Ngaahi Tokoni Fakafolofolá

Sēnesi 12–17; ʻĒpalahame 1–2

Naʻe fekumi ʻa ʻĒpalahame ki he ngaahi tāpuaki ʻo e lakanga fakataulaʻeikí peá ne holi ke hoko ko ha tokotaha muimui lelei ange ki he māʻoniʻoní. Naʻe fakahaofi ia ʻe he ʻEikí ʻi ha mana mei hono feilaulauʻi ia ki he ngaahi ʻotua loí. Naʻe fai ʻe he ʻOtuá ha fuakava mo ʻĒpalahame ʻa ia ʻe iku ʻo faitokonia ai e ngaahi fāmili kotoa pē ʻi he māmaní. Naʻe talaʻofa ʻe he ʻEikí kia ʻĒpalahame ha hako taʻefaʻalaua. Naʻe foaki ʻe Sela ʻene kaunanga ko Hekaʻaá kia ʻĒpalahame ke hoko ko ha uaifi ʻi he feinga ke fakahoko e ngaahi talaʻofa ʻa e ʻEikí ke maʻu ha hakó. ʻI hona taʻu motuʻá, naʻe talaʻofa ʻe he ʻEikí kia ʻĒpalahame mo Sela te na maʻu ha foha ko ʻAisake.

Ngaahi Maʻuʻanga Tokoní

• Puipuituʻá mo e Fakamatalá

• Ako Lahi Ange

• Mītiá

Fakatokangaʻi ange: Ko hono fakaʻaongaʻi ha maʻuʻanga tokoni ʻoku ʻikai pulusi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku ʻikai ʻuhinga ia ʻoku poupouʻi ia pe ko e taha naʻá ne faʻú pe te ne fakafofongaʻi ʻa e tuʻunga fakaʻofisiale ʻo e Siasí.

Puipuituʻá mo e Fakamatalá

ʻĒpalahame 1–2

Ko e hā ʻa e tohi ʻa ʻĒpalahamé?

Vakai, “ʻĒpalahame 3. Ko e hā ʻa e tohi ʻa ʻĒpalahamé?”

ʻĒpalahame 1:2–3

Naʻe maʻu fēfē ʻe ʻĒpalahame ʻa e lakanga fakataulaʻeikí?

“Pea ʻi [he] ʻiloʻi [ʻe ʻĒpalahame] ʻoku ʻi ai ʻa e fiefia mo e melino … lahi ange” maʻaná, naʻá ne “kumi ai ki he ngaahi tāpuaki ʻo e ngaahi tamaí, pea mo e totonu ʻa ia ʻe fakanofo [ia] ki aí.” Naʻá ne hoko ko e “ʻea-hoko totonu, ko ha Taulaʻeiki Lahi, ʻoku maʻu ʻa e totonu ko ia ʻoku maʻu ʻe he ngaahi tamaí.”

ʻI he kuonga ʻo e Fuakava Motuʻá, naʻe “tukufakaholo mai [ʻa e lakanga fakataulaʻeikí] mei he tamaí ki he fohá,” ʻo kamata meia ʻĀtama. Koeʻuhí naʻe tafoki ʻa e tamai tonu ʻa ʻĒpalahamé mei he ʻOtuá, naʻe fekumi ʻa ʻĒpalahame ki he lakanga fakataulaʻeikí mei ha feituʻu kehe. ʻOku akoʻi ʻe he Tokāteline mo e Ngaahi Fuakavá naʻe “maʻu ʻe ʻĒpalahame ʻa e lakanga fakataulaʻeikí meia Melekisēteki.”

Ko e Tāpuakiʻi ʻe Melekisēteki ʻa ʻĒpalahamé, tā fakatātaaʻi ʻe Walter Rane

ʻĒpalahame 1:12, 14

Ko e hā ʻa e ʻū fakatātā ʻi he Tohi ʻa ʻĒpalahamé?

