“Wase 3: Lesoni 3—Na Kosipeli i Jisu Karisito,” Vunautaka Noqu Kosipeli: E Dua na iDusidusi ena Wasei ni Kosipeli i Jisu Karisito (2023)
“Wase 3: Lesson 3,” Vunautaka Noqu Kosipeli
Wase 3: Lesoni 3
Na Kosipeli i Jisu Karisito
iVakatakilakila
Na iKarua ni Lako Mai, mai vei Harry Anderson
Era na Vakataroga Eso na Tamata
“O cei o Jisu Karisito? Ena rawa vakacava ni vukei au kei na noqu matavuvale o Koya?
Na cava na kena ibalebale meda vakabauti Jisu Karisito? Ena rawa ni vakalougatataka vakacava noqu bula na noqu vakabauti Koya?
Na cava na ibalebale ni veivutuni?
Au na rawa ni vakila vakacava na vakacegu ni Kalou kei na veivosoti ni oti noqu digidigi cala?
Na cava na inaki ni papitaiso?
Na cava na isolisoli ni Yalo Tabu?
Na cava na kena ibalebale meda vosota me yacova na ivakataotioti?
Na kosipeli i Jisu Karisito sai koya na sala eda lako mai kina vei Karisito. E rawarawa sara ka rawa ni kila e dua na gone. Na lesoni oqo e vakanamata ki na kosipeli kei na ivunau i Karisito, sai koya na vakabauta na Turaga ko Jisu Karisito, veivutuni, papitaiso, solisoli ni Yalo Tabu, ka vosota me yacova na ivakataotioti. Sa vakanamata talega ki na sala e vakalougatataki ira kece kina na luve ni Kalou na kosipeli.
Na vosa kosipeli e kena ibalebale “na itukutuku vinaka.” Na kosipeli i Jisu Karisito na itukutuku vinaka baleta ni vakarautaka na ivunau—na dina tawamudu—eda gadreva meda lako mai kina ki Vua ka vakabulai (raica na 1 Nifai 15:14). E vakavulici keda na kosipeli ena iwalewale meda bulataka kina na bula e vakaibalebale. Na itukutuku vinaka ni kosipeli e vakarautaka na sala meda vosoti kina mai na noda ivalavala ca, vakasavasavataki, ka lesu yani kina iserau ni Kalou.
Vakatutu ni Veivakavulici
E vakarautaki ena iwasewase oqo e dua na sabolo ni ituvatuva me vukea nomu vakavakarau mo veivakavulici. E okati talega kina na ivakaraitaki ni taro kei na veisureti e rawa ni o vakayagataka.
Ni o vakarau mo veivakavulici, vakasamataka ena masumasu na ituvaki ni tamata yadua kei na nona gagadre vakayalo. Vakatulewataka na ka ena veiivuke vakalevu me vakavulici. Vakarau mo vakamacalataka na vosa eso era na sega beka ni kila na tamata. Tuvatuva ena levu ni gauna ena nomu, ka nanuma tiko me vakaleleka na lesoni.
Digia na ivolanikalou mo vakayagataka ni o veivakavulici. Na iwasewase ni “Yavu Vakaivunau” ni lesoni e oka kina e vuqa na ivolanikalou e rawa ni veivuke.
Vakasamataka na taro cava me tarogi ni o veivakavulici. Tuva na veisureti me caka ka na vakayaloqaqataka na tamata me yavala.
Vakabibitaka na veivakalougatataki yalataki ni Kalou, ka wasea na nomu ivakadinadina ni veika o vakavulica.
iVakatakilakila
vakavulica tiko na matavuvale na daukaulotu
Na Veika mo na Vakavulica vei ira na Tamata ena Loma ni 15-25 na Miniti
Digia e dua se sivia mai na veivakavuvuli oqo mo vakavulica. Na yavu vakaivunau ni veivakavuvuli yadua sa toka tarava mai na ituvatuva oqo.
Na iLesilesi Vakalou i Jisu Karisito
Na Kalou, sa tala mai na Luvena Lomani, ko Jisu Karisito, ki vuravura me vueti keda mai na ivalavala ca kei na mate.
Ena vuku ni nona isoro ni veivakaduavatataki o Jisu, sa rawa nida savai mai na noda ivalavala ca nida veivutuni.
Ni oti na mate nei Jisu ena kauveilatai, a tucake tale o Koya. Ena vuku ni Nona sa Tucake tale, eda na tucake kece tale ni oti noda mate. Sa kena ibalebale oqo ni na cokoti vata tale na yalo kei na yago ni tamata yadua, ka da na bula me tawamudu na tamata yadua ena yago sa uasivi sara, ka sa tucake tale mai na mate.
Vakabauti Jisu Karisito
Na vakabauta sa imatai ni ivakavuvuli ni kosipeli i Jisu Karisito.
Na vakabauti Jisu Karisito e okati kina na noda nuidei ni o Koya na Luve ni Kalou ka vakabauta ni o Koya na noda iVakabula ka Dauveivueti.
Na vakabauti Jisu Karisito sa dua na ivakavuvuli ni cakacaka kei na kaukauwa.
Eda vaqaqacotaka na noda vakabauta ena noda masu, vulica na ivolanikalou, ka talairawarawa ki na ivakaro.
