Isaias 1–12: Leksiyon 115

Isaias 5

“Alaot Kamong Nagtawag sa Daotan nga Maayo ug sa Maayo nga Daotan”

Pinaagi ni propetang Isaias, gipahimangnoan sa Ginoo ang Israel batok sa ilang makasasalang mga pagpili, apil ang pagtawag sa “daotan nga maayo, ug sa maayo nga daotan” (Isaias 5:20). Karon, naay daghang makadaot nga ideya ug buhat nga morag maayo tan-awon. Kini nga leksiyon mopalambo sa katakos sa pag-ila sa mga estudyante sa maayo ug sa daotan.

Pagpangandam sa estudyante: Dapita ang mga estudyante nga motambong sa klase nga andam sa pagpakigbahin og ehemplo sa usa ka butang nga dili peligroso, o maayo pa gani, nga sa kataposan mailhan nga makadaot.

Posibleng mga Kalihokan sa Pagkat-on

Espirituhanong peligroso nga mga ideya ug mga buhat

Ikonsiderar ang pagsugod sa klase pinaagi sa pagpakita og usa ka hulagway sa camouflaged cheetah, sama nianang naa sa sinugdanan niini nga leksiyon. Dayon, pwede nimong ipangutana ang mosunod ug ipakita ang pamahayag ni Elder David A. Bednar.

• Nganong delikado ang cheetah para sa mga biktima niini?

Gitandi ni Elder David A. Bednar sa Kurom sa Napulog Duha ka Apostoles ang mga cheetah ngadto sa peligrosong mga ideya ug binuhatan.

Alang kanako, ang mga cheetah hapsay, madanihon ug makapainteresado nga mga nilalang. Ang pagkadalag-tabonon ngadto sa pagkaabuhon-puti nga adunay itom nga mga pintik sa balahibo sa cheetah nagsilbi nga maanindot nga takuban nga nakahimo niini nga mga hayop nga halos dili na makita samtang sila mangukoy sa ilang biktima sa mga kasagbotan sa Aprika.

Sa samang paagi, ang espirituhanong peligroso nga mga ideya ug mga buhat kasagaran mahimong daw makabihag, madanihon, o makalingaw. Mao nga, sa atong kontemporaryong kalibotan, matag usa kanato kinahanglan nga magbantay sa makailad nga daotan nga nagpakaaron-ingnong maayo. (“Magmabinantayon ngadto sa Pag-ampo Kanunay,” Liahona, Nob. 2019, 33)

• Unsa ang pipila ka ehemplo sa “espirituhanong peligroso nga mga ideya ug mga buhat” nga “mahimong daw makabihag, madanihon, o makalingaw”?

  Makatabang ang pagsulat sa mga tubag sa estudyante diha sa pisara. Tingali ang mga estudyante mosulti og mga butang nga sama sa, “Akoa man ning lawas. Makabuot ko kon unsaon nako kini” o “Okay ra na basta dili lang ka masakpan.” Imong hisgotan kini nga mga ideya diha sa pisara sa ulang bahin sa leksiyon.

• Nganong importante alang kanimo ang pag-ila sa makapadani nga daotan nga nagpakaaron-ingnon nga maayo?

Ang mosunod nga pagpasabot ug pagdapit makatabang sa mga estudyante nga makita kon sa unsang paagi ang ilang tun-an niini nga leksiyon importante diha sa ilang kinabuhi.

Mahimong lisod ang pag-ila niining malimbongong mga ideya ug buhat, ilabina kon naimpluwensiyahan kita niini. Matag usa kanato maghunahuna o molihok sa mga paagi nga wala bug-os masubay sa mga pagtulun-an ni Jesukristo (tan-awa ang Mga Taga-Roma 3:23). Ang Langitnong Amahan ug si Jesukristo motabang kanato nga makita kini diha sa atong kaugalingon samtang nagtinguha kita sa Ilang tabang pinaagi sa Espiritu Santo. Samtang magtuon ka karon, hatagi og dakong pagtagad kon sa unsang paagi ka gitabangan sa Espiritu Santo nga mailhan ang kamatuoran gikan sa sayop.

Nagtakoban nga mga panglimbong

I-summarize ang mosunod nga parapo aron ipaila sa mga estudyante ang katibuk-ang mensahe sa Isaias 5.

