Veikacivi ena Tabana ni Kaulotu
Wase 12: Vukei Ira na Tamata Mera Vakavakarau ki na Papitaiso kei na Veivakadeitaki

“Wase 12: Vukei Ira na Tamata Mera Vakavakarau ki na Papitaiso kei na Veivakadeitaki,” Vunautaka na Noqu Kosipeli: E Dua na iDusidusi ki na Wasei ni Kosipeli i Jisu Karisito (2023)

“Wase 12,” Vunautaka na Noqu Kosipeli

iVakatakilakila
Papitaisotaki Jisu Tiko o Joni na Dauveipapitaisotaki, mai vei Greg K. Olsen

Wase 12

Vukei Ira na Tamata Mera Vakavakarau ki na Papitaiso kei na Veivakadeitaki

Vakasamataka Oqo

  • Me’u na vukei ira vakacava na tamata me ra vakavakarau ki na papitaiso kei na veivakadeitaki?

  • Me’u na vakayacora vakacava e dua na veivakatarogi ni papitaiso?

  • E tuvanaki ka qaravi vakacava e dua na lotu ni papitaiso veilaveti?

  • Na cava e bibi kina me vakaleweni ka vakau na Fomu ni Papitaiso kei na Veivakadeitaki?

  • Me’u na tokoni ira vakacava na lewenilotu vou?

Na papitaiso sa dua na cakacaka vakalotu rekitaki ni inuinui ka kauta mai na kaukauwa ni Kalou ki na bula ni dua na tamata. Na kaukauwa oqori e lako mai ena ciqomi ni isolisoli ni Yalo Tabu. Ena tomani tikoga ni vosota tiko me yacova na ivakataotioti e dua na tamata ena nona maroroya tiko na veiyalayalati ni papitaiso.

Na inaki ni nomu veivakavulici o ya mo vukei ira na tani me ra taracake na nodra vakabauti Jisu Karisito, veivutunitaka na nodra ivalavala ca, ka papitaiso ena gagadre dina me ra muri Karisito. Me vaka a vakavulica o Momani, “sa ivua taumada ni veivutuni na papitaiso” (Moronai 8:25). Ni ra maroroya na tamata o vakavulica na iyalayala o sureti ira me ra cakava, era na vakarau tu me ra cakava ka maroroya na veiyalayalati kei na Kalou ka marautaka na veivakalougatataki yalataki.

Na papitaiso kei na veivakadeitaki e sega ni icavacava ni vanua me yacovi. Ia, na cakacaka vakalotu oqo sa matamata era curu yani kina na luve ni Kalou ki na salatu ni veiyalayalati. Na sala oqo ena veimuataki ki na cakacaka vakalotu, veiyalayalati, kei na veivakalougatataki rekitaki ni valetabu—ka kena itinitini ki na bula tawamudu (raica na 3 Nifai 11:20–40).

Veika Gadrevi me baleta na Papitaiso kei na Veivakadeitaki

E sureti ira kece na Luvena na Kalou me ra lako mai Vua ena papitaiso kei na veivakadeitaki (raica na 2 Nifai 26:33; 3 Nifai 27:20). Na veika e gadrevi me baleta na papitaiso e sa tautauvata vei keda kece.

Mai na Vunau kei na Veiyalayalati 20:37:

  • Vakayalomalumalumutaki iko e mata ni Kalou.

  • Gadreva mo papitaiso.

  • Lako mai ena yalo raramusumusu ka bibivoro.

  • Veivutunitaka na nomu ivalavala ca kecega ka masulaka na veivosoti.

  • Lomasoli mo taura kivei iko na yaca i Karisito.

  • Mo vakadeitaka mo qaravi Karisito me yacova na ivakataotioti.

  • Vakaraitaka ena nomu cakacaka ni o sa ciqoma na Yalo i Karisito ki na vakabokoci ni nomu ivalavala ca.

Mai na Mataveiliutaki Taumada kei na Kuoramu ni iApositolo Le Tinikarua:

  • Sauma vakadodonu na taro ni veivakatarogi ni papitaiso.

  • Ciqoma na lesoni taucoko ni kaulotu.

  • Sotavi peresitedi ni kuoramu ni italatala qase, peresitedi ni iSoqosoqo ni Veivukei, kei bisopi.

  • Tiko ena vica na soqoni ni sakaramede.

Na veika oqo era sa ivakatakilakila ni ivakarau vakayalo ni saumaki mai. Ni ra rawata na tamata na veika oqo, era sa vakarau tu ki na cakacaka vakalotu tabu ni papitaiso kei na veivakadeitaki.

Ni sa biuta e dua na tamata e dua na tikinisiga ni papitaiso tudei::

  • Railesuva vakavinaka na nona itukutuku ena app ni Vunautaka na Noqu Kosipeli mo vakadeitaka kina ni o sa vakavulica na ivunau kei na ivakaro e gadrevi.

