alii o loo aoao atu le aiga

Fautuaga mo Faatulagaga Eseese o le Aoao Atu ma Tagata Aoao

O mataupu faavae o le aoao atu i le ala a le Faaola e mafai ona faaaoga i soo se avanoa faafaiaoga—i le aiga, i le lotu, ma isi nofoaga. Peitai, o avanoa uma lava e o mai faatasi ma ona lava tulaga uiga ese. O le vaega lenei o loo tuuina atu ai ni fautuaga faaopoopo e patino i tagata aoao eseese ma faatulagaga faafaiaoga.

Aiga ma le Auaiga

O Le Aiga o le Nofoaga Sili lea mo le Aoao Atu ma le Aoaoina Mai o le Talalelei

Na aoao mai Peresitene Russell M. Nelson e faapea o le aiga e tatau ona avea ma “totonugalemu o le aoaoina o le talalelei” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113). O le aoaoga e tupu i le lotu po o le seminare e taua ma e manaomia, ae e tatau ona lagolagoina le aoaoga lea e tupu i le fale. O le faatulagaga autu—ma le faatulagaga sili—mo le aoaoina o le talalelei, mo i tatou lava ma o tatou aiga, o le aiga lea.

Ae e le faapea ai la o le lelei o le aoaoina o le talalelei e otometi lava ona tupu i le aiga; e manaomia ai se taumafaiga magafagafa. Na fautua mai Peresitene Nelson atonu e manaomia ona e “suia” pe “toe faafou lou fale”—e le faapea e ala i le talepeina i lalo o puipui po o le faaopoopo i ai o se fola fou ae atonu e ala i le iloiloina o le agaga atoa i lou aiga, e aofia ai lou sao i lena agaga (“Avea ma Faataitaiga Lelei o le Paia o Aso e Gata Ai,” 113). Mo se faataitaiga, mafaufau i musika, vitio, ma isi ala o faasalalauga i lou aiga; o ata o loo i luga o puipui; ma le ala e talanoa ai ma taulima e tagata o lou aiga le tasi ma le isi. Pe o valaaulia e nei mea le faatosinaga a le Agaga Paia? O e faaavanoaina se taimi mo le aoaoina o le talalelei, mo le tagata lava ia ma o se aiga? O lagona e tagata o le aiga le alofagia, saogalemu, ma le latalata atu i le Atua pe a latou i ai i totonu o lou aiga?

Atonu e te le lagonaina o loo ia te oe le puleaina o le siosiomaga faaleagaga i totonu o lou aiga. Afai o le tulaga lena, ia avea ma faatosinaga sili e te mafaia ma ole atu i le Alii mo se fesoasoani. O le a Ia faamamaluina au taumafaiga amiotonu. Pe a e taumafai e aoao atu ma aoao mai le talalelei, e tusa lava pe e te le vaaia ni taunuuga manaomia i le taimi lava lena, ua faamanuiaina oe.

O le Aoaoina i le Aiga e Faavae i Sootaga

“Alofa ia i latou e te aoaoina” e faatatau i faatulagaga uma mo le aoaoina atu o le talalelei, ae i totonu o le aiga, e tatau ona oo mai i le tulaga sili masani ma lagonaina le loloto sili le alofa. E tusa lava pe itiiti ifo le lelei o lou aiga, ae e tatau lava ona avea ma totonugalemu o le aoaoina atu o le talalelei aua o iina e fausia ai a tatou sootaga sili ona mausali. O faiaoga i fafo atu o le aiga atonu e tele atu o latou poto masani po o aoaoga faamasani o ni faiaoga, ae e le mafai lava ona latou faaluaina le gafatia mo sootaga alofa ma faavavau o loo i ai i le aiga. O lea ia faafaileleina na sootaga. Faaalu le taimi ma taumafaiga e tatau ai e faalogo ai i tagata o lou aiga ma fausia ai le faatuatuaina ma le malamalama faatasi ma i latou. O le a fesoasoani lenei mea e fausia ai se faavae mautu mo au taumafaiga e aoao atu ma aoaoina le talalelei i le aiga.

