Yexus Khetos nrog tus poj niam tham nyob ntawm lub qhov dej

Thaum tus Cawm Seej yog peb tus yam ntxwv, kev hlub yog qhov uas ua rau peb mob siab qhia.

Hlub cov uas Koj Qhia

Txhua yam tus Cawm Seej ua thaum Nws ua hauj lwm qhuab qhia hauv lub ntiaj teb no yog vim Nws hlub peb. Thaum peb siv zog coj raws li Yexus Khetos tiag tiag, peb yuav muaj txoj kev hlub no puv peb lub siab (saib Yauhas 13:34–35; Maulaunais 7:47–48; 8:26). Thaum tus Cawm Seej txoj kev hlub nyob hauv peb lub siab, peb thiaj li nrhiav kev pab lwm tus kawm txog Khetos thiab los cuag Nws. Kev hlub yog qhov uas ua rau peb mob siab qhia.

Kom Hlub cov uas Koj Qhia

• Pom cov neeg kawm zoo li Vajtswv pom lawv.

• Nrhiav kev kom paub lawv—to taub lawv tej xwm txheej, tej kev xav tau, thiab lawv tej kev muaj zog.

• Hais lawv lub npe thaum koj thov Vajtswv foom koob hmoov rau lawv.

• Tsim muaj ib qho chaw nyab xeeb kom ib leeg saib ib leeg rau nqi thiab paub tias tej yam lawv ua muaj nqis.

• Nrhiav tej kev tsim nyog kom qhia tias koj hlub lawv.

Tus Cawm Seej Pom tias Txhua Tus uas Nws Qhia Muaj Peev Xwm Hloov Los Ua Zoo Li Vajtswv

Neeg coob nyob hauv Yelikaus xav tias lawv paub txhua yam txog Xakhais lawm. Nws yog ib tug neeg sau se—tus thawj sau se—thiab nws nplua nuj heev. Lawv xav tias nyaj nws yog ib tug uas dag thiab lwj siab. Tiam sis Yexus paub Xakhais lub siab thiab Nws pom tias Xakhais yog “Anplaham tus tub zoo” (saib Lukas 19:1–10). Tus Cawm Seej tsis tau saib lwm tus neeg sab nraud xwb tiam sis Nws saib lawv yog neeg zoo li cas tiag tiag—thiab lawv muaj peev xwm hloov los ua neeg zoo li cas. Nws saib cov neeg nuv ntse xws li Ximoos, Adales, Yakaunpaus, thiab Yauhas, yog cov thawj coj ntawm lub Koom Txoos thaum yav tom ntej. Nws pom tias tus uas tsim txom cov ntseeg, Xaulus, yog ib tug uas Nws “xaiv los ua [Nws] tej hauj lwm,” ib tug uas yuav qhia Nws txoj moo zoo rau cov vaj ntxwv thiab cov thawj coj teb chaws (saib Tes Hauj Lwm 9:10–15). Thiab tus Cawm Seej yeej saib koj thiab txhua tus uas koj qhia hais tias nej yog Vajtswv cov tub los sis cov ntxhais uas muaj peev xwm kav mus ib txhis.

Los ntawm cov neeg uas koj qhia, tej zaum yuav muaj neeg uas koj xav tias rau siab ntseeg thiab hloov siab los ntseeg thiab lwm tus uas zoo li tsis tshua xav kawm los sis lawv ntxeev siab. Ceev faj kom tsis txhob xav raws li koj pom xwb. Tus Vaj Ntsuj Plig Dawb Huv yuav pab koj saib txhua tus neeg ib yam li tus Cawm Seej saib lawv—thiab pab koj pib hlub lawv ib yam li Nws hlub.

Tej Lus Nug Zoo Xav Txog: Cia li xav txog txhua tus neeg uas koj qhia, thiab xav txog qhov uas Leej Txiv Saum Ntuj Ceeb Tsheej thiab Yexus xav li cas txog lawv txhua tus. Nkawd saib dab tsi ntawm nws? Tej kev xav no yuav hloov koj txoj kev qhia tus neeg ntawd?

