“Wase 11: Vukei Ira na Tamata Mera Cakava ka Maroroya na iYalayala,” Vunautaka na Noqu Kosipeli: E Dua na iDusidusi ki na Wasei ni Kosipeli i Jisu Karisito (2023)

“Wase 11,” Vunautaka na Noqu Kosipeli

iVakatakilakila

Ena Sega na ka me Yali vei Au, mai vei Yongsung Kim

Wase 11

Vukei Ira na Tamata Mera Cakava ka Maroroya na iYalayala

Vakasamataka Oqo

E semati vakacava na maroroi ni yalayala ki na saumaki mai?
E semati vakacava na maroroi ni yalayala ki na maroroi ni veiyalayalati?
Me’u na veisureti vakacava me’u vukei ira kina na tamata me ra tubu vakayalo ka vaqaqacotaka na nodra vakabauti Jisu Karisito?
Na cava e bibi kina meda wasea e dua na ivakadinadina ena yalodina?
Na veivakalougatataki cava au rawa ni yalataka?
Me’u na vukei ira vakacava na tamata me ra dau maroroya na iyalayala?

Veivutuni, Yalayala, kei na Saumaki Mai

Ni ko dua na daukaulotu ka tisaipeli i Jisu Karisito, o gadreva na vakabulai ni yalo (raica na Mosaia 28:3). Na iVakabula sa “kaukauwa me veivakabulai” vei ira era maroroya na veiyalayalati era cakava ena nodra ciqoma na cakacaka vakalotu bibi ni matabete, tekivu ena papitaiso (raica na 2 Nifai 31:19). Na nodra sureti ka vukei na tamata me ra maroroya na nodra iyalayala ena vakarautaki ira ki na papitaiso.

Era na vakabulai na tamata kevaka era veivutuni (raica na Ilamani 5:11). Na veivutuni sa ikoya na vuki taucoko ena yalodina vei Jisu Karisito. Na iyalayala esa dua na tiki bibi ni veivutuni. Ni o sureti ira na tamata me ra cakava na iyalayala eso me tiki ni nomu veivakavulici, o sa sureti ira tiko me ra veivutuni.

Na iyalayala e kena ibalebale na digitaki ni dua na ivakarau me caka ka muria na digidigi o ya. Na cakacakataki dei ni dina ni kosipeli ena veimuataki ki na saumaki mai.

Na saumaki mai sa ikoya na veisau ni nona vakabauta, yalona, kei na bula e dua na tamata me ciqoma ka muria na loma ni Kalou. E sa dua na vakatulewa kilai vinaka mo sa dua na tisaipeli i Karisito. Ena yaco na saumaki mai ni ra cakacakataka na tamata na vakabauti Karisito, veivutunitaka na nodra ivalavala ca, papitaiso, ciqoma na isolisoli ni Yalo Tabu, ka vosota me yacova na ivakataotioti. Na Turaga kei ira na Nona parofita a vakatoka na veisau oqo me sucu tale vakayalo (raica na Joni 3:3–5; Mosaia 27:25–26).

E na Veisorovaki ni iVakabula sa rawa kina na saumaki mai, ka sa kauta mai na Yalo Tabu na veisau levu ni yalo oqo (raica na Mosaia 5:2; Alama 5:12–14).

Na saumaki mai e sa dua na ivakarau, sega ni dua na ka me yaco vagauna ga. Na vukei ni tamata me ra saumaki mai vei Jisu Karisito e usutu ni nomu inaki vaka daukaulotu. Ena veidusimaki ni Yalotabu, sureti ira na tamata me ra cakava na iyalayala e na vukei ira me ra tubu vakayalo ka vakila kina na veivakauqeti ni Yalo Tabu ena nodra bula. O sa qai tokoni ira ena maroroi ni iyalayala era sa cakava. O vukei ira me cakacakataka na vakabauta ki na veisau tudei (raica na Mosaia 6:3).