O le Aoaoina i le Aiga e Mafai ona Fuafuaina pe Le Fuafuaina Foi

O le tele o vasega a le Ekalesia e faatasi i le vaiaso, faatasi ai ma se amataga ma se faaiuga faatulagaina, ae e le o le tulaga lea i le fale i taimi uma. Atonu e i ai sau lesona faatulagaina o le afiafi faaleaiga po o suesuega faaleaiga o tusitusiga paia, ae o avanoa e aoao atu ai i le aiga e masani ona tupu soo i taimi faasamasamanoa, taimi o aso uma—a o taumafa se taumafataga, faia feau, taaalo i se taaloga, malaga i le galuega po o le aoga, faitauina se tusi, po o le matamata faatasi i se tifaga. O ni timuga malolosi o se avanoa e talanoa ai e uiga i auala e puipuia ai e le Faaola i tatou mai le tele o afa o le olaga. O se talavou e i ai se faaiuga faigata e fai atonu ua saunia e aoao e uiga i faaaliga faaletagata lava ia. O se tamaitiiti ua faamata‘uina e ono manuia mai lau molimau e uiga i le Faamafanafana. O tamaiti o e faalogogata pe agaleaga le tasi i le isi e mafai ona aoaoina e uiga i le salamo ma le faamagaloga.

Ona o nei taimi e le fuafuaina, e le mafai ona e saunia mo ia taimi e pei ona e saunia mo se lesona masani. Peitai, e mafai ona e saunia oe lava e ala i le nofouta i le Agaga ma taumafai ia “saunia pea lava” (1 Peteru 3:15). Soo se taimi lava e mafai ona avea o se taimi e aoao atu ma aoao mai ai.

O le Aoaoina i le Aiga e Aofia ai Taumafaiga Laiti, Faatauvaa, ma Faifai Pea

O nisi taimi e lotovaivai ai matua pe a foliga mai e le faamanuiaina a latou taumafaiga e aoao atu le talalelei i le fale. Faaletagata lava ia, o se afiafi faaleaiga se tasi, se vasega suesue o tusitusiga paia, po o se talanoaga faaletalalelei atonu e foliga mai o le a ausia ai le tele o mea. Ae o le faateleina o taumafaiga laiti, faatauvaa, e faifai pea lava pea i le aluga o taimi, e mafai ona sili atu ona mamana ma faamalosia nai lo se taimi maoae po o se lesona iloga. “O le a oo mai mea uma i lo latou taimi,” ua fetalai mai ai le Alii. “O le mea lea, aua le faavaivai i le faia o mea lelei, ona o loo oulua faataatiaina le faavae o se galuega tele. Ma o mea iti e tutupu mai ai mea tetele” (Mataupu Faavae ma Feagaiga 64:32–33; tagai foi Alema 37:6–7). O lea aua le fiu, ma aua le popole i le faataunuuina o se mea maoae i taimi uma. Tau lava o le tumau i au taumafaiga.

I le Aiga, o le Aoaoina ma le Ola e Le Mavavaeeseina

E fesootai vave le talalelei i totonu o le aiga. O iina o tagata o loo outou aoaoina le talalelei o tagata ia o le a outou ola ai—i aso uma. O le mea moni, o le tele o taimi, o le ola ai i le talalelei o le auala lea tatou te aoao ai le talalelei. O lea ao e aoaoina ma aoao atu le talalelei i le fale, vaavaai mo ni auala e fesootai ai mea o loo e aoaoina i mea o loo e faia. I lou aiga, ia avea le talalelei ma se mea e te taumafai e ola ai, ae le na o se mea e te talanoa ai.

tamaitai o loo aoao atu tamaiti

O avanoa faafaiaoga i le aiga e masani ona tutupu i taimi faasamasamanoa, i taimi o aso uma.

Aoaoina o Fanau

E Manaomia e Tamaiti ni Mea Eseese

E eseese uma tamaiti, ma a o latou tuputupu ae, o le a suia o latou manaoga. O le eseese o au metotia faafaiaoga o le a fesoasoani ia te oe e taulima ai o latou manaoga eseese. Mo se faataitaiga, mafaufau e faaaoga mea nei:

• Tala. E fesoasoani tala i tamaiti e vaai ai pe faapefea ona faaaoga le talalelei i aso uma o le olaga. Faaaoga tala mai tusitusiga paia, mai lou lava olaga, mai lou lava talafaasolopito o aiga, pe mai mekasini a le Ekalesia, aemaise lava tala e uiga i le Faaola. Fuafua ni auala e faaaofia ai tamaiti i le tala—e ala i le uuina o ata, toe fai fuaitau, po o le faatinoina o vaega.

