Wase 5: Vakayagataka na Kaukauwa ni iVola i Momani
“Wase 5: Vakayagataka na Kaukauwa ni iVola i Momani,” Vunautaka na Noqu Kosipeli: E Dua na iDusidusi ena Wasei ni Kosipeli i Jisu Karisito (2023)
“Wase 5,” Vunautaka na Noqu Kosipeli
iVakatakilakila
Jesus Teaching in the Western Hemisphere (Jesus Christ Visits the Americas) E Veivakavulici tiko o Jisu ena Ra ni Vuravura (Na Veisiko nei Jisu Karisito ki Amerika), mai vei John Scott
Wase 5
Vakayagataka na Kaukauwa ni iVola i Momani
Vakasamataka Oqo
E vatuivakadei vakacava ni noda lotu na iVola i Momani?
Na cava na vuna e rui mana kina na iVola i Momani ena cakacaka ni saumaki?
Na cava e vakavulica na iVola i Momani me baleti Jisu Karisito?
Au na rawa ni vakayagataka vakacava na iVola i Momani meu vukei kina kei ira eso tale me keimami toro voleka vua na Kalou?
E sauma vakacava na iVola i Momani na vakatataro ni yaloda?
E rawa vakacava ni au vukei ira na tamata mera wilika ka rawata edua na ivakadinadina ni iVola i Momani?
Na iVola i Momani, ni rau cakacaka vata kei na Yalo, e nomui ivurevure kaukauwa duadua ena saumaki. Na ivola oqo edua na ivolatukutuku makawa tabu, ka volai me vakadinadinataka vei ira na tamata kecega ni o Jisu na Karisito (raica na tabana ni ulutaga). Me vaka e tukuni ena kena ulutaga lailai, na iVola i Momani “edua tale na ivakadinadina kei Jisu Karisito.” E ivakadinadina kaukauwa tale ga ni Kalou a kacivi Josefa Simici me parofita ka a vakalesuya mai vua na kosipeli i Jisu Karisito.
iVakatakilakila
matanikatuba kalove kei na vatu ivakadei
Na iVola i Momani Sa Vatuivakadei ni Noda Lotu
Na parofita o Josefa Simici a vakavulica ni iVola i Momani na “vatu ivakadei ni noda lotu” (ivakamacala taumada ni iVola i Momani). Ena dua tale na gauna a kaya kina: “Ni kau laivi na iVola i Momani kei na ivakatakila kece, sa qai evei beka na noda Lotu? E sa na sega” (Nodra iVakavuvuli na Peresitedi ni Lotu: Josefa Simici [2007], 196).
Na icurucuru kalove edua na ibulibuli kaukauwa ka caka mai na veitikina kola ka ra veiraviti vakai ira. Na tikina e lomadonu, se vatu ivakadei, e dau levu cake mai na veitikina tale eso ka dau tauri ira vata tu na vo ni veitikina kece.
O Peresitedi Ezra Taft Benson e kaya, ni iVola i Momani e vatu ivakadei ni noda lotu ke lailai sara, ena tolu na sala:
Vakadinadinataki Karisito. Na iVola i Momani e vatu ivakadei ena noda vakadinadinataki Jisu Karisito, ka sai Koya na vatu ivakadei ni veika kece eda cakava. E vakadinadinataka vakaukauwa ka vaka matata sara ni bula dina tiko o Koya.”
Na Taucoko ni iVunau. “Na Turaga vakai Koya e kaya ni tiko ena iVola i Momani na ‘taucoko ni kosipeli i Jisu Karisito’ [Vunau kei na Veiyalayalati 20:9; 27:5]. … Ena iVola i Momani eda na kunea kina na taucoko ni [ivunau] ka gadrevi meda na vakabulai kina. Ka [sa] vakavulici vakamatatata ka vakarawarawa, ka rawa kina vei ira mada ga na gone mera vulica na sala ni Nona veivakabulai kei na bula vakacerecerei na Kalou.”
Yavu ni ivakadinadina. “Me vaka ga ni na kasura na icurucuru rauni kevaka e kautani na vatuivakadei, sa na kasura vakakina na veika kece e tutaka na Lotu me baleta na dina ni iVola i Momani. … Kevaka me dina na iVola i Momani … e dodonu meda na ciqoma na dina ni Veivakalesui Mai.” (Nodra iVakavuvuli na Peresitedi ni Lotu: Ezra Taft Benson [2014], 129, 131, 128.)
