Isaias 1–12: Leksiyon 113

Pasiuna sa Isaias

“Mahinungdanon ang mga pulong ni Isaias”

Ang propetang Isaias adunay importante kaayong responsibilidad sa pagtudlo bahin sa katubsanan pinaagi kang Jesukristo. Kini nga mensahe alang sa mga tawo sa panahon ni Isaias, og sa atong panahon karon. Takos ang paningkamot nga makugihong tun-an ang mga pagtulun-an ni Isaias bahin kang Jesukristo. Kini nga leksiyon makatabang sa mga estudyante nga madasig sa pagkat-on bahin kang Jesukristo pinaagi sa pagtuon sa Isaias.

Pagpangandam sa estudyante: ikonsiderar ang pagdapit sa mga estudyante nga motambong sa klase nga andam ipakigbahin ang importanteng kamatuoran bahin sa Isaias. Pwede nilang tan-awon ang Isaias diha sa Giya ngadto sa mga Kasulatan.

Posibleng mga Kalihokan sa Pagkat-on

Rekomendasyon sa usa ka basahon

Ikonsiderar ang pagsugod sa klase pinaagi sa pagpakita sa mosunod nga mga pamahayag ug pagdapit sa mga estudyante nga ipasunod kini gikan sa labing makakombinsir nila hangtod sa dili kaayo makakombinsir nila sa pagbasa og usa ka basahon.

• Morag makapainteres kaayo

• Rekomendado sa usa ka sakop sa pamilya o higala

• Gi-assign sa usa ka klase sa eskwelahan

• Nindot og mga rebyo sa online

Pwede nimong dapiton ang pipila ka estudyante nga ipakigbahin ang ilang nangunang rason ug kon ngano.

Basaha ang 3 Nephi 23:1–3, nga pangitaon kon unsa nga basahon ang Manluluwas midapit kanato nga tun-an.

• Unsay imong hunahuna bahin sa sugo sa Manluluwas nga makugihong susihon ang mga pulong ni Isaias?

• Sa unsang paagi ang sugo sa Manluluwas makaimpluwensiya sa imong paagi sa pagtuon sa Isaias?

Pwede nimong hangyoon ang mga estudyante nga ipakita ang ilang pagsalig sa ilang katakos nga makugihong tun-an ang mga pulong ni Isaias. Usa ka paagi sa paghimo niini mao ang pagbutang og sulat nga “dako kaayo og pagsalig” sa usa ka bungbong sa lawak klasehan ug ang laing bungbong butangan og “wala kaayoy pagsalig.” Dapita ang mga estudyante sa pagtindog taliwala sa mga bungbong base sa lebel sa ilang pagsalig. Pwedeng ipakigbahin sa andam nga mga estudyante ang lebel sa ilang pagsalig.

Ipakigbahin sa mga estudyante nga makatabang nila sa Espiritu Santo nga makabaton og pagsalig nga matabangan sila sa mga pagtulun-an ni Isaias nga maduol kang Jesukristo.

Unsay angay nimong mahibaloan bahin kang propetang Isaias nga makatabang?

Aron matabangan ang mga estudyante nga masabtan ang pipila ka butang bahin kang propetang Isaias, ikonsiderar ang pagpakita sa infographic nga “The Kingdoms of Israel and Judah at a Glance.” Dapita ang mga estudyante sa pagpangita kang Isaias.

Pwede nimong hangyoon ang mga estudyante nga pangitaon ang tubag sa mosunod nga mga pangutana diha infographic:

• Sa unsang gingharian nagpuyo si Isaias? (Juda)

• Kinsa nga mga propeta ang nagwali sa samang panahon ni Isaias? (Miqueas, Oseas, Jonas)

• Unsang importanteng panghitabo ang nahitabo mga usa ka siglo human kini gipanagna ni Isaias? (Gibihag sa Babelon ang Juda)

Para sa dugang impormasyon, tan-awa ang mga entry para sa “Isaias” diha sa Giya ngadto sa mga Kasulatan. Pwde nimong dapiton ang mga setudyante nga ipakigbahin ang bisan unsang butang nga ilang nakat-onan bahin kang Isaias diha sa ilang pagpangandam sa estudyante.

Basaha o isumaryo ang mosunod nga parapo.

Sa iyang kinabuhi, ang propetang Isaias misangyaw sa mga tawo nga mipahilayo gikan sa pagtuo kang Jehova (Jesukristo). Ang mensahe nga gustong ipahayag ni Isaias makita sa kaugalingon niyang ngalan nga nagkahulugang, “Ang Ginoo ang kaluwasan.” Ang mga pagtulun-an ni Isaias magamit usab sa ubang panahon diin mipahilayo ang mga tawo kang Jesukristo—sama sa panahon ni Kristo ug sa kasamtangang adlaw, samtang nangandam kita para sa Iyang Ikaduhang Pag-anhi.

