Rau cov Thawj Coj—Kev Qhia thiab Kev Txhawb Nqa cov Xib Hwb

Vim koj yog ib tug thawj coj, koj lav ris txoj kev “sib tham nrog cov xib hwb tshiab” nyob hauv koj lub koom haum thiab “pab lawv npaj ua lawv txoj kev hu” (Phau Qhia Kev Coj lub Koom Txoos, 17.3, Txoj Moo Zoo cov Ntawv). Tej kev sib ntsib no yog ib lub cib fim kom qhia cov xib hwb tshiab txog lawv txoj kev hu dawb huv thiab qhia lawv paub tias kev qhia raws li tus Cawm Seej txoj kev zoo li cas. Vim koj yog ib tug thawj coj, koj pab tau cov xib hwb tshiab npaj ua hauj lwm thaum koj ua li no:

• Qhia lawv tias koj ntseeg tus Cawm Seej yuav pab lawv ua qhov uas Nws hu kom lawv ua (saib Lus Qhuab Qhia thiab Kev Khi Lus 88:78).

• Muab cov xib hwb tshiab phau ntawv no, thiab hais kom lawv nrhiav tej yam kom ua raws li tej lub ntsiab cai no thaum lawv qhia.

• Qhia cov xib hwb tshiab tej yam twg txog koj lub koom haum uas yuav pab lawv.

• Raws li xav tau, qhia cov xib hwb tshiab lawv yuav qhia hauv chav kawm twg thiab yuav qhia zaj twg thaum xub thawj. Qhia tej yam uas lawv yuav tsum paub txog lawv chav kawm thiab cov mej zeej nyob haud.

• Piav rau cov xib hwb tshiab tias koj yuav pab lawv ua lawv txoj kev hu. Txhawb nqa lawv nyob hauv chav kawm thiab muab tej yam uas yuav pab lawv qhia yog lawv xav tau.

• Hais tias tej lub sij hawm koj xav saib cov xib hwb qhia, thiab muab tswv yim rau lawv raws li tus Ntsuj Plig qhia koj.

• Caw cov xib hwb koom cov xib hwb pawg sab laj tej kev sib ntsib txhua peb hlis.

Thaum lub sij hawm uas cov xib hwb qhia, nrog lawv sib ntsib ntxiv kom txhawb nqa lawv. Piv txwv hais tias, tej zaum koj yuav xav sib tham nrog ib tug xib hwb ua ntej los sis tom qab nws qhia kom sib tham txog tej ntsiab cai los ntawm phau Kev Qhia Raws Li tus Cawm Seej txoj Kev. Nug tus xib hwb seb nws xav tias nws ua zoo li cas thiab nug seb nws xav ua dab tsi kom qhia zoo dua. Ua siab zoo yaum nws thiab qhia nws tias koj ris nws txiaj rau nws txoj kev pab ua hauj lwm.

Koj yuav tau saib tus xib hwb ntawd qhia ua ntej kom npaj rau tej kev sib tham no. Nrhiav kev kom to taub tus xib hwb tej kev muaj zog thiab kawm txog tej yam koj ua taus kom txhawb nqa nws. Kev txhawb nqa ib tug xib hwb lub dag zog yeej tseem ceeb npaum li yus nrhiav tej yam kom pab nws ua zoo dua.