Eda noda rawata edua na ivakadinadina ni iVola i Momani e vosa ni Kalou, eda na rawa ni kila kina ni ko Josefa Simici e a parofita. Ena vukuna, e a vakalesui tale mai kina na lewa ni matabete ni Kalou mai vei ira na italai vakalomalagi. Na Kalou a vakadonuya tale ga vei Josefa me tauyavutaka na Lotu i Jisu Karisito. E tomani tiko nikua na ivakatakila mai vei ira na parofita bula.
iVakatakilakila
wili ivolanikalou tiko na cauravou
Na iVola i Momani e Gadrevi ki na Saumaki ni Tamata Yadua
Edua na tiki bibi ni saumaki sai koya na ciqomi ni dua na ivakadinadina, ni dina na iVola i Momani, ena kaukauwa ni Yalo Tabu. Ni ko wilika ka vulica ena yalodina, o na vakila ni vakalevutaka na yalomu kei na yagomu na vosa era volai kina. Na vosa era volai kina ena vakararamataka na nomu kila-ka me baleta na bula, ituvatuva ni Kalou, kei na veika baleti Jisu Karisito (raica na Alama 32:28). Masulaka na ivola ena yalomu taucoko kei na vakabauta na Karisito. Ni ko cakava vakakina, o na ciqoma edua na ivakadinadina mai vua na Yalo Tabu ni sa vosa na Kalou (raica na Moronai 10:4–5).
Na nomu ivakadinadina vakataki iko ni iVola i Momani, ena rawa ni veimuataki ki na dua na vakabauta e titobu ka dei ena kena kaukauwa, me vukei ira na tani mera saumaki mai. Vukei ira na tamata o vakavulica mera kila na veivakararamataki era vakila, ni ira wilika ena yalodina. Vakabibitaka na kaukauwa ni kena vakadinadinataki Jisu Karisito. Vakauqeti ira mera masulaka mera ciqoma e dua na nodra ivakadinadina vakataki ira, ni dina na iVola.
Na nodra vakauqeti na tamata mera vakasaqara edua na ivakadinadina mai vua na Yalo Tabu me baleta na iVola i Momani, e dodonu me uto ni nomu vakanamata ni nomu veivakavulici. Na iVola i Momani e rawa ni veisautaka vakadua na nodra bula me tawamudu.
Vakayagataka na iVola i Momani me Vakavulici Kina na kosipeli i Jisu Karisito
Na parofita o Josefa Simici a kaya, “Na iVola i Momani [e] ivola dodonu duadua mai na dua tale na ivola e vuravura” (ivakamacala taumada ni iVola i Momani). E vakadinadinataki Karisito ka vakavulica vakamatata na Nona ivunau (raica na 2 Nifai 31; 32:1–6; 3 Nifai 11:31–39; 27:13–22). E vakatavulica na taucoko ni Nona kosipeli. Na imatai ni ivakavuvuli kei na cakacaka vakalotu ni kosipeli me vaka e vakavulici ena iVola i Momani, era sala ki na bula ni rawa ka vakalevu.
Vakayagataka na iVola i Momani me nomu ivurevure levu duadua ni vakavulica na kosipeli vakalesui mai. Na ivolakabi ka toka e ra era volai tiko kina eso vei ira na dina ena iVola i Momani mo na vakavulica.
Lesoni ni Daukaulotu ena Wase e 3
iVunau
iVurevure
Lesoni ni Daukaulotu ena Wase e 3
Na iTukutuku ni Kosipeli Vakalesui Mai i Jisu Karisito
iVunau
Na ituvaki ni Kalou, na ilesilesi kei na Veisorovaki ni iVakabula, na lutu tani, Veivakalesui mai, Josefa Simici, lewa ni matabete
Na uto ni inaki ni iVola i Momani sai koya me vakadinadinataki Jisu Karisito. E vakatakila na dina ni Nona bula, ilesilesi, tucake tale, kei na Nona kaukauwa. E vakatavulica na ivunau dina me baleti Karisito kei na Nona Veisorovaki.