Ang mga pulong ni Isaias makatabang nato nga hingpit nga motuo kang Jesukristo

Tingali ang mga estudyante interesado sa pagkahibalo nga “Si Jesus mikutlo kang Isaias labaw pa sa iyang pagkutlo ni bisan kinsa nga propeta. Si Isaias gikutlo usab kanunay ni Pedro, ni Juan ug ni Pablo diha sa Bag-ong Tugon. Ang Basahon ni Mormon ug ang Doktrina ug mga Pakigsaad adunay daghan nga pagkutlo gikan kang Isaias kaysa gikan ni bisan kinsa nga propeta ug naghatag og dako nga pagtabang sa paghubad ni Isaias” (Giya ngadto sa mga Kasulatan, “Isaias,” Librarya sa Ebanghelyo).

Basaha ang 1 Nephi 19:23, nga pangitaon kon nganong gibasa ni Nephi ang mga pulong ni Isaias ngadto sa iyang mga igsoon.

• Unsay imong nakaplagan?

Kon dili kini mahisgotan sa mga estudyante, tabangi silang masabtan kini nga kamatuoran: Ang pagtuon sa mga pulong ni Isaias motabang nato nga mas bug-os nga motuo kang Jesukristo.

Maayo kini nga kahigayonan aron mapakita sa mga estudyante ang kaimportante nga mas mailhan si Jesukristo pinaagi sa mga pulong ni Isaias. Usa ka paagi sa paghimo niini mao ang pagdapit sa mga estudyante nga kompletohon ang mosunod nga kapahayag diha sa ilang mga journal: “Ang mas bug-os nga pagtuo kang Jesukristo makaapektar sa akong kinabuhi pinaagi sa …” Dihang nakabaton nag kahigayonan ang mga estudyante sa pagsulat, pwede nimong dapiton ang mga gustong mopakigbahin sa klase ang ilang gisulat. Ayaw og kalimot sa pagpadayag og pagdayeg sa kada estudyante nga mopakigbahin.

Ingon nga alternatibo, imbes pasulatan sa ilang journal, pwede nimong dapiton ang mga estudyante nga ipakigbahin ang ilang mga hunahuna sa ilang pares.

Mga ngalan ug mga titulo ni jesukristo

Tabangi ang mga estudyante nga makasabot nga ang usa sa mga paagi nga gitultolan kita ni Isaias nga hingpit nga motuo kang Jesukristo mao ang pagtudlo bahin sa Iyang mga titulo ug mga tahas. Usa ka paagi sa pagtuon niini nga mga titulo ug mga tahas mao ang paggamit og diagram. Pwede nimong i-drowing sa pisara ang mosunod nga diagram. O, bahina ang mga estudyante sa gagmayng mga grupo ug dapita sila sa pagdrowing niini diha sa usa ka pirasong papel. Isulat ang “Jesukristo” diha sa tunga sa papel. Dayo, pwedeng dapiton ang mga estudyante nga isulat diha sa ubang lingin ang mga titulo ug mga tahas ni Jesukristo nga ilang makaplagan.

Basaha ang mosunod nga mga bersikulo ug ilha ug ikonsiderar ang pagmarka sa mga titulo ug mga tahas ni Jesukristo.

• Isaias 7:14

• Isaias 9:6–7

• Isaias 33:22

• Isaias 40:28

  Human kini mabasa sa mga estudyante, pwede kang magpakita og pipila ka hulagway ni Jesukristo nga gikan sa media library sa Simbahan. Dayon pwedeng ipakigbahin sa mga estudyante kon unsa nga mga titulo o mga tahas ang ilang nakita sa hulagway.

  Ikonsiderar ang pagdapit sa mga sakop sa grupo sa pagpili og titulo o tahas ug magkat-on og dugang bahin niini gamit ang mga footnote o pangitaon ang “Jesukristo” diha sa Giya ngadto sa mga Kasulatan. Dayon pwede nimong dapiton ang mga estudyante nga dugangan ang diagram pinaagi sa paghimo og mga lingin nga konektado sa titulo o tahas nga ilang gipunting. Pwede nilang ilista ang mga panabot nga ilang nakat-onan bahin sa maong titulo o tahas. (Timan-i: kini nga kalihokan pagahisgotan sa Leksiyon 133: “Pagsukod sa Imong Nakat-onan 8.”)