• Fesoasoani vaaia. O ata, vitio, ma mea faitino e mafai ona fesoasoani i tamaiti ia malamalama ma manatua ai mataupu faavae o le talalelei. E tele ata ma vitio e mafai ona maua i le Media Library i luga o le ChurchofJesusChrist.org.

• Musika. O viiga ma pese paia e mafai ona fesoasoani i tamaiti e lagonaina ai le alofa o le Atua, lagona le Agaga, ma aoao upumoni o le talalelei. O fatuga, fati, ma solo faigofie e mafai ona fesoasoani i tamaiti e manatua ai upumoni o le talalelei mo le tele o tausaga e oo mai. Ao e pese faatasi ma tamaiti, fesoasoani ia latou maua ma malamalama i mataupu faavae ua aoaoina i pese.

“O le toatele o tamaiti e sili atu ona aoaoina pe a faaaofia ai faalogona eseese. Sue ni auala e fesoasoani i tamaiti e faaaoga ai o latou sane o le vaai, faalogo, ma le tago a o latou aoao. I nisi o tulaga, e te ono mafai foi ona sue ni auala e faaaofia ai o latou sane o le sogisogi ma le tofo!

O Tamaiti E Sogasoga

A e valaaulia tamaiti e tusi se ata, fau, vali, pe tusi se mea e fesootai ma se mataupu faavae o le talalelei, e te fesoasoani ia i latou e malamalama atili i le mataupu faavae, ma e te tuuina atu ia i latou se faamanatu fai tino o mea o loo latou aoaoina. E mafai foi ona latou faaaogaina mea ua latou fauina e faasoa atu ai mea ua latou aoaoina ma isi. O lomiga taitasi o le Uo e aofia ai ni gaoioiga fatufatuai mo tamaiti.

O Tamaiti E Fia Iloa

Pe a fai atu e tamaiti ni fesili, vaai i ai o ni avanoa, ae le o ni mea faalavelave. O fesili a tamaiti o se faailoga lea ua latou saunia e aoao, ma o a latou fesili e avatu ai ia te oe ni malamalamaaga taua i mea o loo latou mafaufau i ai ma lagonaina. Fesoasoani ia i latou e iloa o tali i a latou fesili e mafai ona maua i totonu o tusitusiga paia ma upu a perofeta soifua.

E Manaomia e Fanau le Alofa e Tusa lava pe Latou te Faalavelave

O isi taimi e amio ai se tamaitiiti i ni auala e faalavelave ai i le aotauina o isi. O le tele o mea faalavefau i amioga e tupu mai i se manaoga e le i faamalieina. A tupu lenei mea, ia onosai, alofa, ma malamalama e uiga i luitau o loo feagai ma lea tamaitiiti. Atonu na te manaomia nisi avanoa e auai ai i lesona i ni auala lelei—mo se faataitaiga, uuina o se ata, tusi se ata, tusia o se ata, po o le faitauina o se mau.

Afai e faaauau pea ona faalavelave se tamaitiiti, atonu e fesoasoani le talanoa patino ia te ia. I se agaga o le alofa ma le onosai, faamatala ou faamoemoega ma lou talitonuga e te iloa e mafai e ia ona faia. Viia le tamaitiiti pe a ia faia ni filifiliga sili atu.

E Tele Mea e Faasoa Atu e Tamaiti

A aoaoina e tamaiti se mea fou, e masani lava ona mananao e faasoa atu i isi. Faamalosia lenei manao e ala i le tuuina atu o avanoa i tamaiti e aoao ai mataupu faavae o le talalelei i le tasi ma le isi, i tagata o o latou aiga, ma a latou uo. Fai atu foi ia i latou e faasoa atu o latou manatu, lagona, ma aafiaga e fesootai i le mataupu faavae o loo e aoaoina. O le a e iloaina o loo ia i latou ni manatu e faigofie, mama, ma mamana.

E Mafai e Tamaiti ona Lagonaina le Agaga ae Atonu e Manaomia le Fesoasoani e Iloa ai Lana Uunaiga

E oo lava i tamaiti e lei mauaina le meaalofa o le Agaga Paia e mafai ona lagonaina Lana uunaiga, aemaise lava pe a latou aoao e uiga ia Iesu Keriso ma Lana talalelei. A latou faia filifiliga amiotonu, e mafai ona latou lagonaina le faamaoniga a le Faaola e ala i le Agaga. Aoao tamaiti e uiga i auala eseese e fesootai mai ai le Agaga ia i tatou. Fesoasoani ia latou iloa Lona siufofoga a o Ia fetalai atu ia i latou. O le a fesoasoani lenei mea ia i latou e atiina ae ai se mausa o le sailia ma le faatinoina o faaaliga faaletagata lava ia i o latou olaga atoa.

