Iesu Keriso o loo talanoa i le fafine i le vaieli

Faatasi ai ma le Faaola e fai ma a tatou faataitaiga, o le alofa e avea ma uunaiga mo a tatou aoaoga.

Alofa Ia I Latou E Te Aoaoina

O mea uma na faia e le Faaola i Lana galuega i le lalolagi atoa sa faaosofia e le alofa. A o tatou taumafai e avea ma soo moni o Keriso, e mafai ona faatumulia i tatou i lenei lava alofa e tasi (tagai Ioane13:34–35; Moronae 7:47–48; 8:26). Pe a i ai le alofa o le Faaola i o tatou loto, tatou te sailia auala tatau uma e fesoasoani ai i isi e aoao ia Keriso ma o mai ia te Ia. E avea le alofa ma uunaiga mo la tatou aoao atu.

Ia Alofa Ia I Latou E Te Aoaoina

• Vaai i tagata aoao i le ala e silasila ai le Atua ia i latou.

• Saili ia iloa i latou—malamalama i o latou tulaga, manaoga, ma malosiaga.

• Tatalo mo i latou ma ta’u o latou igoa.

• Fatu se siosiomaga saogalemu lea e faaaloalogia ai tagata uma ma iloa e faatauaina o latou manatu.

• Saili ni auala talafeagai e faaali atu ai lou alofa.

Na Silafia e le Faaola Gafatia Paia i Tagata Uma Na Ia Aoaoina

O le toatele o tagata i Ieriko sa manatu na latou iloa mea uma latou te manaomia ona iloa e uiga ia Sakaio. O ia o se telona ma se ao lafoga—o le telona sili, o le mea moni—ma sa mauoa o ia. E manino lava, sa latou manatu, atonu e le faamaoni ma piopio o ia. Ae sa silasila Iesu i le loto o Sakaio ma vaaia ai se “atalii [faamamaluina] o Aperaamo” (tagai Luka 19:1–10). Sa vaai le Faaola i tagata e le pei ona sa latou foliga mai ai ae e pei ona sa latou i ai moni lava—ma i le mea e mafai ona avea ai i latou. I tagata faifaiva faatauvaa e pei o Simona, Aneterea, Iakopo, ma Ioane, sa Ia silasila atu i taitai o le lumanai o Lana Ekalesia. I le tagata na taufaafefe ma le saua o Saulo, sa Ia vaai ai i “se ipu filifilia,” o le o le a folafola atu Lana talalelei i luma o tupu ma atunuu (tagai Galuega 9:10–15). Ma i totonu ia te oe ma tagata taitoatasi e te aoaoina, e silasila le Faaola i se atalii po o se afafine o le Atua o i ai se gafatia e le faatapulaaina.

Faatasi ai ma tagata o loo e aoaoina, atonu e i ai nisi e foliga mai e faamaoni ma liua ma isi e foliga mai e le fiafia mai pe fouvale foi. Ia faaeteete ia aua nei faia ni faaiuga e faavae i na o mea e te vaai i ai. E mafai ona fesoasoani le Agaga Paia ia te oe e vaai ai i tagata taitoatasi i nisi o mea ua silasila i ai le Faaola—ma fesoasoani ia te oe e amata ona alofa ia i latou i le ala Na te faia ai.

Fesili e Manatunatu Loloto i Ai: Mafaufau i tagata taitasi e te aoaoina, ma mafaufau loloto pe o a lagona o le Tama Faalelagi ma Iesu e uiga ia i latou taitoatasi. O le a se mea La te ono vaaia ia te ia? O le a faapefea e nei mafaufauga ona aafia ai le ala e te aoao atu ai lena tagata?