Veivutuni
Na vakabauti Jisu Karisito ena vakavuna na veivutuni. Na veivutuni sai koya na iwalewale eda vuki kina vua na Kalou ka vuki tani mai na ivalavala ca. Nida veivutuni, sa veisau na noda ivalavala, gagadre, kei na vakanananu me salamuria na loma ni Kalou.
Nida veivutuni vakaidina, ena vosoti keda o Koya. Sa rawa na veivosoti ni sa sorovaka na noda ivalavala ca o Jisu Karisito.
Nida veivutuni, eda vakila na vakacegu ni sa vakabulai na noda kilai yaloda kei na yaluma.
Na veivutuni e dua na iwalewale ni noda bula taucoko. E kidavaki keda lesu mai na Kalou ena veigauna kece eda veivutuni kina. Ena sega vakadua ni soreva ena vukuda o Koya.
Papitaiso: iMatai ni Noda Veiyalayalati kei na Kalou
Na papitaiso sai koya na sala eda curuma taumada kina na isema veiyalayalatitaki kei na Kalou.
Na papitaiso e rua tiko na kena iwase: papitaiso ena wai kei na papitaiso ena Yalo. Nida papitaiso ka vakadeitaki, eda sa savai mai na noda ivalavala ca, ka soli kina vei keda e dua na itekitekivu vou ni bula.
Eda papitaiso ena tabadromuci, me muria na ivakaraitaki nei Jisu.
O ira na gone era sega ni papitaiso me yacova ni ra sa yabaki walu. O ira na gone era mate ni se bera na yabaki oya sa vueti ira na Veisorovaki i Jisu Karisito.
Eda vakayagataka na sakaramede e veimacawa me ivakananumi ni isoro nei Jisu ka me vakavoui na noda veiyalayalati kei na Kalou.
Na iSolisoli ni Yalo Tabu
Na Yalo Tabu e ikatolu ni Lewetolu Vakalou.
Ni oti na papitaiso sa soli vei keda na isolisoli ni Yalo Tabu ena cakacaka vakalotu ni veivakadeitaki.
Nida ciqoma na isolisoli ni Yalo Tabu, sa rawa ni noda na Nona veitokani ena noda bula taucoko kevaka eda yalodina tiko.
Na Yalo Tabu ena vakasavasavataki keda, tuberi keda, vakacegui keda, ka vukei keda meda kila na dina.
Vosota ki na iVakataotioti
Na vosota vakadede e okati kina noda vakabauti Karisito tiko e veisiga yadua. Eda tomana na noda maroroya tiko noda veiyalayalati kei na Kalou, veivutuni, vaqara na veitokani ni Yalo Tabu, ka vakaivotavota ena sakaramede.
Nida segata ena yalodina meda muri Jisu Karisito, e yalataka na Kalou ni na noda na bula tawamudu.
Na Kosipeli i Jisu Karisito e Vakalougatataki Ira na Luve ni Kalou Kece Sara
Na bulataki ni kosipeli e vakatitobutaka noda reki, vakauqeta noda ivalavala, ka vakavutuniyautaka na noda veiwekani.
Eda na rawa ni marau—vakatamata yadua ka vakamatavuvale—nida bulataka na ivakavuvuli i Jisu Karisito.
Ena kosipeli i Jisu Karisito, era na vakalougatataki na veimatavuvale ena bula oqo ka rawa ni ra vakaduavatataki kina tawamudu ka laki bula ena iserau ni Kalou.
Taro mo na Tarogi ira Kina na Tamata
Na taro eso oqo era ivakaraitaki ni veika o rawa ni tarogi ira kina na tamata. Na taro eso oqo e rawa ni vukei iko me vakaibalebale kina na nomu veivosaki ka kila na nona gagadre kei na ivakarau ni rai e dua na tamata.
Na cava o kila me baleti Jisu Karisito?
Na cava na kena ibalebale vei iko mo vakabauti Jisu Karisito?
Na veisau cava o vinakata mo cakava ena nomu bula?
Na cava o kila me baleta na veivutuni?
Na cava o kila ne baleta na papitaiso? Na cava o rawa ni cakava oqo mo vakavakarau kina ki na papitaiso?
Ena rawa ni vukei iko vakacava na Yalo Tabu ena nomu ilakolako ni lesu kina iserau ni Kalou?
Na cava e dua na bolebole o sotava tiko se na nomu matavuvale? E rawa ni keirau wasea eso na sala e rawa ni veivuke kina na kosipeli i Jisu Karisito?
Veisureti e Rawa nio Vakayacora
Ena rawa beka nio kerea vua na Kalou ena masu me vukei iko mo kila ni veika keirau a vakatavulica e dina? (Raica na “Vakasama Titobu ni Veivakavulici: Masu” ena iotioti ni iwasewase ni lesoni 1)
Ona lako beka ki lotu ena Sigatabu oqo mo vulica eso tale na ka me baleta na veika keirau sa vakavulica?
Ena rawa beka nio wilika na iVola i Momani ka taroga vua na Kalou ena masu mo kila kina ni sa vosa ni Kalou? (Mo na vakatura sara beka ga na wase kei na tikina eso.)
