O Iesu o loo toso ae Peteru mai le vai sousou

Faaatoatoaina le Faatuatua, saunia e J. Alan Barrett

Valaaulia le Aoaoaina ma le Filiga

Sa mautinoa lava le maofa o le matamata i le Faaola o savali i luga o le vai. Ae sa lei lava lena mo Peteru. Sa ia manao e fai le mea na faia e le Faaola, ia i ai i le mea sa i ai o Ia, ma ia maua foi lea lava aafiaga e tasi. “Fetalai mai ia te au, ou te alu atu ia te oe i luga o le vai,” na ia fai atu ai. Sa tali atu le Faaola ma se valaaulia faigofie: “Ina, sau ia.” Mai lena, na oso ai Peteru mai le saogalemu o le vaa ma faaali mai ia i tatou o le avea ma soo e le o se aafiaga e tupu fua (tagai Mataio 14:24–33). E manaomia ai le faatuatua ia Keriso ma taumafaiga filiga. Ae e aumaia ai foi le taui tele o le savavali faatasi ma le Faaola.

“Sau.” “O mai ia, inā matamata.” “Sau, ma mulimuli mai ia te au.” “Ina alu ia, ma ia faapea ona faia” (Mataio 14:29; Ioane 1:39; Luka 18:22; 10:37). Mai le amataga o Lana galuega, sa valaaulia ai e le Faaola Ona soo ina ia latou iloa mo i latou lava ia upumoni, mana, ma le alofa na Ia ofoina atu. Sa Ia faia lenei mea ona o le aoaoga moni lava lenei. E le na o le faalogo po o le faitau; o le suia foi, salamo, ma alualu i luma. I upu a le Faaola, o le aoaoina e oo mai “e ala lava lea i le suesue ma le faatuatua foi” (Mataupu Faavae ma Feagaiga 88:118; faaopoopo le faamamafa). Ma o le faatuatua e aofia ai le faatinoina mo i tatou lava, e le na o le tau faamalosia (tagai i le 2 Nifae 2:26).

A tatou mulimuli i le faataitaiga a le Faaola, tatou te valaaulia i latou tatou te aoaoina e ole atu, saili, ma tuitui atu—ona maua lea (tagai Mataio 7:7–8). Ma ua tatou taliaina lena valaaulia e i tatou lava. Faatasi ai, e ala i lo tatou lava faatuatua ia Keriso ma taumafaiga maelega, o le a tatou iloa ai mo i tatou lava le uiga o le savavali faatasi ma Ia.

Valaaulia le Aoaoina ma le Filiga

• Fesoasoani i tagata aoga ia talia le tiutetauave mo lo latou aoaoina.

• Uunaia tagata aoao ia iloa le Faaola e ala i le suesue i le talalelei i aso taitasi.

• Valaaulia tagata aoao e sauni e aoao.

• Uunaia tagata aoao e faasoa mai upumoni o loo latou aoaoina.

• Valaaulia tagata aoao e ola i mea ua latou aoaoina.

Sa Fesoasoani le Faaola i Isi e Tauave le Tiutetauave mo Lo Latou Aoaoina

O le fausiaina o vaa o le a sopoia ai ma le saogalemu ia vasa o se galuega faigata mo soo se tasi. O le uso o Iareto sa “taitaiina pea e le aunoa e le aao o le Alii” (Eteru 2:6), ma mauaina faatonuga e uiga i foliga o vaa ma le ala o le a latou maua ai le ea. Ae o le a se mea ua e matauina e uiga i le ala na tali atu ai le Alii ina ua fesili atu le uso o Iareto e uiga i le tuuina atu o le malamalama i totonu o vaa? (tagai Eteru 2:22–25). Na faapefea ona faamanuiaina le uso o Iareto i le valaaulia e faaaoga lona faatuatua i lenei auala? (tagai Eteru 3:1–16).