“ʻOku kau ʻi he tohi ʻa ʻĒpalahamé ha ngaahi fakatātā ʻe tolu kuo paaki, ʻoku ʻiloa ko e ngaahi tatau moʻoni, ʻa ia ʻoku fakatefito ʻi he ngaahi ʻīmisi ʻi he takainga tohi [faka-ʻIsipite ʻi he kuonga muʻá naʻe fakatau mai ʻe Siosefa Sāmita]. Naʻe fakakau ʻa e ngaahi tatau moʻoni ko ʻení ʻi he taimi naʻe fuofua pulusi ai ʻa e tohi ʻa ʻĒpalahamé ʻi he 1842. Naʻe pulusi ʻa e fakamatalaʻi ʻe Siosefa Sāmita ʻo e ngaahi ʻatá fakataha mo e ngaahi tatau moʻoní. …

“Ko e lahi taha ʻo e ngaahi fakamatala naʻe pulusi ʻe Siosefa mo e ngaahi tatau moʻoní ʻoku ʻikai tatau ia mo e ngaahi fakaʻuhinga ʻa e kau mataotao ʻo onopooni ʻi he lea mo e hisitōlia faka-ʻIsipité. Ka neongo ia, kuo fakatokangaʻi ʻe he kau mataotaó ha ngaahi meʻa ʻoku potupotutatau. Hangē ko ʻení, naʻe fakamatalaʻi ʻe Siosefa Sāmita ʻa e ngaahi fakatātā ʻe fā ʻi he fakatātā 6 ʻo e Tatau Moʻoni 2 ko e ‘māmani ko ʻení ʻi hono ngaahi potu ʻe faá.’ Kuo fakamatalaʻi foki ʻe he kau mataotao fakaako kehé ʻa e ngaahi fakatātā tatau ʻi he ngaahi tohi fakakuongamuʻa faka-ʻIsipite kehé. ʻOku hā ʻi he tatau moʻoni 1 ha ʻotua kalokataile ʻoku kakau ʻi he meʻa naʻe ui ʻe Siosefa Sāmita ‘ko e ʻatā ki ʻolunga ʻi hotau ʻulú.’ Kuo fakahaaʻi tatau pē ʻe he kau mataotao fakaakó ha ngaahi fakakaukau faka-ʻIsipite ʻo e langí ko ha ‘ʻōseni fakalangi.’

“ʻOku ʻikai ke tau ʻilo pe ʻoku fekauʻaki fēfē ʻa e ngaahi tatau moʻoní mo e fakamatalá. ʻOku ʻi ai ha fakamoʻoni naʻe ʻi ai ha kau faʻu tohi Siu ʻe niʻihi ʻi he kuonga naʻe faʻu ai ʻa e takainga tohí, naʻa nau fakakau ha ʻū tā fakatātā mo e ngaahi talanoa faka-ʻIsipite ʻi heʻenau ngaahi tohi toputapú, ʻo kau ai ʻa e ngaahi tohi ʻoku fekauʻaki mo ʻĒpalahamé. ʻOku malava pē ke pehē ko e ʻū fakatātā ko ʻení naʻe toe fakaʻaongaʻi ia ʻi ha founga tatau ki ha taumuʻa kehe.”

ʻĒpalahame 1:21–27

Ko e hā ʻa e ngaahi fakamalaʻia naʻe lau ki ai ʻa ʻĒpalahamé?

Naʻe fai ʻe ʻĒpalahame ha fakamatala nounou fekauʻaki mo hono ʻiloʻi mo hono nofoʻi ʻo ʻIsipite hili ʻa e Lōmakí. Naʻá ne tohi fekauʻaki mo ha “malaʻia ʻi he fonuá” naʻe tukuʻau hifo ʻi he hako ʻo e foha ʻo Noa ko Hamí.

Naʻe ʻiloʻi ʻe ʻĒpalahame kimui ange ko e ʻuluaki feló ko ha “tangata māʻoniʻoni ia.” Naʻá ne pehē naʻe hanga ʻe Noa ʻo “tāpuakiʻi [ʻa Felo] ʻaki ʻa e ngaahi tāpuaki ʻo e māmaní, pea mo e ngaahi tāpuaki ʻo e potó, kae fakamalaʻiaʻi ia ʻo kau ki he Lakanga Fakataulaʻeikí.”

ʻOku ʻikai fakamatalaʻi mahino ʻe he ngaahi veesi ko ʻení ʻa e ngaahi fakamalaʻiá pe ko e ʻuhinga naʻe ʻoange aí. ʻI he kuohilí, kuo fakafekauʻaki hala ʻe ha niʻihi ʻa e fakamalaʻia ki he hako ʻo Hamí mo e fakangatangata ki he lakanga fakataulaʻeikí mo e temipalé ki he kakai hakoʻi ʻAfilika ʻUliʻuli ʻi hotau kuongá. ʻI he ʻaho ní, ʻoku fakaʻikaiʻi ʻeni ʻe he Siasí mo ha ngaahi fakakaukau kehe ʻi he kuohilí ʻoku feinga ke fakamatalaʻi ʻa e ngaahi ʻuhinga ki hono fakangatangata ʻo e lakanga fakataulaʻeikí mo e temipalé.