E rawa beka me keirau lokuca e dua na gauna baleta na neirau veisiko ka tarava?
Yavu Vakaivunau
Na iwasewase oqo e vakarautaka na ivunau kei na ivolanikalou mo vulica me vaqaqacotaka na nomu kilaka kei na ivakadinadina ni kosipeli ka vukea nomu veivakavulici.
iVakatakilakila
Oqo o Ira na Tinikarua ka Talai Ira Yani o Jisu, mai vei Walter Rane
Na iLesilesi Vakalou i Jisu Karisito
Na Tamada Vakalomalagi a tala mai na Luvena lomani ko Jisu Karisito, ki vuravura me rawa kina vei keda kece meda rawata na reki ena vuravura oqo kei na bula tawamudu ena vuravura sa bera mai. “Raica sai koya oqo na kosipeli, na itukutuku rekitaki, … ni a lako mai i vuravura ko [Jisu Karisito] … ka me colata na ivalavala ca ni vuravura, ka me vakatabuya na vuravura, ka vakasavasavataka mai na veika tawadodonu kecega” (Vunau kei na Veiyalayalati 76:40–42).
Me vaka nida tamata vakayago, eda ivalavala ca kece, ka da na mate kece. Na ivalavala ca kei na mate ena tarovi keda mai na bula tawamudu kei na Kalou vakavo kevaka a dua na noda Dauveivueti (raica na 2 Nifai 9). Ni bera ni buli ko vuravura, sa digitaki Jisu Karisito na Tamada Vakalomalagi me noda iVakabula. Ena dua na ivakaraitaki cecere ni loloma, a lako mai kina i vuravura ko Jisu me mai qarava na itavi vakalou oqo. Sa mai rawata vei keda me da vueti mai na noda ivalavala ca, ka vakadeitaka nida na tucake tale nida mate.
A bulataka o Jisu e dua na bula sega ni ivalavala ca. Ni mai cava na Nona veiqaravi vakalotu ena bula oqo, a colata na noda ivalavala ca ena Nona vakararawataki mai Kecisemani kei na Nona vakamatei ena kauveilatai (raica na 1 Nifai 11:33). A vakaitamera sara na vakararawataki nei Jisu ka vakavuna na Nona “sautaninini ena vuku ni mosi, sa titiri kina na dra mai na qara kecega ni yagona” (Vunau kei na Veiyalayalati 19:18). Ni oti Nona Vakamatei ena Kauveilatai, sa tucake tale ko Jisu, sa vakadruka kina na mate. O rau ruarua na ka a yaco oqo, sa vakatokai me Veisorovaki i Jisu Karisito.
Na noda ivalavala ca sa vakavuna noda tawa savasava vakayalo, ka ni “na sega ni dua na ka tawa savasava ena tiko rawa kei na Kalou” (1 Nifai 10:21). Kena ikuri, na lawa ni lewa dodonu e gadreva me dua na isau ni noda ivalavala ca.
Na isoro ni veivakaduavatataki nei Jisu sa vakarautaka vei keda na sala meda savai mai na ivalavala ca ka vakasavasavataki nida sa veivutuni. Sa vakarautaka talega na sala me rogoci kina na tagi ni lewa dodonu (raica na Alama 42:15, 23–24). E kaya kina ko Jisu, “Raica koi au na Kalou, au sa vosota oti na veika oqo, mera bula kina ko ira era sa veivutuni; ia kevaka era sa sega ni veivutuni era na vakararawataki me vakataki au” (Vunau kei na Veiyalayalati 19:16–17). Kevaka e a sega o Jisu Karisito, na mate ena tinia na vakanuinui kece meda na laki bula vata kei Tamada Vakalomalagi ena gauna mai muri.
Ena Nona soli Koya me isoro ena vukuda, e sega ni sa bokoca kina ko Jisu na noda itavi yadudua. E gadrevi meda vakabauti Koya, veivutuni, ka segata meda muria na ivakaro. Nida veivutuni, ena vakadeitaka ko Jisu na Nona dodonu ni veivosoti mai vua na Tamana (raica na Moronai 7:27–28). Ena vakatakekere ni iVakabula, sa vosoti keda na Tamada Vakalomalagi, ka vueti keda mai na icolacola kei na kilai yalodataki ni noda ivalavala ca (raica na Mosaia 15:7–9). Eda sa savai vakayalo ka na rawa ni yaco meda kidavaki lesu tale ki na iserau ni Kalou.
Na itavi vakalou talega nei Jisu me vakabulai keda mai na mate. Baleta ni sa tucake tale ko Koya, eda na tucake kece tale ni oti noda mate. Sa kena ibalebale oqo ni na cokoti vata tale na yalo kei na yago ni tamata yadua, ka da na bula me tawamudu na tamata yadua ena yago sa uasivi sara, ka sa tucake tale mai na mate. Kevaka e sega o Jisu Karisito, na mate ena tinia na vakanuinui kece meda na laki bula vata kei Tamada Vakalomalagi ena gauna mai muri.
Raica na iDusidusi kina iVolanikalou, “Jisu Karisito”
Gospel Topics: “Jesus Christ”
Vakabauti Jisu Karisito
Na imatai ni ivakavuvuli ni kosipeli sa ikoya meda vakabauta na Turaga o Jisu Karisito. Na vakabauta e yavu ni veivakavuvuli tale eso ni kosipeli.
