo iino, na te reira hoi e tuu i te mau parau faufau i niʻa i to outou utu, e ia faariro i ta outou mau peu ei mau peu hairiiri e te au ore. E mea tiʻa i te pihaa o te oraraa ia vai mâ noa, i reira e roaa ai te hau i roto i te faaipoiporaa moʻa.4
Ia vai viivii ore noa outou e tiʻa ai. Teie te hoê o te mau faaueraa rahi aʻe.
“Ia î noa atoa hoi to outou mau aau i te aroha i te mau taata atoa, e i te utuafare faaroo, e ia faaunauna noa te taiata ore i to outou mau feruriraa i te mau taime atoa; ei reira to outou tiaturiraa e puai roa ai i mua i te aro no te Atua; e e mairi mai ai te haapiiraa no te autahuʻaraa i niʻa i to outou aau mai te hupe no te raʻi maira.
“E riro te Varua Maitai ei apiti no outou i te mau taime atoa, e to outou sepeta ei sepeta taui ore no te parau tiʻa e te parau mau; e e riro to outou mana ei mana mure ore, e e tahe mai te reira ia outou ma te faahepo ore e a muri e a muri noa’tu.” (PH&PF 121:45–46).
Tera râ, eita roa’tu taua mana ra, taua puai ra, taua apitiraa a te Varua Maitai ra e roaa ia tatou maori râ, ia haapii tatou ia riro ei feia viivii ore i roto i te manaʻo, i roto i te peu, e i roto i ta tatou mau ohipa e rave.5
A ahu na ia outou i te haana tamaʻi o te parau tiʻa ra. Eiaha e vaiiho ia outou ia topa i roto i te faahemaraa i roto i te hoê taime ati. A paruru i taua patu o te poraʻo ore ra. E hiero to outou tino no te Varua Maitai, mai te mea e, e tapeʻa mâ noa outou ia’na e te viivii ore.6
A haapaʻo maitai-roa’tu i te ture no te viivii ore mai tei ore â i haapaʻohia a’ʻ nei e outou, na roto i te feruriraa i te mau manaʻo mâ. A haamanaʻo outou i te parau ta te Fatu i parau ra, “I parau-hia mai te feia tahito ra e, Eiaha oe e faaturi: Te parau atu nei râ vau ia outou, O te hiʻo noa’tu i ta vetahi ê ra vahine ei faatupu i te hinaaro, ua faaturi ïa ia’na i to’na ihora aau” (Mataio 5:27–28). I teie nei, ei manaʻo viivii ore to tatou e tiʻa ai. A tinai i ta outou mau huru peu atoa o te faatupu mai i te mau ohipa faufau, e a patoʻi i te peu faufau i te pae morare, oi faaino roa hoi te reira i to outou oraraa.7
Eaha te mau hopearaa o te haapaʻo-ore-raa i te ture no te viivii ore?
Aitâ i itehia aʻe nei te hoê faaheporaa mai teie te huru i niʻa i te parau no te parau tiʻa e no te mâ e no te viivii ore. Ua hohonihia nei te tiʻaraa i te pae morare e te mau mana o te ino. Aita e mea faufaa aʻe no tatou ia rave maori râ, te haapiiraa ïa ma to tatou puai atoa, ma te arataihia e te Varua o te Fatu, no te ani-taparuraa i to tatou mau taata i roto i te ao nei, ia ora tapiri i pihaʻi iho i te Fatu i roto i teie tau faahemaraa rahi.8
Te ‘aroraa rahi aʻe a Satane i teie mahana, o te haamouraa ïa i te utuafare, e ia faainaina i te ture o te viivii ore e i te huru moʻa o te fafauraa o te faaipoiporaa.9
Ua opani te hoê o ta tatou mau amuiraa tĭtĭ na roto i te hoê manaʻo maitai roa, i te tahi aʻe nei tau. … I to te peresideni tĭtĭ tiʻaraa mai i niʻa no te faaoti i te amuiraa, ua hi’o aʻera oia i te tahua i niʻa tei î roa i te feia apî e ua na ô aʻera, “Te hinaaro nei au e parau i te hoê mea ia outou e te feia apî e parahi ra i te tahua i niʻa. Penei aʻe, i teie taime o vau to outou peresideni tĭtĭ, e haere mai outou tataitahi e farerei iaʻu no te hoê uiuiraa—no te faanuuraa anei i roto i te autahuʻaraa, e aore râ, no te tahi anei pii-raa o te