iVakadinadina ni Parofita ko Josefa Simici
    Footnotes

    Na iVakadinadina ni Parofita ko Josefa Simici

    Sa vakaoqo na nona vosa na Parofita ko Josefa Simici me baleta na kena lako mai na iVola i Momani:

    “Ena yakavi ni ika ruasagavulu kadua ni Sepiteba [1823] … au sa tekivu masu ka vakatakekere vua na Kalou Kaukauwa. …

    “Ia niu sa masu tiko ga vua na Kalou, au sa raica e dua na rarama ni sa basika mai ki na loma ni noqu rumu, a sa rarama cake tiko ga me yacova ni sa uasivia na rarama ena sigalevu tutu, ena gauna au raica kina vakasauri e dua na tamata ena yasa ni noqu idavodavo, e tu voli ga e maliwa lala, ni sega ni tara na yavana na buturara ni vale.

    “Sa vakaisulu tu ena dua na icurucuru balavu ka sa vakasakiti sara na kena vulavula. Na kena vulavula sa uasivia na veika vulavula kecega au sa raica oti e vuravura; au sega talega ni vakabauta ni rawa ni dua na ka vakavuravura e caka me uasivia na kena vulavula kei na kena uasivi. E sega ni vakaisulu na qeteqete ni ligana, kei na tolo ni ligana, me sivia vakalailai na nona ilabeniika; sa vakatalega kina na yavana, ena dela ni nona qurulasawa. E sega talega ni vakasulumi na uluna kei na domona. Au raica rawa talega ni sega tale ni dua na isulu e daramaka tu ia na icurucuru balavu ga oqo, me vaka ni tadola tu, ka rawa niu raica yani na lomaserena.

    “E sega walega ni uasivi sara na vulavula ni nona icurucuru balavu, ia na kena ivatuka kece sara ga e sega ni vakamacalataki rawa na kena lagilagi, ia na kena irairai sa vaka na tibi ni liva. Sa rarama sara na loma ni rumu, ia sa sega ni vaka na kena iserau kei na iserau ni vanua e tu kina. Ena imatai ni gauna au raici koya yani kina, au a rere; ia e sega ni dede sa seyavu yani na rere oqori.

    “A kacivi au ena yacaqu, ka kaya vei au ni sa italai mai na iserau ni Kalou ki vei au, ka yacana ko Moronai; ni sa digitaki au na Kalou me’u qarava e dua na cakacaka; a kaya ni na rogo na yacaqu vei ira na veimatanitu, veimataqali kei na duivosavosa; e so era na taleitaka, ka so era na vosacataka.

    “E mai kaya ni sa maroroi tu e dua na ivola, ka volai ena peleti koula, ka tukuni kina na kedra itukutuku o ira era a tawana tu e liu na vanua oqo, kei na vanua era vu mai kina. E kaya tale ga ni sa tu ena ivola ko ya na taucoko ni Kosipeli tawamudu, me vaka a solia na iVakabula vei ira era a tawana tu e liu na vanua oqo.

    “Ka vakakina, ni sa maroroi vata tu kei na rua na vatu ena vucu siliva—ia na vatu e rua oqo, ka rau qasoti ki na dua na peleti ni sere, sai koya na ka sa vakatokai me Urimi kei na Cumimi—sa maroroi vata tu kei na peleti; ia na kena taukeni ka vakayagataki na vatu oqo sai koya sa vakatokai me ‘daurairai’ ena veigauna e liu; ka sa vakarautaka na Kalou me baleta na kena vakadewataki na ivola. …

    “A tukuna tale vei au, ni ena gauna au sa na taura kina na peleti oqori e mai tukuna tiko—ni se bera ni yaco mai na gauna me na tauri kina—meu na kakua sara ni vakaraitaka vua e dua tale na tamata; me kua talega na peleti ni sere kei na Urimi kei na Cumimi; ia vei ira ga ena vakaroti vei au meu vakaraitaka vei ira; kevaka e sega au na vakarusai. Ni keirau veivosaki tiko me baleta na peleti, a dolavi ki na noqu vakasama na raivotu kau raica na vanua e maroroi tu kina na peleti, e matata ka makare vinaka sara kau na kila na vanua oqori kevaka au na sikova.

    “Ni sa tinia na nona itukutuku, sa tekivu seyavu mai na rarama e loma ni vale, ka sa la’ki vakavolivoliti koya ga na italai a vosa tiko vei au; a sa vakatiko ga kina me yacova ni sa butobuto taucoko na loma ni vale, ka sa rarama duadua ga ko koya; sa qai dodo vakasauri cake ki lomalagi e dua na sala, sa lako cake kina ko koya me yacova ni sa yali yani vakadua, raica sa mai vakatale tu ga yani na kena irairai ena gauna e se bera ni rairai mai kina na rarama vakalomalagi oqo na noqu rumu.