Na vakabauti Jisu Karisito e okati kina na noda vakabauta ni o Koya na Luvena e Duabau Ga na Kalou. E okati kina na noda vakabauti Koya ni noda iVakabula ka Dauveivueti—sai Koya duadua ga na sala meda lesu tale kina Vua na Kalou (raica na Cakacaka 4:10–12; Mosaia 3:17; 4:6–8). Eda sa sureti me “dei noda vakabauti Koya, ka vakararavi vakatabakidua sara kina nona vinaka o Koya sa kaukauwa me veivakabulai” (2 Nifai 31:19).
Na vakabauti Jisu Karisito e okati kina noda vakabauta ni a vakararawataki o Koya ena vuku ni noda ivalavala ca ena Nona isoro ni veivakaduavatataki. Ena vuku ni nona isoro ni veivakaduavatataki o Jisu Karisito, sa rawa kina nida savai mai na noda ivalavala ca nida veivutuni. Na veisavai oqo e vukei keda meda kunea na vakacegu kei na inuinui ena bula oqo. Sa rawa talega kina vei keda meda rawata na reki e taucoko ni oti na mate.
Na vakabauti Jisu Karisito e okati kina noda nuitaka ni ena Vukuna, eda na tucake kece tale ni sa oti na mate. Na vakabauta oqo e rawa ni tokoni keda ka vakacegui keda ni ra yali na noda. Na butobuto nei mate ena rawa ni vakaseavutaki ena yalayala ni Tucake tale.
Na vakabauti Jisu Karisito e wili kina na vakabauta kei na vakanuinui ni a colata o Koya na noda rarawa kei na malumalumu (raica na Aisea 53:3–5). Sa kila o Koya ena veika sa sotava mai na sala me tokoni keda kina ena loloma cecere nida lako curuma na dredre ni bula (raica na Alama 7:11–12; Vunau kei na Veiyalayalati 122:8). Nida vakabauta, ena vukei keda o Koya meda toso tikoga ki liu nida curuma na dredre.
Mai na noda vakabauti Jisu Karisito, sa rawa kina Vua me vakabulai keda, vakayago ka vakayalo tale ga. Sa tu vakarau o Koya me vukei iko ni o nanuma na Nona veisureti meda “kakua ni rere se lomalomarua; ia [meda] vakaliuci [Koya] ena [noda] nanuma kecega” (Vunau kei na Veiyalayalati 6:36).
E Dua na iVakavuvuli ni Cakacaka kei na Kaukauwa
Na Vakabauti Jisu Karisito ena vakavuna noda yavala. Eda vakaraitaka noda vakabauta ena noda muria na ivunau ka caka vinaka e veisiga. Eda veivutunitaka noda ivalavala ca. Eda yalodina Vua. Eda vinakata meda yaco me vakataki Koya.
Nida cakacakataka noda vakabauta, eda na rawa ni vakila na kaukauwa nei Jisu ena noda bula e veisiga. Ena vakalevulevuya o Koya na noda igu vinaka duadua. Ena vukei keda o Koya meda tubu ka vorata na veitemaki.
Vaqaqacotaka na Noda Vakabauta
E vakavuvulitaka na Parofita o Alama ni tarai cake ni vakabauta e rawa ni tekivu ena dua na “gagadre ni vakabauta” (Alama 32:27). Me tubu noda vakabauti Jisu Karisito ena gadrevi meda susuga ena noda vulica na Nona vosa, bulataka na Nona ivakavuvuli, ka muria na Nona ivunau. E vakavuvulitaka o Alama, ni noda susuga cake na vosa ni Kalou ena yalovosota, kei na gugumatua e yaloda, “ena qai ti na wakana [ka yaco me vaka] na vunikau me tubu cake ki na bula tawavakaiyalayala”—ka vaqaqacotaka na noda vakabauta (Alama 32:41; raica na tikina e 26–43).
Gospel Topics: “Jesus Christ,” “Atonement of Jesus Christ,” “Faith in Jesus Christ”
Veivutuni
Na cava na Veivutuni?
Na veivutuni sa ikoya na ikarua ni yavu ni ivakavuvuli ni kosipeli. Na vakabauti Jisu Karisito kei na noda lomani Koya sa vakavuna noda veivutuni (raica Ilamani 14:13). Na veivutuni sai koya na iwalewale eda vuki kina vua na Kalou ka vuki tani mai na ivalavala ca. Nida veivutuni, sa veisau na noda ivalavala, gagadre, kei na vakanananu me salamuria na loma ni Kalou. Na vosoti ni noda ivalavala ca sa rawa ena vuku i Jisu Karisito kei na Nona isoro ni veivakaduavatataki.
Na veivutuni e levu cake sara mai na noda vakayagataka na noda lewa e loma me veisautaki e dua na itovo se me ulabaleti e dua na malumalumu. Na veivutuni sai koya na gole ena yalodina vei Karisito, ka na solia o Koya vei keda na kaukauwa meda vakila e dua “na veisau levu”e lomada (Alama 5:12–14). Nida vakila na veisau oqo ni yalo, eda sa sucu vou vakayalo (raica na Mosaia 27:24–26).
