“Tiisin Mo ang Lahat ng Bagay na Ito nang May Pagtitiyaga,” Gabay sa Pagsuporta: Tulong para sa mga Asawa at Pamilya ng mga Taong Nagpapagaling (2014).

“Tiisin Mo ang Lahat ng Bagay na Ito nang May Pagtitiyaga,” Gabay sa Pagsuporta: Tulong para sa mga Asawa at Pamilya ng mga Taong Nagpapagaling.

Larawan

ina na may hawak na maliit na bata

Alituntunin 11

Tiisin Mo ang Lahat ng Bagay na Ito nang May Pagtitiyaga

“Sapagkat nalalaman kong ikaw ay iginapos; oo … tiniis mo ang lahat ng bagay na ito nang may pagtitiyaga dahil sa kasama mo ang Panginoon; at ngayon nalalaman mong iniligtas ka ng Panginoon” (Alma 38:4).

Pagkilala na ang Paggaling ay Isang Proseso

Itinuro ni Elder David A. Bednar na ang espirituwal na pagbabago “ay karaniwang hindi nagaganap nang agaran o minsanan; ito ay patuloy na proseso—hindi lang minsanang nangyayari. Taludtod sa taludtod at tuntunin sa tuntunin, unti-unti at halos hindi halata, magiging tugma ang ating mga hangarin, iniisip, mga salita, at ating mga gawa sa kalooban ng Diyos. Ang yugtong ito ng proseso ng pagbabago ay nangangailangan ng panahon, pagsisikap, at pagtitiyaga” (“Kinakailangan Ngang Kayo’y Ipanganak na Muli,” Ensign o Liahona, Mayo 2007, 21). Gayundin, lahat ng pagbabago ay kailangan ng lakas at patuloy na pagsisikap. Kailangang dumaan ang mga mahal natin sa buhay sa proseso ng emosyonal, espirituwal, at pisikal na pagbabago, at ang prosesong ito ay nangangailangan ng panahon at tiyaga.

Ito ang itinuturo sa Mangaral ng Aking Ebanghelyo (2004) tungkol sa proseso ng paggaling:

“Maaaring kasama sa pagsisisi ang emosyonal at pisikal na proseso. Dapat itigil ng mga tao ang mga maling nakaugalian. Ang di-magandang ugali ay dapat palitan ng maganda at tamang asal.

“Kaya nga maaaring tumagal ang pagsisisi at pagpapagaling. Kung minsan, kahit maganda ang intensyon, nadadala sa tukso [ang mga tao] habang sinisikap nilang disiplinahin ang sarili. …

“Sa pamamagitan ng binyag at kumpirmasyon ay natatanggap ng mga tao ang kaloob na Espiritu Santo. Ito ang magpapalakas sa kakayahan nilang pagtagumpayan ang mga hamong ito. Pero hindi sapat ang binyag at kumpirmasyon para maiwaksi ang mga pagnanasang ito ng damdamin at katawan na kaugnay ng pag-uugaling ito. Kahit nagtatagumpay ang isang tao sa simula, kailangan pa rin ng karagdagang pagpapagaling sa damdamin para ganap na magsisi at gumaling. (187–88).

Paano maiimpluwensyahan ng mga katotohanang ito tungkol sa pagsisisi at pagpapagaling ang mga pagsisikap mong suportahan ang pagpagaling ng iyong mahal sa buhay?

Angkop na Pagtugon sa Pagbalik sa Dating Adiksyon

Nangyayari ang pagbalik sa dating adiksyon kapag muling gumawa ang isang tao ng mga maling pagpili matapos gumaling nang bahagya. Ang pagbalik sa dating adiksyon ay lubhang karaniwan at maaaring isang solong pangyayari o kaya’y lubos na pagbalik sa dating gawi. Dahil lubhang karaniwan ang pagbalik sa dating adiksyon, maaaring idahilan ng ilan na ito ay bahagi ng pagpapagaling basta’t ginagawa nila ang lahat ng kanilang makakaya. Gayunpaman, mahalagang tandaan na ang pagbalik sa dating adiksyon ay hindi bahagi ng proseso ng pagpapagaling. Dapat tayong maging maingat na hindi kunsintihin ang mga pagdadahilan o pangangatwiran ng ating mga mahal sa buhay sa mga maling pagpili nila. Ang pabalik-balik na adiksyon ay nagpapahiwatig na hindi pa lubos na gumaling ang mga mahal natin sa buhay. Maaaring mangahulugan ito na kailangan ng mas matinding pagsisikap at tumanggap ng mas masidhing pagpapagamot ang ating mga mahal sa buhay. Maaaring kailanganin nating magtakda ng mga karagdagang hangganan o limitasyon sa kanila. Kung sinusubukang maliitin ng mga mahal natin sa buhay ang bigat ng pagbalik sa dating adiksyon, ang malinaw at tapat na pananaw natin ay makakatulong na maunawaan nila na nililinlang nila ang kanilang sarili at kailangan pa ng dagdag na tulong.

