Faaola i le vao i Iutaia

E pei lava ona faaalu e le Faaola se taimi e saunia ai faaleagaga mo Lana galuega, e tatau foi ona tatou saunia i tatou lava e aoao atu e ala i le Agaga.

Aoao Atu e ala i le Agaga

Ina ua poloaiina e le Faaola Iosefa Samita ma Sini Rikitone e talai atu Lana talalelei, sa Ia folafola atu ia i laua, “O le a liligi atu le Agaga Paia e molimau i mea uma o soo se mea lua te fai atu ai” (Mataupu Faavae ma Feagaiga100:8; tagai foi Mataupu Faavae ma Feagaiga 42:15–17; 50:17–22). O le folafolaga lava lea e tasi e faatatau ia i latou uma o e aoao atu le talalelei, e aofia ai ma oe. A o e aoao atu le talalelei a Iesu Keriso, e mafai ona e maua le Agaga Paia e faatasi ma oe e taiala oe ma molimau atu i le upumoni i mafaufau ma loto o i latou e te aoaoina (tagai Mataupu Faavae ma Feagaiga 8:2). E le o tuua na o oe pe a e aoao atu, aua “e le o outou e fai atu ai, a o le Agaga Paia” (Mareko 13:11).

O le Agaga Paia o le faiaoga moni lea. E leai se faiaoga faaletino, po o le a lava le tomai po o le poto masani, e mafai ona suia Lana matafaioi i le molimauina o le upumoni, molimau atu ia Keriso, ma suia loto. Ae e mafai ona avea faiaoga uma ma meafaigaluega e fesoasoani ai i fanau a le Atua e aoao e ala i le Agaga.

Ina Ia Aoao Atu e ala i le Agaga

• Saunia oe lava ia faaleagaga.

• Ia saunia i taimi uma e tali atu i uunaiga faaleagaga e uiga i manaoga o tagata aoao.

• Fatufatu ni faatulagaga ma ni avanoa mo tagata aoao ina ia aoaoina e le Agaga Paia.

• Fesoasoani i tagata aoao e saili, iloa, ma faatino faaaliga faaletagata lava ia.

• Tuu atu soo le molimau, ma valaaulia tagata aoao e faasoa mai o latou lagona, aafiaga, ma molimau.

Sa Saunia e le Faaola o Ia Lava Faaleagaga e Aoao Atu

Ina ia saunia mo Lana misiona, sa i ai Iesu i le vao mo le 40 aso, “ina ia faatasi ai ma le Atua” (Faaliliuga a Iosefa Samita, Mataio 4:1 [i le Mataio 4:1, vaefaamatalaga e]). Ae o Lana sauniuniga faaleagaga na amata i se taimi ua leva. Ina ua faaosoosoina o Ia e Satani, sa mafai ona Ia utuvai mai i “afioga o le ola” sa Ia teufatuina mo “lea lava itula” o le a Ia manaomia ai (Mataupu Faavae ma Feagaiga 84:85). Mafaufau i au lava taumafaiga e saunia oe lava faaleagaga e aoao atu. O le a se mea ua e aoaoina mai le Mataio 4:1–11 e uiga i le ala e mafai ona e mulimuli ai i le faataitaiga a le Faaola i lau sauniuniga faaleagaga?

O le Agaga o le faiaoga moni ma o le punavai moni o le liuaina. O le aoaoina atu ma le mana o le talalelei e le na o le saunia o se lesona ae o le saunia lelei faaleagaga o oe lava ae e te lei amata aoao atu. Afai ua e saunia faaleagaga, o le a sili atu ona mafai ona e faalogo ma mulimuli i le taitaiga a le Agaga a o e aoao atu. O le ala e valaaulia ai le Agaga Paia i au aoaoga o le valaaulia lea o Ia i lou olaga. E aofia ai i lenei mea le taumafai ma le filiga e mulimuli i le faataitaiga a le Faaola ma ola i Lana talalelei ma lou loto atoa. Ma ona e leai se tasi o i tatou e faia atoatoa lenei mea, o lona uiga foi o le salamo i aso taitasi.

Fesili e Manatunatu Loloto i Ai: O le a le uiga ia te oe o le saunia o oe lava faaleagaga e aoao atu? O le a se mea ua musuia oe e fai e faaleleia ai le ala e te saunia ai oe lava faaleagaga? O le a sou manatu e mafai faapefea e le saunia faaleagaga ona faia se eseesega i lau aoaoga?