  • Cakava e dua na ituvatuva ni veika e gadrevi me vakarautaki kina na papitaiso kei na veivakadeitaki. Railesuva na ituvatuva oqo vata kei koya na tamata oqo.

  • Kevaka e rawa, sureti koya me tiko ena dua na lotu ni papitaiso ni bera na nona papitaiso.

Vulici ni iVolanikalou

Vulica na ivolanikalou eso oqo. O na vukei ira vakacava o vakavulica me ra vakavakarau ki na papitaiso kei na veivakadeitaki? Vola na veika o sa vulica tiko mai na nomu vuli.

iVakatakilakila
Na Dauveivakabulai Yalomalua, mai vei Greg K. Olsen

Vukei Ira na Tamata Mera Vakavakarau ki na Nodra Veivakatarogi ni Papitaiso

Na veivakatarogi ni papitaiso sa dua na ikalawa bibi me vakadeitaki kina ni dua na tamata e sa sotava na veika e gadreva na Turaga me baleta na papitaiso. Qai tuvanaka ga e dua na veivakatarogi ni papitaiso ni sa vakarau tu e dua na tamata.

Vukei ira na tamata me ra vakavakarau ki na veivakatarogi oqo me rawa ni ra lomavinaka kina. Vakamacalataka se na vakacava tu beka. Tukuna vei ira ni ra na sota kei na dua tale na daukaulotu vakataki iko.

Vakamacalataka na inaki ni veivakatarogi. Sa dua na madigi vei ira me ra vakadinadinataka ni ra sa “veivutunitaka vakaidina na nodra ivalavala ca kecega, [ka] vakaraitaka dina ena nodra cakacaka ni ra sa rawata na Yalo i Karisito me bokoci kina na nodra ivalavala ca” (Vunau kei na Veiyalayalati 20:37).

Wasea na taro ena taroga o koya ena veivakatarogi (raica e ra). Oqo ena vukea na tamata oqo ena nona vakavakarau me na sauma.

Raica me kila vinaka tu o koya na veika o sa vakavulica kei na veiyalayalati ena cakava ena papitaiso. Na veiyalayalati oqo me:

  • Lomasoli me taura kivei koya na yaca i Jisu Karisito.

  • Muria na ivakaro ni Kalou.

  • Qarava na Kalou kei ira na tani

  • Vosota ki na ivakataotioti. (Raica na lesoni 4.)

Wasea na ivakadinadina me baleta na veivakalougatataki cecere e yaco mai ena papitaiso kei na vakadeitaki kei na maroroi ni veiyalayalati ni papitaiso. Na veivakalougatataki oqo e oka kina na vakabokoci ni ivalavala ca kei na isolisoli ni Yalo Tabu.

Vakayacori ni Veivakatarogi ni Papitaiso

Na tamata yadua e gadreva me papitaiso ena vakatarogi mai vua e dua na iliuliu vakadonui ni matabete. Ena dua na tabana ni kaulotu, na tamata oqo sa ikoya na iliuliu ni tikina se iwasewase. Ena vakayacora o koya na veivakatarogi vei ira:

  • Na tamata yabaki 9 ka qase cake era sa bera ni bau papitaiso ka vakadeitaki.

  • Gone yabaki 8 ka qase cake ka rau sega ni lewe ni Lotu na nona itubutubu.

  • Gone yabaki 8 ka qase cake ka tiko e dua na nona itubutubu e sa papitaiso ka vakadeitaki talega.

Sa vakarautaki koto e ra na idusidusi me baleti koya e veivakatarogi.

  • Qarava na veivakatarogi ena dua na vanua logavinaka, ka vakatikitiki e rawa ni vakilai kina na Yalotabu.

  • Ni vakatarogi e dua na gone, itabagone, se marama, me na tiko voleka na itokani nei dauveivakatarogi ena dua na rumu voleka, itikotiko ni olo, se olo. Kevaka e gadreva o koya e vakatarogi, e rawa ni sureti e dua tale na itabaqase me na tiko talega ena veivakatarogi. Me na levea na daukaulotu na ituvaki kece sara e rawa ni vakavuna me ra nanumi cala.

  • Tekivu ena masu

  • Vukei koya me logavinaka.

  • Cakava na veivakatarogi me dua na ka e veilaveti vakayalo.

  • Raica me kila vinaka o koya na inaki ni veivakatarogi.

  • Taroga na taro ni veivakatarogi ni papitaiso ka tuvai koto e ra. Moica na taro ki na nona yabaki, yalomatua, kei na ituvaki ni tamata oqo ke gadrevi vakakina.

  • Sauma na nona taro eso.

  • Railesuva na itukutuku ena Fomu ni Papitaiso kei na Veivakadeitaki me donu vinaka. Kevaka e gonelailai o koya, e dodonu me sainitaka e dua na itubutubu se dauveisusu na fomu ni bera ni papitaiso (raica na iwasewase ni “Papitaiso kei na Veivakadeitaki: Taro kei na Kena iSau” ena iwase oqo).

