tus Cawm Seej nyob hauv roob moj sab qhua Yudais

Ib yam li tus Cawm Seej tau siv sij hawm kom npaj nws sab ntsuj plig rau Nws txoj kev txhawb pab, peb yuav tsum npaj peb tus kheej kom qhia nrog tus Ntsuj Plig.

Qhia nrog tus Ntsuj Plig

Thaum tus Cawm Seej txib Joseph Smith thiab Sidney Rigdon kom qhia Nws txoj moo zoo, Nws cog lus rau nkawd tias, “Tus Tswv yuav txib tus Vaj Ntsuj Plig Dawb Huv los ua tim khawv txog txhua tsav txhua yam uas neb hais” (Lus Qhuab Qhia thiab Kev Khi Lus 100:8; kuj saib Lus Qhuab Qhia thiab Kev Khi Lus 42:15–17; 50:17–22). Kev cog lus no yeej muaj nqis rau txhua tus uas qhia txoj moo zoo, tsis hais koj los yog. Thaum koj qhia Yexus Khetos txoj moo zoo, koj yuav muaj tus Vaj Ntsuj Plig Dawb Huv nrog nraim koj kom coj koj txoj kev thiab ua tim khawv txog qhov tseeb rau cov neeg lub siab (saib Lus Qhuab Qhia thiab Kev Khi Lus 8:2). Koj tsis nyob koj ib leeg thaum koj qhia, vim tias “tej lus uas nej hais tsis yog [koj] tej lus, tiam sis yog Vaj Ntsuj Plig tus Dawb Huv tej lus” (Malakaus 13:11).

Tus Vaj Ntsuj Plig Dawb Huv yog tus xib hwb tseeb. Tsis muaj ib tug xib hwb, txawm nws muaj txuj ci npaum li cas los, uas yuav pauv tus Vaj Ntsuj Plig Dawb Huv chaw ua tim khawv txog qhov tseeb, ua tim khawv txog Yexus Khetos, thiab hloov neeg lub siab. Tiam sis tag nrho cov xib hwb pab tau Vajtswv cov me nyuam kawm los ntawm tus Ntsuj Plig txoj kev qhia.

Qhia nrog tus Ntsuj Plig

• Npaj koj tus kheej sab ntsuj plig.

• Ua raws li tej kev tshoov siab ntawm sab ntsuj plig txog tej yam uas cov neeg kawm xav tau.

• Tsim tej cib fim kom tus Vaj Ntsuj Plig Dawb Huv yuav muaj cib fim qhia cov neeg kawm.

• Pab cov neeg kawm kom nrhiav, pom, thiab ua raws li kev tshwm sim.

• Ua tim khawv ntau, thiab caw cov neeg kawm qhia tias lawv xav li cas hauv lawv lub siab, lawv lub neej, thiab zaj lus tim khawv.

Tus Cawm Seej tau Npaj Nws tus Kheej ntawm Sab Ntsuj Plig Kom Qhia Tau

Kom npaj rau Nws txoj hauj lwm qhuab qhia, tus Cawm Seej tau siv 40 hnub nyob hauv roob moj sab qhua “mus nyob nrog Vajtswv” (Joseph Smith Kev Txhais, Mathais 4:1 [nyob hauv Mathais 4:1, lus cim b]). Tiam sis Nws twb tau npaj Nws sab ntsuj plig ntev tas los lawm. Thaum Dab Ntxwg Nyoog sim ntxias Nws, Nws txawj siv “tej lus uas cawm neeg txoj sia” uas Nws tau cia rau hauv Nws lub cim xeeb txog thaum “lub sij hawm ntawd kiag” uas Nws xav tau (Lus Qhuab Qhia thiab Kev Khi Lus 84:85). Cia li xav txog koj tej kev siv zog npaj koj tus kheej sab ntsuj plig kom koj qhia tau. Koj kawm dab tsi los ntawm Mathais 4:1–11 txog qhov uas koj yuav coj raws li tus Cawm Seej tus yam ntxwv kom npaj koj sab ntsuj plig?