Mai Tusitusiga Paia: Esera 7:10; Luka 6:12; Alema 17:2–3, 9; Mataupu Faavae ma Feagaiga 11:21; 42:13–14

Sa Saunia i Taimi Uma le Faaola e Tali Atu i Manaoga o Isi

Sa faapau Iairo, le pule o le sunako, i vae o Iesu, ma aioi atu ia te Ia e fesoasoani i lona afafine o le a maliu. Sa fetaomi atu Iesu ma Ona soo i auala tumutumu agai atu i le fale o Iairo ae na faafuasei lava ona tu Iesu. “O ai na pa’i mai ia te a’u?” Sa Ia fesili ai. Sa foliga mai o se fesili e ese lava—i le fetaomi atu o tagata, o ai sa lei pa‘i atu ia te Ia? Ae sa silafia e le Faaola e faapea i lena motu o tagata, sa oo atu ai se tasi ia te Ia ma se manaoga faapitoa ma faatasi ai ma le faatuatua e maua ai le faamalologa sa Ia ofoina atu. O le a i ai pea le taimi e asiasi ai i le afafine o Iairo. Ae sa Ia fetalai muamua atu i le fafine o le sa pa‘i atu i Ona ofu, “Afafine e, ina faalototeleina oe: ua e ola i lou faatuatua; ina alu ia oe ma le manuia” (tagai Luka 8:41–48).

I le avea ai ma se faiaoga, atonu o nisi taimi e te oo ai i se faanatinati e tuu se mea sa e saunia e aoao atu. E ui atonu e taua lena mea, ia mautinoa i lou faanatinati e te lei pasia ai ma le le manatu i ai se manaoga faanatinati o se tasi o loo e aoaoina. E faaopoopo atu i le taitaiga faaleagaga sa e sailia a o e sauni e aoao atu, saili foi le taitaiga a le Agaga a o e aoao atu. Taumafai ia nofouta i manaoga, fesili, ma mea e fiafia i ai tagata aoao. E mafai ona fesoasoani le Agaga Paia ia te oe e iloatino pe o faapefea ona taliaina pe malamalama se tagata aoao i se mea na e aoaoina atu. Atonu Na te uunaia oe, i nisi taimi, e suia au fuafuaga. Mo se faataitaiga, atonu e uunaia oe e faaalu le tele o le taimi nai lo le mea sa e faamoemoeina i se autu pe tuua ni talanoaga mo se taimi mulimuli ane ona o se mea e sili atu ona taua i tagata aoao i le taimi nei.

Fesili e Manatunatu Loloto i Ai: O anafea na e lagonaina ai sa silafia e se matua po o se isi faiaoga ou manaoga o se tagata aoao? Pe o iloa e i latou o loo e aoaoina e sili atu lou naunau i lo latou aoaoina nai lo le faamaeaina o se lesona? E mafai faapefea ona faaleleia au fesootaiga e uiga i ou popolega?

Mai Tusitusiga Paia: 1 Peteru 3:15; Alema 32:1–9; 40:1; 41:1; 42:1

Na Saunia e le Faaola Avanoa mo Tagata ia Aoaoina e le Agaga Paia

Sa faigata mo le toatele i le taimi o Iesu ona malamalama po o ai moni lava o Ia, ae sa tele naua manatu. “O upu a isi o oe o Ioane le Papatiso,” na lipoti atu ai Ona soo, “a o isi, o Elia; a o isi, o Ieremia, po o se tasi o le au perofeta.” Ona fai atu lea e Iesu se fesili na valaaulia ai Ona soo e tuu ese manatu o isi ma vaai i totonu o o latou lava loto: “Pe se a la outou upu ia te au po o ai?” Sa Ia manao ia latou maua la latou tali e le mai le “tagata” ae tuusao mai “lo‘u Tama o i le lagi.” O le ituaiga molimau lenei—faaaliga patino mai le Agaga Paia—lea na mafai ai e Peteru ona tautino atu, “O oe o le Keriso, o le Alo o le Atua soifua” (tagai Mataio16:13–17).

