“Pab cov Neeg Kawm Kom Lawv Los Cuag Yexus Khetos,” Kev Qhia Raws Li tus Cawm Seej txoj Kev: Rau Tag Nrho cov uas Qhia hauv Tsev thiab hauv lub Koom Txoos (2022)
“Pab cov Neeg Kawm Kom Lawv Los Cuag Yexus Khetos,” Kev Qhia Raws Li tus Cawm Seej txoj Kev
Peb yog cov neeg uas qhia txog Yexus Khetos txoj moo zoo, peb thiaj li pab lwm tus to taub thiab cia siab rau Nws tej lus qhia, lub hwj chim, thiab txoj kev hlub.
Pab cov Neeg Kawm Kom Lawv Los Cuag Yexus Khetos
Tsis muaj ib yam dab tsi uas koj ua tau kom foom koob hmoov rau cov neeg uas koj qhia ntau tshaj qhov uas koj pab lawv paub Leej Txiv Saum Ntuj Ceeb Tsheej thiab Yexus Khetos thiab hnov Nkawd txoj kev hlub (saib Yauhas 17:3). Cia li xav txog tej yam uas tau pab koj los paub thiab hlub Leej Txiv Saum Ntuj Ceeb Tsheej thiab Yexus Khetos. Koj tau ua dab tsi koj kawm txog Nkawd tej cwj pwm, lub hwj chim, thiab txoj kev hlub? Ua li cas koj txoj kev hlub Leej Txiv Saum Ntuj Ceeb Tsheej thiab Yexus Khetos ua rau koj muaj kev xyiv fab? Ces xav txog qhov uas Nkawd txoj kev hlub thiab lub hwj chim yuav ua li cas kom pab txhua tus neeg uas koj qhia. (Saib Amas 26:16; Mauxes 5:11.)
Peb lub hom phiaj loj tshaj plaws hauv lub neej no yog kom hloov los ua neeg zoo li peb Leej Txiv Saum Ntuj Ceeb Tsheej thiab rov qab mus cuag Nws. Peb yuav ua raws li lub hom phiaj ntawd thaum peb los cuag Yexus Khetos (saib Yauhas 14:6). Yog li ntawd, ib yam li tus yaj saub Nifais qhia, “peb hais txog Khetos, peb xyiv fab rau Khetos” (2 Nifais 25:26).
Vajtswv txhua tus me nyuam xav tau txoj kev kaj thiab qhov tseeb uas los ntawm tus Cawm Seej thiab muaj peev xwm xaiv thiab ua raws li Nws. Qhov uas yus yog ib tug uas qhia txog Yexus Khetos txoj moo zoo txhais hais tias yus pab lwm tus to taub thiab cia siab rau Nws tej lus qhia, lub hwj chim txhiv dim, thiab txoj kev hlub uas zoo tag nrho. Cia li xav seb tej lub tswv yim nram qab no yuav pab koj tshoov lwm tus lub siab kom paub Yexus Khetos zoo ntxiv thiab coj raws li Nws.
Pab cov Neeg Kawm Kom Paub txog tus Tswv txoj Kev Hlub, lub Hwj Chim, thiab lub Siab Hlub Nyob hauv Lawv lub Neej
Yeej zoo thaum peb paub txog tus Cawm Seej txoj kev hlub, lub hwj chim, thiab txoj kev hlub tshua, tiam sis peb kuj yuav tsum muaj tej ntawd hauv peb lub neej. Qhov uas peb pom tias Nws tau pab thiab kho cov neeg nyob hauv cov vaj lug kub yeej pab peb ntseeg Nws ntxiv hais tias Nws muaj hwj chim foom koob hmoov rau peb thiab kho peb zoo. Piv txwv hais tias, qhov uas peb kawm txog tej yam uas Daniyees raug yeej tsis txaus yog tias peb tsis tso siab rau tus Tswv thaum twg peb raug teeb meem uas phem npaum li ib lub qhov tsov ntxhuav.
