lalaking nagninilay-nilay

Alituntunin 2

Iwagwag ang mga Tanikalang Gumagapos sa Iyo

“Gumising … isuot ninyo ang baluti ng kabutihan. Iwagwag ang mga tanikalang gumagapos sa inyo, at lumabas mula sa karimlan, at bumangon mula sa alabok” (2 Nephi 1:23).

Pagkatanto na Hindi Tayo Dapat Sisihin sa mga Pagpiling Ginagawa ng Ating mga Mahal sa Buhay

Habang sinisikap nating unawain ang mahirap na sitwasyon natin, karaniwan lamang na magtaka kung bakit mali ang tinahak na landas ng mga mahal natin sa buhay. Maaari nating madama na may pananagutan tayo rito kahit paano. Bilang mga magulang, maaari tayong mag-alala kung ano ang maaari nating gawin na naiiba. Bilang mga asawa, maaaring isipin natin kung nabigo ba tayong tugunan ang mga pangangailangan ng ating asawa at tanungin ang ating sarili na gaya ng “Hindi pa ba sapat ang ginawa ko?” at “Ano pa ba ang maaari kong gawin?” Kapag hindi maganda ang kinahinatnan ng mga bagay-bagay, natutukso tayong sisihin ang ating sarili. Ang ganitong uri ng pag-iisip ay maaaring umakay sa atin na ipalagay na responsable tayo sa mga pagpili ng ibang tao, na nauuwi sa pag-uusig ng budhi at kawalang-pag-asa na hindi nararapat sa atin.

Isang mahalagang elemento sa plano ng Ama sa Langit ang alituntunin ng kalayaang pumili—ang kakayahan at pribilehiyong gumawa ng sarili nating mga pagpili. Kapag pinag-aralan at inunawa natin ang alituntuning ito, patototohanan sa atin ng Espiritu na hindi tayo ang dahilan ng mga maling pagpili ng ating mga mahal sa buhay. Sinabi ni Elder Richard G. Scott, “Kung wala kayong malubhang kasalanan huwag na ninyong pagdusahan ang bunga ng mga kasalanan ng iba. Bilang asawa, magulang o mahal sa buhay, mahahabag kayo sa taong sukdulan ang pait ng pagkakasala. Gayunma’y hindi ninyo dapat akuin ang responsibilidad sa mga pagkakasalang iyon” (“Upang Maging Malaya sa Mabibigat na Pasanin,” Ensign, o Liahona, Nob. 2002, 88). Ang mga mahal natin sa buhay ang may pananagutan sa mga pagpiling ginagawa nila. Bagama’t ang eksaktong dahilan sa kanilang pagpili ay maaaring kumplikado, hindi tayo ang mananagot sa kanilang mga pagpili. Ang isang magandang paalala ay, “Sinumang gagawa ng kasamaan, ay ginagawa ito sa kanyang sarili; sapagkat masdan, kayo ay malaya” (Helaman 14:30; idinagdag ang italics). Ang mga mahal natin sa buhay ay malamang na makagawa ng mga maling pagpili. Bahagi ng proseso ng lubos na paggaling para sa kanila ang gumawa ng mga pagkakamali ngunit akuin ang buong responsibilidad sa kanilang mga pagpapasiya. Ang ating tagumpay at kaligayahan sa buhay ay hindi dapat sukatin ayon sa kung paano pinipiling gamitin ng ibang tao ang kanilang kalayaang pumili. Tayo ay responsable lamang sa sarili nating mga pagpili at pagkilos.

• Naramdaman mo ba na responsable ka kahit paano sa mga maling pagpili ng iyong mahal sa buhay? Kung oo, paano ito nakaapekto sa iyo?

• Ano ang nakatulong sa iyo na maunawaan na hindi ka responsable sa mga pagpiling ginawa ng iyong mahal sa buhay?