  • Sureti koya me wasea na nona ivakadinadina se na veika e vakila.

  • Vakavinavinakataka na nomu rawa ni sotavi koya.

Taro ni Veivakatarogi ni Papitaiso

Sa ikoya oqo na taro ni veivakatarogi ni papitaiso:

  1. O vakabauta li ni Tamada Tawamudu na Kalou? O vakabauta li ni ko Jisu Karisito sa Luve ni Kalou, na iVakabula ka Dauveivueti kei vuravura?

  2. O vakabauta li na Lotu kei na kosipeli i Jisu Karisito sa vakalesui mai vua na Parofita o Josefa Simici? O vakabauta li ni [o Peresitedi ni Lotu ni gauna oqo] e dua na parofita ni Kalou? Na cava na ibalebale ni ka oqo vei iko?

  3. Na cava na ibalebale ni veivutuni vei iko? O sa vakila dina li ni ko sa veivutunitaka na nomu ivalavala ca e liu?

  4. O sa vakavulici oti mai ni kena leweni Na Lotu i Jisu Karisito ni Yalododonu Edaidai e okati kina na bulataki ni ivakavuvuli ni kosipeli. Na cava o kila me baleta na ivakavuvuli era koto oqo? O sa tuvakarau mo talairawarawa kina?

    • Na lawa ni tiko savasava, e sega ni vakatara na veimoceri ena taudaku ni vakamau na tagane kei na yalewa

    • Na lawa ni ikatini

    • Na Vosa ni Vuku

    • Vakatabuya na Siga ni Vakacecegu, ka okati kina na vakaivotavota ena sakaramede ena veimacawa ka dau qaravi ira na tamata

  5. O a cakava beka e dua na cala bibi? Kevaka e vakakina, o sa tiko oqo vaka tovolei se cakacakataka tiko e tuba na kemu itotogi?

  6. O sa bau vakaitavi beka ena dua na vakalutu? (Raica na iVoladusidusi Raraba, 38.6.1.)

  7. Ena gauna o sa papitaiso kina, ko sa na veiyalayalati kina vata kei na Kalou ni sa lomamu mo taura na yaca i Karisito, qaravi ira na tamata, ka tu mo ivakadinadina ni Kalou ena veigauna kecega, ka maroroya na Nona ivakaro ena gauna ni nomu bula taucoko. O sa vakavakarau tiko li mo na vakayacora na veiyalayalati oqo ka segata mo yalodina kina?

Me baleta na idusidusi kevaka e sauma vakadodonu na tamata oqo na taro 5 se 6, raica na iVoladusidusi Raraba, 38.2.8.7 kei na 38.2.8.8.

Mo kila vakavinaka na lawatu kei na idusidusi e semati ki na papitaiso kei na veivakadeitaki ena iVoladusidusi Raraba, 38.2.8. Eso vei ira na lawatu oqo era oka tiko kina na veituvaki vakatabakidua o na rawa ni sotava.

Ni oti na veivakatarogi, me ra duavata tale na daukaulotu kei koya e vakatarogi kei na daukaulotu tale eso. Kevaka e sa vakarau tu na tamata oqo me papitaiso, e rau na vakamacalataka na daukaulotu na veika ena yaco ena lotu ni papitaiso. E rau vakamacalataka talega ni veivakadeitaki e dau vakayacori ena dua na soqoni ni sakaramede ni tabanalevu e vakaitikotiko kina o koya.

Ni Gadrevi me Lokuyarataki na Papitaiso

Ena so na gauna e gadrevi me vakadaroi na papitaiso ena vuku ni bolebole eso ena ivakadinadina se na bula kilikili. Ni yaco oqo, mo qarava ena veinanumi kei na veimaroroi. Vukei koya me kila na sala me vakavakarau kina ki na papitaiso ena dua na tikinisiga mai muri.

Vakayaloqaqataki koya ka solia na inuinui vei Karisito kei na Nona Veisorovaki. Kerei ira na lewe ni tabanalevu me ra vakarautaka na veitokani vinaka. Tomana tiko na vakavulici ni ivakavuvuli taumada ni kosipeli me yacova ni sa vakarau tu na tamata oqo me papitaiso ka vakadeitaki. Wawa me yacova na gauna oya mo tuvanaka e dua na tikinisiga vou ni papitaiso.

Papitaiso kei na Veivakadeitaki: Taro kei na Kena iSau

Au gadreva beka na veivakadonui me’u papitaisotaka e dua na gone? Na Lotu e kauwaitaka na nodra tiko vinaka na gone kei na logaloga vinaka ni draki ni bula ena nodra itikotiko. E dua na gone, me vaka e vakamatatataki ena lawa ni vanua, e rawa ni papitaiso ni sa sotavi nai tuvaki ruarua oqo:

  1. Sa vakadonui vakaivola mai vei rau (se dua) na itubutubu se o rau (se dua) na dauveisusu vakalawa. E dodonu me ra kila vakararaba na ivunau ena vakavulici vua na gone me vaka ni sa dua na lewe ni Lotu. Sa dodonu talega me ra tuvakarau me tokoni koya na gone me cakava ka maroroya tiko na veiyalayalati ni papitaiso.