Sa Isaias 5, gitudloan sa Ginoo ang mga Israelita bahin sa Iyang gugma kanila ug ang mga resulta sa ilang makasasala nga mga pagpili pinaagi sa pagtandi ngadto sa usa ka parasan. Bisan tuod gisulayan sila og tabang sa Ginoo nga motubo, ang pagpili sa mga Israelita nga makasala misangpot sila mahimong “aslom nga ubas” (tan-awa sa Isaias 5:2), usa ka simbolo sa pagkadunot ug dili maayo nga kinaiya. Kay mipili sila nga “isalikway” ug dumtan ang Ginoo ug ang Iyang mga pagtulun-an (tan-aw ang Isaias 5:24),sili mahimong biniyaan nga walay tabang sa Ginoo.

Pwede nimong dapiton ang mga estudyante nga tan-awon ang Isaias 5:8–23 ug iphon kon pila ka higayon nga gigamit sa Ginoo ang pulong nga “alaot” (kaunom). Ipasabot nga ang “alaot” nagpasabot og grabe nga kaguol o pag-antos. Gisulayan sa Ginoo pagtudlo ang mga Israelita nga ang ilang pagpili nga magpakasala mopahilayo kanila gikan Kaniya ug mosangpot sa kagul-anan ug pag-antos.

Samtang daghang kamatuoran niini nga leksiyon ang pwedeng tutokan, ang nahibiling bahin niini nga leksiyon magpunting sa tudling sa doktrinal nga kahanas sa Isaias 5:20.

Ang Isaias 5:20 maoy usa ka tudling sa doktrinal nga kahanas. Ikonsiderar ang pagdapit sa mga estudyante nga markahan sa pinasahi nga paagi ang mga tudling sa doktrinal nga kahanas aron dali ra nila kining makit-an.

Basaha ang Isaias 5:20, nga pangitaon kon unsay hinungdan sa kaalaotan, o kasub-anan ug pag-antos.

• Unsay imong nakaplagan?

Tabangi ang mga estudyante nga mailhan ang usa ka kamatuoran, sama sa Kon tawgon natong daotan ang maayo ug ang maayo nga daotan, sa kataposan makasinati kitag kaguol ug pag-antos. Pwede nimong dapiton ang mga estudyante nga ikonsiderar ang pagmarka sa tulo ka pares diha sa bersikulo, daotan ug maayo, kangitngit ug kahayag, ug pait ug tam-is. Ipatin-aw nga sagad mohatag si Isaias ug daghang ehemplo aron mahimong mas tin-aw ang iyang mga pagtulun-an.

• Sa unsang paagi ang pagtawag sa daotan nga maayo ug sa maayo nga daotan sa kataposan mosangpot sa kaguol ug pag-antos?

Ang pag-angkon sa kalisod sa pag-ila niini nga mga pagpanglimbong motabang sa mga estudyante nga mobati nga naay nakasabot nila, makaila sa mga babag, ug makakita nga gikinahanglan nila ang Dios.

Tan-aw ang listahan sa “espirituhanong peligroso nga mga ideya ug mga buhat” diha sa pisara, ug ipangutana ang mosunod.

• Unsay nakapalisod sa pag-ila niining espirituhanong peligroso nga mga ideya ug mga buhat?

Hunahunaa kon naa bay espirituhanong peligroso nga mga ideya ug mga buhat nga para nimo makabihag, madanihon, o makalingaw.

Si Jesukristo mao ang kamatuoran

Human maila ang mga kalisdanan, tabangi ang mga estudyante nga makita si Jesukristo mao ang solusyon.

Basaha ang Juan 14:6, nga pangitaon kon unsay gisulti ni Jesus kon kinsa Siya.

• Sa imong hunahuna, unsay ipasabot ni Jesus dihang miingon Siya nga Siya ang kamatuoran?

• Unsay gihatag sa Langitnong Amahan ug ni Jesukristo kanato aron motabang sa pag-ila sa malimbongon nga mga ideya ug buhat nga atong gilista ganina?

