« វាយតម្លៃសកម្មភាពការរៀនសូត្ររបស់អ្នក សម្រាប់មេរៀនការរៀបចំជីវិត » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« វាយតម្លៃសកម្មភាពការរៀនសូត្ររបស់អ្នក សម្រាប់មេរៀនការរៀបចំជីវិត » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ឧបសម្ព័ន្ធ
វាយតម្លៃសកម្មភាពការរៀនសូត្ររបស់អ្នក សម្រាប់មេរៀនការរៀបចំជីវិត
បន្ទាប់ពីអ្នកបានបញ្ចប់ការបង្រៀនផ្នែកមួយនៃមេរៀននៃការរៀបចំជីវិតរួចហើយ សូមពិចារណាជួយសិស្សឲ្យគិតពិចារណាអំពីការរៀនសូត្រ និងការរីកចម្រើនរបស់ពួកគេ ។ ដើម្បីធ្វើដូច្នេះ អ្នកអាចបញ្ចូលសកម្មភាពខាងក្រោមមួយ ឬច្រើននៅក្នុងមេរៀនវាយតម្លៃការរៀនសូត្ររបស់អ្នកនាពេលខាងមុខ ។ សកម្មភាពទាំងនេះអាចកែសម្រួលដើម្បីបំពេញតម្រូវការសិស្សរបស់អ្នកបានល្អបំផុត ។
ជំនាញសិក្សាព្រះគម្ពីរ
សូមបង្ហាញពីសមត្ថភាពដើម្បីប្រើបទគម្ពីរដើម្បីទទួលជំនួយ និងការបំផុសគំនិត
សូមគិតអំពីរបៀបដ៏គួរឲ្យចាប់អារម្មណ៍មួយដើម្បីជួយសិស្សរៀបចំខ្លួនគិតពិចារណាអំពីជំនាញសិក្សាព្រះគម្ពីរ ដែលពួកគេបានប្រើនាពេលថ្មីៗនេះ ដើម្បីរៀបចំពួកគេឲ្យទទួលជំនួយពីព្រះវរបិតាសួគ៌ ។ សូមរកមើលរបៀបដើម្បីធ្វើឲ្យវាគួរឲ្យចាប់អារម្មណ៍ និងទាក់ទងសម្រាប់សិស្សរបស់អ្នក ។ អ្នកអាចធ្វើអ្វីមួយដូចជាស្វែងរកជំនាញដើម្បីស្រាវជ្រាវរកនៅលើអ៊ីនធឺណិតយ៉ាងមានប្រសិទ្ធភាព ( ដូចជាសកម្មភាពខាងក្រោម ) ឬប្រសិនបើសិស្សមានបទពិសោធន៍ប្រើប្រាស់ AI នោះពួកគេអាចនិយាយអំពីជំនាញទាំងឡាយសម្រាប់ការសួរសំណួរ ឬដាក់សេចក្តីណែនាំទៅកាន់ប្រព័ន្ធ AI ដើម្បីទទួលបានការឆ្លើយតបប្រកបដោយប្រសិទ្ធភាព ។
សូមពិចារណាអំពីសាច់រឿងខាងក្រោម ៖
ឧទាហរណ៍ថាអ្នកកំពុងរៀបចំខ្លួនធ្វើគម្រោងសាលារៀនមួយ ហើយត្រូវពឹងផ្អែកលើធនធានលើអ៊ីនធឺណិត ។
-
តើអ្នកបានរៀនជំនាញអ្វីខ្លះ ដើម្បីធ្វើឲ្យការស្រាវជ្រាវរកតាមអ៊ីនធឺណិតកាន់តែមានប្រសិទ្ធភាព ឬមិនសូវមានប្រសិទ្ធភាព ?