  Pwede nimo silang dapiton nga ipakigbahin ngadto sa ilang grupo ang ilang nakat-onan bahin sa Manluluwas.

• Nganong gikinahanglan nimo ang Manluluwas aron matuman ang usa o kapin pa niini nga mga tahas diha sa imong kinabuhi?

• Sa unsang paagi nimo nakita nga natuman sa Manluluwas ang usa niini nga mga tahas diha sa imong kinabuhi o sa kinabuhi sa imong kaila?

Dugang nga mga Kapanguhaan

Mahitungod sa unsang yugto sa panahon ang gisulat ni Isaias?

Si Presidente Dallin H. Oaks sa Unang Kapangulohan mipakigbahin:

Ang basahon ni Isaias naglangkob sa daghang mga panagna nga morag dunay daghang mga katumanan. Ang usa ingon og nag-apil sa mga katawhan sa panahon ni Isaias o ang mga kahimtang sa sunod nga henerasyon. Ang lain nga kahulugan, kasagaran may simbolo, ingon og nagpasabot ngadto sa mga panghitabo sa tunga-tunga sa kapanahonan, sa dihang ang Jerusalem gilumpag ug ang mga katawhan niini nagkatibulaag human sa paglansang sa krus sa Anak sa Dios. Lain pa gayod nga kahulugan o katumanan sa samang panagna ingon og kabahin sa mga panghitabo kalabot sa Ikaduhang Pag-anhi sa Manluluwas. Ang kamatuoran nga daghan niining mga panagna mahimong adunay daghang mga kahulugan nga naghatag og gibug-aton sa ka-importante sa atong pagtinguha og pinadayag gikan sa Espiritu Santo sa pagtabang nato nga mahubad kini. Sama sa giingon ni Nephi, ang mga pulong ni Isaias “yano ngadto sa tanan nga napuno sa espiritu sa panagna” (2 Nephi 25:4). (“Scripture Reading and Revelation,” Ensign, Jan. 1995, 8)

Unsa pay atong masabtan sa ngalan ni Jesus nga “Immanuel”? (Isaias 7:14)

Ang mga kasulatan nagtudlo nga ang “Immanuel” nagkahulogan og “Ang Dios ania uban kanato.” (Tan-awa sa Mateo 1:23.)

Si Presidente Jeffrey R. Holland sa Kurom sa Napulog Duha ka Apostoles naghatag og mga panabot kon sa unsang paagi ang Langitnong Amahan nag-uban nato pinaagi kang Jesukristo:

Sa kadaghan sa maanindot nga mga katuyoan nga nahatag sa kinabuhi ug pagpangalagad ni Ginoong Jesukristo, usa sa dakong aspeto niana nga misyon kadaghanan nga milabay nga wala mamatikdi. Ang iyang mga sumusunod wala makasabot nianang higayona, ug daghan sa modernong Kristiyanismo ang wala makasabot niini karon, apan ang Manluluwas Mismo ang mibalik-balik og sulti niini ug sa klaro nga paagi. Kini mao ang mahinungdanong kamatuoran nga sa tanang gisulti ug gibuhat ni Jesus, lakip na ug ilabina sa Iyang matubsanong pag-antos ug sakripisyo, Siya nagpakita kanato kon kinsa ug unsa gayod ang Dios ang atong Mahangturong Amahan, unsa ka hingpit ang Iyang pagkamaunongon ngadto sa Iyang mga anak sa tanang dispensasyon ug nasod. Sa pulong ug sa buhat si Jesus naninguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit. (“Ang Kahalangdon sa Dios,” Liahona, Nob. 2003, 70)

Sa unsang paagi ang basahon sa Isaias haom sa han-ay sa mga basahon sa Daang Tugon?

Ang Daang Tugon gihan-ay sa upat ka seksiyon: ang Balaod, Kasaysayan, Balak, ug ang mga Propeta. Ang basahon sa Isaias mao ang unang basahon sa mga Propeta, ang kataposang seksiyon sa Daang Tugon, nga natapos sa Malaquias.

Dugang nga mga Kalihokan sa Pagkat-on

Pagkat-on og dugang bahin kang Jesukristo gikan sa Isaias

Kini nga kalihokan pwedeng gamiton uban sa mga kasulatan nga gitun-an sa mga estudyante bahin sa mga titulo ug mga tahas sa Manluluwas. Pinaagi sa pagtuon sa mosunod nga mga bersikulo, pwedeng makat-onan sa mga estudyante ang bahin sa mga hiyas sa Manluluwas ug ang mga paagi nga Iya kitang gitabangan.