Na veivutuni e oka kina na bucini ni ivakarau vou ni noda raica na Kalou, o keda, kei na vuravura. Eda na vakila vou tale na loloma ni Kalou ena vukuda nida Luvena—kei na nona loloma vei keda na noda iVakabula. Na madigi ni veivutuni e sa dua na veivakalougatataki levu sa solia tu vei keda na Tamada Vakalomalagi mai vei Luvena.
iWalewale ni Veivutuni
Nida veivutuni, eda vakadinadinataka na noda ivalavala ca ka da rarawataka vakaidina. Eda vakatusa na noda ivalavala ca vua na Kalou ka kerea na Nona veivosoti. Eda vakatusa talega na ivalavala ca bibi vei ira na veiliutaki digitaki ni Kalou, ka rawa ni ra vukei keda meda veivutuni. Eda cakava na veika eda rawata meda vakadodonutaka, kena ibalebale nida tovolea meda vakavinakataka na ca e yaco ena vuku ni noda ivalavala. Na veivutuni dina e vakaraitaki ena ivalavala dodonu ena loma ni dua na gauna.
Na veivutuni e dua na iwalewale e veisiga ni noda bula. “Ni sai valavala ca ko ira kecega na tamata ka sega ni yacova na ka e vakarokorokotaki kina na Kalou” (Roma 3:23). E dodonu meda dau veivutuni tikoga, ka nanuma tiko nida na “rawata na ka kecega ena vukui Karisito o koya sa vakaukauwataki” keda (Filipai 4:13). Sa kaya na Turaga, “Ia ena veigauna kece era veivutuni kina na noqu tamata, au na vosota kina na nodra lako sese vei au” (Mosaia 26:30).
Veivakalougatataki ni Veivutuni
Na veivutuni e dua na ivakavuvuli vinaka ka kauta mai na reki kei na vakacegu. E kauti keda mai “ki na nona kaukauwa na Dauveivueti me vakabulai kina na [yaloda]” (Ilamani 5:11).
Nida veivutuni, sa na vakabulai na noda kilai yalodataka noda cala kei na yaluma ena kena gauna. Eda na vakila na veivakauqeti ni Yalo Tabu ni vakalevutaki. Na noda gagadre meda muria na Kalou sa na kaukauwa cake.
iVakatakilakila
Peresitedi Russell M. Nelson
“Sa rui levu na tamata era nanuma ni itotogi na veivutuni—e dua na ka me levei. … Ia na vakasama ni veitotogitaki oqo e vakavurea mai o Setani. E dau saga o koya me vakataotaka na noda raici Jisu Karisito, e tucake ka dodoka tu mai na ligana, ena vakanuinui ka tuvakarau me veivakabulai, veivosoti, veisavai, veivakaukauwataki, ka vakasavasavataki keda” (Russell M. Nelson, “E Rawa ni Vinaka Cake na Veika Eda Cakava tiko meda Vinaka Cake kina,” Liaona, Me 2019, 67).
Gospel Topics: “Repentance,” “Atonement of Jesus Christ”
iVakatakilakila
papitaiso e dua na goneyalewa
Papitaiso: iMatai ni Noda Veiyalayalati kei na Kalou
Na vakabauti Jisu Karisito kei na veivutuni e vakarautaki keda me baleta na cakacaka vakalotu ni papitaiso kei na vakadeitaki. Na papitaiso e imatai ni cakacaka vakalotu ni veivakabulai ni kosipeli i JIsu Karisito. Nida ciqoma na cakacaka vakalotu rekitaki oqo ni vakanuinui, eda sa cakava kina na imatai ni noda veiyalayalati kei na Kalou.
Na cakacaka vakalotu sa ikoya e dua na cakacaka tabu se soqoni ka vakayacori ena lewa ni matabete. Eso na cakacaka vakalotu, me vaka na papitaiso era gadrevi ki na noda vakabulai.
Ena cakacaka vakalotu, eda caka veiyalayalati kina kei na Kalou. Na veiyalayalati oqo era yalayala tabu vei keda kei na Kalou. Sa yalataka ko Koya ni na vakalougatataki keda nida maroroya na noda yalayala Vua. Sa dodonu meda qaqa ka yalodei ena noda maroroya na noda yalayala vua na Kalou.
Sa vakarautaka na Kalou na cakacaka vakalotu me vukea meda lako mai Vua ka rawata na bula tawamudu. Nida ciqoma na cakacaka vakalotu ni matabete ka maroroya na kena veiyalayalati, sa rawa nida vakila na “kaukauwa ni bula vakalou” ena noda bula (Vunau kei na Veiyalayalati 84:20).
Na Veiyalayalati ni Papitaiso
A vakavulica o Jisu ni dodonu meda papitaiso meda na curu kina ki na matanitu ni Kalou (raica na Joni 3:5). Sa yaga talega vei keda meda lewena na Lotu i Jisu Karisito. Sa vakadavora na iVakabula na ivakaraitaki ena nona papitaiso (raica na Maciu 3:13–17).