O ira na tamata era maroroya na iyalayala ni se bera na papitaiso era rawa vakalevu cake ni cakava ka maroroya na veiyalayalati tabu eso ni oti oya. Ni o vakavulici ira na tamata me ra maroroya na iyalayala eso, o sa vakavulici ira tiko me ra maroroya na veiyalayalati eso. Na caka kei na maroroi ni veiyalayalati e sa dua na tiki bibi ni kosipeli i Jisu Karisito kei na ituvatuva ni Kalou me baleti Ira na luvena.

Na iwase oqo e oka kina na idusidusi eso ni soli veisureti, yalataki ni veivakalougatataki, wasei ni nomu ivakadinadina, kei na nodra vukei na tamata me ra maroroya nodra iyalayala me rawa ni ra lako mai kina kivua na iVakabula ka vakabulai.

iVakatakilakila

na daukaulotu vakavulica tiko e dua na yalewa

Na Veisureti

Ni o matataki Jisu Karisito, o sureti ira na tamata me ra muri Koya ka ciqoma na reki ni Nona kosipeli. O veisureti vakatabakidua vei ira me ra cakava na veika ena taracake na nodra vakabauti Karisito. O sa qai tokoni ira ena maroroi ni nodra iyalayala.

Era sa bibi sara na veisureti kei na iyalayala me baleta na vuna eso oqo:

Era na vukei ira na tamata me ra bulataka na ivakavuvuli era sa vulica ka ra vakila kina na ivakadinadina veivakadeitaki ni Yalotabu.
Na maroroi ni iyalayala sa ikoya e dua na sala era vakaraitaka kina na tamata na veivutuni (raica na Vunau kei na Veiyalayalati 20:37).
Na veivutuni e vukei ira me ra vakila na vakacegu kei na reki ni veivosoti ni Kalou. Era na rawata vakalevu cake talega kina na veivuke ni Kalou me baleta na nodra dredre eso.
Na maroroi ni iyalayala e vakarautaki ira na tamata me ra cakava ka maroroya na veiyalayalati tabu.
E rawa ni o vakaraitaka na nomu lomani ira na tamata kei na nomu vakabauta na iyalayala ni Kalou ena nomu vukei ira na tamata me ra maroroya na nodra iyalayala.

Sureta me vaka na Veiliutaki ni Yalotabu

Vakasaqara na veidusimaki ni Yalotabu me baleta na veisureti me caka kei na gauna me soli kina. Vakasamataka mada na veivakavulici se ivunau cava, e kilai vakavinaka, ena vukea e dua me ciqoma na nomu veisureti. Na veisureti donu ena gauna donu ena rawa ni vakauqeti ira na tamata me ra cakava na veika ena taracake na nodra vakabauta. Na ivalavala oqo ena rawa ni vakavuna e dua na veisau levu ni yalo (raica na Mosaia 5:2; Alama 5:12–14).

Na veisureti o vakayacora e rawa ni ka lailai ga, me vaka na wiliki ni dua na wase ni ivolanikalou se lako mai ki na soqoni ni sakaramede. Se rawa ni ra ka bibi sara me vaka na papitaiso. Na veisureti e dodonu me veiganiti kei na vanua e sa toka kina e dua ena nona ilakolako vakayalo.

Na veisureti eso e liutaka na Yalotabu e dau veitokoni vakaiira me vukea e dua na tamata me toso vakayalo (raica na 2 Nifai 28:30; Vunau kei na Veiyalayalati 93:12–13). Tarogi iko mada, “Na yalayala cava so e maroroya tiko na tamata oqo? Na cava e gadreva me cakava tarava o koya me toso kina?”

Vakarorogo vei ira o veivosaki vata tiko se vakavulica tiko. Mai na veika o rogoca ka vakila, vakasaqara na veidusimaki ni Yalotabu me baleta na veisureti ena vukei ira yadua na tamata me ra toso ki na caka ni veiyalayalati tabu eso.

iVakavuvuli ni Vakalevutaki na Veisureti

Na vakalevutaki ni veisureti e gadrevi kina na vakabauti Karisito. Mo vakabauta ni na vakalougatataki ira na tamata o Koya ni ra ciqoma ka talemuria na nomu veisureti.