  2. O koya ena vakayacora na veivakatarogi mena vakadeitaka ni sa kila vinaka na gone na veiyalayalati ni papitaiso. E dodonu me nuidei o koya ni na segata na gone me maroroya na veiyalayalati oqo ena nona talairawarawa ki na ivakaro, oka kina na tiko ena veisoqoni ni Lotu.

Au gadreva beka na veivakadonui nei watina me’u papitaisotaka e dua vei rau na veiwatini? Io. E dua na tamata vakawati e dodonu me vakadonuya mai o watina ni bera ni papitaiso.

Kevaka e se bera ni vakarau tu me papitaiso e dua na itubutubu ena dua na matavuvale, me’u na papitaisotaki ira beka eso tale na lewe ni matavuvale se wawa me yacova ni sa vakarau tu na itubutubu oya? E dau vinaka cake me ra papitaiso vata na lewe ni matavuvale. Ia, kevaka eso era se bera ni vakarau tu, sa rawa me ra papitaiso na lewe ni matavuvale yadua kevaka ga sa soli na veivakadonui e gadrevi.

E dodonu beka me vakaberaberataki na nodra papitaiso na lewe ni matavuvale me yacova ni sa ciqoma rawa o tama na Matabete i Eroni me vakayacora kina o koya na papitaiso? Sega. O ira na turaga se qai papitaiso vou era sega ni dau ciqoma na Matabete i Eroni ena siga era papitaiso kina. E na gadrevi taumada me ra vakatarogi mai vei bisopi ka tokoni mai vei ira na lewe ni tabanalevu.

E rawa beka ni’u vakavulica ka papitaisotaka e dua e sa vakagalalataka na nona lewena na Lotu se sa vakasukai na nona itutu vaka lewenilotu? O ira na tamata sa vakasuka na nodra lewena na Lotu se o ira era sa vakagalalataki na nodra lewena na Lotu e rawa ni ra vakacurumi tale ena papitaiso kei na veivakadeitaki. Kevaka era vinakata me vakavulici, veivosaki kei ira na iliuliu ni matabete vakaitaukei kei na nomu peresitedi ni tabana ni kaulotu me baleta na itavi mo qarava.

Ena dua na iteki, na vakacurumi tale ena papitaiso sa tiko ena ruku ni nona veidusimaki na bisopi se peresitedi ni iteki. Ena dua na tabana ni kaulotu, na vakacurumi tale e tiko ena ruku ni nona veidusimaki na peresitedi ni tabana ni kaulotu. O ira na iliuliu oqo era na ciqoma na veidusimaki mai vei iratou na Mataveiliutaki Taumada me vaka e gadrevi. Era sega ni dau vakayacora na daukaulotu na veivakatarogi ni papitaiso oqo se vakalewena na Fomu ni Papitaiso kei na Veivakadeitaki. Ia, e rawa ni sureti e dua na daukaulotu me vakayacora na papitaiso.

O ira na lewe ni Lotu e liu ka ra sa curutale era sega ni lewenilotu saumaki mai. Ia, e rawa ni dua na nodra itavi bibi na daukaulotu ena so na gauna ena nodra vukei ira me ra marautaka tale na veivakalougatataki ni lewe ni Lotu.

Vakacava ke dua e sa vakadeitaki tu na tikinisiga ni nona papitaiso ia e sega ni maroroya tiko na nona yalayala kece? Wawa me vakarautaki e dua na veivakatarogi ni papitaiso me yacova ni sa maroroya tiko na tamata oqo na yalayala ka sotava na veika e gadrevi ena papitaiso. Raica na “Ni Gadrevi me Lokuyarataki na Papitaiso” ena iwase oqo.

Vakacava ke rau vinakata e dua na veiwatini me rau papitaiso ia erau bula vata tiko? Erau na sega ni rawa ni papitaiso e dua na veiwatini ka rau vakaitikotiko vata ena taudaku ni vakamau vakalawa me baleta e dua na tagane kei na yalewa me yacova ni rau sa bulataka na lawa ni tiko savasava. Sa kena ibalebale oqo ni sa sega tale ni bula vata—se veiwatini vakadodonu se vakatagane se vakayalewa vata—se, me baleta e dua na tagane kei na dua na yalewa, sa kena ibalebale na vakamau. Oqo e oka talega kina na cakacakataki ni vakabauta ki na veivutuni me vaka e vakamacalataki ena Vunau kei na Veiyalayalati 20:37. Na nodrau vakamau e dua na tagane kei na dua na yalewa e sa tiki bibi ni Nona ituvatuva na Kalou

