« ការផ្តល់សម្រាប់ខ្លួនយើង និងការថែទាំអ្នកដែលខ្វះខាត ៖ ជួយអ្នកដទៃដូចជាព្រះអង្គសង្រ្គោះនឹងធ្វើ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការផ្តល់សម្រាប់ខ្លួនយើង និងការថែទាំអ្នកដែលខ្វះខាត ៖ ជួយអ្នកដទៃដូចជាព្រះអង្គសង្រ្គោះនឹងធ្វើ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការស្ថាបនាភាពខ្លួនទីពឹងខ្លួន ៖ មេរៀនទី ១៨០
ការផ្តល់សម្រាប់ខ្លួនយើង និងការថែទាំអ្នកដែលខ្វះខាត
ជួយអ្នកដទៃដូចជាព្រះអង្គសង្រ្គោះនឹងធ្វើ
តើអ្នកអាចគិតពីមនុស្សម្នាក់ដែលអ្នកស្គាល់ដែលជាគំរូល្អអំពីភាពខ្លួនទីពឹងខ្លួនដែរឬទេ ? ព្រះអម្ចាស់បានបង្រៀនអំពី យ៉ូសែបនៃស្រុកអេស៊ីព្ទ ថាជាគំរូដ៏អស្ចារ្យនៃមនុស្សម្នាក់ដែលដូចជាព្រះអង្គសង្គ្រោះ បានបង្ហាញពីភាពខ្លួនទីពឹងខ្លួន និងបានជួយអ្នកដទៃដែលខ្វះខាត ។ មេរៀននេះអាចជួយសិស្សស្វែងរករបៀបស្ថាបនាភាពខ្លួនទីពឹងខ្លួនដែលធ្វើឲ្យពួកគេអាចជួយអ្នកដទៃ ដូចជាព្រះយេស៊ូវគ្រីស្ទនឹងធ្វើ ។
ការរៀបចំសិស្ស ៖ សូមអញ្ជើញសិស្សឲ្យស្ដាប់ ឬអានទំនុកនៃទំនុកតម្កើងបទ « អ្នកធ្វើដំណើរដ៏ក្រតោកយ៉ាក » ( ទំនុកតម្កើង ល.រ. ១៧ ) ។ សិស្សអាចរកមើលរបៀបដែលយើងអាចថែទាំអ្នកដទៃដូចដែលព្រះយេស៊ូវនឹងធ្វើ ។
សកម្មភាពរៀនសូត្រដែលអាចមាន
ម៉ាស់អុកស៊ីហ្សែនខាងវិញ្ញាណ
សូមពិចារណាចាប់ផ្តើមថ្នាក់ដោយការជួយសិស្សពិភាក្សាអំពីរបៀបដែលការផ្គត់ផ្គង់តម្រូវការផ្ទាល់ខ្លួនរបស់យើងនឹងអាចឲ្យយើងជួយអ្នកដទៃបានកាន់តែប្រសើរ ។ របៀបមួយដែលអ្នកអាចធ្វើបានគឺដាក់បង្ហាញរូបភាពម៉ាស់អុកស៊ីហ្សែននៅលើយន្តហោះ ដែលរួមបញ្ចូលនៅក្នុងមេរៀននេះ និងសេចក្តីថ្លែងការណ៍ខាងក្រោម ។