Aoaoina o le Autalavou

Ua I Ai i le Autalavou se Gafatia Tele

Ua i ai i le autalavou le gafatia e faia ai ni mea matagofie i le auaunaga a le Alii. O le tele o aafiaga o loo faamaumauina i tusitusiga paia o loo faamanino mai ai e i ai i le Atua le talitonuga i agavaa faaleagaga o tagata talavou. Afai e lagona e le autalavou e te faatuatuaina i latou, o le a tuputupu ae lo latou talitonuga i lo latou gafatia paia, ma o le a latou faateia oe i mea e mafai ona latou faataunuuina. Fesoasoani ma le alofa ia i latou ia iloa le mea e silafia e le Tama Faalelagi e mafai ona avea ai i latou. Mulimuli i le faataitaiga a le Faaola e ala i le faaauau pea ona alofa ma faamalosiau ia i latou, galulue ma le onosai faatasi ma i latou, ma aua lava nei fiu ia i latou.

O Loo Aoao le Autalavou e uiga ia i Latou Lava

O talavou o loo e aoaoina o loo fatuina faavae o la latou molimau. Ua latou i ai i le faagasologa o le iloaina o o latou talitonuga ma talitonuga maumaututu. O loo latou faia ni faaiuga o le a aafia ai le ala o o latou olaga. Ina ia ola faaleagaga i nei taimi faigata ma faataunuu le misiona a le Alii mo i latou, o le a manaomia e le autalavou o loo e aoaoina ona iloa pe faapefea ona maua le malosi i taimi o o latou tofotofoga, tali i a latou fesili, ma le lototele e “tutu o ni molimau a le Atua” (Mosaea18:9).

Ua i ai i le autalavou se naunautaiga tuputupu ae e aoao mea e ala i le mafaufau ma le poto masani nai lo le na o le ta‘uina atu o mea. O lona uiga o le aoaoina o le autalavou o le a manaomia ai le tomai lelei e faalogo ai. A lagona e le autalavou o loo e malamalama ia i latou, o le a sili atu ona latou lagonaina le gauai atu i fautuaga ma taitaiga. Faamautinoa atu ia i latou e silafia i latou e le Alii ma o le a fesoasoani ia i latou a o latou tauivi ma fesili ma tofotofoga. E mafai ona latou faatinoina lo latou faatuatua ia te Ia e ala i le atiina ae o se mausa o le tatalo ma le suesueina o tusitusiga paia i aso taitasi ma e ala i le auauna atu i isi. O le uunaia o le autalavou e auai i vasega a le Ekalesia ma suesue le tagata lava ia e mafai ona fesoasoani ia i latou ia maua ni aafiaga patino o le a fausia ai a latou molimau i lo latou tofi paia.

E Toatele le Autalavou e Fiafia i le Faaaogaina o Tekinolosi

Afai o le autalavou o loo e aoaoina e i ai a latou lava masini eletonika, ia manatua o nei masini o ni meafaigaluega e faaleleia ai le aoaoina. Aoao i latou i le auala e faaaoga ai a latou tusitusiga paia faaeletonika ma isi punaoa o loo maua i le Gospel Library. E mafai foi ona e auina atu ni feau tusitusia ma sootaga i le autalavou i le aluga o le vaiaso e fesoasoani ai ia i latou e saunia mo lesona o le a sosoo ai.

Vasega o le Aoga Sa

E manaomia ona malamalama le autalavou i mea e silafia e le Tama Faalelagi e mafai ona avea ai i latou.

Aoaoina o Tagata Matutua

E Mafai e Tagata Matutua ona Tauaveina le Tiutetauave mo Lo Latou Aoaoina

O tagata aoao matutua e mafai ona galulue mo i latou lava i faatulagaga o le aoaoina o le talalelei (tagai i le 2 Nifae 2:26). Valaaulia i latou e sauni mo talanoaga o le talalelei e ala i le suesueina muamua o se mea, ma uunaia i latou e faasoa mai mea ua latou aoaoina e ala i le Agaga. E mafai foi ona e fesili atu ia i latou po o fea o mataupu faavae o le talalelei latou te mananao e faaalu se taimi e aoao faatasi ai.

