« ការគ្រប់គ្រងធនធានហិរញ្ញវត្ថុដោយឆ្លាតវៃ ៖ ការប្រើគោលការណ៍របស់ព្រះអម្ចាស់ដើម្បីធ្វើការសម្រេចចិត្តផ្នែកហិរញ្ញវត្ថុ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការគ្រប់គ្រងធនធានហិរញ្ញវត្ថុដោយឆ្លាតវៃ ៖ ការប្រើគោលការណ៍របស់ព្រះអម្ចាស់ដើម្បីធ្វើការសម្រេចចិត្តផ្នែកហិរញ្ញវត្ថុ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការស្ថាបនាភាពខ្លួនទីពឹងខ្លួន
ការគ្រប់គ្រងធនធានហិរញ្ញវត្ថុដោយឆ្លាតវៃ
ការប្រើប្រាស់ គោលការណ៍របស់ព្រះអម្ចាស់ដើម្បីធ្វើការសម្រេចចិត្តផ្នែកហិរញ្ញវត្ថុ
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ បានបង្រៀន ៖ « ព្រះអម្ចាស់ស្ថិតក្នុងភាពលម្អិតនៅក្នុងជីវិតរបស់យើង » ( « By Divine Design » Liahona ខែវិច្ឆិកា ឆ្នាំ២០១៧ ទំព័រ ៥៦ ) ការណ៍នេះរួមបញ្ចូលទាំងការសម្រេចចិត្តផ្នែកហិរញ្ញវត្ថុរបស់យើង ។ ការរៀនពីរបៀបដើម្បីឲ្យព្រះអម្ចាស់ចូលរួមនៅក្នុងការសម្រេចចិត្តរបស់យើងអំពីលុយ អាចជួយយើងធ្វើជាមនុស្សមានភាពខ្លួនទីពឹងខ្លួន ។ មេរៀននេះអាចជួយសិស្សប្រើគោលការណ៍ដែលបានបំផុសគំនិតដើម្បីគ្រប់គ្រងការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់ ។
ការរៀបចំសិស្ស ៖ មុនពេលបង្រៀនមេរៀននេះ សូមពិចារណាបង្ហាញ « ផែនទីស្ដីពីភាពជោគជ័យនៃការគ្រប់គ្រងហិរញ្ញវត្ថុ » នៅលើក្តារខៀន ហើយអញ្ជើញសិស្សឲ្យថតរូបផែនទីនេះនៅលើទូរសព្ទរបស់ពួកគេ ។ អ្នកក៏អាចចែកចាយសំណៅក្រដាសរបស់ផែនទីនេះដល់សិស្សផងដែរ ។
សកម្មភាពរៀនសូត្រដែលអាចមាន
ការសម្រេចចិត្តផ្នែកហិរញ្ញវត្ថុ
( កំណត់ចំណាំ ៖ មេរៀននេះអាចបង្រៀនភ្ជាប់ជាមួយមេរៀនទី ១៥៨ ៖ « ម៉ាឡាគី ៣ » ដែលមានសកម្មភាពសិក្សាដើម្បីជួយសិស្សឲ្យយល់ពីក្រឹត្យវិន័យរបស់ព្រះអម្ចាស់ពីដង្វាយមួយភាគក្នុងដប់ ) ។
មុនចាប់ផ្ដើមថ្នាក់ សូមគូរ ឬដាក់បង្ហាញតារាងដូចខាងក្រោមនៅលើក្ដារខៀន ។
|
ការសម្រេចចិត្តផ្នែកហិរញ្ញវត្ថុសំខាន់ៗ |
ការព្រួយបារម្ភក្នុងការធ្វើការសម្រេចចិត្តទាំងនេះ |
