Yexus rub Petus tawm hauv cov dej thaum cua daj cua dub

Tus uas Ua Kom Kev Ntseeg Tiav, los ntawm J. Alan Barrett

Caw Kom Tib Neeg Rau Siab Kawm

Yeej xav tsis thoob thaum nws pom tus Cawm Seej los ko taw saum nplaim dej. Tiam sis qhov ntawd tsis txaus Petus lub siab. Petus xav ua zoo li tus Cawm Seej ua, mus rau qhov chaw uas Nws nyob, thiab ua neej zoo li Nws. Nws hais tias, “Thov koj hais kom kuv mus tau saum nplaim dej tuaj cuag koj.” Tus Cawm Seej tau teb hais tias: “Cia li tuaj.” Ces Petus txawm tawm hauv lub nkoj mus thiab qhia rau peb tias kev ua ib tug thwj tim yeej tsis yog ib yam uas yus ua twj ywm xwb (saib Mathais 14:24–33). Yuav tsum ntseeg Yexus Khetos thiab rau siab ua. Tiam sis kev ua ib tug thwj tim kuj muaj nqi zog uas yog kev nrog tus Cawm Seej mus.

“Cia li tuaj.” “Cia li los thiab saib.” “Los, nrog kuv mus.” “Cia li mus ua ib yam li ntawd” (Mathais 14:29; Yauhas 1:39; Lukas 18:22; 10:37). Txij thaum Nws pib Nws txoj hauj lwm qhuab qhia, tus Cawm Seej caw Nws cov thwj tim kom kawm txog tej lus tseeb, lub hwj chim, thiab txoj kev hlub uas Nws xav muab rau lawv. Nws tau ua li no vim kev kawm yeej yog raws li txoj kev no. Tsis yog kev mloog los sis kev nyeem ntawv xwb; yeej yuav tsum hloov siab los ntseeg thiab kawm zuj zus. Raws li tus Cawm Seej tej lus, kev kawm yog los ntawm “kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118; ntxiv qhov uas ntawv qaij). Thiab kev ntseeg yog kev ua peb tus kheej, tsis yog raug lwm yam ua tej yam rau peb xwb (saib 2 Nifais 2:26).

Thaum peb coj raws li tus Cawm Seej tus yam ntxwv, peb caw uas peb qhia kom thov, nrhiav, thiab khob qhov rooj—ces pab lawv nrhiav tau (saib Mathais 7:7–8). Thiab peb yuav tsum ua raws li lo lus caw ntaw thiab. Ua ke, dhau los ntawm peb txoj kev ntseeg Yexus Khetos thiab txoj kev rau siab, peb yuav paub tias kev taug kev nrog Nws zoo li cas.

Caw Kom Tib Neeg Rau Siab Kawm

• Pab cov neeg lav ris tej yam uas lawv yuav kawm.

• Hais kom cov neeg kawm kom paub txog tus Cawm Seej los ntawm kev kawm txog txoj moo zoo txhua hnub.

• Caw cov neeg kom npaj kawm.

• Hais kom cov neeg qhia txog tej yam tseeb uas lawv kawm.

• Caw cov neeg kom ua neej raws li tej yam uas lawv kawm.

Tus Cawm Seej tau Pab Lwm Tus Lav Ris tej Yam uas Lawv Yuav Kawm

Kev ua nkoj uas hla taus dej hiav txwv yeej yog ib qho nyuaj rau txhua tus. “Tus Tswv txhais tes yeej coj [Yales tus tij laug] kev tsis tu ncua” (Ethaws 2:6), thiab Nws txais tej lus qhia txog qhov uas yuav ua lub nkoj zoo li cas thiab yuav ua li cas kom cua nkag hauv. Tiam sis koj kawm dab tsi txog qhov uas tus Tswv teb li cas thaum Yales tus tij laug thov Vajtswv seb yuav ua li cas kom muaj teeb ci hauv lub nkoj? (saib Ethaws 2:22–25). Yales tus tij laug tau koob hmoov li cas thaum tus Tswv caw nws muab siab rau ntseeg li no? (saib Ethaws 3:1–16).

