« ការជ្រើសរើសដើម្បីបម្រើបេសកកម្ម ៖ ពរជ័យនៃការបម្រើជាអ្នកផ្សព្វផ្សាយសាសនា » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការជ្រើសរើសដើម្បីបម្រើបេសកកម្ម ៖ ពរជ័យនៃការបម្រើជាអ្នកផ្សព្វផ្សាយសាសនា » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ការរៀបចំខ្លួនធ្វើជាអ្នកផ្សព្វផ្សាយសាសនា ៖ មេរៀនទី ១៩៨
ការជ្រើសរើសដើម្បីបម្រើបេសកកម្ម
ពរជ័យនៃការបម្រើជាអ្នកផ្សព្វផ្សាយសាសនា
ការបម្រើបេសកកម្មសម្រាប់ព្រះអម្ចាស់គឺជាឱកាសដ៏អស្ចារ្យមួយ ។ ព្រះវរបិតាសួគ៌ប្រទានពរដល់ពួកអ្នកផ្សព្វផ្សាយសាសនា នៅពេលពួកគេបម្រើ និងបង្រៀនមនុស្សនៅក្នុងសហគមន៍របស់ពួកគេ និងនៅជុំវិញពិភពលោក ។ ទោះយ៉ាងណាក៏ដោយ វាអាចជាការពិបាកក្នុងការសម្រេចចិត្តបម្រើបេសកកម្ម ។ មេរៀននេះអាចជួយសិស្សឲ្យមាននូវបំណងប្រាថ្នាដើម្បីបម្រើព្រះអម្ចាស់ក្នុងនាមជាពួកអ្នកផ្សព្វផ្សាយសាសនារបស់ទ្រង់ ។
ការរៀបចំសិស្ស ៖ អញ្ជើញសិស្សឲ្យសួរនរណាម្នាក់ដែលពួកគេស្គាល់ដែលបានបម្រើបេសកកម្មថា តើពរជ័យអ្វីខ្លះដែលពួកគេបានមើលឃើញថាព្រះអម្ចាស់បានប្រទានដល់ពួកគេដោយសារការបម្រើរបស់ពួកគេ ។ ពួកគេអាចធ្វើសួរសំណួរនេះនៅពេលពួកគេជួបបុគ្គលនោះផ្ទាល់ តាមទូរសព្ទ ឬតាមសារ ឬអ៊ីមែល ។ សូមឲ្យសិស្សមករៀនដោយបានត្រៀមខ្លួនដើម្បីចែកចាយអ្វីដែលពួកគេបានរៀន ។
សកម្មភាពរៀនសូត្រដែលអាចមាន
ការបម្រើបេសកកម្មពេញម៉ោង
សូមពិចារណាចាប់ផ្តើមថ្នាក់ក្នុងរបៀបដែលជួយសិស្សគិតអំពីការបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនាពេញម៉ោងរបស់ទ្រង់ ។ អ្នកអាចច្រៀងបទ « ហៅឲ្យបម្រើ » ( ទំនុកតម្កើង ល.រ ១៥៥ ) ហើយសុំឲ្យសិស្សចែកចាយពីនរណាម្នាក់ដែលពួកគេស្គាល់ ដែលបានបម្រើ ឬកំពុងបម្រើបេសកកម្ម និងទីកន្លែងដែលពួកគេបម្រើ ។ ឬពីមុនមកថ្នាក់ អ្នកអាចសុំសិស្សពីរបីនាក់ឲ្យយករូបភាពនៃមនុស្សម្នាក់ដែលពួកគេដឹងថាកំពុងបម្រើព្រះអម្ចាស់ក្នុងបេសកកម្មមួយ ។
-
តើព្រះអម្ចាស់បានបង្រៀនអ្វីខ្លះអំពីទំនួលខុសត្រូវរបស់យុវជន និងយុវនារី ដើម្បីបម្រើជាពួកអ្នកផ្សព្វផ្សាយសាសនា ?
