“Wase 4: Vakasaqara ka Vakararavi vua na Yalo,” Vunautaka na Noqu Kosipeli: E Dua na iDusidusi ena Wasei ni Kosipeli i Jisu Karisito (2023)
“Wase 4: Vakasaqara ka Vakararavi vua na Yalo,” Vunautaka na Noqu Kosipeli
iVakatakilakila
Liaona, mai vei Arnold Friberg
Wase 4
Vakasaqara ka Vakararavi vua na Yalo
Vakasamataka Mada Oqo
Na cava au rawa ni cakava me tiko kina ena noqu bula kei na noqu veiqaravi vakadaukaulotu, na kaukauwa ni Yalo Tabu?
Na cava na itavi ni Yalo Tabu ena saumaki mai?
Ena rawa vakacava meu vukei ira na tamata keirau vakavulica tiko mera vakila na veivakayarayarataki ni Yalo Tabu?
Ena rawa vakacava meu cakava na noqu masu mera vakaibalebale vakalevu cake?
Ena rawa vakacava meu kila na veivakauqeti ni Yalo Tabu?
Vakasaqara na Veituberi ni Yalo Tabu
Na isolisoli ni Yalo Tabu e dua vei ira na isolisoli cecere duadua ka solia na Kalou vei ira na luvena. E gadrevi sara vakalevu ena cakacaka vakadaukaulotu. O gadreva na kaukauwa ni veituberi, kei na veivakatakilai ni Yalo Tabu ni ko vukei ira na Tamata mera papitaiso, vakadeitaki, ka saumaki mai.
Ena gadrevi na cakacaka vakayalo mena tiko kina na veidusimaki ni Yalo Tabu ena nomu bula. Na cakacaka oqo e oka kina na masu vagumatua kei na vuli ivolanikalou e veigauna. E okati tale ga kina na maroroya na nomu veiyalayalati kei na ivakaro ni Kalou (raica na Mosaia 18:8–10, 13). E oka kina na vakayagataka na sakaramede ena bula kilikili e veimacawa (raica na Vunau kei na Veiyalayalati 20:77, 79).
O na sotava na gagadre kei na veituvaki duidui eso e veisiga. Na veivakauqeti ni Yalo ena vukei iko mo kila na cava mo cakava ka tukuna. Ni ko vaqara ka cakacakataka na veivakauqeti oqo, na Yalo Tabu ena vakalevulevutaka na nomu igu kei na nomu veiqaravi me uasivita na ka o rawa ni cakava vakataki iko. E na vukei iko o Koya e na veitiki kece sara ni nomu veiqaravi vakadaukaulotu kei na nomu bula vakataki iko. (Raica na 2 Nifai 32:2–5; Alama 17:3; Ilamani 5:17–19; Vunau kei na Veiyalayalati 43:15–16; 84:85.)
iVakatakilakila
Peresitedi Russell M. Nelson
“Ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu” (Russell M. Nelson, “iVakatakila ki na Lotu, iVakatakila ki na Noda Bula,” Liaona, Me 2018, 96).
iVakatakilakila
Rarama kei na Dina, mai vei Simon Dewey
Na Rarama i Karisito
Na Rarama iKarisito “sa soli vei ira na tamata kecega, me kila kina na vinaka mai na ca” (Moronai 7:16; raica na tikina e 14–19; raica tale ga na Joni 1:9). Na Rarama i Karisito sai koya na veivakararamataki, kila ka, kei na veivakayarayarataki ka soli ena vuku i Jisu Karisito. Na veivakayarayarataki oqo ena liu taumada ki na kena ciqomi na isolisoli ni Yalo Tabu. Ena tuberi ira era sa tuvakarau tu mera vuli ka bulataka na kosipeli vakalesuimai i Jisu Karisito.
Na Yalo Tabu
Na iTuvaki ni Yalo Tabu
Na Yalo Tabu e ikatolu ni Lewetolu Vakalou. O Koya e vakayalo ka sa sega ni vakalewe se vakasui na yagona (raica na Vunau kei na Veiyalayalati 130: 22). O Koya na Dauveivakacegui, ka yalataka na iVakabula ni na vakavulici ira era muri Koya ena ka kecega, ka vakananumi ira ena veika a vakatavulica ko Jisu (raica na Joni 14:26).
Na Kaukauwa ni Yalo Tabu
Na ivakadinadina ka yaco vei ira era vakasaqara matua na dina ni bera na papitaiso, e lako mai ena kaukauwa ni Yalo Tabu. Na tamata kece e rawa ni ciqoma edua na ivakadinadina kei Jisu Karisito kei na Nona kosipeli vakalesuimai, ena kaukauwa ni Yalo Tabu. “Ia ena kaukauwa ni Yalo Tabu [eda] na kila kina na dina ni veika kecega” (Moronai 10:5).