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ប៉ុន្មានសប្ដាហ៍មុន ខ្ញុំបានជិះយន្ដហោះទៅកាន់អាមេរិកខាងត្បូង ។ អ្នកបម្រើតាមយន្ដហោះ បានបង្វែរចិត្តរបស់យើងទៅមើលវីដេអូសុវត្ថិភាព ។ យើងត្រូវបានព្រមានថា « វាប្រហែលជាមិនទំនង ប៉ុន្តែបើមានការផ្លាស់ប្ដូរសម្ពាធខ្យល់ក្នុងយន្ដហោះ នោះបន្ទះគម្របនៅខាងលើកៅអីរបស់អ្នកនឹងបើក ហើយទម្លាក់ម៉ាស់អុកស៊ីហ្សែនមក ។ បើរឿងនេះកើតឡើង សូមចាប់យកម៉ាស់នោះមកពាក់ ។ សូមដាក់ម៉ាស់គ្របលើច្រមុះ និងមាត់របស់អ្នក ។ សូមទាញខ្សែមកទាក់នឹងក្បាលរបស់អ្នក ហើយកែតម្រូវតាមចាំបាច់ ។ រួចហើយមានការព្រមាននេះថា ៖ « សូមប្រាកដថា ពាក់ម៉ាស់របស់អ្នកឲ្យបានត្រឹមត្រូវជាមុនសិន មុននឹងជួយដល់អ្នកដទៃ » ។ ( « Joseph Smith » ឬ Liahona ខែវិច្ឆិកា ឆ្នាំ២០១៤ ទំព័រ ៣០ )
-
ហេតុអ្វីវាសំខាន់ដើម្បីពាក់ម៉ាស់អុកស៊ីហ្សែនឲ្យខ្លួនឯងជាមុនសិន មុននឹងជួយអ្នកដទៃ ?
-
តើរបៀបណាខ្លះដែលការណ៍នេះអាចអនុវត្តចំពោះការខិតខំខាងវិញ្ញាណ និងខាងសាច់ឈាមរបស់យើងដើម្បីដើរតាមព្រះវរបិតាសួគ៌ និងព្រះយេស៊ូវគ្រីស្ទ ?
របៀបមួយដែលការណ៍នេះអាចអនុវត្តបានគឺនៅក្នុងកិច្ចខិតខំប្រឹងប្រែងរបស់យើងក្នុងការស្ថាបនាភាពខ្លួនទីពឹងខ្លួន ដូច្នេះយើងអាចជួយអ្នកដទៃបាន ។
វាអាចប្រយោជន៍ក្នុងការរំឭកសិស្សថា ថ្នាក់ដឹកនាំសាសនាចក្របានទូន្មានយើងឲ្យពង្រឹង « ភាពខ្លួនទីពឹងខ្លួនរបស់យើងផ្ទាល់តាមរយៈការងារដ៏ឧស្សាហ៍ព្យាយាម និងដោយមានជំនួយរបស់ព្រះអម្ចាស់ ។ ភាពខ្លួនទីពឹងខ្លួនគឺជាលទ្ធភាព … ដើម្បីផ្តល់សេចក្តីត្រូវការចាំបាច់នៃជីវិតខាងវិញ្ញាណ និងខាងសាច់ឈាមសម្រាប់ខ្លួនឯង និងគ្រួសារ » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ២២.០ នៅក្នុងបណ្ណាល័យដំណឹងល្អ ) ។
យ៉ូសែបនៃស្រុកអេស៊ីព្ទ