Tus Ntsuj Plig yog tug xib hwb tiag tiag thiab tus uas ua rau neeg hloov siab los ntseeg. Xwv kom muaj hwj chim qhia txoj moo zoo los tsis yog koj yuav tsum npaj ib zaj lus ua ntej tiam sis koj kuj yuav tsum npaj koj sab ntsuj plig ua ntej koj pib qhia. Yog koj npaj koj sab ntsuj plig lawm, koj yuav txawj hnov thiab ua raws li tus Ntsuj Plig coj thaum koj qhia. Txoj kev caw tus Vaj Ntsuj Plig Dawb Huv thaum koj qhia yog kev caw Nws los rau hauv koj lub neej. Yuav tsum siv zog coj raws li tus Cawm Seej tus yam ntxwv thiab ua raws li Nws txoj moo zoo kawg koj siab koj ntsws. Thiab vim tsis muaj leej twg uas ua zoo tag nrho, ces peb kuj yuav tsum hloov siab lees txim txhua hnub.

Tej Lus Nug Zoo Xav Txog: Yuav tsum ua dab tsi kom npaj koj sab ntsuj plig ua ntej koj qhia? Koj txais kev tshoov siab twg kom npaj koj sab ntsuj plig zoo dua yav tas los? Koj xav tias kev npaj koj sab ntsuj plig yuav hloov koj txoj kev qhia li cas?

Los ntawm cov Vaj Lug Kub: Exalas 7:10; Lukas 6:12; Amas 17:2–3, 9; Lus Qhuab Qhia thiab Kev Khi Lus 11:21; 42:13–14

Tus Cawm Seej Yeej Npaj Siab Pab Thaum Lwm Tus Xav Tau tej Yam

Yailus, tus thawj coj hauv lub tsev sab laj, tau txhos caus ntua ntawm Yexus ko taw, thov Yexus pab nws tus ntxhais uas twb yuav tuag. Yexus thiab Nws cov thwj tim tab tom taug kev mus thaum neeg coob nrog Yexus mus sib nphoo ntxuas rau Yailus lub tsev es Yexus nres kiag. “Leej twg kov kuv?” Nws nug. Yeej zoo li ib lo lus nug txawv heev—vim muaj neeg coob, ces ntshe txhua tus kov Nws lawm? Tiam sis tus Cawm Seej paub tias nyob hauv neeg coob, muaj ib tug neeg uas xav tau kev pab thiab muaj kev ntseeg kom Nws kho tau lawv zoo. Tseem yuav muaj sij hawm mus xyuas Yailus tus ntxhais. Tiam sis ua ntej ntawd, Nws hais rau tus poj niam uas tau kov Nws lub tw tsho hais tias, “Me ntxhais, koj tus mob zoo lawm, twb yog vim koj ntseeg. Koj cia li mus kaj siab lug” (saib Lukas 8:41–48).

Vim koj yog ib tug xib hwb, tej lub sij hawm koj yuav maj nrawm xav qhia ib yam uas koj tau npaj qhia lawm. Txawm yog qhov ntawd tseem ceeb heev los, ua tib zoo kom tsis txhob puam chawj ib qho xwm txheej ntawm ib tug uas koj qhia. Nrog rau tus Ntsuj Plig tej lus qhia uas koj nrhiav thaum kojnpaj qhia, thov kom tus Ntsuj Plig coj koj kev thaum koj tab tom qhia thiab. Ua tib zoo paub txog cov neeg kawm tej kev xav tau, tej lus nug, thiab tej yam lav nyiam. Tus Vaj Ntsuj Plig Dawb Huv yuav pab koj paub tias ib tug neeg puas lees yuav los sis to taub ib yam uas koj tau qhia lawm. Tej zaum Nws yuav tshoov koj lub siab kom hloov tej yam uas koj tau npaj lawm. Piv txwv hais tias, tej zaum koj yuav txais kev tshoov siab kom siv sij hawm ntxiv qhia txog ib lub ntsiab cai los sis tsis txhob sib tham txog tej yam kom muaj sij hawm kawm txog ib yam uas tseem ceeb rau cov neeg kawm tam sim no.