Nida papitaiso ka maroroya noda veiyalayalati, sa yalataka na Kalou me vosota na noda ivalavala ca (raica na Cakacaka 22:16; 3 Nifai 12:1–2). Sa rawa na veivakalougatataki cecere oqo ena isoro ni veivakaduavatataki nei Jisu Karisito, o koya ka “lomani keda ka savai keda mai na noda ivalavala ca ena nona dra” (iVakatakila 1:5). Sa yalataka talega ga na Kalou me vakalougatataki keda ena veitokani ni Yalo Tabu me rawa kina nida vakasavasavataki, tuberi, ka vakacegui.
Ena noda iwase ni veiyalayalati ni papitaiso, eda vakadinadinataka kina ni sa lomada meda taura na yaca i Jisu Karisito. Eda sa yalataka nida na daunanumi Koya tikoga ka maroroya na Nona ivakaro. Eda sa yalataka meda lomani ira ka qaravi ira na tani, meda “rarawa vata kei ira sa rarawa … vakacegui ira era sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega” (Mosaia 18:9; raica na tikina e 8–10, 13). Eda vakaraitaka e dua na yalo ni igu meda qaravi Jisu Karisito ki na itinitini ni noda bula (raica na Vunau kei na Veiyalayalati 20:37; Mosaia 2:17).
Na noda veiyalayalati ni papitaiso sa itavi levu. Era veivakauqeti talega ka rekitaki. Era tauyavutaka e dua na veiwekani digitaki vei keda kei na Tamada Vakalomalagi ka dau solia mai kina ko Koya na Nona loloma.
Papitaiso ena Tabadromuci
E vakavuvulitaka ko Jisu nida gadreva meda papitaiso ena tabadromuci me bokoci kina na noda ivalavala ca (raica na Vunau kei na Veiyalayalati 20:72–74). Na papitaiso ena tabadromuci sa ivakatakarakara ni mate, bulu, kei na tucake tale nei Jisu Karisito (raica na Roma 6:3–6).
Na papitaiso talega ena tabadromuci e tiko talega na kena ivakatakarakara kaukauwa baleti keda yadua. E matataka na mate ni noda bula makawa, na buluti yani ni bula oya, kei na noda basika mai ena sucuvou vakayalo. Nida sa papitaiso eda sa tekivuna kina na ikalawa ni sucu tale ka yaco me luvena tagane kei na yalewa vakayalo na Karisito (raica na Mosaia 5:7–8; Roma 8:14–17).
Gonelalai
Mera kua ni papitaisotaki me yacova na yabaki ni vakatulewa vakataki ira, oya ni ra sa yabaki walu (raica na Vunau kei na Veiyalayalati 68:27). O ira na gone era mate ni se bera na yabaki walu era na vueti ena Veisorovaki nei Jisu Karisito (raica na Moronai 8:4–24; Vunau kei na Veiyalayalati 137:10). Ni bera ni ra papitaiso na gone, sa dodonu me ra vakavulici ena kosipeli me rawa ni ra vakarautaki me baleta na ikalawa bibi ni nodra bula oqo me ra veiyalayalati kei na Kalou.
Na Sakaramede
E vinakata na Tamada Vakalomalagi meda yalodina ki na veiyalayalati eda sa vakayacora vata kei Koya. Me vukea na noda cakava na ka oqo, e vakaroti keda o Koya meda soqoni wasoma ka vakaivotavota ena sakaramede. Na sakaramede e dua na cakacaka vakalotu ni matabete a vakatekivuna ko Jisu vei ira na Nona iApositolo ni se bera na Nona Veisorovaki.
Na vakaivotavota ena sakaramede sai koya na inaki bibi ni soqoni ni sakaramede e veimacawa. Sa vakalougatataki ka veisoliyaki yani vei ira na ivavakoso na madrai kei na wai. Na madrai e matataka na nona sorovaka na iVakabula na Yagona ena vukuda. Na wai e matataka na Nona dra, ka a vakadavea ena vukuda.
Eda vakayagataka na ivakatakarakara oqo e veimacawa me ivakananumi ni nona isoro na iVakabula ka vakavouya na noda veiyalayalati kei na Kalou. Eda ciqoma vou tale na yalaya ni na tiko vata kei keda na Yalo.
E rua na iwasewase ni papitaiso. E vakavuvulitaka o Jisu nida gadreva meda “sucu ena wai kei na Yalotabu” meda curu kina ki na matanitu ni Kalou (Joni 3:5; vakaikuritaki). E vakavuvulitaka o Josefa Simici “Na papitaiso ena wai sa papitaiso e veimama ga, ka sega na betena ke sega na ikarua ni kena veimama—o ya na papitaiso ena Yalo Tabu” (Nodra iVakavuvuli na Peresitedi ni Lotu: Josefa Simici [2007], 95).
“Na papitaiso ena wai, mena muria na papitaiso ena Yalotabu me na taucoko kina. Nida sa ciqoma na papitaiso ruarua, eda sa vakasavasavataki mai na noda ivalavala ca ka sa sucu vou tale vakayalo. Eda sa qai tekivuna e dua na bula vakayalo vou vakatisaipeli i Karisito.