E vica na parofita ka maroroi tu na nodra volavola ena iVola i Momani era a raici Karisito e matanavotu. O tuakai Jereti, Nifai, kei Jekope eratou a raici Karisito ni se bula vakayalo. Era lewe levu sara era a tiko ena gauna ni Nona veiqaravi na iVakabula ena kedra maliwa na Nifaiti (raica na 3 Nifai 11–28). E muri, erau a qai raica na Karisito sa tucake tale, o Momani kei Moronai (raica na Momani 1:15; Ica 12:39).
Ni ra wilika ka masulaka na iVola i Momani na tamata, era na yaco me kila vakavinaka cake na iVakabula ka vakila na Nona loloma. Era na tubu ena nodra ivakadinadina me baleti Koya. Era na kila na sala mera lako mai kina ki Vua ka vakabulai. (Raica na 1 Nifai 15:14–15.)
iVakatakilakila
Peresitedi Russell M. Nelson
“Na iVola i Momani e vakarautaka na kilaka taucoko ka vakadonui duadua ni Veisorovaki i Jisu Karisito e rawa ni kunei ena veivanua cava ga. E vakavuvulitaka na ibalebale dina ni sucu tale. … Eda kila na vuna eda tiko kina qo e vuravura. Oqo kei na veidina tale eso era mana ka vakauqeti vakaukauwa cake ena iVola i Momani mai na dua tale na ivola. Na mana taucoko ni kosipeli i Jisu Karisito e tu ena iVola i Momani. ” (Russell M. Nelson, “Na iVola i Momani: Ena Vakaevei Beka Na Nomu Bula Kevaka e Sega?” Liaona, Nove. 2017, 62).
Vuli Yadudua
Ena gauna taucoko ni nomu kaulotu, vola na isau ni veitaro e ra ena nomu ivolanivuli ni veisiga:
Na cava o sa bau vulica me baleti Jisu Karisito mai na nomu vulica na iVola i Momani?
Sa vakayaco ka beka vakacava ki na nomu vakadinadinataki Jisu Karisito, na nomu vulica na iVola iMomani?
Ena rawa ni ko vakayagataka vakacava na iVola i Momani, mo vukei ira kina na tamata mera vaqaqacotaka na nodra ivakadinadina?
Vulici ni iVolanikalou
Na cava era tukuna na parofita ni iVola i Momani e vakavuna na nodra vola na nodra ivolatukutuku?
Na iVola i Momani e volai “me vakadinadinataka vei ira na [tamata kecega] ni o Jisu na Karisito” (tabana ni ulutaga ni iVola i Momani). Na ituvatuva e ra, e volai tiko kina eso na iwase ni iVola i Momani ka ra vakadinadinataka na bula, ivakavuvuli, kei na veiqaravi i Jisu Karisito. Digitaka na veitikina mo vulica ena gauna taucoko ni nomu kaulotu.
Me kena ikuri, vakasamataka na nodra gagadre na tamata o vakavulica tiko. Cakava na ituvatuva mo wilika vata kei ira eso na veitikina oqo, me vaqaqacotaka na nodra kila kei na nodra vakadinadinataka na iVakabula.
E sureti ira kecega na tamata o Moronai me ra lako mai vei Karisito ka vakataucokotaki Vua.
Na iVola i Momani e Vukei Keda meda Toro Voleka vua na Kalou
E a kaya na parofita ko Josefa Simici me baleta na ivola oqo “ni na toro voleka cake vua na Kalou e dua na [tagane se yalewa] ena nona muria na kena ivakavuvuli, mai na dua tale na ivola”(ivakamacala taumada ni iVola i Momani). Mai na kena dau vakavulici ka sureti na tamata mera bulataka na ivakavuvuli ni iVola i Momani, o vukei ira tiko mera taracake na vakabauti Jisu Karisito ka toro voleka vua na Kalou.
Na iVola i Momani e tara cake na ivakadinadina, ka sureta na ivakatakila ki na tamata yadua. Vakayagataka na iVola i Momani me vukei ira na tamata mera vakila na veika vakayalo, vakabibi na ivakadinadina mai vua na Yalo Tabu ni ivola vakataki koya e vosa ni Kalou.