សូមអញ្ជើញសិស្សឲ្យមកកាន់ក្ដារខៀន ហើយបំពេញតារាងនេះ នៅពេលពួកគេពិចារណាពីការសម្រេចចិត្តផ្នែកហិរញ្ញវត្ថុដែលពួកគេនឹងធ្វើក្នុងរយៈពេល ៥ ទៅ ១០ ឆ្នាំខាងមុខ ។ នៅពេលសិស្សធ្វើដូច្នេះ អ្នកអាចដើរជុំវិញថ្នាក់ ហើយលើកទឹកចិត្តពួកគេឲ្យចែកចាយគំនិតរបស់ពួកគេនៅលើក្ដារខៀន ឬជាមួយអ្នក ។
ការសម្រេចចិត្តដែលសិស្សអាចរៀបរាប់ រួមមានការបង់ប្រាក់សម្រាប់ការអប់រំ និងបេសកកម្ម ការផ្គត់ផ្គង់គ្រួសារ ឬការទិញ ឬជួលកន្លែងរស់នៅ ។ កង្វល់អាចរួមបញ្ចូលការខ្វះខាតលុយ មិនដឹងពីរបៀបរៀបចំថវិកា ការឈប់ពីការងារដើម្បីបម្រើបេសកកម្ម ឬដឹងថាអ្នកណាគួរទុកចិត្តនៅពេលធ្វើការសម្រេចចិត្តផ្នែកហិរញ្ញវត្ថុ ។
គិតអំពីការសម្រេចចិត្តផ្នែកហិរញ្ញវត្ថុសំខាន់ៗមួយចំនួនដែលអ្នកប្រឈមមុខ ឬនឹងប្រឈមមុខក្នុងពេលឆាប់ៗនេះ នៅពេលអ្នកពិចារណាសំណួរខាងក្រោម ៖
-
តើអ្នកមានសំណួរអ្វីខ្លះអំពីរបៀបទទួលបានជំនួយពីព្រះអម្ចាស់ក្នុងការសម្រេចចិត្តទាំងនេះ ?
-
តើអ្នកបានសាកល្បងអ្វីខ្លះកាលពីមុន ដែលវាបានមានប្រយោជន៍ ? តើអ្វីខ្លះដែលពុំមានប្រយោជន៍ ?
នៅពេលយើងឆ្លើយតបចំពោះព្រះវិញ្ញាណបរិសុទ្ធ នោះព្រះវរបិតាសួគ៌អាចបង្ហាញយើងពីរបៀបធ្វើការសម្រេចចិត្តផ្នែកហិរញ្ញវត្ថុដ៏ឈ្លាសវៃពេញមួយជីវិតរបស់យើង ។ សូមបើកចិត្តទូលាយចំពោះចំណាប់អារម្មណ៍ទាំងនេះនៅពេលអ្នកសិក្សានៅថ្ងៃនេះ ។
ការធ្វើការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់
ព្រះវរបិតាសួគ៌ និងព្រះយេស៊ូវគ្រីស្ទចង់ដឹកនាំយើងក្នុងគ្រប់ទិដ្ឋភាពនៃជីវិតរបស់យើង ។ ការណ៍នេះរួមបញ្ចូលទាំងការសម្រេចចិត្តផ្នែកហិរញ្ញវត្ថុរបស់យើង ។ ទ្រង់ទាំងទ្វេបានផ្ដល់ការណែនាំដល់យើងនៅក្នុងបទគម្ពីរ ដែលអាចជួយយើងធ្វើការសម្រេចចិត្តផ្នែកហិរញ្ញវត្ថុប្រកបដោយប្រាជ្ញា ។
សរសេរការណ៍ខាងក្រោមនៅខាងលើទំព័រនៅក្នុងសៀវភៅកំណតហេតុការសិក្សារបស់អ្នក ៖ ខ្ញុំអាចធ្វើការសម្រេចចិត្តផ្នែកហិញ្ញវត្ថុតាមរបៀបរបស់ព្រះអម្ចាស់ដោយ …
សូមអានសេចក្តីយោងបទគម្ពីរបីខាងក្រោម ។ បំពេញសេចក្តីពិតនៅក្នុងសៀវភៅកំណត់ហេតុការសិក្សារបស់អ្នកជាមួយនឹងអ្វីដែលអ្នករៀនពីព្រះគម្ពីរ ។
-
លោកុប្បត្តិ ៤១:៤៦–៤៩, ៥៣–៥៧ ( ផារ៉ោនបានតែងតាំងយ៉ូសែបឲ្យមើលការខុសត្រូវលើការផលិតគ្រាប់ធញ្ញជាតិនៅស្រុកអេស៊ីព្ទក្នុងអំឡុងពេលច្រូតកាត់ដ៏ច្រើនសន្ធឹកសន្ធាប់ ដើម្បីរៀបចំសម្រាប់ឆ្នាំដែលមានអំណត់ ដែលបានព្យាករ ) ។