Tej Lus Nug Zoo Xav Txog: Thaum twg koj tau xav tias ib tug niam tsev txiv tsev los sis lwm tus xib hwb tau paub tias koj xav tau dab tsi? Cov uas koj qhia puas paub tias koj saib lawv txoj kev kawm tseem ceeb dua koj txoj kev qhia kom tiav? Koj yuav ua li cas kom qhia tias koj xav paub tiag tiag?

Los ntawm cov Vaj Lug Kub: 1 Petus 3:15; Amas 32:1–9; 40:1; 41:1; 42:1

Tus Cawm Seej tau Muab Cib Fim rau cov Neeg Kom tus Vaj Ntsuj Plig Dawb Huv Qhia Lawv

Yeej nyuaj rau neeg nyob hauv Yexus lub caij nyoog paub tias Nws yog leej twg tiag, tiam sis neeg coob xav ntau yam. Nws cov thwj tim hais tias, “Muaj qee leej hais tias koj yog Yauhas tus uas muab neeg ua kev cai raus dej, muaj qee leej hais tias koj yog Eliyas thiab muaj qee leej hais tias, koj yog ib tug uas cev Vajtswv lus.” Ces Yexus tau nug ib yam uas caw Nws cov thwj tim txhob xav txog lwm tus tej kev xav thiab saib hauv lawv tus kheej lub siab hais tias: “Nej ho hais tias kuv yog leej twg?” Nws tsis xav kom “neeg qhia” rau lawv tiam sis Nws xav kom “kuv Txiv tus uas nyob saum ntuj ceeb tsheej qhia rau” lawv. Yog los ntawm kev ua tim khawv li no—tej kev tshwm sim los ntawm tus Vaj Ntsuj Plig Dawb Huv—Petus thiaj li muaj tshaj tawm hais tias, “Koj yog tus Mexiyas uas yog Vajtswv tus uas muaj sia nyob tus Tub” (saib Mathais 16:13–17).

Xwv kom nyob tau hauv hnub nyoog kawg no, cov neeg uas koj qhia yuav tsum txais tau tus Ntsuj Plig tej lus tim khawv txog qhov tseeb. Koj pub tsis tau qhov no rau lawv, tiam sis koj yuav tsum caw, txhawb nqa, yaum, thiab qhia lawv kom nrhiav qhov no. Los ntawm koj tej lus thiab tej yam koj ua, koj qhia tau meej hais tias tus Vaj Ntsuj Plig Dawb Huv tseem ceeb npaum li cas rau kev kawm txoj moo zoo. Piv txwv hais tias, cia li xav txog qhov chaw kawm vaj lug kub uas koj tsim thiab txhawb nqa. Ib yam me me npaum li kev kho tej lub rooj zaum hauv chav kawm los sis koj txoj kev sib txuas lus nrog cov neeg kawm yeej npaj lawv lub siab rau tej yam uas lawv yuav kawm. Koj kuj caw tau cov neeg kom npaj lawv sab ntsuj plig kawm, ib yam li koj npaj koj sab ntsuj plig qhia lawv. Hais kom lawv lav ris lawv txoj kev xav hauv lawv lub siab. Thiab tsim nyog koj muab cib fim rau lawv hnov tus Ntsuj Plig ua tim khawv txog Yexus Khetos thiab Nws txoj moo zoo. Txoj kev ua tim khawv no yuav los ua ib “lub pob zeb” rau lawv, “thiab kev tuag los yuav kov tsis yeej [lawv]” (Mathais 16:18).

Tej Lus Nug Zoo Xav Txog: Koj tau pom dab tsi uas txhawb nqa kev kawm ntawm sab ntsuj plig thaum npaj ib qhov chaw rau kev kawm txoj moo zoo? Muaj dab tsi uas cuam tshuam? Muaj dab tsi uas pab cov neeg uas koj qhia kom kawm los ntawm tus Ntsuj Plig? Cia li xav txog qhov chaw uas koj nyob qhia ntau tshaj. Koj xav li cas thaum koj nyob ntawd? Koj yuav ua li cas kom caw tus Ntsuj Plig los nyob ntawd?