Na taro 5 kei na 6 ena veivakatarogi ni papitaiso e taroga tiko kevaka e dua e sa vakayacora e dua na cala bibi se vakaitavi ena dua na vakalutu. Na cava me’u cakava kevaka e dua e sauma na “io” ki na dua vei rau na taro oqo? Kevaka o sotava e dua na ituvaki vakaoqo ena gauna ni veivakatarogi ni papitaiso, kakua ni taroga na kena matailalai. Kakua ni yalataka ni na vakadonui na tamata oqo me papitaiso. Ia, vakaraitaka ga na nomu loloma ka vakamacalataka ena yalovinaka ni dua e yalomatua ka kilaka cake ena veivosaki kei koya me veivuke.

Vakauta e dua na kerekere ni veivakatarogi ni papitaiso vua na nomu peresitedi ni tabana ni kaulotu. O koya se dua na nona daunivakasala ena sota kei na tamata oqo. Raica na iVoladusidusi Raraba, 38.2.8.7 kei na 38.2.8.8.

Na cava me’u cakava kevaka e sa caka oti tu e dua na ivolatukutuku ni lewenilotu ni bera ni’u vakauta na Fomu ni Papitaiso kei na Veivakadeitaki? Veitaratara kei nomu peresitedi ni tabana ni kaulotu me baleta na veidusimaki.

Vuli Yadudua

Vakasamataka mada na veika o na rawa ni vakila ke o a vakatarogi o iko. Navuca na taro eso oqo ka vola na veika o nanuma.

  • Ena vakacava beka na kena sega ni logaloga vinaka vei iko na veivakatarogi qo? Na cava e rawa ni cakava se kaya o koya e veivakatarogi me vakacegui iko kina?

  • Na sala cava beka o na vinakata me veimaliwai kina kei iko o koya e veivakatarogi?

  • Na sala cava beka o na vinakata me sauma kina o koya e veivakatarogi na nomu vakatitiqa se nanuma cala se o vakatusa na ivalavala ca bibi?

iVakatakilakila
papitaiso

Na Lotu ni Papitaiso

Na lotu ni papitaiso kei na veivakadeitaki e dodonu me ka bibi vakayalo vua e dua na lewenilotu vou. E dodonu me vakarautaki sara na lotu ni papitaiso ena gauna ga sa sotava kina e dua na tamata na veika e gadrevi me baleta na papitaiso. Vakamacalataka na veika e tuvanaki kei na vuna. Veivosakitaka na isulusulu dodonu, oka kina na ivakarau ena soli kina vua na isulu vulavula me daramaki me baleta na papitaiso.

Na lotu ni papitaiso me baleti ira na saumaki mai e dau tuvanaki ena ruku ni nodratou veidusimaki na matabisopi. Na iliuliu ni kaulotu ena tabanalevu (ke sa kacivi e dua) se lewe ni mataveiliutaki ni kuoramu ni italatala qase ka liutaka tiko na cakacaka ni kaulotu e tuvanaka ka liutaka na lotu oqo. O koya e cakacaka vata kei ira na daukaulotu tudei. Na lotu ni papitaiso e dodonu me rawarawa, lekaleka walega, ka veilaveti vakayalo.

Sureta e dua na lewe ni matabisopi, dua na lewe ni mataveiliutaki ni iSoqosoqo ni Veivukei, kei na dua na lewe ni mataveiliutaki ni kuoramu ni italatala qase (ke sega ni veiliutaki tiko) me ratou tiko ena lotu ni papitaiso. Ni ganita, sureti ira na iliuliu tale eso ni isoqosoqo, iliuliu ni itabagone, kei ira na turaga kei na marama dauveiqaravi (kevaka e lesi). Cakacaka vata kei koya ena papitaiso tiko me sureti ira na itokani kei na wekana me ra tiko ena lotu ni papitaiso kei na veivakadeitaki.

Vakasamataka mo sureti ira eso tale o vakavulica tiko. Na veika sotavi oqo ena vukei ira me ra vakila na Yalotabu ka vulica eso tale na ka me baleta na kosipeli. Ni oti na lotu, talemuria mo veivosakitaka na veika era sa sotava ka sureti ira me ra vakavulici.

Na lotu ni papitaiso e oka kina na veika oqo:

  1. Sere kei na ivakatagi ni curumai

  2. Dua na veikidavaki lekaleka mai vua na iliuliu ni matabete e liutaka tiko na lotu (e dodonu me vakatulewa e dua na lewe ni matabisopi kevaka e rawa)

  3. Dua na sere ni tekivu kei na masu

  4. Dua se rua na itukutuku lekaleka ena ulutaga vakosipeli, me vaka na papitaiso kei na isolisoli ni Yalo Tabu

  5. Dua na sere digitaki

  6. Na papitaiso

  7. Dua na gauna ni tiko vakarokoroko ni ra veisau tiko o ira era vakaitavi ena papitaiso. (E rawa ni vakatagitaki se lagati tiko ena gauna oqo na sere ni Lotu se nodra sere na Lalai. Se rawa ni rau solia e dua na ivakamacala lekaleka ni kosipeli na daukaulotu.)