Isaias 12:2

Isaias 43:25

Isaias 49:15–16

Isaias 53:3–5

Dayon pwedeng ipakigbahin sa mga estudyante ang ilang nakat-onan o gibati bahin kang Jesus panahon niini nga kalihokan.

Si Nephi mitabang kanato nga makasabot ni Isaias

Human matun-i ang mga ngalan ug mga titulo ni Jesukristo, pwede nimong hatagan ang mga estudyante og dugang tabang alang sa pagtuon sa Isaias. Pwede nimong tutokan ang gitudlo ni Nephi bahin sa pagsabot sa Isaias—nga atong mas masabtan ang mga pagtulun-an sa Isaias samtang kita:

1. Magkat-on bahin sa “pamaagi sa pagpanagna sa mga Judeo” (2 Nephi 25:1). Kini naglakip sa pagtinguha nga masabtan ang mga paghulagway, mga simbolo, ug balak nga gigamit ni Isaias.

   Pananglitan, unsa kahay gusto niyang isulti dihang iyang gisulat ang bahin sa usa ka parasan (tan-awa sa Isaias 5:1–7), mga tubig sa Siloe (tan-awa sa Isaias 8:5–10), ug usa ka bandila (tan-awa sa Isaias 5:26; 11:10, 12)?

2. “Puno sa espiritu sa panagna” (2 Nephi 25:4). “Kay ang pagpanghimamatuod ni Jesus mao man ang espiritu sa propesiya” (Pinadayag 19:10). Kon motuo kita kang Jesukristo ug tutokan ang gitudlo ni Isaias bahin Kaniya, mas masabtan nato ang mga gisulat ni Isaias.

   Human sa kada kapitulo, pangutan-a ang imong kaugalingon, “Unsay akong nakat-onan bahin kang Jesukristo?” (Tan-awa sa 1 Nephi 19:23.)

3. Hibaloa ang “pamaagi sa mga Judeo” ug ang “mga rehiyon nga nagpalibot” sa Jerusalem (2 Nephi 25:6). Ang pagkat-on bahin sa heograpiya sa Jerusalem ug sa palibot nga mga nasod motabang nato nga masabtan ang mga sinulat ni Isaias.

   Pananglitan, ang Babelonia pwedeng makita ingon nga simbolo sa pagkakalibotanon ug garbo, dili lang usa ka karaan nga siyudad. Ang Israel pwedeng sabton ingon nga katawhan sa Dios diha sa bisan unsang panahon. Ang Zion pwedeng lantawon ingon nga ulahing adlaw nga kawsa nga gidawat sa katawhan sa Dios, imbes nga laing pulong lang para sa Jerusalem.

   Kon magamit, gamita ang mga tabang sa pagtuon, sama sa usa ka dictionary, mga footnote sa Biblia, mga ulohan sa kapitulo, ug ang Giya ngadto sa mga Kasulatan.

4. Pagpuyo sa “kataposang mga adlaw.” Si Nephi mitudlo nga ang mga pulong ni Isaias “dako kaayo kini og bili ngadto kanila sa kataposang mga adlaw; kay niana nga adlaw makasabot sila niini” (2 Nephi 25:8). Ang pagkonektar sa mga pagtulun-an ni Isaias sa mga panghitabo ug kondisyon sa kataposang mga adlaw makatabang aron masabtan nato ang iyang mga panaagna.

   Pangita alang sa mga hilisgotan nga maingon og may kalabotan sa atong panahon, sama sa kinabuhi ug misyon ni Jesukristo, ang pagkatibulaag ug pagpundok sa Israel, ang kataposang mga adlaw, ug ang Milenyum. Makahimo usab ikaw sa pagbaton og mga lista sa mga pakisayran gikan sa Isaias nga nagtudlo mahitungod niini nga mga hilisgotan.

Pwede pud tun-an sa mga estudyante ang artikulo nga “Upat ka Mahinungdanong Paagi ni Nephi sa Pagsabot sa Isaias” o ang “Unsaon nako Pagsabot ang Isaias?”

Isaias 9:7

Aron masabtan ang mga ngalan ug titulo ni Jesukristo, makatabang tingali ang “Alang Kanato ang Usa ka Bata Natawo” (Liahona, Dis. 2009, 8–9). Pwede nimong ipakita ang mga bahin niana nga naghulagway sa kahulogan sa mga titulo nga gihisgotan sa Isaias 9:7 ug dapita ang mga estudyante nga mopili og usa o duha nga gusto nilang mas masabtan.

Bidyo

Makatabang ang bidyo nga “Isaiah the Prophet” nga makatabang sa mga estudyante nga makita kon sa unsang paagi mitudlo si Isaias bahin kang Jesukristo.