ʻĒpalahame 2:6–11

Ko e hā ʻa e fuakava naʻe fai ʻe he ʻOtuá mo ʻĒpalahamé?

(Fakahoa ki he Sēnesi 12:1–3; 13:14–18; 15:1–21; 17:1–10.)

ʻOku kau ʻi he ngaahi talaʻofa naʻe fai ʻe he ʻOtuá kia ʻĒpalahamé, ʻa e ngaahi meʻá ni:

• ʻE taʻefaʻalaua hono hakó.

• ʻE ʻaloʻi ʻa Sīsū Kalaisi ʻi hono hakó.

• Te ne maʻu mo hono hakó ha ngaahi fonua pau.

• ʻE maʻu ʻe hono hakó ʻa e ongoongoleleí pea maʻu mo e lakanga fakataulaʻeikí

• ʻE tāpuekina ʻa e ngaahi puleʻanga kotoa pē ʻo e māmaní ʻo fakafou ʻi hono hakó.

ʻOku hoko ʻa kinautolu kotoa ʻoku nau fakahoko mo tauhi ʻa e ngaahi fuakava toputapu mo e ʻOtuá ko e hako ʻo ʻĒpalahame mo e kau ʻea-hoko ki he ngaahi tāpuaki ʻo e fuakava faka-ʻĒpalahamé.

Naʻe akonaki ʻa Palesiteni Lāsolo M. Nalesoni ʻo pehē:

“ʻOku tau toe maʻu ʻi hono fakafoʻou e talaʻofá ni, ʻa e lakanga fakataulaʻeiki māʻoniʻoní pea mo e ongoongolelei taʻengatá. Ko ʻetau ngaahi kui ʻa ʻĒpalahame, ʻAisake, mo Sēkope. Ko ha kakai ʻIsileli kitautolu. ʻOku tau maʻu ʻa e totonu ke maʻu e ongoongoleleí, ngaahi tāpuaki ʻo e lakanga fakataulaʻeikí mo e moʻui taʻengatá. ʻE tāpuekina ʻe heʻetau ngaahi ngāué e ngaahi puleʻanga ʻo e māmaní mo e ngaahi ngāue hotau hakó. ʻOku maʻu ʻe he hako ʻo ʻĒpalahamé mo kinautolu ʻoku tānaki mai ki hono fāmilí ʻi he ohí, ʻa e ngaahi tāpuaki kuo talaʻofa ko ʻení—ʻo makatuʻunga ʻi heʻenau tali ʻa e ʻEikí mo talangofua ki Heʻene ngaahi fekaú. …

Ko e kakai tangata mo fafine kitautolu ʻa e ʻOtuá koeʻuhí he kuo tau fai ha ngaahi fuakava mo Ia. Ko e hako kitautolu ʻo ʻĒpalahame. Ko e fānau kitautolu ʻo e fuakavá—ʻa e fuakava faka-ʻĒpalahamé.”

Ko ʻĒpalahame ʻi he Maʻomaʻonganoa ʻo Mamilí, tā fakatātaaʻi ʻe Grant Romney Clawson

Sēnesi 12:14–20; ʻĒpalahame 2:22–25

Ko e hā naʻe pehē ai ʻe Sela ko e tuofefine ia ʻo ʻĒpalahamé?

ʻOku fakamahinoʻi ʻe he tohi ʻa ʻĒpalahamé naʻe fakatokanga ʻa e ʻEikí kia ʻĒpalahame mo Sela ʻi he fakatuʻutāmakí pea fakahinohinoʻi ʻa Sela ke fakahā ki he kau ʻIsipité ko e tuofefine ia ʻo ʻĒpalahamé. Naʻe talangofua ʻa ʻĒpalahame mo Sela ki he faleʻi ʻa e ʻEikí pea naʻe fakahaofi kinaua mei ha tūkunga fakatuʻutāmaki. Koeʻuhí naʻe fakatou tupu ʻa ʻĒpalahame mo Sela meia Tela, naʻe lava pē fakaʻatā ʻe he anga fakafonua ʻo hona taimí ke ui totonu ʻe ʻĒpalahame ʻa Sela ko hono tuofefine.

Sēnesi 14:18–20

Ko hai ʻa Melekisēteki?