នៅពេលសិស្សឆ្លើយ ត្រូវប្រាកដថាពួកគេយល់នូវការណ៍ខាងក្រោមនេះ ។
ប្រធាន រ័សុល អិម ណិលសុន បានបង្រៀន ៖
ព្រះអម្ចាស់សព្វព្រះទ័យឲ្យយុវជនគ្រប់រូបមានភាពស័ក្ដិសម ជាយុវជនដែលមានសមត្ថភាពឲ្យរៀបចំខ្លួនដើម្បីបម្រើបេសកកម្ម ។ … សម្រាប់យុវនារីដែលមានលទ្ធភាព បេសកកម្មគឺជាឱកាសដ៏មានអានុភាពមួយផងដែរ តែវាជា ជម្រើសរបស់អ្នក ។ ( « ការផ្សាយដំណឹងល្អនៃភាពសុខសាន្ដ » លីអាហូណា ខែឧសភា ឆ្នាំ២០២២ ទំព័រ ៦ )
នេះរាប់បញ្ចូលទាំងបេសកកម្មផ្សព្វផ្សាយ និងបេសកកម្មផ្នែកសេវាកម្ម ។
អ្នកអាចសរសេរសំណួរខាងក្រោមនៅលើក្ដារខៀន ហើយសុំសិស្សជាច្រើននាក់ឲ្យចែកចាយគំនិតរបស់ពួកគេលើសំណួរណាមួយ ៖
-
តើមានហេតុផលអ្វីខ្លះដែលនរណាម្នាក់អាចនឹងចង់បម្រើបេសកកម្ម ?
-
តើមានហេតុផលអ្វីខ្លះ ដែលវាអាចជាការពិបាកក្នុងការជ្រើសរើសដើម្បីបម្រើបេសកកម្ម ?
ប្រសិនបើមានប្រយោជន៍ សូមពន្យល់ថាអ្នកផ្សេងទៀតជាច្រើននាក់បានប្រឈមមុខនឹងកង្វល់នានា ។ ឧទាហរណ៍ នៅគ្រាដែលប្រធាន អិម. រ័សុល បាឡឺដ ( ឆ្នាំ១៩២៨–២០២៣ ) ក្នុងកូរ៉ុមនៃពួកសាវកដប់ពីរនាក់បានសម្រេចចិត្តបម្រើបេសកកម្ម ឪពុកម្តាយរបស់លោកមិនបានសកម្មនៅក្នុងសាសនាចក្រទេ ( សូមមើល « ការបម្រើជាអ្នកផ្សព្វផ្សាយសាសនាបានផ្ដល់ពរដល់ជីវិតខ្ញុំជារៀងរហូត » លីអាហូណា ខែឧសភា ឆ្នាំ២០២២ ទំព័រ ៨ ) ។ ប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានចែកចាយថា លោក « មិនមានប្រពៃណីផ្សព្វផ្សាយសាសនាទេនៅក្នុងគ្រួសារ [ របស់លោក ] ទេ » ( សូមមើល « My Mission Influence » [ ៣:៣១ ] ចាប់ពីនាទីទី ២:០១ ដល់ ២:១៦ ដែលមាននៅគេហទំព័រ ChurchofJesusChrist.org ) ។ ឪពុករបស់អែលឌើរ ឃ្វីនថិន អិល ឃុក មិនបានសកម្មក្នុងសាសនាចក្រទេ ហើយបានលើកទឹកចិត្តបងប្រុសលោកឲ្យទៅសាលាពេទ្យជំនួសការទៅបម្រើបេសកកម្ម ( សូមមើល « Conversion to the Will of God » Ensign ខែឧសភា ឆ្នាំ២០២២ ទំព័រ ៥៤ ) ។
សូមចំណាយពេលបន្តិចដើម្បីសរសេរនៅក្នុងសៀវភៅកំណត់ហេតុការសិក្សារបស់អ្នក ថាតើអ្នកមានអារម្មណ៍យ៉ាងណាចំពោះការបម្រើបេសកកម្មពេញម៉ោង និងមូលហេតុ ។