Mai Tusitusiga Paia: 1 Samuelu 16:7; Salamo 8:4–5; Roma 8:16–17; Mataupu Faavae ma Feagaiga 18:10–14

E Silafia e le Faaola i Tatou ma Malamalama i o Tatou Tulaga, Manaoga, ma Malosiaga

E lei sau le fafine Samaria i le vaieli e faalogo i se savali o le talalelei. Sa sau o ia e asu vai. Ae sa mafai ona silafia e le Faaola o lona fiainu sa sili atu nai lo le faaletino. Sa Ia silafia sa ia te ia ni faaletonu i le tuanai ma ni mafutaga e le mautu. O lea na faaaoga ai e Iesu le manaoga faaletino lea sa aafia ai o ia—vai e tausi ai le ola—ma fesootai ai ma ona manaoga faaleagaga loloto mo le “vai ola” ma le “ola e faavavau.” E oo atu i le faaiuga o le la talanoaga, sa i ai se molimau patino a le fafine o Iesu o le Keriso, na musuia i se vaega i le lelei na Ia silafia ai o ia. “Ua [Na] taua mai ia te au o mea uma lava ua ou faia,” o lana tala lea. “Pe le o le Keriso ea lea?” (tagai Ioane 4:6–29).

O le avea ma se faiaoga e faapei o Keriso e aofia ai le faamasani i tagata o loo e aoaoina ma taumafai ia malamalama i mea o loo i o latou loto. E mafai ona e fiafia i o latou olaga ma faaali atu le agaalofa. E mafai ona e vaavaai mo auala e malamalama ai i o latou talaaga, taleni, mea e fiafia i ai, ma manaoga. E mafai ona e sailia le auala sili latou te aoao ai. E mafai ona e fai atu fesili, faalogo ma le toto‘a, ma matau. Ae sili ai, tatalo mo le malamalamaaga lena e na o le Agaga e mafai ona tuuina mai. O le lelei o lou iloa o se tagata, o le lelei foi lena o lou mafaia ona fesoasoani ia te ia ia maua le uiga patino ma le mana i le talalelei a Iesu Keriso. O le taimi lava e te malamalama ai i le galala o se tagata, e mafai loa e le Agaga ona aoao oe i le auala e fesoasoani ai e faamalieina i le vai ola a le Faaola.

Fesili e Manatunatu Loloto i Ai: O le a se mea ua uma ona e iloa e uiga i tagata o loo e aoaoina? O le a le mea e taua ia i latou? O a ni o latou malosiaga? O le a le mea o loo latou tauivi ai? O le a se mea e mafai ona e faia e malamalama atili ai ia i latou?

Mai Tusitusiga Paia: Salamo 139:1–5; Mataio 6:25–32; Mareko 10:17–21; Ioane 10:14; 3 Nifae 17:1–9

Na Tatalo le Faaola mo i Latou na Ia Aoaoina

Vaai faalemafaufau i lagona atonu na oo ia Simona Peteru ina ua ia faalogo i le Faaola o fetalai atu ia te ia, “Simona e, Simona e, faauta, ua manao tele Satani ia te outou, … a ua ou faatoga mo oe, ina ne‘i mavae lou faatuatua” (Luka 22:31–32). E mafai faapefea ona aafia oe i le iloaina na tatalo Iesu Keriso i le Tama mo oe? Sa i ai i tagata o Amerika anamua se aafiaga faapenei, ma sa latou faamatalaina i le ala lenei: “E leai se tasi e mafai ona malamalama i le olioli lea na faatumulia ai o matou loto i le taimi na matou faalogo ia [Iesu] o tatalo atu i le Tama mo i matou” (3 Nifae 17:17).

Atonu foi e te mafaufau i le mea e tupu i totonu ia te oe pe a e tatalo mo se tasi—i taimi uma, i o latou igoa. E faapefea e au tatalo ona aafia ai ou lagona e uiga i lena tagata? E faapefea ona aafia ai au faatinoga? E mautinoa lava e faafofoga ma tali mai lo tatou Tama oi le Lagi i tatalo faamaoni a se faiaoga e manao e fesoasoani i se tagata aoao. Ma i le tele o tulaga, o se tasi o auala e tali mai ai o Ia i na tatalo o le pa‘i atu lea i le loto o le faiaoga ma musuia o ia e fai pe fai atu se mea o le a fesoasoani ai i le tagata aoao ia lagona Lona alofa.