Bisan tuod dili kini kompleto nga listahan, ipakigbahin tingali sa mga estudyante ang mga butang nga sama sa mosunod:

• Ang Espiritu (tan-awa sa Doktrina ug mga Pakigsaad 11:12–13)

• Ang Kahayag ni Kristo (tan-awa sa Moroni 7:16–19)

• Mga propeta (tan-awa sa Doktrina ug mga Pakigsaad 21:1, 4–6)

• Mga kasulatan (tan-awa sa 2 Timoteo 3:15–17)

Kon nakita nimo nga gikinahanglan sa imong mga estudyante, pwede nimong basahon ug hisgotan ang pipila sa mga kasulatan nga gihatag.

Ang mosunod nga kalihokan mohatag og higayon sa mga estudyante nga tun-an ang mga pagtulun-an sa Manluluwas nga motabang nila sa pag-ila sa kamatuoran. Ipatan-aw sa mga estudyante ang listahan sa espirituhanong peligroso nga mga ideya o mga buhat diha sa pisara. Ipakita ang mosunod nga mga instruksiyon.

Aron matabangan kita sa pag-ila sa kamatuoran gikan sa sayop, pwede kitang modangop sa mga pagtulun-an ni Jesukristo ug sa Iyang mga propeta. Usa sa pwede natong kadangpan “pagpangita sa mga pagtulun-an ni Jesukristo ug sa Iyang mga propeta” mao ang Alang sa Kalig-on sa mga Kabatan-onan: Usa ka Giya sa Paghimo og mga Pagpili (“Paghimo og Dinasig nga mga Pagpili,” Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022]).

Pagpili og usa ka ideya o buhat nga daotan pero nagpakaaron-ingnon nga maayo o maayo nga gilantaw o gitawag nga daotan. Tun-i ang giya nga Alang sa Kalig-on sa mga Kabatan-onan, nga pangitaon ang mga pagtulun-an ni Jesukristo ug sa Iyang mga propeta nga makatabang nimo sa pagpili nga sundon si Jesukristo imbes ang malimbongon nga mga mensahe sa yawa. Isulat kon giunsa pagtul-id sa mga pagtulun-an sa Manluluwas ang sayop nga mga ideya.

Dapita ang mga estudyante sa pagpakigbahin sa unsay ilang nakit-an. Aron mahimo kini, pwedeng mopili ang estudyante og ideya o buhat nga naa sa pisara. Hangyoa ang klase sa pagpasabot kon sa unsang paagi ang ilang nakat-onan nagpakita nga espirituhanong peligroso ang maong ideya o buhat. Pananglitan, kon pilion sa estudyante ang “Okay ra na basta dili lang ka masakpan,” ipakigbahin tingali sa mga estudaynte ang usa ka butang nga ilang nakat-onan sa seksiyon nga “Ang kamatuoran mohimo kaninyo nga gawasnon” diha sa giya nga Alang sa Kalig-on sa mga Kabatan-onan, sama sa mga parapo nga nagsugod sa “Ang pagpakabuhi nga may kaligdong nagpasabot nga kamo mohigugma sa kamatuoran sa tibuok ninyong kasingkasing” o “Higugmaa ang kamatuoran.”

Pagpamalandong sa pagkat-on

Hatagi og kahigayonan ang mga estudyante sa pagpamalandong sa ilang nakat-onan pinaagi sa pagpakita sa pangutana nga sama sa mosunod.

Isulat ang tubag sa mosunod nga pangutana diha sa imong journal sa pagtuon:

• Unsay nakat-onan nimo karon nga makatabang nimo sa pag-ila sa kamatuoran ug mas mosunod kang Jesukristo?

Pwede nimong dapiton ang mga estudyante sa pagpakigbahin sa ilang mga pagbati ug pagpamatuod pinaagi sa pagpakigbahin sa ilang gisulat. Ikonsiderar ang pagpamatuod kang Jesukristo ug sa Iyang titulo ingon nga ang Kamatuoran.

Pagsag-ulo

Pwede nimong tabangan ang mga estudyante sa pagsag-ulo sa tudling sa doktrinal nga kahanas ug sa importanteng hugpong sa mga pulong sa kasulatan atol niini nga leksiyon ug dayon pagrebyo niini sa umaabot nga mga leksiyon. Ang importanteng hugpong sa mga pulong sa kasulatan para sa Isaias 5:20 mao ang: “Alaut kanila nga nagangalan sa dautan nga maayo, ug sa maayo nga dautan.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsay makatabang nako nga mailhan ang maayo gikan sa daotan?