នៅពេលអ្នកសិក្សាមេរៀននេះ សូមស្វែងរកការណែនាំមកពីព្រះអម្ចាស់ដើម្បីជួយអ្នកក្នុងការសម្រេចចិត្ត ថាតើត្រូវបម្រើបេសកកម្មពេញម៉ោងឬអត់ និងរបៀបឆ្លើយតបទៅនឹងកង្វល់ដែលអ្នកអាចមាន ។
ពេលយើងគោរពតាមព្រះអម្ចាស់
សូម អាន ចោទិយកថា ២៨:១–៦, ៩ ដោយរកមើលអ្វីដែលព្រះអម្ចាស់បានសន្យាតាមរយៈម៉ូសេ ប្រសិនបើយើងធ្វើអ្វីដែលទ្រង់សុំឲ្យយើងធ្វើ ។
សូមអញ្ជើញសិស្សឲ្យចែកចាយនូវអ្វីដែលពួកគេបានរកឃើញ ។ សូមពិចារណាសុំសិស្សឲ្យចែកចាយឧទាហរណ៍នៃពរជ័យផ្សេងៗគ្នាដែលព្រះអម្ចាស់បានសន្យានៅក្នុងខគម្ពីរទាំងនេះ ។ វាអាចមានប្រយោជន៍ក្នុងការដឹងថា « ផលដែលកើតពីពោះរបស់អ្នក » ( ចោទិយកថា ២៨:៤ ) សំដៅទៅលើកូនចៅ ។
-
ហេតុអ្វីបានជាវាមានប្រយោជន៍ដើម្បីដឹងពីពរជ័យផ្សេងៗគ្នាជាច្រើនដែលព្រះអម្ចាស់សន្យានឹងយើង ប្រសិនបើយើងធ្វើតាមអ្វីដែលទ្រង់បានសុំនោះ ?
-
តើអ្នកគិតថាការសន្យារបស់ព្រះអម្ចាស់នៅក្នុងខគម្ពីរទាំងនេះអាចអនុវត្តចំពោះការគោរពប្រតិបត្តិរបស់យើងដើម្បីបម្រើទ្រង់ក្នុងនាមជាពួកអ្នកផ្សព្វផ្សាយសាសនារបស់ទ្រង់ដោយរបៀបណា ?
ប្រធាន រ័សុល អិម ណិលសុន បានបង្រៀន ៖
មិត្តវ័យក្មេងជាទីស្រឡាញ់ខ្ញុំអើយ អ្នករាល់គ្នាម្នាក់ៗមានតម្លៃចំពោះព្រះអម្ចាស់ ។ ទ្រង់បានបម្រុងអ្នកទុករហូតដល់ពេលនេះ ដើម្បីឲ្យអ្នកជួយប្រមូលផ្ដុំអ៊ីស្រាអែល ។ ការសម្រេចចិត្តរបស់អ្នកក្នុងការបម្រើបេសកកម្ម មិនថាជាអ្នកផ្សព្វផ្សាយដំណឹងល្អ ឬបេសកកម្មផ្នែកសេវាកម្មទេ នឹងប្រទានពរដល់អ្នក និងមនុស្សជាច្រើនទៀត ។ ( « ការផ្សាយដំណឹងល្អនៃភាពសុខសាន្ដ » លីអាហូណា ខែឧសភា ឆ្នាំ២០២២ ទំព័រ ៦ )
សូមពិចារណាសរសេរនៅលើក្ដារខៀន ៖ ព្រះអម្ចាស់នឹងប្រទានពរដល់យើង និងមនុស្សជាច្រើនទៀត នៅពេលយើងជ្រើសរើសបម្រើបេសកកម្ម ។
ការយល់ដឹងពីពរជ័យមួយចំនួនដែលព្រះប្រទានឲ្យអាចជួយក្នុងការសម្រេចចិត្តរបស់យើងដើម្បីបម្រើបេសកកម្ម ។
សម្រាប់សកម្មភាពបន្ទាប់នេះ សូមអញ្ជើញសិស្សឲ្យស្រមៃថាពួកគេជាអ្នកផ្សព្វផ្សាយសាសនាពេញម៉ោង ។ សូមពិចារណាដាក់សិស្សជាគូ ឬមានគ្នាបីនាក់ជាអែលឌើរ និងស៊ីស្ទើរ ។ សិស្សអាចចែកចាយជាមួយគ្នាទៅវិញទៅមកនូវឈ្មោះរបស់ពួកគេក្នុងបេសកកម្ម ៖ អែលឌើរ ( នាមត្រកូល ) ឬ ស៊ីស្ទើរ ( នាមត្រកូល ) ។ អ្នកអាចពន្យល់ថា នៅបេសកកម្មពេញម៉ោង ដៃគូផ្សព្វផ្សាយសាសនាសិក្សាជាមួយគ្នារៀងរាល់ព្រឹក ។