សិស្សអាចធ្លាប់សិក្សាដំណើររឿងអំពីយ៉ូសែបនៅស្រុកអេស៊ីព្ទក្នុងមេរៀនទី ៣៥ ៖ « លោកុប្បត្តិ ៤២–៤៥ » ឬ នៅក្នុងមេរៀនទី ១៧៨ ៖ « ការអនុវត្តសេចក្ដីជំនឿលើព្រះយេស៊ូវគ្រីស្ទដើម្បីស្ថាបនាភាពខ្លួនទីពឹងខ្លួន » ។ កថាខណ្ឌខាងក្រោមអាចត្រូវបានប្រើដើម្បីជួយរំឭកសិស្សអំពីដំណើររឿង ។ ម្យ៉ាងវិញទៀត អ្នកអាចអញ្ជើញសិស្សម្នាក់ឲ្យរៀបរាប់ដំណើររឿងរបស់យ៉ូសែបនៅស្រុកអេស៊ីព្ទដែលមាននៅក្នុង លោកុប្បត្តិ ៤២–៤៥ ។
យ៉ូសែបនៅស្រុកអេស៊ីព្ទគឺជាគំរូមួយរបស់មនុស្សម្នាក់ដែលបានបង្ហាញភាពខ្លួនទីពឹងខ្លួន ហើយជាលទ្ធផល ព្រះអម្ចាស់បានរៀបចំលោកដើម្បីជួយមនុស្សដទៃ ។ ក្នុងអំឡុងពេលមានគ្រោះទុរ្ភិក្ស ពួកបងប្រុសរបស់យ៉ូសែបបានធ្វើដំណើរទៅស្រុកអេស៊ីព្ទដើម្បីស្វែងរកគ្រាប់ធញ្ញជាតិ ។ នៅស្រុកអេស៊ីព្ទមានគ្រាប់ធញ្ញជាតិជាច្រើនដែលត្រូវបានស្ដុកទុក ដោយសារព្រះបានបំផុសគំនិតយ៉ូសែបឲ្យរៀបចំទុកជាមុនសម្រាប់គ្រោះទុរ្ភិក្ស ។ ពេលពួកបងរបស់យ៉ូសែបបានមកដល់ ដោយស្វែងរកជំនួយខាងសាច់ឈាម យ៉ូសែបបានបង្ហាញខ្លួនលោកថាជាប្អូនប្រុសរបស់ពួកគេ ។
សូមអាន លោកុប្បត្តិ ៤៥:៤–១១; ៤៧:១១–១២ ដោយរកមើលរបៀបដែលយ៉ូសែបផ្ដល់ពរជ័យដល់គ្រួសាររបស់លោក ។
-
តើអ្នកមើលឃើញដំណើររឿងនេះ និងឧទាហរណ៍អំពីម៉ាស់អុកស៊ីហ្សែនមានទំនាក់ទំនងគ្នាអ្វីខ្លះ ?
-
នៅក្នុងដំណើររឿងរបស់យ៉ូសែប តើវារំឭកអ្នកអ្វីខ្លះអំពីព្រះអង្គសង្គ្រោះ ?
ជួយសិស្សឲ្យស្គាល់សេចក្ដីពិតមួយដូចជាប្រយោគនេះ ៖ នៅពេលយើងប្រែក្លាយជាមនុស្សមានភាពខ្លួនទីពឹងខ្លួនតាមរយៈជំនួយរបស់ព្រះ យើងមានលទ្ធភាពកាន់តែច្រើនដើម្បីជួយមនុស្សដទៃ ។ ដើម្បីជួយសិស្សមើលឃើញពីគំរូបន្ថែមទៀតនៃសេចក្តីពិតនេះ អ្នកអាចរៀបចំសិស្សជាពីរក្រុម ហើយចាត់ក្រុមនីមួយៗនូវសេចក្ដីយោងបទគម្ពីរខាងក្រោមមួយ ។
សូមអានសេចក្ដីយោងបទគម្ពីរខាងក្រោម ដោយរកមើលគំរូអំពីរបៀបដែលព្រះអង្គសង្គ្រោះ និងស្តេចបេនយ៉ាមីនបានបង្រៀនសេចក្តីពិតនេះ ។
លូកា ២២:៣១–៣២
-
នៅក្នុងខគម្ពីរទាំងនេះ តើអ្នកមើលឃើញអ្វីខ្លះអំពីគំរូនៃសេចក្ដីពិតនេះ ?