Si Presidente Dallin H. Oaks sa Unang Kapangulohan mipahayag:

Kon magsugod kita pinaagi sa pagsukod sa modernong mga buhat ug mga sugyot batok sa unsay atong nahibaloan sa plano sa Dios ug mga butang nga gihatag diha sa pulong sa Dios ug sa mga pagtulun-an sa Iyang buhi nga mga propeta, … nasayud kita nga kini nagbutang nato sa luwas nga lugar sa kahangturan. (“As He Thinketh in His Heart,” [gabii kauban ni Elder Dallin H. Oaks, Peb. 8, 2013], 5)

Tan-awa ang mga parapo 11 ug 12 sa “Pag-angkon og Espirituhanong Kahibalo” diha sa Mahinungdanon nga Dokumento sa Doktrinal nga Kahanas (2023).

Tan-awa ang “Isentro ang Imong Kinabuhi diha ni Jesukristo” o “Pakisayod sa Kasaligan nga mga Tinubdan,” nga anaa sa Pagpangita og mga Tubag sa Imong mga Pangutana nga serye sa Mga Hilisgotan ug mga Pangutana nga seksiyon sa Librarya sa Ebanghelyo.

Sa unsang paagi managlahi ang mga mensahe sa Langitnong Amahan ug sa kaaway?

Si Presidente Russell M. Nelson mitudlo:

Ang kaaway abtik. Liboan na ka tuig nga siya mihimo sa maayo nga daotan ug sa daotan nga maayo. Ang iyang mga mensahe ingon og kusog, isog, ug mapagarbohon.

Hinoon, ang mga mensahe gikan sa atong Langitnong Amahan makita nga lahi. Siya makigsulti sa yano, sa hilom, ug sa labihan kayano nga kita makasabot gayod Kaniya. (“Paminaw Kaniya,” Liahona, Mayo 2020, 89)

Dugang nga mga Kalihokan sa Pagkat-on

Dugang nga mga opsiyon sa bidyo

Makabenepisyo tingali ang mga estudyante sa pagkadungog sa paghulagway kon unsay nabantayan ni Elder Bednar ug sa iyang asawa bahin sa pagpangitag matukob sa mga cheetah dihang mibisita sila sa Africa. Pwede ninyong tan-awon ang mas taas nga bahin sa iyang pakigpulong nga, “Magmabinantayon ngadto sa Pag-ampo Kanunay,” gikan sa time code 2:13 hangtod 6:07, diin naapil ang iyang kasinatian.

“Nagtawag sa kangitngit nga kahayag … pait nga tam-is” (Isaias 5:20)

Tungod kay dili pa andam ang pipila ka estudyante nga sulatan ang usa ka buhat o ideya ingon nga maayo o daotan, pwede kang mogahin og panahon sa pag-istorya human maila ang nakabaga pagsulat nga kamatuoran bahin sa dugang mga ehemplo nga gihatag ni Isaias: ang kangitngit ug kahayag, pait ug tam-is.

• Unsang dugang mga ehemplo sa espirituhanong peligroso nga mga ideya o mga buhat nga pwedeng magtawag sa “kangitngit nga kahayag, ug sa kahayag nga kangitngit; ug naghimo sa pait nga tam-is ug sa tam-is nga pait” (Isaias 5:20)?

Bisan tuod og dili tingali tawgon sa mga estudyante ang usa ka mga kapilian sa musika o ang pagyagayaga ni bisan kinsa ingon nga daotan, pwede tingali nilang ipakigbahin kon sa unsang paagi ang mga pagpili sa piho nga musika mahimong madugangan ang kangitngit o kahayag o kon sa unsang paagi ang atong pagtratar sa uban moresulta og pait o tam-is nga mga kasinatian.