Tej zaum yuav yooj yim dua yog koj qhia cov neeg kawm txog tag nrho tej yam uas koj xav tias lawv yuav tsum paub. Tiam sis Txwj Laug David A. Bednar ntuas hais tias: “Tsis yog peb yuav tsum xav tias ‘Kuv yuav tsum qhia dab tsi rau lawv?’ Tiam sis, peb yuav tsum nug peb tus kheej tias ‘Kuv yuav caw lawv ua dab tsi? Kuv yuav nug tej yam twg kom coj tus Vaj Ntsuj Plig Dawb Huv los nrog lawv nyob, yog tias lawv kam ua li tau caw lawv?’” (ib hmo nrog ib tug Tuam Thawj Coj, Ob Hlis Ntuj 7, 2020, broadcasts.ChurchofJesusChrist.org).

Xav seb koj yuav ua li cas kom caw cov neeg lav ris lawv txoj kev kawm. Piv txwv hais tias, koj caw tau lawv nug tej yam lawv xav paub, nrhiav tej lus teb, xav zoo zoo, thiab sau ntawv txog lawv tej kev xav. Thaum lawv ua li ntawd, lawv txoj kev ntseeg yuav muaj zog zuj zus, lawv yuav kawm tej yam tseeb txog Vajtswv txoj lus, thiab yuav ua neej raws li tej lus tseeb no. Thaum peb lav ris peb txoj kev kawm, peb yuav muaj cai hais li Joseph Smith tau hais tias, “Kuv tau kawm paub rau kuv tus kheej” (Joseph Smith—History 1:20).

Tej Lus Nug Zoo Xav Txog: Vim li cas cov neeg kawm yuav tsum rau siab thiab tsis txhob nyob twj ywm xwb? Koj yuav pab lawv li cas kom lawv lav ris lawv txoj kev kawm? Cov xib hwb tau ua li cas kom pab koj ua li no? Tej zaj twg los ntawm cov vaj lug kub hais txog cov neeg uas lwm tus caw lawv kawm rau lawv tus kheej? Tej zaj no puas hloov koj txoj kev qhia?

Los ntawm cov Vaj Lug Kub: 1 Nifais 11; Lus Qhuab Qhia thiab Kev Khi Lus 9:7–8; 58:26–28; 88:118–125; Joseph Smith—Keeb Kwm 1:11–20

Tus Cawm Seej tau Hais Kom cov Neeg Kom Paub txog Nws Los ntawm Kev Kawm txog Nws txoj Lus

Thaum txog lub sij hawm rau tus Cawm Seej txhim tsa Nws lub Koom Txoos hauv hnub nyoog kawg no, Nws tau qhia Nws cov tub qhe kom lawv “Cia li vam khom rau tej yam uas twb tau muab sau cia” (Lus Qhuab Qhia thiab Kev Khi Lus 18:3). Muaj tseeb tiag, Phau Ntawv Maumoos, thaum ntawd yuav luag muab txhais tas, twb muaj tej lus qhia rau txoj hauj lwm no, xws li txoj kev muab neeg ua kev cai raus dej, muab lub cim nco txog rau lwm tus, thiab lwm yam uas muaj nqis heev. Tiam sis tus Cawm Seej kuj xav kom Nws cov tub qhe pom tias Nws tej kev tshwm sim yog ib lub cib fim mloog Nws hais thiab los paub Nws zoo dua ntxiv. Nyob hauv kev tshwm sim ntawd, Nws qhia lawv tias, “Twb yog kuv lub suab uas hais tej no rau nej; … yog li ntawd, nej muaj peev xwm ua tim khawv tias nej tau hnov kuv lub suab, thiab paub kuv tej lus” (Lus Qhuab Qhia thiab Kev Khi Lus 18:35–36).

Cia li xav txog cov neeg uas koj qhia. Lawv xav li cas txog kev kawm vaj lug kub? Ib yam li ntawd, koj xav li cas txog kev kawm vaj lug kub? Puas yog ib yam koj yuav tsum ua txhua hnub? Thaum koj kawm cov vaj lug kub, koj puas xav tias tus Cawm Seej hais lus rau koj Thawj Tswj Hwm Russell M. Nelson qhia tias: “Peb yuav mus qhov twg kom thiaj mloog Nws hais? Peb nrhiav hauv vaj lug kub los tau. … Peb yuav tsum kawm txog Vajtswv txoj lus txhua hnub kom peb thiaj li yuav muaj peev xwm nyiaj kom dhau hauv lub caij nyoog uas muaj tej xwm txheej ntawm sab ntsuj plig. Thaum peb mloog ntsoov Khetos tej lus txhua hnub, Khetos tej lus yuav qhia peb paub ua li cas thaum peb raug tej teeb meem uas peb xav tias peb yeej yuav tsis raug” (“Mloog Nws Hais,” Liahona, Tsib Hlis Ntuj 2020, 89). Thaum koj qhia, hais kom cov neeg muaj lub hom phiaj nrhiav tus Cawm Seej thaum lawv kawm cov vaj lug kub—tsis yog kev nrhiav tej nqe los sis tej lus tseeb txog Nws xwb tiam sis kev nrhiav Nws. Kev hnov tus Tswv lub suab txhua hnub hauv cov vaj lug kub yeej yog lub hauv paus ntawm kev kawm txog txoj moo zoo tas koj lub neej.