    “Au davo koto ga ka vakasamataka na matata vinaka ni veika au a raica, ka’u sa vakasakita vakaidina na veika sa mai tukuna vei au na italai veivakurabuitaki oqo; ena noqu vakanananu tiko oqori, au kurabui vakalevu dina ni’u raica ni sa tekivu rarama tale mai na loma ni noqu rumu, ka sega ni dede sa tu tale ena yasa ni noqu idavodavo na italai mai lomalagi.

    “A tekivu tukutuku, ka taleva lesu tale na veika vata ga a tukuna ena imatai ni nona veisiko mai, e sega sara ga na ka e duidui kina; ia ni sa oti, a qai tukuna ni na cudruvi sara ko vuravura, ka na lala mai ena vuku ni dausiga, na iseleiwau, kei na mate dauveitauvi; ia ena yaco na lewa veivakararawataki vei ira na itabatamata ga oqo. Ni sa tukuna oti na veika oqo, sa qai cabe cake tale me vaka a vakayacora e liu.

    “Ena gauna oqo, sa yavalati sara vakalevu na noqu vakasama, ka dredre kina me’u moce, au sa mani davo koto ga ka luvuci au na kurabui ena veika au sa raica ka rogoca. Ia sa qai toro cake ga na noqu kurabui ni’u raica ni sa tu tale ena yasa ni noqu imocemoce na italai vata ga oqo, ka’u rogoca na nona taleva ka tokaruataka tale vei au na veika vata ga me vaka e liu; a vakuria ena dua na ivakasala vei au, ka tukuna ni na tovolea ko Setani me temaki au (me vaka na ituvaki dravudravua ni matavuvale nei tamaqu), meu taura na peleti meu vutuniyau kina. E vakatabuya sara vei au na ka oqo, ka kaya meu kakua ni nanuma e dua tale na ka ena vuku ni peleti ia meu vakalagilagia ga kina na Kalou, ka me’u kakua ni vakauqeti ena dua tale na inaki, ia na tarai cake ga ni nona matanitu; kevaka e sega au na sega ni taura.

    “Ni sa oti na ikatolu ni nona rairai mai, sa lesu cake tale ki lomalagi me vaka e liu, ka’u sa mai biu tale koto me’u vakananuma na ka levu ka veivakurabuitaki au se qai sotava oti; ia e sa qai cabe ga na italai mai lomalagi ena ikatolu ni gauna mai vei au, sa tagi na toa, ka’u kila ni sa voleka ni kida na mataka, kena ibalebale oqo, ni voleka ni taura na bogi taucoko ko ya na neirau veivosaki tiko.

    “Oti ga vakalailai au sa duri mai, ka tekivu qarava na itavi e dodonu me’u dau qarava ena veisiga me vaka na kena ivakarau; ia, ni’u laki tovolea me’u cakacaka me vaka ena veigauna kecega, sa sega ni rawa ni sa wawale vakalevu sara na yagoqu ka sega ni rawa ni’u cakacaka. Keirau a cakacaka vata tiko kei tamaqu, ka sa siqema rawa ko koya ni dua na ka e sa manati au, ka tukuna me’u lesu tale ki vale. Au sa lako ka noqu inaki me’u lesu tale ki vale; ia, ni’u tovolea meu kosova na bai ni vanua keirau cakacaka tiko kina, sa malumalumu sara na yagoqu, au a bale sobu ki na qele ka lecai yaloqu sara koto.

    “Na imatai ni ka au vakila mai ni vaka me vosa tiko e dua na domo ni tamata, ka cavuta mai na yacaqu. Au rai cake yani, ka raica na italai vata ga oqo ni tucake donuya tu na uluqu, ka vakavolivoliti koya na rarama me vaka e liu. A baci tukuna taucoko tale vei au na veika a sa tukuna mada vei au ena bogi, ka qai vakaroti au me’u lesu vei tamaqu ka tukuna vua na raivotu kei na ivakaro sa soli vei au.

    “Au a muria na nona ivakaro; ka lesu vei tamaqu ki na were, ka’u tukuna vua na veika kece. A kaya vei au ko koya ni oqori na veika va-Kalou, ka tukuna me’u lako ka kitaka me vaka sa vakaroti au kina na italai. Au biuta na were, ka lako ki na vanua a tukuna vei au na italai ni maroroi tu kina na peleti; ia me vaka na matata vinaka ni raivotu au a raica, au a kila na vanua ko ya ena gauna ga au yacova yani kina.