Atonu e foliga faigofie atu le tau na ona tau atu i tagata aoao mea uma e te manatu e tatau ona latou iloa. Peitai, sa fautua mai Elder David A. Bednar: “O lo tatou faamoemoega e le tatau ona avea ma ‘O le a se mea ou te ta’u atu ia i latou?’ Nai lo lena, o fesili e fesili ai ia i tatou lava o, “O le a se mea e mafai ona ou valaaulia i latou e fai? O a fesili musuia e mafai ona ou fai atu, afai latou te naunau e tali mai, o le a amata ona valaaulia le Agaga Paia i o latou olaga?’” (afiafi ma se Pulega Aoao, 7 Fep., 2020, broadcasts.ChurchofJesusChrist.org).

Mafaufau pe mafai faapefea ona e valaaulia tagata aoao e talia le tiutetauave mo lo latou aoaoina. Mo se faataitaiga, e mafai ona e valaaulia i latou e fai atu a latou lava fesili, saili mo tali, mafaufau loloto, ma faasoa pe tusifaamaumau o latou manatu ma lagona. A o latou faia, o le a latou faamalolosia lo latou faatuatua, iloa upumoni i le afioga a le Atua, ma maua o latou lava aafiaga i nei upumoni. A o tatou tauaveina le tiutetauave mo lo tatou lava aoaoina, e mafai ona tatou faapea atu, e pei ona sa faia e Iosefa Samita, “Ua ou iloa mo au lava” (Iosefa Samita—Talafaasolopito 1:20).

Fesili e Manatunatu Loloto i Ai: Aisea e taua ai mo tagata aoao ona toaaga mai nai lo le le ano i lo latou aoaoina? E mafai faapefea ona e fesoasoani i tamaiti e tauave le tiutetauave mo lo latou aoaoina? Na faapefea ona fesoasoani faiaoga ia te oe e faia lenei mea? O a ni faataitaiga mai tusitusiga paia e mafai ona e mafaufau i ai pe o fea na valaaulia tagata e aoao ai mo i latou lava? E faapefea e nei faataitaiga ona aafia ai le auala e te aoao atu ai?

Mai Tusitusiga Paia: 1 Nifae 11; Mataupu Faavae ma Feagaiga 9:7–8; 58:26–28; 88:118–125; Iosefa Samita—Talafaasolopito 1:11–20

Na Uunaia e le Faaola Isi ia Iloa o Ia e ala i le Suesueina o Lana Afioga

Ina ua oo mai le taimi mo le Faaola e faatulaga aloaia ai Lana Ekalesia i aso e gata ai, sa Ia ta‘u atu i Ana auauna, “Ia e faalagolago i mea ua tusia” (Mataupu Faavae ma Feagaiga18:3). O le mea moni, o le Tusi a Mamona, lea na toeitiiti uma ona latou faaliliuina, sa i ai faatonuga aoga mo le galuega, e aofia ai le auala e papatiso ai, le auala e faatautaia ai le faamanatuga, ma isi faamatalaga taua. Ae sa finagalo foi le Faaola i Ana auauna e vaai i Ana faaaliga o se avanoa e faalogo ai ia te Ia ma iloa atili ai o Ia. I lena lava faaaliga, sa Ia ta‘u atu ai ia te i latou, “O lo’u leo lea o loo tautala atu [nei upu] ia te outou; … o le mea lea, e mafai ona outou molimau atu sa outou faalogo i lo‘u leo, ma iloa a’u upu” (Mataupu Faavae ma Feagaiga 18:35–36).