សូមអញ្ជើញសិស្សឲ្យធ្វើបញ្ជីមួយនៅលើក្ដារខៀនពីជំនាញសិក្សាព្រះគម្ពីរដែលពួកគេបានរៀន ។ នៅជិតជំនាញនីមួយៗ ពួកគេអាចចែកចាយពីរបៀបដែលឧបករណ៍ទាំងនេះអាចនឹងជួយពួកគេទទួលបានជំនួយ និងការបំផុសគំនិតពីព្រះអម្ចាស់ ។ ជំនាញដែលថ្នាក់របស់អ្នកអាចបានរៀន រួមមាន ៖
-
ការផ្តោតទៅលើព្រះយេស៊ូវគ្រីស្ទ
-
រកមើលទីសម្គាល់នៃព្រះយេស៊ូវគ្រីស្ទ
-
ធ្វើការប្រៀបធៀប
-
ការយាងអញ្ជើញព្រះវិញ្ញាណបរិសុទ្ធតាមរយៈការអធិស្ឋាន ដោយការដកយកការរំខានចេញ និងការពិចារណា
-
ការសម្គាល់ ឬគូសចំណាំពាក្យ និងឃ្លា
-
ការកត់ត្រា
-
យោងឆ្លងខគម្ពីរ ឬភ្ជាប់ខគម្ពីរ
-
ស្វែងរកសេចក្ដីពិតដែលថ្លែងដោយបង្កប់ន័យ ឬបង្ហាញច្បាស់
ប្រសិនបើថ្នាក់របស់អ្នកបានរៀន និងអនុវត្តជំនាញបន្ថែម នោះអ្នកអាចបន្ថែមវាទៅក្នុងបញ្ជីដែលសិស្សបង្កើត ។
ដើម្បីជួយសិស្សបង្ហាញជំនាញសិក្សាព្រះគម្ពីរដែលពួកគេបានរៀន សូមជ្រើសរើសវគ្គបទគម្ពីរមួយសម្រាប់សិស្សដើម្បីអនុវត្ត ។ ការណ៍នេះអាចជាវគ្គចំណេះចំណានខាងគោលលទ្ធិ ឬវគ្គបទគម្ពីរប្រកបដោយអត្ថន័យមួយដែលសិស្សមិនអាចសិក្សាក្នុងថ្នាក់សិក្ខាសាលា ។
សូមបង្ហាញពីសមត្ថភាពរបស់អ្នកដើម្បីប្រើជំនាញសិក្សាព្រះគម្ពីរដើម្បីទទួលបានជំនួយ និងការបំផុសគំនិតពីព្រះអម្ចាស់ដោយធ្វើដូចខាងក្រោម ៖
-
អានវគ្គបទគម្ពីរនេះពីរបីដង ។
-
កំណត់ថាតើជំនាញសិក្សាព្រះគម្ពីរមួយណាដែលអ្នកនឹងប្រើដើម្បីស្វែងរកការយល់ដឹង ឬការបំផុសគំនិត ហើយរាយបញ្ជីជំនាញទាំងនេះនៅក្នុងសៀវភៅកំណត់ហេតុការសិក្សារបស់អ្នក ។
-
អនុវត្តជំនាញទាំងនេះនីមួយៗជាមួយនឹងវគ្គដែលអ្នកបានជ្រើសរើស ។
-
កត់ត្រានៅក្នុងសៀវភៅកំណត់ហេតុការសិក្សារបស់អ្នកនូវអ្វីដែលអ្នកបានរៀនដោយប្រើជំនាញទាំងនេះ ។
នៅពេលសិស្សបានធ្វើហើយរួចរាល់ អ្នកប្រហែលជាចង់ឲ្យពួកគេចែកចាយជាមួយថ្នាក់ ឬជាក្រុមតូចៗថាតើជំនាញមួយណាដែលពួកគេប្រើ និងអ្វីដែលពួកគេបានរៀនពីបទពិសោធន៍នេះ ។ នៅពេលសិស្សចែកចាយ អ្នកប្រហែលជាចង់សួរសំណួរតាមដានអំពីរបៀបដែលការបញ្ចូលជំនាញទាំងនេះនៅក្នុងការសិក្សាព្រះគម្ពីរផ្ទាល់ខ្លួនរបស់ពួកគេ អាចជួយពួកគេឲ្យខិតទៅជិតព្រះវរបិតាសួគ៌ និងព្រះយេស៊ូវគ្រីស្ទ ។
ដើម្បីកម្លាំងនៃយុវជន ៖ ការធ្វើការជ្រើសរើស
ការទទួលកម្លាំងពីព្រះអម្ចាស់ដើម្បីធ្វើការជ្រើសរើសដែលបំផុសគំនិត
សូមពិចារណាសរសេរពាក្យ ការជ្រើសរើស នៅលើក្ដារខៀន ។ បង្ហាញសិស្សនូវរបស់ខាងក្រោម ហើយសុំឲ្យពួកគេចែកចាយជម្រើសសំខាន់ៗ ឬជម្រើសដែលទាក់ទងនឹងរបស់នោះ ។ ( របស់នីមួយៗតំណាងឲ្យមេរៀនមួយនៅក្នុងផ្នែក ដើម្បីកម្លាំងនៃយុវជន ) ។
ទូរសព្ទដៃ
ពរជ័យអយ្យកោ
សៀវភៅណែនាំ ដើម្បីកម្លាំងនៃយុវជន
ក្រដាសមួយដែលមានចំណងជើងថា « គោលដៅ » ដោយមានសរសេរគោលដៅមួយចំនួននៅលើក្រដាសនោះ ។
នៅក្នុងសៀវភៅកំណត់ហេតុការសិក្សារបស់អ្នក សូមចំណាយពេលមួយនាទីដើម្បីរាយបញ្ជីជម្រើសសំខាន់ៗដែលអ្នកបានធ្វើ ឬពិបាកធ្វើក្នុងរយៈពេលប៉ុន្មានសប្តាហ៍ចុងក្រោយនេះ ។ ពួកគេអាចរួមបញ្ចូលជម្រើសដែលទាក់ទងនឹងរបស់ដែលបានបង្ហាញ ដូចជា បច្ចេកវិទ្យា ពរជ័យអយ្យកោ ប្រធានបទនៅក្នុង ដើម្បីកម្លាំងនៃយុវជន ឬការដាក់គោលដៅ ។ សូមកត់ត្រាចម្លើយរបស់អ្នកចំពោះសំណួរខាងក្រោម ៖
-
តើអ្នកបានស្វែងរកកម្លាំង ជំនួយ ឬការណែនាំរបស់ព្រះអម្ចាស់ដើម្បីធ្វើការជ្រើសរើសនាពេលថ្មីៗនេះដោយរបៀបណា ?