Ko e lahi taha ʻo e ngaahi meʻa ʻoku tau ʻilo fekauʻaki mo Melekisētekí ʻoku maʻu ia ʻi he folofola kuo fakafoki maí. Ko ha palōfita, taulaʻeiki lahi, mo ha tuʻi maʻongoʻonga ia. Naʻá ne fakanofo ʻa ʻĒpalahame ki he lakanga fakataulaʻeikí. Hangē ko ʻĪnoke mo e kakai ʻo Saioné, naʻe fakahoko ʻe Melekisēteki mo hono kakaí ʻa e “māʻoniʻoni, pea nau maʻu ʻa e langí.”

Kimuʻa he kuonga ʻo Melekisētekí, ko e lakanga fakataulaʻeiki “naʻe ui ia ko e Lakanga Fakataulaʻeiki Toputapu ʻi he Lakanga ʻo e ʻAlo ʻo e ʻOtuá. Ka ko e meʻa pē ke fakaʻapaʻapa pe ʻapasia ai ki he huafa ʻo e ʻOtua Fakalevelevá, koeʻuhi ke ʻoua naʻa fuʻu tuʻo lahi ʻa hono lea ʻaki ʻo hono huafá, ko ia, naʻe ui ʻaki ai ʻe kinautolu, ʻa ia ko e siasí ʻi he ngaahi ʻaho fuoloá, ʻa e lakanga fakataulaʻeiki ko iá ʻo tauhingoa kia Melekisēteki, pe ko e Lakanga Taulaʻeiki Faka-Melekisētekí.”

Sēnesi 15:1–18

Ko e hā e ʻuhinga naʻe fahi ua ai ʻe ʻĒpalahame ʻa e fanga monumanú?

ʻI he fefolofolai ʻa ʻĒpalahame mo e ʻEikí ʻi ha meʻa-hā-maí, naʻe toe fakaongo ʻe he ʻEikí ʻEne ngaahi talaʻofa ke tāpuakiʻi ʻa ʻĒpalahame ʻaki ha kelekele mo ha hakó. Neongo naʻe tui ʻa ʻĒpalahame ki he ʻEikí, ka naʻá ne fiemaʻu ha fakapapau ʻo e talaʻofa ʻa e ʻOtuá kiate ia fekauʻaki mo e fonuá.

Naʻe fekau ʻe he ʻOtuá kia ʻEpalahame ke ne toʻo ha fanga monumanu kehekehe, fahi ua pea fokotuʻutuʻu ke nau māvahevahe. Kimui angé, naʻe ʻi ai ha “afi kakaha kuo kohu, mo e maama ulo,” naʻe ngalingali ke ne fakafofongaʻi e ʻao ʻo e ʻEikí, “naʻe ʻalu ʻi he vahaʻa ʻo e ngaahi konga manú.” ʻOku fakaʻosi e talanoá ʻaki ʻene pehē, “ʻI he ʻaho ko iá naʻe fai ʻe he ʻEikí ʻa e fuakava mo ʻĒpalame, ʻo pehē, Kuó u tuku ki ho hakó ʻa e fonuá ni, mei he vaitafe ʻo ʻIsipité ʻo aʻu ki he vaitafe lahí, ʻa ia ko e ʻIufaletisí.”

ʻI he Fuakava Motuʻá, ʻoku maʻu ʻa e kupuʻi lea “ke fai ʻa e fuakavá” mei he ongo foʻi lea faka-Hepelū ko e kārat berît, ʻa ia ʻe lava foki ke liliu ko e “ke tuʻusi ha fuakava.” ʻI he kuonga muʻá, naʻe faʻa haʻi ʻa e ngaahi fuakavá ʻaki hano tāmateʻi mo fahifahi ha monumanu. Ko e ngāue ʻo e ʻalu atu ʻi he ʻangaʻangá ko ha fakataipe ia naʻe loto-fiemālie ʻa e fakafoʻituituí ke mate kapau te ne maumauʻi ʻa e fakapapaú.

Ko e meʻa tatau pē, naʻe meimei ke hoko ʻa e hāʻele atu ʻa e ʻOtuá ʻi he vahaʻa ʻo e fanga monumanú ko ha fakapapau kia ʻĒpalahame ʻe fakahoko ʻe he ʻEikí ʻEne ngaahi talaʻofá. Naʻe akoʻi ʻe Palesiteni Lāsolo M. Nalesoni, “ʻI he taimi ʻoku tau fakahoko ai ha fuakava mo e ʻOtuá, kuo tau fakahoko ha fuakava mo Ia ʻa ia te Ne tauhi maʻu pē ʻEne folofolá.”

