“Pagpangita og mga Tubag sa Imong mga Pangutana,” Mga Hilisgotan ug mga Pangutana (2023)
Pagpangita og mga Tubag sa Imong mga Pangutana
Pasiuna
Dugay pa kaayo nga si Joseph Smith miluhod sa pag-ampo didto sa Sagradong Kakahoyan, siya nakapahimutang na sa pundasyon alang sa iyang espirituhanong pagtubo. Siya migahin og daghang mga bulan sa pagtambong og mga serbisyo sa pagsimba, pagbasa sa Biblia, ug sa pag-apil sa mga pag-ampo sa pamilya. Nakigsulti siya ngadto sa mga sakop sa iyang pamilya, lakip ang pipila kinsa madudahon og tinukod nga relihiyon. Si Joseph kinahanglan nga maningkamot sa pagpangita og mga tubag sa iyang mga pangutana. Sa kataposan, gitubag sa Dios ang pag-ampo ni Joseph. Apan ang Unang Panan-awon wala mitubag sa tanang mga pangutana ni Joseph. Alang ni Joseph, ang pagpangita og mga tubag usa ka tibuok kinabuhi nga pagpangita.
Karon, ang impormasyon mahitungod sa kasaysayan sa Ang Simbahan ni Jesukristo sa mga Santos sa Ulahing mga Adlaw mas daling makuha kay sa kaniadto. Kini mahimong usa ka dako kaayong panalangin, apan kini dili sa kanunay masayon ang pagkahibalo hain sa mga tinubdan ang kasaligan. Ug pipila sa mga butang nga atong nakat-onan mahimong mopasaka og malisod nga mga pangutana. Nakamatikod si Elder Dieter F. Uchtdorf nga ang “uban tingali mobati og kaulaw o ka dili takos tungod kay aduna silay pagduki-duki nga mga pangutana mahitungod sa ebanghelyo, apan dili sila kinahanglan nga mobati niana nga paagi.” Siya mitudlo, “Ang pagpangutana dili timailhan sa kahuyang; usa kini ka pasiuna sa paglambo.”1 Ang mga artikulo niini nga kapanguhaan nagtanyag og daghang mga sugyot nga makatabang kanimo sa pagkaplag og kalinaw samtang ikaw nangita sa mga tubag sa imong mga pangutana.