Fesili e Manatunatu Loloto i Ai: A o e mafaufau e uiga i tagata o loo e aoaoina, pe o i ai se tasi e te lagona e i ai se manaoga faapitoa mo au tatalo? O le a se mea ua musuia oe e tatalo ai mo ia? O a faamanuiaga e ono oo mai a o e valaaulia tagata aoao e tatalo mo le tasi ma le isi?

Mai Tusitusiga Paia: Ioane 17; Alema 31:24–36; 3 Nifae 18:15–24; 19:19–23, 27–34

Sa Faamautinoa e le Faaola Ua Lagona e Tagata Uma le Faaaloalogia ma le Faatauaina

O le uiga masani i taitai faalelotu i ona po o Iesu o le tatau lea ona teenaina tagata agasala. Ona o lenei mea, ina ua vaai atu nei taitai ia Iesu o fegalegaleai ma tagata agasala, sa faate‘ia i latou. E mafai faapefea e se tasi e fesootai ma na tagata ona avea ma se faiaoga faaleagaga?

Ioe, sa ese le auala na faia e Iesu. Sa ia saili e faamalolo i latou o e sa mama‘i faaleagaga (tagai Mareko 2:15–17; Luka 4:17–18). Sa ia aapa atu pea lava pea ia i latou o e sa ese mai ia i latou sa siomia i latou po o e sa i ai se faaletonu i le tuanai, ma sa Ia fegalegaleai ma i latou o e na agasala. Sa Ia viia le faatuatua o se fitafita Roma (tagai Mataio 8:5–13). Sa Ia valaauina se ao lafoga ua le talitonuina e avea ma se tasi o Ona soo faatuatuaina (tagai Mareko 2:14). Ina ua tuuaia se fafine i le mulilua, sa Ia faia ia ona lagona le saogalemu ma musuia o ia e salamo ma ola i se olaga sili atu (tagai Ioane 8:1–11).

Ae sa sili atu se mea na faia e Iesu nai lo lena. Sa Ia faafaileleina lenei lava uiga faaalia o le taliaina ma le alofa i Ona soo. O Lana faataitaiga sa mautinoa lava i loto o Ana Aposetolo ina ua oo mai le taimi latou te avatu ai le talalelei i tagata uma. O loo faaalia i upu a Peteru: “E moni, ua ou iloa e le faailogaina tagata e le Atua” (Galuega 10:34).

O loo i ai se avanoa lelei tele lea e toetoe lava o tagata uma ua valaauina oe e aoao atu o loo tauivi i se auala e lagona ai le faaaloalogia ma le faatauaina. O le ala e te alofa ma faaaloalo ai ia i latou, e mafai ai ona e fesootai atu e le gata ina talileleia i latou ae manaomia. E mafai ona e aapa atu ia i latou e le o auai, o e o tauivi, po o e foliga mai e le fiafia mai, onosai pe afai e foliga mai e telegese le alualu i luma. E mafai ona e fesoasoani i tagata uma ia lagona le saogalemu ma le toafimalie e faasoa atu o latou atugaluga i uso a tagata talitonu. Ma e tele atu mea e mafai ona e faia nai lo lena. E mafai ona e musuia tagata aoao uma e fesoasoani ia te oe e fatu se siosiomaga lea e aoao atu ai le aoaoga faavae i se agaga o le faaaloalo, auai, ma le alofa.

Fesili e Manatunatu Loloto i Ai: O le a se mea e fesoasoani i se tagata e lagona ai le faaaloalogia ma le faatauaina? O le a se mea e musuia ai se tagata e faaaloalo ma faatauaina isi? A o e mafaufau ma le agaga tatalo e uiga i tagata o loo e aoaoina, o le a se mea ua uunaia oe e fai ina ia mafai ai e i latou uma ona lagona le taliaina ma le manaomia?