Era na veisau vakalevu cake na tamata ni o sureti ira me ra cakacakataka e dua na dina ni kosipeli ka vukei ira me ra raica na sala ena vakalougatataki ira kina na veisau oqori. Era na veisau ki na ivakatagedegede era vakila kina na Yalotabu ka sotava na reki ni bulataki ni kosipeli i Jisu Karisito.

E veigauna ga o veisotari kina kei ira na tamata, e matanavotu se ena initaneti, vakasamataka na veisureti cava ena vukei ira me vaqaqacotaka na nodra vakabauti Karisito ka vakila na Yalotabu. Ena so na gauna ena rawarawa sara oqo me vaka ga na nomuni sota tale se lako mai ki na dua na itaviqaravi ni Lotu.

Ni o vakavakarau mo vakavulica e dua na lesoni, vakasamataka na gagadre eso kei na toso ni tamata yadua. Raica me okati ena nomu ituvatuva ni lesoni e dua se sivia na veisureti ka na vukei koya me toso ki liu.

Qarauna mo kua ni veisureti vakasivia ena dua ga na gauna. E dua na tamata ena dau gadreva na gauna me cakacaka, tubu, ka vuli mai na veisureti yadua.

Mo doudou ia kakua ni veivakararawataki ni o sureti ira na tamata me ra caka iyalayala (raica na Alama 38:12). Rokova na nodra galala ni digidigi na tamata.

Vulici ni iVolanikalou

Na cava era ka bibi kina na yalayala?

Veisureti ena Vosa e Yalovinaka ka Matata

Na veisureti e dau taura vakawasoma e dua na taro “ko na”, ka gadrevi me saumi mai ena io se sega. Cakava me yalovinaka, vakatabakidua, ka matata na nomu veisureti. E dodonu me sureti ira se muataki ira na tamata me ra yalataka me ra cakacaka ena vakabauti Jisu Karisito.

E dina ga ni na duatani na nomu veisureti vei ira yadua, vakasamataka mada eso na ivakaraitaki oqo:

Na lako i lotu e vakarautaka e dua na gauna kei na vanua mo qarava kina na Kalou ka vakila na Nona Yalotabu. Ena rawa talega ni vukei iko mo tiki ni dua na itikotiko veitokoni ni ko cakava na veisau mo toro voleka yani kina vua na iVakabula. O na lako beka mai vata kei keirau ki na soqoni ni sakaramede ena Sigatabu oqo?
Ni datou sa veivosakitaka oti qo na bibi ni vulici ni ivolanikalou, o na wilika beka [e dua na tiki ni ivolanikalou vakatabakidua]? O na vola beka na vei nanuma se taro cava ga e votu mai vei iko ? E rawa ni tou veivosakitaka na nomu vakasama eso ena nodatou sota ka tarava.
E datou sa veivosakitaka tiko na bula ni iVakabula kei na Nona ivakaro. O na muria beka na Nona ivakaraitaki ena nomu papitaiso ki na Nona Lotu ka cakava na iyalayala eso vata kei Koya? (Raica na “Na Veisureti me Papitaiso ka Vakadeitaki” ena wase 3.)
O a vakaraitaka na nomu taleitaka mo veitaratara vakalevu kei na Kalou ena nomu bula. O na masu beka ena vakabauta ena vica na siga mai oqo me rawa ni o vakila kina na veivakalougatataki ni masu?
E tiko e dua na vidio keirau nanuma ni na vukei iko. E rawa beka ni keirau vakaraitaka vei iko se vakauta yani vei iko e dua na kena isema? O na sarava beka? E rawa beka ni keirau raici iko ni mataka me baleta na nomu nanuma?

Vakasaqara na veivakauqeti ni Yalo Tabu ni o vakasamataka na sala matau mo solia kina na veisureti e yalovinaka, vakatabakidua, ka matata.

