“Fesoasoani i Tagata Aoao e O Mai ia Iesu Keriso,” Aoao Atu i le Ala a le Faaola: Mo I Latou Uma O E Aoao Atu i le Aiga ma i le Ekalesia (2022)
“Fesoasoani i Tagata Aoao e O Mai ia Iesu Keriso,” Aoao Atu i le Ala a le Faaola
I le avea ai ma faiaoga o le talalelei a Iesu Keriso, tatou te fesoasoani i isi ia malamalama ma faalagolago i Ana aoaoga, mana, ma le alofa.
Fesoasoani i Tagata Aoao e O Mai ia Iesu Keriso
E leai se mea e te faia o se faiaoga o le a sili atu ona faamanuiaina ai tagata aoao nai lo le fesoasoani ia i latou ia iloa le Tama Faalelagi ma Iesu Keriso ma lagonaina lo Laua alolofa (tagai Ioane 17:3). Mafaufau i aafiaga na fesoasoani ia te oe e te iloa ai ma alofa i le Tama Faalelagi ma Iesu Keriso. O le a se mea ua e faia e aoao ai e uiga i o Laua uiga, mana, ma le alofa? Na faapefea e lou alofa mo le Tama Faalelagi ma Iesu Keriso ona aumaia ia te oe le olioli? Ona mafaufau lea i le mea e mafai ona faia e lo La‘ua alofa ma le mana mo tagata taitoatasi e te aoaoina. (Tagai Alema 26:16; Mose 5:11.)
O la tatou sini tupito i lenei olaga o le avea atili lea e faapei o lo tatou Tama Faalelagi ma toe foi atu ia te Ia. O le ala tatou te ausia ai lena sini o le o mai ia Iesu Keriso (tagai Ioane 14:6). O le mafuaaga lea, e pei ona aoao mai le perofeta o Nifae, “ua matou tautalatala e uiga ia Keriso, ua matou olioli ia Keriso” (2 Nifae 25:26).
E manaomia e fanau uma a le Atua le malamalama ma le upumoni lea e sau mai le Faaola ma e mafai ona filifili e tali atu i ai. O le avea ma se faiaoga o le talalelei a Iesu Keriso o lona uiga o le fesoasoani lea i isi ia malamalama ma faalagolago i Ana aoaoga, mana togiola, ma le alofa atoatoa. Mafaufau pe mafai faapefea e manatu nei ona fesoasoani ia te oe e musuia ai isi ia iloa atili Iesu Keriso ma mulimuli ia te Ia.
Fesoasoani i Tagata Aoao ia Iloa le Alofa, Mana, ma le Alofa Mutimutivale o le Alii i o Latou Olaga
E lelei le iloa e uiga i le alofa, mana, ma le alofa mutimutivale o le Faaola, ae e manaomia foi ona tatou lagonaina . O le vaaia o le ala na Ia faamanuiaina ma faamaloloina ai tagata i tusitusiga paia e fesoasoani tatou te atiina ae ai le faatuatua sili atu e mafai ona Ia faamanuiaina ma faamaloloina ai i tatou. Mo se faataitaiga, o le aoao e uiga i aafiaga o Tanielu e le atoatoa pe afai e le musuia ai i tatou e faalagolago i le Alii pe a tatou feagai ma o tatou lava lua faafaatusa o leona.
A o e fesoasoani i tagata aoao ia iloa le “alofa mutimutivale agamalu” o le Alii (1 Nifae 1:20), i tusitusiga paia ma i o latou lava aafiaga, o le a latou lagonaina ma iloa o loo faatasi le Alii ma i latou ma o le a tu ma le alofa ia i latou (tagai Mataupu Faavae ma Feagaiga 68:6). O le a latou vaai ma lagonaina le moni o le alofa ma le alofa mutimutivale o le Alii i o latou manaoga patino ma tulaga.
E mafai e faiaoga ona fesoasoani i tagata aoao ia lagona le alofa, mana, ma le alofa mutimutivale o le Faaola.
Fesoasoani i Tagata Aoao ia Faamalosia lo Latou Sootaga ma le Tama Faalelagi ma Iesu Keriso.
O le faamoemoega o le aoao atu ma le aoao mai e uiga ia Iesu Keriso o le fesoasoani lea i tagata taitoatasi ia latalata atili atu ia te Ia ma lo tatou Tama Faalelagi. Fesoasoani i tagata o loo e aoaoina ia aua lava nei galo lena faamoemoega. Fautuaina i latou e faamalosia lo latou sootaga ma le Tama Faalelagi ma Iesu Keriso e ala i le suesue i tusitusiga paia, salamo e le aunoa, talanoa ma le Tama i le tatalo, ma molimau atu i le Tama ma le Alo. Aoao tagata aoao e ala i upu ma faataitaiga pe faapefea e le osia ma le tausia o feagaiga ona fusia ai i tatou ia i Laua. Fesoasoani ia latou iloa lo tatou taua ma le pele ia i Laua. Faamalosia lo latou faatuatua o Iesu Keriso, e ala i le mana o Lana Togiola atoatoa, ua na o le pau lea o le ala e toe foi atu ai i lo tatou Tama. Saunia avanoa mo tagata aoao e maua ai se molimau mai le Agaga Paia, “o lē e molimau i le Tama ma le Alo” (Mose 5:9).
Fesoasoani i Tagata Aoao e Taumafai ma le Loto i ai ia Avea Atili e Faapei o Iesu Keriso
I le iuga, o le aoao e uiga ia Iesu Keriso e musuia ai i tatou ia avea atili e faapei o Ia. Ae o le avea e faapei o Ia e tupu pe a tatou galulue i le faatuatua, i totonu ma fafo o le vasega, faia o filifiliga ma le loto i ai e mulimuli ai i Lana faataitaiga ma maua Lona alofa tunoa. Valaaulia tagata aoao e saili le fesoasoani a le Agaga Paia e faailoa mai auala e mafai ai ona latou avea atili e faapei o le Faaola. Ofo atu le taitaiga ma le lagolago a o taumafai tagata aoao ia avea e faapei o Ia o se taumafaiga i le olaga atoa.
Na aoao mai Iakopo e faapea “o mea uma na tuu mai e le Atua mai le amataga o le lalolagi” e mafai ona aoao ai i tatou e uiga ia Iesu Keriso (2 Nifae 11:4). O lau aoaoga e mafai ona avea ma se tasi o na mea. Tuu Iesu Keriso i le totonugalemu o aafiaga taitasi faafaiaoga ma le aoaoina mai. A o outou “tautalatala ma [tagata aoao] e uiga ia Keriso, … olioli ia Keriso, … talai atu Keriso” (2 Nifae 25:26), e mafai e le Agaga Paia ona totoina se molimau o le Faaola i le loloto o le mafaufau ma le loto o tagata taitoatasi. A o e fesoasoani i au tagata aoao ia iloa le Tama Faalelagi ma Iesu Keriso mo i latou lava, o le a sili atu ona latou liliu atu ia i Laua mo se fesoasoani, faamoemoe, ma le faamalologa i o latou olaga atoa.