Sēnesi 16:1–3

Ko e hā e ʻuhinga naʻe foaki ai ʻe Sela ʻa Hekaʻā kia ʻĒpalahame ke hoko ko ha uaifí?

Neongo e ngaahi talaʻofa ʻa e ʻEikí kia ʻĒpalahame te ne maʻu ha hako maʻongoʻongá, ka naʻe teʻeki pē ke lava ʻa Sela ʻo maʻu ha fānau hili ha ngaahi taʻu lahi ʻo ʻena nofo-malí. ʻI hono foaki ʻe Sela ʻa Hekaʻā kia ʻĒpalahame ke hoko ko ha uaifi tokolahí, naʻá ne fakaʻamu ke lava ʻa ʻĒpalahame ʻo maʻu ha fānau mo fakahoko e ngaahi talaʻofa ʻa e ʻEikí. ʻOku mahino kiate kitautolu mei he fakahā ʻi he ngaahi ʻaho kimui ní ko ha fekau ʻeni mei he ʻOtuá naʻe talangofua ki ai ʻa ʻĒpalahame mo Sela.

ʻOku akoʻi ʻi he Tohi ʻa Molomoná ko e mali ʻi he vahaʻa ʻo ha tangata ʻe taha mo ha fefine ʻe tahá ko e fono tuʻu-pau ia ʻa e ʻOtuá ki he malí. Ka neongo ia, kuo tuʻutuʻuni ʻe he ʻOtuá he taimi ʻe niʻihi ke fakahoko ʻa e mali tokolahí ko ha fakaʻatā makehe. Ko ha ʻuhinga ʻe taha kuo ʻomi ʻe he ʻOtuá ki hono fakahoko ʻo e mali tokolahí ke “fakatupu ha hako kiate [Ia].”

Lolotonga e ngaahi fuofua ʻaho ʻo e Siasi kuo fakafoki maí, naʻe fekauʻi ʻe he ʻEikí ke fakahoko ʻa e mali tokolahí ʻi ha vahaʻataimi, ʻo kamata ʻi he Palōfita ko Siosefa Sāmitá. “Naʻe kau ʻa e tefitoʻi moʻoni ko ʻení ʻi he ngaahi konga faingataʻa taha ʻo hono Fakafoki Mai ʻo e ongoongoleleí—kia Siosefa fakataautaha pea mo e kāingalotu kehe ʻo e Siasí.” Naʻe iku ʻa e fakahā mei he ʻEikí kia Uilifooti Utalafi ʻi he 1890 ke fakangata ai hono fakahoko ʻo e mali tokolahí ʻi he Siasí.

Sēnesi 16:4–6

Ko e hā e ʻuhinga naʻe anga fakamālohi ai ʻa Sela kia Hekaʻaá?

ʻI he taimi naʻe ʻilo ai ʻe Hekaʻā ʻokú ne feitamá, naʻá ne “taukaeʻi [ʻa Sela] ʻi hono matá.” ʻOku ʻuhinga ʻeni naʻe ʻikai fakaʻapaʻapaʻi ʻe Hekaʻā pe naʻá ne tāufehiʻa kia Sela. ʻI he fakalalahi ʻa e fekeʻikeʻí, naʻe fakamanatu ange ʻe ʻĒpalahame kia Sela ʻokú ne maʻu ha mafai ʻi hona falé kia Hekaʻā, pea ʻe lava ke feinga ʻa Sela ke fakaleleiʻi ʻa e fekeʻikeʻi ʻi hona fāmilí. Naʻe “[fehangahangai] fakamālohi” leva ʻa Sela mo Hekaʻā ʻo tupu ai e hola ʻa Hekaʻā.

ʻE lava ke fakamanatu mai ʻe hono ako e ngaahi feohi ʻa ʻĒpalahame, Sela, mo Hekaʻaá ʻa ʻetau fiemaʻu kotoa ko ia ʻa e ʻaloʻofá mo e huhuʻí ʻo fakafou ʻia Sīsū Kalaisí. Neongo honau ngaahi tūkungá mo e taʻehaohaoá, ka naʻe ʻofa ʻa ʻĒpalahame, Sela, mo Hekaʻā ki he ʻEikí pea naʻá Ne tāpuekina lahi kinautolu. Naʻe fakaʻatā ʻe he fili ʻa Hekaʻā ke foki kia ʻĒpalahame mo Selá ke ne maʻu ʻene talaʻofa ʻo e fuakavá fekauʻaki mo hono hakó.

Sēnesi 17:5, 15

Ko e hā e ʻuhinga naʻe liliu ai ʻe he ʻEikí ʻa e hingoa ʻo ʻEpalame mo Selaí?