Ina ia ola faaleagaga i aso e gata ai, o le a manaomia e tagata o loo e aoaoina se molimau faaleagaga o le upumoni. E le mafai ona e tuuina atu ia i latou, ae e mafai ona e valaaulia, faamalosiau, musuia, ma aoao i latou e saili i ai. E mafai ona e faamanino—e ala i au upu ma faatinoga—le taua tele o le Agaga Paia i le aoaoina o le talalelei. Mafaufau, mo se faataitaiga, o le siosiomaga e aoao ai e te fatuina ma faamalosiauina. O se mea e faigofie e pei o le faatulagaina o nofoa i totonu o se potu po o le auala e te faafeiloai ai ma fegalegaleai ai ma tagata aoao e seti ai se leo faaleagaga mo le aafiaga o le a maua e tagata aoao. E mafai foi ona e valaaulia tagata aoao e saunia i latou lava faaleagaga e aoao, e pei lava ona e saunia faaleagaga e aoao atu. Fai atu ia i latou e tauave le tiutetauave mo le agaga latou te aumaia. Ma e mafai ona e tuuina atu avanoa mo i latou e lagona ai le molimau mai o le Agaga ia Iesu Keriso ma Lana talalelei. O lena molimau o le a avea ma se “papa” mo i latou, “e le mafai foi e faitotoa o seoli ona manumalo ia te i [latou]” (Mataio16:18).

Fesili e Manatunatu Loloto i Ai: O le a se mea ua e matauina e saofaga i se siosiomaga faaleagaga mo le aoaoina o le talalelei? O le a se mea e tata‘iese mai ai? O le a se mea e fesoasoani i tagata o loo e aoaoina e aoao mai le Agaga? Mafaufau i le nofoaga e masani ona e aoao atu ai. O le a sou lagona pe a e i ai iina? E mafai faapefea ona e valaaulia ma le mataalia atili le Agaga ina ia i ai iina?

Mai Tusitusiga Paia: Luka 24:31–32; Ioane 14:26; 16:13–15; Moronae 10:4–5; Mataupu Faavae ma Feagaiga 42:16–17; 50:13–24

faifeautalai o loo aoaoina se aiga

A o tatou aoao atu, e mafai ona tatou valaaulia tagata aoao e saili a latou lava molimau faaleagaga o le upumoni.

Sa Fesoasoani le Faaola i Isi e Saili, Iloa, ma Faatino Faaaliga Faaletagata Lava Ia

E finagalo le Alii e fesootai mai ia i tatou—ma e finagalo o Ia ia tatou iloa o loo Ia fesootai mai ia i tatou. I le 1829, sa aoao ai se faiaoga e 22 tausaga le matua e igoa ia Oliva Kaotui e uiga i le aoaoga faavae lototoa ma le matagofie e faapea e mafai e soo se tasi ona maua faaaliga faaletagata lava ia. Ae sa i ai ni ana fesili e talitutusa ma mea na fesili ai le toatele o i tatou: “Pe o taumafai moni ea le Alii e fetalai mai ia te au? Ma e mafai faapefea ona ou iloa le mea o loo Ia fetalai mai ai?” Ina ia taliina nei fesili, sa valaaulia ai e Iesu Keriso ia Oliva e toe mafaufau i tua i se taimi patino o le sailiga faaleagaga. “Ou te lei tautala atu ea le filemu i lou mafaufau?” Sa ia fesili atu ai (tagai Mataupu Faavae ma Feagaiga 6:21–24). Mulimuli ane, sa Ia aoao atu ia Oliva e uiga i isi auala e mafai ona talanoa atu ai le Agaga ia te ia (tagai Mataupu Faavae ma Feagaiga 8:2–3; 9:7–9; tagai foi Mataupu Faavae ma Feagaiga 11:12–14).

O le ola ai i se lalolagi e masani ona le iloa ai mea faaleagaga, tatou te manaomia uma le fesoasoani e iloa ai le siufofoga o le Agaga. Atonu na tatou lagonaina le Agaga e aunoa ma le iloaina. Ma e mafai e i tatou uma ona aoao atili e uiga i le auala e saili ai le Agaga, iloa Lana uunaiga, ma faatino uunaiga Na te tuuina mai ia i tatou. A o e aoao atu, fesoasoani i tagata aoao ia iloa auala e mafai ona fesootai mai ai le Agaga—ma pe na faapefea ona Ia fesootai ma i latou. O se tasi o meaalofa silisili e mafai ona e tuuina atu o se faiaoga o le fesoasoani lea ia i latou e te aoaoina ia alualu i luma i lenei sailiga o faaaliga faaletagata lava ia i le olaga atoa.