Vuli Yadua se Vuli Vata Vakaitokani

Vola ena nomu ivolaniveisiga ni vuli e dua na veisureti e rawarawa, vakadodonu, ka matata me baleta na iyalayala yadua ena dua na lesoni. Kevaka o sa cakava oti na itaviqaravi oqo, tokaruataka ka vakatauvatana na nomu veisureti vou kei ira na kena e liu.

Railesuva vata kei nomu itokani na veisureti o sa vola rawa. Qai veivosakitaka na veitaro oqo:

E rawa vakacava ni da vukei ira na tamata me ra kila vakavinaka na veivakalougatataki yalataki ni Turaga ka semati ki na veisureti oqo?
Na cava e bibi kina vei au vakai au na veisureti oqo?
Me’u na vukei ira vakacava na tamata me ra vakila na loloma ni Kalou vei ira ni’u veisureti voli?
Me’u na vakavinakataka vakacava na noqu vukei ira na tani me ra cakacakataka na veisureti au solia yani?

Vakasamataka mada e dua o vakavulica tiko. Vakatovotovotaka na kena soli na veisureti oqo me vaka ga o vosa tiko vua na tamata oya. Railesuva na nomu veisureti me vaka e gadrevi.

Yalataka Vei Ira na Tamata na Veivakalougatataki

Sa yalataka tu na Kalou ni na vakalougatataki keda ni da muria na Nona ivakaro (raica na Vunau kei na Veiyalayalati 130:20–21). O ira na tamata era muria na ivakaro ka yalodina tikoga “era sa vakalougatataki ena veika kece sara” ka ra na “tiko marau kina vata kei na Kalou me tawamudu” (Mosaia 2:41).

Ni o sureti ira na tamata me ra cakava na iyalayala, yalataka vei ira na veivakalougatataki eso me baleta na nodra maroroya na nodra iyalayala. E rawa ni o raica e vuqa na veivakalougatataki oqo ena nomu vulica na ivolanikalou, na nodra ivakavuvuli na parofita edaidai, kei na lesoni ena wase 3. Vakasamataka talega na veivakalougatataki ena nomu bula. Vakatulewataka ena masumasu na veivakalougatataki cava mo yalataka vei ira yadua na tamata ni ko veisureti voli.

Ni o sureta tiko e dua me bulataka e dua na ivakaro, vakavulica na veika oqo:

Na talairawarawa ki na ivakaro e vakaraitaka na noda lomana na Tamada Vakalomalagi kei na Luvena, o Jisu Karisito (raica na Joni 14:15).
Na talairawarawa ki na ivakaro e vakaraitaka vua na Kalou ni da sa vakararavi vei Koya (raica na Vosa Vakaibalebale 3:5–6).
Na veivakalougatataki ni Kalou era sa vakayalo ka vakayago (raica na Mosaia 2:41).
Na veivakalougatataki cecere duadua ni Kalou sa ikoya na bula tawamudu (raica na Vunau kei na Veiyalayalati 14:7).
Ni da masu vakaidina ka cakacakataka ena vakabauta, ena vukei keda na Kalou me da rawata na veika sa vakarota vei keda o Koya me da cakava (raica na 1 Nifai 3:7).
Na Kalou e vakayacora na Nona iyalayala me vakalougatataki keda me vaka na Nona sala kei na Nona gauna (raica na Vunau kei na Veiyalayalati 88:68).

Era dau sotava na tamata na veisaqasaqa ena nodra muria na ivakaro. Tokoni ira o vakavulica, ka vakadeitaka vei ira ni na vakalougatataki ira na Kalou ni ra segata me ra cakava na Lomana. Vukei ira me ra kila vinaka ni veisaqasaqa sa dua na madigi ni tubu ena noda digitaka meda muri Karisito kevaka sara mada ga e dredre (raica na 2 Nifai 2:11, 13–16).