Dau vakaliuca na veitikina mai na iVola i Momani ni ko veivakavulici. Era tiko kina na kaukauwa me saumaka na tamata, mai vua na Yalo Tabu. Ni ko vakavulica na kosipeli ena vakayagataki ni iVola i Momani, na nomu veivakavulici ena kaukauwa ka matata ki na yalo kei na vakasama.
O Peresitedi Gordon B. Hinckley a vakavulica ni “o ira era sa wilika oti na [iVola i Momani] ena masumasu, se ra vutuniyau se dravudravua, vuli se tawavuli, era na tubu ena kena kaukauwa.” A vakavulica talega:
“E sega ni vakataratutu ni au yalataka oqo vei iko ni kevaka ko masulaka nomu wilika na iVola i Momani, veitalia mada ga na nomu sa wilika oti vakavica, ena vakaikuritaki nai votavota ni Yalo ni Turaga ki na nomu bula. Ena basika mai e dua na navunavuci qaqaco mo lako voli ena talairawarawa ki na nona ivakaro, ka na basika mai e dua na ivakadinadina e kaukauwa cake me baleta ni bula vakaidina tiko na Luve ni Kalou” (The Power of the Book of Mormon,” Ensign, June 1988, 6).
iVakatakilakila
wili ivolanikalou tiko na daukaulotu
Na iVola i Momani ena Sauma na Vakatataro ni Yalo
Na wiliki ni iVola i Momani ena veituberi ni Yalo, ena rawa ni vukei ira na Tamata mera kunea na isau ni taro se veivakararamataki ki na nodra veitaro yadua—se vakatataro ni yalo. Vukei ira na tamata mera raica na sala e sauma kina na vakatataro ni bula na iVola i Momani.
Eso vei ira na taro oqo era volai toka e ra, vata kei na ivurevure mai na iVola i Momani ka ra saumi kina.
“E dodonu mera kila na daukaulotu na sala ni kena vakayagataki na iVola i Momani me saumi kina na nodra taro vakai ira, me rawa vei ira me vukei ira vakavinaka na tani mera vakayacora vakakina. … E dodonu mera kila vakavinaka na kaukauwa ni iVola i Momani ena vakavulici ni kosipeli vakalesui mai, taumada ena nodra vakayagataka na nodra bula vakataki ira, ka qai wasea vata kei ira era vakavulica tiko” (Dallin H. Oaks, “Counsel for Mission Leaders,” seminar for new mission leaders, June 25, 2022).
Vuli Yadua se Vuli Vata Vakaitokani
Vola na vakatataro ni yalo ka tiko vei iko se o koya o rogoca mai vei ira na tale eso. Vaqara na veitikina mai na iVola i Momani e saumi kina na veitaro oqo. Vola na veivakararamataki kei na ivurevure mai na iVola i Momani ena nomu ivolanivuli ni veisiga. Vakayagataki ira ni ko veivakavulici.
Erau Veitokoni na iVola i Momani kei na iVola Tabu
Na Turaga a tukuna “vunautaka yani na ivakavuvuli ni noqu kosipeli, sa tabaki tu ena i Vola Tabu kei na i Vola i Momani, ka sa tu kina na taucoko ni kosipeli” (Vunau kei na Veiyalayalati 42:12). O ira na Yalododonu Edaidai era “vakabauta ni sa vosa ni Kalou na iVolaTabu, kevaka sa vakadewataki vakadodonu” (Na Yavu ni Vakabauta 1:8; raica talega na 1 Nephi 13:29). Na iVola Tabu e ivolanikalou tabu. Na iVola i Momani e itokani ni ivolanikalou tabu ka tiko kina na taucoko ni kosipeli i Jisu Karisito.