Los ntawm cov Vaj Lug Kub: 1 Xamuyees 16:7; Phau Ntawv Nkauj 8:4–5; Loos 8:16–17; Lus Qhuab Qhia thiab Kev Khi Lus 18:10–14

Tus Cawm Seej Paub Peb thiab To Taub Peb tej Xwm Txheej, tej Kev Xav Tau, thiab tej lub Dag Zog

Tus poj niam Xamalis tsis tau tuaj txog lub qhov dej kom mloog ib zaj lus txog txoj moo zoo. Nws tuaj kom tau dej haus. Tiam sis tus Cawm Seej pom tias nws txoj kev nqhis dej tsis yog ntawm sab cev nqaij daim tawv xwb. Tus Cawm Seej paub tias yav tas los tus poj niam muaj teeb meem thaum yav tas los thiab tej kev txheeb ze uas tsis khov. Yog li ntawd Yexus siv qhov uas tus poj niam xav tau ntawm sab cev nqaij daim tawv uas nws xav txog—cov dej uas txhawb nqa txoj sia—thiab muab txuas rau nws txoj kev xav tau “cov dej uas cawm txoj sia” thiab “txoj sia mus ib txhis.” Thaum nkawd sib tham tas lawm, tus poj niam paub tias Yexus yog tus Khetos, vim Yexus paub nws zoo npaum li no. Tus poj niam hais tias, “Nws qhia txhua yam uas kuv tau ua tas lawm huv tib si rau kuv mloog. Nws puas yog tus Mexiyas?” (saib Yauhas 4:6–29).

Kev ua ib tug xib hwb zoo li Yexus Khetos yog kev los paub cov neeg uas koj qhia thiab kev siv zog kom to taub muaj dab tsi nyob hauv lawv lub siab. Koj yuav xav paub txog lawv lub neej thiab muab siab npuab lawv. Koj yuav nrhiav kev kom to taub lawv caj ceg, tej txuj ci, tej yam lawv nyiam, thiab tej kev xav tau. Koj yuav nrhiav txoj kev uas lawv kawm zoo tshaj. Koj yuav nug tej lus nug, mloog zoo, thiab saib ntsoov. Qhov tseem ceeb, koj yuav thov Vajtswv kom to taub raws li tus Ntsuj Plig tib leeg qhia xwb. Koj yim paub ib tug neeg zoo, koj yim txawj pab nws nrhiav lub ntsiab thiab lub hwj chim ntawm Yexus Khetos txoj moo zoo. Thaum koj to taub ib tug neeg nqhis dab tsi, tus Ntsuj Plig yuav qhia koj kom paub muab tus Cawm Seej cov dej uas cawm txoj sia rau nws haus.

Tej Lus Nug Zoo Xav Txog:Koj paub dab tsi lawm txog cov neeg uas koj qhia? Lawv xav tias yam twg tseem ceeb heev? Lawv tej kev muaj zog yog dab tsi? Nyuaj rau lawv ua dab tsi? Koj yuav ua li cas kom to taub lawv zoo dua?

Los ntawm cov Vaj Lug Kub: Phau Ntawv Nkauj 139:1–5; Mathais 6:25–32; Malakaus 10:17–21; Yauhas 10:14; 3 Nifais 17:1–9

Tus Cawm Seej Thov Vajtswv Pab cov uas Nws Qhia

Xav seb Ximoos Petus tau xav li cas thaum nws hnov tus Cawm Seej hais rau nws tias, “Ximoos, Ximoos! Koj mloog kuv hais! Vajtswv twb cia Dab Ntxwg Nyoog los sim nej txhua tus siab lawm, … kuv twb thov Vajtswv pab koj lawm, kom koj muab siab rau ntseeg” (Lukas 22:31–32). Koj yuav xav li cas yog tias koj paub Yexus Khetos tau thov Leej Txiv pab koj? Cov neeg hauv Amelikas puag thaum ub tau muaj ib yam xwm txheej zoo li no, thiab lawv tau piav txog qhov no li no hais tias: “Twb tsis muaj leej twg to taub txog txoj kev xyiv fab uas muaj puv npo rau peb tus ntsuj plig nyob rau lub sij hawm uas peb tau hnov nws thov Leej Txiv rau peb” (3 Nifais 17:17).

Tej zaum koj kuj yuav xav txog qhov uas koj lub siab hloov li cas thaum koj thov Vajtswv pab lwm tus—tsis tu tsis tseg, thaum koj hais lawv lub npe. Koj tej kev thov Vajtswv puas hloov koj txoj kev xav txog tus neeg ntawd? Puas hloov tej yam koj ua? Peb Leej Txiv Saum Ntuj Ceeb Tsheej yeej hnov thiab teb cov xib hwb uas thov tiag tiag thaum lawv xav pab ib neeg kawm. Thiab muaj ntau zaus, ib txoj kev uas Nws siv kom teb neeg tej lus thov yog kom tshoov tus xib hwb lub siab kom hais ib yam dab tsi uas yuav pab tus neeg ntawd paub txog Nws txoj kev hlub.