Unsaon pag-ila tali sa kasaligan ug sa dili kasaligan nga mga tinubdan

Usa ka paagi nga atong mailhan ang mga panglimbong ni Satanas mao ang pag-ila tali sa kasaligan ug dili kasaligan nga mga tinubdan. Pwede nimong tabangan ang mga estudyante nga makakat-on kon unsaon kini paghimo pinaagi sa paggamit sa materyal nga anaa sa “Mubo nga Pagbansay 3: Unsaon Pagtimbangtimbang sa Pagkamasaligan sa mga Tinubdan,” nga naa sa kurso sa Institute nga Materyal sa Magtutudlo alang sa Pagtubag sa Akong mga Pangutana sa Ebanghelyo. O pwede nimong gamiton ang materyal bahin sa pagkonsulta sa kasaligang mga tinubdan nga naa sa “Pagpangita og mga Tubag sa Imong mga Pangutana” nga tinubdan ilawom sa Mga Hilisgotan ug mga Pangutana diha sa Librarya sa Ebanghelyo.

Isaias 6: Pagbag-o pinaagi kang Jesukristo ug sa Iyang Pag-ula

Pwede nimong ikonsiderar ang pagtudlo bahin ni Jesukristo pinaagi sa simbolo nga gigamit sa Isaias 6. Pwede kang magpakita og duha ka hulagway nga nagpakita sa wala pa ug human mahitabo ang usa ka butang, sama sa usa ka hulagway sa sakyanan sa wala pa ug human mahugasi.

Ikonsiderar ang pag-summarize sa Isaias 6:1–4 pinaagi sa pagpasabot nga nakakitag panan-awon si Isaias diin nagtindog siya atubangan sa Ginoo. Gisulayan ni Isaias sa paghulagway ang gahom ug himaya nga iyang gibati sa presensiya sa Dios.

Dapita ang mga estudyante sa pagbasa sa Isaias 6:5 ug pangitaa kon unsay gibati ni Isaias sa presensiya sa Ginoo.

• Sa unsang mga paagi nga mibati ka og sama kang Isaias?

Dayon pwedeng tun-an sa mga estudyante ang Isaias 6:6–10, nga pangitaon ang mga hulagway ug hugpong sa mga pulong nga nagtudlo nila bahin sa kon sa unsang paagi kita mausab pinaagi ni Jesukristo ug sa Iyang Pag-ula. Ila tingali ipasabot kon sa unsang paagi ang altar nagpahinumdom kanato sa sakripisyo ni Jesukristo (tan-aw sa bersikulo 6), kon sa unsang paagi ang pagdapat sa mga ngabil nagpahinumdom nato sa gahom sa pagputli ni Jesukristo (tan-awa sa bersikulo 7), o sa unsang paagi ang tubag ni Isaias sa bersikulo 8 nagpahinumdom nato sa tubag ni Jesukristo sa Langitnong Amahan dihang didto pa siya sa kinabuhi sa wala pa dinhi nga kinabuhi (tan-awa sa Abraham 3:27).

Samtang ipakigbahin sa mga estudyante sa ilang nadiskobrehan, tabangi sila sa pag-ila sa usa ka kamatuoran, sama sa Pinaagi ni Jesukristo ug sa Iyang Pag-ula, mahimo kong mausab ug mahimong limpyo.

• Sa unsang paagi ang kasinatian ni Isaias uban kang Jesukristo ug sa Iyang Pag-ula maghatag og paglaom sa usa ka tawo nga tingali mibati nga dili takos o dili kwalipikado?

• Nga dili ipakigbahin ang bisan unsa nga personal ra kaayo, sa unsang paagi ka nabag-o pinaagi ni Jesukristo ug sa Iyang Pag-ula?

Ikonsiderar tingali nimo ang pagtabang sa mga estudyante nga makita kon sa unsang paagi nga personal nga makasinati sa gahom sa pag-ula ni Jesukristo mopadako sa atong tinguha sa paghimo sa Iyang kabubut-on. Pwedeng itandi sa mga estudyante ang unang gibati ni Isaias diha sa bersikulo 5 (“Pagkaalaot ko! Wala akoy paglaom”) ngadto sa iyang tubag sa pagdapit sa Ginoo diha sa bersikulo 8 (“Ania ako; Ipadala ako”). Pwedeng ipakigbahin sa mga estudyante kon nganong ang pagsinati sa gahom sa pag-ula ni Jesukristo mopadako sa atong tinguha sa pagbuhat sa Iyang kabubut-on, o pwede nilang ipakigbahin ang mga ehemplo gikan sa kasulatan o sa ilang mga kaila nga nagpakita niini nga kausaban sa tinguha.