  8. Wasei ni ivakadinadina mai vei ira na lewenilotu vou, kevaka e gadrevi

  9. Dua na sere ni suka kei na masu

  10. Sere kei na ivakatagi ni curuyani

Kevaka e lokuci e dua na lotu ni papitaiso ena Sigatabu, digitaka e dua na gauna me kua ni vakasaqasaqa kei na veisoqoni tudei ni Sigatabu.

iVakatakilakila
veivakadeitaki

Veivakadeitaki

Ena ciqoma e dua na tamata na cakacaka vakalotu ni veivakadeitaki ni sa papitaiso oti o koya (raica na Vunau kei na Veiyalayalati 20:41). E sa na qai lewe ni lotu e dua na tamata ena gauna e sa vakayacori oti na cakacaka vakalotu ni papitaiso kei na veivakadeitaki ka sa volaitukutukutaki vakavinaka.

Na vakadeitaki e qaravi ena ruku ni nona veidusimaki na bisopi. Ia, e sega ni dau vakayacora o koya e duatani tale na veivakatarogi me baleta na veivakadeitaki.

Cakacaka vakavoleka vata kei bisopi kei iliuliu ni kaulotu ni tabanalevu (ke sa kacivi e dua) me laurai vinaka ni ra sa vakadeitaki na curuvou vou. Na veivakadeitaki e dodonu me vakayacori ena kena gauna totolo ni oti na papitaiso, ka vinaka cake ena Sigatabu ga ka tarava. Ia, sa rawa vei bisopi me vakatara na veivakadeitaki me vakayacori ena lotu ni papitaiso me vakavudua ga (raica na iVoladusidusi Raraba, 18.8).

Era dau vakadeitaki na saumaki mai ena dua na soqoni ni sakaramede ena tabanalevu era vakaitikotiko kina. E dau sureti ira na italatala qase daukaulotu era veiqaravi tiko ena tabanalevu o bisopi me ra vakaitavi ena veivakadeitaki. Kevaka e vakayacora e dua na daukaulotu na veivakadeitaki, ena gadreva talega o koya na veivakadonui nei peresitedi ni tabana ni kaulotu (raica na iVoladusidusi Raraba, 18.8.1). E dau vakaitavi e dua na lewe ni matabisopi ke lailai.

Vakalewena na Fomu ni Papitaiso kei na Veivakadeitaki

Sa ka bibi sara me caka vakatotolo e dua na ivolatukutuku ni lewenilotu ni oti ga nona papitaiso ka vakadeitaki e dua na tamata. Me baleta na itukutuku vakaoqori ena nona gauna, a vola kina o Moronai ni o ira na lewenilotu vou “era sa wili me lewe ni lotu i Karisito; a sa volai na yacadra, me ra na daunanumi ka vakani ena vosa vinaka ni Kalou, me ra tiko ga kina ena sala dodonu,” (Moronai 6:4).

Ni o vakavulica e dua sa vakavakarau tiko me papitaiso, tekivu mo vakalewena na Fomu ni Papitaiso kei na Veivakadeitaki ena app ni Vunautaka na Noqu Kosipeli. Vakamacalataka ni fomu oqo ena vakayagataki me tauyavutaki kina e dua na ivolatukutuku ni lewenilotu. Na volaitukutuku oqo ena tiko kina na itukutuku bibi me baleta na cakacaka vakalotu e sa ciqoma na tamata oqo. Ni ra toki na lewe ni Lotu, sa na vakau yani na nodra ivolatukutuku ni lewenilotu ki na nodra tabanalevu vou me rawa ni ra tokoni ira kina na iliuliu kei na lewenilotu e kea.

Ni sa papitaiso ka vakadeitaki oti ga na lewenilotu vou, vakavouya na fomu ena itukutuku me baleta na cakacaka vakalotu yadua, oka kina o cei a vakayacora. Ni o sa vakalewena oti na fomu, vola na itukutuku ena app ni Vunautaka na Noqu Kosipeli ka vakauta vakalivaliva vua na vunivola ni tabanalevu. Ni sa ciqoma ga na fomu o vunivola, me railesuva o koya ka cakava sara e dua na ivolatukutuku ni lewenilotu.

Ni sa caka oti na ivolatukutuku ni lewenilotu, me vakarautaka sara o koya e dua na Sitivikiti ni Papitaiso kei na Veivakadeitaki. Na sitivikiti oqo e dau sainitaka o bisopi ka solia vua na tamata oqo.

Na yaca e na ivolatukutuku ni lewenilotu kei na sitivikiti e dodonu me tautauvata kei na ivolanisucu, rejisita ni sucu ni matanitu, se na yaca kilai vakalawa e taurivaki tiko.