Los ntawm cov Vaj Lug Kub: Lukas 24:31–32; Yauhas 14:26; 16:13–15; Maulaunais 10:4–5; Lus Qhuab Qhia thiab Kev Khi Lus 42:16–17; 50:13–24

ob tub txib qhia ib tsev neeg

Thaum peb qhia, peb caw tau cov neeg kawm kom lawv nrhiav tus Ntsuj Plig txoj kev ua tim khawv txog qhov tseeb.

Tus Cawm Seej tau Pab Lwm Tus Kom Nrhiav, Pom, thiab Ua Raws Li Kev Tshwm Sim

Tus Tswv xav nrog peb sib txuas lus—thiab Nws xav kom peb paub tias Nws hais lus rau peb. Nyob rau xyoo 1829, ib tug xib hwb uas muaj 22 xyoos Oliver Cowdery tau kawm txog cov lus qhuab qhia uas hais tias txhua tus txais tau kev tshwm sim. Tiam sis nws muaj tej lus nug ib yam li peb feem coob nug hais tias: “Tus Tswv puas hais lus rau kuv tiag? Thiab kuv yuav ua li cas kom paub Nws hais dab tsi?” Xwv kom teb tej lus nug no, Yexus Khetos tau caw Oliver xav txog ib lub sij hawm thaum nws nrhiav tej yam ntawm sab ntsuj plig. “Kuv tsis tau hais lus ua rau koj lub siab kaj los?” Nws tau thov (saib Lus Qhuab Qhia thiab Kev Khi Lus 6:21–24). Tom qab ntawd, Nws tau qhia Oliver txog lwm txoj kev uas tus Ntsuj Plig yuav siv kom hais lus rau nws (saib Lus Qhuab Qhia thiab Kev Khi Lus 8:2–3; 9:7–9; kuj saib Lus Qhuab Qhia thiab Kev Khi Lus 11:12–14).

Vim peb nyob hauv ib lub ntiaj teb uas tsis quav ntsej txog tej yam ntawm sab ntsuj plig, peb txhua tus xav tau kev pab paub txog tus Ntsuj Plig lub suab. Tej zaum peb tau hnov tus Ntsuj Plig tiam sis peb tsis paub. Thiab peb txhua tus yuav tsum kawm ntxiv txog kev nrhiav tus Ntsuj Plig, paub txog Nws lub hwj huam, thiab ua raws li tej kev tshoov siab uas Nws foom pub rau peb. Thaum koj qhia, cia li pab cov neeg kawm kom nrhiav tej kev uas tus Ntsuj Plig siv kom qhia lawv—thiab Nws tau ua li cas kom qhia lawv. Ib lub txiaj ntsim zoo tshaj plaws uas koj txais tau thaum koj yog ib tug xib hwb yog kev qhia kom cov neeg vam meej thaum lawv kawm txais kev tshwm sim hauv lawv lub neej.

Tej Lus Nug Zoo Xav Txog: Vim li cas yuav tsum kawm kom txais tau kev tshwm sim? Puas muaj leej twg uas tau pab koj to taub yuav ua li cas kom nrhiav thiab nkag siab txog kev tshwm sim? Koj yuav ua li cas kom pab cov neeg uas koj qhia kom nrhiav, paub, thiab ua raws li tej kev tshwm sim los ntawm tus Vaj Ntsuj Plig Dawb Huv?