Tej Lus Nug Zoo Xav Txog: Cia li xav seb koj txoj kev kawm vaj lug kub zoo li cas. Kev kawm Vajtswv txoj lus tau pab koj li cas kom sib raug zoo nrog Nws? Koj yuav ua li cas kom kawm tau zoo dua? Koj yuav ua li cas kom pab lwm tus rau siab kawm Vajtswv txoj lus tsis tu tsis tseg? Lawv yuav tau koob hmoov twg thaum lawv ua li ntawd?

Los ntawm cov Vaj Lug Kub: Yausuas 1:8; 2 Timautes 3:15–17; 2 Nifais 32:3; Yakhauj 2:8; 4:6; Lus Qhuab Qhia thiab Kev Khi Lus 33:16

Tus Cawm Seej tau Caw Lwm Tus Kom Npaj Kawm

Cov noob zoo tshaj yeej tsis loj tuaj thaum nyob hauv cov av uas tawv tawv, muaj pob zeb, los sis tuaj pos. Ib yam li ntawd, cov lus qhuab qhia uas txhawb kev ntseeg thiab muaj nqis heev ntshe yuav tsis hloov ib lub siab uas tsis npaj txais cov lus ntawd. Qhov no yog lub ntsiab ntawm tus Cawm Seej zaj lus piv txwv txog tus uas tseb noob nplej, cov noob, thiab cov av. Yog tias cog hauv “qhov av zoo”—uas yog ib lub siab uas mos muag thiab tsis muaj pob zeb thiab tsis tuaj pos ntawm sab ntsuj plig—ces Vajtswv txoj lus yeej yuav txi txiv (saib Mathais 13:1–9, 18–23).

Yuav tsum npaj koj sab ntsuj plig—koj thiab cov neeg uas koj qhia. Yog li ntawd peb yuav ua li cas kom npaj peb lub siab thiaj li yuav muaj “qhov av zoo” rau Vajtswv txoj lus? Xav txog tej lub ntsiab cai txog kev npaj nram qab no, uas koj siv tau hauv koj lub neej thiab txhawb nqa hauv cov uas koj qhia lub neej. Thov Vajtswv kom paub tias tus Tswv xav kom koj kawm dab tsi. Ua neej zoo kom thiaj li caw Nws nrog nraim koj nyob hauv koj lub neej. Hloov siab lees txim txhua hnub. Txhawb nqa koj txoj kev xav kawm thaum nug tej yam uas koj xav paub tiag tiag. Muaj kev ntseeg tias Vajtswv yuav teb koj tej lus nug thaum koj kawm Vajtswv txoj lus. Qhib koj lub siab rau txhua yam uas Nws yuav qhia koj.

Thaum cov neeg npaj kawm li no, ces lawv qhov muag ntawm sab ntsuj plig yuav pom kev thiab pob ntseg yuav hnov tej yam uas tus Tswv xav qhia lawv (saib Mathais 13:16).

Tej Lus Nug Zoo Xav Txog: Koj ua dab tsi kom npaj kawm? Koj txoj kev npaj puas hloov koj txoj kev pom, hnov, thiab kev to taub Vajtswv txoj lus? Koj yuav ua li cas kom tshoov lwm tus lub siab npaj kawm? Qhov ntawd puas hloov lawv txoj kev txais tej lus tseeb ntawm txoj moo zoo?

Los ntawm cov Vaj Lug Kub: Enos 1:1–8; Amas 16:16–17; 32:6, 27–43; 3 Nifais 17:3

tus me nyuam nyeem vaj lug kub

Cov neeg tau koob hmoov thaum lawv muaj cib fim qhia lwm tus txog tej yam uas lawv kawm.