Kapag bumabalik sa dating adiksyon ang ating mga mahal sa buhay, maaari tayong dumanas ng kawalan ng pag-asa, pagdududa, mababang pagpapahalaga sa sarili, at galit. Ang mga damdaming ito ay maaaring matindi at kung minsa’y napakahirap. Kahit luma na sa atin ang isyung ito, maaaring sariwa at matindi pa rin ang sakit na dulot nito. At kung minsan, kung nagbalik sa dating adiksyon ang mga mahal natin sa buhay matapos ang napakahabang panahon ng pagpapagaling, maaaring mas tumindi pa ang kawalang-pag-asa at sakit. Bahagi ng ating pagpapagaling ang matutong harapin at daigin ang masasakit na damdaming umuusbong dahil sa mga maling pagpili ng ating mga mahal sa buhay. Magagamit natin ang magagandang kasanayang natutuhan natin para kayanin ito at ang mga hangganang naitakda natin hanggang sa ngayon sa ating pagpapagaling at tumatatag sa pundasyong iyan. Maaari din nating lapitan ang mga taong nagmamahal at sumusuporta sa atin. Maaari nating idulog ang nilalaman ng ating puso sa Panginoon at umasa na aalisin Niya ang ating mga pasanin at bibigyan tayo ng kapayapaan. Ang mga pagbalik sa dating adiksyon ng ating mga mahal sa buhay ay hindi kailangang maging dahilan para mawalan tayo ng pag-asa, dahil sa ating kaugnayan sa Tagapagligtas na si Jesucristo.

Mahalagang tumugon nang angkop sa mga pagbalik sa dating adiksyon ng ating mga mahal sa buhay, hindi lamang para tulungan tayong magpagaling kundi para tulungan din sila sa kanilang paggaling. Ang pagkunsinti o pagbabalewala sa kanilang pag-uugali ay maaaring magpanatili sa kanilang pag-uugali at magpasidhi sa ating pagdurusa. Kailangan nilang maunawaan na mahal natin sila ngunit hindi natin maaaring kunsintihin ang patuloy na paggawa nila ng mga maling pagpili at pangangatwiran sa kanilang mga desisyon. Maaari tayong tumugon nang may pagmamahal at katapatan sa kanilang pagbalik sa dating adiksyon at mga pangangatwiran para maipaunawa sa kanila kung paano tayo naaapektuhan, pati na sila, ng kanilang mga ikinikilos. Masusuportahan natin ang iba nang may “hindi pakunwaring pag-ibig” (D at T 121:41) habang malinaw ring ipinararating na tutol tayo sa kanilang pag-uugali “kapag pinakikilos ng Espiritu Santo; at pagkatapos ay magpakita ng ibayong pagmamahal” (D at T 121:43).

Paano ka natulungan ng Diyos na kayanin ang mga pagbalik sa dating adiksyon ng iyong mahal sa buhay?
Paano ka angkop na makakatugon sa pagbalik sa dating adiksyon?

Pagtulong sa Ating mga Mahal sa Buhay na Bumalik sa Dati Nilang Adiksyon

Samantalang sinusubukang pangatwiranan ng ilan ang kanilang pagbalik sa dating adiksyon, ang iba nama’y masyadong pinanghihinaan ng loob at sumusuko kapag bumalik sila sa dating adiksyon, na may maling paniniwala na nasira na nila ang lahat ng progreso nila tungo sa pagpapagaling. Ngunit hindi nababalewala ng pagbalik sa dating adiksyon ang lahat ng pagsisikap nila na gumaling. Maaari pa ring magkaroon ng progreso sa ibang mga paraan, tulad ng kanilang katapatan tungkol sa kanilang mga hamon o sa dalas o tindi ng mga pagbalik nila sa dating adiksyon. Kailangang matuto sila sa kanilang mga kamalian, itama nila ang mga ito, at patuloy silang magbago. Ang ating panghihikayat at suporta ay mahalaga sa prosesong ito. Kailangan ng mga mahal natin sa buhay na kilalanin natin ang progreso nila at tulungan silang patuloy na magpagaling. Bagama’t hindi natin mahihiwatigan kung lubos na silang nagsisi o hindi pa, mapapatotohanan natin na nais ng Panginoon na patawarin sila at na may pag-asa pa, at mahihikayat natin silang makipagtulungan sa kanilang mga lider sa simbahan, support people, at iba pa na higit na makakatulong sa kanila. Posible ang matagumpay na pagpapagaling para sa mga taong mapagpakumbaba at sumasampalataya kay Jesucristo habang patuloy nilang nilulutas ang kanilang mga hamon at gumagawa sila ng pangmatagalang mga pagbabago sa kanilang buhay.

Paano mo masusuportahan ang iyong mahal sa buhay kapag nagbalik siya sa dating adiksyon?

Ang ating panghihikayat at suporta ay mahalaga. … Kailangan [nila] na kilalanin natin ang progreso nila at tulungan silang patuloy na gumaling.

Resources para sa Karagdagang Pag-aaral

Pag-aaral ng Ebanghelyo

Habang pinag-aaralan mo ang resources na nakalista sa ibaba, mapanalanging isipin kung paano mo magagamit ang mga alituntuning itinuturo ng mga ito.

