“Pagmapailobon sa Imong Kaugalingon ug sa Uban,” Mga Hilisgotan ug mga Pangutana (2023)

Imahe

duha ka babaye nag-istoryahanay sa simbahan

Pagpangita og mga Tubag sa Imong mga Pangutana

Pagmapailobon sa Imong Kaugalingon ug sa Uban

Ang unang mga Santos dihay duol kaayo nga pagtan-aw sa hulagway ni Joseph Smith ug sa Pagpahiuli. Nasaksihan nila ang mga milagro––mga paghubad, mga pagpang-ayo, ug mga panan-awon. Nakita usab nila ang mga hagit, mga sayop, ug mga kapakyasan. Nakat-onan nila ang pagsunod sa propeta uban ang “pagpailob ug hugot nga pagtuo.”¹

Si Elder Jeffrey R. Holland mitudlo: “Mao nga pagmapailubon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lamang sa Iyang Bugtong hingpit nga Anak, ang dili hingpit nga mga tawo mao ang gikatambayayong sa Dios.” Nagtawag kanato si Elder Holland sa “pagmapailubon, ug pagmabination ug pagmapasayloon” ngadto sa usag usa.² Usa ka ehemplo sa pagpaubos mao ang kasarang sa paghatag sa atong mapuslanong pagtagad ngadto sa usa ka butang sulod sa gilugway nga panahon samtang naglikay sa kahasol ug kasuko. Kini nagkinahanglan og pagpaubos, pagkamabination, ug taas nga pagsabot. Nagtubo kita sa hugot nga pagtuo samtang kita naggamit og pailob sa atong mga kaigsoonan ug sa atong mga kaugalingon. Hunahunaa ang mosunod nga mga baroganan:

Pagmapailubon sa imong kaugalingon. Kini makalibog o makasamok kon ikaw nahibalo og usa ka butang mahitungod sa Simbahan o sa kasaysayan niini nga nagbangi sa unsay imong nasabtan sa kaniadto. Tugoti ang imong kaugalingon og panahon sa pagtan-aw og isyu sa mas klaro nga paagi ug sa pagsabot og bag-o nga impormasyon. Padayon sa pagtuon ug pag-ampo. Kini mahimong mokabat og panahon sa dili pa ikaw mobati sama og ikaw nabalik diha sa lig-on nga kamatuoran. Kadto kinsa nakakita niini nga proseso makapamatuod nga kini nakapalig-on sa ilang pagkakabig ngadto sa ebanghelyo.
Pagmapailubon sa mga miyembro sa Simbahan. Walay miyembro sa Simbahan nga perpekto. Ang atong mga ward ug mga branch puno sa matinguhaong mga tumutuo kinsa kasagaran nga mapakyas sa pagtuman sa labing taas nga mga sumbanan sa ebanghelyo. Ang sama nga mga problema atong makaplagan sa kalibotan––eksklusibong gamay nga pundok sa tawo, kahakog, moral nga kahuyang, ug daghan pa––makaplagan taliwala sa mga Santos sa Ulahing mga Adlaw. Samtang kita nagsimba ug nag-uban sa pagserbisyo, atong masaksihan ang mga sayop ug mga kapakyasan sa usag usa. Kinahanglan motugot kita og lawak alang sa grasya sa Dios samtang ang uban naninguha sa pagpalambo, sama lamang nga kita nagkinahanglan sa ilang pailob uban sa atong maayo-tinud-anay nga mga paninguha.
Pagmapailubon uban niadtong kinsa gustong motabang. Kadtong nanlimbasog sa mga pangutana o walay kasigurohan kasagaran moduol ngadto sa mga sakop sa pamilya, mga higala, o lokal nga mga lider alang sa panabang. Sa daghang mga higayon, kini nga mga relasyon naghatag og kahamugaway ug suporta. Sa kasubo, usahay ang tawo nga atong giduol mahimong managang o madudahon o mapakyas sa pagpakita og taas nga pagsabot. Kini malisod sa pagmapailubon ngadto sa uban kon kita anaa sa higayon sa krisis. Apan sila nagkinahanglan sa atong pailob sama lamang nga kita nagkinahanglan sa ilang pailob.
Pagmapailubon sa mga lider sa Simbahan. Ang mga lider sa Simbahan kinsa gitawag sa pagdumala niini nga buhat mga matinuoron apan dili perpekto nga mga tawo. Naobserbahan ni Elder Dieter F. Uchtdorf nga “adunay mga higayon nga ang mga miyembro o mga lider sa Simbahan makahimo og sayop.”³ Kini tinuod sa kaniadto ug sa gihapon tinuod sa karon. Ang usa ka lider sa Simbahan tingali mosulti og usa ka butang nga motingob sa imong kapakyasan o pagbati nga nahibulag. Mahimong dili sila mopakita sa kalooy o pagsabot nga ikaw nagkinahanglan. Ang pagpakita og pailob ngadto sa mga lider wala magpasabot nga kita nag-uyon sa ilegal o abusado nga batasan. Apan kinahanglan atong ilugway ang suporta, gugma, ug pailob ngadto sa kinadaghanan sa mga lider sa Simbahan samtang sila yano ug dili perpekto nga nagtrabaho alang sa Zion.
Pagmapailubon sa tukma nga panahon sa Ginoo. Kon kita adunay mga pangutana mahitungod sa Simbahan, kasagaran kita mangayo og dali nga tubag. Mahimong kita naghunahuna nga kini motabang ang pagbasa sa tanan nga atong makaplagan mahitungod sa isyu sa walay pagsapayan sa tinubdan. O kita mahimong maghunahuna nga usa ka pag-ampo o usa ka miting uban sa lider sa Simbahan dali nga mosulbad sa atong mga pagbati. Apan ang pagkakaplag og kalinaw sa kasagaran usa ka taas nga proseso. Ang sayop nga pagkapares tali sa atong mga paglaom ug sa atong karon nga reyalidad makasakit. Sama ni Nephi, kita makakuha og kahupay sa pagkasayod, “nga ang [Dios] nahigugma sa iyang mga anak” bisan tuod kita “wala masayod sa kahulogan sa tanan nga mga butang.”⁴

Importanting mga kasulatan: Mga Taga-Roma 5:3–4; Alma 7:23; Doktrina ug mga Pakigsaad 21:5