Eda na ciqoma na papitaiso ena Yalo ena dua na cakacaka vakalotu ka vakatokai na veivakadeitaki. Na cakacaka vakalotu oqo era qarava e dua se sivia na matabete ka ra vakotora na ligadra e uluda. Taumada era na vakadeitaki keda meda sa lewena na Lotu, oti era qai solia na isolisoli ni Yalo Tabu vei keda. Oqo na cakacaka vakalotu vata ga ka cavuti ena Veiyalayalati Vou kei na iVola i Momani (raica na Cakacaka 8:14–17; 3 Nifai 18:36–37).
Na Yalo Tabu e ikatolu ni Lewetolu Vakalou. E cakacaka o Koya ena duavata cecere vata kei na Tamada Vakalomalagi kei Jisu Karisito. Nida ciqoma na isolisoli ni Yalo Tabu, sa rawa ni tiko kina vata kei keda na Nona veitokani ena noda bula taucoko kevaka eda yalodina tiko.
Na Sala e Vakalougatataki Keda kina na Yalo Tabu
Na isolisoli ni Yalo Tabu sa dua vei ira na isolisoli talei dina nei Tamada Vakalomalagi. Na Yalo Tabu e savai keda ka vakatabui keda, meda vakalou cake kina, taucoko vakalevu cake, vaka na Kalou vakalevu cake (raica na 3 Nifai 27:20). Ena vukei keda ko Koya meda veisau ka tubu vakayalo nida segata meda muria na ivakavuvuli ni Kalou.
Na Yalo Tabu e vukei keda meda vuli ka kila na dina (raica na Moronai 10:5). E vakadeitaka talega o Koya na dina ki yaloda kei na noda vakasama. Kena ikuri, na Yalo Tabu e vukei keda meda vakavulica na dina (raica na Vunau kei na Veiyalayalati 42:14). Nida vulica ka vakavulica na dina ena kaukauwa ni Yalo Tabu, ena kauta yani ko Koya ki yaloda (raica na 2 Nifai 33:1).
Nida segata ena yalomalumalumu meda dusimaki mai na Yalo Tabu, ena tuberi keda o Koya (raica na 2 Nifai 32:5). E wili kina na nona uqeti keda ena sala meda qaravi ira kina na tani.
E vakarautaka na Yalo Tabu na kaukauwa vakayalo me vukea noda uabaleta na malumalumu. E vukei keda o Koya meda vorata na veitemaki. E vakasalataki keda me baleta na veika rerevaki vakayalo se vakayago.
Na Yalo Tabu ena vukei keda meda lako curuma na dredre ni bula. Ena vakacegui keda o Koya ena gauna ni vakatovolei kei na rarawa, vakasinaiti keda ena inuinui (raica na Moronai 8:26). Mai na kaukauwa ni Yalo Tabu eda na rawa ni vakila kina na loloma kei na veidusimaki ni Kalou me baleti keda.
Ena gauna ni noda papitaiso, eda a vakayacora e dua na veiyalayalati vata kei na Kalou. Ena veika tale eso, eda yalataka nida na muria na Nona ivunau ka qaravi Koya ena vo ni noda bula (raica na Mosaia 18:8–10, 13; Vunau kei na Veiyalayalati 20:37).
Nida curuma na salatu ni kosipeli ena papitaiso kei na veivakadeitaki, eda na sasaga tiko ena noda igu meda tiko ga kina. Nida lako tani mai na salatu ke vakalailai wale mada ga, eda na cakacakataka noda vakabauti Karisito meda veivutuni. Na veivakalougatataki ni veivutuni e rawa kina nida lesu tale kina ki na salatu ni kosipeli ka rawata na veivakalougatataki ni noda veiyalayalati kei na Kalou. Nida veivutuni vakaidina, sa na dau tuvakarau na Kalou me veivosoti ka kidavaki keda lesu mai.
Na vosota ki na ivakataotioti e kena ibalebale meda yalodina tikoga ki na ivakataotioti ni noda bula—ena veigauna vinaka kei na gauna dredre, ena gauna ni sautu kei na gauna ca. Eda laiva vei Karisito ena yalomalumalumu me buli keda cake ka cakava meda ucui Koya vakalevu cake. Eda rai vei Karisito ena vakabauta, vakararavi, kei na inuinui se cava ga e yaco mai ki na noda bula.
Na vosota me yacova na ivakataotioti e sega ni kena ibalebale meda tautauri matua tikoga me yacova nida sa mate. Ia, e kena ibalebale me vakanamata noda bula, vakanananu, kei na ivalavala vei Jisu Karisito. E okati kina noda vakabauti Karisito tiko e veisiga yadua. Eda tomana tikoga noda veivutuni, maroroya noda veiyalayalati kei na Kalou, ka segata na veitokani ni Yalo Tabu.
Na vosota ki na ivakataotioti e okati kina na “toso[yani] ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega.” E yalataka na Tamada Vakalomalagi nida vosota ki na ivakataotioti, eda na “rawata na bula tawamudu” (2 Nifai 31:20).
Na Kosipeli i Jisu Karisito e Vakalougatataki Ira na Luve ni Kalou Kece Sara
Na kosipeli i Jisu Karisito e baleti ira kece na luvena na Kalou. E vakavuvulitaka na ivolanikalou ni ra “sa tautauvata na tamata kecega vua na Kalou” se cava ga na kedra itukutuku se ituvaki. Sa veisureti tu o Koya kivei “ira kecega me ra lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua” (2 Nifai 26:33).