Mafaufau i tagata o loo e aoaoina. E faapefea ona latou vaai i le suesueina o tusitusiga paia? Mo lena mea, e faapefea ona e vaai i ai? Pe sili atu ea nai lo se matafaioi i aso taitasi? Pe a e suesue i tusitusiga paia, pe o e lagonaina le fetalai sa‘o atu o le Faaola ia te oe? Na aoao mai Peresitene Russell M. Nelson: “O fea e mafai ona tatou o i ai e faalogo ai ia te Ia? E mafai ona tatou ō i tusitusiga paia. O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o faigata. Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i” (“Faalogo ia te Ia,” Liahona, Me 2020, 89). A o e aoao atu, uunaia tagata aoao e suesue i tusitusiga paia ma le faamoemoega o le sailia o le Faaola—e le na o le mauaina o fuaiupu po o mea moni e uiga ia te Ia ae ia maua o Ia. O le faalogoina o le siufofoga o le Alii i aso uma i tusitusiga paia o se faavae lea i se olaga atoa o le aoaoina ma le filiga ma le tutoatasi o le talalelei.

Fesili e Manatunatu Loloto i Ai: Mafaufau i au oe lava mausa o le suesueina o tusitusiga paia. Na faapefea e le suesueina o le afioga a le Atua ona faamalosia ai lou sootaga ma Ia? O le a se mea e mafai ona e faia e faaleleia atili ai au suesuega? O le a faapefea ona e musuia isi e suesue ma le filiga ma le le aunoa i le afioga a le Atua? O a faamanuiaga o le a latou maua pe a latou faia?

Mai Tusitusiga Paia: Iosua 1:8; 2 Timoteo 3:15–17; 2 Nifae 32:3; Iakopo 2:8; 4:6; Mataupu Faavae ma Feagaiga 33:16

Na Valaaulia e le Faaola Isi e Saunia e Aoao

E oo lava i fatu sili ona lelei e le mafai ona tupu ae i se eleele malo, papa, po o se eleele matuituia. E faapena foi, e oo lava i aoaoga faavae e sili ona taua ma faatupu faatuatua e le suia ai se loto e le o saunia e taliaina. O se vaega lena o le savali o le faataoto a le Faaola e uiga i se tagata lulu saito, fatu, ma eleele o tulaga eseese. O totonu o le “eleele lelei”—o le loto ua faamaluluina ma faamamaina mai maa faaleagaga ma mea matuitui—o le afioga a le Atua e fua mai ai fua o le ola (tagai Mataio 13:1–9, 18–23).

E taua le sauniuniga faaleagaga—mo oe ma tagata o loo e aoaoina. E faapefea la ona tatou fesoasoani e saunia o tatou loto ina ia avea ma “eleele lelei” mo le afioga a le Atua? Mafaufau i mataupu faavae nei o sauniuniga, ia e mafai ona e faaaogaina i lou olaga ma uunaia ai olaga o i latou e te aoaoina. Tatalo ia iloa po o le a le mea e finagalo le Alii e te aoaoina. Ola i se auala e valaaulia ai Lana faatosinaga i lou olaga. Salamo i aso taitasi. Faafailele lou manao e aoao e ala i le faia o fesili faamaoni. Suesue i le afioga a le Atua ma le faatuatua o le a Ia taitai atu oe i tali. Tatala lou loto i soo se mea o le a Ia aoaoina ai oe.

I le avea ai ma tagata aoao saunia e aoao i lenei auala, o le a latou maua mata faaleagaga e vaai ma taliga e faalogo ai i mea e finagalo le Alii latou te iloa (tagai Mataio 13:16).

Fesili e Manatunatu Loloto i Ai: O le a se mea e te faia e saunia ai oe lava e aoao? E faapefea e au sauniuniga ona aafia ai le ala e te vaai ai, faalogo, ma malamalama ai i le afioga a le Atua? E mafai faapefea ona e musuia isi e saunia e aoao? O le a se eseesega e mafai e lena mea ona faia i le auala latou te maua ai upumoni o le talalelei?

Mai Tusitusiga Paia: Enosa 1:1–8; Alema 16:16–17; 32:6, 27–43; 3 Nifae 17:3

tamaitiiti o loo faitau tusitusiga paia i le vasega

E manuia tagata aoao mai avanoa e fefaasoaai ai le tasi ma le isi i mea ua latou aoaoina.