Na iVola Tabu kei na iVola i Momani erau veirogorogoci ka veivukei vakairau (raica na Isikeli 37:16–17; 1 Nifaii 13:40; Mormon 7:8–9). Oi rau na ivolanikalou oqo, erau ivakasokumuni ni ivakavuvuli ka a volai mai vei ira na parofita ni gauna makawa. Na iVola Tabu e tukuna na Nona veitaratara na Kalou kei ira na tamata ena Tokalau ni Vuravura, ena vica vata na udolu na yabaki. Na iVola i Momani e tukuna na Nona veitaratara na Kalou kei ira na tamata e Amerika makawa, ena sivia na udolu na yabaki.
iVakatakilakila
tamata e makataka tiko na ivolanikalou
Ka bibi duadua, sai koya ni iVola Tabu kei na iVola i Momani erau duavata ena vakadinadinataki Jisu Karisito. Na iVola Tabu e tukuna na sucu ni iVakabula, veiqaravi e vuravura, kei na Veisorovaki—oka kina Nona mate kei na Tucake tale. Na iVola i Momani e tukuna na parofisai ni sucu kei na ilesilesi ni iVakabula, ivakavuvuli me baleta na Veisorovaki, kei na itukutuku ni Nona veiqaravi e Amerika. Na iVola i Momani e vakadeitaka ka tomana na ivakadinadina ni iVola Tabu, ni ko Jisu e Luvena Duabau ga na Kalou ka Vakatuburi, ka iVakabula kei vuravura.
Na iVola Tabu kei na iVola i Momani erau vakavulica ruarua na lawa ni ivakadinadina: “Ena vakadinadinataki na vosa kecega ena gusu ni vakadinadina e lewe rua, se lewe tolu” (2 Korinica 13:2–1; raica tale ga na 2 Nifai 11:2–3). Me tokona na lawa oqo, o irau ruarua na ivolanikalou oqo erau vakadinadinataki Jisu Karisito (raica na 2 Nifai 29:8).
Vuli Yadua se Vuli Vata Vakaitokani
Vaqara na ivurevure digitaki ena veiulutaga oqo ena iVola i Momani kei na iVola Tabu. Na ivakaraitaki era tiko e loma ni kovukovu tarava na ulutaga. Vakuria kina na nomu ulutaga kei na veitikina eso.
Vukei Ira na Tamata Mera Wilika ka Kila Vakavinaka na iVola i Momani
O ira era sega ni wilika se kila vakavinaka na iVola i Momani, ena dredre na nodra ciqoma edua na kena ivakadinadina ni dina. Ena rawa ni ko vukei ira mera kila vakavinaka na ivola, ni ko wilika vata kei ira. Wilika ena gauna ni veivakavulici, ena gauna e talemuri kina na veisiko, se ena vakayagataki ni tekinolaji. E rawa tale ga ni o kerea vei ira na lewenilotu mera wiliwili vata kei ira. Na saravi ni dua na vidio ni iVola i Momani kei na wilika ni iwase e salavata, e rawa ni veivuke sara vakalevu.
Masuta na veivuke ni ko digitaka na veitikina e tukuni kina na nodra kauwai kei na nodra gagadre na tamata. Wilika ka veivosakitaka na veitikina leleka, me vaka na 1 Nifai 3:7 se Mosaia 2:17. Wilika ka veivosakitaka tale ga na veitikina balavu se dua taucoko na wase, me vaka na 2 Nifai 31, Alama 7, se 3 Nifai 18. Vakauqeti ira na tamata mera wilika na iVola i Momani mai na kena itekivu, oka kina na nodratou ivakadinadina na Tolu na Walu na iVakadinaina kei na ivakadinadina i Josefa Simici na Parofita.
iVakatakilakila
kalasi ni matawilivola ni siga Tabu
Vakasamataka na veivakatutu oqo ni ko wilika vata kei ira na tamata na iVola i Momani:
Masu ni bera na wiliwili. Kerea na veivuke me kilai vakavinaka na ivola. Masulaka me vakadinadinataka vei ira na Yalo Tabu ni dina.
Veivukevuke ena wiliwili. Wiliwili ena totolo era logaloga vinaka kina. Vakamacalataka na vosa se malanivosa era sega ni matata.
Dau cegu vagauna ka veivosakitaka na ka e wiliki tiko.
Vakamacalataka na itukutuku veisemati eso baleta na tikina oqo, me vaka o cei e vosa tiko, e mataqali tamata vakacava o koya, ka vakacava tu na ituvaki. Ke tiko edua na kena vidio, nanuma me na saravi.
Dusimaka na itukutuku se ivunau bibi mena kunei.
Wasea na nomu ivakadinadina kei na raititobu, veika e vakilai, kei na veika o sotava ka veiganiti.