Ezekiel 3:21; Mga Taga Efeso 6:18; Doktrina at mga Tipan 88:81 (Ang ating mga babala ay maaaring magpalakas sa ating mga mahal sa buhay.)
Doktrina at mga Tipan 121:8 (Kung titiisin nating mabuti ang ating mga hamon, dadakilain tayo ng Diyos sa kaitaasan.)
David A. Bednar, “Mangagpuyat sa Buong Katiyagaan,” Ensign o Liahona, Mayo 2010, 40–43
Craig A. Cardon, “Nais ng Tagapagligtas na Magpatawad,” Ensign o Liahona, Mayo 2013, 15–17
James E. Faust, “Ang Kapangyarihang Magbago,” Ensign o Liahona, Nob. 2007, 122–24
Dieter F. Uchtdorf, “Patuloy na Magtiyaga,” Ensign o Liahona, Mayo 2010, 56–59
Mga bahaging “Pagsisisi at Pagrekober Mula sa Adiksyon o Pagkalulong,” “Pagtulong sa mga Investigator at Bagong Binyag na Maunawaan ang Pagsisisi at Paggaling Mula sa Adiksyon o Pagkalulong,” at “Plano para Madaig ang Pagkalulong”, Mangaral ng Aking Ebanghelyo (2004), 214–16

Personal na Pag-aaral at Pagsasabuhay

Ang mga sumusunod na aktibidad ay para sa ikahuhusay ng iyong pag-aaral at pagsasabuhay ng mga alituntuning ito. Isulat sa journal ang iyong mga iniisip, damdamin, pananaw, at plano para maisagawa ang natutuhan mo. Habang nagbabago ang mga pangangailangan at sitwasyon sa buhay mo, bibigyan ka ng mga bagong ideya ng pag-ulit sa mga aktibidad na ito.

Pag-aralan at pagnilayan ang mensahe ni Pangulong James E. Faust na “Ang Kapangyarihang Magbago” at ang mga bahaging “Pagsisisi at Paggaling Mula sa Adiksyon o Pagkalulong,” “Pagtulong sa mga Iinvestigator at Bagong Binyag na Maunawaan ang Pagsisisi at Paggaling Mula sa Adiksyon o Pagkalulong,” at “Plano para Madaig ang Pagkalulong” (mga pahina 214–16) sa Mangaral ng Aking Ebanghelyo. Ano ang natututuhan mo tungkol sa proseso ng paggaling? Ano ang mga inaasahan mo para sa paggaling ng mahal mo sa buhay? Ano ang magagawa mo para tulungan siyang magtagumpay kapag nagbalik siya sa dating adiksyon at pagkatapos nito?
Pag-aralan at pagnilayan ang mensahe ni Pangulong Dieter F. Uchtdorf na “Patuloy na Magtiyaga.” Bakit mahalaga para sa iyo at sa iyong mahal sa buhay na maging matiyaga sa proseso ng pagrekober? Paano ka matutulungan ng Panginoon na maging matiyaga? Ano ang itinuturo sa iyo ng mga salita ni Pangulong Uchtdorf kung paano angkop na tumugon sa pagbalik sa dating adiksyon?
Pag-aralan at pagnilayan ang mensahe ni Elder David A. Bednar na “Mangagpuyat sa Buong Katiyagaan.” Ano ang itinuturo ni Elder Bednar na makakatulong sa iyo at sa iyong mahal sa buhay na maging maingat sa mga palatandaan ng posibleng pagbalik sa dating adiksyon? Anong tulong na ang hiningi ng iyong mahal sa buhay? Ano ang gagawin mo upang maging mas maayos ang pagtutulungan ninyo?
Gawin ang sumusunod na aktibidad mula sa Mangaral ng Aking Ebanghelyo (pahina 216), at isipin kung ano ang maaaring nararanasan ng iyong mahal sa buhay habang nagsisikap siyang gumaling: “Isipin ang ilang nakagawian mo—isang bagay na madalas mong ginagawa, nang hindi nag-iisip. Halimbawa’y ang pagpapalagutok ng mga buko ng daliri, paggalaw-galaw sa salamin mo, pagkain nang sobra, o pagpupuyat. Ngayon subukan mong palipasin ang isang araw na hindi ginagawa ito ni isang beses. Kapag nakaya mo, subukan mo uli ito sa loob ng isang linggo.” Isipin kung gaano mas mahirap para sa iyong mahal sa buhay na baguhin ang kanyang mapaminsalang pag-uugali kaysa talikuran mo ang isang masama ngunit hindi nakalululong na gawi. Paano ka matutulungan ng karanasang ito na suportahan ang iyong mahal sa buhay sa pagpapagaling? Isulat sa iyong journal ang iyong karanasan.
Isipin ang mga alituntuning matatagpuan sa mga himnong ito: “Magpunyagi, mga Banal” (Mga Himno, blg. 43); “Magpakumbaba Ka” (Mga Himno, blg. 75); “Kung Mananalig Kailanman” (Mga Himno, blg. 72).