Na iSolisoli ni Yalo Tabu
Na isolisoli ni Yalo Tabu sai koya na dodonu me tiko kei keda na veitokani ni Yalo Tabu ni keda bula kilikili. Eda ciqoma na isolisoli ni Yalo Tabu ni oti noda papitaisotaki ena wai. E vakatikori ena cakacaka vakalotu ni veivakadeitaki.
Na parofita o Josefa Simici e tukuna: “Erau duidui tiko na Yalo Tabu kei na isolisoli ni Yalo Tabu. O Konilio a ciqoma na Yalo Tabu ni bera ni papitaiso, sai koya na ivakadinadina mana ni Kalou vua baleta na dina ni kosipeli, ia a sega ni rawa ni ciqoma na isolisoli ni Yalo Tabu. me yacova ni sa papitaiso oti” (Nodra iVakavuvuli na Peresitedi ni Lotu: Josefa Simici [2007], 97).
Ena isolisoli kei na kaukauwa ni Yalo Tabu eda vakasavasavataki kina—vakatabui kina, vakataucokotaki kina, vakaduavatataki kina, ka vakataka vakalevu cake na Kalou. Na veivakabulai i Karisito kei na veivakasavasavataki mana ni Yalo Tabu, sa rawa kina meda sucu tale vakayalo ni keda maroroya na veiyalayalati eda cakava vata kei na Kalou (raica na Mosaia 27:25–26).
Na Yalo tabu ni Yalayala
Na Yalo Tabu e vakatokai tale ga me Yalo Tabu ni Yalayala (raica na Vunau kei na Veiyalayalati 88:3). Ena itutu oqo, e vakadeitaka kina na Yalo Tabu ni veicakacaka vakalotu ni matabete eda ciqoma kei na veiyalayalati eda cakava era sa ciqomi mai vua na Kalou. O ira era sa dregati ena Yalo Tabu ni Yalayala ena solia ki ligadra ko Tamada na ka kecega (raica na Vunau kei na Veiyalayalati 76:51–60; Efeso 1:13–14; iDusidusi ki na iVolanikalou, “Yalo tabu ni Yalayala”).
Na vei cakacaka vakalotu kei na veiyalayalati kece e dodonu me vauci mai vua na Yalo Tabu ni Yalayala, me vakadonui kina ni oti na bula oqo (raica na Vunau kei na Veiyalayalti 132:7, 18–19, 26). Na veivauci oqo e na vakatau ena noda yalodina tikoga.
iSolisoli Eso ni Yalotabu
Na Turaga e solia vei keda na isolisoli ni Yalo meda vakalougatataki kina, ka da vakalougatataki ira kina na tani (raica na Vunau kei na Veiyalayalati 46:8–9, 26). Me ivakaraitaki, o ira na daukaulotu ka vulica edua na vosa vou, e rawa ni ira ciqoma na isolisoli ni vosataka na vosa tani me soli vei ira na veivuke vakalou, mera vakavulici ira na tani ena nodra vosa vakaitaukei.
Eso na isolisoli ni Yalo era vakamacalataki tu ena Moronai 10:8–18, Vunau kei na Veiyalayalati 46:11–33, kei na 1 Koronica 12:1–12. Oqo eso ga vei ira na vuqa na isolisoli ni Yalo. Na Turaga ena rawa ni vakalougatataki keda ena so na isolisoli tale eso ka na vakatau ena noda yalodina, noda gagadre, kei na nodra gagadre na tani.
Na iVakabula e sureti keda vakabibi meda vakasaqara na isolisoli vakayalo eso (raica na Vunau kei na Veiyalayalati 46:8; 1 Koronica 14:1, 12). O ira na isolisoli oqo era lako mai ena masu, na vakabauta, kei na sasaga—ka vaka na loma ni Kalou.
Vuli Yadua se Vuli Vata Vakaitokani
Ena iDusidusi ki na iVolanikalou, wilika na Yalo Tabu,” “Rarama i Karisito.” Vola edua na ivakamacala ni ituvaki kei na itavi ni Yalo Tabu.
Erau a vakasaqara vakacava o Pita kei Joni na isolisoli vakayalo?
A sauma vakacava na Kalou na nodrau masu?
Na cava o rawa ni vulica mai na ka a yaco oqo me baleta na nomu cakacaka vakai iko?
iVakatakilakila
masu tiko na ilawalawa
Na Kaukauwa ni Yalo ena Saumaki
Na saumaki e yaco ena kaukauwa ni Yalo Tabu. Na nomu itavi sai koya mo kauta na kaukauwa ni Yalo ki na nona bula edua na tamata. Eso na sala o rawa ni cakava kina oqo sa vakatututaki toka e ra.