Mai Tusitusiga Paia: Ioane 4; 2 Nifae 26:27–28, 33; Alema 1:26; 3 Nifae 18:22–25

tamā o loo aoaoina le fanau

E mafai e faiaoga ona fesoasoani ia i latou o loo latou aoaoina ia lagonaina le alofaina.

Na Faaalia e le Faaola Lona Alofa mo i Latou na Ia aoaoina.

I le faaiuga o se aso matagofie, ma faagaeetia o le aoao atu ma le auauna atu i tagata sa Nifaē, sa matauina ai e Iesu ua oo i le taimi e afio ese atu ai o Ia. Sa i ai isi Ana tagata e asiasi i ai. “Ia outou o atu i o outou fale,” na Ia fetalai atu ai, “ma saunia o outou mafaufau mo a taeao.” Ae sa nonofo pea tagata iina “ua maligi o latou loimata,” ma “pulatoa mai ia te ia e peiseai ua latou ole mai ia te ia ia afio pea o ia faatasi ma i latou mo sina taimi umi teisi atu.” O le iloa ai o lo latou manao e le o faaleoina ma le “faatumulia i le agaalofa,” sa faaumiumi teisi atu le nofo ai o Iesu (3 Nifae 17:3, 5–6). Sa Ia faamanuiaina o latou tagata mama‘i ma puapuagatia. Sa Ia tootuli ma tatalo faatasi ma i latou. Sa Ia tagi faatasi ma i latou, ma sa Ia olioli faatasi ma i latou.

Mafaufau ma le agaga tatalo e suesue i afioga ma faatinoga a le Faaola i le 3 Nifae 17. Mafaufau loloto i le alofa na Ia faaalia mo i latou na Ia aoaoina. Vaavaai mo faailoaga o Lona alofa i isi nofoaga i tusitusiga paia. Ona mafaufau lea i tagata o loo e aoaoina. E faapefea ona e faaalia talafeagai atu lou alofa mo i latou? Ia tuu atu i le Agaga e taialaina oe. Afai e faigata ia te oe ona lagona pe faailoa atu le alofa mo i latou o loo e aoaoina, amata i le molimau atu i le alofa o le Atua. Ona “tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso” (Moronae 7:48). Ma ia manatua o lou popole mo le aoaoina atu o se lesona e le tatau lava ona faalavelave ia te oe mai le faaali atu o le alofa e ala i au upu ma faatinoga. E masani lava o le ala e te taulimaina ai tagata e tutusa lava le taua ma mea e te aoaoina ai i latou.

Fesili e Manatunatu Loloto i Ai: Na faapefea ona fesoasoani le Faaola ia te oe ia iloa Lona alofa mo oe? Na faapefea ona fesoasoani se matua po o se isi faiaoga ia te oe ia lagona Lona alofa? O iloa e tagata o loo e aoaoina e te alofa ia i latou? Pe latou te iloa e alofa le Faaola ia i latou?

Mai Tusitusiga Paia: Mareko 6:31–42; Ioane 13:3–16, 34–35; 15:12–13; 1 Korinito 13:1–7; 1 Ioane 4:7–11

O Nisi o Auala e Faaaoga ai Mea Ua E Aoaoina

• Afai o loo e aoaoina se vasega, aoao igoa o tagata aoao ma faaaoga pe a e aoao atu.

• Faailoa atu lou agaga faafetai pe a saofaga mai tagata aoao.

• Fegalegaleai ma tagata aoao a o lei amataina ma pe a uma ona e aoao atu.

• Fesoasoani i tagata aoao e atiina ae se siosiomaga o le alofa ma le faaaloalo mo le tasi ma le isi.

• Faalogo ma le toto‘a—pe a e aoao atu ma i isi taimi.

• Faatino galuega o le auauna atu mo i latou e te aoaoina.

• Ia naunau e suia au fuafuaga faafaiaoga e faaalu ai le tele o le taimi i mataupu faavae e taua ia i latou e te aoaoina.