-
ចោទិយកថា ១៥:៧–៨
-
ទំនុកដំកើង ២៤:១
-
ម៉ាទ្បាគី ៣:៨–១១
បន្ទាប់ពីសិស្សសិក្សាបទគម្ពីររួចហើយ សូមអញ្ជើញពួកគេឲ្យចែកចាយអ្វីដែលពួកគេបានរៀន ។ របៀបមួយដើម្បីធ្វើការណ៍នេះគឺត្រូវដាក់បង្ហាញ « Financial Stewardship Success Map » នៅលើក្ដារខៀន ។ សិស្សអាចសរសេរអ្វីដែលពួកគេបានរៀន និងខគម្ពីរដែលពួកគេបានរៀនចេញពី នៅក្បែរកន្លែងនៅលើផែនទីដែលពួកគេមានអារម្មណ៍ថាវាត្រូវបំផុត ។
ជាជម្រើសមួយផ្សេងទៀត អ្នកអាចបង្កើតជួរឈរទីបីមួយនៅក្នុងតារាងនេះនៅលើក្ដារខៀនដោយដាក់ចំណងជើងថា របៀបរបស់ព្រះអម្ចាស់ ហើយអញ្ជើញសិស្សឲ្យសរសេរអ្វីដែលពួកគេបានរកឃើញ ។
សូមពិចារណាសង្កត់ធ្ងន់លើសេចក្តីពិតដែលទាក់ទងបំផុតទៅនឹងតម្រូវការសិស្សរបស់អ្នក ។ ខាងក្រោមនេះ គឺជារបៀបដែលអាចមានដើម្បីបំពេញសេចក្តីថ្លែងការណ៍នេះ ៖
… សន្សំទុកធនធានហិរញ្ញវត្ថុសម្រាប់គ្រាលំបាក ( លោកុប្បត្តិ ៤១:៤៦–៤៩, ៥៣–៥៧ ) ។
… ជួយអ្នកខ្វះខាត ( ចោទិយកថា ១៥:៧–៨ ) ។
… ចងចាំថា អ្វីៗដែលយើងមានគឺមកពីព្រះអម្ចាស់ ( ទំនុកដំកើង ២៤:១ ) ។
… គោរពប្រតិបត្តិតាមក្រឹត្យវិន័យដង្វាយមួយភាគក្នុងដប់របស់ព្រះអម្ចាស់ ( ម៉ាឡាគី ៣:៨–១១ ) ។
… ស្វែងរកនគររបស់ព្រះជំនួសឲ្យទ្រព្យសម្បត្តិ ( យ៉ូប ២:១៨–១៩ ) ។
… បង់សងបំណុល ( គោលលទ្ធិ និងសេចក្តីសញ្ញា ១០៤:៧៨ ) ។
-
តើអ្វីដែលអ្នករៀនពីព្រះគម្ពីរអាចជួយអ្នកធ្វើការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់យ៉ាងដូចម្ដេច ?
ដាក់អាទិភាពលើការចំណាយរបស់យើង
សកម្មភាពខាងក្រោមត្រូវបានបង្កើតឡើងដើម្បីជួយសិស្សឲ្យអនុវត្តការប្រើប្រាស់សេចក្តីពិតដែលបានបំផុសគំនិត ដែលពួកគេបានរកឃើញដើម្បីធ្វើការសម្រេចចិត្តផ្នែកហិរញ្ញវត្ថុ ។ ដើម្បីធ្វើដូច្នេះ អ្នកអាចដាក់សិស្សជាក្រុមដែលមានគ្នាបួននាក់ ហើយផ្តល់ឲ្យក្រុមនីមួយៗនូវសំណៅមេរៀនដែលមានចំណងជើងថា « Making Financial Decisions in the Lord’s Way » ។ ផ្តល់ឲ្យសិស្សម្នាក់ៗក្នុងក្រុមនូវអាយុមួយក្នុងចំណោមក្រុមអាយុដែលបានបង្ហាញនៅលើសំណៅមេរៀន ។