Sa Uunaia e le Faaola Isi e Faasoa Atu Upumoni Sa Latou Aoaoina

“E amu la‘u tautala,” o le tala lea a Enoka ina ua valaauina o ia e le Alii e talai atu le talalelei. Ae o le poto e tautala e lei avea lava ma se tulaga manaomia mo se auauna a le Alii. Nai lo lena, sa folafola atu e le Alii ia Enoka afai e lava lona faatuatua e tatala ai lona gutu, o le a oo mai upu. “O le a ou tuu atu ia te oe upu e te tautala ai,” na Ia fetalai ai (Mose 6:31–32). Sa faaaoga e Enoka lona faatuatua, ma sa fetalai moni mai lava le Alii e ala mai ia te ia, faatasi ai ma upu na matua mamana tele na mafua ai ona gatete tagata (tagai Mose 6:47). O le mea moni, sa latou faagateteina le lalolagi lava ia. Na sosola mauga, na suia e vaitafe lo latou ala, ma sa matatau atunuu i tagata o le Atua, “ona o le mamana tele o le upu a Enoka, ma ona o le matua tele o le mana o le gagana na tuu mai e le Atua ia te ia” (Mose 7:13).

E finagalo le Alii ia i tatou uma—e le na o Ana perofeta—ia maua le mana e tautala atu ai i Lana afioga. E finagalo o Ia mo i tatou uma, e aofia ai tagata o loo e aoaoina (tagai i le Mataupu Faavae ma Feagaiga 1:20–21). O a tatou upu atonu e le aveesea ai mauga po o vaitafe e toe suia ala, ae e mafai ona fesoasoani e suia ai loto. O le mafuaaga lena e taua tele ai le tuuina atu i tagata aoao o avanoa e faasoa atu ai i le tasi ma le isi mea ua latou aoaoina e uiga i le Faaola ma Lana talalelei. O le faia o lenei mea o le a fesoasoani latou te teulotoina ai upumoni ua aoaoina ai i latou ma faailoa mai. O le a fesoasoani foi ia i latou e maua ai le mautinoa i lo latou tomai e faasoa atu upumoni i isi nofoaga.

Fesili e Manatunatu Loloto i Ai: Mafaufau i se taimi na e talanoa ai e uiga i se upumoni o le talalelei i se tasi. O le a se mea na e aoaoina mai le aafiaga? O anafea na e faafetai ai ona sa i ai i se tasi le lototele e faasoa mai ai o latou manatu ma talitonuga? O le a faapefea ona manuia tagata o loo e aoaoina mai avanoa e talanoa ai e uiga i mea o loo latou aoaoina? O a ni avanoa e mafai ona e fatuina mo i latou?

Mai Tusitusiga Paia: Alema 17:2–3; Moronae 6:4–6; Mataupu Faavae ma Feagaiga 84:85; 88:122; 100:5–8

Sa Valaaulia e le Faaola Isi e Ola i Mea sa Ia Aoao Atu

“Ia faapea ona pupula atu lo outou malamalama i luma o tagata.” “Ia outou alolofa atu ia i latou e ita mai ia te outou.” “Ia outou ole atu, ona foaiina mai ai lea ia te outou.” “Ia outou ulu atu i le faitotoa vaapiapi.” (Mataio 5:16, 44; 7:7, 13.) O nisi o valaaulia sili ona manino ma manatua pea i le galuega atoa a le Faaola i le lalolagi sa tautalagia a o Ia aoao atu Ona soo i luga o se mauga e vaai atu i le Sami o Kalilaia. O le faamoemoega o le Faaola o le suia lea o olaga, e pei ona faamanino mai i Lana valaaulia faaiu: “Ai se faalogo i a‘u upu nei, ma faiae ia, ou te faatusaina o ia i le tagata poto, ua na faia lona fale i luga o le papa” (Mataio 7:24; faaopoopo le faamamafa).