    “Ena yasa ni koro ko Menijesita, ena yasayasa vaka-Onitario mai Niu Ioka, e tu kina e dua na ulunivanua levu toka, oqo na ulunivanua cecere duadua ena vanua ko ya. Ena ra ni ulunivanua oqo, sega ni yawa mai delana, ena ruku ni dua na vatu levu, era tu kina na peleti, e tawa tu ena dua na kato vatu. E vavaku na vatu oqo ka rodu cake e loma donu, ka qai mamare sobu na batina, o koya sa votu tu mai kina e dela ni qele na kena loma donu ka tabulu tu na batibatina.

    “Ni’u sa qeva tani rawa na qele, au qai taura e dua na kau, vakaciqira e ruku ni vatu ka tulega cake. Au iro yani ki loma ni kato ka raica ni sa tu dina kina na peleti, na Urimi kei na Cumimi, kei na peleti ni sere, me vaka a tukuna vei au na italai. Na kato era tawa tu kina e caka ena kena kabiri vata na vatu ena dua na mataqali simede. Ena boto ni kato e rau davo vakababa koto kina e rua na vatu, ka ra qai dabe yani e deladrau na vatu oqori na peleti kei na veika tale eso.

    “Au sa segata sara me’u taura, qai vakatabui au ko koya na italai, a kaya tale vei au ni se bera mai na gauna me na tauri kina, ena sega tiko ni yaco mai, me yacova ni sa oti e va na yabaki mai na siga ko ya; ia e tukuna vei au me’u na lako tale mai ki kea ni oti e rauta ni dua na yabaki mai na gauna ko ya, me keirau na mai sota kina, ia me’u na dau vakayacora tiko vakakina me yacova na gauna me sa na tauri kina na peleti.

    “Me vaka, na ivakaro sa soli vei au, au dau lako ena mua ni veiyabaki, ena veigauna yadua oqori au dau raica e kea na italai vata oqo, kau sa dau vakasalataki ka vakavukui ena neirau veitalanoa yadua, me baleta na veika ena vakayacora na Turaga, ka vakakina na sala kei na iwalewale cava me na cicivaki kina na nona matanitu ena veisiga mai muri. …

    “Ni sa toso tiko na gauna ka sa yaco mai na gauna me’u taura kina na peleti, na Urimi kei na Cumimi, kei na kena peleti ni sere. Ena ika ruasagavulu karua ni Sepiteba, dua na udolu walunadrau ruasagavulu kavitu, ni’u baci lako tale me vaka na kena ivakarau ni oti e dua na yabaki ki na vanua era maroroi tu kina, sa solia mai vei au na italai vakalomalagi vata ga ko ya, vata kei na kena ivakaro oqo: ni sa noqu itavi na kedra maroroi; kevaka au na laiva me kau tani vakailoa, se ena noqu vakawelewele, au na tamusuki tani; ia kevaka au na segata ena noqu igu meu maroroya, me yacova na gauna ena mai kauta kina ko koya, na italai, era na taqomaki tu.

    “A sega ni dede au sa kila na vuna ka vakaroti vakabibi tiko kina vei au me’u taqomaka ka maroroya vinaka na peleti, kei na kena ibalebale e tukuna kina na italai ni ena gauna au sa cakava oti kina na veika e gadrevi e ligaqu, ena qai lakova mai. Ena gauna ga e kilai kina ni sa tiko vei au na peleti, sa tekivu sagai sara vakaukauwa me kaliraki tani vei au. Era a taurivaka na ivadi kecega era vakasamataka rawa me baleta na inaki oqori. Sa qai gaga cake ga ka ca vakalevu na veivakacacani, ka ra sa qaqarauni sara toka e veigauna na lewevuqa me ra kauta tani mai vei au kevaka e rawa. Ia ena lewa vuku ni Kalou, era a taqomaki vinaka toka ga kina e ligaqu, me yacova niu sa rawata na veika a gadrevi kina mai ligaqu. Ena gauna, sa lesuva mai kina na italai, me vaka sa tuvai tu, au sa solia yani ki vua; ka sa koto ena nona lewa me yacova mai na gauna oqo, na ikarua ni siga ni vula ko Me, dua na udolu walunadrau tolusagavulu kawalu.”

    Me baleta e dua na kena itukutuku taucoko, raica na Josefa Simici—Ai Tukutuku ena Mataniciva Talei.

    Sa keli mai na qele na itukutuku makawa oqo, ka rogo mai kina na domodra e dua na mata tamata era sa vosa mai na kuvu ni soso; a sa vakadewataki ki na vosa ni gauna oqo ena isolisoli kei na kaukauwa ni Kalou; ia sa vakadinadinataki va-Kalou, ka tabaki taumada e vuravura ena vosa vaka Peretania ena yabaki 1830 ka yacana The Book of Mormon.