-
តើអ្នកមានអារម្មណ៍យ៉ាងណាចំពោះកម្លាំង ជំនួយ ឬការណែនាំរបស់ទ្រង់ដើម្បីធ្វើការជ្រើសរើសដែលបំផុសគំនិត ?
-
តើបញ្ហាប្រឈមមួយណាដែលអ្នកបានប្រឈមមុខ ឬអ្នកអាចប្រឈមមុខពេលធ្វើការជ្រើសរើសដែលបំផុសគំនិតទាំងនេះ ?
បន្ទាប់ពីសិស្សមានពេលគ្រប់គ្រាន់ដើម្បីគិតពិចារណាហើយ សូមពិចារណាអញ្ជើញសិស្សដែលស្ម័គ្រចិត្តឲ្យចែកចាយ ។ នៅពេលសិស្សចែកចាយពីរបៀបដែលពួកគេបានទទួលអារម្មណ៍ពីកម្លាំងរបស់ព្រះអម្ចាស់ សូមបញ្ជាក់ពីព្រះឆន្ទៈរបស់ព្រះអម្ចាស់ក្នុងការជួយយើង ។ នៅពេលសិស្សចែកចាយបញ្ហាដែលពួកគេកំពុងប្រឈមមុខ សូមអញ្ជើញសិស្សក្នុងថ្នាក់ឲ្យចំណាយពេលមួយភ្លែតដើម្បីជញ្ជឹងគិតពីរបៀបដែលពួកគេអាចជួយ ។ ពួកគេអាចរកមើលបទគម្ពីរ ឬសេចក្តីថ្លែងការណ៍នៅក្នុងសៀវភៅណែនាំ ដើម្បីកម្លាំងនៃយុវជន ឬជញ្ជឹងគិតបទពិសោធន៍របស់ពួកគេផ្ទាល់ ។ សូមអញ្ជើញពួកគេឲ្យចែកចាយ ។
សូមអញ្ជើញសិស្សឲ្យបញ្ចប់លំហាត់នេះដោយសរសេរអ្វីដែលពួកគេមានអារម្មណ៍ថាព្រះអម្ចាស់ចង់ឲ្យពួកគេធ្វើ ជាជំហានបន្ទាប់របស់ពួកគេ ។
ការស្ថាបនាភាពខ្លួនទីពឹងខ្លួន
ស្ថាបនាភាពខ្លួនទីពឹងខ្លួនតាមរបៀបរបស់ព្រះអម្ចាស់
សូមពិចារណាដាក់បង្ហាញរូបភាពមួយដែលពិពណ៌នាអំពីយ៉ូសែបនៃស្រុកអេស៊ីព្ទ ហើយអញ្ជើញសិស្សឲ្យរំឭកពីអ្វីដែលពួកគេបានរៀនអំពីភាពខ្លួនទីពឹងខ្លួនចេញពីការសិក្សាដំណើររឿងរបស់លោក ( សូមមើល លោកុប្បត្តិ ៣៧–៤៧ ) ។ វាអាចមានប្រយោជន៍សម្រាប់ពួកគេក្នុងការមើលកំណត់ចំណាំនៅក្នុងទិនានុប្បវត្តិ ឬព្រះគម្ពីររបស់ពួកគេ នៅពេលពួកគេគិតពិចារណាពីអ្វីដែលពួកគេបានរៀន ។
អ្នកអាចពិចារណាផ្តល់សេចក្តីយោងបទគម្ពីរមួយចំនួន ឬទាំងអស់ដូចខាងក្រោមសម្រាប់សិស្សដើម្បីយោងទៅ ៖
-
លោកុប្បត្តិ ៤១:៣៧–៤៣, ៤៩, ៥៤–៥៥ ( យ៉ូសែបនៃស្រុកអេស៊ីព្ទបានស្តុកស្រូវទុកសម្រាប់គ្រោះអំណត់នាពេលអនាគត ដោយសារលោកបានទទួលវិវរណៈពីព្រះអម្ចាស់ ) ។
-
លោកុប្បត្តិ ៤៥:៤–១១; ៤៧:១១–១២ ( យ៉ូសែបនៃស្រុកអេស៊ីព្ទផ្ដល់ពរដល់គ្រួសាររបស់លោក ដោយសារតែកិច្ចខិតខំដើម្បីស្ថាបនាភាពខ្លួនទីពឹងខ្លួន ) ។
-
ម៉ាឡាគី ៣:៨–១១ ( ការគោរពតាមក្រឹត្យវិន័យនៃដង្វាយមួយភាគក្នុងដប់របស់ព្រះអម្ចាស់ )
-
ម៉ូសេ ៤:២៣–២៥; ៥:១ ( លោកអ័ដាម និងនាងអេវ៉ា ធ្វើការដើម្បីទទួលបានអាហាររបស់ពួកលោក ជំនួសឲ្យព្រះប្រទានឲ្យពួកលោក )
សូមពិចារណាពីសំណួរខាងក្រោមនេះ ហើយកត់ត្រាគំនិតរបស់អ្នកទុកនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកកាន់តែស្ថាបនាភាពខ្លួនទីពឹងខ្លួនរបស់អ្នកតាមរបៀបណា ?
