Mo Taitai—Aoao Faamasani ma Lagolagoina Faiaoga

I le avea ai ma se taitai, ua ia te oe le tiutetauave e “fono ma faiaoga faatoa valaauina” i lau faalapotopotoga ma “fesoasoani ia i latou e saunia mo o latou valaauga” (Tusitaulima Aoao, 17.3, Potutusi o le Talalelei). O nei fonotaga o se avanoa e faailoa ai faiaoga fou i o latou valaauga paia ma uunaia i latou i se vaaiga po o le a le uiga o le aoao atu i le ala a le Faaola. I le avea ma se taitai, e mafai ona e fesoasoani e saunia faiaoga fou e auauna atu e ala i le faia o mea nei:

• Faaali atu le talitonuga o le a fesoasoani le Faaola ia i latou i o latou valaauga (tagai i le Mataupu Faavae ma Feagaiga 88:78).

• Tuu atu i faiaoga fou se kopi o lenei punaoa, ma uunaia i latou e vaavaai mo auala e faaaoga ai ona mataupu faavae i a latou aoaoga.

• Faasoa atu i faiaoga fou soo se mea e uiga i lau faalapotopotoga o le a fesoasoani mo i latou ia iloa.

• Pe a manaomia, ta‘u atu i faiaoga fou po o le fea potu e aoao atu ai ma po o le a le lesona e amata ai. Tuu atu soo se faamatalaga latou te manaomia e uiga i a latou vasega ma tagata o le vasega.

• Faamalamalama atu i faiaoga fou e mafai ona e fesoasoani ia i latou i lo latou valaauga. Ofo atu le lagolago i le potuaoga ma le mauaina o punaoa faafaiaoga pe a manaomia.

• Ofo atu e matau vasega a faiaoga i nisi taimi, ma tuuina atu manatu faaalia e pei ona uunaia ai e le Agaga.

• Valaaulia faiaoga e auai i fonotaga faalekuata a le aufono a faiaoga.

I le taimi atoa o le auaunaga a faiaoga, ia faaauau pea ona feiloai ma i latou mai lea taimi i lea taimi e tuuina atu le lagolago faifai pea. Mo se faataitaiga, e mafai ona e faia se talanoaga puupuu ma se faiaoga a o lei amataina le vasega po o le uma foi o le vasega e talanoaina ai mataupu faavae o le Aoao Atu i le Ala a le Faaola. Fesili atu i le faiaoga e uiga i mea latou te lagona o loo lelei lo latou faia ma auala latou te mananao e faaleleia atili ai. Faamalosiau atu ia i latou ma le agalelei ma le agaga faafetai mo le auaunaga latou te tuuina atu.

E mafai ona e saunia mo lenei talanoaga e ala i le vaavaai atu i le faiaoga a’o aoao atu. Saili ia malamalama atili i malosiaga o le faiaoga ma saili ni auala e mafai ona e ofoina atu ai le lagolago. O le atiaeina i luga o malosiaga o se faiaoga e tutusa lava le taua e pei o le faailoaina o avanoa mo le faaleleia atili.