tuuhia mai i niʻa ia outou, e aore râ, no te parau faatia anei no te hiero—taaʻe noa’tu te tahi mau mea, e ui atu vau ia ou-tou i te hoê uiraa no niʻa i te huru o to outou varua. E mea mâ anei outou i te pae morare? Mai te mea e, e pahono mai outou ma te haavare ore e, ‘E, e te Peresideni, e mea mâ vau i te pae morare,’ e roaa te oaoa ia outou. Mai te mea e, e pahono mai outou e, ‘Aita, aita vau i mâ i te pae morare,’ e peʻapeʻa outou; e mai te mea e, e haavare mai outou iaʻu, e î to outou varua i te oto e hope noa’tu to outou oraraa.”…
Ia tae i te hoê mahana e farerei atu tatou i tei Hamani ia tatou, e mai tei papaihia e Moroni ra—e reo paari mau teie—te na ô ra oia e, “Te manaʻo ra anei outou e, e mauruuru outou ia parahi i mua i te aro o tei Moʻa i Iseraela nei a ite noa ai outou i ta outou mau hara?” Te parau ra oia e, “E hau aʻe to outou mauruuru ia parahi i ó te mau varua faahapahia i hade ra, i to outou mauruuru ia parahi i mua i te aro o tei Moʻa i Iseraela a vai noa ai ta outou mau hara e ta outou mau ohipa faufau i niʻa ia outou.” [A hiʻo Moromona 9:3–4].10
Ia ofati anaʻe tatou i te mau faaueraa, te faaino ra ïa tatou ia tatou iho e ia vetahi ê atoa. Ta te hape e horoʻa mai, o te ahoaho ïa, te oto, te riri, e aore râ, te faaatea-ê-raa, mai te mea e, aita tatou e tatarahapa. Ia na reira tatou, te faaiti ra ïa tatou i to tatou tiaturi i niʻa ia tatou iho; te faaiti ra ïa tatou i te faufaa o to tatou tiʻaraa ei mau tamaiti e ei mau tamahine na te Atua; e riro tatou i te faaruʻe i to tatou huru mau!
Ia rave anaʻe tatou i te hara, e riro mai tatou ei mau melo huru paruparu no te utuafare taata nei. … E nehenehe tatou e haafifi ia vetahi ê; e nehenehe atoa tatou e haapepe i te utuafare taata na roto i te raveraa piʻo, no to tatou iho mau ino, e ua ati roa ïa te taata nei i reira. E nehenehe te peu taiʻata a te mau metua e faatupu i te hoê peu o te vai i tera uʻi e tera uʻi, noa’tu e, ua rau te huru faaiteraa te mau tamarii mauruuru ore i to ratou inoino e to ratou patoʻiraa. Ia ore te here e vai i roto i te utuafare, e tupu mai te tahi mau arepurepuraa i niʻa ia tatou paatoa; o te mau taata atoa o te aufau i te hoo ino no taua huru hape ra. Eaha te mea faufaa atu no te utuafare taata nei i te riroraa tatou ei mau taata taiʻata ore, i te faatupuraa tatou i te here i roto i te utuafare—oia hoi, i te haapaʻoraa tatou i te mau faaueraa atoa?11
Aita roa’tu to te hoê tane e aore râ, to te hoê vahine tiʻaraa teitei i roto i teie nei Ekalesia o tei haapaʻo ore i te ture o tei titauhia ia’na ia haapaʻo, ma te ore e aratai na muri iho ia’na e rave rahi taata o tei faatae i to ratou tiaturiraa i niʻa ia’na. Ua haapepe oia i to ratou aau; ua faahiʻa oia i te feia faaroo paruparu, e e rave rahi o tei faaruʻe i teie nei Ekalesia na roto i te haapaʻo-ore-raa te taata o ta ratou i tiaturi, i te mau ture i titauhia ia’na ia haapaʻo.12
Ua faaite atu vau ia outou i te ino o te hara; e utuʻa hoi te pohe no te hara, tera râ, o outou o tei rave i te hara, na roto i te taraehara a te Fatu ra o Iesu Mesia, e na roto hoi i te tatarahapa, e iteahia ia outou te tatarahapa e te eʻa e tae atu ai i te oaoa i roto i teie nei oraraa e te îraa i roto i te oraraa a muri aʻe.13
Eaha te hopoiʻa a te feia tei mau i te autahuʻaraa ei tuʻatiraa i te parau no te ture o te viivii ore?