សូមដាក់បង្ហាញសាច់រឿង និងសេចក្តីណែនាំខាងក្រោម ។ បន្ថែមពីលើការដែលសិស្សដែលដាក់អាទិភាពលើការចំណាយរបស់អេលីសាបិត នោះអ្នកអាចប្រាប់សិស្សពីចំនួនទឹកប្រាក់ដែលអេលីសាបិតរកបាននៅក្នុងចន្លោះអាយុនីមួយៗដែលបានផ្តល់ឲ្យនៅលើសំណៅមេរៀននេះ ។ បន្ទាប់មក សិស្សអាចអនុវត្តការរៀបចំថវិកានៃការចំណាយដែលបានផ្តល់ឲ្យដោយផ្អែកលើថវិកាដែលនាងមាន ។
ជាជម្រើសមួយផ្សេងទៀត អ្នកអាចដាក់សិស្សជាក្រុមតូចៗ ហើយអញ្ជើញពួកគេឲ្យធ្វើសកម្មភាពដោយប្រើអ្វីដែលបានសរសេរនៅក្រោម ការសម្រេចចិត្តផ្នែកហិរញ្ញវត្ថុសំខាន់ៗ នៅក្នុងតារាងនេះនៅលើក្ដារខៀន ។
អេលីសាបិត ជាស្ត្រីនៅក្នុងសាខារបស់អ្នក បានចាប់ផ្តើមធ្វើការ ការងារកម្រិតទាបមួយនៅឯភោជនីយដ្ឋាននៅពេលនាងឈានចូលអាយុ១៦ឆ្នាំ ។ ប៉ុន្មានឆ្នាំមកនេះ នាងបានធ្វើការរបស់នាង ហើយក្លាយជាអ្នកគ្រប់គ្រងភោជនីយដ្ឋាននោះ ។ នៅពេលដែលនាងជិតដល់ពេលចូលនិវត្តន៍ នាងបានទិញ និងបើកភោជនីយដ្ឋានផ្ទាល់ខ្លួនរបស់នាងបាន ។
-
ដាក់លេខរៀង « ការចំណាយដែលអាចមាន » តាមលំដាប់លំដោយដែលអ្នកនឹងណែនាំដល់ អេលីសាបិត ឲ្យដាក់អាទិភាពលើ ។
-
នៅជាប់នឹងការចំណាយពីរផ្សេងគ្នា សូមសរសេរសេចក្ដីយោងបទគម្ពីរមួយដែលអ្នកបានសិក្សា ដែលបានជួយណែនាំអំពីរបៀបដែលអ្នកដាក់អាទិភាពនៃការចំណាយ ។
-
រៀបចំដើម្បីពន្យល់ពីរបៀបដែលសេចក្តីពិតដែលអ្នកបានរៀននៅក្នុងព្រះគម្ពីរបានជួយអ្នកធ្វើការសម្រេចចិត្តអំពីរបៀបដែលអ្នកដាក់អាទិភាពលើការចំណាយនានា ។
ប្រសិនបើមានប្រយោជន៍ អ្នកអាចឲ្យឧទាហរណ៍ពីរបីដល់សិស្ស ។ ឧទាហរណ៍ អ្នកអាចពន្យល់ថា ការដាក់អាទិភាពលើការសន្សំគឺជារបៀបមួយដើម្បីរៀបចំខ្លួនសម្រាប់គ្រាលំបាក ដូចដែលព្រះអម្ចាស់បានឲ្យដំបូន្មាន ( សូមមើល លោកុប្បត្តិ ៤១:៤៦–៤៩, ៥៣–៥៧ ) ឬថាការចងចាំអ្វីគ្រប់យ៉ាងដែលយើងមានមកពីព្រះអម្ចាស់ ( សូមមើល ទំនុកដំកើង ២៤:១ ) អាចជួយយើងដាក់អាទិភាពលើការថ្វាយដង្វាយមួយភាគក្នុងដប់ ។
សូមទុកពេលឲ្យសិស្សចែកចាយជាមួយអ្នកដទៃអំពីរបៀបដែលពួកគេដាក់អាទិភាពលើការចំណាយតាមគោលការណ៍របស់ព្រះអម្ចាស់ ។