Fesili e Manatunatu Loloto i Ai: Aisea e taua ai le aoao ia maua faaaliga faaletagata lava ia? Pe na fesoasoani se tasi ia te oe ia malamalama i le auala e saili ma iloa ai faaaliga? E mafai faapefea ona e faamalosiauina i latou o loo e aoaoina ia saili, iloa, ma faatino faaaliga mai le Agaga Paia?

Mai Tusitusiga Paia: Kalatia 5:22–23; Alema 5:45–47; Mataupu Faavae ma Feagaiga 42:61; 121:33; Iosefa Samita—Talafaasolopito 1:8–20

Na Tuuina Atu e le Faaola le Molimau ia i Latou Na Ia Aoaoina

I se taimi na faapitoa lava le agaalofa o le aoao atu ma le auauna atu, sa saili ai Iesu e faamafanafana i Lana uo o Mareta, o lona tuagane lea na maliu. Sa Ia faasoa atu ia te ia se molimau faigofie o se upumoni e faavavau: “E toe tu mai lou tuagane” (Ioane 11:23). O lana molimau na uunaia ai Mareta e faasoa atu lana lava molimau: “ua ou iloa e toetu mai lava o ia i le toetu i le aso gataaga” (Ioane 11:24). Matau le ala o loo toe ta‘ua ai lenei mamanu i le Ioane 11:25–27. O le a se mea ua faagaeetia ai oe e uiga i le faataitaiga a le Faaola? Aisea e avea ai le faasoa atu o molimau i upumoni o le talalelei o se vaega taua o le aoao atu?

O lau molimau e mafai ona i ai se faatosinaga mamana ia i latou e te aoaoina. E le tau teuteuina ma faaumiumiina. Ma e le manaomia ona amata i le “Ou te fia tuuina atu lau molimau.” Tau lava o le faasoa atu o mea ua e iloa e ala i le mana o le Agaga Paia. O se molimau o le upumoni e sili atu ona mamana pe a tuusao ma mai i le loto. Ia molimau soo atu e uiga i le Faaola, Lana talalelei, ma Lona mana i lou olaga, ma uunaia i latou e te aoaoina ia faia foi faapea. Ma ia manatua o nisi taimi o le molimau sili ona mamana e le tuuina mai e le faiaoga ae o se uso a tagata aoao.

Fesili e Manatunatu Loloto i Ai: Vaavaai mo faataitaiga i tusitusiga paia e faapupula mai ai le faatosinaga mamana a se tasi o loo tuuina atu se molimau. O a ni mea ua e aoaoina mai i na faataitaiga? O anafea na faamanuiaina ai oe i se molimau a se tasi? Na faapefea e le faasoaina atu o lau molimau ona uunaia ai i latou o loo e aoaoina? Na faapefea ona aafia ai oe?

Mai Tusitusiga Paia: Galuega 2:32–38; Mosaea 5:1–3; Alema 5:45–48; 18:24–42; 22:12–18; Mataupu Faavae ma Feagaiga 46:13–14; 62:3

O Nisi o Auala e Faaaoga ai Mea Ua E Aoaoina

• Fai atu i tagata aoao e faasoa mai mea na aoaoina ai i latou e le Agaga Paia a o latou suesueina le afioga a le Atua.

• Saunia muamua ia maua uunaiga faaleagaga a o aoao atu.

• Tusi i lalo uunaiga faaleagaga e oo mai a o e saunia.

• Tuu atu ni avanoa i nisi taimi mo tagata o le vasega e mafaufau loloto lemu ai i mea o loo aoaoina ai i latou e le Agaga.

• Faaaoga musika ma ata paia e valaaulia ai le uunaiga a le Agaga.

• Faalogo mo uunaiga a o e fuafuaina ma aoao atu, ma ia naunau e fetuunai au fuafuaga.

• Tuu atu avanoa mo tagata aoao uma e molimau atu ai i mea ua latou aoaoina.

• Fesoasoani i isi ia iloa le taimi e i ai le Agaga.

• Ola i upumoni o loo e aoaoina ina ia mafai ai ona e molimau atu e uiga i ai.

• Mulimuli i uunaiga e aoao atu i taimi e lei fuafuaina, ma faasamasamanoa.