Tus Cawm Seej tau Hais Kom Lwm Tus Qhia txog tej Yam Tseeb uas Lawv Kawm

“Kuv hais lus taj,” yog qhov uas Enauj hais thaum tus Tswv hu nws mus qhia txog txoj moo zoo. Tiam sis tus Tswv tus tub qhe yuav tsum yeej tsis tas txawj hais lus. Tiam sis, tus Tswv cog lus rau Enauj tias yog nws muaj kev ntseeg txaus kom qhib nws lub qhov ncauj, ces tej lus yuav los rau nws hais. Nws hais tias, “Kuv yuav qhia kom koj paub hais” (Mauxes 6:31–32). Enauj muab siab nrau ntseeg, thiab tus Tswv twb tau hais dhau los ntawm nws, nws tej lus muaj hwj chim heev thaum nws hais lus ua rau cov neeg tshee hnyo (saib Mauxes 6:47). Muaj tseeb tiag, nws tej lus ua rau cov av deeg daws. Cov roob cia li pawv, cov dej twb lem ntawm txoj kev uas dej ntws, thiab txhua lub teb chaws ntshai Vajtswv cov neeg, “vim Enauj txoj lus muaj hwj chim heev, thiab lub hwj chim ntawm cov lus uas Vajtswv tau muab rau nws hais muaj zog heev” (Mauxes 7:13).

Tus Tswv xav kom peb txhua tus—tsis yog Nws cov yaj saub xwb—muaj hwj chim hais Nws txoj lus. Nws xav kom peb txhua tus zoo li no, tsis hais cov neeg uas koj qhia (saib Lus Qhuab Qhia thiab Kev Khi Lus 1:20–21). Tej zaum peb tej lus yuav tsis ua rau cov roob txav mus los sis ua rau tej dej lem, tiam sis yeej yuav pab cov neeg hloov lawv lub siab. Yog vim li no peb yuav tsum cia cov neeg kawm muaj cib fim qhia lwm tus txog tej yam uas lawv kawm txog tus Cawm Seej thiab Nws txoj moo zoo. Kev ua li no yuav pab lawv ua raws li tej lus tseeb uas koj qhia lawv. Thiab kuj yuav pab lawv ua siab loj hais lus tseeb lwm lub sij hawm.

Tej Lus Nug Zoo Xav Txog: Cia li xav txog ib lub sij hawm thaum koj nrog lwm tus sib tham txog qhov tseeb ntawm txoj moo zoo? Koj tau kawm li cas los ntawm lub sij hawm ntawd? Thaum twg koj zoo siab uas lwm tus tau ua siab loj qhia txog lawv txoj kev xav thiab lawv txoj kev ntseeg? Cov neeg uas koj qhia puas yuav tau txiaj ntsim thaum lawv sib tham txog tej yam uas lawv kawm? Koj tsim tau tej cib fim twg kom pab lawv?

Los ntawm cov Vaj Lug Kub: Amas 17:2–3; Maulaunais 6:4–6; Lus Qhuab Qhia thiab Kev Khi Lus 84:85; 88:122; 100:5–8

Tus Cawm Seej tau Caw Lwm Tus Kom Ua Neej Raws Li Nws Qhia

“Cia nej lub teeb kom ci rau neeg.” “Hlub nej cov yeeb ncuab.” “Thov, ces yuav muab rau nej.” “Nej yuav tsum mus lub qhov rooj nqaim.” (Mathais 5:16, 44; 7:7, 13.) Tej lus caw uas tib neeg yeej nco ntsoov thaum tus Cawm Seej ua Nws txoj hauj lwm qhuab qhia hauv lub ntiaj teb no yog Nws hais lus thaum Nws qhia Nws cov thwj tim pem roob ze Dej Hiav Txwv Kalilais. Tus Cawm Seej lub hom phiaj yog kom hloov tib neeg lub neej, raws li Nws hais nyob hauv Nws cov lus caw kawg: “Txhua tus uas hnov kuv tej lus thiab ua raws li tej lus ntawd, tus ntawd zoo ib yam li tus uas muaj tswv yim, nws ua nws lub tsev rau saum pob zeb” (Mathais 7:24; ntxiv qhov uas ntawv qaij).