ស្វ័យវាយតម្លៃខាងក្រោមអាចជួយសិស្សភ្ជាប់ការខិតខំប្រឹងប្រែងរបស់ពួកគេក្នុងការស្ថាបនាភាពខ្លួនទីពឹងខ្លួន និងជួយអ្នកដទៃជាមួយនឹងកាលៈទេសៈផ្ទាល់ខ្លួនរបស់ពួកគេ ។
ទោះបីយ៉ូសែបបានជួបប្រទះនឹងការលំបាកនៅស្រុកអេស៊ីព្ទក្ដី ជាលទ្ធផល ក៏ព្រះអម្ចាស់បានរៀបចំលោកដើម្បីប្រទានពរដល់អ្នកដទៃ ( សូមមើល លោកុប្បត្តិ ៤៥:៥–៨ ) ។ ស្រដៀងគ្នានេះដែរ ព្រះអម្ចាស់អាចរៀបចំអ្នកដើម្បីផ្ដល់ពរជ័យ និងជួយអ្នកដទៃជាលទ្ធផលនៃបទពិសោធន៍របស់អ្នក ។ នៅពេលអ្នកគិតពីជីវិតរបស់អ្នក សូមពិចារណាសំណួរខាងក្រោម ៖
-
តើអ្នកកំពុងដកពិសោធន៍អ្វីខ្លះឥឡូវនេះ ដែលកំពុងជួយអ្នកឲ្យមានភាពខ្លួនទីពឹងខ្លួនកាន់តែច្រើនក្នុងផ្នែកផ្សេងៗនៃជីវិតរបស់អ្នក ? ( ការណ៍ទាំងនេះអាចជាផ្នែកខាងវិញ្ញាណ ខាងហិរញ្ញវត្ថុ ខាងបញ្ញា ខាងរាងកាយ ឬខាងសតិអារម្មណ៍ ) ។
-
តើព្រះអម្ចាស់អាចប្រើបទពិសោធន៍ទាំងនេះដើម្បីជួយអ្នកឲ្យអ្នកផ្ដល់ពរជ័យដល់អ្នកដទៃនៅពេលអនាគតដោយរបៀបណា ?
នៅពេលអ្នកបន្តសិក្សានៅថ្ងៃនេះ សូមយកចិត្តទុកដាក់លើការបំផុសគំនិតពីព្រះវិញ្ញាណបរិសុទ្ធ ដែលអាចជួយអ្នកឲ្យកាន់តែមានភាពខ្លួនទីពឹងខ្លួនដើម្បីជួយអ្នកដទៃ ដូចព្រះអង្គសង្គ្រោះនឹងធ្វើ ។
ការស្ថាបនាភាពខ្លួនទីពឹងខ្លួន
សកម្មភាពខាងក្រោមអាចជួយសិស្សឲ្យស្គាល់ពីរបៀបដែលការខិតខំប្រឹងប្រែងរបស់ពួកគេក្នុងការស្ថាបនាភាពខ្លួនទីពឹងខ្លួនអាចជួយអ្នកដទៃបាន ។ សូមពិចារណាចាត់សិស្សជាប្រាំក្រុម ហើយចាត់តាំងក្រុមនីមួយៗនូវផ្នែកនៃភាពខ្លួនទីពឹងខ្លួន ។ នៅក្នុងថ្នាក់ដែលមានសិស្សតិច អ្នកអាចចាត់តាំងផ្នែកនីមួយៗដល់សិស្សម្នាក់ ។
ដាក់បង្ហាញរូបភាពដូចខាងក្រោមនៅលើក្តារខៀន ហើយចែកចាយសេចក្តីណែនាំខាងក្រោមម្តងមួយៗ ។
-
នៅលើទំព័រមួយក្នុងសៀវភៅកំណត់ហេតុការសិក្សារបស់អ្នក សូមគូសរូបម៉ាស់អុកស៊ីហ្សែន ។
-
សូមដាក់ស្លាកនៅខាងលើម៉ាស់អុកស៊ីហ្សែនរបស់អ្នកនូវចំណុចមួយនៃភាពខ្លួនទីពឹងខ្លួនដូចខាងក្រោម ៖
- ចំណេះដឹងអំពីដំណឹងល្អ
- តម្រូវការផ្នែកហិរញ្ញវត្ថុ
- ការអប់រំ និងការងារ
- តម្រូវការផ្នែករាងកាយ
- តម្រូវការខាងសតិអារម្មណ៍ និងខាងសង្គម
-