A vakavulica o Elder Jeffrey R. Holland: “Eso na veivakalougatataki e yaco totolo, eso e yaco bera mai, ka so e sega ni yaco mai me yacovi lomalagi; ia, vei ira era ciqoma na kosipeli i Jisu Karisito, era yaco mai” (“An High Priest of Good Things to Come,” Ensign,, Nove. 1999,38).

Vulici ni iVolanikalou

Na cava e vakavulica na ivolanikalou eso oqo me baleta na gagadre ni Turaga me vakalougatataki keda?

Vuli Yadudua

Wilika na Vunau kei na Veiyalayalati 82:10 kei na 130:20–21. Qai vulica na ivolanikalou oqo. Cakava e rua na kolomu ena nomu ivolaniveisiga ni vuli. Ena dua na yasana, vola kina na ivakaro o kunea ena veitikina yadua. Ena yasana kadua, vola kina na iyalayala ni kena maroroi na ivakaro.

Wasea na Nomu iVakadinadina

Wasea na nomu ivakadinadina ena veigauna kece o veisureti kina ka yalataka na veivakalougatataki. Tukuna na sala o sa vakalougatataki kina ni o bulataka na ivakavuvuli o vakavulica tiko. Wasea na nomu ivakadinadina ni ivakavuvuli oqo ena vakalougatataka na nona bula na tamata o ya ni bulataka o koya.

Na dina ni nomu ivakadinadina ena vukea na tauyavutaki ni dua na ituvaki me ra vakila kina na tamata na Yalo Tabu ni vakadeitaka na dina. Oqo ena vakayaloqaqataki ira me ra ciqoma na veisureti o na dulaka yani.

Me baleta eso tale na itukutuku, raica na “Wasea Nomu iVakadinadina” ena wase 10.

iVakatakilakila

masu tiko e dua na ilawalawa

Vukei Ira na Tamata Mera Maroroya na Nodra iYalayala

Ni ra ciqoma na tamata na nomu veisureti me ra cakava e dua na ka, talemuria yani me vukei ira me ra maroroya na nodra iyalayala. O sa vukei ira tiko na tamata me ra tara cake na vakabauti Karisito. Na nomu itavi o ya mo vukei ira me ra vaqaqacotaka na nodra vakabauta kei na nodra vakadeitaka me ra toso ki na saumaki mai vakataucoko. Kakua ni sureti ira walega na tamata me ra veisau; tokoni ira ena nodra cakava oqori.

Era na ciqoma na tamata e dua na ivakadinadina ni Yalotabu ni ra cakacakataka na vakabauta ki na veivutuni ena nodra maroroya na iyalayala. Na ivakadinadina oqori e sega ni dau lako mai “me yacova ni sa vakatovolei oti na [nodra] vakabauta” (Ica 12:6). Kakua ni kurabui ni yaco na veisaqasaqa. Tuvanaka na sala mo na vukei ira ena gauna ni veivakatovolei me rawa ni ra ciqoma kina na ivakadinadina ni Yalotabu. Sa rawa talega vei ira na lewe ni Lotu tale eso me ra veitokoni.

Era dau vakila na tamata na veivakayarayarataki ni Yalotabu ni o tiko vata kei ira. Vakabibitaka na bibi ni masu, na wiliki ni ivolanikalou, kei na vakamuri ni nomu veisureti me rawa ni ra vakila kina na veika oqo ni ra sa tiko vakataki ira.

Na maroroi ni iyalayala ena vakarautaki ira na tamata ki na cakacaka vakalotu kei na veiyalayalati eso ena salatu ni saumaki mai ni bula taucoko. Na nomu sasaga ena vukei ira me “vakaraitaka dina ena nodra cakacaka” na nodra gagadre me ra muri Jisu Karisito (Vunau kei na Veiyalayalati 20:37).

iVakatakilakila

veimokomoko na marama

Tuvanaka na Veitaratara Lekaleka e Veisiga

Na nodra vukei na tamata me ra dau maroroi yalayala e tekivu ena imatai ni gauna o sikovi ka vakavulici ira kina. Kerei ira me ra vola na nodra iyalayala ena nodra talevoni, ivolanivula, se dua na ka o biuta tu vei ira.