-
តើបញ្ហាអ្វីខ្លះក្នុងការស្ថាបនាភាពខ្លួនទីពឹងខ្លួនដែលអ្នកកំពុងប្រឈមមុខ ?
-
តើអ្នកនឹងអញ្ជើញព្រះឲ្យជួយអ្នកបន្តស្ថាបនាភាពខ្លួនទីពឹងខ្លួនដោយរបៀបណា ?
សូមពិចារណាអញ្ជើញសិស្សពីរបីនាក់ឲ្យចែកចាយគំនិតរបស់ពួកគេ ។
សុខភាពខាងរាងកាយ និងខាងសតិអារម្មណ៍
សូមអនុវត្តគោលការណ៍ និងជំនាញទាំងឡាយដើម្បីឲ្យកាន់តែមានសុខភាពល្អទាំងខាងសតិអារម្មណ៍ និងខាងរាងកាយ ។
សូមពិចារណាដាក់បង្ហាញរូបភាពដើមឈើដែលត្រូវខ្យល់បក់បោក ឬអ្នកអាចគូរដើមឈើនៅលើក្ដារខៀន ។ ប្រសិនបើសិស្សគូររូបដើមឈើនៅក្នុងសៀវភៅកំណត់ហេតុការសិក្សារបស់ពួកគេ នៅពេលពួកគេសិក្សា មេរៀនទី ១៨១ ៖ « ការស្ថាបនាភាពរឹងមាំខាងសតិអារម្មណ៍នៅក្នុងព្រះអម្ចាស់ » សូមអញ្ជើញពួកគេមើលការប្រឈមខាងសតិអារម្មណ៍ដែលពួកគេបានដាក់ស្លាកនៅលើដើមឈើរបស់ពួកគេ ។
ជាជម្រើសមួយផ្សេងទៀត សិស្សអាចសរសេរនៅជុំវិញរូបគំនូរដើមឈើថ្មីពីការប្រឈមខាងសតិអារម្មណ៍ដែលពួកគេបានដកពិសោធណ៍ ឬអាចប្រឈមមុខនៅពេលខាងមុខ ។
-
តើឧបសគ្គខាងសតិអារម្មណ៍ដែលយើងប្រឈមនៅក្នុងជីវិតមានអារម្មណ៍ដូចជាខ្យល់កួចដោយរបៀបណា ?
-
តើអ្នកបានរៀនអ្វីខ្លះថ្មីៗនេះនៅក្នុងថ្នាក់សិក្ខាសាលាអំពីរបៀបដោះស្រាយបញ្ហាប្រឈមខាងសតិអារម្មណ៍ ?
នៅពេលសិស្សចែកចាយ សូមរកមើលឱកាសដើម្បីថ្លែងទីបន្ទាល់ថា យើងអាចទប់ទល់នឹងខ្យល់កួចខាងសតិអារម្មណ៍បានដោយពឹងផ្អែកលើកម្លាំង និងព្រះចេស្ដាដែលព្រះវរបិតាសួគ៌ និងព្រះយេស៊ូវគ្រីស្ទដែលបានសន្យា ( សូមមើល ហេលេមិន ៥:១២ ) ។
-
តើគោលការណ៍ ឬជំនាញមួយចំនួនអ្វីខ្លះដែលអ្នកបានព្យាយាមអនុវត្ត ដើម្បីទទួលបានកម្លាំងខាងសតិអារម្មណ៍មកពីព្រះវរបិតាសួគ៌ និងព្រះយេស៊ូវគ្រីស្ទ ?
-
តើការណ៍អ្វីខ្លះដែលមានប្រយោជន៍ ? តើអ្នកបានរៀនអ្វីខ្លះ ឬនៅតែចង់សាកល្បង ?