គិតអំពីអ្វីដែលក្មេងវ័យជំទង់អាចធ្វើ ដើម្បីស្ថាបនាភាពខ្លួនទីពឹងខ្លួននៅត្រង់ចំណុចដែលអ្នកបានជ្រើសរើស ។ សូមសរសេរចំណុចទាំងនេះនៅក្នុងម៉ាស់អុកស៊ីហ្សែនដំបូង ។
ឧទាហរណ៍ សិស្សអាចនិយាយអំពីអ្វីៗដូចជាការសិក្សាព្រះគម្ពីរដោយខ្លួនខ្ញុំផ្ទាល់ ( ចំណេះដឹងពីដំណឹងល្អ ) ការសិក្សាដើម្បីប្រឡងគណិតវិទ្យារបស់ខ្ញុំ ( ខាងការអប់រំ ) ឬការធ្វើតាមផែនការលំហាត់ប្រាណ ( ខាងរូបកាយ ) ។
-
សូមដាក់ស្លាកម៉ាស់អុកស៊ីហ្សែនទីពីរ « ការជួយអ្នកដទៃ » ។ ជ្រើសរើសគំនិតពីរ ឬបីដែលបានសរសេរនៅក្នុងម៉ាស់អុកស៊ីហ្សែនដំបូង ។ សម្រាប់គំនិតនីមួយៗដែលអ្នកជ្រើសរើស សូមសរសេររបៀបជាក់លាក់មួយដែលក្មេងវ័យជំទង់អាចប្រើបទពិសោធន៍នោះ ដើម្បីជួយអ្នកដទៃឲ្យស្ថាបនាភាពខ្លួនទីពឹងខ្លួន ។ សរសេរចំណុចជាក់លាក់ទាំងនេះនៅក្នុងម៉ាស់អុកស៊ីហ្សែនទីពីរ ។
សិស្សអាចសរសេរចំណុចដូចជា ការប្រើប្រាស់បទពិសោធន៍សិក្សាព្រះគម្ពីររបស់ខ្ញុំ ដើម្បីជួយប្អូនស្រីរបស់ខ្ញុំរៀនពីរបៀបសិក្សាព្រះគម្ពីរ ( ខាងវិញ្ញាណ ) ការបង្រៀនរបៀបគិតគណិតវិទ្យាដល់មិត្តភក្ដិរបស់ខ្ញុំនៅក្នុងថ្នាក់ ( ខាងការអប់រំ ) ឬអញ្ជើញមិត្តរបស់ខ្ញុំឲ្យធ្វើលំហាត់ប្រាណជាមួយខ្ញុំ ( ខាងរូបរាងកាយ ) ។
បន្ទាប់ពីសិស្សមានពេលគ្រប់គ្រាន់ដើម្បីបំពេញលំហាត់នេះហើយ សូមអញ្ជើញពួកគេឲ្យចែកចាយអ្វីដែលពួកគេបានសរសេរនៅលើម៉ាស់អុកស៊ីហ្សែនរបស់ពួកគេ ។ ពួកគេអាចធ្វើដូចនេះបានដោយការចែកចាយអ្វីដែលពួកគេបានរៀនជាមួយសិស្សដែលផ្តោតលើផ្នែកផ្សេងៗនៃភាពខ្លួនទីពឹងខ្លួន ។ ជាផ្នែកនៃការចែកចាយ អ្នកអាចអញ្ជើញសិស្សឲ្យអាន សុភាសិត ២៨:២៧ ដោយរកមើលសេចក្តីសន្យាសម្រាប់អស់អ្នកដែលផ្គត់ផ្គង់ដល់អ្នកដទៃ ។ ( កំណត់ចំណាំ ៖ ពាក្យ ទាល់ក្រ អាចអនុវត្តចំពោះគ្រប់ទិដ្ឋភាពទាំងអស់នៃភាពខ្លួនទីពឹងខ្លួន មិនគ្រាន់តែជាផ្នែកហិរញ្ញវត្ថុនោះទេ ) ។
-
តើការខិតខំប្រឹងប្រែងរបស់អ្នកដើម្បីធ្វើជាមនុស្សមានភាពខ្លួនទីពឹងខ្លួនបានជួយអ្វីខ្លះដល់អ្នកដទៃ ? តើការណ៍នោះជួយអ្នកឲ្យទទួលអារម្មណ៍កាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទបានយ៉ាងដូចម្តេច ?