E te mau taeaʻe, e mea tiʻa ia faaoti faahou tatou i to tatou manaʻo e, e haapaʻo tatou i te ture no te viivii ore: e mai te mea e, ua hape tatou, e haamata anaʻe ïa tatou i teie nei i te faaafaro i te reira mau hape. E haere anaʻe tatou i roto i te maramarama; e te taparu atu nei au ia outou e te mau taeaʻe, eiaha e haaviivii i te maitai nehenehe tei roaa ia outou ei mau tane, mai te feia atoa o tei taati atu i te rima e Tei Hamani, i roto i te parau no te fanauraa i te varua taata, na roto i te faaóraa’tu ia outou i roto i te tahi mau huru taatiraa i haamana-ore-hia e te ture, o te faatupu mai i te haamâ e o te faaino roa i te aau o ta outou vahine e o ta outou mau tamarii. E te mau taeaʻe, te taparu atu nei matou ia outou ia vai mâ noa outou, e ia haere maite na te eʻa o te parau mau e te parau tiʻa, ei reira hoi e roaa ai ia outou te haapoupouraa a te hoê Metua i te Ao ra, inaha, e mau tamaiti outou na’na.14
Te hinaaro nei au e faaara i teie tino autahuʻaraa rahi i te hara rahi no Sodoma e o Gomora, o tei parauhia e, o te piti ïa o te hara ino roa i muri noa mai i te hara taparahi taata. Te parau nei au i te parau no te hara faaturi, mai ta outou i ite, o te iʻoa ïa i faaohipahia e te Fatu no te parauraa i te parau no te hara faufau haamana-ore-hia, oia te hara poreneia e te faaturi; taaʻe noa’tu te reira, te vai atoa ra te hara ino roa o te peu mahu, mai te huru ra e, te rahi noa’tu ra te reira, e te rahi noa atoa’tura te taata i te farii i te reira i roto i te Babulonia o te ao nei, oia te vahi eiaha roa te mau melo o te Ekalesia e amui atu.
A ora ai tatou i roto i te ao nei, eiaha e faariro ia tatou ei taata no te ao nei. Ia tamata te mau fare haapiiraa e aore râ, te mau vahi hautiraa i te faateniteni i te parau no te mau peu faufau, inaha, aita’tu ta te reira e horoʻa mai maori râ, te faatupuraa i te hiaai ia tamatamata, e mea tiʻa ïa i to te autahuʻaraa o te ekalesia ia patoʻi uʻana e te tuutuu ore i te reira, ma te faaohipa i te mau huru raveʻa atoa i au i te ture o te tiʻa ia faaohipahia.15
No te hoê tamarii a te Atua, te hoê ihoa râ tamarii o tei mau i te autahuʻaraa te ora itoito nei i roto i te Ekalesia, mai te mea e, e faariro oia i te horoʻa ta te Atua i horoʻa ia’na, oia hoi, te mana no te poieteraa, ei ohipa hauti noa, e aore râ, mai te mea e, e faariro oia i to raua o to’na hoa here apipitiraa ei raveʻa faatupu-noaraa i to’na mau hiaai tino, te hauti ra ïa oia i te hauti a Satane, inaha, ua ite papu o Satane e, e riro taua huru peu ra ei raveʻa papu no te haamou i roto i te hoê taata, i te maitai e titauhia no te farii i te apitiraa a te Varua o te Fatu.16
Nahea te mau metua ia haapii i ta ratou mau tamarii ia maramarama e ia haapaʻo i te ture no te viivii ore?