សូមអញ្ជើញសិស្សឲ្យចែកចាយពីរបៀបដែលព្រះអម្ចាស់បានជួយពួកគេ ឬអ្នកដទៃទៀតដែលពួកគេស្គាល់ នៅពេលពួកគេបានធ្វើការសម្រេចចិត្តផ្នែកហិរញ្ញវត្ថុតាមរបៀបរបស់ទ្រង់ ។ ប្រសិនបើវាមានប្រយោជន៍ អ្នកអាចមើល « បង្អួចនៃស្ថានសួគ៌ » មាននៅលើគេហទំព័រ ChurchofJesusChrist.org ចាប់ពីនាទីទី ០:៣៩ ដល់ ២:២២ ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានចែកចាយពីរបៀបដែលគ្រួសាររបស់ភរិយារបស់លោកបានទទួលពរ នៅពេលពួកគាត់បានដាក់អាទិភាពលើការថ្វាយដង្វាយមួយភាគក្នុងដប់របស់ពួកគាត់ ។
ការឲ្យព្រះអម្ចាស់មានចំណែកនៅក្នុងការសម្រេចចិត្តផ្នែកហិរញ្ញវត្ថុរបស់ខ្ញុំ
សូមទុកពេលឲ្យសិស្សដើម្បីពិចារណាពីរបៀបដែលពួកគេអាចរួមបញ្ចូលព្រះអម្ចាស់ក្នុងការធ្វើការសម្រេចចិត្តផ្នែកហិរញ្ញវត្ថុ ។ របៀបមួយដើម្បីជួយពួកគេធ្វើការណ៍នេះគឺត្រូវដាក់បង្ហាញសេចក្តីថ្លែងការណ៍ខាងក្រោមនេះមុនពេលសិស្សឆ្លើយសំណួរដែលភ្ជាប់មកជាមួយ ។
ប៊ីស្សព អិល ថត បាជច៍ នៃគណៈប៊ីស្សពជាអធិបតី បានចែកចាយ ៖
អ្វីដែលខ្ញុំបានរកឃើញក្នុងជីវិតរបស់ខ្ញុំផ្ទាល់គឺថា ខ្ញុំអាចអធិស្ឋានអំពីកិច្ចការខាងសាច់ឈាមរបស់ខ្ញុំផងដែរ ។ ខ្ញុំអាចអធិស្ឋានអំពីហិរញ្ញវត្ថុរបស់ខ្ញុំ ។ ខ្ញុំអាចអធិស្ឋានថាតើត្រូវទិញផ្ទះនេះ ឬផ្ទះនោះ ឬថាតើត្រូវធ្វើការវិនិយោគមួយនេះ ឬធ្វើការវិនិយោគមួយនោះ ។ យើងគួរតែឲ្យព្រះអម្ចាស់មានចំណែកមិនត្រឹមតែផ្នែកខាងវិញ្ញាណនៃជីវិតរបស់យើងប៉ុណ្ណោះទេ ប៉ុន្តែក៏នៅក្នុងកិច្ចការខាងសាច់ឈាមនៃជីវិតរបស់យើងផងដែរ ។ ( « 4 Principles We Can Learn from the Way the Presiding Bishopric Works » Liahona ខែកុម្ភៈ ឆ្នាំ២០២៤ ទំព័រ ១៤ )
សូមគិតអំពីការសម្រេចចិត្តផ្នែកហិរញ្ញវត្ថុដែលអ្នកត្រូវធ្វើឥឡូវនេះ ឬនាពេលអនាគត ។ យាងអញ្ជើញព្រះវិញ្ញាណបរិសុទ្ធ ដើម្បីជួយអ្នកឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់អ្នក ៖
-
តើគោលការណ៍អ្វីខ្លះដែលអាចជួយអ្នកធ្វើការសម្រេចចិត្តផ្នែកហិរញ្ញវត្ថុទាំងនេះតាមរបៀបរបស់ព្រះអម្ចាស់ ?
-
តើការអនុវត្តគោលការណ៍ហិរញ្ញវត្ថុទាំងនេះអាចរៀបចំអ្នកឲ្យបម្រើព្រះនិងអ្នកដទៃយ៉ាងដូចម្ដេច ?
សូមពិចារណាចែកចាយឧទាហរណ៍ខ្លីមួយពីជីវិតរបស់អ្នកអំពីរបៀបដែលអ្នកបានប្រើអ្វីដែលសិស្សបានរៀនពីថ្ងៃនេះដើម្បីធ្វើការសម្រេចចិត្តផ្នែកហិរញ្ញវត្ថុ ។ អ្នកក៏អាចចែកចាយអ្វីដែលបទពិសោធន៍នោះបានបង្រៀនអ្នកអំពីព្រះវរបិតាសួគ៌ និងព្រះយេស៊ូវគ្រីស្ទផងដែរ ។