សិស្សអាចសិក្សាខ្លឹមសារនៃសំណៅមេរៀន « ពរជ័យដែលព្រះប្រទានឲ្យពួកអ្នកផ្សព្វផ្សាយសាសនារបស់ទ្រង់ » សម្រាប់ការសិក្សាជាដៃគូរបស់ពួកគេ ។
សូមអានខគម្ពីរ និងសេចក្ដីថ្លែងការណ៍មួយចំនួន ឬទាំងអស់នៅលើសំណៅមេរៀន « ពរជ័យដែលព្រះប្រទានឲ្យពួកអ្នកផ្សព្វផ្សាយសាសនារបស់ទ្រង់ » ឬស្វែងរកបទគម្ពីរ ឬសេចក្ដីថ្លែងការណ៍បន្ថែម ។ សូមពិចារណាគូសចំណាំ ឬគូសរង្វង់ពរជ័យដែលមានអត្ថន័យចំពោះអ្នក ។ សូមកត់ចំណាំថា ព្រះអម្ចាស់ប្រទានពរជ័យទាំងនេះ អំឡុងពេល និងបន្ទាប់ពីការបម្រើជាអ្នកផ្សព្វផ្សាយសាសនា ។
សម្រាប់ពរជ័យបន្ថែមនៃការបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនា សូមពិចារណាបង្ហាញវីដេអូមួយរបស់ប្រធាន ជែហ្វ្រី អ័រ ហូឡិន និងអែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់ពិភាក្សាអំពីពរជ័យមួយដូចខាងក្រោម ៖
-
ទីបន្ទាល់បន្ថែមនៃ « The Book of Mormon » ( ២:១០ )
2:10 -
« Missions and Eternal Companions » ( ១:០៧ )
1:7 -
« Missions and Careers » ( ១:៣៧ )
1:37 -
« Education » ( ១:៤៤ )
1:44
វីដេអូទាំងនេះមាននៅលើគេហទំព័រ ChurchofJesusChrist.org ។
សិស្សក៏អាចបន្ថែមពរជ័យទាំងឡាយដែលពួកគេបានកត់សម្គាល់ពីការចែកចាយដំណឹងល្អក្នុងពេលឥឡូវនេះផងដែរ ហើយជញ្ជឹងគិតអំពីរបៀបដែលពរជ័យទាំងនោះអាចទាក់ទងនឹងការបម្រើបេសកកម្មនៅពេលអនាគត ។
នៅពេលសិស្សបានសិក្សាចប់ហើយ សូមអញ្ជើញដៃគូនីមួយៗឲ្យធ្វើដូចខាងក្រោម ៖
រៀបចំអ្វីមួយដែលអ្នកអាចចែកចាយជាមួយនរណាម្នាក់ដែលកំពុងសម្រេចចិត្តថាតើត្រូវបម្រើព្រះអម្ចាស់នៅក្នុងបេសកកម្មឬអត់ ។ រួមបញ្ចូលយ៉ាងហោចណាស់ចំណុចពីរខាងក្រោម ៖
-
ពរជ័យមួយ ឬពីរដែលអ្នកបានរៀនថា ព្រះប្រទានឲ្យនៅពេលយើងបម្រើបេសកកម្មពេញម៉ោង និងអារម្មណ៍របស់អ្នកចំពោះពរជ័យទាំងនោះ ។
-
ឧទាហរណ៍នៃមនុស្សម្នាក់ដែលអ្នកស្គាល់ដែលបានទទួលពរជ័យមួយរបស់ព្រះ ដែលអ្នកបានមើលឃើញតាមរយៈការបម្រើជាអ្នកផ្សព្វផ្សាយសាសនារបស់ពួកគេ ។
-