Vakasaqara ena masu me tiko vata kei iko na Yalo, vakasaqaqara ena ivolanikalou, kei na maroroya na nomu veiyalayalati.
Veivakatavulici ena Yalo me baleta na iVakabula kei na itukutuku ni Veivakalesui Mai. Muria na veituberi ni Yalo ena nomu moica na nomu itukutuku ki na gagadre ni tamata yadua.
Vakadinadinataka ni ko kila ena kaukauwa ni Yalo Tabu, ni ka dina na veika o vakavulica tiko. Ni ko vakadinadinataka, na Yalo Tabu ena rawa ni vakadinadinataka vei ira na tani.
Sureti ira na tamata mera cakacaka, ka tokoni ira ena nodra maroroya na nodra yalayala. Ni ira maroroya na tamata na nodra yalayala, era na vakila vakaukauwa cake na kaukauwa ni Yalo Tabu. Raica na wase e 11.
Talemuria ena nomu tarogi ira na tamata me baleta na veika era sotava ni ira vakayacora edua na veisureti. Ena qai tubu na nodra vakabauta ni ira veivutuni, talairawarawa ki na ivakaro, ka maroroya na nodra yalayala. Vukei ira me ra kila ni cakacaka vata tiko kei ira na Yalo.
iVakatakilakila
Peresitedi M.Russell Ballard
O Peresitedi M. Russell Ballard a vakavulica: “Na saumaki dina ena yaco, ena kaukauwa ni Yalo. Ni tara na uto na Yalo, e na veisau na uto. Ni ira vakila … na tamata yadua ni cakacaka vata tiko kei ira na Yalo, se ira raica na ivakadinadina ni loloma kei na veivosoti ni Turaga ena nodra bula, era na vakatataki cake ka vaqaqacotaki vakayalo ka na tubu na nodra vakabauti Koya. Na veika ka sotavi oqo vata kei na yalo ena yaco ga mai, ni lomarawarawa edua na tamata me vakatovotovotaka na vosa [raica na Alama 32:27]. Oqo na sala eda na qai vakila kina ni dina na kosipeli” (“Now Is the Time,” Ensign, Nove. 2000, 75).
Vuli Yadua se Vuli Vata Vakaitokani
Vulica edua se sivia na iwase ka toka e ra. Ni ko wiliwili tiko, vakasaqara mo kila vakavinaka na cava ena vakila edua na tamata ena cakacakataki ni saumaki mai. Vola na nomu vakasama ena nomu ivolanivuli ni veisiga. Veivosakitaka na nomu raititobu vata kei ira na daukaulotu tale eso, kei ira tale ga na lewenilotu.
Vulica edua se sivia na iwase ka toka e ra. Ni ko wiliwili tiko, vakasamataka na sala o rawa ni veivakavulici vakavinaka cake kina ena kaukauwa ni Yalo me kauta mai na veisau. Vola na veika o vakila ka uqeti kina ena nomu ivolanivuli ni veisiga. Veivosakitaka na nomu vakasama vata kei ira na daukaulotu tale eso, kei ira tale ga na lewenilotu.
Mera vukei na tani mera saumaki mai, ena gadrevi mo veivakavulici ena kaukauwa ni Yalo (raica na Vunau kei na Veiyalayalati 50:13–14, 17–22). E kaya na Turaga, “Raica ena soli vei kemudou na Yalo Tabu ni dou sa kerea ena vakabauta; ia mo dou vunau walega ena veivakauqeti ni Yalo Tabu” (Vunau kei na Veiyalayalati 42:14).
Ni ko masuta na veivuke ena nomu veivakavulici, na kaukauwa ni Yalo Tabu ena kauta na veika o vakavulica “ki na lomadra na luve ni tamata” (2 Nifai 33:1). Ni ko vulica ena Yalo ka ra ciqoma na tamata ena Yalo, drau na qai “[vakararamataki vata]” ka “veivakatataki ka marau vata” (Vunau kei na Veiyalayalati 50:22).
iVakarau ni Masu
O Jisu a vakaraitaka vei keda na ivakarau ni masu (raica na Maciu 6:9–13; 3 Nifai 18:19). Masu ena yalodina kei na gagadre dina mo cakacakataka na veiuqeti o ciqoma mai vua na Yalo Tabu. Na masu ka vakayaco ka, e gadrevi kina na sasaga tikoga ena yalomalumalumu (raica na Moronai 10:3–4; Vunau kei na Veiyalayalati 8:10).