Vuli Yadua se Vuli Vata Vakaitokani

Vulica na Mosaia 6:1–3 kei na Moronai 6:1–4. E semati vakacava na veitikina oqo ki na maroroi ni itukutuku dodonu ni papitaiso kei na veivakadeitaki?

Ni Oti na Papitaiso kei na Veivakadeitaki

Tomana Tikoga na Veiqaravi

Tomana tikoga na veitokani kei na veitokoni vei ira na lewenilotu vou ni ra sa papitaiso ka vakadeitaki oti. Vukei ira me ra dau lako ki lotu ka taracake na veitokani kei ira na lewenilotu. Wilika vata kei ira na iVola i Momani, ka vukei ira me ra wasea na kosipeli vei ira na lewe ni matavuvale kei ira na itokani. Vakamacalataka vei ira na ivolalailai My Covenant Path . Tomana tiko na vakayagataki ni app ni Vunautaka na Noqu Kosipeli me volai kina na nodra toso, me vaka na nodra dau tiko ena soqoni ni sakaramede kei na lesoni era sa ciqoma rawa.

iVakatakilakila
veimokomoko tiko na tagane

Ni oti na veivakadeitaki, vakavulica tale na lesoni ni kaulotu. Mo liutaka na veivakavulici. Ia, cakacaka vata kei ira na iliuliu ni tabanalevu me rawa ni ra vakaitavi kina na daukaulotu ni tabanalevu se so tale na lewenilotu. Ni o veivakavulici, vakayaloqaqataki ira na lewenilotu vou me ra maroroya na yalayala kece sara ena lesoni.

Ena bose ni veivakacokotaki vakamacawa, veivakasalataki me baleta na sala e rawa ni ra tokoni ira kina na papitaiso vou na lewenilotu ka vukei ira mera vakaitavi tikoga vagumatua ena Lotu. Tuvanaka se o cei ena vakaveikilaitaki ira vei ira na iliuliu ni kuoramu se mataisoqosoqo. Vakarautaka na nodra vakaitavi na lewenilotu tale eso ni o vakavulica tale na lesoni. Kerea me ra lesi na dauveiqaravi turaga (kei na dauveiqaravi marama).

Ni sa vakadeitaki oti e dua na tagane, sa rawa vua me ciqoma na Matabete i Eroni kevaka ena yabaki 12 ke lailai ena mua ni yabaki. Na veitabaki ki na Matabete i Eroni era sa tiko ena ruku ni veidusimaki nei bisopi (raica na iVoladusidusi Raraba, 38.2.9.1).

Me vaka e ganita, dau veitaratara kei ira o sa vakavulica ena nomu bula taucoko. Tokoni ira ena nodra ciqoma na veivakalougatataki kece sara ni kosipeli i Jisu Karisito.

iVakatakilakila
Elder Gerrit W. Gong

“Ni da lako mai ena yalo e raramusumusu ka bibivoro, e rawa ni da kunea na voqa ni domo mai vei Jisu Karisito ka ovigi ena Ligana dau veikaroni ni tataqomaki. Na cakacaka vakalotu tabu e solia na taukeni veiyalayalati kei ‘na kaukauwa ni bula vakalou’ me vakatabuya na inaki e loma kei na kena cakacakataki e tuba [Vunau kei na Veiyalayalati 84:20]. Ena Nona yalololoma-levu kei na vosota-vakadede, sa yaco kina na Nona Lotu me noda Bure” (Gerrit W. Gong, “Tikina ena Bure,” Liaona, Me 2021, 27).

Vukea na Lewenilotu Vou Me Vakaitavi ena Veivakalougatataki ni Valetabu

Sa rawa vei ira na lewenilotu vou ena yabaki ni bula veiganiti me ra ciqoma e dua na ivolatara ni valetabu ka na rawa kina vei ira me ra papitaiso me baleti ira na lewe ni nodra matavuvale sa mate (raica na iVoladusidusi Raraba, 26.4.2). Era ciqoma na ivolatara oqo mai vua na bisopi. Vakayaloqaqataki ira ka vukei ira na lewenilotu vou me ra rawata e dua na ivolatara ni valetabu ena kena gauna totolo ni sa veiganiti. Kevaka e tu voleka e dua na valetabu, navuca mo veisureti me baleta e dua na gauna vei ira na lewenilotu vou me ra papitaisotaki me baleti ira na tubudra era sa mate.

Ena bose ni veivakacokotaki vakamacawa, tuvanaka o cei ena vakaveikilaitaki ira na lewenilotu vou vei rau na iliuliu ni valetabu kei na tuvakawa ena tabanalevu. Na iliuliu oqo ena rawa ni vukei ira me ra vakavakarau me ciqoma na veivakalougatataki ni valetabu ena nodra cakava na nodra veiyalayalati ni valetabu.