Thaum koj pab cov neeg paub txog tus Tswv “txoj kev hlub tshua” (1 Nifais 1:20), nyob hauv cov vaj lug kub thiab hauv lawv lub neej, ces lawv yuav paub tias tus Tswv nrog nraim lawv nyob thiab yuav hlub lawv (saib Lus Qhuab Qhia thiab Kev Khi Lus 68:6). Lawv yuav paub tias tus Tswv hlub lawv tiag tiag tsis hais lawv xav tau dab tsi thiab raug xwm txheej twg los yog.
Cov xib hwb pab tau cov neeg uas lawv qhia kom paub txog tus Cawm Seej txoj kev hlub, lub hwj chim, thiab txoj kev hlub tshua.
Peb cov Neeg Kawm Kom Sib Raug Zoo nrog Leej Txiv Saum Ntuj Ceeb Tsheej thiab Yexus Khetos
Lub hom phiaj ntawm kev qhia thiab kev kawm txog Yexus Khetos yog kom pab txhua tus neeg los nyob ze Nws thiab nyob ze peb Leej Txiv Saum Ntuj Ceeb Tsheej. Pab cov neeg uas koj qhia kom lawv nco ntsoov lub hom phiaj ntawd tas mus li. Hais kom lawv sib raug zoo nrog Leej Txiv Saum Ntuj Ceeb Tsheej thiab Yexus Khetos ntxiv, los ntawm kev kawm vaj lug kub, kev hloov siab lees txim tsis tu tsis tseg, kev hais lus nrog Leej Txiv thaum lawv thov Vajtswv, thiab kev ua tim khawv txog Leej Txiv thiab Leej Tub. Qhia cov neeg los ntawm koj tej lus thiab tus yam ntxwv kom paub uas li cas kev khi lus thiab kev ua raws li tej kev khi lus yuav khi peb rau Nkawd. Pab lawv paub tias Nkawd xav tias peb muaj nqis npaum li cas thiab hlub peb npaum li cas. Txhawb lawv txoj kev ntseeg tias Yexus Khetos, los ntawm Nws txoj Kev Theej Txhoj uas zoo tag nrho, yeej yog tib txoj kev rov qab mus cuag peb Leej Txiv. Muab cib fim rau cov neeg kom lawv txais tus Vaj Ntsuj Plig Dawb Huv zaj lus tim khawv, “uas ua tim khawv txog Leej Txiv thiab Leej Tub” (Mauxes 5:9).
Pab cov Neeg Kawm Txhob Txwm Siv Zog Hloov Los Ua Neeg Zoo Li Yexus Khetos
Qhov tseem ceeb kawg, kev kawm txog Yexus Khetos ua rau peb xav hloov los ua neeg zoo li Nws. Tiam sis peb yuav hloov los ua neeg zoo li Nws tsuas yog peb muab siab rau ntseeg, nyob hauv chav kawm thiab nyob sab nraud, thiab txhob txwm xaiv kom coj raws li Nws tus yam ntxwv thiab txais tau Nws txoj kev tshav ntuj. Caw cov neeg uas koj qhia kom nrhiav tus Vaj Ntsuj Plig Dawb Huv txoj kev pab kom paub tej yam lawv ua tau kom hloov los ua neeg zoo li tus Cawm Seej. Qhia thiab txhawb nqa cov neeg kawm thaum lawv siv zog hloov los ua neeg zoo li Nws kom mus tas lawv lub neej.
Yakhauj tau qhia tias “txhua yam uas Vajtswv tau muab los rau noob neej txij thaum chiv keeb ntawm lub ntiaj teb los, yog muab los ua lub cim txog Khetos” (2 Nifais 11:4). Koj tej lus qhia los yeej yuav zoo ib yam li ntawd. Tsom ntsoov rau Yexus Khetos thaum koj qhia thiab kawm txhua yam. Thaum koj thiab cov neeg uas kawm “hais txog Khetos, … xyiv fab txog Khetos, … qhia txog Khetos” (2 Nifais 25:26), ces tus Vaj Ntsuj Plig Dawb Huv yuav ua pov thawj txog tus Cawm Seej hauv txhua tus neeg lub siab lub ntsws. Thaum koj pab cov neeg kom paub txog Leej Txiv Saum Ntuj Ceeb Tsheej thiab Yexus Khetos, ces lawv haj yam yuav xav tig mus rau Nkawd kom thov kev pab, kev cia siab, thiab kev kho mob kom tas lawv lub neej.