E Utuvai Mai Tagata Matutua i o Latou Aafiaga Pe a Aoao

Sa ta‘ua e Iopu, “O loo i ai le poto i e ua toeaina; o le faalevaleva foi o aso e i ai le faautauta” (Iopu 12:12). E masani lava, o le poto ma le malamalama faaleagaga e oo mai pe a mavae tausaga o le poto masani. A o e aoaoina tagata matutua, valaaulia i latou e faasoa mai ni aafiaga na fausia ai lo latou faatuatua i le Tama Faalelagi ma Iesu Keriso. O lenei mea o le a tuuina atu ai ia i latou ni avanoa e molimau atu ai e uiga i le ala ua latou iloa ai o mataupu faavae o le talalelei o loo latou suesueina e moni. O le fefaasoaai foi o aafiaga o le a fausia ai foi sootaga i le va o i latou e te aoaoina, fesoasoani i “tagata uma … ia faagaeetia ai o tagata uma” (Mataupu Faavae ma Feagaiga 88:122).

E Saili e Tagata Matutua Faatinoga Talafeagai

O tagata matutua o loo e aoaoina atonu e tele matafaioi ma tiutetauave i a latou galuega, nuu, valaauga o le Ekalesia, ma aiga. A latou suesue i le talalelei, e masani ona latou mafaufau pe mafai faapefea e mea o loo latou aoaoina ona fesoasoani ia i latou i na matafaioi. Valaaulia i latou e vaai pe faapefea ona talafeagai le afioga a le Atua i o latou tulaga uiga ese. E mafai ona e faia lenei mea e ala i le fesili atu ia i latou pe faapefea ona anoa ma talafeagai ia mataupu faavae o le talalelei i o latou olaga.

E Mafai e Tagata Matutua ona Mafaufau i Auala Faigata

Ona o lo latou poto masani ma le malamalama, ua iloa ai e tagata matutua e le o i ai i taimi uma ni tali faigofie i fesili o le talalelei. E mafai ona latou talisapaia atonu e tele ni uiga o se mau, ma e mafai ona latou faaaogaina se mataupu faavae o le talalelei i ni tulaga eseese o le olaga. Valaaulia i latou e mafaufau loloto pe faapefea ona fesootai mataupu faavae o le talalelei i le tasi ma le isi ma le mea o loo tupu i o latou olaga. Uunaia le auai ma talanoaga ina ia mafai ona latou aoao mai manatu tulaga ese o le tasi ma le isi.

tamaitai o loo aoao le vasega

E mafai e tagata matutua ona faasoa mai ni aafiaga se tele na fausia ai lo latou faatuatua i le Tama Faalelagi ma Iesu Keriso.

Aoaoina o Tagata e i ai Manaoga Faapitoa

Fesoasoani i Tagata Taitoatasi Ia Tuputupu Ae ma Alualu i Luma.

Sa aoao mai Iosefa Samita, “O mafaufau ma agaga uma ua auina mai e le Atua i le lalolagi ua mafai ona faateleina” (Aoaoga a Peresitene o le Ekalesia: Iosefa Samita [2007], 210). Manatu faapea o fanau uma a le Atua e mafai ona faateleina le malamalama ma le alualu i luma. Ole atu i le Alii e fesoasoani ia te oe ia iloa pe faapefea ona fesoasoani i tagata taitoatasi.

Aoao e uiga i Manaoga Faapitoa

Talanoa i tagata aoao po o o latou matua po o tagata tausimatua. Saili po o a auala e sili atu ona lelei ai le aoao o le tagata ma po o a metotia e sili ona aoga. E mafai foi ona e fefautuaai ma isi taitai ma faiaoga o loo i ai le poto masani ma malamalamaaga e faasoa atu. Mo auala aoga e aoao atu ai, tagai i le disabilities.ChurchofJesusChrist.org.

Fatufatu se Siosiomaga Lelei

Fatufatu se siosiomaga lelei lea e lagona ai e tagata uma le saogalemu ma le alofaina. Aua e te manatu e tutusa uma tagata aoao e i ai manaoga faapitoa, ma taulimaina tagata taitoatasi i le alofa ma le faaaloalo. Fautuaina isi ia agalelei ma taliaina.