Vakatutu ni Vuli kei na kena Vakayagataki

Vuli Yadudua

  • Vola na bolebole eso e rawa ni sotava e dua me papitaiso. Na cava e bibi kina vua e dua na tamata me vakila na loloma kei na veitokani ni lewe ni Lotu?

  • Vulica na Moronai 6 kei na Vunau kei na Veiyalayalati 20:68–69. Na cava o rawa ni vulica mai na veitikina oqo me baleta na nodra vukei na tamata me ra vakavakarau ki na papitaiso kei na veivakadeitaki? Vola na veika o sa vulica. Wasea na nomu nanuma vua na nomu itokani ena gauna ni vuli vakaitokani.

Vuli Vakaitokani kei na Veisau ni iTokani

  • A vakamacalataka o Peresitedi Henry B. Eyring na vuna e bibi kina na ivakatagedegede ni kosipeli. Veivosakitaka na ivakasala oqo. O na vakauqeti ira vakacava na tamata me ra gadreva me rawata na ivakatagedegede oqo?

    “Sa vakotora na Turaga na Nona ivakatagedegede me rawa ni vakalougatataki keda kina o Koya. Vakasamataka na veivakalougatataki oqori: Sa yalataka o Koya na veivuke ni Yalo Tabu vei ira era sotava na ivakatagedegede. E yalataka na vakacegu ni tamata yadua. E yalataka o Koya na madigi me ciqomi kina na cakacaka vakalotu tabu ena Nona vale. Ka sa yalataka o Koya vei ira era vosota ena nodra bulataka na Nona ivakatagedegede ni ra na rawata na bula tawamudu. …

    “Baleta ni da lomani ira eda qaravi ira, oi keda kece eda via vakayacora na noda igu ena noda laveti ira cake na luvena na Tamada Vakalomalagi ki na yalodina kei na savasava era gadreva me nodra kina na veivakalougatataki ni Turaga. …

    “… O na tekivu ena nomu taura matua vakamatata na ivakatagedegede ni Turaga ka sega ena kere veivosoti. Na levu ga ni nona ciri tani mai vei ira ko vuravura ka vakalialiai ira, na levu ni noda doudou me da cakava tiko” (“Standards of Worthiness,” iMatai ni Soqoni ni Vuli ni Veiliutaki e Vuravura Raraba, Jan. 2003, 10–11).

  • Railesuva na taro ni veivakatarogi ni papitaiso. Vakasamataka na sala mo sotava kina na ituvaki me vakataka na veika oqo:

    • A sega ni tukuna vei iko na tamata oqo ni se tiko vakatovolei ena vuku ni dua na cala vakalawa.

    • E se bera ni ciqoma na tamata oqo na isau ni masu ni a parofita o Josefa Simici.

    • A vakatavako na tamata oqo ena rua na siga sa oti.

    • E sega ni kila na tamata oqo ni sa ciqoma o koya na isau ni nona masu.

    • Eratou vakila na matavuvale na veivakasaurarataki mai vei ira na itokani ka sega ni vakadeitaka ni ratou sa vakarau tu me papitaiso.

  • Railesuva na Fomu ni Papitaiso kei na Veivakadeitaki Na cava me dodonu ka taucoko kina na itukutuku o vakarautaka?

Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu

  • Railesuva na bibi ni veivakatarogi ni papitaiso. Veivosakitaka na sala e rawa ni ra vukei ira kina na tamata na daukaulotu me ra vakavakarau ki na veivakatarogi.

  • Veivosakitaka na sala me vakayagataki kina na lotu ni papitaiso kei na veivakadeitaki me madigi ni kunekunei.

Liuliu ni Kaulotu kei na Daunivakasala ni Kaulotu

  • Cakacaka vata kei ira na iliuliu ni matabete kei na isoqosoqo me vakadeitaki ni ra sa vakayagataka tiko vakavinaka na ripote ni Toso ena Salatu ni Veiyalayalati.

  • Vakavulici ira na iliuliu ni tikina, iliuliu ni iwasewase, kei ira na iliuliu ni veituberi ni marama ena sala ni nodra vakarautaki na tamata ki na veivakatarogi ni papitaiso. Sureti ira me ra tuberi ira na daukaulotu tale eso me ra vakarautaki ira na tamata ki na veivakatarogi oqo.

  • Vakavulici ira na iliuliu ni tikina kei na iwasewase ena ivakarau ni kena vakayacori na veivakatarogi ni papitaiso.

  • Vakavulica na ivakarau ni kena saumi ena veivakatarogi ni papitaiso na nona vakatakila e dua na tamata ni sa cakava e dua na ivalavala ca bibi.

  • Kevaka e rawa, dau tiko ena lotu ni papitaiso me baleti ira na lewenilotu vou. Veivosaki kei ira na lewenilotu vou ka vulica na veika era sotava ena nodra saumaki mai. Wasea na veika o vulica vei nomu itokani kei ira na daukaulotu.