masu tiko na veiwatini

16.

Bulataki ni Kosipeli i Jisu Karisito

Na cakacaka ni veivakabulai kei na bula vakacerecerei ni Kalou e vakanamata ena va na itavi lesi vakalou (raica na 1.2). Na imatai vei ira oqo sai koya na bulataki ni kosipeli i Jisu Karisito. Eda bulataka na kosipeli ena noda:

• Cakacakataka noda vakabauti Jisu Karisito.

• Veivutuni e veisiga.

• Veiyalayalati vata kei na Kalou ena noda ciqoma na cakacaka vakalotu ni veivakabulai kei na bula vakacerecerei.

• Vosota me yacova na ivakataotioti ena kena maroroi na veiyalayalati oqori.

Ni da bulataka na kosipeli ka vakila na veivakauqeti ni Yalo Tabu, eda gadreva me da vukei ira na lewe ni matavuvale kei ira tale eso me ra ciqoma na veivakalougatataki ni Kalou (raica na 1 Nifai 8:10–12). Eda vulica ka vakavuvulitaka na kosipeli i Jisu Karisito e vale ka vakakina e valenilotu. Eda segata talega meda bula rawati keda ena noda vakarautaka na veika me baleti keda kei na noda matavuvale, vakayalo ka vakayago.

Na bulataki ni kosipeli e kovuta na veika tale eso me baleta na Nona cakacaka ni veivakabulai kei na bula vakacerecerei na Kalou. Oqo e oka kina na nodra vukei o ira era vakaleqai tu, sureti ni tamata kecega me ciqoma na kosipeli, ka vakaduavatataki na matavuvale me tawamudu.