Pag-unawa na Tayo ay mga Anak ng Diyos

Ang mga pagpili ng ating mga mahal sa buhay ay maaaring makaapekto sa pagtingin natin sa ating sarili at sa buhay. Maaari nating simulang tukuyin ang ating sarili ayon sa karanasan natin sa mga pagpili ng ating mga mahal sa buhay, dahil kung minsa’y tila apektado nito ang lahat ng aspeto ng ating buhay. Mahalagang tandaan natin kung sino tayo at bakit tayo narito sa lupa. Ang Diyos ay hindi lamang natin Pinuno at Lumikha, kundi Siya rin ang ating Ama sa Langit. Lahat ng lalaki at babae ay literal na mga anak ng Diyos. Makakaasa tayo sa simpleng katotohanan na Siya ay ating Ama at tayo ay Kanyang mga anak. Ang maunawaan ang relasyong ito ay naghahatid ng kapayapaan at tiwalang sumulong—hindi dahil sa ating sariling mga kakayahan kundi dahil sa kabutihan at walang-kapantay na kapangyarihan Niya at ng Kanyang Anak na si Jesucristo. Anuman ang nangyayari sa ating buhay, makatutuon tayo sa walang-hanggang katatagan ng pagmamahal Niya sa atin. Dito nagsisimula ang ating proseso ng pagpapagaling. Sa gitna ng ating mga pagsubok, kapag ibinaling natin ang ating puso sa ating Ama sa Langit, ang Kanyang pagmamahal at ang nagpapagaling na kapangyarihan ng Kanyang Anak, sa pamamagitan ng Pagbabayad-sala, ay matutulungan tayong magkaroon ng lakas-ng-loob at pag-asa.

• Sa anong paraan nakakatulong sa iyo ang kaalaman na ikaw ay anak ng Diyos?

• Paano mo patatatagin ang relasyon mo sa Diyos sa pamamagitan ng mga bagay na tulad ng pagdarasal, pag-aaral ng mga banal na kasulatan, pagninilay, pag-aayuno, at pagsunod sa Kanyang mga utos?

Pagkilala na Malaya Tayong Kumilos para sa Ating Sarili

Maaaring madama natin na wala tayong lakas dahil hindi natin gaanong kontrolado ang pinipiling gawin ng ating mga mahal sa buhay o ang mga bunga ng mga pagpiling iyon. Bagama’t itinuturo ng ebanghelyo sa atin na tayo ay “malayang makapipili ng kalayaan at buhay na walang hanggan, sa pamamagitan ng dakilang Tagapamagitan ng lahat ng tao, o piliin ang pagkabihag at kamatayan, alinsunod sa pagkabihag at kapangyarihan ng diyablo” (2 Nephi 2:27). Magagamit natin ang ating kalayaang pumili upang pagandahin ang ating sitwasyon at gumawa ng mabubuting pagpili anuman ang ating kalagayan. Ipinayo ni Elder David A. Bednar na, “Kapag naunawaan natin at ginamit ang nagbibigay-kakayahang kapangyarihan ng Pagbabayad-sala sa ating sariling buhay, mananalangin at hihingi tayo ng lakas na mabago ang ating sitwasyon sa halip na manalanging baguhin ang ating sitwasyon. Tayo ay magiging taong kumikilos sa halip na mga bagay na pinakikilos (tingnan sa 2 Nephi 2:14)” (“Ang Pagbabayad-sala at ang Paglalakbay sa Mortalidad,” Ensign o Liahona, Abr. 2012, 16).

• Paano mo gagamitin ang iyong kalayaang pumili upang kumilos at pagandahin ang iyong sitwasyon?

• Paano naaangkop ang ikalawang saligan ng pananampalataya sa sitwasyon mo?

babaeng may pasan na maliit na batang lalaki sa kanyang likod

Sa gitna ng ating mga pagsubok, kapag ibinaling natin ang ating puso sa ating Ama sa Langit, ang Kanyang pagmamahal at ang nagpapagaling na kapangyarihan ng Pagbabayad-sala ng Kanyang Anak ay matutulungan tayong magkaroon ng lakas-ng-loob at pag-asa.