Vakavulica na ivunau, vakadodonu sara ga mai na nodra vosa na parofita ni iVola i Momani. Oqo ena vukea mera vakila na tamata na kaukauwa vakayalo ni iVola i Momani.
Vukei ira na tamata mera “vakatautauvatataka” na ka era wilika ki na nodra bula (1 Nifai 19:23). Vukei ira mera raica na sala e yaga kina vei ira vakayadua na ivolanikalou.
Ni ko vakayagataki ira na ivakavuvuli oqo, o na vukei ira na tamata mera rawata ka gadreva me wilika na iVola i Momani vakataki ira. Vakabibibitaka ni kena wiliki na iVola i Momani e veisiga e idola ki na papitaiso kei na saumaki ena bula taucoko.
Vakararavi ki na yalayala ena Moronai 10:3–5. Vakauqeti ira na tamata mera wilika na iVola i Momani ena yalodina ka masu ena gagadre dina mera kila ni sa dina. Vakamacalataka ni gagadre dina, e kena ibalebale na lomarawarawa me cakacakataki na isau ni masu sa ciqomi mai vua na Yalo Tabu. Na tamata yadua e wilika ka masulaka ena gagadre dina na iVola i Momani, ena rawa ni kila ni dina ena kaukauwa ni Yalo Tabu.
E dodonu tale ga mo dau nanuma e veigauna na yalayala oqo me vaqaqacotaki kina na nomu ivakadinadina ni iVola i Momani. Na nomu ivakadinadina ena solia vei iko na lomadei, ni ko ira era vakayagataka na yalayala oqo era na ciqoma edua na ivakadinadina ni ivola oqo e vosa ni Kalou.
Vakatutu ni Vuli kei na kena Bulataki
Vuli Yadudua
Wilika na 2 Nifai 2; 9; 30; 31; 32. Makataka na vanua e cavuti kina o Jisu Karisito. Vola edua na lisi ni yaca kei na itutu duidui i Karisito ena vei iwase oqo. Makataka na vosa e vosataka. Makataka na Nona itovo ni bula kei na ivalavala.
Ni ko wiliwili e veisiga mai na iVola i Momani, vola ena nomu ivolanivuli ni veisiga na veitikina ka vakaibalebale vakalevu vei iko. Vola na sala o na bulataki ira kina ena nomu bula.
Vola ena nomu ivolanivuli ni veisiga na ka o a vakila ni ko a ciqoma ena imatai ni gauna edua na ivakadinadina vakayalo ni dina na iVola i momani.
Vola na taro e tolu ka toka e ra ena nomu ivolanivuli ni veisiga. Ena gauna taucoko ni nomu kaulotu, tomana na isau ni taro ki na veitaro oqo.
Matai, ena vakaivei beka na noqu bula kevaka e sega na iVola i Momani?
Na cava beka au na sega ni kila kevaka e sega na iVola i Momani?
Na cava beka ena sega ni tiko vei au kevaka e sega na iVola i Momani?
Wilika na i Vunau mai na Ulunivanua ena Maciu 5–7 kei na i vunau i Karisito ena valetabu ena 3 Nifai 12–14. E vukei iko vakacava na nomu wiliki rau vata mo kila vakavinaka cake kina nai vakavuvuli ni iVakabula?
Vulica na veigauna yadua e tukuni kina ni masu tiko edua ena iVola i Momani. Ena nomu ivolanivuli ni veisiga, vola kina na ka o vulica mai na iVola i Momani me baleta na masu.
Mai na ulutaga ni wase ni Mosaia 11–16, vola edua na ivakalekaleka ni cava a vakatavulica o Apinatai. Qai wilika na veiwase oqo ka vakuria na nomu ivakalekaleka ni tukutuku.
Ma i na ulutaga ni wase ni Mosaia 2–5, vola edua na ivakalekaleka ni cava a vakatavulica o Tui Penijamini. Qai wilika na veiwase oqo ka vakuria na nomu ivakalekaleka ni tukutuku.
Vuli Vakaitokani kei na Veisau ni iTokani
Wilika vata na veitikina eso mai na iVola i Momani. Wasea na veika o vulica kei na veika o vakila. Veivosakitaka na sala me vakayagataki kina ena nomudrau bula.
Wilika vata na Alama 26 kei na 29. Wasea na nomu nanuma me baleta na nomu veiqaravi vakadaukaulotu. Vola na nomu nanuma ena nomu ivolanivuli ni veisiga.