ប្រសិនបើសិស្សចែកចាយការលំបាក ឬការប្រឈមនានា សូមស្វែងរកការបំផុសគំនិត ដើម្បីដឹងពីរបៀបដើម្បីជួយ ។ សមាជិកក្នុងថ្នាក់អាចជួយគ្នាទៅវិញទៅមកដោយការបង្ហាញការអាណិតអាសូរ និងការយោគយល់ ។
ការរៀបចំសម្រាប់ការអប់រំ និងការងារនាពេលអនាគត
ស្វែងយល់ពីសារៈសំខាន់នៃការអប់រំខាងសាច់ឈាម និងខាងវិញ្ញាណពេញមួយជីវិត
សកម្មភាពខាងក្រោមផ្តល់ឲ្យសិស្សនូវឱកាសដើម្បីពន្យល់ពីសារៈសំខាន់នៃការអប់រំខាងវិញ្ញាណ និងខាងសាច់ឈាមពេញមួយជីវិត ។
សូមអញ្ជើញសិស្សឲ្យនឹកស្រមៃពីសាច់រឿងដូចខាងក្រោម ។ អ្នកអាចកែសម្រួលសាច់រឿងនេះឲ្យស្របនឹងតម្រូវការសិស្សរបស់អ្នក ។
អ្នកត្រូវបានសុំឲ្យឡើងនិយាយនៅក្នុងព្រឹត្តិការណ៍របស់យុវជនមួយនៅដើមឆ្នាំសិក្សា ។ ព្រឹត្តិការណ៍នេះមានគោលបំណងពង្រឹងសេចក្តីជំនឿលើព្រះវរបិតាសួគ៌ និងព្រះយេស៊ូវគ្រីស្ទ ។ ប្រធានបទដែលបានផ្ដល់ឲ្យអ្នកគឺ « សារៈសំខាន់នៃការអប់រំខាងវិញ្ញាណ និងខាងសាច់ឈាមក្នុងការធ្វើតាមព្រះវរបិតាសួគ៌ និងព្រះយេស៊ូវគ្រីស្ទ » ។
សូមសរសេរគម្រោងសម្រាប់ឡើងនិយាយពីពីរទៅបីនាទី ។ សូមពិចារណាដូចខាងក្រោមជាផ្នែកនៃគម្រោងនិយាយរបស់អ្នក ៖
-
សារៈសំខាន់នៃការអប់រំខាងវិញ្ញាណ និងខាងសាច់ឈាមនៅក្នុងផែនការរបស់ព្រះវរបិតាសួគ៌
-
បទគម្ពីរមួយ ឬច្រើន ឬសេចក្តីថ្លែងការណ៍របស់ព្យាការីដែលគាំទ្រដល់សាររបស់អ្នក ។ ( ឧទាហរណ៍ គោលលទ្ធិ និងសេចក្តីសញ្ញា ៨៨:៧៧–៨០ )
-
បទពិសោធន៍ដែលអ្នក ឬអ្នកដទៃទៀតមាន ដែលជួយអ្នកយល់ពីសារៈសំខាន់នៃការរៀនសូត្រពេញមួយជីវិត
បន្ទាប់ពីមានពេលវេលាគ្រប់គ្រាន់ហើយ អ្នកអាចអញ្ជើញសិស្សឲ្យចែកចាយគម្រោងរបស់ពួកគេជាក្រុមតូចៗ ឬអញ្ជើញសិស្សដែលស្ម័គ្រចិត្តមួយចំនួនឲ្យចែកចាយជាមួយសិស្សក្នុងថ្នាក់ ។
បង្កើតផែនការសម្រាប់ការអប់រំ និងការងារនាពេលអនាគត
ប្រសិនបើសិស្សមានឱកាសដាក់ផែនការដើម្បីទទួលការអប់រំខាងវិញ្ញាណ និងខាងសាច់ឈាមនាពេលអនាគត សូមអញ្ជើញពួកគេឲ្យពិនិត្យមើលផែនការដែលពួកគេបានដាក់ ។ ប្រសិនបើសិស្សមិនទាន់បានដាក់ផែនការទេ សូមអញ្ជើញពួកគេឲ្យចំណាយពេលនេះ ដើម្បីបង្កើតផែនការមួយអំពីរបៀបដែលពួកគេចង់បន្តទទួលបានការអប់រំខាងវិញ្ញាណ និងខាងសាច់ឈាមតាមរបៀបដែលនឹងអនុញ្ញាតឲ្យព្រះអម្ចាស់មានចំណែកនៅក្នុងផែនការរបស់ពួកគេ ។
សំណួរដែលអាចជួយក្នុងការពិភាក្សារួមមានដូចខាងក្រោម ៖
-
តើអ្នកនឹង ឬបានអនុញ្ញាតឲ្យព្រះវរបិតាសួគ៌ និងព្រះយេស៊ូវគ្រីស្ទចូលរួមនៅក្នុងផែនការរបស់អ្នកដោយរបៀបណា ?
-
តើអ្នកនៅមានសំណួរអ្វីខ្លះទៀតអំពីជម្រើសនៃការអប់រំខាងវិញ្ញាណ ឬខាងសាច់ឈាមនាពេលអនាគត ?
-
តើជំហានបន្ទាប់មួយណាដែលអ្នកអាចនឹងធ្វើដែលជាផ្នែកនៃផែនការរបស់អ្នក ?