Na kosipeli ena vakalougatataki keda ena noda gauna taucoko ni bula oqo ka vakakina ena tawamudu taucoko. Eda na dau mamarau—vakatamata yadua ka vakamatavuvale—nida bulataka na ivakavuvuli nei Jisu Karisito (raica na Mosaia 2:41; “Na Matavuvale: iVakaro iVuravura Raraba,” ChurchofJesusChrist.org). Na bulataki ni kosipeli e vakatitobutaka noda reki, vakauqeta noda ivalavala, ka vakavutuniyautaka na noda veiwekani.
Na bulataki ni kosipeli i Jisu Karisito e rawa talega ni taqomaki keda ena noda cakava eso na digidigi ena rawa ni vakamavoataka na noda bula vakayago ka vakayalo talega. E vukei keda meda kunea na kaukauwa kei na vakacegu ena gauna ni vakatovolei kei na rarawa. E vakarautaka na sala ki na dua na bula ni reki tawamudu.
E dua na itukutuku cecere ni kosipeli vakalesui mai sai koya nida tiki taucoko ni matavuvale ni Kalou. O keda na Luvena tagane kei na yalewa lomani. Se cava ga na ituvaki ni noda matavuvale e vuravura, o keda yadua eda lewe ni matavuvale ni Kalou.
E dua tale na tiki bibi ni noda itukutuku sai koya ni matavuvale e rawa ni vakaduavatataki me tawamudu. Na matavuvale e sa lesi mai vua na Kalou. Na nona ituvatuva ni bula marau na Tamada Vakalomalagi sa rawa me tomani kina na noda veiwekani vakamatavuvale me lako sivita na ibulubulu. Na veicakacaka vakalotu tabu ni valetabu sa rawa kina me ra tiko vata me tawamudu na matavuvale.
Ena rarama ni kosipeli, sa rawa kina ki na matavuvale me ra vakameautaka e vuqa na veileti vakavuvale, na duiyaloyalo kei na dredre. Na vuvale e mavoa tu ena veileti ena rawa ni vakabulai ena yalo ni veivutuni, veivosoti, kei na vakabauta na mana ni Veisorovaki iJisu Karisito.
Na kosipeli i Jisu Karisito e vukei keda meda tara cake na isema qaqaco ni matavuvale. Na itikotiko sa vanua uasivi duadua me vakavulici ka vulici kina na ivakavuvuli ni kosipeli. Na vuvale ka yavutaki ena ivakavuvuli ni kosipeli ena vanua ni ivakaruru kei na veitaqomaki. Sa vanua me rawa ni tiko kina na Yalo ni Turaga.
Na ituvatuva sa koto oqo e sabolo ni veika e rawa ni o vakavulica vua e dua ke lailai walega na gauna. Ni o vakayagataka na ituvatuva oqo, digia e dua se sivia na ivakavuvuli mo vakavulica. Na yavu vakaivunau ni veivakavuvuli yadua sa soli yani ena itekivu ni lesoni.
Ni o veivakavulici, taro ka vakarorogo. Vakayacora na veisureti ena vukei ira na tamata me ra vulica me ra toro voleka vua na Kalou. E dua na veisureti bibi sai koya me sotavi iko tale na tamata oya. Na balavu ni lesoni ena vakatau ena taro o taroga kei na vakarorogo o vakayacora.
iVakatakilakila
vakavulici ira tiko na marama na daukaulotu
Na Veika mo na Vakavulici ira Kina na Tamata ena Loma ni 3-10 na Miniti
Na Kalou, sa tala mai na Luvena Lomani, ko Jisu Karisito, ki vuravura me vueti keda mai na ivalavala ca kei na mate.
Na vakabauti Jisu Karisito sa dua na ivakavuvuli ni cakacaka kei na kaukauwa. Na vakabauta ena vukei keda meda vakila na kaukauwa veivaqaqacotaki ni iVakabula ena noda bula.
Na vakabauti Jisu Karisito ena vakavuna na veivutuni. Na veivutuni sai koya na iwalewale eda vuki kina vua na Kalou ka vuki tani mai na ivalavala ca. Nida veivutuni, sa veisau na noda ivalavala, gagadre, kei na vakanananu me salamuria na loma ni Kalou.
Nida veivutuni, e na vosoti keda na Tamada Vakalomalagi. Sa rawa na veivosoti ni sa sorovaka na noda ivalavala ca o Jisu Karisito.
Na papitaiso e rua tiko na kena iwase: papitaiso ena wai kei na papitaiso ena Yalo. Nida papitaiso ka vakadeitaki, eda sa savai mai na noda ivalavala ca, ka soli kina vei keda e dua na itekitekivu vou ni bula.
Ni oti na papitaiso ena wai sa soli vei keda na isolisoli ni Yalo Tabu ena cakacaka vakalotu ni veivakadeitaki.
Nida muria na salatu ni kosipeli ena yalodina me yacova na itinitini ni noda bula, e yalataka na Kalou nida na rawata na bula tawamudu.