Ntuj los nag thiab cov dej nyab thiab cua nplawm txhua tus nyob hauv lawv lub neej. Kev kawm txog txoj moo zoo yeej tsis txaus yog tias cov neeg yuav tiv taus txhua txoj kev sim siab hauv lawv lub neej. Yog vim li no peb thiaj li yuav tsum tsis txhob tos kom caw cov neeg kawm xav seb lawv yuav ua li cas kom ua neej raws li tej yam uas lawv kawm. Vim peb saib lwm tus txoj kev ywj siab xaiv rau nqi, ces peb txoj kev caw lwm tus yeej yuav zoo li no: “Koj xav tias koj txais kev tshoov siab ua dab tsi?” Tej lub sij hawm peb tej lus caw yuav tsum hais meej: “Koj puas yuav xaiv tus Cawm Seej ib tug cwj pwm uas koj xav ua zoo dua?” Thaum koj muab cib fim rau lwm tus mloog, paub, thiab qhia txog tus Vaj Ntsuj Plig Dawb Huv tej kev tshoov siab, Nws yuav qhia lawv tias lawv yuav tsum ua dab tsi. Cia li pab cov neeg kawm xav txog cov koob hmoov uas lawv yuav tau thaum lawv ua raws li tej yam lawv kawm, thiab hais kom lawv nyiaj mus tom ntej thaum twg nyuaj ua li ntawd. Kev ua raws li qhov tseeb yeej yog txoj kev sai tshaj plaws kom muaj kev ntseeg, ib zaj lus tim khawv, thiab hloov siab los ntseeg ntxiv. Ib yam li tus Cawm Seej hais, kev ua neej raws li Leej Txiv cov lus qhuab qhia yog txoj kev rau peb paub tias cov lus qhua qhia ntawd muaj tseeb (saib Yauhas 7:17).

Tej Lus Nug Zoo Xav Txog: Thaum twg koj tau txais kev tshoov siab ua ib yam dab tsi vim lwm tus tau caw koj ua li ntawd? Koj lub neej tau hloov li cas vim koj ua li ntawd? Cia li nco txog tej lus caw uas cov thawj coj hauv vaj lug kub thiab lub Koom Txoos tau hais. Koj kawm dab tsi uas yuav pab koj thaum koj caw lwm tus ua tej yam? Koj yuav ua dab tsi kom nug seb lawv tau ua li cas tom qab koj caw lawv?

Los ntawm cov Vaj Lug Kub: Lukas 10:36–37; Yauhas 7:17; Yakaunpaus 1:22; Mauxiyas 4:9–10; Lus Qhuab Qhia thiab Kev Khi Lus 43:8–10; 82:10

Tej Yam uas Koj Ua Tau Kom Ua Raws Li tej Yam Koj Qhia

• Thov lwm tus npaj ua ntej ib yam dab tsi uas tus Vaj Ntsuj Plig Dawb Huv tau qhia lawv, xws li ib lub tswv yim los ntawm ib nqe vaj lug kub uas muaj nqis rau lawv.

• Cia cov neeg kawm muaj cib fim qhia ib feem ntawm koj zaj lus qhia.

• Hais kom cov neeg kawm saib vidi-aus, nyeem vaj lug kub, los sis ib zaj lus ua ntej nej sib ntsib.

• Tsis txhob ua raws li koj xav kom teb txhua lo lus nug. Hais kom lwm tus koom tes nrhiav tej lus teb.

• Ua ntej koj qhia koj lub tswv yim txog ib nqe vaj lug kub, thov kom cov neeg kawm qhia lawv tej lub tswv yim thiab.

• Thov tej lus nug uas pab cov neeg kawm xav nrhiav tej lus teb los ntawm Vajtswv txoj lus.

• Caw cov neeg nug tej lus nug txog tej yam uas lawv kawm.

• Muab sij hawm rau tag nrho cov neeg kawm kom xav txog ib lo lus nug ua ntej koj hais kom lawv teb.

• Cia li xav seb koj puas muab cov neeg kawm faib ua ob pawg, raws li tsim nyog ua li ntawd.

• Qhia meej txog tej yam uas yuav pab cov neeg kawm loj hlob tuaj.

• Hais lus caw kom tshoov cov neeg lub siab xav ua zoo dua yav tas los tiam sis tsis txhob txhawj. Rov qab xyuas thiab caw cov neeg kawm qhia txog lawv lub neej.

• Pab cov neeg kawm los ntawm cov vaj lug kub thaum koj:

  • Kos tej nqe vaj lug kub uas muaj nqis heev, yog xav ua li ntawd.

  • Thov kom txais tau kev tshwm sim thaum koj xav thiab thov Vajtswv.

  • Sau ntawv txog tej kev tshoov siab ntawm sab ntsuj plig.

  • Sau rau hauv phau ntawv txog kev kawm vaj lug kub.

  • Cuab hom phiaj kom ua raws li tej yam uas lawv kawm.