I teie nei, tei roto i te utuafare e ravehia ai te haapiiraa maitai roa aʻe o te Ekalesia, inaha, te hopoiʻa a te metua tane e a te metua vahine i roto i te utuafare, o te haapiiraa ïa i ta raua mau tamarii mai to ratou aruaruraa mai â, i te mau parau tumu papu o te faaroo, te tatarahapa, te tiaturi i te Faaora, e tae noa’tu i taua mau parau tumu matamua o te taiʻata ore, te viivii ore, te tura, e te vai atu ra. Te puai rahi aʻe o te tiʻa i te tamarii ia farii no te faaatea-ê-raa ia ratou i teie mau mea o te ao nei, o te mataʻuraa ïa ia ere ratou i to ratou parahiraa i roto i te taatiraa o te utuafare mure ore. Mai te mea e, ua haapiihia ratou i to ratou tamariiraa e i to ratou taurearearaa, ia here e ia faatura i te utuafare, e feruri ïa ratou e piti aʻe taime hou a rave ai ratou i te hoê mea o te tapu ê roa e a muri noa’tu i to ratou parau i roto i taua utuafare mure ore ra. No tatou nei, ua riro te parau no te faaipoiporaa, te fanauraa i te tamarii, te taiata ore, te viivii ore, ei mau parau mau faufaa roa aʻe tei roaa ia tatou—oia te mau mea faufaa rahi roa.17
Ua haapapu anei tatou e, i roto i te parau no te tupuraa o taua varua iti naʻinaʻi ra o tei tuuhia mai i roto i to tatou rima, eita roa tatou e faaruʻe ia’na ma te ore e haafaanao ia’na i to tatou paari ma te haapii ia’na i te mau mea atoa o ta tatou i ite? A tupu ai oia i te paariraa, ua haamau anei tatou i te niu e i te tino o te hoê oraraa paari, te auhune, e te oaoa, e aore râ, ua vaiiho noa anei tatou ia’na ia tamatamata haere i te mau mea atoa, ma te tiaturi e, na te raʻi e paruru mai i to tatou here iti i roto i ta’na titauraa i te ite?
Penei aʻe na roto i te ohipa o tei tupu, i reira e ô ai te manaʻo o taʻu e tamata nei i te faaite. … Teie te hoê taurearea faahoro manureva apî roa, oia anaʻe teie e rere teitei nei na niʻa aʻe i te ta-hua tauraa manureva, i te taime haapiipiiraa o tei matarohia … e inaha, ua tuo taʻue aʻera oia na roto i te faanahoraa o te radio paraparau, i te taata faatere o te pû hi’opoʻaraa: “Aita vau e ite faahou! Ua pô to’u mata.” Ahiri i tupu te riʻariʻa rahi i roto i te pû hi’opoʻaraa, e mea papu maitai e, ua ati roa taua faahoro manureva apî ra e tae noa’tu i taua manureva ra; auaʻe râ, e taata faatere aravihi teie, inaha, no to’na maororaa i roto i taua ohipa ra, ua ite oia e, i te tahi mau taime, e matapohia te hoê faahoro manureva apî mai te mea e, e mea puai roa te hitahita i roto ia’na. Na roto i te mărû, ua paraparau te taata faatere i taua taurearea ra i niʻa, ma te aratai maite ia’na i roto i te faanahoraa o te faaohu-noa-raa no te haapou mărû noa mai i raro, e ma te faaue i taua taime atoa ra, ia hopoi oioihia mai te mau raveʻa parururaa, ia perehi noa’tu te manureva. Ia hope nau minuti ahoaho ra o tei riro ei taime mai te huru ra e, aita to’na e hopearaa no te feia o tei mataitai i taua ohipa ra, ua faatau maira taua faahoro manureva matapo ra i te huira o to’na manureva i niʻa i te tahua tauraa e a tere noa’tu ai e tae roa’tu i te hoê vahi tapearaa. Ua faahoro oioi atura te pereoo faahoro maʻi i teie tamaiti i te fare maʻi o te nuu no te rapaau ia’na.
Ahiri i tupu te mataʻu i roto i te taata faatere no te pû hi’opo- ʻaraa, e aore râ, ahiri e, aita oia i haapaʻo i ta’na ohipa, e aore râ, ahiri e, aita oia i ite eaha te ohipa e rave i roto i taua huru fifi ra, eaha ïa te ohipa e tupu? Te pahonoraa, o te ohipa mau ïa e tupu i niʻa i te [hoê taurearea] aita to’na e taata haapii paari e te aravihi i te taime a topa ai oia i roto i te hoê ati mataro-ore-hia e a’na. I roto i na hiʻoraa toopiti, te hoê oraraa tera e ino ra, e aore râ, e mou roa, e ua ino atoa te hinaaro ia titau i te mau mea teitei aʻe. …
Ua hinaaro vau ia faaroo te mau metua vahine paatoa i te oto o te aau e i te mau uiraa a te hoê tamahine here e te mărû, o tei ofati i te ture no te viivii ore, i te taime mau a fatata ai i te tupu te moemoea o ta’na i moemoea noa na i to’na apîraa ra, no niʻa i te faaipoiporaa i te hiero, area i teie nei ra … te ati nei ïa oia i te faahaparaa tamau o to’na aau. Teie ta’na mau uiraa: “Nahea hoi au e ite ai e, e fifi au? No te aha aita i roaa iaʻu te puai no te patoʻi?” Mai te au i te taata faahoro manureva matapo, ua maʻue matapo noa atoa oia; te vahi fifi râ no’na, aita e taata tauturu i te pû hi’opoʻaraa, no te aratai ia’na i roto i to’na ati, e tae roa’tu i te hoê vahi tauraa papu. E nehenehe ta’na e faaite i to’na fifi i te hoê metua vahine paari!