ភាពជោគជ័យនៅក្នុងសាលា
អនុវត្តជំនាញទាំងឡាយដើម្បីបានជោគជ័យនៅក្នុងសាលា
សូមពិចារណាសរសេរចំណងជើងមេរៀនដូចខាងក្រោមនៅលើក្ដារខៀន ៖
ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់អ្នក
ទទួលខុសត្រូវចំពោះការរៀនសូត្ររបស់អ្នក
ការរៀបចំភារកិច្ច និងការដាក់អាទិភាព
យកឈ្នះលើការពន្យារពេល
សូមអញ្ជើញសិស្សឲ្យអានចំណងជើងនោះ ហើយគិតពិចារណាពីរបៀបដែលពួកគេបានអនុវត្តជំនាញទាំងនេះនៅក្នុងកិច្ចការសាលារបស់ពួកគេ ។ ដើម្បីធ្វើដូច្នេះ អ្នកអាចអញ្ជើញពួកគេឲ្យធ្វើដូចខាងក្រោម ។
គូររូបមនុស្សចង្កឹះពីរ និងរូបពពុះតំណាងឲ្យការនិយាយ ។ ស្រមៃថាមនុស្សពីរនាក់កំពុងពិភាក្សាអំពីអ្វីដែលអ្នកចង់កែលម្អដើម្បីទទួលបានជោគជ័យក្នុងសាលា ។
នៅក្នុងរូបពពុះទីមួយ សូមបំពេញប្រយោគ ៖ « នៅពេលនិយាយពីសាលារៀន ខ្ញុំស្មុគស្មាញនឹង »
នៅក្នុងរូបពពុះទីពីរ សូមបំពេញអ្វីដែលអ្នកបានព្យាយាមធ្វើ ដើម្បីអនុវត្តតាមគោលការណ៍ និងជំនាញទាំងឡាយដែលអ្នកបានរៀននាពេលថ្មីៗនេះនៅក្នុងថ្នាក់សិក្ខាសាលា ដើម្បីជួយអ្នកឲ្យទទួលបានជោគជ័យនៅក្នុងសាលា ៖
« ទាំងនេះគឺជាអ្វីមួយដែលខ្ញុំបានព្យាយាម … »
« ខ្ញុំកំពុងព្យាយាមបន្ត ឬកែសម្រួល … »
អ្នកអាចអញ្ជើញសិស្សដែលស្ម័គ្រចិត្តពីរបីនាក់ឲ្យចែកចាយចម្លើយរបស់ពួកគេជាមួយសិស្សនៅក្នុងថ្នាក់ ។ សូមលើកទឹកចិត្តសិស្សឲ្យស្ដាប់មិត្តរួមថ្នាក់របស់ពួកគេដោយយកចិត្តទុកដាក់ ។ សូមសួរថាតើពួកគេមានបទពិសោធន៍ ឬគោលការណ៍បន្ថែមពីមេរៀនដែលអាចជួយបានដែរឬទេ ។ នៅពេលសិស្សស្តាប់គ្នាទៅវិញទៅមក នោះពួកគេអាចនឹងទទួលបានការបំផុសដោយព្រះវិញ្ញាណបរិសុទ្ធឲ្យសាកល្បងជំនាញមួយចំនួនដែលអ្នកដទៃបានរកឃើញថាមានប្រយោជន៍ ។
ការរៀបចំខ្លួនធ្វើជាអ្នកផ្សព្វផ្សាយសាសនា
មានបំណងប្រាថ្នាកើនឡើងក្នុងការចែកចាយដំណឹងល្អនៃព្រះយេស៊ូវគ្រីស្ទជាមួយនឹងអ្នកដទៃ
ដើម្បីរៀបចំសិស្សឲ្យគិតពិចារណាពីអារម្មណ៍របស់ពួកគេអំពីការចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃ សូមពិចារណាអំពីការពិនិត្យមើលនូវកិច្ចការមួយចំនួនដោយសង្ខេបអំពីអ្វីដែលពួកគេបានរៀន ឬបានអនុវត្តចេញពីមេរៀនរៀបចំខ្លួនធ្វើជាអ្នកផ្សព្វផ្សាយសាសនា ។ ឧទាហរណ៍ ប្រសិនបើសិស្សបានសិក្សា មេរៀនទី ១៩៨ ៖ « ការជ្រើសរើសដើម្បីបម្រើបេសកកម្ម » អ្នកអាចលើកកញ្ចក់ឡើង និងសួរសំណួរដូចតទៅ ។
-
តើបទពិសោធន៍អ្វីខ្លះដែលអ្នកមានទាក់ទងនឹងការចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃដោយប្រើ « ការសន្ទនាឆ្លុះបញ្ចាំងពីអារម្មណ៍ ? » តើមានរបៀបអ្វីខ្លះទៀត ដែលអ្នកបានព្យាយាមចែកចាយដំណឹងល្អនាពេលថ្មីៗនេះ ?