Vakayagataka na vosa ka vakatakila edua na veiwekani ni veilomani kei na veivakarokorokotaki vua na Kalou. Ena vosa Vakaviti, vakayagataka na vosa vaka-ivolanikalou me vaka na Kemuni, Nomuni, mai na kena vakayagataki na iko, kei na nomu.
Dau vakaraitaka e veigauna na vakavinavinaka. Na sasaga dina mo dau vakavinavinaka ena vukei iko mo kila na veivosoti ni Kalou ena nomu bula. Ena dolava na lomamu kei na nomu vakasama ki na veivakauqeti.
Masu “ena [yalomu] taucoko” mo vakasinaiti ena loloma uasivi (Moronai 7:48). Masulaki ira na tani ena yacadra. Masulaki ira o vakavulica tiko. Vakasaqara na veivakauqeti ena sala mo na sureti ira ka vukei ira kina mera lako mai vua na Karisito.
Vuli Yadudua
Vulica na masu ni Turaga ena Maciu 6:9–13. Tarogi iko ena veitaro oqo, ka vola na nomu vakasama ena nomu ivolanivuli ni veisiga.
E veivakayarayarataki vakacava ki na nomu masu, na nomu itavi vakadaukaulotu ena gauna oqo?
Na sala cava soti o sa vaqara tiko kina ena masu, me vakalougatataki na nodra bula na tani?
O sa masu tiko vakacava mo vorata rawa kina na veitemaki?
O dau masuta vakacava na veivuke me sotavi na veika o gadreva, vakayalo ka vakayago talega?
O vakalagilagia vakacava na Kalou ni ko masu?
Gauna ni masu
Na gauna cava e dodonu mo masu kina? Na Turaga e kaya, “ Dou vakasaqaqara vagumatua ka daumasu tiko ga ena vakabauta, ka na yaco me vinaka vei kemudou na veika ckece ” (Vunau kei na Veiyalayalati 90:24).
O Alama e tukuna, “Mo vakarorogotaka vua na Turaga na ka kecega ko kitaka, ia ena dusimaki iko ena veika vinaka ko koya; io mo soli iko vua na Turaga ni ko sa davo sobu ena bogi ka na vakatawai iko ko koya ni ko sa moce; ia ni ko sa yadra ena mataka, mo vakasinaiti ena vakavinavinaka vua na Kalou” (Alama 37:37; raica tale ga na 34:17–27).
Na Turaga e sureti iko mo vagalalataka na veigauna vakanomodi vakai iko mo masu kina: “Curu ki na nomu loqi, ka … masu vua na Tamamu” (3 Nifai 13:6; raica tale ga na tikina e 7–13).
O Peresitedi Gordon B. Hinckley e vakavulica: “E veimataka … , e dodonu mera tekiduru na daukaulotu ka kerea vua na Turaga me sereka na yamedra ka vosa mai vei ira mera vakalougatataki kina o ira era na vakavulica. Kevaka era cakava oqo, ena tubu cake na nodra kila ka. Ena tubu cake na nodra taleitaka na cakacaka. Ena yaco mera kila, ni ira sa italai dina ni Turaga ka vosa tiko ena Vukuna” (“Missionary Service,” First Worldwide Leadership Training Meeting, Janu. 11, 2003, 20).
Vakararavi Vua na Kalou Ni Keda Masu
Na vakabauta na Kalou e kena ibalebale meda vakararavi Vua. Oqo e oka kina na noda nuitaka na Nona lewa kei na Nona gauna, ena saumi ni noda masu (raica na Aisea 55:8–9). E vakavulica o Elder Dallin H. Oaks:
“Se mani vakacava na kaukauwa ni noda vakabauta, ena sega ni vuataka edua na ka ena veisaqasaqa kei na Nona lewa o Koya eda vakabauta. Nanuma tiko oya, ena gauna e sega ni vaka me saumi kina na nomu masu ena sala se na gauna o gadreva kina. Na cakacakataki ni vakabauta na Turaga ko Jisu Karisito edau vakatau tu ga ki na ivakarau vakalomalagi, ki na Nona vinaka kei na lewa kei na vuku kei na gauna ni Turaga. Ni tiko vei keda na vakabauta vaka oya ka vakararavi vua na Turaga, eda na taqomaki ka tiko vakacegu ena noda bula” (“The Atonement and Faith,” Ensign, Epe. 2010, 30).