Taroga kevaka o iko, se dua na lewenilotu sa vakaitavi tiko, e rawa ni dau veitaratara mai vakalekaleka e veisiga ena maliwa ni veisiko ni veivakavulici. Vakamacalataka ni inaki ni veitaratara oqo oya me tokoni ira, ka vakaraitaka eso na sala e rawa ni o cakava kina oqori. Na veitaratara oqo e dua na sala me vakayagataki kina na ivakavuvuli ena Vunau kei na Veiyalayalati 84:106.

Vakadeitaka na sala ni veitaratara ka na yaga vakalevu duadua, me vaka e dua na veisiko lekaleka, qiri ena talevoni, teks, se itukutuku ni vakauitukutuku raraba. Na tekinolaji e vakarautaka tu e vuqa na digidigi me baleta na ikuri ni veivakananumi kei na veitokoni.

Vakayaloqaqataki ka Vukei Ira na Tamata ena Nomu Veitaratara e Veisiga

Ena veisureti kece o solia, vola na ivakamacala ena app ni Vunautaka na Noqu Kosipeli me baleta na sala mo talemuria kina ena siga ka tarava. Ni o tuvanaka na siga ka tarava, vakasaqara na veidusimaki ni Yalotabu ni o veivosakitaka na sala mo vukei ira kina na tamata me ra maroroya na nodra yalayala.

Cakava me vinaka ka veivakayaloqaqataki na nomu veitaratara kei ira e veisiga. Masulaki Ira Vakaraitaka na loloma kei na kila vinaka ni o vukei ira me ra maroroya na nodra iyalayala. Sauma na taro ka vukei ira me ra ulabaleta na bolebole eso. Kevaka e tiko na gauna, wilika vata na iVola i Momani. Wasea na itukutuku raraba ni Lotu e veiganiti, oka kina na sereivakatagi e vakarautaka na Lotu ka na rawa ni laveti ira. Mo rokova na nodra gauna kei na nodra gagadre.

Vakaveikilaitaki ira vei ira tale eso na lewe ni Lotu. Ni veiganiti, kerei ira na lewenilotu me ra vukei ira na tamata me ra maroroya na nodra iyalayala (raica na wase 10).

Vakacaucautaki ira na tamata era saga tiko me maroroya na nodra iyalayala. Vukei ira me ra raica na sala e marautaka kina na Turaga na nodra sasaga. O ira oqo era sa veisautaka tiko na nodra bula, ka na dau taura e levu na sasaga kei na vosota. Vukei ira me ra kila na veivakalougatataki era sa ciqoma tiko. Vakaraitaka na nuidei ni ra na rawa ni qaqa.

Vakaraitaka talega na loloma ke ra sega ni maroroya na tamata na nodra iyalayala. Lomasoli mo tokoni ira ena nomu veitaratara e veisiga. Me ivakaraitaki, ke dua a ciqoma e dua na veisureti me wilika e dua na wase ena iVola i Momani ia e se bera ni cakava, kerea mo drau wilika vata. Vukei koya me raica mai na veika e sotava na sala e rawa ni vakalougatataka kina na nona bula na maroroi ni iyalayala.

Ena taura beka e vuqa na sasaga vei ira na tamata me ra maroroya e dua na iyalayala, ka na gadrevi beka mo veisiko vakavica me vukei ira. Veivosakitaka na sala era rawa ni ulabaleta kina na bolebole eso me ra maroroya na iyalayala. Dauvosota ka veitokoni, kua ni dau vakalelewa.

Me Tiko na Veivakauqeti ni Yalo Tabu ena Nomu Veitaratara e Veisiga

Ni o talemuri ira na tamata, kerei ira me ra wasea na veika era sa sotava ena nodra maroroya tiko na iyalayala. Taroga na veika era sa vulica ka vakila. Oqo ena vukei ira me kila na veivakayarayarataki ni Yalotabu ena nodra bula ka vukei ira me ra raica rawa na ikalawa e tarava.