នៅពេលសិស្សចែកចាយបទពិសោធន៍របស់ពួកគេ អ្នកក៏អាចសួរអំពីសេចក្ដីពិតមួយណាដែលពួកគេបានចែកចាយអំពីព្រះអង្គសង្គ្រោះ ឬការអញ្ជើញណាដែលពួកគេធ្វើផងដែរ ។ អ្នកអាចរំឭកសិស្សថានៅក្នុង មេរៀនទី ១៩៧ ៖ « ការចែកចាយដំណឹងល្អតាមរបៀបសាមញ្ញ » ពួកគេរកមើលសេចក្តីពិតអំពីព្រះយេស៊ូវគ្រីស្ទ ដែលពួកគេរំភើបដើម្បីចែកចាយជាមួយអ្នកដែលពួកគេស្រឡាញ់ ( សូមមើល អេសាយ ១:១៨; ២៥:៤, ៨–៩; ៤០:២៨–៣១; ៤៣:២៥; ៥៤:១០ ) ។
សូមគិតពិចារណាអំពីអ្វីដែលអ្នកប្រហែលជាបានរៀន ឬបានអនុវត្តពីមេរៀនការរៀបចំខ្លួនធ្វើជាអ្នកផ្សព្វផ្សាយសាសនា ។ បន្ទាប់មក សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកមានអារម្មណ៍ថាបំណងប្រាថ្នារបស់អ្នកក្នុងការចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃបានកើនឡើង ថយចុះ ឬនៅដដែល ?
-
តើអ្នកគិតថាអ្វីបានរួមចំណែកដល់របៀបដែលអ្នកគិតអំពីការចែកចាយដំណឹងល្អ ?
សូមពិចារណាអញ្ជើញសិស្សដែលស្ម័គ្រចិត្តពីរបីនាក់ឲ្យចែកចាយអ្វីដែលពួកគេបានសរសេរ ។ សូមលើកទឹកចិត្តសិស្សឲ្យបន្តស្វែងរកបំណងប្រាថ្នា និងឱកាសដើម្បីចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃ ។
ការរៀបចំខ្លួនទៅព្រះវិហារបរិសុទ្ធ
មានអារម្មណ៍ចង់ធ្វើសេចក្ដីសញ្ញាជាមួយព្រះក្នុងព្រះវិហារបរិសុទ្ធកាន់តែខ្លាំងឡើង
សូមពិចារណាប្រើសកម្មភាពមួយ ឬច្រើនខាងក្រោមនេះ ដើម្បីជួយសិស្សវាយតម្លៃពីបំណងប្រាថ្នារបស់ពួកគេក្នុងការធ្វើសេចក្ដីសញ្ញាជាមួយនឹងព្រះនៅក្នុងព្រះវិហារបរិសុទ្ធ ។
សូមអញ្ជើញសិស្សឲ្យគិតពិចារណាអំពីគោលការណ៍ដែលពួកគេបានរៀនអំពីមេរៀនការរៀបចំខ្លួនសម្រាប់ព្រះវិហារបរិសុទ្ធ ។ ពួកគេអាចពិនិត្យមើលព្រះគម្ពីរ និងសៀវភៅកំណត់ហេតុការសិក្សារបស់ពួកគេ ដើម្បីចងចាំពីអ្វីដែលពួកគេបានរៀនអំពីក្រឹត្យវិន័យនៃការថ្វាយ និងការគោរពប្រតិបត្តិ របៀបដែលព្រះវិហារបរិសុទ្ធបង្រៀនអំពីព្រះយេស៊ូវគ្រីស្ទ និងរបៀបដើម្បីរៀបចំខ្លួនចូលព្រះវិហារបរិសុទ្ធដោយភាពស័ក្តិសមដោយសិក្សាសំណួរ ដើម្បីទទួលប័ណ្ណចូលព្រះវិហារបរិសុទ្ធ ។ ប្រសិនបើចាំបាច់ អ្នកអាចផ្ដល់តម្រុយដូចខាងក្រោម ៖
ពិនិត្យមើលសេចក្ដីយោងបទគម្ពីរដូចខាងក្រោម និងសេចក្ដីថ្លែងការណ៍ដោយប្រធាន រ័សុល អិម ណិលសុន អំពីពរជ័យដែលមានសម្រាប់អ្នកដែលថ្វាយបង្គំនៅក្នុងព្រះវិហារបរិសុទ្ធ ៖
និក្ខមនំ ២៥:៨; ពង្សាវតាក្សត្រ ទី១ ៦:១២–១៣; ហាកាយ ២:៦–៩
[ចំ]ពោះអ្នកដែលបម្រើ និងថ្វាយបង្គំនៅក្នុងដំណាក់របស់ព្រះអម្ចាស់អាច … រំពឹង ថានឹងទទួលបានចម្លើយចំពោះការអធិស្ឋាន វិវរណៈផ្ទាល់ខ្លួន មានសេចក្ដីជំនឿកាន់តែខ្លាំង មានភាពរឹងមាំ មានការលួងលោមចិត្ត បង្កើនចំណេះដឹង និងបង្កើនអំណាច ។ ( « រីករាយនៅក្នុងអំណោយទាននៃកូនសោបព្វជិតភាព » លីអាហូណា ខែឧសភា ឆ្នាំ២០២៤ ទំព័រ១២១, ១២២ )