Los ntawm cov Vaj Lug Kub: Kalatias 5:22–23; Amas 5:45–47; Lus Qhuab Qhia thiab Kev Khi Lus 42:61; 121:33; Joseph Smith—Keeb Kwm 1:8–20

Tus Cawm Seej tau Ua Tim Khawv rau cov uas Nws Qhia

Ib lub sij hawm tseem ceeb thaum Yexus qhia thiab txhawb pab lwm tus, Yexus xav nplij Nws tus phooj ywg, Mathas, lub siab, vim Mathas tus nus tau xiam tas lawm. Nws tau hais lus tim khawv txog ib yam tseeb nyob mus ib txhis li: “Koj tus nus yuav sawv rov qab los” (Yauhas 11:23). Nws txoj kev hais lus tim khawv no tau tshoov Mathas lub siab kom Mathas hais lus tim khawv thiab: “Kuv paub hais tias thaum txog hnub kawg nws yeej yuav sawv rov qab los tiag” (Yauhas 11:24). Cia li saib muaj tus txheej txheem no nyob hauv Yauhas 11:25–27. Muaj dab tsi uas tshoov koj lub siab txog tus Cawm Seej tus yam ntxwv? Vim li cas kev hais lus tim khawv txog txoj moo zoo yog ib feem tseem ceeb ntawm kev qhia vaj lug kub?

Koj zaj lus tim khawv yuav muaj hwj huam ntau pab cov neeg uas koj qhia. Koj tsis tau hais lus ntev los sis hais paj lug. Thiab koj tsis tas pib hais li no tias, “Kuv xav hais lus tim khawv.” Cia li qhia txog tej yam uas koj paub lawm los ntawm tus Vaj Ntsuj Plig Dawb Huv lub hwj chim. Ib zaj lus tim khawv txog qhov tseeb yeej muaj hwj chim ntau tshaj thaum koj hais ncaj qha thiab hais los ntawm koj lub siab. Cia li ua tim khawv txog tus Cawm Seej, Nws txoj moo zoo, thiab Nws lub hwj chim nyob hauv koj lub neej, thiab txhawb nqa cov uas koj qhia kom ua ib yam li ntawd. Thiab nco ntsoov tias tej lub sij hawm zaj lus tim khawv uas muaj hwj chim loj tshaj plaws tsis yog los ntawm tus xib hwb tiam sis yog los ntawm ib tug neeg uas kawm thiab.

Tej Lus Nug Zoo Xav Txog: Nrhiav tej zaj hauv cov vaj lug kub uas qhia txog lub hwj huam ntawm ib tug uas hais lus tim khawv. Koj kawm dab tsi los ntawm tej zaj no? Puas tau muaj ib lub sij hawm thaum koj tau koob hmoov thaum ib tug hais lus tim khawv? Qhov uas koj hais lus tim khawv puas tau pab cov uas koj qhia? Puas tau pab koj?

Los ntawm cov Vaj Lug Kub: Tes Hauj Lwm 2:32–38; Mauxiyas 5:1–3; Amas 5:45–48; 18:24–42; 22:12–18; Lus Qhuab Qhia thiab Kev Khi Lus 46:13–14; 62:3

Tej Yam uas Koj Ua Tau Kom Ua Raws Li tej Yam Koj Qhia

• Nug cov neeg kawm kom qhia tias tus Vaj Ntsuj Plig Dawb Huv qhia dab tsi rau lawv thaum lawv kawm Vajtswv txoj lus.

• Npaj ua ntej kom txais tau tej kev tshoov siab ntawm sab ntsuj plig thaum koj qhia.

• Sau ntawv txog tej kev tshoov siab uas los rau koj thaum koj npaj qhia.

• Muab cib fim rau cov neeg uas koj qhia kom nyob twj ywm xav txog tej yam uas tus Ntsuj Plig qhia lawv.

• Siv cov nkauj dawb ceev thiab cov duab kom caw tus Ntsuj Plig lub hwj huam los.

• Cia li mloog tej kev tshoov siab thaum koj npaj thiab qhia, thiab qhib koj lub siab kom hloov tej yam uas tau npaj lawm.

• Muab cib fim rau tag nrho cov neeg kom ua tim khawv txog tej yam uas lawv kawm.

• Pab lwm tus paub thaum tus Ntsuj Plig nyob.

• Cia li ua raws li qhov tseeb uas koj qhia koj thiaj li yuav ua tim khawv txog lawv.

• Ua raws li tej kev tshoov siab kom qhia thaum tsis tau npaj ua ntej.