Me baleta na masu ka vaka me sega ni dau saumi mai, e tukuna kina vakaoqo o Peresitedi Russell M. Nelson:
“Au kila na mataqali yalo o ya! Au kila na ririko kei na tagi ni gauna vakaoqori. Ia au kila talega ni sega vakadua ni dau vakawaleni na noda masu. Na noda vakabauta ena sega vakadua ni tawa vakamareqeti. Au kila ni Nona rai edua na Tamada Vakalomalagi vuku ka yalomatua e rabailevu cake sara mai na noda rai. Ni keda kila tu na noda leqaleqa kei na mosi ni bula oqo, o koya e kila na noda tubu ki na bula tawa oti rawa. Kevaka eda na masu me da kila na Lomana ka soli keda kina, ena vosota kei na yaloqaqa, ena yaco na veivakabulai vakalomalagi ena Nona sala kei na Nona gauna ga” (Jisu Karisito—na Turaga ni Veivakabulai,” Liaona, Nove. 2005, 86).
iVakatakilakila
Sala ki Emeo, mai vei Greg Olsen
Vulica mo Kila na Veivakauqeti ni Yalo
E bibi vei iko kei ira o vakavulica, mera vulica mera kila na veitaratara mai vua na Yalo. Na Yalo edau veitaratara lo, ena veika o vakila, nomu vakasama kei na yalomu. Na parofita o Ilaija a kila ni domo ni Turaga e sega ni tiko ena cagi, na tavuki ni vanua, se na bukawaqa—ia ena “domo lailai e vinaka” (1 Tui 19:12). E “sega ni domo ni kurukuru,” ia edua “ na domo rogo lailai sara ka malumu, vinaka sara me vaka na vakasolokakana,” ka sa “lau basikata sara na yalodra” (Ilamani 5:30).
Na veitaratara mai vua na Yalo ena rawa ni duidui ki na vei tamata tale eso. Se mani vakacava na duidui ni veitaratara oqo, na ivolanikalou e vakavulica na sala meda kilai ira kina. Me ivakaraitaki, na Yalo ena vakavulici iko ka tuberi iko mo caka vinaka. O Koya ena vakararamataka na nomu vakasama. O Koya ena tuberi iko mo lako voli ena yalomalumalumu ka dau lewa vakadodonu. (Raica na Vunau kei na Veiyalayalati 11:12–14 kei na kato ni “Vuli Yadua ena mua ni wase oqo.)
Me saumi na taro “Eda na vakila vakacava na veivakauqeti ni Yalo?” A wilika kina o Peresitedi Gordon B. Hinckley na Moronai 7:13, 16–17. A qai tukuna o koya:
“Sa ikoya oya na taro, ni sa vakayacori taucoko na veika kece. Ena uqeta beka edua me caka vinaka, me duri cake, me tu vakadodonu, me kitaka na ka dodonu, me yalovinaka, me dau lomasoli? Ia sa mai vua na Yalo ni Kalou. …
“… Ia kevaka e veisureti ki na caka vinaka, sa mai vua na Kalou. Ke veisureti ki na caka ca, sa mai vua na tevoro. … Ka, kevaka o cakava tiko na ka dodonu ka bula tiko ena sala dodonu, o na kila e lomamu na cava e tukuna tiko na Yalo vei iko.
“Ko na kila na veivakauqeti ni Yalo mai na vua ni Yalo—sai koya e veivakararamataki, e veitarai cake, na veika e vinaka ka veivakauqeti ka veilaveti ka muataki keda ki na vakanananu vinaka kei na vosa vinaka kei na ivalavala vinaka, sa mai vua na Yalo ni Kalou” (Teachings of Gordon B. Hinckley [1997], 260–61).
Ni ko vaqara ka muria na veidusimaki ni Yalo Tabu, ena toso cake na nomu rawa ni vakila ka kila vakavinaka na Nona veivakauqeti ni toso tiko na gauna (raica na 2 Nifai 28:30). Ena so na sala, na nomu kila vakavinaka na vosa ni Yalo e vaka na vulici ni dua na vosa vou. E dua na cakacaka vakamalua ka gadrevi kina na sasaga vagumatua kei na vosota.
Vakasaqara na veituberi ni Yalo Tabu ena lomamu taucoko. Kevaka o vakaogai iko tiko ena veika tale eso, o na sega beka ni vakila na vakasolokakana malumu ni Yalo. Se ena waraka beka o Koya me veitaratara yani, me yacova ni ko vaqara na Nona veivakayarayarataki ka lomasoli ena yalomalumalumu mo cakacakataka na Nona veivakauqeti.