Tej Lus Nug Zoo Xav Txog: Thaum koj xav txog cov neeg uas koj qhia, puas muaj leej twg uas koj xav tias yuav tsum ua tib zoo thov Vajtswv kom pab tus ntawd? Koj txais kev tshoov siab twg kom thov Vajtswv muab kev pab li cas rau tus ntawd? Yuav tau cov koob hmoov twg thaum koj caw cov neeg kawm kom ib leeg thov Vajtswv pab ib leeg?

Los ntawm cov Vaj Lug Kub: Yauhas 17; Amas 31:24–36; 3 Nifais 18:15–24; 19:19–23, 27–34

Tus Cawm Seej Ua Kom Txhua Tus Paub tias Nws Saib Taus Lawv thiab Lawv Muaj Nqi

Cov thawj coj kev teev ntuj hauv Yexus lub caij nyoog ntseeg tias yuav tsum tsis txhob koom nrog cov neeg uas ua txhaum. Yog vim li no, thaum twg cov thawj coj no pom Yexus nrog cov neeg txhaum sib tham, lawv xav tsis thoob. Ua cas ib tug uas koom nrog cov neeg zoo li no yuav ua ib tug xib hwb zoo?

Tiam sis, Yexus yeej muaj ib txoj kev uas tsis zoo li lawv xav. Nws xav kho cov neeg uas mob ntawm sab ntsuj plig (saib Malakaus 2:15–17; Lukas 4:17–18). Nws yeej ncav tes pab cov uas tsis zoo li lwm tus los sis cov uas raug xwm txheej dhau los, thiab Nws nrog cov neeg txhaum sib tham ua ke. Nws tau qhuas ib tug tub rog Loos txoj kev ntseeg (saib Mathais 8:5–13). Nws tau hu ib tug neeg sau se uas txhua tus tsis ntseeg kom los ua Nws ib tug thwj tim (saib Malakaus 2:14). Thaum ib tug poj niam raug luag liam tias nws deev luag txiv, Nws ua rau tus poj niam kaj siab thiab txhawb nqa nws kom hloov siab lees txim thiab ua neej zoo dua (saib Yauhas 8:1–11).

Tiam sis tej uas Yexus ua tsis tas li ntawd xwb. Nws tau hais kom cov neeg uas coj raws li Nws kom txais thiab hlub lwm tus ib yam li Nws. Nws cov Thwj Tim tau xav txog Nws tus yam ntxwv thaum txog lub sij hawm lawv yuav tshaj tawm Nws txoj moo zoo mus rau txhua tus neeg. Petus tej lus qhia peb li no tias: “Kuv paub tseeb hais tias Vajtswv tsis xaiv leej twg ntsej muag” (Tes Hauj Lwm 10:34).

Nyaj yuav luag txhua tus neeg uas koj qhia muaj teeb meem uas ua rau lawv xav tias tsis muaj neeg saib lawv rau nqi. Los ntawm koj txoj kev hlub thiab txoj kev saib taus lawv, koj yuav qhia lawv tias muaj neeg xav tau lawv. Koj yuav ncav tes pab cov neeg uas tsis tuaj, cov neeg uas nyuaj siab, los sis cov uas ua rau koj xav tias lawv tsis xav kawm, thiab ua siab ntev yog tias lawv maj mam kawm xwb. Koj pab tau txhua tus kom lawv muaj kev cia siab thiab txaus siab hais txog lawv tej kev txhawj xeeb nrog cov ntseeg. Thiab tsis tas li ntawd xwb. Koj yuav tshoov tag nrho cov neeg kawm lub siab kom pab koj tsim ib qho chaw rau nej kawm cov lus qhuab qhia raws li kev saib taus lwm tus, kev koom siab koom ntsws, thiab kev hlub.

Tej Lus Nug Zoo Xav Txog: Yuav ua dab tsi kom pab ib tug neeg paub tias koj saib nws rau nqi? Yuav ua dab tsi kom tshoov ib tug neeg lub siab thiaj li saib lwm tus rau nqi? Thaum koj thov Vajtswv xav txog cov neeg uas koj qhia, koj txais tej kev tshoov siab twg kom lawv txhua tus yuav paub tias muaj neeg zoo siab tos txais lawv?