Ia Mautinoa e Mafai e Tagata Uma ona Auai

E mafai ona faia ni suiga laiti i gaoioiga e faamautinoa ai e mafai e tagata aoao uma ona aoao, e aofia ai i latou e i ai faafitauli faaletino pe faigata ona aoao. Mo se faataitaiga, afai o se gaoioiga e fautuaina ai le faaalia o se ata, e mafai ona e usuina se pese e fesootai ina ia faaaofia ai tagata aoao e i ai ni faaletonu i le vaai.

Faatulaga Ni Faiga Masani ma le Faasologa Tumau

O se tasi auala e faatulaga ai se faiga masani o le faia lea o se pepa lautele o i ai se taimi faatulagaina. O lau faatulagaga e ono aofia ai tatalo, taimi mo le aoaoga, ma le taimi o gaoioiga. O le mulimuli i se faatulagaga e mafai ona fesoasoani e faaitiitia ai lagona o le le mautonu ma le popole mo nisi o tagata aoao.

Malamalama Pe Aisea E I Ai Amioga Faigata

Aoao e uiga i manaoga faapitoa po o tulaga e mafai ona aafia ai se tagata e amio le talafeagai. Vaavaai totoa i le mea o loo tupu pe a tulai mai amioga faigata. Mafaufau ma le agaga tatalo pe faapefea ona suia le tulaga ina ia mafai ona sili atu le lagolago i tagata aoao.

Mo nisi faamatalaga e uiga i le aoaoina o tagata e i ai manaoga faapitoa, tagai disabilities.ChurchofJesusChrist.org.

Vasega a Tamaitai Talavou

E mafai e faiaoga ona faia se siosiomaga lelei e aoao ai lea e lagona ai e tagata uma le taliaina ma le alofaina.

Aoao Atu Faatekinolosi

Ia Faamasani i Tekinolosi

A o lei amataina lau vasega po o le fonotaga, faaalu sina taimi e faamasani ai i le tekinolosi o le a e faaaogaina. Suesue i nisi o ona vaaiga, e pei o le auala e faasoa atu ai vitio po o ata. Fuafua le faia o se fonotaga “faataitai” ma ni tagata o lou aiga po o ni uo.

O le tele o uarota ma siteki e i ai se tagata tomai faapitoa mo tekinolosi. E mafai foi ona e iloa isi o e ua i ai le poto masani i fonotaga faatekinolosi. Talosaga mo a latou fautuaga ma taiala.

Aveese Mea Faalavefau e Ono I ai

Afai e mafai, saili se nofoaga filemu e fai ai la outou fonotaga. O le pisapisao mai tua e mafai ona faalavelave. Uunai tagata aoaoina ia faia o lea lava mea pe tape a latou mea faaleotele leo pe afai e le o talanoa i latou.

Faaaoga le Meapueata

Afai e mafai, faaola pea lau meapueata ina ia mafai ai ona iloa atu e tagata aoao ou fofoga. Valaaulia (ae le faamalosia) tagata aoao e faaola foi a latou meapueata. E mafai ona fesoasoani lenei mea e fausia ai se agaga o le lotogatasi ma le lagolagosua tutusa.

Faaaoga le Vaega o Talanoaga Faatekinolosi

O le tele o polokalama o fonotaga faatekinolosi e mafai ai e tagata auai ona tusi ni fesili po o ni manatu i le faamalama o talanoaga. E mafai foi e isi ona faataga tagata auai e sii o latou lima faatekinolosi. Tuu atu ia iloa e tagata aoao nei vaega. E mafai ona e tofia se tasi e matau lima o loo sii po o manatu faaalia i le faamalama o talanoaga ina ia mafai ai ona e taulai atu i le taitaiina o le talanoaga.

Saili Auala e Faaaofia ai Tagata Aoao

O faatulagaga o le aoaoina faatekinolosi i nisi taimi e faigata ai ona iloa atu ma lagona tagata. Fai se taumafaiga magafagafa e faaaofia ai i latou o e mananao e auai. O nisi taimi o lona uiga o le fatuina o ni vaega toalaiti atu (mo se faataitaiga, e ala i le vaevaeina o se vasega toatele o le Aoga Sa). O nisi taimi o lona uiga o le fesili muamua atu i tagata aoao e auai i se auala patino. Aua nei faatagaina tapulaa o tekinolosi e mafua ai ona galo ia te oe pe le ano atu i tagata o e mananao ma naunau e aoao.