Na domo era tiko e vuravura era vinakata tu mo malele yani vei ira. Era rawa ni drigiti tani na veivakauqeti vakayalo, vakavo ga ke o solia edua na tikina vua na Yalo e lomamu. Nanuma na ivakasala oqo mai vua na Turaga: “Dou tiko lo, mo dou kila niu sa Kalou” (Same 46:10; raica tale ga na Vunau kei na Veiyalayalati 101:16).
iVakatakilakila
Elder David A. Bednar
“Na Kalou e vakayagataka e vuqa sara na sala me solia kina na ivakatakila vei ira na Luvena tagane kei na yalewa, me vaka na vakanananu ki na vakasama kei na veika e vakilai ki na yalo, tadra, … kei na veivakauqeti. Eso na ivakatakila ena ciqomi vakatotolo ka vakaukauwa; eso ena kilai mai vakamalua ena sala malumu. Na ciqomi, kilai, kei na cakacakataki ni ivakatakila mai vua na Kalou era isolisoli vakayalo ka dodonu vei keda meda gadreva ka vakasaqara” (David A. Bednar, “The Spirit of Revelation in the Work,” 2018 semina ni veiliutaki ena tabana ni kaulotu).
Vuli Yadudua
Vulica na ivolanikalou ka tuvai toka e ra. Vakananuma na veigauna ko a sotava kina edua na ka e vakilai, vakanananu, se veivakauqeti ka vakamacalataki ena veitikina oqo. Ni ko vuli ka tubu na veika o kila, tomana eso tale na ivolanikalou ki na lisi oqo. Vakananuma na sala o rawa ni vakayagataka kina na veivakavuvuli oqo, me vukei ira na tani mera vakila, ka kila na Yalo.
Vakatataki rau ruarua na qasenivuli kei na gonevuli.
Vakararavi vua na Yalo
Me vaka ni ko italai ni Turaga, mo cakava na Nona cakacaka ena Nona sala kei na Nona kaukauwa. A vakavulica na Parofita o Josefa Simici ni “sega ni rawa vua e dua na tamata me vunautaka na Kosipeli ke sega na Yalo Tabu” (Nodra iVakavuvuli na Peresitedi ni Lotu: Josefa Simici, 332).
Vakararavi vua na Yalo me tuberi iko ena veitiki kece sara ni nomu cakacaka. O Koya ena vakararamataki iko ka vakauqeti iko. Ena vukei iko mo kunea na tamata mo vakavulica, ka na kauta mai na kaukauwa ki na nomu veivakavulici. O Koya ena veivuke ni ko vukei ira na lewenilotu, lewenilotu era sa lesutale mai, kei ira na saumaki vou me vaqaqacotaki na nodra vakabauta.
Eso na daukaulotu era lomadei vakataki ira. Ka so e sega. Ena yalomalumalumu vakararavi ena loma e dei kei na vakabauta vei Jisu Karisito, ka sega vei iko. Vakararavi vua na Yalo, ka sega ki na nomu taledi kei na ka o rawa ni cakava. Na Yalo Tabu ena vakalevutaka na nomu sasaga me uasivia na ka o rawa ni cakava vakataki iko.
Vulici ni iVolanikalou
Vulica na ivolanikalou ka toka e ra, ka vakasamataka na sala era sauma kina na veitaro bibi oqo, ka dodonu mo dau taroga e veisiga. O na vakayagataka vakacava na ivakavuvuli ena veitikina oqo ki na nomu sasaga ni vaqaqara, soqoni ni tuvatuva-ka, kei na vuli yadua se vakaitokani? O na vakayagataka vakacava na veitikina oqo ki na nomu sasaga mo veivakavulici, sureta na tamata mera caka veidinadinati, ka talemuria na veidinadinati?
Vakadeitaka na Nomu Veivakauqeti ki na iVurevure Nuitaki Eso
Ni ko masulaka na veivakayarayarataki, vakatauvatana na nomu vakauqeti vakayalo kei na ivolanikalou kei na nodra ivakavuvuli na parofita bula. Na veivakauqeti mai vua na Yalo ena salavata kei ira na ivurevure eso oqo.
Vaqara na iVakatakila me baleta Na Nomu iLesilesi
Mo vakadeitaka ni veika o vakila era salavata kei na nomu ilesilesi. Kevaka o sega ni kacivi ena lewa dodonu, ena sega ni rawa ni ko vakayagataka na veivakauqeti mai vua na yalo mo veivakasalataki se vakadodonutaki ira kina na tani. Me ivakaraitaki, o na sega ni ciqoma na ivakatakila mo tukuna vua edua na bisopi na ka me cakava ena nona veikacivi.
iVakatakilakila
iSolisoli ni Rarama
Kila na Veivakauqeti Dina ni Yalo
O Peresitedi Howard W. Hunter e vakasalataka: “Meu tukuna mada edua na ivakasala.… Au nanuma ni kevaka eda na sega ni qarauna … , eda rawa ni tekivu me tovolea me sosomitaka na veivakauqeti dina ni Yalo ni Turaga ena ivalavala eso e tawa kilikili se veivakatotogani. Au dau kauwai vakalevu ni vakatauvatani na Nona tiko na Yalo ki na luluvu ni yalo kei na drodro vakayauyau ni wai ni mata. Sa rawa vakaidina ki na Yalo ni Turaga me kauta mai na luluvu ni yalo, oka kina na turu ni wai ni mata, ia na ivakaraitaki e tuba e sega ni dodonu me kilasevati ki na Nona tiko na Yalo vakai koya” (The Teachings of Howard W. Hunter [1997], 184).