Resources para sa Karagdagang Pag-aaral

Pag-aaral ng Ebanghelyo

Habang pinag-aaralan mo ang resources na nakalista sa ibaba, mapanalanging isipin kung paano mo magagamit ang mga alituntuning itinuturo ng mga ito.

• Awit 82:6 (Tayo ay mga diyos, mga anak ng Kataas-taasan.)

• Mga Gawa 17:29 (Tayo ay lahi ng Diyos.)

• 2 Nephi 2:14–16 (Binigyan tayo ng kakayahang pumili.)

• Moroni 7:15–16 (Maaari tayong humatol sa pagitan ng mabuti at masama sa pamamagitan ng Liwanag ni Cristo.)

• Doktrina at mga Tipan 101:78 (Tayo ay mananagot sa ating sariling mga pagkilos.)

• Moises 7:32 (Binigyan tayo ng Diyos ng kalayaang pumili.)

• Mga Saligan ng Pananampalataya 1:2 (Tayo ang mananagot sa sarili nating buhay at hindi sa buhay ng iba.)

• “Ang Mag-anak: Isang Pagpapahayag sa Mundo”

• David A. Bednar, “Ang Pagbabayad-sala at ang Paglalakbay sa Mortalidad,” Ensign o Liahona, Abr. 2012, 12–19

• D. Todd Christofferson, “Disiplinang Moral,” Ensign o Liahona, Nob. 2009, 105–8

• Robert D. Hales, “Kalayaan: Mahalaga sa Plano ng Buhay,” Ensign o Liahona, Nob. 2010, 24–27

Personal na Pag-aaral at Pagsasabuhay

Ang mga sumusunod na aktibidad ay para sa ikahuhusay ng iyong pag-aaral at pagsasabuhay ng mga alituntuning ito. Isulat sa journal ang iyong mga iniisip, damdamin, pananaw, at plano para maisagawa ang natutuhan mo. Habang nagbabago ang mga pangangailangan at sitwasyon sa buhay mo, bibigyan ka ng mga bagong ideya ng pag-ulit sa mga aktibidad na ito.

• Ano ang malayang gawin ng mga tao? Ano ang hindi sila malayang gawin? Paano ka mapalalakas ng pagsasabuhay ng alituntunin ng kalayaang pumili na makahanap ng kapayapaan at tulong mula sa Tagapagligtas?

• Pag-aralan at pagnilayan ang mga talatang binanggit sa lesson outline. Isulat sa iyong journal ang itinuturo nito tungkol sa kalayaang pumili. Alin sa mga talata ang pinakamakabuluhan sa iyo? Bakit? Paano ka matutulungan ng natutuhan mo?

• Pagnilayan ang sumusunod na pahayag ni Elder Robert D. Hales na: “Sa mga huling araw na ito, tulad noong unang panahon, iwasan natin ang impluwensya ng kasamaan sa pagkilos natin mismo para maiwasan ito” (“Kumilos para sa Ating Sarili: Ang Kaloob at Pagpapala ng Kalayaang Pumili,” Ensign o Liahona, Mayo 2006, 6–7). (Tingnan sa 2 Nephi 2:14.)

• Ano ang nadarama mo sa pagiging isang kinatawan na kumikilos sa halip na isang bagay na pinakikilos? Isulat kung paano mo maisasabuhay ang payo ni Elder Hales na kumilos para sa iyong sarili at makahanap ng higit na kapayapaan at paggaling.

• Pag-aralan at pagnilayan ang mensahe ni Elder D. Todd Christofferson na “Disiplinang Moral,” at hanapin ang mga alituntunin ng kalayaang pumili na maaaring umangkop sa iyong buhay. Anong mga ideya ang ibabahagi mo sa isang kaibigang nasa sitwasyon na katulad ng sa iyo? Isulat sa iyong journal ang mga naiisip mo.

• Isipin ang mga alituntuning matatagpuan sa himnong ito: “Turuang Lumakad sa Liwanag” (Mga Himno, blg. 192).