Ua rahi roa anei te ohipa a te metua vahine i roto i te Ekalesia, e aore râ, i te utuafare, e aore râ, i roto i te oraraa sotiare, e aore râ, i roto i te mau taatiraa, no te faatupu i te auhoaraa, taua auhoaraa ra o te titau i ta’na tamahine ia faaite mai i to’na mau ma-naʻo no niʻa i taua mau mea moʻa ra? Penei aʻe teie te hoê metua vahine o tei mauruuru i te mea e, ua haapiihia ta’na tamahine i teie mau tumu parau huru fifi, ia au i te haapiiraa i te fare haapiiraa, e taua huru haapiiraa ra, i te rahiraa o te taime, e turai ïa i te mau tamarii haapii ia tamatamata roa. Aita paha oia i ite e, te tae mai nei i te mau mahana atoa, i roto roa i to’na iho piha faafaaearaa, na roto anei i te ratio, te veʻa e te afata teata, te mau manaʻo hape no niʻa i te here e te oraraa, e te faaipoiporaa, e o ta te feia apî e hape nei e, o te reira ïa te eʻa e tae atu ai i te oaoa ra.18
Outou e te mau metua vahine e, e mata na outou i te parahi i pihaʻi iho i ta outou mau tamahine. I to ratou tamariiriiraa, eiaha outou e vaiiho i te tahi atu taata e parau ia ratou i te mau parau no niʻa i te hamaniraa i te tamarii. Ia haamata ta outou mau tamariirii i te ui mai ia outou i te tahi mau uiraa, e mau tamariirii no niʻa i te mau mea o te herehereraa, a parahi i raro e a paraparau ia ratou i te mau mea e au i te faito o to ratou maramarama. I reira ratou e parau ai e, “Na reira e mama, e mea maitai roa.” E i te tahi tau taime i muri mai, ia huru paari rii mai ratou, e hoʻi faahou mai ratou no te piti o te taime, tei niʻa rii aʻe ïa te auri i taua taime ra. E i muri iho, e haamata ratou i te haere e orihaere na muri iho i te tahi, e i hea hoi ratou e haere ai e tii i te aʻoraa? Mai te mea e, ua rave maitai outou i ta outou ohipa, e haere mai ratou e ani i te aʻoraa a Mama no niʻa i tera mea e tera mea, e no niʻa i te arui o to’na faaipoiporaa, e titau oia i te haapiiraa a to’na metua vahine, eiaha râ te haapiiraa a tera vahine i niʻa i te purumu.
E o outou e te mau metua tane, ia riro outou ei hoa no ta outou mau tamaiti. Eiaha roa’tu e turai i ta outou tamaiti i te hiti ia hinaaro anaʻe oia i ta outou haapiiraa no niʻa i te mau mea o ta- ’na e hinaaro e na te hoê metua tane e haapii mai ia’na. O te reira te raveʻa e roaa ai te hau i roto i te utuafare. Te vai ra te parau no te oraraa hau o to outou feia apî. Eiaha outou e te mau metua tane e te mau metua vahine e faaere ia ratou i taua oraraa hau ra.19
Te hoê o te mau mea e tiʻa ia tatou ia rave ia haapii anaʻe tatou i to tatou mau feia apî, o te haamatauraa ïa ia ratou ia ite e nahea ia farerei atu i te hoê faahemaraa o te tupu mai i te hoê taime aita i haapaʻohia’tu. …
Te taata tei ia’na ra te hopoiʻa no te faatereraa, o te metua tane ïa o te tamaiti. Te auraa no te reira, e ere ïa e, e tiʻa mai te metua tane i niʻa i te poʻipoʻi, a pii atu ai i ta’na tamaiti ia haere mai i pihaʻi iho ia’na, e i reira oia e faaite ai i ta’na tamaiti i te mau mea atoa no te oraraa nei, i roto noa i te ahuru e ma pae minuti te maoro. E ere o te reira ta te tamaiti e titau ra. Te hinaaro ra râ oia i te hoê metua tane no te pahono ia hinaaro oia e ui i te tahi mau uiraa huru fifi rii. E hiaai rahi to’na i te ite; e taata hi’opoʻa oia.