Los ntawm cov Vaj Lug Kub: Yauhas 4; 2 Nifais 26:27–28, 33; Amas 1:26; 3 Nifais 18:22–25

leej txiv qhia cov me nyuam

Cov xib hwb pab tau cov uas lawv qhia kom paub tias muaj neeg hlub lawv.

Tus Cawm Seej Hais rau cov uas Nws Qhia Hais tias Nws Hlub Lawv

Thaum Yexus qhia thiab txhawb pab cov Neeg Nifais kom tas, Nws pom tias twb txog lub sij hawm rau Nws rov qab mus. Muaj lwm tus neeg uas Nws yuav tsum mus xyuas. Nws hais tias, “Nej cia li mus rau tom nej lub vaj lub tsev, thiab … npaj nej lub siab rau tag kis.” Tiam sis cov neeg nyob twj ywm “los kua muag, thiab ntsia ntsoov nws zoo li lawv xav thov kom nws nrog lawv nyob ib nyuag ntev me ntsis.” Vim Nws paub lawv xav tau dab tsi thiab Nws “lub siab muaj kev khuv leej puv npo,” Yexus twb nyob ib nyuag ntev me ntsis (3 Nifais 17:3, 5–6). Nws tau foom koob hmoov rau lawv cov neeg mob thiab cov neeg txom nyem. Nws txhob caug thov Vajtswv nrog lawv. Nws los kua muag nrog lawv, thiab Nws koom nrog lawv zoo siab.

Xav seb koj puas thov Vajtswv thaum koj kawm txog tus Cawm Seej tej lus qhia thiab tej yam Nws ua nyob hauv 3 Nifais 17. Xav txog tej yam twg Nws tau ua kom cov uas Nws qhia paub tias Nws hlub lawv. Nrhiav lwm yam uas qhia tias Nws hlub lawv nyob hauv cov vaj lug kub. Ces cia li xav txog cov neeg uas koj qhia. Koj yuav ua li cas kom qhia lawv tias koj hlub lawv? Cia tus Ntsuj Plig coj koj kev. Yog tias nyuaj rau koj qhia tias koj hlub cov neeg uas koj qhia, cia li pib ua tim khawv txog Vajtswv txoj kev hlub. Ces “thov Leej Txiv kawg siab kawg ntsws, xwv kom [koj] yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag” (Maulaunais 7:48). Thiab nco ntsoov tias koj txoj kev txhawj txog kev qhia ib zaj lus yeej yuav tsum tsis txhob cuam tshuam koj kom koj tsis txhob qhia tias koj hlub lawv los ntawm tej yam koj hais thiab ua. Qhov uas koj ua li cas rau neeg yeej tseem ceeb npaum li tej yam uas koj qhia lawv.

Tej Lus Nug Zoo Xav Txog: Tus Cawm Seej tau pab koj li cas kom paub tias Nws hlub koj? Koj niam koj txiv los sis lwm tus xib hwb puas tau pab koj paub tias Nws hlub koj? Cov neeg uas koj qhia puas paub tias koj hlub lawv? Lawv puas paub tias tus Cawm Seej hlub lawv?

Los ntawm cov Vaj Lug Kub: Malakaus 6:31–42; Yauhas 13:3–16, 34–35; 15:12–13; 1 Kauleethaus 13:1–7; 1 Yauhas 4:7–11

Tej Yam uas Koj Ua Tau Kom Ua Raws Li tej Yam Koj Qhia

• Yog koj qhia ib chav kawm, cia li kawm tej npe ntawm cov neeg kawm thiab hais lawv lub npe thaum koj qhia.

• Hais ua tsaug thaum cov neeg kawm hais lus.

• Sib tham nrog cov neeg kawm ua ntej thiab tom qab koj qhia.

• Pab cov neeg kawm kom lawv ib leeg hlub thiab saib ib leeg rau nqi.

• Mloog zoo zoo—thaum koj qhia thiab lwm lub sij hawm.

• Ua tej yam kom pab cov neeg uas koj qhia.

• Cia li txaus siab hloov tej yam koj tau npaj qhia kom siv sij hawm ua raws li tej lub ntsiab cai uas muaj nqis rau cov neeg uas koj qhia.