E oo mai timuga ma lologa ma agi mai matagi i olaga o tagata uma. O leaoaoina e uiga i le talalelei e le lava pe afai e tatau i tagata aoao ona tetee atu i tofotofoga uma o le a latou feagai. O le mafuaaga lea e le tatau ai ona tatou faatuai ona valaaulia tagata aoao e mafaufau pe mafai faapefea ona latou ola i mea ua latou aoaoina. Ona o le faaaloalo mo le faitalia o isi, o le tele o a tatou valaaulia o le a lautele: “O le a se mea ua uunaia oe e fai?” Mai lea taimi i lea taimi atonu e manaomia ona sili atu ona patino a tatou valaaulia: “Pe o le a e filifilia se uiga se tasi o le Faaola e te manao e galue ai?” A o e tuuina atu avanoa mo tagata aoao e faalogo, iloa, ma faasoa atu uunaiga mai le Agaga Paia, o le a Ia aoao i latou po o a faatinoga faaletagata lava ia e manaomia ona latou faia. Fesoasoani i tagata aoao e mafaufau i faamanuiaga o le a mulimuli mai a o latou faatinoina mea latou te aoaoina, ma uunaia i latou e tumau ai e tusa lava pe faigata. O le ola ai i le upumoni o le ala aupito vave lea i le faatuatua, molimau, ma le liua e sili atu. E pei ona fetalai le Faaola, o le ola ai i aoaoga faavae a le Tama o le ala lea mo i tatou uma ia iloa moni ai e moni le aoaoga faavae (tagai Ioane 7:17).

Fesili e Manatunatu Loloto i Ai: O anafea na musuia ai oe e faatino ona o se valaaulia na tuuina atu e se tasi? Na faapefea ona suia ai lou olaga o se taunuuga? Matau valaaulia ua tuuina mai i tusitusiga paia ma taitai o le Ekalesia. O le a se mea ua e aoaoina e mafai ona fesoasoani ia te oe ao e valaaulia isi e faatino? O a ni auala e mafai ona e tulitataoina ai au valaaulia?

Mai Tusitusiga Paia: Luka 10:36–37; Ioane 7:17; Iakopo 1:22; Mosaea 4:9–10; Mataupu Faavae ma Feagaiga 43:8–10; 82:10

O Nisi o Auala e Faaaoga ai Mea Ua E Aoaoina

• Fai atu i isi e o mai saunia e faasoa mai se mea na aoao atu e le Agaga Paia ia i latou, e pei o se malamalamaaga mai se mau anoa.

• Tuu atu i tagata aoao ni avanoa e aoao atu ai se vaega o se lesona.

• Uunaia tagata aoao e iloilo se vitio, mau, po o se savali ae tou te lei feiloai.

• Tetee atu i le manao e tali fesili uma. Faaaofia isi i le sailia o tali.

• A o lei faasoa atu ou manatu e uiga i se mau, fai atu i tagata aoao e faasoa mai o latou lava manatu.

• Fai ni fesili e uunaia ai tagata aoao e saili tali i le afioga a le Atua.

• Valaaulia tagata aoao e fai a latou lava fesili e uiga i mea ua latou aoaoina.

• Tuu atu se taimi mo tagata aoao uma e mafaufau loloto ai i se fesili a o lei fai atu ia i latou e faasoa mai ni tali.

• Mafaufau e vaevae tagata aoao i ni vaega toalaiti o talanoaga, pe a talafeagai ai.

• Faailoa atu faamoemoega manino e fesoasoani ai i tagata aoao ia tuputupu ae.

• Tuuina atu valaaulia e musuia ai tagata aoao ia faaleleia ae e le lofituina. Tulitatao ma valaaulia tagata aoao e faasoa mai o latou aafiaga.

• Fesoasoani i tagata aoao e aoao mai tusitusiga paia e ala i le:

  • Faailogaina o fuaitau anoa, pe a manaomia.

  • Valaauliaina o faaaliga e ala i le mafaufau loloto ma le tatalo.

  • Tusitusi i lalo uunaiga faaleagaga.

  • Tausia o se api faamaumau mo suesuega.

  • Faatutuina o sini ia faatino mea latou te aoaoina.