Mai te mea e, e faaite to’na metua tane i te parau mau e te parau tiʻa, ma te parau ia’na i te mau mea e au i to’na maramarama, a tupu noa ai oia i te paariraa, o taua metua tane ra ïa te taata o ta te tamaiti e hoi atu e ani i te aʻoraa i roto i te roaraa matahiti i muri mai. E riro taua metua tane ra ei tutau no te varua o taua tamaiti ra, mai te mea e, e iriti mai te reira metua tane mai roto mai i ta’na buka iteraa, i te mau haapiiraa o ta’na e horoa’tu i ta- ’na tamaiti ra, no te faaineine ia’na, ia topa noa’tu oia i roto i te herepata i te hoê taime aita i haapaʻohia’tu.20
Aue to’u hinaaro ia haapapu maitai ia outou i teie mahana, outou o te haere nei i te mau mahana atoa na niʻa i te araturu turairai i niʻa aʻe i te mau mea o te ao nei e i te hara o te tahe nei mai te hoê anavai tahe puai na raro aʻe ia outou; I te mau taime e tupu mai te manaʻo tapitapi e te mataʻu i roto ia outou, o te faaatea roa ia outou i te parau no te pure, no te faaroo e no te here, aue ïa to’u hinaaro ia faaroo outou i to’u reo i te piiraa ia outou i niʻa i te araturu o te oraraa nei, “A faaroo na—o teie te haerea— i te mea e, e atea aʻe taʻu iteraa i mua i ta outou.” Te hinaaro nei au i mua i te Atua ia itea ia outou i teie mahana, te here no roto atu i to’u nei varua e haere atu i roto i to outou na varua, e a ite mai outou i to’u aroha rahi no outou tataitahi ia farerei outou i to outou mau fifi i te mau mahana atoa. Ua tae mai te tau e titauhia ia outou tataitahi ia tiʻa outou i niʻa i to outou na avae. Ua tae mai te tau aita hoê tane e aita hoê vahine e tautoo noa i niʻa i te maramarama tipeehia. E mea tiʻa i te taata tataitahi ia arataihia oia e te maramarama i roto ia’na iho. Mai te mea e, aita te reira i roaa ia outou, eita ïa outou e tiʻa i niʻa.21
Te Mau Manaʻo Tauturu no te Haapiiraa e te Aparauraa
-
No te aha i titauhia ai ia tatou ia feruri i te mau feruriraa mâ no te haapaʻoraa i te ture o te viivii ore?
-
Eaha te mau haamaitairaa e roaa i te feia taiata ore ete viivii ore?
-
No te aha te taiata i riro ai ei haerea e tae atu ai i te haamouraa o te tino e te varua? Nahea te riroraa ei taata taita i riro ai ei faaru’eraa i to tatou huru mau!
-
Eaha te hopoiʻa a te feia tei mau i te autahuʻaraa i roto i te parau no te parururaa ia ratou iho e i to ratou atoa mau melo utuafare i te mau fifi o te peu taiata?
-
Eaha te tiʻa i te mau metua tane e te mau metua vahine ia haapii i ta ratou mau tamarii no niʻa i te viivii ore i te pae morare? Eaha te tiʻa i te mau metua ia rave no te haapapu e, te vai ra te tiaturiraa i roto i ta ratou mau tamarii no te faaite mai ia ratou i te mau mea huru ê rii no niʻa ia ratou iho?
-
Eaha te mau faaturoriraa o te ao nei i teie mahana e nehenehe e faaiti i to tatou paari no te patoʻi i te mau faahemaraa o te haaviivii ia tatou? No te aha te aʻoraa e, “aita hoê tane e aita hoê vahine e tautoo noa i niʻa i te maramarama tipeehia” i tano maitai ai i niʻa i te parau no te haapaʻoraa i te ture no te viivii ore i roto i te ao nei i teie mahana?