Kua ni Tovolea mo Vakasaurarataka na Veika Vakayalo
Na veika vakayalo ena sega ni rawa ni vakasaurarataki. O na rawa ni vakavurea edua na ivakarau kei na ituvaki ena sureta na Yalo, ka rawa ni ko vakarautaki iko, ia o sega ni rawa ni vakatulewataka na sala kei na gauna ena yaco mai kina na veivakauqeti. Mo dau vosota ka nuitaka ni ko na ciqoma na ka o gadreva ena kena gauna donu.
Maroroya Na Veika Sotavi Vakayalo Me Ka Tabu
Vaka dua na daukaulotu, o na mai kila beka vakalevu cake na veika sotavi vakayalo, ni vakatauvatani kei na veigauna ni nomu bula e liu. Na veika sotavi oqo era ka tabu ka dau yaco mo na vakavulici, dusimaki se vakadodonutaki kina.
E levu vei ira na ka o sotava oqo ena vinaka me na tiko ga vei iko. Wasea ga na ka e vakatakila vei iko na Yalo, na rawa ni vakalougatataki ira kina na tamata (raica na Alama 12:9; Vunau kei na Veiyalayalati 63:64; 84:73).
Vakayagataka Na Nomu Vakatulewa Vinaka Duadua ena So na iTuvaki
Ena so na gauna eda na gadreva meda liutaki mai vua na Yalo ena veika kecega. Ia, na Turaga edau vinakata vakawasoma vei keda meda dau vakayagataka na noda vakatulewa vinaka duadua (raica na Vunau kei na Veiyalayalati 60:5; 61:22; 62:5). A vakavulica o Peresitedi Dallin H. Oaks:
“Na gagadre meda liutaki mai vua na Turaga edua na ivakarau vinaka, ia e gadrevi me salavata kei na kena kilai ni Tamada Vakalomalagi e dau laiva tu e vuqa na vakatulewa ki na noda digidigi yadua. Na vakatulewa ni tamata yadua, edua tiko vei ira na ivurevure ni tubu e nakiti meda mai vakila ena bula oqo. O ira era tovolea me biliga vua na Turaga na vakatulewa kecega, ka kerea na ivakatakila ena vei digidigi kece, era na sotava na ituvaki eso era na masuta kina na veidusimaki ka ra na sega ni ciqoma. Me kena ivakaraitaki, oqo e rawa ni dau yaco ena vei ituvaki eso ka sega ni dau bibi sara na digidigi se ena digidigi ka dau donu ruarua.
“E dodonu meda dikeva taumada ena noda vakasama, ni da vakayagataka na kaukauwa ni noda rawa ni vakadeuca na ka, ka sa vakatikora oti tu e lomada na noda Dauveibuli. Meda qai masuta na veidusimaki ka cakacakataka kevaka eda ciqoma. Kevaka eda sega ni ciqoma na veidusimaki, e dodonu meda cakacaka ena noda vakatulewa vinaka duadua. O ira na tamata era gumatua ni vaqara na ivakatakila mera dusimaki kina ena veika eso ka sega ni digitaka na Turaga meda dusimaki kina, era rawa ni vakavurea eso na isaunitaro mai na nodra tatadra se nodra vakasama ga, se rawa sara ga ni ira ciqoma na isaunitaro mai na dua na ivurevure lasu ni ivakatakila” (“Our Strengths Can Become Our Downfall,” Ensign, Oko. 1994, 13–14).
Vulici ni iVolanikalou
Na vakararavi vua na Yalo e rui bibi sara, ka vakaroti keda kina na Turaga meda kakua ni cakitaka se bokoca na Yalo. Na cava o vulica mai na veitiki ni ivolanikalou e ra?
Wasea vakarua edua na draunipepa. Vakatoka edua na iyatu me “Na cava a cakava na Turaga” kei na kena ikarua me “Na cava a cakava o Liai se o Nifai.” Wilika na italanoa ni Liaona kei na kamusu ni dakai titi (1 Nifai 16:9–31) se na italanoa ni tara waqa nei Nifai (1 Nifai 17:7–16; 18:1–6). Vola na veika a yaco ena italanoa ena iyatu e veiganiti kaya. Vakasamataka se cava e rawa ni vakavulica vei iko na italanoa me baleta na ituvaki ni veivakauqeti.