-
នៅពេលសិស្សចែកចាយ សូមជួយពួកគេឲ្យដឹងថា ពួកគេមិនចាំបាច់មានភាពខ្លួនទីពឹងខ្លួនដ៏ឥតខ្ចោះនៅក្នុងផ្នែកណាមួយដើម្បីជួយនរណាម្នាក់ផ្សេងទៀតនោះទេ ។
ការជួយអ្នកដទៃដូចជាព្រះអង្គសង្គ្រោះ
សកម្មភាពខាងក្រោមមានគោលបំណងផ្តល់ឲ្យសិស្សនូវពេលវេលាដើម្បីគិតអំពីរបៀបដែលការខិតខំប្រឹងប្រែងរបស់ពួកគេក្នុងការស្ថាបនាភាពខ្លួនទីពឹងខ្លួនអាចឲ្យពួកគេជួយអ្នកដទៃ ។
សូមសរសេរសេចក្តីថ្លែងការណ៍មិនពេញលេញខាងក្រោមនៅក្នុងសៀវភៅកំណត់ហេតុការសិក្សារបស់អ្នក ៖
-
ខ្ញុំកំពុងស្ថាបនាភាពខ្លួនទីពឹងខ្លួនដោយ …
-
របៀបមួយចំនួនដែលខ្ញុំអាចជួយអ្នកដទៃនៅផ្នែកនេះគឺ …
ស្វែងរកជំនួយពីព្រះវិញ្ញាណបរិសុទ្ធដើម្បីបំពេញសេចក្តីថ្លែងការណ៍ទាំងពីរ ។
សូមអញ្ជើញសិស្សឲ្យពិចារណាប្រកបដោយការអធិស្ឋាននូវអ្វីដែលពួកគេអាចធ្វើ ។ ការណ៍នេះអាចរួមបញ្ចូលការស្វែងរកបុគ្គលជាក់លាក់ដែលពួកគេចង់ជួយ និងរបៀបដែលពួកគេអាចជួយ ។
សូមពិចារណាអញ្ជើញសិស្សឲ្យចែកចាយអ្វីដែលពួកគេបានសរសេរ ។ ជាសំណួរតាមដាន អ្នកអាចសួរសិស្សដូចខាងក្រោម ៖
-
តើការយកចិត្តទុកដាក់ចំពោះអ្នកដទៃអាចជួយអ្នកឲ្យប្រែក្លាយកាន់តែដូចជាព្រះអង្គសង្គ្រោះយ៉ាងដូចម្ដេច ?
សូមបញ្ចប់មេរៀនដោយការចែកចាយទីបន្ទាល់របស់អ្នកអំពីរបៀបដែលការស្ថាបនាភាពខ្លួនទីពឹងខ្លួនបានផ្ដល់សមត្ថភាពដល់អ្នកដើម្បីជួយអ្នកដទៃ ។ សូមអញ្ជើញសិស្សឲ្យធ្វើសកម្មភាពតាមការបំផុសគំនិតដែលពួកគេបានទទួលដើម្បីជួយអ្នកដទៃដូចជាយេស៊ូវគ្រីស្ទនឹងធ្វើ ។