Tā fakatātā ʻo ʻĒpalahame mo Sela, tā ʻa Dilleen Marsh

ʻI he lea faka-Hepeluú, ʻoku ʻuhinga e hingoa ʻEpalamé ki he “tamai kuo hakeakiʻi,” pea ʻuhinga ʻa e ʻĒpalahamé ki he “tamai ʻo ha kakai tokolahi.” ʻOku ʻuhinga ʻa e hingoa Selá ki he “pilinisesi.” ʻE lava ke fakafofongaʻi ʻe hono foaki ʻe he ʻEikí ha hingoa foʻou kia ʻĒpalahame mo Selá ʻa ʻena liliu ki ha tuʻunga foʻou ko ha ongo meʻa fakafoʻituitui ʻi ha vā fetuʻutaki fuakava mo e ʻOtuá. Naʻe akoʻi ʻe Palesiteni Lāsolo M. Nalesoni, “Naʻe fakaʻilongaʻi ʻe hono foaki ʻo e [ongo] hingoa foʻou ko iá ʻa e kamataʻanga ʻo ha moʻui foʻou mo ha ikuʻanga foʻou ki he fāmili ko ʻení.”

Sēnesi 17:10–14

Naʻe fekauʻaki fēfē ʻa e kamú mo e fuakava ʻa e ʻEikí mo ʻĒpalahamé?

Naʻe fekauʻi ʻe he ʻOtuá ʻa e kau mēmipa tangata kotoa pē ʻo e fale ʻo ʻĒpalahamé ke nau kamu, ko ha fakamanatu ʻo ʻEne fuakava mo ʻĒpalahamé. Kia ʻĒpalahame mo hono fāmilí, naʻe hoko ʻa e ngāue ko ʻení ko ha fakataipe ʻo e fuakava faka-ʻĒpalahamé. Naʻá ne fakafofongaʻi ʻa e līʻoa ki he ʻOtuá mo e mavahe mei he māmaní mo e angahalá. Naʻe ʻikai toe fiemaʻu ke fakahoko ʻa e kamú ko ha fakaʻilonga ʻo e fuakava faka-ʻĒpalahamé hili e ngāue fakafaifekau ʻa Sīsū Kalaisi ʻi he māmaní.

Ako Lahi Ange

Ko e fuakava faka-ʻĒpalahamé

• Russell M. Nelson, “Ko e Fuakava Taʻengatá,” Liahona, ʻOkatopa 2022, 4–11

• “Ko e Fuakava Faka-ʻĒpalahamé,” ʻi he Ngaahi Akonaki ʻa e Kau Palesiteni ʻo e Siasí: Lāsolo M. Nalesoni (2024)

Ko e tohi ʻa ʻĒpalahamé

• Andrew C. Skinner, “The Book of Abraham: A Most Remarkable Gift for Our Time” (digital-only article), Liahona, Jan. 2022, Gospel Library

• Ngaahi Tefitó mo e Ngaahi Fehuʻí, “ʻĒpalahamé, Tohi ʻa,” Gospel Library

• Gospel Topics Essays, “Translation and Historicity of the Book of Abraham,” Gospel Library

Mītiá

Ngaahi Vitiō

Ngaahi ʻĪmisí

Ko Ha ʻĀngelo ʻOkú Ne Fakahaofi ʻa ʻĒpalahame, tā fakatātaaʻi ʻe Del Parson

“Ko ha Fakatātā mei he Tohi ʻa ʻĒpalahamé, Fika 2”

Tamai ʻo e Ngaahi Puleʻangá, tā fakatātaaʻi ʻe Eva Koleva Timothy

Ko e Hā ʻa e ʻEikí kia ʻĒpalahamé, tā fakatātaaʻi ʻe Keith Larson

Melekisēteki—Tauhi ʻo e Fale Tukuʻanga Koloá, tā fakatātaaʻi ʻe Clark Kelley Price

ʻOku Moʻui mo ʻAfio Mai ʻa e ʻOtuá Kiate Au, tā fakatātaaʻi ʻe Elspeth Young

Ngaahi Maʻuʻanga Fakamatalá

1. ʻĒpalahame 1:2.

2. Tokāteline mo e Ngaahi Fuakava 107:40.

3. Vakai, Tokāteline mo e Ngaahi Fuakava 84:14–16; 107:40–52.

4. Vakai, ʻĒpalahame 1:5–7.

5. Tokāteline mo e Ngaahi Fuakava 84:14. Vakai foki, History, 1838–1856 (Manuscript History of the Church), volume E-1, 1708, josephsmithpapers.org.