បន្ទាប់ពីសិស្សមានឱកាសពិនិត្យមើលបទគម្ពីរ និងកំណត់ចំណាំរបស់ពួកគេហើយ សូមដាក់បង្ហាញចំណុចខាងក្រោមនេះដើម្បីជួយសិស្សគិតពិចារណាអំពីរបៀបដែលបំណងប្រាថ្នារបស់ពួកគេដើម្បីធ្វើសេចក្ដីសញ្ញាជាមួយនឹងព្រះនៅក្នុងដំណាក់របស់ទ្រង់បានជះឥទ្ធិពលដោយមេរៀនទាំងនេះ ។
សូមជ្រើសរើសមួយដូចខាងក្រោម ៖
-
សូមចែកចាយរូបភាពព្រះវិហារបរិសុទ្ធ និងចែកចាយរបៀបដែលព្រះវិហារបរិសុទ្ធរំឭកអ្នកពីព្រះយេស៊ូវគ្រីស្ទ ។ ប្រសិនបើចាំបាច់ អ្នកអាចរករូបភាពមួយនៅក្នុងវិចិត្រសាលប្រព័ន្ធផ្សព្វផ្សាយនៅលើគេហទំព័រ temples.ChurchofJesusChrist.org ។ សូមចែកចាយគំនិត និងអារម្មណ៍របស់អ្នកអំពីការធ្វើ និងការរក្សាសេចក្ដីសញ្ញាជាមួយនឹងព្រះវរបិតាសួគ៌នៅក្នុងព្រះវិហារបរិសុទ្ធរបស់ទ្រង់ ។
-
នៅក្នុងមេរៀនមួយនៃការរៀបចំខ្លួនទៅព្រះវិហារបរិសុទ្ធដែលអ្នកបានរៀនអំពីសារៈសំខាន់នៃការរៀបចំខ្លួនដោយមានភាពស័ក្ដិសមដើម្បីចូលទៅក្នុងព្រះវិហារបរិសុទ្ធ ។ តើមានអ្វីខ្លះដែលអ្នកបានរៀន ឬមានអារម្មណ៍នាពេលថ្មីៗនេះ ដែលមានឥទ្ធិពលលើបំណងប្រាថ្នារបស់អ្នកក្នុងការធ្វើ និងរក្សាសេចក្ដីសញ្ញាជាមួយនឹងព្រះវរបិតាសួគ៌នៅក្នុងព្រះវិហារបរិសុទ្ធ ? បើដូច្នេះ សូមសរសេរកំណត់ចំណាំសម្រាប់ខ្លួនអ្នកនៅក្នុងសៀវភៅកំណត់ហេតុការសិក្សា ។
ការបង្រៀនរបស់ថ្នាក់ដឹកនាំសាសនាចក្រ
យល់ ហើយអនុវត្តការបង្រៀនរបស់ថ្នាក់ដឹកនាំសាសនាចក្រទៅក្នុងជីវិតរបស់ពួកគេ
នៅពេញមួយវគ្គសិក្សានេះ សិស្សមានឱកាសដើម្បីសិក្សា និងអនុវត្តការបង្រៀនទាំងឡាយមកពីថ្នាក់ដឹកនាំសាសនាចក្រ ។ សម្រាប់សកម្មភាពនេះ អ្នកអាចរំឭកសិស្សអំពីសុន្ទរកថាជាក់លាក់ដែលអ្នកបានសិក្សាជាថ្នាក់ ។ សូមពិចារណាសរសេរចំណងជើងរបស់សុន្ទរកថានោះនៅលើក្ដារខៀន ។ សូមអញ្ជើញសិស្សឲ្យជ្រើសរើសសុន្ទរកថាមួយក្នុងចំណោមសុន្ទរកថានោះ ហើយពិនិត្យមើលសារលិខិត និងកំណត់ចំណាំណាមួយដែលពួកគេអាចនឹងបានដកស្រង់មក ។ រៀបចំសិស្សជាដៃគូ ប្រសិនបើអាចធ្វើទៅបានចាប់ដៃគូជាមួយអ្នកដែលបានជ្រើសរើសសុន្ទរកថាផ្សេង ។ សូមឲ្យដៃគូនីមួយៗចែកចាយចម្លើយរបស់ពួកគេចំពោះសំណួរពីរខាងក្រោម ។
-
តើអ្នកនឹងសង្ខេបសារលិខិតនៃសុន្ទរកថាដែលអ្នកបានជ្រើសរើសដោយរបៀបណា ?
-
ហេតុអ្វីបានជាសារលិខិតនោះអាចសំខាន់សម្រាប់ក្មេងជំទង់នៅសព្វថ្ងៃ ?
បន្ទាប់ពីដៃគូនីមួយៗបានចែកចាយហើយ សូមអញ្ជើញសិស្សឲ្យគិតអំពីរបៀបដែលពួកគេបានព្យាយាមអនុវត្តតាមការបង្រៀនរបស់សុន្ទរកថាដែលពួកគេបានជ្រើសរើសនោះ ។ អ្នកអាចសួរពួកគេអំពីជោគជ័យ ឬការបរាជ័យដែលពួកគេប្រឈមមុខនៅពេលអនុវត្តតាមការបង្រៀនទាំងនេះ ។