Ni o veitaratara kei ira na tamata e veisiga, e dua na tiki bibi ni nomu inaki o ya mo sureta na veivakauqeti ni Yalo Tabu ena nodra bula. Vukei ira me kila rawa na sala me ra vakila kina na Yalotabu ni o sega ni tiko. Na nomu veitaratara e veisiga e dodonu me vaqaqacotaka na veika vakayalo era a vakila ni o vakavulici ira. Era na saumaki mai ni ra vakila na kaukauwa kei na veivakauqeti ni Yalo Tabu.

Vakaraitaka na Loloma

E usutu ni ivakarau ni saumaki mai oya na loloma Vakarisito (raica na 4 Nifai 1:15). Vakasaqara na isolisoli ni loloma cecere. Na vakaraitaki ni loloma dina ena rawa ni vukei ira na tamata me ra vakila na Yalotabu ena nodra bula. Na nomu vakaraitaka na loloma ena rawa talega ni vukei ira me ra ciqoma na veisureti ka maroroya na iyalayala ka na veimuataki ki na saumaki mai.

Ni o lomani ira ka vakavulici ira na tani, ena vakatitobutaka na nomu saumaki vakai iko vua na iVakabula.

Na veivuke ena saumaki mai ni dua tale na tamata e sa dua na cakacaka tabu. Ko na kunea na reki tudei ni o soli iko ki na cakacaka oqo kei na nomu qaravi ira na tani (raica na Maciu 10:39; Mosaia 2:17; Alama 27:17–18; Vunau kei na Veiyalayalati 18:10–16).

Vuli Yadua se Vuli Vata Vakaitokani

Vola ena app ni Vunautaka na Noqu Kosipeli na nomu ituvatuva ni veitaratara e veisiga vei ira yadua o vakavulica tiko. Tuvanaka ni se vo e vica na siga na veika o na cakava mo talemuria kina na tamata yadua.

Digitaka e dua na veisureti o na solia ni o vakavulici ira yadua na tamata. Qai raica na veika duidui eso ena rawa ni tarova e dua mai na nona ciqoma se maroroya na iyalayala oya. Veivosakitaka ka vakatovotovotaka na sala vinaka duadua mo vukei ira kina na tamata me ra walia na nodra kauwai.

E Gadreva na Turaga Mera Lako Mai na Tamata ka Tiko Dei

Na cakacaka ni kaulotu e dau mana vakalevu duadua ni ra cakava ka maroroya na tamata na yalayala me ra bulataka na kosipeli ka bulabula tikoga ena Lotu ena nodra bula taucoko. E sega ni rauta vinaka me ra lako walega mai ki na Lotu. E gadreva na Turaga me ra lako mai me ra mai tiko dei (raica na Joni 15:16). Vagolea na nomu veivakavulici kei na veisureti kece sara ki na icavacava o ya. Me rawa ni ra ciqoma na veivakalougatataki kece sara sa tu vei Tamada Vakalomalagi me baleti ira, sa dodonu vei ira na lewenilotu me ra tomana tikoga na nodra bulataka na kosipeli ena nodra muria na ivakaro kei na veiyalayalati era sa cakava ena nodra bulabula tikoga ena Lotu.

A vakavulica o Nifai: “Ni [ko] sa tu ena sala qiqo ka rabailailai oqo, au na taroga mada se sa vakayacori na ka kece sara? Raica, au sa kaya vei [iko], E segai; … mo … toso ki liu ka tudei vei Karisito, … ka vosota me yacova na ivakataotioti, raica, sa kaya vakaoqo na Tamada: [Ko] na rawata kina na bula tawamudu” (2 Nifai 31:19–20).

Solia na nomu sasaga vinaka duadua mo vukei ira na tamata me ra rawata na “bula tawamudu, na isolisoli uasivi duadua vei ira na isolisoli uasivi ni Kalou” (Vunau kei na Veiyalayalati 14:7).