Wilika na Alama 37:9 ka veivosakitaka na kena bibi nai ivolanikalou vei Amoni kei iratou na nona itokani daukaulotu. Vakaraica na ivurevure eso e vakamacalataka na sala eratou vakayagataka kina na ivolanikalou.
Wilika na Alama 11–14, me qai dua veikemudrau me taura na itutu nei Alama se o Amuleki kei na dua me taura na itutu ni dauveivakalialiai. Veivosakitaka na sala erau a sauma kina na veitaro dredre eso na daukaulotu.
Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu
Vakatovotovotaka na vakayagataki ni iVola i Momani ena veisala yadua ka tukuni tiko ena iulutaga levu ni iwase oqo.
Vola na veitaro eso era dau taroga o ira o vakavulica tiko. Ni dui vakamacalataka na sala o ni na sauma kina na veitaro oqo, ni vakayagataki na iVola i Momani.
Wilika vata na veitikina eso mai na iVola i Momani. Veiwaseitaka na kila, veika e vakilai, kei na ivakadinadina.
Vakatovotovotaka na vakayagataki ni iVola i Momani me vakadeitaka na itukutuku ni Veivakalesui Mai.
Sureti ira na daukaulotu mera wasea na veika era sa sotava ka sa vukei ira kina, kei ira era sa vakavulica oti na iVola i Momani ena cakacaka ni saumaki.
Mera wasea na daukaulotu edua na tikinivola taleitaki mai na iVola i Momani ka vukea me sauma edua na taro ni yalo.
Sureta edua na lewenilotu ka a saumaki mai me wasea na itavi ni iVola i Momani ena nona saumaki.
Liuliu ni Tabana ni Kaulotu kei na Vukevuke ni Liuliu ni Tabana ni Kaulotu
Vakavulici ira na daukaulotu mera vakatovotovotaka na vakayagataki ni iVola i Momani me vakadeitaka na dina ni itukutuku ni Veivakalesui Mai.
Wilika na 1 Nifai 1 vata kei ira na daukaulotu ka vakatautauvatataka kei na ka a sotava o Josefa Simici.
Vakarautaka vei ira na daukaulotu edua na ilavelave waqapepa vou ni iVola i Momani. Sureti ira mera wilika ka makataka na ivola, vakarua ena loma ni ikarua se ikatolu nodra veitosoyaki ka tarava.
Ena imatai ni wiliwili, kerei ira mera makataka na veika kece e dusi Jisu Karisito se vakadinadinataki Koya.
Ena ikarua ni wiliwili, kerei ira mera makataka na ivunau kei na veiivakavuvuli ni kosipeli.
Mera qai wasea na daukaulotu na veika era sa vulica ka vakila. A vakamacalataka o Elder Ronald A. Rasband na sala a vakayaco ka vakalevu sara kina vua vaka dua na daukaulotu, na wiliki vakaoqo ni iVola i Momani:
iVakatakilakila
Elder Ronald A. Rasband
“E levu cake sara na ka ena noqu wiliwili mai na kena makataki walega na ivolanikalou. Ena wiliwili yadua ni iVola i Momani, mai liu yaco imuri, au a vakasinaiti ena loloma cecere vua na Turaga. Au a vakila e dua na ivakadinadina bula titobu me baleta na dina ni Nona ivakavuvuli kei na kena yaga ena ‘siga oqo.’ Na ivola oqo erau veiganiti vinaka sara kei na yacana, ‘E Dua Tale na iVakadinadina kei Jisu Karisito.’ Ena vuli oya kei na ivakadinadina bula vakayalo a ciqomi, sa yaco meu dua na daukaulotu ni iVola i Momani ka tisaipeli i Jisu Karisito” (“Na Siga Oqo,” Liaona, Nove. 2022, 25).
Sureti ira na daukaulotu mera wasea vata kei iko na vei tiki ni ivolanikalou mai na iVola i Momani ka bibi ena nodra bula.
Vakaraica na nodra vakatataro ni yalo na tamata ena nomu tabana ni kaulotu. Sureti ira na daukaulotu mera kunea na veitikina mai na iVola i Momani ka sauma na veitaro oqo.