Taleva na nomu ivolaniveisiga ka vaqara na gauna eso ko a liutaki kina mai vua na Yalo se vakila na isolisoli ni Yalo. Vakananuma na gauna, na vanua, kei na vuna era a yaco kina na veika o sotava oqo. E a vakaraitaki vakacava na liga ni Turaga? Na cava o a vakila? Na vakananumi ni veika sotavi oqo, e rawa ni vukei iko mo kila na Yalo.
Vulica na Alama 33:1–12 kei na Alama 34:17–31. Na taro cava erau a sauma tiko o Alama kei Amuleki? (Railesuva na Alama 33:1–2.) Era sauma vakacava na veitaro oqo? Na veivakadeitaki cava era solia?
Sa yalataka na Turaga ni Yalo ena tuberi keda ena veisala bibi e vuqa. Ni o wilika na veitiki ni vola e ra, vakaraica na veitiki ni nomu cakacaka ka na gadrevi kina na veidusimaki ni Yalo. Na cava na kedra ibalebale na ivakavuvuli ka tiko ena ivolanikalou e ra, ki na nomu vuli vakayadua kei na vuli vakaitokani? ki na bose ni matabose ni tikina, koniferedi ni iwasewase, lotu ni papitaiso, kei na veisoqoni tale eso?
Veivosakitaka na masu drau dau cabora vakaitokani. Era dau dusimaki beka mai vua na Yalo Tabu? Drau sa ciqoma beka vakacava na isau ni nomudrau masu vakaitokani vata? Ni drau masu vakaitokani vata, drau:
Vakabauta beka ni Kalou ena solia na veika drau vinakata ena ka dodonu ka vaka na Nona lewa?
Dau ciqoma ka vakavinavinakataka beka na isau ni nomudrau masu?
Dau masulaki ira beka na tamata ena yacadra ka kauwaitaka na nodra gagadre?
Dau veimasulaki beka vakai kemudrau me dusimaki kemudrau na Yalo?
Dau kila beka na isau ni nomudrau masu?
Dau masu beka ka yalataka mo drau cakacakataka na veiuqeti drau ciqoma?
Veivosakitaka na sala mo drau vakasaqara vagumatua cake kina na Yalo.
Veivosakitaka na sala duidui eso era vakamacalataka kina na tamata na veivakayarayarataki ni Yalo Tabu. Vola ena nomu ivolanivuli ni veisiga na veika era tukuna o ira o vakavulica tiko, me baleta na veika era sotava vata kei na Yalo. O na vukei ira vakacava na tani mera kila na veivakayarayarataki tabu oqo?
Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu
Ke ganita, mera wasea na daukaulotu edua na italanoa se veika e sotavi, era a rogoca ena dua na soqoni ni soli ivakadinadina wale tikoga oqo, ena veivakavulici, se ituvaki tale eso. Nai talanoa vakayalo kei na veika era sotava eso tale na tamata, ena rawa ni vukei iko me tarai cake na nomu vakabauta, ka kila ni veivakayarayarataki ni Yalo e rabailevu ka dau vakaraitaki mai vakawasoma.
Kerei ira na daukaulotu mera vosa me baleta na kaulotu kei na kaukauwa ni Yalo Tabu.
Veivosakitaka na sala e veivuke kina na nomu dau vakavinavinaka, mo raica kina na veisala lalai ia e bibi ni Nona dau vakalougatataki iko na Turaga (raica na Ica 3:5; Vunau kei na Veiyalayalati 59:21). Veivosakitaki na sala ni kena vakaraitaki na vakavinavinaka.
Vakasamataka mo kerea edua na lewenilotu vou me wasea na sala a vakayarayarataki kina mai vua na Yalo ni a vulica tiko na veika baleta na Lotu. Kerea na tamata oya me wasea ga na veika a sotava ka vakila ni veiganiti.
Liuliu ni Tabana ni Kaulotu kei na Vukevuke ni Liuliu ni Tabana ni Kaulotu
O na rawa beka ni kerei ira na daukaulotu mera okata ena nodra ivola vakamacawa vei iko, na veika sotavi vakayalo ka veiganiti.
Ena gauna ni veivakatarogi se veitalanoa, dau tarogi ira vagauna na daukaulotu me baleta na nodra masu ena veimataka kei na veiyakavi. Kevaka e gadrevi, veivakasalataki vata kei ira me baleta na sala me vakayacori kina na nodra masu me vakaibalebale vakalevu cake.
Tarogi ira na daukaulotu ena sala era vukei ira kina o ira era vakavulica tiko mera vakila ka kila na Yalo.