តើអ្វីដែលអ្នកបានរៀនជះឥទ្ធិពលដល់បំណងប្រាថ្នារបស់អ្នកដើម្បីបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនាពេញម៉ោងយ៉ាងដូចម្ដេច ។
-
អ្វីដែលអ្នកបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយនរណាម្នាក់ឲ្យជ្រើសរើសបម្រើបេសកកម្មពេញម៉ោង ។
បន្ទាប់ពីសិស្សបានរៀបចំហើយ សូមអញ្ជើញដៃគូនីមួយៗឲ្យបែងចែកសាររបស់ពួកគេជាពីរផ្នែក ។ ឲ្យពួកគេសម្រេចចិត្តថាតើពួកគេនឹងចែកចាយផ្នែកមួយណា ។ ( ឧទាហរណ៍ សិស្សម្នាក់អាចចែកចាយពរជ័យមួយ និងអារម្មណ៍របស់ពួកគេអំពីពរជ័យនោះ បន្ទាប់មកសិស្សម្នាក់ទៀតអាចចែកចាយឧទាហរណ៍មួយ និងរបៀបដែលការផ្តោតទៅលើព្រះវរបិតាសួគ៌ និងព្រះយេស៊ូវគ្រីស្ទអាចជួយបាន ) ។ ពិចារណាថាតើវានឹងមានប្រសិទ្ធភាពជាងក្នុងការមានដៃគូជាច្រើនធ្វើបទបង្ហាញនៅពីមុខថ្នាក់ទាំងមូល ឬវានឹងប្រសើរជាងប្រសិនបើពួកគេធ្វើបទបង្ហាញដល់គ្នាទៅវិញទៅមកជាក្រុមតូចៗ ។ ប្រសិនបើពួកគេធ្វើបទបង្ហាញជាក្រុមតូចៗ អ្នកអាចសួរនៅពេលក្រោយ ពីអ្វីដែលមានអត្ថន័យសម្រាប់ពួកគេដែលពួកគេបានឮពីអ្នកផ្សេង ឬអ្វីដែលពួកគេបានចែកចាយដោយខ្លួនឯង ។
ការសម្រេចចិត្តរបស់អ្នក
សូមចំណាយពេលមួយសន្ទុះ ដើម្បីបិទភ្នែករបស់អ្នក ហើយគិតអំពីព្រះវរបិតាសួគ៌ ។ សូមចងចាំពីសេចក្តីស្រឡាញ់របស់ទ្រង់ចំពោះអ្នក ។ យុវនារីទាំងឡាយ សូមស្រមៃមើលថាតើទ្រង់អាចមានព្រះទ័យយ៉ាងណា នៅពេលអ្នកស្វែងរកដើម្បីដឹងពីឆន្ទៈរបស់ទ្រង់អំពីការបម្រើបេសកកម្ម ។ យុវជនទាំងឡាយ សូមគិតអំពីអ្វីដែលព្រះវរបិតាសួគ៌សព្វព្រះទ័យឲ្យអ្នកធ្វើក្នុងពេលឥឡូវនេះ ដើម្បីរៀបចំខ្លួនដើម្បីក្លាយជាអ្នកផ្សព្វផ្សាយសាសនាដ៏មានប្រសិទ្ធភាព ឬដើម្បីដោះស្រាយកង្វល់ទាំងឡាយដែលអ្នកប្រហែលជាមានអំពីការបម្រើ ។
ស្វែងរកជំនួយពីព្រះវរបិតាសួគ៌ ពេលអ្នកសរសេរនៅក្នុងសៀវភៅកំណត់ហេតុការសិក្សារបស់អ្នកនូវអ្វីដែលអ្នកបានរៀន ឬអ្វីដែលទ្រង់សព្វព្រះទ័យឲ្យអ្នកចងចាំចេញពីមេរៀននេះ នៅពេលអ្នកគិតពិចារណាអំពីការបម្រើព្រះអម្ចាស់ជាអ្នកផ្សព្វផ្សាយសាសនាពេញម៉ោង ។
សូមពិចារណាអញ្ជើញសិស្សពីរបីនាក់ឲ្យចែកចាយអ្វីដែលពួកគេបានរៀន ឬទទួលអារម្មណ៍នៅក្នុងមេរៀននេះ ។ សូមបន្ថែមគំនិត និងទីបន្ទាល់របស់អ្នកផងដែរ ។