6. Ngaahi Tefitó mo e Ngaahi Fehuʻí, “ʻĒpalahamé, Tohi ʻa,” Gospel Library.

7. ʻĒpalahame 1:21–24.

8. ʻĒpalahame 1:26.

9. Kuo fakamahamahalo ha niʻihi naʻe ʻikai maʻu ʻe Felo ʻa e totonu ki he lakanga fakataulaʻeikí koeʻuhí ko ha hako ia ʻo Keini ʻo fakafou ʻi ʻIsipitasi, ko e uaifi ʻo Hamí. Ka ʻoku ope atu ʻa e fakakaukau ko ʻení ʻi he meʻa ʻoku akoʻi ʻe he folofolá pea ʻoku ʻikai totonu ke kei hoko atu ʻi he ʻahó ni.

10. Vakai, Ngaahi Tefitó mo e Ngaahi Fehuʻí, “Race and The Church of Jesus Christ of Latter-day Saints,” Gospel Library. Vakai foki, Dallin H. Oaks, “President Oaks Remarks at Worldwide Priesthood Celebration” (address given at the “Be One” celebration, June 1, 2018), newsroom.ChurchofJesusChrist.org.

11. Vakai, Sēnesi 17:5–6; ʻĒpalahame 3:14.

12. Vakai, Kalētia 3:16; “Ko e Fuakava Faka-ʻĒpalahamé,” ʻi he Ngaahi Akonaki ʻa e Kau Palesiteni ʻo e Siasí: Lāsolo M. Nalesoni (2024), Gospel Library.

13. Vakai, Sēnesi 17:8; ʻĒpalahame 2:6.

14. Vakai, ʻĒpalahame 2:9.

15. Vakai, ʻĒpalahame 2:11; 1 Nīfai 15:18.

16. Vakai, Kalētia 3:27–29; ʻĒpalahame 2:10–11; “Ko e Fuakava Faka-ʻĒpalahamé,” ʻi he Ngaahi Akonakí: Lāsolo M. Nalesoni.

17. “Ko e Fuakava Faka-ʻĒpalahamé,” ʻi he Ngaahi Akonakí: Lāsolo M. Nalesoni.

18. Vakai, ʻĒpalahame 2:22–25.

19. Vakai, Sēnesi 20:12.

20. Vakai, Stephen O. Smoot and others, “Did Abraham Lie About His Wife, Sarai?,” BYU Studies Quarterly, vol. 61, no. 4 (2022), 126–28; vakai foki, John Gee, “The Wanderings of Abraham,” ʻi he From Creation to Sinai: The Old Testament through the Lens of the Restoration, ed. Daniel L. Belnap and Aaron P. Schade (2021), 265–66.

21. Vakai, Liliu ʻa Siosefa Sāmita, Sēnesi 14:26, Gospel Library.

22. Vakai, Hepelū 7:1–3; vakai foki, Liliu ʻa Siosefa Sāmitá, Sēnesi 14:27–36, Gospel Library; Fakahinohino ki he Ngaahi Folofolá, “Melekisēteki,” Gospel Library.

23. Vakai, Tokāteline mo e Ngaahi Fuakava 84:14.

24. Liliu ʻa Siosefa Sāmita, Sēnesi 14:34, Gospel Library.

25. Tokāteline mo e Ngaahi Fuakava 107:2–4.

26. Vakai, Sēnesi 15:3–7.

27. Vakai, Sēnesi 15:6.

28. Vakai, Jared T. Parker, “Cutting Covenants,” ʻi he The Gospel of Jesus Christ in the Old Testament, ed. D. Kelly Ogden and others (2009), 114.

29. Sēnesi 15:17.

30. Sēnesi 15:18.

31. Parker, “Cutting Covenants,” 110; Tremper Longman III and Mark L. Strauss, The Baker Expository Dictionary of Biblical Words, entry 1285, page 943 and entry 3772, page 972.

32. Vakai, Parker, “Cutting Covenants,” 110; Shon D. Hopkin, “The Covenant among Covenants: The Abrahamic Covenant and Biblical Covenant Making,” ʻi he Belnap and Schade, From Creation to Sinai, 237–38.

33. Vakai, Michael D. Coogan and others, eds., The New Oxford Annotated Bible: New Revised Standard Version, 5th ed. (2018), 32, note on Genesis 15:9–17; Thomas R. Valletta, “The Captain and the Covenant,” ʻi he The Book of Mormon: Alma, the Testimony of the Word, ed. Monte S. Nyman and Charles D. Tate Jr. (1992), 226–27.