Vakatutu ni Vuli kei na kena Vakayagataki

Vuli Yadudua

Raica e dua na ivakaro mai na lesoni 4. Raica ka vola na idusidusi vakaivolanikalou kei na vosacavuti mai vei ira na parofita edaidai e vakamacalataka na veivakalougatataki yalataki e semati ki na ivakaro oqo. Vakasamataka mada na veivakalougatataki o sa ciqoma ena nomu talairawarawa ki na ivakaro oqo, ka vola ena nomu ivolaniveisiga.
Ni o veivosaki kei na nomu matavuvale se so tale, taroga se ra sa vakalougatataki vakacava ena nodra talairawarawa ki na dua na ivakaro (me vaka oqo, na vakatabui ni Siga ni Vakacecegu, talairawarawa ki na lawa ni ikatini, se maroroi ni dua na ivakaro e dredre vua e dua o vakavulica tiko).
Sauma na taro eso oqo me vukei iko mo kila na veivanua e rawa ni o vakavinakataka cake ni o veisureti voli. Tuvanaka mo vakavinakataka cake.
- Era kila beka na tamata ni’u lomani ira?
- Au sa nuidei beka ni ra na vakalougatataki ena nodra vakayacora na neirau veisureti?
- Au dau solia beka na gauna kei na veitokoni veiganiti me rawa ni’u veitaratara e veisiga kei ira na tamata me vukei ira me ra maroroya na nodra iyalayala?
- E oka beka ena neirau ituvatuva ni lesoni na veisureti matata me cakacakataki?

Vuli Vakaitokani kei na Veisau ni iTokani

Railesuva na veisureti eso ena dua na lesoni ni kaulotu. Sauma na taro eso oqo me baleta na veisureti yadua:
- Na veivakalougatataki cava sa yalataka na Turaga vei ira era maroroya na iyalayala oqo?
- Ena vukei ira vakacava na tamata me ra vakalevutaka na nodra vakabauta kei na ivakadinadina na talairawarawa ki na ivakavuvuli oqo?
- Ena vukei ira vakacava na tamata na iyalayala oqo me ra veivutuni ka yalorawarawa cake ki na Yalotabu?
Mai na nomu iyaya ni tuvatuva, vola e dua na lisi ni tamata o sa veitaratara kaya ena rua na siga sa oti. Okati ira kina o vakavulica tiko kei ira na lewenilotu.
- Me baleti ira yadua, vola na veisureti o a solia kei na iyalayala era a cakava.
- Vakasamataka mada na veisureti cava tale eso o a rawa ni solia yani.
- Veivosakitaka na vuna o a rawata kina na veivakadeitaki ni yalayala mai vei ira eso na tamata oqo ka sega mai vei ira tale eso.
- Na cava o na cakava mo talemuria kina na veisureti oqo?

Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu

Veivosakitaka na vakasama mana ka yaga me baleta na veitaratara ni veisiga kei ira o vakavulica tiko. Era sa cakacaka vakavinaka vakacava beka na daukaulotu kei ira na lewenilotu? Na itukutuku tabaki se itukutuku vakalivaliva cava e yaga? Na cava o rawa ni cakava ni ra sega ni tiko e vale se ra rui osooso na tamata me ra raici iko?
Veivosakitaka na sala eso era sa vakavulica kina vakavinaka na daukaulotu na ivakaro ena lesoni 4.

Liuliu ni Kaulotu kei na Daunivakasala ni Kaulotu

Kevaka e rawa, tomani ira na daukaulotu ni ra veivakavulici. Vukei ira me ra vakanamata ena nodra vukei na tamata me cakava ka maroroya na iyalayala.
Vakauqeti ira na iliuliu ni matabete ni tabanalevu, iliuliu ni mataisoqosoqo, kei ira na lewenilotu me ra veitaratara e veisiga kei ira era vakavulica tiko na daukaulotu—kevaka era sa vakadonuya vakakina.