34. Vakai, Parker, “Cutting Covenants,” 114–15.

35. Russell M. Nelson, “Ko e Fuakava Taʻengatá,” Liahona, ʻOkatopa 2022, 11.

36. Vakai, Sēnesi 13:16.

37. Vakai, Sēnesi 16:1.

38. Vakai, Sēnesi 16:1–3. Naʻe muimui e foaki ʻe Sela ʻene kaunanga ko Hekaʻaá kia ʻĒpalahamé ʻi he ngaahi anga fakafonua taufatungamotuʻá ʻi he ngaahi tūkunga ʻo e paʻá (vakai, Camille Fronk Olson, “The Matriarchs: Administrators of Godʻs Covenantal Blessings,” ʻi he Belnap and Schade, From Creation to Sinai, 392–93).

39. Vakai, Tokāteline mo e Ngaahi Fuakava 132:34.

40. Vakai, Sēkope 2:27, 30.

41. Sēkope 2:30. Naʻe folofola ʻa e ʻEikí fekauʻaki mo e mali tokolahi ʻa ʻĒpalahame kia Hekaʻaá, “Naʻe fekau ʻe he ʻOtuá kia ʻĒpalahame, pea naʻe foaki ʻe Sela ʻa Hekaʻā kia ʻĒpalahame ke hoko ko hono uaifi. Pea ko e hā ʻa e ʻuhinga naʻá ne fai ai iá? Koeʻuhí he ko e fonó ia; pea naʻe tupu meia Hekaʻā ʻa e kakai tokolahi. Ko ia, naʻe fakahoko ʻe he meʻá ni ʻa e ngaahi talaʻofá, fakataha mo ha ngaahi meʻa kehe” (Tokāteline mo e Ngaahi Fuakava 132:34).

42. Vakai, Gospel Topics Essays, “Plural Marriage in The Church of Jesus Christ of Latter-day Saints,” Gospel Library.

43. Gospel Topics Essays, “Plural Marriage in Kirtland and Nauvoo,” Gospel Library.

44. Vakai ki he talateu ki he Fanongonongo Fakamafaiʻi 1.

45. Sēnesi 16:4.

46. Ko e foʻi lea faka-Hepelū naʻe fakaʻaongaʻi ke fakamatalaʻi ʻaki e tōʻonga fakakaukau ʻa Hekaʻā kia Selá ʻoku fakahaaʻi ai naʻe siʻisiʻi pe taʻe-mahuʻinga ʻa Sela ki he vakai ʻa Hekaʻaá pe naʻe fehiʻa ʻa Hekaʻā kia Sela (vakai, Longman and Strauss, The Baker Expository Dictionary, entry 7043, page 1014).

47. Vakai, Sēnesi 16:6.

48. Sēnesi 16:6.

49. Vakai, Loma 3:23–26; 2 Nīfai 2:8. Vakai foki, Avram R. Shannon, “Abraham: A Man of Relationships,” ʻi he Belnap and Schade, From Creation to Sinai, 295‒99.

50. Vakai, Sēnesi 16:10–14; 17:1–8, 15–19; ʻĒpalahame 2:8–13.

51. Neongo naʻe hoko ʻa Hekaʻā ko ha fakafofonga maʻa Sela, ka naʻe fakahā ʻe he ʻEikí kia Hekaʻā e hingoa ʻe ui ʻaki ʻa ʻIsimelí, fakataha mo ha talaʻofa ʻe fakatokolahi hono hakó (vakai, Sēnesi 16:10–14). Ko Hekaʻaá ko e taha ia ʻo ha kau fafine tokosiʻi pē ʻi he folofolá naʻa nau maʻu ha fakahā fakalangi ki hono fanauʻi ʻo ʻene tamá (vakai, Sēnesi 16:10–12; vakai foki, Fakamaau 13:2–5; 1 Samuela 1:17, 19–20; Luke 1:26–38). Ko Hekaʻā pē mo Mele naʻe talaange ki ai e hingoa ke fakahingoa ʻaki hona ongo fohá.

52. Bible Dictionary, “Abraham

53. Bible Dictionary, “Sarah or Sarai.”

54. Vakai, Shannon, “Abraham,” 300–301.

55. Russell M. Nelson, “Ko e Fuakava Taʻengatá,” 7.

56. Vakai, Bible Dictionary, “Circumcision.”

57. Vakai, Molonai 8:8.